كيف تكون سياسى مشهور

[جمال نصير]

كيف تكون سياسى مشهور

لو تحب تكون سياسى ..
ف الزمان دا..
بين شوية خلق تايهه ... فى الجهالة
او عقول هزلانه ضايعه .. ف الضلالة
عايشة عيشة كالديابة... وسط غابة..
كات ف يوم محسوبة أمة...
بين جيرانها
والنهارده... الامة تاهت...
بين نعالها..
بين ظروفها وبين مصيرها
عشوائية ف درب أعوج.. مش طريقها
والجهالة .. والرشاوى ..
والتدنى .. والوضاعة..
وكل حاجة عكس دينها ...
كان قانونها...
*****
لو تحب تكون سياسى .. ف الظروف دى
والحياة تاخدك .. تضمك
والعبيد بإشارة منك .. تحت أمرك
إبقى مجرم.. إنسى نفسك..
إنسى دينك .. حتى أهلك..
إنسى إن الرب شايفك.. او يحاسبك
دا السياسة لعبة تافهة ...
هىّ برضه أكيد بتبحث
عن تفاهتك..
*****
لو تحب تكون سياسى ف البلد دى..
يبقى عندك كام مهارة
ايد طويلة..ف الحرام
واللسان اكتر سفالة م الكلام
والشهامة روح دافنها تحت رجلك..
والرجولة .. تحت جلدك ..
وان ما كنش معاك ندالة
اشتريها.. ياما ناس شغلتها تبدع.. ف الندالة
تبقى ف عيون ال زيك..
دى الحضارة..
وان ماكنتش شخص حاقد.. والحقارة فيك بتلمع
وان ماكنش القلب إسود ... والقساوة فيك بتبدع
كاره الخلق وخالقها.. مش هتنفع
*****
لو تحب تكون سياسى ف الزمان دا..
شوف شوية ناس لمامة .. وتصاحبها..
وتعاشرها وترافقها..
يبقوا جنبك .. زى ظلك
لما تغلط ... راح يشيلوا الحمل عنك
لما تسرق.. راح تساندك
واما تتعب ... برضة راح يدوك ضهورهم..
لجل تركب..
كون ف ايدهم .. زى كيفهم
اوعى تشرد عن طريقهم
بالبجاحة يدهنوك
والقباحة .. يرسموك
وبكلام ما لهش معنى .. يشحنوك
*****
لو تاحب تكون سياسى
والجهالة يقولوا ثورى
ف البلد دى.. سب والعن
هات مسدس او طبنجة
خللى كل الناس تخافك
حرق .. احرق
نهب .. انهب
قتل .. اقتل
سرقة .. تسرق..
كل شغل البلطجية .. يبقى شغلك
*****
ف البلد دى..
لو تحب تكون سياسى..
فيه مبادئ..
يبقى كذبك .. زى اسمك
يبقى قلبك ..
زى نعلك
يبقى أهلك ..
زى أعدى عدو عندك..
شوف يا سيسى
او سياسى
كل حاجة ف البلد دى كأى حاجة
الطيابة .. كالخباثة
والرجولة .. كالانوثة..
والشهامة . . كالرجولة
والشيوخ العاقلة تاهت .. ف العيال
والضمير الحى ضايع .. في الضلال
والحرام .. زى الحلال
مش هتفرق لما تلعب بالسياسة
ما السياسة ف البلد دى كالنجاسة
والنجاسة .. مش حرام
واسألوا الازهر وجمعة
وللا مظهر والهلالى
وللا أمن الدولة – أقصد - ...
هو حزب النور وحبة م اللمام
أسألوا كل اللئام
هيقولولكم... اصل إسلامهم بكيفهم...
النجاسة .. مش حرام

*****
جمال نصير ... مايو 2013

 

[بن الريان @]

أستاذي الكريم الدكتور جمال
---------------------------------
تراءت لمحات الأحرف من بريق عينيها فيا له من شعاع لامع يبهر ويلج ولوج السفن على ربانه في شواطئ لا ترسوا تلك القوارب وأنما تراها العيون محملقه ومرتابه أين ما تمخر !
يا لها من طريق وأين تسير تلك القوارب الهشه بلا مجداف أومحرك قويم لماذا ؟
هنا لا بد أن نعرف ولو أننا نعرف ما ذا !
ماذا علنا فاعلين لتلك القوارب ؟
هنا ولو نصرخ ونقول لأنها........
لا تحمل أمتعه والشراع الباهت الجميل حئنذ لا يحملها لبر الأمان نسأل الله أن يكون يشملنا بعصمته وهدايته
كلمات من ذهب وراقيه
======================
ترفق شاعري بالنفس ولا تكون عليها والزمان وعناية الخالق فوق كل شئ
والعذر لخطوفي أخوك بو فارس​