{ طولت بآلي وخذهآ آليوم لك شكراً , / تأليفي !

[أم حور]

(( طولت بالي وخذها اليوم لك شكراً ما ينزل الراس دام الروح بي حية))


الجزء الثالث عشر


بيت أبو عبد العزيز – العين
يوم السبت
الساعة 9:00 صباحاً


موزة وأمها واصلين أمس المسا .. واليوم مربوشين بالعزيمة .. قرروا إييون يساعدون ميثة لأن بشكارتها محد .. الشباب كانوا متولفين حق الذباح .. والبنات في المطبخ يشتغلن ..
عيون سيف كانت طول الوقت ع موزة .. بس موزة من عقب اللي صار .. ما قامت ترمسه ولا تطالع صوبه ولمن يدش المطبخ تظهر منه ..

حصة: بلاج تظهرين م المطبخ كل ما دش سيف ..؟!
موزة: تدرين عقب اللي صار .. مكان فيه أخوج مب قاعدة فيه
حصة: هو أخويه صح .. بس إنتي غالية عليه وايد وبصراحة سيف غلطان وأنا معج ف كل اللي تسويه .. بس ها يسمى هروب .. جان المفروض تواجهينه باللي عرفتيه .. إنتي حتى نحن ما خليتينا نقول له شفيج .. وربي هالأسبوع حشرني كل يوم يسألني عنج يبا يعرف شفيج وليش ما ترمسينه ..
موزة: أنا أتحاشى أرمسه عشان ما أغلط عليه .. مب أنا يا حصه اللي ينلعب عليه .. مب أنا .. وربي موقف بايخ .. إنتي ما شفتي مايا كيف ترمس .. كأنها تدري إني أحبه وتبا تقهرني ..
روضة: الصراحة أنا انصدمت ف عميييه وايد .. حتى حمود كل ما أرمسه يقولي إنه يحبج .. وأونه عاد أنا وهو نخطط عشان تكونون حق بعض ..
موزة: ما شاء الله عليج .. ياهل وتفكرين فهالسوالف .. لا تخططين ولا غيره .. خليج بعيد عني أحسن ..

ميثة: مواااااااز .. موااااز فديتج ..
ظهرت موزة م المطبخ من الباب اللي يطلّع ع الحوش لأن ميثة كانت ف الحوش عند الشباب ..

موزة: هلا ميثاني .. تبين شي..؟!
ميثة: إذا ما عليج أمر روحي بدلي الصابون والفوط اللي ف ميلس الرياييل والحريم ..
موزة: إن شاء الله

سارت موزة صوب ميلس الحريم وبدلت الصابون والفوط .. وعقبها سارت صوب ميلس الرياييل .. دشت ميلس الرياييل وسارت صوب حجرة المغاسل .. بدلت الصابون والفوط .. ولمن يات تظهر تفاجأت بسيف يدش .. صكر الباب وتساند عليه .. تراجعت موزة ع ورا ونزلت راسها .. ما تبا تشوفه ..


لا تفتكر أني براضيك في يوم ولا بطلب رضاك
قررت برحل عن اراضيك وانهي المحبة بيني وياك
لن الرجاوي ضايعه فيك والقلب ما يتحمل خطاك
تلعب على الحبلين مابيك الله يسامحلك خطاياك
خلني عسى ربي يخليك واتبع هوى من قلبك يهواه
الله يسهلك خطاويك مارد أنا امشي على مشاك
خاين عهود اللي يداريك واللي رخص في الروح لرضاك
ماكنت أنا والله بخليك في يوم ولا اقدر أنساك

يا حبيبي ضاع الرجا فيك أرجوك اسمحلي وحياك
لاتفتكر إني براضيك في يوم ولا بطلب رضاك
قررت برحل عن أراضيك وانهي المحبة بيني وياك
لن الرجاوي ضايعه فيك والقلب ما يتحمل خطاك


سيف: شحالج موزتي ..؟!
موزة: بخير .. لو سمحت أبا أظهر
سيف: مب قبل لا نرمس ..
موزة: ما عندنا شي نرمس فيه
سيف: لا عندنا .. وعندنا وايد بعد ..
موزة: أسمعك .. وياليت بسرعة لأن لو حد شافنا أحينه ما بيصير خير ..
سيف بعصبية: لا تستوين ياهل .. خلينا نعرف نتفاهم ..

جرب سيف صوب موزة اللي كانت زايغة من نظراته لها ..

سيف: صار لج كم يوم متغيرة عليه .. موزان أنا سويت شي ..؟!!

كانت موزة منقهرة منه وايد .. مب عارف شو مسوي .. لا وبعد يسألها بكل برود .. أنا سويت شي .. هبت موزة ف ويهه م العصبية .. والقهر اللي فيها

موزة: تبا تعرف ..؟! أوكي بخبرك .. تعرفها مايا ..

انصدم سيف أول ما سمع اسم مايا .. وموزة كملت رمستها ..

موزة: هيه تعرفها ما تروم تنكر .. بس اللي أريده يوصلك إنه إلا أنا يوم تبا توصلي تحطلك حدود وما تتعداها .. وجان تبا تلعب روح دّور لك ع وحده من هالخايسات اللي تعرفهن وإلعب عليها بس مب أنا تفهم يا أخ سيف ..

سيف جان منصدم من رمسة موزة ومن ردة فعلها وعشان جيه مب قادر يرد عليها ..


موزة: بصراحة أبداً ما توقعتك جيه .. صحيح ما صار بينا شي .. بس أنا ندمانة جد شعر راسي يوم إني فكرت فيك .. وآخرتها إتييني وحدة مثل هالخايسة تتشمت فيني .. لكن أنا أستاهل لأن أنا اللي حطيت عمري فهالموقف .. صج إنك ما تستاهل .. إنت حتى مجرد تفكير ما تستاهل .. حسافة .. وربي حسافة ..

طلعت موزة من حجرة المغاسل .. عقب ما خلت سيف ف صدمة كبيرة .. ومب قادر يرمس أو يقول أي شي ..!



الساعة 8 المسا


قبل شوية راحوا قوم موزة .. ورجعت حصة بيتهم وانتبهت ع سيف اللي واقف جدام البيت وسارت صوبه ..

حصة: ليش واقف هنيه ..؟!
سيف: كنت أشوف أهل ميثة وهم مروحين ..
حصة: انزين راحوا خلاص .. شو موقفنك بعد خل ندش ..!
سيف: مواز زعلانة مني ..؟!!
حصة بتفكير: زعلانة ..؟! ما أعتقد .. بس البنت كارهتنك من فوادها ..
سيف: هي قالت لج هالشي ..؟!
حصة: تعال خل نيلس وبقولك ..

دشوا البيت وساروا يقعدوا ف الحديقة ..

سيف: قولي عاد .. هي قالت لج إنها تكرهني ..؟!
حصة: لا .. بس لو أنا ف مكانها وإنت سويت فيني جيه .. شي طبيعي أكرهك ..
سيف: حصة أنا أحبها ..
حصة: تحبها ..؟! تصدق حتى أنا انخدعت فيك .. تحسبتك صج تحبها .. بس اكتشفت إنك ما تعرف تحب ياخوي ..
سيف: إمبلا أحبها .. شدراج إنتي فيني ..
حصة: تحبها .. وتروح تقول حق غيرها حياتي وحبي وقلبي وفديتج .. أي حب ها .. لا وبعد مب حق أي حد .. حق مايا .. مايا يا سيف .. بصراحة ما أعرف كيف تفكر .. شو تبا منها .. وإنت عارف شو نهاية هالعلاقة ..؟! وإلا بس شفتها صيدة وقلت خل نلعب ..
سيف: هي اللي كانت تلاحقني .. وما أدري من وين يابت رقمي .. وكانت دوم تتصل فيني ..
حصة: وإنت ما صدقت .. ع طول شبكت ..
سيف: يعني شو تبيني أسوي ..؟!
حصة: صح شو بتسوي .. بنت حلوة .. وأهم شي وناستك .. مب مشاعر الناس صارت لعبة .. وبعدين كيف قلبك يطاوعك تبين حق موزة إنك تحبها وتخلي البنت تتعلق فيك .. وإنت ترمس غيرها .. شلون قدرت ع جيه .. لو كنت صج تحبها .. مستحيل تسويها بس إنت ما تحبها يا سيف ..!
سيف: قلت لج أحبها احبها .. الله ياخذ ابليس .. أنا بس أبا أعرف موزة شلون درت إني أرمس مايا ..؟!
حصة: ليش مايا ما قالت لك ..؟!
سيف: شو تقول لي ..؟! وشو يخص مايا في السالفة ..؟!
حصة: مايا هي اللي قالت حق موزة عن اللي بينكم ..
سيف بصدمة: شو ..؟!!
حصة: تذكر لمن موزة كانت هنيه الأسبوع اللي طاف ..؟!
سيف: هيه
حصة: مايا كانت عندنا لمن حضرتك دقيت عليها والحبيبة ما قصرت حطت التليفون سبيكر وموزة وروضة كانوا هناك .. لا وموزة سمعت الرمسة كلها وعقب سألت مايا منو ها .. وقالت لها ها سيف .. سيف أخو حصة ..
سيف بصدمة: شو ..؟!
حصة: اللي سمعته .. وبعدين يا اخويه الغلط منك مب منها .. دامك تحب موزان وتبيها .. وعلى فرض إن علاقتك فيها كانت قبل لا تتقرب من موزان .. المفروض تتركها .. ولا تتصل فيها ..
سيف وهو يضرب الطاولة بالقو ..: هالخايسة ما عليه إن ما علمتها الأدب .. ما أكون ولد أبويه ..
حصة: ودام تعرفها خايسة .. شو يخليك تتواصل وياها وتظهر معها ؟!! سيف: شو شو شو .. أظهر وياها ..؟! منو قالج هالشي ؟!
حصة: مايا قالت شو .. أونه جم مرة عزمتها ع العشا برع .. لا وغير جيه ما تقدر ترقد قبل لا ترمسها وتسمع صوتها ..
سيف: طالعوا الجذابة .. تخسي إلا هي أعزمها ع العشا .. كل اللي بينا اتصالات وهدايا .. وأحياناً أشوفها لمن إتيي بيتنا ..
حصة: عاد إنت ومايا تصطفلون .. بس بليز سواف خلك بعيد عن موزان ..
سيف: حصة رمسيها فهميها إني احبها وأبيها .. وإن هالخايسة تجذب وربي تجذب .. عمري ما ظهرت وياها ف السيارة .. شو بتتبلى عليه هاللوث ..
حصة: بحاول يا سيف .. مع إن موزة من قبل تعرف إنك راعي بنات وسوالف وأنا كنت أدافع عنك .. واحينه عقب ما صار هالموقف وياها أشك إنها تسمع مني شي .. وما أظن بتقدر تسامحك ع اللي سويته فيها .. عيل وينه اللي يقول السوالف البطالية خليتها من زمان .. جان زين لو كنت صادق ياخويه .. ضيعت درة ما تتعوض من إيدك وأحينه تحمل ..
سيف: بتحمل أي شي .. بس موزة ترجع لي .. أنا مستحيل أخليها تضيع مني خصوصاً أحينه لمن دريت إنها تحبني .. أو ع الأقل ف قلبها شي صوبي .. لا تنسين ترمسينها يا حصة .. وهاللوث اللي اسمها مايا دواها عندي ..

نشت حصة بتروح داخل .. وسيف ركب سيارته ودق حق مايا .. عطاها رمسة تخليها تكره اليوم اللي انولدت فيه وصكر التليفون ف ويهها ..!!!



بيت أبو حميد
يوم الإثنين
الساعة 5:30 عصراً


أحمد يالس ف دار موزة يسألها عن حصة .. وهي ضربها ملل من كثر ما تجاوب ع أسئلته ..

موزة: أوووف .. أحمدوو خلاص عاد .. ترا صدج صدج مليييت
أحمد: إنزين بخليج ف حالج بس قبل قوليلي .. إنتي رمستيها عني ..؟!
موزة: لا ما رمستها .. خبرتك كنا مرتبشين ما وحيت أيلس وياها بروحنا
أحمد: يعني أبداً ما رمستوا عني ..؟! ما طريتوني ف سوالفكم ..؟! هي ما سألت أنا ليش ما ييت وياكم ..؟!!
موزة: لا حول ولا قوة إلا بالله .. قلت لك ما رمسنا أبداً ولا طريناك ولا يبنا اسمك .. ما أذكر إن يلسنا بروحنا عشان أفتح معها الموضوع ..
أحمد: جان تبي مستعد أوديج العين أحين عشان ترمسينها ..
موزة: لا والله .. ما أبا شكراً أصلاً أنا العين مليت منها .. إذا بسير ف اعرف إني سايرة غصب عني
أحمد: لا والله .. شو اللي تغير ..؟! قبل تروحين أسبوع وأسبوعين وشهر .. لا وبعد لو مب أمي وإلا أبويه يتصلون فيج عشان تردين وإلا جان ما رديتي ..
موزة: بعد تدري من كثر ما أروح عفتها ..
أحمد: إنزين مواز بليز رمسيها .. شوفي وشو بتقولج .. أخافها تضيع شرات أختها
موزة: إنت احمد ربك إني ما قلت لها إنك تحب أختها .. وإلا جان الرفض بييك ع طبق من ذهب
أحمد: تصدقين .. أحس مشاعري صوب حصة غير عن مشاعري صوب مهرة ..
موزة: كيف غير بعد ..؟!
أحمد: ما أدري .. بس أحس إني صج صج أحب حصة .. في شي ف داخلي يتحرك لمن أشوفها .. أو أرمسها ..
موزة: ترمسها ...؟! وحضرتك متى رمستها ...؟!
أحمد: احم احم .. لمن كانت هنيه أيام عرس حميد ..
موزة: شت .. من ورايه .. والدبة ولا قالت لي ..
أحمد: بس ما قلنا شي .. رمسة عادية .. لا يروح تفكيرج بعيد
موزة: حتى لو .. يا عيب الشوم عليكووو .. لا إنته ولا هي تقولون لي .. ما عليه يا أحمدووو ما عليه ..
أحمد: بتذليني عاد .. ترا قلت لج احينه ..

دق جرس البيت .. ونش أحمد عشان يشوف منو .. وأول ما فتح الباب تفاجأ بالبنت اللي واقفة عند الباب .. ونورة من شافته تصنمت مكانها .. منو ها .. أول مرة تشوفه ..!

أحمد: هلا أختي بغيتي حد ..؟!!
نورة: السلام عليكم ..
أحمد: وعليكم السلام والرحمة
نورة: موزة هنييه ..
أحمد: هيه .. لحظة بس بزقرها لج ..

سار أحمد عند موزة يقولها إن بنت تبيها .. وموزة مستغربة منو ياينها .. بالعادة إذا حد من رفيجاتها يبي إييها يدق عليها أو يطرشلها مسج .. وأول ما ظهرت وشافت نورة تفاجأت ..

موزة: منوو .. نوااااااارة ...؟!! مستحييييييل
نورة: ليش مستحيل ..؟!!
موزة: شحالج فديتج شخبارج ..؟!
نورة: الحمدلله بخير .. شحالج إنتي ..؟!
موزة: الحمدلله طيبة .. دشي فديتج دشي ..


نورة: وفوز شحالها ..؟!!
موزة: الحمدلله .. الأسبوع اللي طاف كنت عندها
نورة: هيه .. فوز بتزورينها .. وإلا أنا لا مول محد إيي صوبي
موزة: عاد إنتي الله يهداج .. قاطعة .. حتى تليفونج مغلق ..
نورة: كانت عندي ظروف .. والحمدلله عدت ع خير ..
موزة: إلا صج .. اليوم الإثنين .. مب المفروض تكونين ف دبي ..؟!
نورة: لا خلاص لا دبي ولا غيرها .. صار لي فترة تركت الدراسة
موزة: ليش عاد ..؟!
نورة: ما ارتحت لوجودي هناك .. وبيني وبينج أنا مب حق الدراسة
موزة: الله يعينج يا نورة .. شكلج أول وحدة بتعرسين فينا ..
نورة: هيه جان بتخطبين لي أخوج ..
موزة: منو من خواني عاد ..؟!
نورة: هالوسيم اللي فتح لي الباب ..
موزة: هههههههههههه أحمد
نورة: ها أحمد .. تصدقين عاد أول ما شفته يبست مكاني لو مب هو قالي تبين شي وإلا أنا ذايبة
موزة: هههههههههه ما تيوزين عن سوالفج .. تدرين قبل لا تيين جان يرمسني عن وحده من معارفنا أونه يبيها .. وإلا لو قلبه خالي جان خطبناج له ..
نورة: شو هالحظ اللي عليه .. ما علييييه .. الله كريم
موزة: هههههههههه ربي يوفقج ويرزقج ع قد نيتج فديتج ..
نورة: آمين يارب .. الله يسمع منج.. تدرين عاد ولد عمي .. يبيني بس أنا ما أدري مب مرتاحة .. أحينه أكثر من 3 مرات خطبني .. وأنا رافضة ..!
موزة: ليش إنزين .. فيه شي مب زين ..؟!
نورة: لا بالعكس هو أحسن خوانه .. وغير جيه يحبني .. بس ما أعرف .. ما أحس إني أبا آخذ واحد م الأهل
موزة: ما تعرفين يمكن يكون هالريال أخير وأحسن .. إنتي صلي استخارة .. وإن شاء الله خير ..
نورة: يصير خير .. وإنتي قوليلي .. شخبار سيف العين ..؟!
موزة: يا أختي بلا سيف بلا بطيخ .. خليها على الله ..
نورة: ليش شو صار ..؟!
موزة: طاااااااااار طيره ..
نورة: لا والله
موزة: هيه .. أحينه أبا أزهب عمريه حق الدراسة ما باجي إلا جم يوم .. وبندا الفصل الثاني ..
نورة: شو الأسبوع الياي يبدا دوامكم ..؟!
موزة: هيه
نورة: وفوز شحالها .. ماشي يديد ف حياتها ..؟!! ولهانة عليها واااااايد
موزة: فواز انخطبت ..
نورة: تمزحين ..؟!
موزة: ما أمزح .. صج انخطبت ..
نورة: ووافقت ..؟!
موزة: لا ..
نورة: تصدقين آخر مرة رمستها فيها .. كنت أقولها عن خلوف أخويه .. مصر إلا يبيها ما أدري شو سوت له هالبنت .. يهلوس فيها يا موزة ..
موزة: ههههههههه صج والله
نورة: هيه .. حتى كسر خاطريه .. ما عرفت شو أسوي .. ولمن قلت له إنها مب موافقة .. قال مب بكيفها .. أول ما تخلص دراسة بيروح يخطبها ..
موزة: مستحيل ..؟! يخطبها وهي ما تبيه ..؟!
نورة: مب هو يدري إن رفضها مب عشان هو مب زين .. هي رافضة الفكرة م الأساس
موزة: ما أدري شو سبب الرفض .. كل ما أرمسها تسكت أو تغير السالفة .. بس أنا أحس هالرفض وراه شي كبير ولازم أعرفه ..
نورة: إيلسي معها .. واسأليها .. هي أصلا من أيام المدرسة حالتها مب طبيعية ..
موزة: إن شاء الله أول ما يبدا الدوام بفاتحها بالموضوع ..
نورة: مممممم يمكن هي ترفض لأنها حاطة أمل إن محمد يحبها ..؟!!
موزة: ما أدري .. بس هي كانت متفقة ويانا تنساه .. وسارت عندهم قبل فترة ويات وحده ثانية تقول أونها ما تقدر تنساه ..
نورة: معقولة .. مرة ثانية يرد يدش حياتها ..؟!
موزة: حاولت أرمسها .. وكله تقولي خلاص أصلاً هي بروحها ما تبيه .. بس فوز وأعرفها هالرمسة تقولها عشان تقص علينا فيها .. وف داخلها تتعذب ..
نورة: إذا كانت لين أحين تفكر ف محمد .. ف ها سبب مقنع إنها ترفض خلوف وترفض الشخص الثاني اللي يا يخطبها ..
موزة: برمسها لمن يبدا الداوم .. وبسألها ..
نورة: الله يوفقها ويسعدها يا رب ..
موزة: آمين

استأذنت موزة عشان تروح اتييب الفوالة حق نورة.. ونورة يلست تفكر ف أحمد .. ما شاء الله عليه وسييييييم .. عيني عليه باردة .. وعقبها يات موزة وتقهويوا وكملوا سوالفهم لين جريب أذان المغرب روحت نورة ...!


السكن الجامعي
الجمعة
الساعة 11:30 مساءاً

بداية الفصل الثاني

وقفت سيارتهم فوز جدام السكن الجامعي .. جان أخوها حمد يايبنها .. سلمت عليه ونزلت أغراضها ودشت ..
أول ما وصلت غرفتها .. كانت ميرة موجودة سلمن ع بعض .. ويلسن ياخذن العلوم من بعض ..

ميرة: دبه ليش تأخرتي ..؟!
فوز: ما تأخرت .. عادي .. ليش إنتي متى واصلة ..؟!
ميرة: أنا حليليه من الساعة 8 ونص مرتزة هنيه ..
فوز: فديتج والله .. وشو يلستي تسوين كل هالوقت ..؟!
ميرة: صليت وعقبها دشيت النت .. متعودة أقرا حق وحده تكتب ف المنتدى .. ويلست أقرا يديد كتاباتها وعقبها فتحت المسن ورمست علاوي ..
فوز: ما أدري إنج بتيين من وقت وإلا جان قلت حق حمد نطلع من وقت ..
ميرة: ترا أنا لازم أظهر من وقت .. لأن المسافة بعيدة وأحاتي أخويه بعد يوم بيرد ..
فوز بتفكير: مممممم أنا عندي اقتراح وما أدري إذا بتوافقيني عليه
ميرة: شو هالإقتراح ..؟!
فوز: تقولي حق أخوج يوصلج بيتنا وعقبها نروح مع بعض .. ترا إنتو لمن تييون تمرون ف دربكم صوبنا .. ف بدل لا يمشي هالمسافة كلها ويتعب روحه 4 ساعات ف الطريج .. يوصلج نص الطريج .. وعقبها تروحين ويايه ..
ميرة: ما أدري .. اخاف أثقل عليكم .. وبعدين ما أعتقد عبدالله بيوافق ..
فوز: إنتي خذي رايه .. وترا انا مب دوم أروح ويا حمد .. مرة حمد ومرة أبويه وأحيانا ف الباص ..
ميرة: بشوفه .. لأن هو قرر يعرس وأكيد بيرتبش ف زواجه .. وعلاوي محد ..
فوز: جان زين والله لو يوافق .. بتونسيني ف الطريج .. حمد أخويه طول الطريق ميود تليفونه إذا مب يرمس خطيبته .. يتراسلون بالمسجات .. وأنا حليلي ساكتة .. أو ميودة التليفون وأكتب
ميرة: برمسه الأسبوع الياي .. وإن شاء الله يوافق ..
فوز: وأحينه خل نتعشى يايبتلج معكرونة بالباشميل .. وعقب فتيلي علومج ..
ميرة: وعلومج إنتي بعد ..
فوز: ولا يهمج ..

زهبن السفرة .. وفوز دقت حق خلود وعزمتها هي وشهد عشان إييون يتعشون وياهن .. وصلن البنات وتعشن وسولفن وعقبها خلود ورفيجتها استأذنن ..

ميرة: ما توقعتج تعزمين خلود وشهد ..
فوز: ليش ..؟! عادي
ميرة: فوادج ما يعورج ...؟!
فوز: بتصدقين لو قلت لج إن وجودهن ويا بعض مب مأثر فيني
ميرة: يعني ما تحسين بغيره ..؟!
فوز بابتسامة: وليش أغار ..؟! فديتج هي حصلت البنت اللي تفهمها وأنا بعد ..
ميرة: أدري .. بس حتى لو .. لازم يكون ف خاطرج شي ..
فوز: ما فخاطريه شي صوبها .. أنا نسيتها ونسيت كل شي يربطني فيها .. تصدقين أول ما سرت البيت طلعت كل رسايلها وشقيتهم .. أنا محيتها من حياتي كوحده من الناس المميزين اللي فيها ..
ميرة: أقولج شي ..؟!
فوز: شو ..
ميرة: هي الخسرانة .. وإلا منو الغبي اللي يفرط ف وحده شراتج
فوز: تسلمين يالغلا .. أوبس نسيت ..
ميرة :شو نسيتي ..؟!
فوز: تعالي براويج ..
ميرة: شو ..؟!!

فتحت فوز اللاب توب .. ودشت المنتدى .. ويلست تحكي حق ميرة عن الطالب اللي يطرشلها مسجات ..

ميرة: ورد عليج .. أقصد قالج منو هو ..؟!!
فوز: هيه .. اقري هالرسالة ..

" أنا مقدر موقفج .. وعارف شو سبب هالعصبية .. بس صدقيني أنا مب ياي ألعب .. أنا صادق ف كل كلمة قلتها لج .. أنا أحبج وأبيج ع سنة الله ورسوله .. وما أبي منج شي .. بس أمل صغير .. إن باجر لي خطبتج توافقين ..
أكيد تبين تعرفين منو أنا .. أنا " سلطان" .. ومثل ما قلت لج أبي هالشي يكون بيني وبينج ..!

ميرة: شو هالجرأة ..؟! أونه سلطان .. شو سلطان العرب
فوز: حرام عليج شو تبيه ..
ميرة: أوووه بعد تدافعين عنه ..
فوز: لا طبعاً شو أدافع عنه .. ما يخصني فيه ..
ميرة: ورديتي عليه ..؟!!
فوز: لا .. وأحينه مطرش رسالة .. خل نفتحها نشوف شو فيها ..
ميرة: أوكي ..

" السلام عليكم ورحمة الله وبركاته .. شحالج فوز ..؟! شو الإجازة وياج ..؟! ما رديتي علي .. أنا عندي كلام وايد أبا أقوله .. ويمكن إنتي ما رديتي لأنج شاكة فيني .. ع بالج أنا ألعب وياج .. وتقولين أنا ما اعرفج .. تبيني أقولج منو إنتي ..؟!!

فوز بنت محمد بن علي الـ ..........!
مولودة 7/7/1989
عمرج 18 سنة ..
تسكنين فـ .......... منطقة .........!
مريتي بتجربة حب كانت قاسية عليج وايد .. والسبب إن الطرف الثاني ما يبادلج مشاعرج .. بس هالشي مب نهاية الدنيا .. وأصابع إيدج مب متساوية ..!"

ميرة: شو ها ..؟! شدراه بكل هالتفاصيل ..؟!!
فوز: شدراني عنه ..؟! مب عارفة شو أسوي وياه ...؟!!
ميرة: إنتي رمستي حد عن موضوع محمد ف الكلية ..؟!
فوز: كنا نلعب لعبة جرأة وصراحة .. وبنت سألتني إذا حبيت قبل .. وجاوبتها بس ما عطيتها تفاصيل ..
ميرة: منو هالبنت ..!؟
فوز: اسمها هبه .. وياي ف نفس الكلاس ..
ميرة: معقولة تكون هي اللي خبرته ..؟!
فوز: ما أدري .. بس
ميرة: بس شو ..؟!!
فوز: ع نهاية الفصل الأول .. امتحانات الفاينل تحيدين لمن قلت لج بروح أودي المذكرة حق بنت ف الوحدة اللي حذالنا ..!
ميرة: هيه .. سرتي وتأخرتي وعقب قلتي إن رفيجتج كانت تبيج ف موضوع ..
فوز: تدرين شو جان الموضوع ..؟!
ميرة: شو ..؟!
فوز: ياربي كيف طافت عليه هالسالفة ..
ميرة: فوز .. قولي عاد شووو ..؟!

فوز ..: دقيت الباب .. ودشيت محد جان موجود غيرها ..

هبه: هلا فواز شحالج ..؟!
فوز: الحمدلله بخير ..
هبه: شو خلصتي مذاكرة ..؟!
فوز: لا والله .. لسه جدامي جم صفحة .. وإنتي ..؟!
هبه: أنا بعد لسه ما خلصت ..
فوز: المهم عيل ما بعطلج .. هاج المذكرة ..
هبه: ايلسي بنسولف شوية ..
فوز: ترا الإمتحان باجر .. شو أيلس ..
هبه: بس عاد باجر آخر إمتحان .. يعني ما بنشوفج لأني عقب الإمتحان ع طول بروح ..
فوز: عشان خاطرج بيلس بس شوية ..
هبه: تسلميلي والله ..

وصلها مسج .. طالعتني بنظرة غريبة وعقب ردت عليه .. ولمن تفيجت .. كانت تطالعني بنظرات غريبة .. كأنها تبا تقول شي ومب عارفة كيف تقوله ..

هبه: فوز ..
فوز: هلا ..
هبه: أبا أسألج سؤال .. وتجاوبيني بكل صراحة ..
فوز: اسألي ..
هبه: لا تفهميني غلط .. هو سؤال محرج شوية .. بس إنتي جاوبي
فوز: أوكي .. اسألي شفيج ..
هبه: شو شعورج تجاه سلطان ..؟!!
فوز باستغراب: سلطان ..؟! منو سلطان ..؟!
هبه: ما عندنا غير سلطان واحد ف الكلاس .. اللي طلب منج اللاب توب لمن جان عندهم عرض ..
فوز: هييييييييه تذكرته .. شفيه ..
هبه: شو شفيه بعد .. اسألج شو شعورج صوبه ..
فوز: هههههههههههه سلطان .. شو شعوري بعد .. عادي
هبه: يعني ما تحسين بشي صوبه ..؟!
فوز: لا .. بشو بحس .. ما أعرفه ولا يعرفني .. ولا شفت شكله زين .. كل اللي أتذكره سالفة اللاب توب لمن شافني يايبة اللاب توب ودش الكلاس وقالي لو سمحتي باجر عندنا عرض وأبا اللاب توب .. وقلت له إن شاء الله .. واليوم الثاني شغلت اللاب توب عشان يعرضون عليه ولمن خلصوا قالي شكراً قلتله عفواً .. بس
هبه: أهاا .. أوكي
فوز: بس إنتي ليش تسألين ..؟!
هبه: ولا شي ..
فوز: لا فيه شي .. منو قالج تسألين هالسؤال ..؟!
هبه: بنت ..
فوز: بنت .. منو هالبنت ..؟!
هبه: بنت مب نفس تخصصنا .. بس هي م الجامعة
فوز: وهالبنت شدراها فيني أنا وفي الأخ سلطان ..؟!
هبه: لا تسألين فوز .. هي قالت لي اسألج وأنا سألتج وإنتي جاوبتي ..
فوز: أوكي ما بتقولين منو قالج تسألين .. قوليلي ليش السؤال ..؟!
هبه: بقولج بس قبل لازم اسأل البنت .. يمكن ما تبيج تعرفي
فوز: أحينه إنتي ميلستني هنيه وترمسيني ف شي يخصني وما تبيني أعرف .. عيل م البداية لو ما قلتي وخلصنا..
هبه: لا تعصبين يا فوز .. بس بصراحة هو يعني .. ملاحظ إنج تطالعي عليه ..
فوز: شو شو شو .. أنا أطالع عليه .. لا والله وايد شايف نفسه ها .. أونه شو أطالع عليه ..
هبه : أكيد الولد غرضه شريف يا فوز .. ويمكن مرمس أهله عنج يعني .. ما أعتقد إنه يلعب ..
فوز: والله عاد يلعب ما يلعب ما يخصني .. أنا بسير تأخرت..
هبه: أوكي ..


ميرة: دام جيه .. ف أكيد هي اللي وصلت له هالمعلومات عنج
فوز: إنزين ليش تسوي فيني جيه ..؟!
ميرة: تغار منج .. تكرهج ..
فوز: تغار مني .. وتكرهني .. ليش شو مسوية لها ..؟!
ميرة: ما أدري ..
فوز: ما اعتقد جيه ..
ميرة: انزين رمسيها ..
فوز: هو ف الرسايل يقول ما يبي حد يعرف .. يعني أكيد هي بعد ما تعرف .. وأخاف أقولها وتصير مشاكل ..
ميرة: يعني شو بتسكتين عنها ..؟!
فوز: هيه ..
ميرة: إنزين تهقين .. يحبج صج ..؟!
فوز: ف هالزمن مافي شي اسمه حب ..
ميرة: لا عاد فيه بس قولي نسبة ضئيلة ..
فوز: وإنتي تشوفين إن واحد جيه .. حبه صادق ..؟!
ميرة: ليش لا ..؟!
فوز: طريقته غلط ..
ميرة: يمكن ما حصل طريقة غير يوصلج فيها إنه يحبج ..
فوز: تدرين .. ف آخر إمتحان .. وأنا مروحة صادفته .. وجان يطالعني بنظرات غريبة .. استغربته ومشيت عنه
ميرة: أكيد يحبج .. لو ما يحبج ما بيروح يسأل عنج وإييب المعلومات اللي قالها ..
فوز: خل يحبني .. شو أسويله يعني ..
ميرة: عطيه ويه
فوز: لا والله .. أقول ميرووووووه إذا عندج سالفة قوليها .. ما عندج .. خلينا نرقد ترا الوقت تآخر .. صارت الساعة 2 إلا ربع
ميرة: عندي ..
فوز: شو ..؟!
ميرة: في الإجازة أخويه رمسني .. اونه رفيجه يبا يخطبني ..
فوز: منو رفيجه .. ومنو م خوانج ..؟!
ميرة: علي .. رفيجه راشد هاك اللي خبرتج عن الحركة اللي سواها
فوز: أها يعني طلع صج يحبج ويبيج ..
ميرة: هيه .. وعلاوي رمسني وقالي يبا رأيي .. بس أنا مب عارفة واليوم دق عليه يسألني إذا قررت أو لا .. وقالي إنه رمس عبدالله وعبدالله موافق ..
فوز: وإنتي شو تحسين صوبه ..؟!
ميرة: فوووووز .. شهالسؤال .. إنتي تعرفين إني أحب سعيد ولد خالتيه ..
فوز: أدري .. إلا صج سعيد درا ..
ميرة: هيه درا .. وشكله ما تأثر .. يعني عادي عنده
فوز: اهاااا .. وإنتي شلون شفتي راشد .. ارتحتيله ..؟!
ميرة: علاوي يمدح فيه .. وأنا أقولج تفكيري كله عند سعيد
فوز: أنا أشوف تصلين استخارة أحسن ..
ميرة: بصلي وبشوف شو ..
فوز: الله يجدم اللي فيه الخير ..
ميرة: آمين يا رب ..
فوز: تدرين عاد .. انا بعد أخويه رمسني .. أخو خطيبته يبيني بس رفضت ..
ميرة: ليش ..؟!
فوز: لوايد أسباب .. أهمها ما أفكر ف شي اسمه زواج .. ثانيها أدري عن سوالفه واحد مب زين راعي بنات وعلاقات ..
ميرة: ياربي يا فوز أحينه كل ما واحد يخطبج بترفضينه .. بعد ما يصير جيه ..
يلست فوز تفكر ف رمسة ميرة .. إحساس بالألم وإحساس بالقهر وإحساس بالظلم .. أحاسيس مختلطة اجتاحتها ..
ميرة: فوز .. شفيج ..؟!
فوز: هاه .. ولاشي .. خل نرقد الساعة صارت 2 وربع ..
ميرة: أوكي ..

سارت فوز تتغسل .. وبالمرة راحت ع شبريتها ورقدت .. ورمسة ميرة تتردد ف بالها .. " ياربي يا فوز أحينه كل ما واحد يخطبج بترفضينه " .." ياربي يا فوز أحينه كل ما واحد يخطبج بترفضينه".....!!!!!!


نهاية الجزء
ترقبوا الجزء الرابع عشر​

 

[ٲلآمپراطۉرھ]

صحححِ لسسآإنً قآيلهَآ ,

تسَلمينِ دبوؤهً ع ألطرح ,ً

مآإتقصصريينُ وآللهً’

يزآجُ آللهً ألف خيرً , لـآهًنتيً , ,

 

[[ود]]

المبدعة Nadoosh تألقت في صياغة تأليف القصة
الواقعية ، أتمنى لك مزيدا من التقدم والرقي

واصلي نحن لك متابعون وننتظر الجديد

 

[أم حور]

صحححِ لسسآإنً قآيلهَآ ,

تسَلمينِ دبوؤهً ع ألطرح ,ً

مآإتقصصريينُ وآللهً’

يزآجُ آللهً ألف خيرً , لـآهًنتيً , ,

الإمبرآطورة ,

أشكر لج مرورج , وخلج دوم متآبعتنآ ,
تسلمين لي !​

 

[أم حور]

المبدعة Nadoosh تألقت في صياغة تأليف القصة
الواقعية ، أتمنى لك مزيدا من التقدم والرقي

واصلي نحن لك متابعون وننتظر الجديد

ود ~

شآكرة لكِ مرورٌ عذب !
كوني بـ آلقرب دوماً
ودي !​

 

[أم حور]

(( طولت بالي وخذها اليوم لك شكراً ما ينزل الراس دام الروح بي حية))


الجزء الرابع عشر


شقة علي – بريطانيا
يوم السبت
الساعة 9:00 مساءاً


علي وسعيد يالسين ف الصالة .. يطالعون مباراة .. بس سعيد يفكر ف البنت اللي شافها .. رفيجة ميرة .. فوز .. اسمها حلو وايد .. صحيح ما شافها زين بس يذكر هيأتها كيف م بعيد .. أما علي ف تفكيره ف العضوة اللي وقفت كتاباتها .. تدش المنتدى بس ما تنزل شي يديد ..!

سعيد: راشد ما يا اليوم ..؟!
علي: لا ..
سعيد: ليش شو عنده ..؟!
علي: عنده امتحان باجر .. وقال بييلس ف شقته يذاكر ..
سعيد: إلا صج ميرة ما ردت عليك إذا موافقة ع راشد أو لا ..؟!
علي: لا ما ردت ..
سعيد: وايد تأخرت .. شو كل ها تفكر ..؟!
علي: ما أبا أضغط عليها .. خل تاخذ راحتها ..
سعيد: بس مب جيه عاد .. هي كلمة تبيه أو لا .. وبصراحة راشد ما ينرفض ..
علي: أدري إنه ما ينرفض .. بس البنت لها الحرية تختار اللي تباه
سعيد: لا والله .. أنا أشوف أحسن لها تنخطب .. خصوصاً دراستهم هناك مختلطة .. وما تدري شو ممكن يصير
علي: شفيك يا سعيد .. يعني إنت ما تعرف ميرة ..؟!! مستحيل تسوي أي شي غلط .. شهالتفكير البدائي ..؟!
سعيد: أنا تفكيري بدائي .. أحينه لأني أبا مصلحة أختك تفكيري صار بدائي ..
علي: هيه بدائي .. وأختي أدرى بمصلحتها .. وتعرف الصح م الغلط ما يحتاي نعلمها .. ليش لين أحينه تشوفها ميرة الصغيرة الياهل .. البنت كبرت وأحينه ف الجامعة ..
سعيد: كبرت وأحينه ف الجامعة .. بس إنت إذا عارف أختك وتدري إنها ما بتسوي شي غلط .. تضمن عيال الحرام..؟!
علي: إنت أصلا م البداية رافض فكرة الدراسة وأحينه عاد مصر إلا تنخطب .. شو ماشي ثقة .. أنا اختيه واثق منها ..


دق تليفون علي .. كانت ميرة اللي متصلة .. عشان تقوله ردها بخصوص موضوع راشد ..

ميرة: السلام عليكم
علي: وعليكم السلام والرحمة
ميرة: شحالك علاوي ..؟!
علي: بخير فديتج .. شحالج إنتي ..؟!
ميرة: الحمدلله طيبة ..
علي:قبل شوية .. كنا نرمس أنا وسعيد عنج ..
ميرة: ف شو ترمسون عاد ..؟!
علي: سعيد يسألني جان رديتي عليه بخصوص موضوع راشد أونج تأخرتي ..
ميرة: وليش مستعيل .. أحينه المعرس مب مستعيل كثر ولد خالتك
علي: شدراني عنه ..
ميرة: لو أخويه بقول يبا الفكة مني ..
علي: حرام عليج سعيد ما يفكر جيه .. بس شافج تأخرتي ع رفيجه ..
ميرة: إنزين أنا داقة أقولك إني صليت استخارة .. وشفت نفسي مب مرتاحة ..
علي: يعني شو ..؟!
ميرة: مب موافقة .. خله يشوف وحده غيري ..
علي: آخر قرار ..
ميرة: هيه .. علاوي أنا ورايه دراسة وما أبا أي شي ثاني يشغلني
علي: أوكي .. هاي حياتج وإنتي حرة فيها .. وأكيد كلنا تهمنا مصلحتج ..
ميرة: تسلم فديتك .. المهم بخليك أحينه .. سلم ع سعيد ..
علي: إن شاء الله .. ديري بالج ع روحج
ميرة: لا توصي ..
علي: ربي يحفظج ..
ميرة: مع السلامة ..

سعيد: أوف .. أسرع اتصال هذا ..
علي: ما أدري شفيها .. يبين عليها مضايجة من شي ..
سعيد: شقالت ..؟!
علي: مب موافقة ..
سعيد: ليش إن شاء الله .. راشد شو يعيبه ريال والنعم فيه ..
علي: ما يعيبه شي .. بس هي صلت استخارة وشافت نفسها مب مرتاحة ..
سعيد: شهالرمسة يا علي .. لو تلف الدنيا ما بتلاقي أحسن من راشد .. ودام الريال يحبها ويبيها ليش ترفضه ..
علي: وإنت ليش محتر جيه ..؟!
سعيد: مش محتر بس ميرة بعدها صغيرة وما تعرف مصلحتها
علي: لا والله .. وتبينا نحن ندلها ع مصلحتها .. لا يا سعيد .. أنا ما أقدر أغصب أختيه ع شي ما تباه .. باجر لي غصبناها وما ارتاحت ويا راشد .. بتقول نحن السبب .. خلها ع راحتها ..
سعيد: بذمتك إنت مقتنع بسبب رفضها ..؟!
علي: هيه ..
سعيد: بس أنا مش مقتنع .. هات تليفونك ..
علي: شو تبا فيه ..
سعيد: عطني إياه .. شو بآكله .. بشوف شي ..
علي: هاك ..

خذ سعيد تليفونه وظهر خاري الشقة .. عقب ما طرش رسالة فيها رقم ميرة من تليفون علي ع رقمه .. وعلي مستغرب ليش سعيد معصب من رفض ميرة لراشد .. جان بيتصل حق راشد يقوله بس عقب تذكر إن عنده امتحان ويخاف إن موضوع الرفض يأثر فيه .. وقرر باجر ف الكلية يقوله ..

أما سعيد .. ف أول ما ظهر من الشقة .. سار ييلس ف الحديقة .. الجو جان بارد م الخاطر .. جان عز الشتاء ف بريطانيا .. يود تليفونه ودق حق ميرة ..!!!


السكن الجامعي
يوم السبت
الساعة 1:30 بعد منتصف الليل


ميرة مضايجة وايد .. والسبب استعجال سعيد ع ردها .. عقب ما درت إن سعيد صج مب مهتم .. حست نفسها إنها ندمت ع قرار الرفض مع إن قرارها جان باقتناع ..

فوز: غريبة بسرعة بندتي عن أخوج .. بالعادة وايد تهذربين ..؟!
ميرة: مضايجة يا فوز ..
فوز: شفيج ..؟!
ميرة: خل نظهر خاري ..
فوز: أوكي ..
ظهرن فوز وميرة برع الغرفة .. ويلسن يرمسن ..

فوز: مب فاهمتنج يا ميرة ..؟!
ميرة: فوز أنا أحب سعيد .. بس دام سعيد مب مهتم .. ما راح تفرق عندي إذا وافقت ع راشد أو غيره ..
فوز: لا فديتج بتفرق .. لأنج ما يصير توافقين ع أي حد وإنتي تحبين سعيد .. أول شي لازم تنسينه عشان تقدرين تعيشين مع غيره
ميرة: معج حق يا فوز .. بس ما أدري ..
فوز: جأن تليفوني يدق .. أحين بييج ..

دشت فوز الغرفة وسارت صوب التليفون وردت بسرعة عقب ما شافت إن الرقم رقم بريطانيا ..

فوز: هلا والله بالغلا ..
سعيد: السلام عليكم
فوز باستغراب: وعليكم السلام والرحمة .. السموحة منك تحسبت أختيه داقه ..
سعيد: حصل خير ..
فوز: منو بغيت ..؟؟!
سعيد: منو إنتي ..؟!
فوز: إنت اللي منو .. داق عليه وتسأل منو أنا ..؟!!
سعيد: أنا مش داق عليج .. أنا داق ع بنت خالتيه ..
فوز: أخويه الظاهر إنك غلطان ..
سعيد: مش غلطان ..

فوز بهمس: اللهم طولج يا روح ..

ميرة اللي يات من برع: بلاج فواز ..؟!!
فوز: ها واحد داق عليه .. أونه يبا بنت خالته .. أقوله غلطان يقولي مب غلطان .. شو أسويله ..؟!!

سعيد: آلوووو .. وين رحتي .. آآلووو لو سمحتي ..
فوز: نعم شو تبا ..؟!
سعيد: مب ها تليفون ميرة ..؟!!
فوز: هاه ..

انتبهت ميرة إن التليفون اللي محطوط ع الطاولة تليفون فوز ..

ميرة: فواز ها تليفوني ..
فوز: شووو ..؟!!!

فرت فوز التليفون ف ويه ميره م الفشلة .. وميرة نقعت م الضحك عليها ..

فوز: صج سخيفة .. ما عليج .. رمسي ها اللي يبيج وعقب بتشوفين شو بسويلج ..

ظهرت فوز م الغرفة .. وميرة ردت ع سعيد اللي يتريا حد يرمسه .. عقب ما سمع الحوار اللي دار بين فوز وميرة ..

ميرة: آلو ..
سعيد: هلا ميرة شحالج ..؟!
ميرة باستغراب:منو سعيد .. أنا الحمدلله بخير .. شحالك إنته..؟!
سعيد: الحمدلله بخير وعافية ..
ميرة: غريبة داق عليه .. خير سعيد صاير شي .. قبل شوية مرمسة علاوي .. جان بخير .. شو مستوي ..؟!
سعيد: لا ما صاير شي لا تخافي .. وعلاوي ما يدري إني خذيت رقمج وأرمسج أحينه ..
ميرة: ليش فيه شي ..؟!
سعيد: هيه أبا أرمسج ف سالفة .. بس قبل قوليلي منو البنت اللي ردت عليه ..؟!
ميرة: رفيجتي فوز ..
سعيد: ورفيجتج ليش ترد ع تليفونج ..؟!
ميرة: تحسبته تليفونها ..
سعيد: لا والله ..
ميرة: كنت أبا أسوي فيها مقلب .. ف حطيت نغمة تليفوني نفس نغمتها .. وأنا وهي عندنا نفس التليفون ..
سعيد: أهااا .. عيل اعتذريلي منها ..
ميرة: إن شاء الله .. وأحينه قولي ف شو تبا ترمسنيه ..؟!
سعيد: ميرة ..
ميرة: هلا ..
سعيد: ليش رفضتي راشد ..؟!
ميرة باستغراب: ما فهمتك .. إنت تسألني عن سبب الرفض ..؟!! أو تحاسبني لأني رفضته ..؟!
سعيد: شو خلاج ترفضينه ..؟!
ميرة: والله عاد كيفي .. هاي حياتي وأنا حرة فيها ..
سعيد: لا مش حرة .. راشد يبيج ع سنة الله ورسوله .. ريال ما ينعاب بشي والكل يمدح فيه .. أبا أفهم ليش ترفضينه ..!
ميرة: ما ارتحلته .. ما أباه شو هو بالغصب ..

فهاللحظة دشت فوز .. وكانت تطالع ع ميرة اللي يبين عليها العصبية والضيج ..

سعيد: ميرة .. إنتي حد ف حياتج ..؟!





ميرة: شووو ..؟!
سعيد: ترا ماشي مبرر يخليج ترفضين راشد إلا إنج تحبين واحد ثاني .. لأن سبب رفضج اللي قلتيه حق علاوي ما أقنعني ..
ميرة بعصبية: إنت صاحي .. سعيد ترا وايد تغلط وأنا حاشمتنك لأنك ولد خالتيه .. شي ثاني لا ..
سعيد: ميرة جاوبي ع سؤالي .. إنتي حد ف حياتج يخليج ترفضين راشد ..؟!
ميرة بتحدي : هيه نعم .. تبا تعرف شي ثاني ..؟!
سعيد: شوو ..؟! ومنو هاا ..؟!
ميرة: ما يخصك .. ولا تتدخل ف حياتي .. إذا خواني ما حاسبوني .. ف إنت مالك حق تحاسبني وتسألني يا ولد الخالة .. مع السلامة ..!

بندت ميرة التليفون ف ويه سعيد ويلست تصيح ..

فوز: بلاج ميرة .. ليش تصيحين ..؟!
ميرة: سعيد حرقلي قلبي يا فوز
فوز: ليش شو قالج ..؟!
ميرة: داق يحاسبني ليش رفضت رفيجه .. ويقول إن سبب رفضي مب مقنع ..
فوز: ما فهمت
ميرة: يسألني إذا ف حياتي حد .. أو بالأحرى يتهمني إن ف حياتي حد ولهالسبب رفضت راشد ..
فوز: معقولة ...؟!!
ميرة: صدمني يا فوز .. ما توقعته جيه ..
فوز: وإنتي شو قلتيله ..؟!
ميرة: اللي حاب يسمعه ..
فوز: اللي هو حد ف حياتج .. ولهالسبب رفضتي راشد
ميرة: هيه
فوز: ليش يا ميرة .. أخاف يسويلج مشاكل مع خوانج ..؟!
ميرة: ما يهمني .. يعني شو كنتي تبيني أقوله ..؟! سؤاله فاجأني وقهرني بنفس الوقت .. معقولة لا نغزاتي ولا تلميحاتي يابن نتيجة .. هالغبي بعده ما فهم إني احبه ..
فوز: روحي تغسلي وصلي لج ركعتين ونامي ..
ميرة: إن شاء الله

نشت ميرة عشان تتغسل .. ووقفت وطالعت ع فوز كأنها تذكرت شي ..

ميرة: صج فوز .. سعيد أونه يعتذر منج ..

نقعت فوز م الضحك .. تذكرت المقلب البايخ اللي سوته ميرة فيها .. وميرة ضحكت درت إن فوز تضحك ع المقلب ..

فوز: ربي يسامحج ..
ميرة: قلت لج غيري تليفونج ..
فوز: ههههههههه يديد ما كمل 6 شهور شو أغيره ..
ميرة: عاد أنا ما يخصنيه .. نغمة تليفونج عايبتني ..
فوز: صج دبه .. خذيها أنا بغيرها
ميرة: بحط اللي بتحطينها ..
فوز: طالعوا هاي .. إنزين بشتري حق تليفوني اكسسوار ..
ميرة: بشتري نفس الإكسسوار ..
فوز: شو ها .. تقليد عيني عينك ..
ميرة: كيفي أحب أقلدج ..
فوز: تصدقين ترا أنا أحس إنج وايد تقلديني .. أحب واحد ما يدري عني .. وإنتي بعد هيك .. وانخطبت من واحد ما أباه وإنتي هيك ..
ميرة: وأنا أقول ليش حظي طايح بالأرض ..
فوز: ليش إن شاء الله ..؟!
ميرة: لأنج إنتي رفيجتي ..

فرتها فوز بالمخدة .. وميرة ظهرت م الغرفة قبل لا توصلها .. سارت تتغسل وفوز نشت بعد تتغسل عشان ترقد لأن الساعة صارت 3 إلا ربع ..!

الحرم الجامعي
يوم الثلاثاء
الساعة 5:00 عصراً


موزة أمس اتصلت حق فوز .. تبا ترمسها .. تبا تفهم منها سبب تهربها من موضوع الخطوبة .. تبا تعرف شو السر اللي كانت بتقوله لهم ف آخر سنة لهم بالمدرسة .. وما قدرت تقوله .. عقب ما ظهرت فوز من الكلاس وصلها مسج من موزة تقولها عن المكان اللي بيلتقون فيه .. وع طول سارت ..

أول ما وصلت كانت موزة تنتظرها .. سلمت عليها ويلست عشان تعرف شو الموضوع اللي تبيها فيه ..

موزة: شحالج يالدبة ..!؟ وشو الدراسة ..؟!
فوز: الحمدلله كله تمام ..
موزة: وشحاله سلطان العرب ..؟!
فوز: والله ع حاله يطرش مسجات .. قلت له لا تطرش لأني ما برد قالي مب لازم تردين أهم شي إني أطرش وتقرين ..
موزة: شكله عاشق متيم ..
فوز: إلا قولي شكله فاضي وما عنده سالفة ..
موزة: مب يمكن يكون يحبج صدج .. ليش ما تعطينه فرصة ..؟!
فوز: مواز أنا الفرصة لو كنت بعطيها حد .. كنت عطيتها فهد .. وإلا خليفة .. وإلا منصور .. مب واحد ما أعرف عنه شي ..
موزة: وليش ما عطيتيها خليفة .. وإلا منصور ..؟!
فوز: لأني ما أفكر فهالشي ..
موزة: عيل فكرتي ف محمد ..
فوز: محمد فكرت فيه .. لأني أدري إني ما بوصل له .. ودامه بعيد أنا مرتاحة جيه .. وإلا حد ثاني ولا يفكر ..
موزة: لا والله .. وليش عاد ..؟!
فوز: موزة .. إنتي شتبين ..؟!
موزة: أبا أعرف ليش تكرهين الرياييل ..
فوز بتردد: م .. منو قالج أكرههم ..؟!!
موزة: كل شي يقول إنج تكرهينهم أو مب تكرهينهم .. تخافين منهم .. حاقدة عليهم .. ما توثقين فيهم .. رفضج لهم .. رمستج عنهم .. أسلوبج وياهم ..
فوز: شو تقولين يا موزة .. شهالرمسة ..
موزة: فوز .. إنتي مب طبيعية من أيام المدرسة .. وأذكر زين هاك اليوم اللي كنتي بتقولين لنا شفيج وعقب غيرتي رايج .. وغير جيه ضيجج وصياحج هاك اليوم .. ورمستج لمن قلتيلي هذولا هم الشباب اللعب ف دمهم .. وما يبون إلا يرضون شهوتهم .. وكلام وايد غيره .. وتأثرج بسالفة مريم حرمة حميد ..
فوز: ها كلام الواقع .. وتأثري جان لأن قصتها تعور القلب ..
موزة: بس غيرج ما قاله .. لو
فوز: لو شو ..؟!
موزة: لو ما كنتي مارة ف موقف أو حد مرمسنج بشي يشبه اللي صار ما كنتي قلتي ..
فوز: خلاص يا موزة كافي .. أرجوج ارحميني ..
موزة: أنا أبا أعرف شفيج .. ليش الحزن .. ليش دومج مضايجة .. ليش دموعج ع خدج ..!!!

الدموع كانت تنزل .. بس فوز من كثر ما صاحت .. ما عادت تحس فيهن .. مسحت موزة دموعها ..

موزة: قوليلي يا فوز.. صدقيني بترتاحين .. مهما جان صعب .. راح تحسين براحة ..
فوز: أحاول أنساه يا موزة .. أحاول أنسى كل شي .. بس ما أقدر .. يوم عن يوم أحس إن كل شي يذكرني بالماضي .. ف كل الشباب .. أشوف الحقارة .. أشوف أشياء تخرعني وتذكرني باللي صار .. ما أقدر أثق فيهم .. ما أقدر أثق ف حد ..
موزة: شو صار .. شو هالماضي اللي تخافين منه ..؟!!
فوز وهي تصيح: موزة إنتي رفيجتي وأختي وحبيبتي .. أنا ما أقدر ما أقولج دامج تطلبيني .. بس صدقيني هالشي ما ينقال .. هالشي ما أقدر أقوله حق حد ..
موزة: إمبلا تقدرين .. قولي يا فوز .. وصدقيني سرج ف بير .. ومحد بيدري .. يمكن أقدر أساعدج ..
فوز: إذا أنا ما أقدر أساعد نفسي .. شلون تقدرين تساعديني .. محد يقدر يساعدني .. محد ..
موزة: إمبلا .. كل مشكلة ولها حل .. حتى لو كانت صعبة ..

سكتت فوز للحظات .. كأنها تهيئ نفسها عشان تقول السر اللي خشته عن الكل .. واللي يمكن يا الوقت إنها تطلعه .. يمكن فعلاً موزة تشوف لها حل .. بدل لا هي قاعدة جيه .. تتهرب من كل شي .. وموزة لمن شافتها سكتت .. عرفت إن فوز بترمس .. بس تبا وقت عشان تستوعب الألم والجرح اللي خلفه لها الماضي .. والطفولة التعيسة اللي عاشتها ..


فوز .. بدت ترمس .. وسيل م الدموع ينزل من عيونها .. بدت تتذكر الماضي بتفاصيله .. بدت تقول اللي كانت تخاف تقوله طول هالسنين .. :


جان عمري 5 سنوات .. كنت أحب أسير بيت يدي أبو أمي .. لأن يدي يموت عليه .. أنا دلوعته وكلامي مسموع .. ورغباتي وطلباتي فوق طلبات عياله اللي هم خوالي .. كنت أسير م الصبح وأرجع بالليل ..

وف يوم ..

سعد: حبيبتي تعالي ..
فوز وبدون وعي سارت .. لأنها تعرف هالريال : شو تبا ..
سعد: تبين حلاوة ..
فوز بابتسامة: هيه أبا ..
سعد: شرايج نسير الدكان .. وناخذ اللي تبينه ..
طالعت ع البيت .. محد جان موجود .. يمكن لو حد شافها ما بيخلوها تروح .. وهي قالت بما إن محد موجود بتروح وترجع ومحد بيشوفها ..
وسارت معه ..

دخلني ف بيت جريب من بيت يدي .. بيت مهجور .. مافيه درايش ولا فيه شي .. صالة وغرفة .. ما فيه أبواب .. وفيه أثاث مهجور .. وأنا ساكتة .. ما أرمس .. ما أدري شو صار فيني .. الكل يعرف إني هادية .. ما أحب أرمس .. كيف بكون وأنا بنت 6 سنوات .. ما أذكر شو صار ..

أشوف نفسي مرقدة ع الشبرية .. شبرية من حديد .. ما فيها شي .. بس لوح .. أنا راقدة عليه .. وجان ..
موزة وهي تتخيل اللي قاعد يصير بدون لا فوز تكمل رمستها .. ويلست تصيح .. وفوز بدت تشهق م البجي ..

بطل ملابسي .. ما أعرف شو سوا .. ما أذكر شو سوا بالضبط .. كنت صغيرة .. ذاكرتي وقفت .. للوقت اللي دشينا ف المغرب .. عقبها لبسني ملابسي .. وظهرني م البيت .. وخلاني أروح .. سرت أركض .. بس ما رمست .. ما قلت حق حد .. كنت صغيرة .. ما أعرف شو اللي سواه .. ولا أعرف إن هالشي راح يضرني .. ليش أنا شو سويت .. كنت ياهله .. وربي ما أذنبت ف شي ..

حظتنها موزة بالقو .. وفوز تبجي بقوة
موزة وهي تبجي وللحين حاظنه فوز ..: منو هذا ..؟!! تعرفينه ؟!!
فوز: أعرفه .. ولد ييران هم يدي .. يسكنون جريبهم وهو رفيج خوالي ..
موزة: وليش ما علمتي عليه ؟!! ليش سكتي يا فوز ..؟!!
فوز: أعلم عليه منو .. قلت لج أنا ياهل .. ما كنت فاهمة اللي قاعد يصير ..
موزة: وأحين .. مب مقررة تقولين حق حد ؟!! دام تعرفيه خبري أهلج ؟!!
فوز وحالتها بدت تزيد سوء: شقاعدة تقولين إنتي .. تبين أهلي يذبحوني .. تبيني أدنس سمعتهم .. وأحط راسهم ف الأرض .. صعب يا موزة صعب أقول حق حد .. ما أقدر أعلم حد إن هالشي صار وياي ..
موزة: خلاص حبيبتي هدي ..
فوز: أهدي .. آآآآآآآآآه يا موزة .. محد يقدر يحس بالألم اللي فيني .. ياليتني مت ولا صار فيني هالشي .. ياليت
موزة: الله ينتقم منه .. هالخايس .. هو وينه أحين ؟!!!
فوز وهي تمسح دموعها: ما أعرف .. أنا من يومها ما تغير عليّ شي .. ما كأن صار معي اللي صار .. بس زياراتي قلت لهناك .. وبديت أكبر .. وكل ما كبرت بدا الخوف يزيد فيني .. وأتذكر اللي صار .. بس اللي سمعته .. لأنهم كانوا يرمسون عنه .. إنه مريض عنده مرض ما أدري شو نسيت اسمه بس لازم بين فترة وفترة يبدل دم .. وغير ها عنده أنيميا وما يقدر يعرس .. وأحين يمكن صك الأربعين وهو مب معرس ..
موزة: الله فوق .. الله ما ينسى عباده يا فوز ..
فوز: ومريض .. هو مريض بس أنا .. أنا حياتي خربت .. مستقبلي ضاع .. وين بودي ويهي من أهلي .. هالشي ما يتخبى ومصيرهم بيدرون .. شو أقولهم ..؟!!! كيف بتصرف .. ما تفهموني .. تتحسبون هالشي سهل .. ها شرفي .. هاي سمعتي .. منو بيرضى فيني .. منو ..؟!!!!!!
موزة: بس حبيبتي لا تبجين .. يمكن ما صار شي يمكن هو ما أذاج .. إنتي تقولين إنج ما تتذكرين اللي صار ..
فوز: وتبيني أعيش على هالأمل .. تبيني أحط ف بالي وأنسى إنه ما صار شي .. وربي هالشي يخرعني أكثر من قبل .. اسأل نفسي وينهم فيه أهلي .. ليش محد جان موجود .. ليش خلوني أسير .. ليش أنا اللي يصير وياي كل هذا .. ليش الناس حقيرين لهالدرجة .. أنا كبرت .. جربت أدش الـ 19 .. كيف تبوني أعيش بهالجذبة .. قبل ما كنت أفكر بهالشي .. بس احين ما أقدر .. خصوصا عقب ما رمستني نورة عن أخوها .. وحمد عن منصور .. ما تعلميني ..؟!! شو أقولهم ..
موزة: الغالية .. هدي أحين وإن شاء الله خير .. اهتمي ف دراستج أحين .. ولى يا الوقت اللي بيصير فيه كل ها .. روحي المستشفى وافحصي وعقبها شوفي شو بيصير ..
فوز: حرام .. وربي حراااااام .. حراااااام عليه .. حرام اللي قاعد يصير فيني ..
موزة: فوز غناتي .. لا تبجين قطعتي قلبي .. تعالي اغسلي ويهج وعقب بنرمس ف السالفة بهدوء ..
فوز: آآآآآآه .. أحياناً أفكر أنتحر .. أصلاً أنا حياتي منتهية ف كل الحالات ..
موزة: شهالرمسة يا فوز .. تعوذي م الشيطان ..

خذنها موزة تغسل ويهها .. وعقبها وصلتها للسكن .. ودخلتها غرفتها عشان ترتاح .. ولمن تأكدت إنها رقدت .. روحت ووصت ميرة عليها .. أما فوز ف حست إنها تبا ترقد عشان تنسى اللي صار .. تبا ترقد وما تنش عشان ما ترد تتذكر ماضيها .. وميرة كانت مستغربة م اللي صاير بفوز .. بس ما قدرت تسأل أو تتدخل ف شي ما يخصها ...!!!!



بيت أبو حميد
يوم الأربعاء
الساعة 8:00 مساءاً


قبل شوية موزة مصكرة من عند حصة .. ومتضايجة وايد بسبب هالإتصال .. حصة ع اليومين اتصلت فيها ترمسها عن سيف .. تبي تقنعها إن سيف يحبها وإن غلط .. وتبيها تسامحه .. بس موزة خلاص .. تحس نفسها مب قادرة تتقبل شي منه .. عقب ما اكتشفت خيانته ..!

دق تليفونها .. جان مسج واصلنها .. بس هالمرة مب من عند حصة .. هالمرة المسج من عند سيف .. تفاجأت أول ما شافت المسج .. جان يقولها إنه آسف .. ويدري إنه غلطان .. وإنه يحبها ومن هالكلام .. اللي ما عاد يأثر ف موزة .. واستغربت من وين ياب رقمها .. بس عقب توقعت إن حصة عطته .. أو يمكن يكون خذاه بدون لا تدري من عندها أو من عنده روضة .. دق تليفونها بمسج ثاني .. :

" أنا من بين كفينك شعور يشبه الشعره
أقولك شي .. ترا فدوة حياتي لو قطعتيني
أخذت من الصبر لا لا أخذ مني الصبر صبره
مدام إني بغيتك محد يجي مثلك ويحييني
تعالي يا بعد روح الشعور ويا بعد عمره
أنا البارح لهذا اليوم أبد ما غمضت عيني "


وعقبها اتصل .. بس هي ما ردت عليه .. جان يبا يفهمها ويرمسها .. وموزة رافضة تسمع أي شي يخص سيف .. ف طرش لها 3 مسجات ورا بعض .. :

" رد علي محتاج صوتك دقيقة ..
رد علي لا تحرمني من الصوت
صوتك يبدد داخلي كل ضيقة ..
يحييني لو إنه مثل رعشة الموت "



طرشتله مسج .. :

وطاحت أقنعة صدقك .. وبانت ظلمة النية
كسرت الحلم بالواقع ولا لي نية أحلم ..!
لقب " طفل الملاك" أثره وهم ، صورة رمادية
لبست النور وأخفيت الخفوق الموحش المظلم
خلاص اتضحت الصورة وغنّى الصدق مرثية
رثى فيك الشعور اللي توفى قبل ما يسلم ..
يمينك قد نوت بالشر ولكن خنجرك عيّا ..
غريبة كيف يرحمني جماد وإنت ما ترحم ..!!!


ورد عليها بمسج .. :

يا شمس عمري يا دفاي وحنيني
جيتك حروف الحب وعيونك كتاب
بالحيل أحبك يا رجاوي سنيني
وحبك فتح للعاطفة كل الأبواب
إحساسي الصادق معك يحتويني
وإحساسي لغيرك من الحب كذاب

بس موزة كانت ظاهرة م الغرفة .. عقب ما فرت التليفون ع الشبرية ..!!

تذكرت فجأة رمستها ويا فوز .. وحالة فوز شلون صايرة لمن رمستها آخر مرة .. صدج إن الجرح اللي فتحته موزة مستحيل هالمرة يبرا .. هي كانت تحاول تتناساه .. بس عقب ما ردت تتذكره بكل تفاصيله .. صار صعب عليها تنسى .. أو حتى تتناسى .. كانت موزة مهمومة وهي تفكر ف رفيجتها فوز .. واللي صار معها .. للحين مب مستوعة اللي صار .. اعتراف فوز بسرها يباله قوة وشجاعة .. واللي صار معها مب هيّن .. موزة نفسها تخاف تفكر باللي صار ويا رفيجتها .. وقررت ترمس أمها بالسالفة ..

موزة: أمايه ..
أم حميد: هلا بنيتي ..
موزة: ممممم أبا اسأل ..
أم حميد: عن وشو تسألين ..؟!!
موزة: ما أعرف كيف .. ممممممم
أم حميد: شو ف خاطرج ..؟!!
موزة: أمايه .. سمعت سالفة .. تعور القلب ..
أم حميد: سالفة شو ..؟!
موزة: بنت .. وهي صغيرة .. تعرضت للإغتصاب ..
أم حميد: لا حول ولا قوة إلا بالله ..
موزة: بس .. مممم مب اغتصاب اغتصاب .. أتصور تحرش .. أحين لو هي تبا تعرف إذا هالشي أثر فيها كيف تعرف ..؟!
أم حميد: تروح المستشفى وتفحص ..
موزة: لا يعني أمايه هي ما تبا حد يعرف ..؟!
أم حميد: جم جان عمرها ..؟!
موزة: 5 سنوات تقريبا ..

يلست أم حميد تفكر ف الموضوع .. وعقب جاوبت ع سؤال بنتها .. اللي حست براحة أول ما سمعت رمستها .. وع طول سارت تتصل ف فوز تقولها يمكن هالشي يطمنها ..!


دشت دارها .. وصكت الباب عدل .. لا حد يسمعها وهي ترمس .. واتصلت ع رقم فوز .. محد رد عليها .. وعقب اتصلت مرة 2 .. ونفس الحالة .. خافت لا يكون صار فيها شي .. حالتها النفسية كانت متحطمة ع الآخر .. فكرت إنها ممكن تسوي ف نفسها شي .. اتصلت مرة 3 .. وردت فوز عليها ..

موزة: السلام عليكم ورحمة الله وبركاته
فوز: وعليكم السلام ورحمة الله وبركاته ..
موزة: شحالج فوازي ..؟!!
فوز: نحمد الله ونشكره .. شحالج إنتي ؟! وشخبار هلج ؟!
موزة: الحمدلله كلهم بخير وعافية .. شو صحتج أحين ؟!!
فوز: الحمدلله بخير ..
موزة: ممممممم غناتي ..
فوز: هلا فديتج .. بغيتي شي ؟!
موزة: يب .. عندي شي بقووله ..
فوز: بخصوص شو ؟!!
موزة: بـ .. بخصوص موضوعج ؟!!!
فوز بغصة: شفيه ؟!!
موزة: فوز فديتج أنا سألت أمايه ..
فوز: شو ؟!!!!
موزة: لا .. ما قلت لها منو البنت .. بس كنت بسألها
فوز تقاطعها : ما كنت أبا حد يدري يا موزة ..
موزة: كنت أبا اساعدج .. ولا تخافين ما قلت لها شي بس سألتها عن الضرر اللي ممكن يصير وكيف يقدر الواحد يتأكد ..
فوز ما ردت .. نزلت دمعة حارّة ع خدها .. وهي تحس بالألم ..
موزة: فوز اسمعيني عدل .. أمايه قالت إن البنت إذا كانت ياهل وتعرضت حق هـ الشي أكيد راح يبين عليها وأهلها بيدرون .. لانها تكون صغيرة يعني إذا جان فعلاً ضرج فـ مستحيل تكونين عايشة ليمن أحين .. هالشي مب سهل وتأثيره ع الجسم كبير .. إذا كانت البنت ف سن كبير .. ف ما بالج وهي صغيرة وف سن 5 سنوات ...؟!!!
فوز: ويعني ..؟! أعلق نفسي ع هـ الأمل ؟!!!
موزة: مب تعلقين نفسج ع هالأمل .. بس هالشي إيجابي .. وإنتي أحين صكي ع الموضوع ولا تفكرين فيه .. غناتي ليمن يحين الوقت روحي افحصي .. وعقبها يصير خير .. إذا طلع ما فيج شي الحمدلله يا رب وعقبها تقدرين تكملين حياتج عادي وبدون لاحد يدري .. وإذا لا سمح الله .. طلع فيج شي .. ف الشخص اللي يحبج مستحيل يتخلى عنج .. وهو يدري إن هالشي صار غصب عنج ..!!!
فوز: مشكلتكم تتحسبون الموضوع سهل .. شو أقسى م العذاب النفسي اللي أنا عايشته ؟!
موزة: لا والله .. أدري شو حالتج وربي حاسة فيج .. بس إنتي ما ف إيدج شي أحين .. إنتي قاعدة تدفعين ثمن شهوة لشخص مريض .. وغيرج واايد اللي صار فيهم هالشي .. بس إنتي وضعج أفضل يا فوز .. احمدي ربج إن ما صار اللي أكبر من جيه .. وخلي إيمانج بربج قوي وإن شاء الله ما راح يطلع فيج شي ..
فوز: والنعم بالله .. بخليج .. بحط راسي حاسة بصداااع فضييييع
موزة: أوكي فديتج .. لا تحطين ف بالج وتفكرين ف الموضوع .. أشوفج ع خير ..
فوز: إن شاء الله .. مع السلامة
موزة: مع السلامة


ضيج فوز .. يضايج موزة وايد .. والموضوع مب سهل .. موزة تدري إنها مهما قالت حق فوز عشان تخفف عنها .. ما راح ينفع .. لأنها مب عارفة إذا تضررت أو لا .. ومجرد التفكير بهالشي يخرعها ..!!!!


نهاية الجزء

​

 

[أم حور]

(( طولت بالي وخذها اليوم لك شكراً ما ينزل الراس دام الروح بي حية))


الجزء الخامس عشر


بيت أبو حمد
بوم الخميس
الساعة 5:36 عصراً


فوز ف الصالة .. فاتحة اللاب توب وتكتب .. محد ف البيت غير هي والبشكارة .. حمد ف المكتب وأبو حمد وأم حمد وندى سافروا أمس بريطانيا عند ريم .. والبيت صاير ممل وايد .. حتى فوز تلومت إنها رجعت البيت بس جان لازم ترجع عشان تسلم ع أهلها .. وقررت الأسبوع الياي ما ترد البيت تيلس تذاكر عشان الإمتحانات ..

يلست تكتب .. :

وقفت الدمعة حائرة .. تتساءل عن الوجع الذي مزّق كل شيءٍ جميل ترسمهُ الحياة .. في لحظةِ انتظار ..
أرغبُ في البكاء بـ شدة .. ولكن كبريائي يرفض ذلك بـ ذاتِ الشدة ..!
تذكرتُ الحب القديم .. فـ ابتسمتُ ابتسامة رضا .. رغم جرحي الذي تأبى الأيام أن تبرئه ..!

............................

دق تليفون فوز .. كانت خلود مطرشة لها مسج عادي .. :

إنت الرفيق اللي بهالكون ما مال
لا ضاق صدري منهم ألقاك لافي
ترا غلاك اليوم ثابت ولا زال
ولا عاد أبي ربع القلوب المقافي

ردت عليها فوز بمسج .. :

هذا الغياب اللي خذانا على وين ..؟!
كلن مع الأيام عاش بسكاته ..
نزعل ونتضايج ونبعد وبعدين ..
كلن يدور له عذر في حياته ..
لو صاحبك عن دنيتك غاب يومين
ومنك ولا حتى المراسيل جاته
وعادي إذا طال الجفا فوق شهرين
يمكن يموت وما دريت بوفاته

وعقبها كملت كتاباتها .. وإلا يدق تليفونها بمسج ثاني .. جان من عند خلود .. :

" فوز أنا آسفة ع كل اللي سويته معج .. وأدري إنج زعلانة لأني خليتج وسرت ويا شهد .. بس الظروف خلتنا نصير جيه .."

فوز ردت عليها .. مع إنها مستغربة من رمسة خلود ..

" ماله داعي تعتذرين .. لأن أنا نسيت كل شي .. "

خلود .. :

" حتى أنا نسيتيني ...؟!!! "

فوز:

" نسيت كل شي يخص صداقتنا .. اللي صار مب شوية .. صعب لمن تضحين عشان شخص وعقب تكتشفين إن هالشخص باعج برخص التراب ...! "

خلود :

" أنا ما بعتج .. قلت لج الظروف كانت أقوى مني .. وفذيج الفترة شهد كانت محتايتني .. "

فوز:

" دوم الظروف هي الشماعة اللي نعلق عليها أخطاءنا .. ! "

خلود :

" فوز أتمنى إنج تسامحيني وتنسين اللي صار .. ونرد صديقات نفس قبل وأحسن .."

فوز:

" إذا ع السماح .. ف أنا مسامحتنج .. بس أنسى صعب أنسى .. وصعب نرد شرات قبل لأن اللي انكسر صعب يتصلح .. "

خلود:

" عطيني فرصة يا فوز .. وعطي نفسج فرصة تفكرين .. لا تردين علي ألحين .."

فوز:

" ما يحتاي أفكر .. ها هو قراري وما بيتغير .. وأنا مب مستعدة أرد لنفس المعاناة مرة ثانية .. خلينا جيه كل وحده بعيد عن الثانية أحسن .. لأن ف داخلي شي انكسر صعب الأيام تصلحه .. الجرح اللي ف قلبي دثرته عشان ما يذكرني فيج بس القدر جان أقوى وجمعنا .. وأنا رضيت بالقدر وتماشيت مع اللي صار بوضع عادي ..!

خلود :

" يعني خلاص كل شي انتهى .. ما تبين يكون بينا تواصل ..؟! "

فوز:

" إنتي اللي نهيتي كل شي وأنا أقلمت حياتي ع الوضع اللي إنتي حطيتيني فيه .. وتواصلنا راح يكون تواصل زملاء دراسة بس .. والسموحة منج"

خلود:

" أوكي ع راحتج .. بس مع ذلك أنا بعطيج فرصة تفكرين ..!"


ما ردت فوز ع آخر مسج .. هالمرة كانت أقوى حتى دمعة ما طاحت من عينها وهي تتذكر كل اللي سوته خلود فيها .. سبحان الله عقب ذيج السنين يات أحينه تبانا نرد صديقات ..

قلتيها حق نفسج يا فوز وإنتي تصبريها .. راح ترد لج .. لازم ترد لج وتعتذر منج وتطلب منج السماح .. بس عقبها إنتي بترفضين .. ياربي كيف الدنيا دوارة .. آسفة يا خلود .. بس لقيت اللي أحسن منج .. وما بسوي شراتج وببيعهن عشان خاطر عيونج .. مثل ما بعتيني عشان خاطر عيون شهد وغيرها ...!!

نشت فوز من مكانها سايرة المطبخ تسويلها عصير .. وسمعت صوت تليفونها يدق .. هالمرة اتصال .. سارت البشكارة تييبه لها وعطتها إياه .. وردت ع طول ..

ميرة: السلام عليكم
فوز: وعليكم السلام والرحمة .. هلا والله
ميرة: شحالج فوزي ..؟!
فوز: بخير وعافية ميراني .. شحالج إنتي ..؟!
ميرة: الحمدلله طيبة .. ها شو يالسة تسوين ..!؟
فوز: حالياً ف المطبخ يالسة أسويلي عصير .. تبين ..؟!
ميرة: يا ريت والله .. ريقي ناشف
فوز: هههههه أونج .. شخبارج .. وشو أهلج ..!؟
ميرة: الحمدلله كلنا بخير .. بس الأوضاع شوية متوترة بسبب موضوع الزواج ..
فوز: ليش عاد .. مب حرمة أخوج موافقة ع الزواج ..؟!
ميرة: موافقة صح بس صعب يعني الواحد قلبه يحترق ..
فوز: الله يعينها ..
ميرة: أنا ما قلت لج هي من خطبت له ..؟!
فوز: لا .. ليش حرمة أخوج هي اللي خطبت له ..؟!
ميرة: هيه .. وما خطبت له أي حد .. خطبت له بنت خالة أمي ..
فوز: إنزين وين المشكلة ..؟!
ميرة: تدرين إن هالبنت عبدالله جان يحبها وهي تحبه .. وجان بينهم علاقة قبل لا يعرف خولة ويتزوجها .. والبنت ما تزوجت كأنها حاسة إن عبدالله بيرد لها ..
فوز: سبحان الله .. يعني هي أحينه جم عمرها ..؟!
ميرة: ف عمر عبدالله أو أقل بجم سنة ..
فوز: والله حرمة أخوج غريبة .. يعني يوم تخطب ما اختارت إلا البنت اللي جان يحبها ..؟!! ليش عاد ..؟!
ميرة: ما أدري كلنا انصدمنا لمن عرفنا .. بس هاي حياتهم وهم حرين فيها ..
فوز: الله يصبرها ويعطيها ع قد نيتها ..
ميرة: آمين يا رب .. وإنتي علومج .. وشو النفسية ..؟! هالأسبوع ترا مول ما عايبتنيه ..؟
فوز: والله الحمدلله أحسن .. أحس نفسي مرتاحة نفسياً .. لو إني حاسة بملل فضيع ..
ميرة: ليش عاد ...؟!
فوز: أهلي أمس سافروا بريطانيا عند ريم
ميرة: صج ..؟! وإنتي بروحج ف البيت ..؟!
فوز: لا انا وحمد بس حمد ف المكتب ..
ميرة: ومتى بيردون ..؟!
فوز: بيقضون الصيف كله هناك ..
ميرة: ما شاء الله .. وإنتو أكيد بتلحقونهم ..
فوز: هيه إن شاء الله من أخلص الإمتحانات ع طول بنسير
ميرة: حلو ع الأقل تغيرين جو ..
فوز: هيه والله
ميرة: المهم أنا داقة أقولج إني خبرت عبدالله بخصوص اقتراحج وقال ما عنده مانع .. ف باجر إن شاء الله بمرج البيت وبروح وياج
فوز: صج والله .. حلووو الصراحة كنت خايفة إنه ما يوافق ..
ميرة: وافق .. تقولين جان يبا الفكة من هالمشوار الطويل
فوز: ههههههه ما ورا عليه 4 ساعات ف الطريج .. وهو يروح ويرجع يعني 8 ساعات ..
ميرة: هيه والله ..
فوز: إلا صج .. ما صار شي من عقب ما رمسج ولد خالتج ..؟!
ميرة: لا .. أعتقد عندهم امتحانات ومرتبشين عشان جيه ما انفتح الموضوع مرة ثانية .. بس أنا مزهبة عمريه حق علاوي
فوز: شو بتقولين له ..
ميرة: الحقيقة .. بقوله إني أحب سعيد ..
فوز: تستهبلين شو ..؟!
ميرة: لا ما أستهبل .. يعرف إني أحب ولد خالتيه .. أفضل من إنه يفكر إني أحب واحد م الجامعة وبينا تواصل ..
فوز: أوكي معج حق .. بس ما تخافين يقوله ..؟! أو يعصب عليج مثلاً
ميرة: علاوي متفهم وايد .. وأنا بحلفه ما يقوله شي .. أهم شي أخويه يكون عارف اللي قاعد يصير ..
فوز: أوكي .. الله يعينج
ميرة: الله يعين الجميع .. هيه صح .. شخباره العاشق الولهان ..؟!
فوز: أقولج شو .. مطرش رسالة .. تصدقين مرمس اهله عني ..
ميرة: شووو ..؟! لا الريال شكله ماخذ الموضوع جد ..
فوز: شدراني .. أقولج أول ما شفت الرسالة تفاجأت ..
ميرة: رديتي عليه ..؟! لا .. بس أفكر أرمس هبه ف سالفته أكيد تعرفه وتعرف الحقيقة وشو يبا مني .. بس قلت خل نخلص الفصل وعقب يصير خير ..
ميرة: أوكي يكون أحسن لج بعد .. تخلصين هالسالفة وعقبها تسافرين وتفتكين .. المهم بخليج أحينه تخلصين عصيرج ..
فوز: أوكي فديتج ..
ميرة: مع السلامة
فوز: ربي يحفظج ..


بندت فوز عن ميرة .. وكملت عصيرها وعقبها سارت الصالة تكمل كتاباتها لين ما إييون أهلها ...!!


شقة علي - بريطانيا
يوم الخميس
الساعة 2:10 ظهراً بتوقيت بريطانيا


الساعة 10 ظهر علي من الإمتحان .. وعقبها رجع الشقة يرتاح .. رقد .. وبعدها نش يصلي .. ويلس ع النت .. سعيد امتحانه يبدا الساعة 12 .. ولين أحينه ما يا .. علاوي فاتح المنتدى ويقرا كتابات العضوة .. عقب هذيج الفترة الطويلة .. أخيراً نزلت شي ..
يستانس لمن يقرا بصوت عالي .. يحس بكلامها وإحساها أكثر ..

رغم جرحي الذي تأبى الأيام أن تبرئه ..!
تذكرتهُ هو .. فـ شعرتُ بـ الحنين يتوشحني .. وأشواقي تحملني إليه ..!
أحبهُ .. وأشعرُ بـ حبهِ يموت في كل لحظةِ نسيانٍ يعيشها هو ..!
كل الأماكن خاوية بدونهِ ..
فـ لا وطن .. ولا مكان يحتضنُ تلك الدمعة العالقة على عتبةِ عيني ..!
أشعرُ بـ الاختناق وبـ ضيقٍ هو بوابة العبور إلى جراحي المتواصلة ..
وتستمر مسيرةُ عطاياهُ الباذخة .. من جراحٍ وآلامٍ وأحزان ..
وأستمرُ أنا في تصنّع الابتسامة ..التي تبعدُ شبهات الحزن عني
أستمرُ في إخفاء الحسرة البادية على وجهي ..
أحاولُ أن أكون الأقوى أمام من حولي ..
أمام دمعي ..
أمام حزني .. وأمام نفسي ..!
وأحاولُ أن أخفي حقيقة أنني
أذبل ..
أموت ..
وأتلاشى ..

حقاً ..

تموتُ التضحيات .. في لحظةِ غباءٍ موصومةُ بـ العار ..!
فـ شكراً
لـ قلبك الذي لم يبخل عليّ بـ لحظةِ جرحٍ قاتله ..
شكراً لـ كرمك اللا محدود ..!


وصل سعيد ف هاللحظة .. سلم وفر كتبه ع الطاولة وسار ييلس ع القنفة ..
علي: بسم الله الرحمن الرحيم .. اللهم سكنهم في مساكنهم .. بلاك جيه .. الإمتحان صعب ..؟!
.. so soسعيد: يعني
علي: ودام سو سو ع قولتك .. شفيك جيه مضايج ..؟!
سعيد: ماشي .. صج خبرت راشد عن رفض أختك ..؟!
علي: هيه من يومين تقريباً ..
سعيد: وشو قال ..؟!
علي: ما قال شي .. تفهم الموضوع وردة فعله كانت أفضل بوايد من ردة فعلك ..
سعيد: إنته خلصت امتحانات ..؟!
علي: اليوم جان آخر امتحان .. ليش ..؟!
سعيد: ماشي .. إلا صج ما خبرتك الظاهر عرب انتقلوا هنيه جريب
علي: شدراك ..؟
سعيد: اليوم عقب الإمتحان شفت بنووته تلعب خاري .. وسرت عندها ورمستها ..

علي: أهاااا .. ما قالت لك من وين ..؟؟
سعيد: حليلها وايد تسولف .. قالت كل شي .. ربي يحفظها ..
علي: اهاااا .. انزين إنت شفيك من جم يوم مضايج .. كنت برمسك بس قلت بتريا ليمن تخلص امتحانات ..؟!
سعيد: ما فيني شي ..
علي: إمبلا أنا حاس إن شي ف خاطرك
سعيد: ما عندي شي ..
علي: ياللا عاد قول .. شفيك .؟!
سعيد: ما أبا أقول شي .. عقب بتعصب عليه وبنتناقر وما أبا أناقر حد ..
علي: هههههههههه أونك .. إنزين قول ما بناقر .. بس لا تقول الموضوع عن ميرة ..
سعيد: إمبلا عن ميرة ..
علي: تصدق من جم يوم ما رمستها .. قول موضوعك عشان أرمسها عقب .. شفيها ميرة ..؟!
سعيد: أنا رمستها ..
علي: متى ..؟!
سعيد: ف نفس اليوم اللي ردت فيه إنها رفضت راشد .. خذيت رقمها من عندك ودقيت عليها .. ورمسنا ..
علي: وشو قالت لك ..؟!
سعيد: بدون ذكر تفاصيل .. بس أنا كنت شاك ف شي .. وميرة أكدته لي ..
علي: اللي هو ..؟!
سعيد: سبب رفضها ما جان عدم ارتياحها لراشد .. يمكن هي صلت استخارة وما ارتاحت .. بس في سبب ثاني ..
علي بحيرة: وشو هالسبب ..؟!!
سعيد: ميرة تحب واحد ..

نقع علي م الضحك ..

سعيد: شفيك تضحك .. ع بالك أمزح وياك ..؟!!
علي: لا .. بس منو قالك هالشي ..؟!
سعيد: أنا سألتها وهي قالت لي .. إن حد ف حياتها وعشان جيه رفضت راشد ..
علي: عاد أنا أصدق ف أي حد .. إلا ف ميرة ..
سعيد: يعني أنا أجذب عليك ..؟!
علي: محشوم فديتك .. بس يمكن قهرتها برمستك ف حبت تقهرك بزيادة .. يعني هاي حركات ميروووه .. ما تطوف عليه ..
سعيد: لا والله .. يعني بتقهرنيه وما بتخاف إني مثلاً أقولك أو أقول حق عبدالله ..؟!!
علي: سعيد ليش خايف ع ميرة هالكثر ..؟!
سعيد: بنت خالتيه .. واللي يمسها يمسنيه ..
علي: وهي بعد أختيه .. وشي أكيد ما بشوفها تغلط وبخليها ..
سعيد: أنا قلت لك وإنت بكيفك ..

نش سعيد .. وسار داره يتغسل ويصلي ويرقد لأنه تعبان .. أما علي ف بالرغم من ثقته ف ميرة إلا إن خوف سعيد وكلامه خلاه يشك ف السالفة .. وعشان جيه خذ تليفونه واتصل فيها عشان يأكد شكوكه .. جان مشغول .. ف رد يتصل مرة 2 .. وبعد مشغول .. انتظر ربع ساعة وعقبها دق وردت عليه ..

علي: السلام عليكم
ميرة: وعليكم السلام .. هلا والله بشيخ الشباب
علي: هلا فيج يالدبة .. حشا ويا منو تهذربين نص ساعة
ميرة: هههههههه كنت داقة حق فوز .. وتدري عاد السوالف ما تخلص ..
علي: شحالج شو الدراسة وياج ..؟!
ميرة: الحمدلله كل الأمور عال العال .. وإنته كيف امتحاناتك ..؟!
علي: شدراج إني عندي امتحانات ..؟!
ميرة: أخويه ما يقطعني إلا إذا عنده امتحانات ..
علي: هيه والله .. طالعة ذكية ع أخوج .. والله الإمتحانات كويسة يا أختي .. وخلصت اليوم ..
ميرة: الحمدلله .. نحن بعد كلها جم أسبوع ونبدا امتحانات الفاينل
علي: مسرعكم .. توه بادي الفصل الثاني .. شو تسوون بعمركم إنتو ..
ميرة: ياربي ع الحسد ..
علي: ما أحسد أنا .. وماشي أخبار ف البيت ..؟!
ميرة: ماشي .. من يوم ما عبدالله فتح موضوع الزواج ويانا .. ماشي يديد ..
علي: وشحالهن رفيجاتج ..؟!
ميرة: وإنته ليش تسأل عنهن ..؟!
علي: وأبوووووويه .. رفيجات أختيه لازم أسأل عنهن
ميرة: يالعيار .. بخييييير ويسلمن عليك وايد .. وشخباره ولد الخالة ..؟!
علي: سعيد .. خليها على الله ..
ميرة: شفيه ..؟!
علي: من يوم رفضتي راشد وسعيد منجلب حاله ..
ميرة: وليش عاد .. شو يخصه هو ..؟!
علي: يشوف إن الريال ما يعيبه شي .. وما يتفوت ..
ميرة: أحينه لو أنا أخته بيغصبني عليه ..؟!! هاي حياة أبدية .. مب يوم ويومين عشان أجرب حظي ويا واحد أنا مب مرتاحة له ..
علي: ما عليج منه يومين وبيرد مثل قبل ..
ميرة: هو رمسني ..
علي: أدري قالي إنه رمسج .. وقالي إنتي شو قلتيله ..
ميرة: إنت ما تصدق ف أختك صح ..؟!
علي: لا فديتج أنا واثق منج ..
ميرة: بس بقولك الصج .. مب عشان شي .. عشان ما يأثر عليك سعيد برمسته .. سعيد ولد خالتيه وأنا أحترمه وأحترم رمسته .. بس بصراحة فاجأني أول ما هاجمني بسؤاله .. شو أونه يسألني إذ ف حياتي حد ..
علي: ما عليج منه .. ميراني إنتي عاقلة .. بس سعيد تعرفينيه ما يحب هالسوالف .. وخايف عليج .. بس إنتي ليش قلتيله إن حد ف حياتج ..؟!!
ميرة: علاوي إنته أخويه .. وأنا ما بخبي عليك .. بس رمسة سعيد قهرتني .. شو أقوله ..؟!! ولد خالتيه ويشك فيني ها آخر شي كنت أتوقعه بصراحة ..
علي: ميرة أول ما قالي سعيد الرمسة اللي قلتيها له .. نقعت م الضحك .. تدرين ليش ..؟! لأني كنت عارف إنج تستهبلين عليه
ميرة: خليه يستاهل هالدب
علي: هههههههه سعيد يخاف عليج .. ويشوفج مثل أمون عشان جيه مآخذ راحته ع الآخر ..
ميرة: لااااه .. قوله لا ياخذ راحته ..
علي: بعد إنتي تدرين سعيد دفش ما يعرف يعبر عن مشاعره
ميرة: هو أصلاً عنده مشاعر ..
علي: شفيج ع الريال .. خفي عليه شوية ..
ميرة: ما فيني شي غير إني مقهووووورة..
علي: هههههههه الظاهر رفع لج ضغطج ..
ميرة: رفع ضغطي بس .. خليها مستورة ..
علي:إن شاء الله .. ديري بالج ع روحج فديتج
ميرة: لا توصي .. وإنت بعد حبيبي
علي: إن شاء الله

عقبها بند علي عن أخته .. وتفاجأ بسعيد واقف ويسمع الرمسة .. بس علي ما يعرف سعيد من متى واقف ..!!

علي: شو بوعسكور .. ما رقدت ..؟!
سعيد: رقدت نص ساعة ونشيت .. ليش ..؟!
علي: ولا شي بس استغربت لمن شفتك هنيه ..
سعيد: منو كنت ترمس ..؟!
علي: منو بعد .. ميرة ..!
سعيد: وشو سألتها عن اللي قالته ..؟!
علي: هيه .. وقالت إنها كانت معصبة عليك وعشان جيه قالت إن حد ف حياتها تبا تقهرك .. بس هي ما تفكر فهالسوالف ..
سعيد: يصير والله .. مب ميرة من يومها تحب تغايظنيه وتقهرني ..
علي: عاد اللي يسمع إنته مقصر فيها ..
سعيد: المهم .. خلينا نظهر نتغدا ترا انا يوعااان
علي: أوكي بتزهب وبنظهر ..

سار علي يتزهب .. أما سعيد ف باله مشغول برمسة علي ويا أخته معقولة ميرة تبا تقهره عشان جيه قالت إن حد فحياتها ..؟!! والله يمكن ليش لا ...!!


بيت أبو حميد
يوم الجمعة
الساعة 3:30 ظهراً

موزة ف دارها ترتب جنطتها .. هالمرة بتيلس أسبوعين ف الجامعة ما بترد البيت .. لأنهم بيبدون امتحانات الفاينل وقالت دام الإجازة 3 شهور مب مشكلة بتتحمل أسبوعين بدون لا تشوف أهلها .. وسط التفكير اللي غاطه فيه موزة .. دق باب غرفتها ..

موزة: تفضل ..

أول ما شافت موزة اللي داش عليها تفاجأت ..

حصة: هلااااااااااااااااااااا
موزة: حصيص ..؟!!! مستحييييل ..
حصة: وليش مستحيل ..؟!
موزة: يالدبة ما قلتي إنج ياية
حصة: قلت بسويها مفاجأة
موزة: أحلا مفاجأة والله .. شحالج فديتج ..؟!
حصة: الحمدلله بخير .. شحالج إنتي وشو الدراسة وياج ..؟!
موزة: الحمدلله كل أموري طيبة
حصة: عسى دوم يا رب
موزة: يدوم عزج ونبض قلبج .. إلا ما قلتيلي ويا منو ياية ..؟! وشو سر هالزيارة ..؟!
حصة: ويا سيفان .. سايرين عند أهل أبويه ف الفجيرة وقال دامنا جريب منكم بيمر يسلم عليج ..
موزة: لا والله .. وايد واثق إني بظهر أسلم عليه ..
حصة: لين أحين زعلانة منه ..؟!
موزة: لا مب زعلانة .. بس ما أبا أشوفه ..
حصة: مواز سيف يحبج ..
موزة: بذمتج إنتي مقتنعة بهالرمسة عشان تقولينها لي ..؟!
حصة: بصراحة لا .. بس سواف من يوم ما رمستيه هاك اليوم وهو متغير .. مب سيف وربي واحد ثاني .. حتى الكل حاس بتغيره .. ولو ما يحبج ما تغير ..
موزة: خليه يتغير حق عمره .. بس أنا ما يجرب صوبي ..
حصة: عطيه فرصة ثانية ..
موزة: حصة خليج ف مكاني .. واللي صار لي صارلج .. شو بتسوين ..؟! بتسامحينه وبتسوين نفسج جأن ماصار شي ..؟!!
حصة: وربي معج حق .. بس صدقيني سيف يستاهل فرصة ثانية
موزة: خليني أنسى اللي صار قبل عشان أقدر أعطيه فرصة ثانية
حصة: شو يعني ما بتظهرين تسلمين عليه ..؟!
موزة: لا مب ظاهرة .. ليش أسلم عليه شو يقربلي ..؟! أخويه .. ولد عمي .. ولد خالي .. واحد من هلي ..؟!!
حصة: ع راحتج .. بس فكري زين ترا سيف شاريج ويبيج ..
موزة: بليز حصة غيري السالفة ..
حصة: أوكي ..
موزة: صج نسيت أقولج ..
حصة: شو ..؟!
موزة: أحمد يدري إنج هنيه ..؟!
حصة: هيه سلمت عليه وأنا داشة ..
موزة: أحينه بيحشرني ..
حصة: ليش ..؟!
موزة: أول ما تروحون .. بيدش عندي بيقولي رمستي حصة عني ..؟!
حصة: بخصوص شو ..؟!
موزة: تسوين نفسج مب فاهمة شي .. على ماما يا بابا .. مب كأنج هاك اليوم مرمسة وياه من ورايه وأنا يا غافلين لكم الله
حصة: أعوذ بالله منج .. ما قلنا شي
موزة: حتى لو جان المفروض تقولين لي ..
حصة: نسيت
موزة: مرة ثانية بليز لا تنسين ..
حصة: صج صج يبيلج ذبح .. المهم قوليلي بلاه أخوج ؟!
موزة: احم .. يحبج يا قمر ..
حصة: شو ..؟!
موزة: أونج تفاجأتي .. مب إنتي عارفة إنه يحبج
حصة: لا والله .. ابداً مب مبين عليه ..
موزة: وإنتي ..؟!
حصة: أنا شو ..؟!
موزة: شو تحسين صوبه ..؟!
حصة: أقولج الصج وما تعلقين ..
موزة: قولي ..
حصة: بصراحة معجبة فيه .. وبشخصيته .. ماشاء الله ..
موزة: أهاا زين شي طيب .. يعني نيي نخطب ..؟!
حصة: حياكم الله
موزة: طالعوا ها .. هالكثر منتزقة ..
حصة: شسوي ف البيت بروحي لا شغله ولا مشغله
موزة: محد قالج تودرين دراستج ..
حصة: أوف أنا ما صدقت أخلص الثانوية ..بعد أكمل دراسة .. لا شكراً ما أبي .. وعاد ف نص الدراسة بيي المعرس وبيقولي خليها .. يعني درست ع الفاضي ..
موزة: إنزين .. إنتي عادي عندج تيين هنيه ..؟! ترا حياتنا غير عن حياتكم ..؟!
حصة: وشو غير فيها .. بالعكس حياتكم حلوة ..
موزة: خلاص عيل بقول حق أحمد إنج موافقة ..
حصة: مب بهالسرعة عاد .. بيقول صج هاي منتزقة ..
موزة: أوكي بس ما عليييج بذله مذلة لين أقوله ..
حصة: هيه جيه أباج ..
موزة: مبارك عليج أحمد .. صدقيني ما بتندمين أخويه وأعرفه ريال والنعم فيه ..
حصة بابتسامة: الله يبارك فيج .. هيه صح شو اليوم بتداومين ..؟!
موزة: ما تشوفيني أزهب أغراضي ..
حصة: وما بتظهرين تسلمين ع سيف ..؟!
موزة بنص عين : لا مب سايرة ..

دش أحمد ف هاللحظة ..

موزة: هيي إنته .. ليش ما تدق الباب .. شو ها داش جيه ..؟!
أحمد: السموحة منكم .. بس سيف بيروح ويبي حصة ..
حصة: أحينه بظهر ..
أحمد: ما يلستوا عندنا .. حاولت أقنعه .. بس يقول عنده شغل ..
حصة: ما عليه بنيي مرة ثانية .. ترا حتى إنتو ما تيون عندنا
أحمد بابتسامة: جان تبونا بنيي ..
حصة: حياك الله ف أي وقت ..
أحمد: تسلمين والله
موزة: شرايكم أظهر .. عشان تاخذون راحتكم بالرمسة ..
داست حصة موزة ع ريولها ..

موزة: آآآآي .. حشا شو هااا ..
حصة: تستاهلين ..
أحمد: عاد لا تقاطعونا ..
حصة: إن شاء الله ..

سار أحمد .. وحصة استلمت موزة .. كانت شوي وتذبحها لو ما ذكرت ربها وهدتها ..

موزة: صج دفشة .. الله يعين أخويه ..
حصة: محد غيرج دفش .. واسمعي إنتي يا آنسة دفشة أنا بآخذ أخوج ورضيتي وإلا نرضيتي مالج إلا سيف تفهمين ..
موزة: لا والله شو بكيفج هو .. بعدين أبويه ما بيرضى أروح العين .. أبويه يبا يبنيلي هنيه ملحق بس عشان ما أخليه ..
حصة: ها أحين .. لين يصير الشي رسمي ما بيردنا أبو حميد ..
موزة: أونج وايد واثقة ..
حصة: هيه نعم ..
موزة: ياللا وريني عرض كتافج يا حلوة خليني أتزهب لأني ع الساعة 5 بروح الجامعة ..
حصة: صج دبة .. مب منج من اللي إييج ..

سلمت حصة ع موزة وظهرت عشان يروحون بيتهم .. وسيف تضايج وايد لأن موزة ما ظهرت .. وعقب ما ركبوا سيارتهم وراحوا طرش لها مسج بس موزة ما انتبهت عليه ف ما شافته .. لأن أحمد دش غرفتها يبا ياخذ منها العلوم ..

أحمد: أكيد رمستوا عني ..؟!
موزة: هيه ..
أحمد: وشو قالت..!؟
موزة: ما قالت شي ..
أحمد: شو يعني ما قالت شي ..؟!
موزة: إنت تبيها ..؟!
أحمد: هيه
موزة: تحبها ..؟!
أحمد: وايد
موزة: خلاص رمس أبويه وروح اخطبها ..
أحمد: صج ..؟!
موزة: شفيك .. ما بتردك لو رحت صدقني .. إنت بس سير
أحمد: اليوم إن شاء الله برمس أبويه
موزة: مب كأنك وايد مستعيل..!؟
أحمد: لا
موزة: وين بتسكنون ..؟!
أحمد: أنا أحين بخطبها .. وببدا أبني هنيه ف البيت .. البيت واسع ببنيلي صالة وغرفة ويا الدبليو سي .. وخلاص
موزة: أوووه تطورنا وقمنا نقول دبليو سي ..
أحمد: شو تتحسبين ..
موزة: المهم يعني إنت حاسب حساب حق كل شي ..
أحمد: هيه ..
موزة: أوكي .. خلاص الله يوفقك ياخويه ..
أحمد: آمين يا رب ..

ظهر أحمد من عند موزة .. اللي سارت تتمسح حق الصلاة .. وصلت العصر وعقبها زهبت عمرها .. ويلست تتريا أحمد إيي م الصلاة لأن هو اللي بيوديها .. انتبهت ع مسجين بتليفونها .. طبعاً توقعوا من عند منو .. أكيد سيف ..

المسج الأول .. :

لهالدرجة كارهتني ..؟! حتى ما ظهرتي تسلمين عليه وأنا اللي ياي بس عشان عيونج .. ربي يسامحج .. "

والمسج الثاني .. :

جيتك شقا يا مشغل الفكر كله
جيتك مواجع هم وآهات وأحزان
جيتك غريب وغيرك القلب مله
وكلي للقاء حيل عطشان
جيتك ولحن الصبا عازفه شله
جيتك بشوق اللي فقد شوف خله
خله بعيد وزود الشوق هجران
جيتك حبيبي والغلا في محله
وزود الغلا في بحر الأشواق غرقان
جيتك سماح وما حصل منك زله
طالب رضاك وجيتي خير برهان
ياللي غرامه خافقي مستحله
ترا حبيبك وافي العهد ما خان
جيتك حبيني جاوب القلب قله
إنك على عهدك وما زلت للآن

قرت موزة المسجات وطنشت .. مالها خلق ترد عليه .. تبا تعلمه درس ما ينساه عشان يحرم مرة ثانية يكرر اللي سواه .. معها او مع غيرها .. يا أحمد وخذ جنطتها وهي سارت تسلم ع أمها وأبوها عشان تروح الجامعة ...!



نهاية الجزء
ترقبوا الجزء السادس عشر​

 

[أم حور]

(( طولت بالي وخذها اليوم لك شكراً ما ينزل الراس دام الروح بي حية))


الجزء السادس عشر

السكن الجامعي
يوم الأربعاء
الساعة 10:12 مساءاً

فوز برع وميرة يالسة ف الغرفة يذاكرن حق الإمتحانات النهائية .. عطوهم أسبوع حق المذاكرة وقررن إيلسن ف السكن ع الأقل يكونن مع بعض لأن فوز بروحها ف البيت حمد كل وقته ف المكتب .. وميرة من عقب ما ملج أخوها عبدالله الأسبوع اللي طاف حست إنها ما تبا تيلس ف البيت .. مقهورة وايد ع خولة وف نفس الوقت تبا تعطيهم خصوصية شوية قبل لا تيي العروس اليديدة البيت ..


دشت فوز الغرفة كانت ميرة فاتحة الكتاب وتسوي تلخيص حق المقرر ..

فوز: هلا
ميرة: أهلين ..
فوز: شو خلصتي .؟
ميرة: لا لسه .. وإنتي ..؟!
فوز: الحمدلله خلصت الشباتر اللي حددتها حق اليوم
ميرة: شرايج عيل أشرحلج عشان إدش المعلومة بسرعة وأخلص..
فوز: تبين تغثيني بالقانون ..؟!
ميرة: القانون مب مغثة بالعكس بتستانسين ..
فوز: هاتي أشوف ..
ميرة: أوكي .. المقرر اسمه قانون الأحوال الشخصية .. يعني زواج طلاق نفقة ميراث وجيه .. وأنا بشرحلج أحينه أسباب الطلاق
فوز: خل نعرس قبل .. وعقب طلقينا ..
ميرة: لا إنتي إذا عرستي بخليج تخلعي هههههه
فوز: أعوذ بالله منج .. خليج بعيد عني الشيمة ..
ميرة: لا تهذربين وايد .. اسمعي شو بقولج .. أول شي تخيلي إني الدكتور وإنتي الطالبة ..
فوز: إن شاء الله دكتور ..
ميرة: المهم عندنا أسباب الطلاق تقريباً 11 .. أول سبب الطلاق للعلة .. شو يعني ..؟!
فوز: الضرر ..؟!
ميرة: لا مب الضرر .. الطلاق للضرر ها بروحه سبب .. الطلاق للعلة يعني الريال أو الحرمة واحد منهم فيه علة تخلي الحياة بينهم مستحيل تستمر وهالعلة لا يرجى برء منها يعني ماشي أمل ف الشفاء منها .. والعلة إما عقلية أو عضوية ..
فوز: طيب وإذا شي أمل بس يبيلها فترة ..؟!!
ميرة: ف هالحالة يعطونهم مهلة سنة كاملة .. إذا شفت العلة خلاص ما يتطلقون .. بس إذا عدت السنة وماشي فايدة خلاص يتحقق الطلاق ..
فوز: أهاااا .. انزين ياللا كملي ..
ميرة: عندنا سبب ثاني اللي هو الطلاق لعدم أداء الصداق ..
فوز: هاي مفهمومه يعني يتطلقون إذا الريال ما دفع المهر حق حرمته ..
ميرة: هيه بس هنيه نفرق بين شيئين .. شوفي إذا الريال ما دش ع حرمته يتطلقون ف حالتين : إن الريال ما عنده أموال عشان ياخذون منها المهر أو الريال ف عسر أو مجهول حاله والمدة اللي حددها القاضي عشان يدفع فيها المهر انتهت وهو مب دافع ..

بس شوفي إذا الريال دش ع حرمته ف ما يطلقونها ويبقى المهر دين ف ذمته ..
فوو: أووووف ..
ميرة بنص عين: لا تتأففين .. ما عندي طلبة يتأففون ..
فوز: عورتي راسي ..
ميرة: يالويه ها بينفعج باجر لي بغيتي تتطلقين ..
فوز: ومنو قالج بعرس عشان أتطلق ..
ميرة: وييييه تبين تذبحين سلطان العرب إنتي .. لا بويه من تخلصين دراسة بنزوجكم
فوز: صخي لاه .. لازم تدخلينه ف كل رمسة .. ما عندج سالفة غيره .. كملي شرحج أبرك لج ..
ميرة: بشرحلج نوع وبنوقف شرح لليوم ..
فوز: إنزين بسرعة .. أنا يوعانة ترا ..
ميرة: أنا بعد .. أقولج خل نطلب ..
فوز: أوكي .. من وين ..؟! بيتزا هت وإلا كنتاكي ..
ميرة: لا كنتاكي أحسن ..
فوز: إنزين شتبين ..؟!
ميرة: أبا زنجر واطلبيلي سلط ..
فوز: لحظة عاد بدق عليهم ..

دقت فوز وقالتلهم شو يبون .. عطتهم البيانات اللي طلبوها .. وقالوا لها الطلبية توصل عقب نص ساعة ..

فوز: عندج نص ساعة تخلصين فيها شرح
ميرة: ربع ساعة بس تسدني .. وإنتي خلج ويايه مب تسرحين وإلا بطردج م الكلاس
فوز: أبركها من ساعة والله ..
ميرة: ترا صج بطردج ..
فوز: طالعوا هاي صدقت روحها دكتور .. الشرهة مب عليج الشرهة عليه أنا يالسة أسمعج عشان أساعدج تحفظين ..
ميرة: بس انزين ما بقول شي خليني أخلص هالسبب عشان أفتك ..
فوز: إنزين ..
ميرة: عندنا بعد طلاق للغياب والفقدان ..
فوز: غياب وفقدان ..؟!
ميرة: هيه إذا غاب الريال عن بلاده أو محل اقامته تقدر الحرمة تطلب الطلاق بس قبل لازم المحكمة تعطيه إنذار إنه يعيش وياها أو ياخذها تعيش وياه أو يطلقها .. ويعطوه مهلة من 4 شهور لسنة .. والمادة مية وعشرة تقول إن زوجة المفقود أو الغايب اللي مب معروف مكانه أو محل اقامته تقدر تطلب الطلاق للضرر وتحكم المحكمة بالطلاق عقب مدة ما تقل عن سنة من تاريخ الغياب أو الفقدان ..
فوز: انزين بسألج احينه ليش يطلقونها بس عشان بعيد عنها يعني مثلا يشتغل ف بلاد ثانية او ف مكان بعيد .. الريال وظروفه يمكن ما يقدر ياخذها معه
ميرة: فديتج الحرمة ما بتطلب الطلاق هنيه إلا إذا كانت خايفة ع نفسها تسوي شي غلط .. يعني زوجها بعيد ومب حاسة إنها متزوجة وحد يلعب عليها وتجاريه .. تخونه مثلاً ..
فوز: أعوذ بالله جان شي حريم يخونن أزواجهن ..
ميرة: ليش نسيتي سالفة حرمة أخو موزة ..؟!
فوز: هيه والله
ميرة: المهم خلصنا حق اليوم .. وباجر بشرحلج الباجي ..
فوز: لا فديتج ما أبا يسدني شرح اليوم ..
ميرة: ليش ما عيبج شرحي ..؟!
فوز: أهم شي إنتي تكوني فاهمة .. انا ما بيسألوني هالأسئلة ف الإمتحان ..
ميرة: أنا فاهمة .. مسد كول أكيد وصلت الطلبية خل نييبها ..

يابن الطلبية .. وتعشن وعقبها سارن يرقدن .. عشان ينشن باجر من وقت يذاكرن ..!


السكن الجامعي
" أيام الإمتحانات "

يوم الثلاثاء
الساعة 2:05 صباحاً


فوز: خذي فديتج ..
ميرة: تسلم إيدج .. تصدقين كنت محتاية حق نسكافيه أحس راسي يعورني ولسه جدامي وايد على ما أخلص ..
فوز: ربي يسلمج .. ياللا اشربي النسكافيه .. وكملي مذاكرتج .. وعقبها ارقدي ساعتين لوقت الإمتحان ..
ميرة: إن شاء الله ..
فوز: أنا بظهر عنج عشان ما تهذربين ويايه وتخلصين بسرعة
ميرة: وين بتروحين ..؟!
فوز: بسير أذاكر خاري ..
ميرة: لو مكانج برقد دام ما باجلج إلا امتحان واحد وعقب 3 أيام
فوز : أحسن أخلص دام ما فيني رقاد .. وبعدين عشان أحمسج حق المذاكرة لأني لو رقدت إنتي بعد بترقدين وعادي باجر إدشين الامتحان وإنتي مب مخلصة ..
ميرة: هيه والله
فوز: ياللا أشوفج عقب ..
ميرة: أوكي .. فواااز ..؟!
فوز: هلا فديتج ..
ميرة: مشكورة وايد .. بصراحة ما أعرف شو كنت بسوي بدونج
فوز: نحن خوات شهالرمسة يا ميرة .. هالأمور مب بينا ..
ميرة: تسلمين يا أحلا أخت
فوز: ذاكري أحينه وخلي عنج الهذربة ترا الساعة 2 وثلث
ميرة: إن شاء الله ..


يوم السبت
الساعة 1:10 ظهراً

فوز: السلام عليكم
ميرة: وعليكم السلام .. هلا والله .. هاه بشري شو سويتي ف الإمتحان ..؟!
فوز: الحمدلله جان حلو ..
ميرة: الحمدلله .. مبارك عليج فديتج نهاية الإمتحانات ..
فوز: الله يبارك فيج .. عقبالج
ميرة: آمين يا رب ..
فوز: مواز بعد بتخلص بالإثنين ..
ميرة: صج ..؟ حلو عيل يوم الإثنين بنحتفل ..
فوز: فالج طيب ..
ميرة: خلاص إنتي ما بتداومين ..؟
فوز: لا .. ليش ..؟!
ميرة: وسلطان العرب .. ما سلمتي عليه ..؟

سرحت فوز أول ما انذكر اسم سلطان ..

ميرة: فووز .. نحن هنا ..
فوز: شو ..؟!
ميرة: أكيد شي صاير بينكم ..
فوز: هيه بس عقاباً لج ما بقولج إلا يوم الإثنين ..
ميرة: وأنا شو يصبرني ..
فوز: عاد أنا ما يخصنيه ..
ميرة: حاسدة ..
فوز: وايد مستانسة إني خلصت .. ولهانة ع أهلي وغير جيه هاي أول مرة أسافر فيها دولة أوروبية .. وأكيد وناستيه أكثر لأني بفتك من هالطالب بدل لا كل يوم مطرش رسالة ..
ميرة: ههههههه ربي يسعدج .. أقولج ترا اخويه هناك شرايج أسير وياج ..؟
فوز: صدج والله .. عزمي ويانا ياللا ..
ميرة: عاد إنتي ما تصدقين .. لا بويه أنا سرت الصيف اللي طاف وقلتلهم أبا أرد ..
فوز: ليش مب حلوة ..؟
ميرة: إمبلا .. بلادهم حلوة حلوة .. بس الوطن ماله مثيل ..
فوز: ههههههههه أونج .. لا صدج ليش بغيتي تردين .. أنا متحمسة وإنتي أحينه بتخليني أتكاسل ..؟
ميرة: كنت بروحي .. يعني ويا سعيد وعلي .. ومب كل يوم نظهر ف الويكند بس ..
فوز :اهاااا .. وأخوج متى بيرد البلاد ..؟!
ميرة: ع شهر 7 تقريباً .. عقب التخرج يعني نهاية شهر 7
فوز: ما شاء الله بيتخرجون ..
ميرة: هيه خلاص .. ها آخر كورس
فوز: الله يوفقهم ..


يوم الاثنين
الساعة 4:20 عصراً


فوز: بلاج تفرين الأوراق جيه .. ينيتي ..؟
ميرة: آآآآه مستانسة يا فوز مستانسة .. أخيرا افتكييييت
فوز: هههههه مبارك عليج الفكة عيل
ميرة: الله يبارك فيج ..
فوز: شو سويتي ف الإمتحان ..؟!
ميرة: الحمدلله حليت وخرفت واخترعت ..
فوز: عسى دوم يا رب ههههه
ميرة: آمييييين .. شووو ..؟
فوز: ههههههههه أسولف وياج ..
ميرة: أدري يالدبة .. صج مواز متى بتيي ..؟
فوز: ع الساعة 6 إن شاء الله
ميرة: أنا بصلي العصر وبرقد .. وعيني ع الساعة 5 ونص
فوز: إن شاء الله ..

سارت ميرة تتمسح حق الصلاة وفوز فتحت اللاب توب ودشت المسن ترمس أختها وتسألها عن أخبار أهلها ..

الساعة 6 وصلت موزة .. ويلسن البنات ويا بعض يسولفن ويفتن علومهن عقب حكرة المذاكرة وضغط الإمتحانات ..

موزة: أنا بروّح باجر العصر ..
فوز: نحن الظهر بنطلع من هنيه ..
ميرة: مواز تعرفين هاي رفيجتج نذلة ..
طالعتها فوز بنص عين ..
موزة: ليش عاد ..؟
ميرة: صاير عندها شي مع سلطان العرب وما رضت تقول لي .. وأنا عندي امتحان أبا أذاكر ف لازم أعرف عشان أذاكر عدل وقالت ما بتقولي إلا اليوم ..
فوز: لو قلت لج بعد ما بتذاكري بتيلسي تفكرين ف السالفة وبتحشريني بأسئلتج ..
موزة: صدج نذالة .. لو انا بموت لين إيي هاليوم عشان أعرف ..
فوز: ههههههه عاد إنتي الفضول بيذبحج وبتروحين فيها ..
ميرة: إنزين عاد لا تذلينا .. قولي شو صار ..؟
موزة: بسرعة يالدبة .. لا تستهبلين ..
فوز: احم سيري ييبيلي ماي قبل ..
ميرة: أقولج نذلة ..
فوز: ممممم بقول بس بليز بدون تعليقات سخيفة ..
موزة: إن شاء الله بس إنتي رمسي ..
ميرة: أول شي .. الزمان ..؟
فوز: السبت الساعة 12 وربع تقريباً ..
ميرة: المكان ..؟
فوز: قاعة الامتحان ..
ميرة: الشخصيات ..؟
فوز: فوز وسلطان العرب ع قولتج ..
بطلت موزة عيونها .. : شوو إنتي وياه بروحكم .. مستحيل ..؟
فوز: سخيف والله .. تمنيت الأرض تنشق وتبلعني ولا أنحط ف هالموقف ..
ميرة: التفاصيل ..؟
فوز :

كنا نمتحن وع آخر الوقت تقريبا .. ومحد ف الكلاس غير أنا وبنت اسمها خديجة .. وطبعا الأخ والدكتور .. ظهرت خديجة وأنا مخلصة بس كنت أراجع حلي إذا ناسية شي .. رفعت راسي إلا الحبيب يطالع صوبي ..

خلصت وزقرت الدكتور عشان أعطيه الورقه .. وأشوفه ينش وإيي صوبنا وعطا الدكتور ورقته .. وطبعا الدكتور ما صدق خبر إن خلصنا ع طول خذ الأوراق وطلع .. خذيت أنا أقلامي وأغراضي وكنت بظهر

سلطان: فوز ..

أول ما سمعت اسمي ع لسانه .. حسيت إن قلبي طاح .. ويا راسه خرعني .. كنت أبا أشرد بأي طريقة .. ف مشيت عنه ..

سلطان: فوز ..؟
فوز: نعم أخويه .. بغيت شي ..؟

كنت عاطيته ظهري وعقب طالعت صوبه .. وكانت بينا مسافة لا بأس فيها ..

سلطان: شحالج فوز ..؟
فوز: خاطريه أعرف شو تبا مني ..؟
سلطان: كل ها .. وما تعرفين شو أبا منج .. وربي مصيبة ..
فوز: أخويه إذا عندك شي قوله .. ما عندك خلني أروح ترا مب حلوة وقفتنا ويا بعض هنيه ..
سلطان: أنا أخاف عليج أكثر منج ومن نفسي .. ما بطول عليج .. هاج ..
فوز باستغراب: شو ها ..؟
سلطان: القصيدة اللي وعدتج اعطيج إياها ..

خذيت الورقة وشقيتها قطعة قطعة وحطيتها ع الطاولة ..

فوز: اسمع يا ولد الناس .. خلك بعيد عن طريقي .. ترا والله ما بيصير طيب ..

مشيت عنه وزقرني بس لبسته .. ومع ذلك ما برد فواده لين ما قال اللي ف خاطره ..

موزة: شو قال ..؟!!
ميرة: شووو ..؟!!!
فوز: أحبج وعشان جيه متحمل كل شي منج .. وما بتنازل عنج مهما سويتي .. تفهمين ..

موزة: أنا عقب اللي سواه الشيخ سيف ما أصدق أي حد ..
ميرة: بس مافي شي يجبره يتحمل إهانات فوز لو مش صادق بحبه ..
فوز: أوكي على فرض إنه صادق .. شو أسويله ..؟
موزة: بردي فواده وقوليله إنج بتوافقين عليه جان يا يخطب ..
فوز: ف عينج .. فديتج الواحد لو يبا يخطب بروح حق أهل البنت وبيسألهم .. مب إيي حق البنت يقولها والله أبيج تقولين لي إذا ييت بتوافقين أو لا .. ليش ما إيي ع أساس إنه ما يعرفني .. بس هالحركات ما تطوف عليه ..
ميرة: يعني إنتي ما تبيه ..؟!
فوز: ما أدري .. بس ما أحس بأي شي صوبه ..
موزة: طبيعي دام عقلج وتفكيرج عند محمد ..
ميرة: خلاص يا فوز قوليله إنج ما تبينه ..
فوز: مواز هو يدري بهالشي .. يدري إني أحب شو يخليه يتمسك فيني .. تخيلن الفترة الأخيرة تقولن جأنه مترصدلي .. ما أتحرك مكان إلا ف ويهي .. وطبعا عقب ما يشوفني لازم يطرش رسالة وعاد شو يكتب مستانس لأني شفتج .. ما شاء الله منورة اليوم ومن هالكلام .. بذمتكم هاي رمسة واحد غرضه شريف بس محد غيري بيعرف صدقه م جذبه ..
ميرة: إلا صج إنتي ليش شقيتي القصيدة .. أحينه نبا نعرف شو فيها ..؟
فوز: أعرف شو فيها ..
موزة: شو ..؟
فوز: قصيدة جان قايلنها ف أمسية جروب الانجلش عاد أونه بيتفلسف .. قال هالقصيدة حق ناس بين الحضور أتمنى يسمعوها ويحسوا بكلماتها .. وعقبها طرشلي رساله يشكرني ع الحضور وقال إن القصيدة كانت لي وراح إييبها لي عشان أقراها وأتمعن فيها عدل ..
ميرة: يا عيني ع الرومانسية .. أنا حاسة إنه يحبج ..
موزة: وما طرش شي جريب ..؟
فوز: أصلا هو كل يوم يطرش رسالة .. وأظن أحينه مطرش .. بس أنا لسه ما دشيت النت ..
موزة: افتحي اللاب توب خل نشوف ..
فوز: ياربيييييي يا موزة شكثر فضولية ..
موزة : أبا أقرا ..
فوز: إنزيييين ..

فتحت فوز اللاب توب ودشت النت عشان تشوف رسالة سلطان .. وطبعاً مثل ما توقعت جان مطرش لها رسالة .. :

"

مساء الخيـر ..

فوز .. إنتي ما تعرفين شكثر أنا أحبج .. وأتمنى قربج .. ما تعرفين شكثر إنتي شاغلة تفكيري .. وما تعرفين شكثر أغار عليج .. وربي عدم ردج ولا مبالاتج مسبب لي تعب نفسي .. إنتي حياتي كلها .. ما أقدر أعيش بدونج ..!

قسم بالله ما حبيت إنسان مثل ما حبيتج .. وما تمنيتج إلا لي وبس .. وما أبا أي شي يبعدني عنج .. ما تعرفين شكثر حالتي النفسية زفتة والسبب إني ما بشوفج لعقب الإجازة ..

المهم .. أتمنى بس تعطيني من وقتج عشان تفكرين باللي أسويه تعرفين صدقي من جذبي .. وتتأكدين من صدق مشاعري ..
أتمنالج رحلة سعيدة حبيبتي ..
ديري بالج ع روحج .. وأتمنى تردين بالسلامة
فمان الله

"
فوز علامات تعجبها تزيد يوم عن يوم ..

موزة: شت شو ها ..؟ فوز حرام عطي الريال فرصة ..
ميرة: ترا أقولها بس ما تسمع الرمسة ..
فوز: ومحمد ..؟!
ميرة: محمد لو يبيج يدل طريقج .. ودامه ما تحرك خلاص .. عطي غيره فرصة ..
فوز: وليش ما عطيتي راشد هالفرصة يا ميرة ..؟؟
ميرة: لأني أحب سعيد .. وصعب أوافق غ غيره وأنا بعدني أحبه
فوز: عيل أنا بعد صعب أوافق ع سلطان وانا أحب محمد .. وغير جيه خلكن م العواطف .. إذا غرضه زين البيت يدله وخلصنا ..
موزة: صج هو شدراه إنج بتسافرين ؟
فوز: ما أدري والله .. خلونا من سالفته والله صج استكربت .. اليوم مخلصات امتحانات عشان تغثني بهالمخلوق ..
ميرة: إنزين خلاص صكي اللاب توب .. خلينا ناخذ علوم موزة ..
موزة: علوومي ..؟ أي علوم ..؟
ميرة: ما أدري عنج .. قولي قولي ..
موزة: شو أقول ..؟
ميرة: منو الشيخ سيف ..؟!
موزة: ههههههههه ياربي كيف ترصد الرمسة ..
فوز: شو عبالج .. ترا ميرة اللي تبا تسمعه بتسمعه واللي ما تبا تسمعه بتطنشه ..
ميرة: هههههههه لا والله .. بس يالسة أفكر منو الشيخ سيف ..
موزة: خلكم منه الشيخ سيف .. محتشر يباني أسامحه عقب سواد ويهه .. بس يشوف منو بيرد عليه ..
ميرة: هههههههههه سواد ويه مرة وحده .. شو مسوي ..؟
موزة: عديم القلب والإحساس .. خاين مثل هالناس .. حسبته مخلص ووافي ..
فوز: بس خلاص خلاص .. شو بتغنين ..
موزة: من حرتي فديتج ..
ميرة: ههههههههه أنا بينكم وطلعت ما أعرف شي ..
فوز: ترا هالسالفة صارت ف الإجازة .. وإنتي بعيييييد .. نحن التقينا وفتينا العلووم عنج ..
موزة: صح ما خبرتج فواز .. أحمد أخويه بيخطب حصة ..
فوز: صج ..؟
موزة: هيه ..
فوز: بالمبارك والله .. وأخوج حميد شحاله ..؟؟
موزة: والله ع حاله من يوم ما طلق مريم .. وأبويه يالس ع راسه يبيه يعرس ..
فوز: خلوه شوية ليمن ينسى .. اللي صار له مب سهل ..
ميرة: هيه والله ..


مطار هيثرو الدولي
يوم الأحد
الساعة 8:00 صباحاً


حاولت ترقد في الطايرة بس ما قدرت .. بسبب المطبات الهوائية اللي كانت طول الرحلة .. أما حمد ف كالعادة من ركب الطايرة ولين ما وصلوا وهو راقد ..
فوز مب متعودة ترقد .. لا ف السيارة ولا الطايرة .. يلست تقرا رواية فوضى الحواس لأحلام مستغانمي .. الرواية مشوقة بس حست بنعاس وقالت بتحاول تنام .. وفعلاً تغطت وغمضت عيونها بس بدون فايدة .. عقبها فتحت التي في تشوف البرامج المعروضة .. بس بندته ع طول ويلست تفكر بالأحداث اللي صارت لها الفترة الأخيرة .. وخصوصاً الأشياء اللي اكتشفتها فوز عن سلطان عقب ما رمست هبه عنه .. وسألتها شو يبا منها .. رد هبه صدمها وعشان جيه ع طول دشت النت وطرشتله رسالة ..

حمد: فوز .. الساعة جم ..؟
فوز: 7 ونص ..
حمد: وصلنا يعني ..؟
فوز: هيه كلها نص ساعة وبننزل ..
حمد: أنا بروح أتغسل ..

نش حمد .. وفوز يلست ترتب أغراضها خلاص ما باجي شي كلها نص ساعة بالكثير وبتحط الطايرة ع أرض المطار .. وبتشوف أهلها .. ولهانة عليهم وايد ..!

الساعة 8 وعشر .. طلعوا حمد وفوز عقب ما خذوا جناطهم .. وكانوا أهلهم يتريوونهم .. سلموا عليهم .. وخذوا أغراضهم وركبوا التاكسي اللي بيوصلهم البيت ..!

أم حمد: كيف كانن الامتحانات يا فوز ..؟
فوز: الحمدلله أمايه ..
أبو حمد: وشو الرحلة .. عسى ما تعبتوا ..؟!
حمد: أبداً .. حتى ما حسينا فيها ..
فوز: احم .. لو سمحت لا تعمم .. قصدك إنت ما حسيت فيها ..
ريم: أكيد جان راقد ..؟
فوز: هيه ..
أبو حمد: وإنتي فوز ..؟
فوز: والله يا بويه ما قدرت أرقد .. الرحلة بطولها جان فيها مطبات هوائية ..
أبو حمد: ياللا ما عليه .. أهم شي وصلتوا بالسلامة ..
فوز: إلا صج ندوووش وين ..؟
ريم: ندوش راقدة خليناها ف البيت ..
فوز: بروحها ..؟
ريم: هيه .. ووصيت عليها راعية البيت تطل عليها بين فترة وفترة ..
فوز: كيف تخلونها بروحها .. أخاف تسويلها شي ..؟
ريم: بعيد الشر شو بتسوي الحرمة طيبة وغير جيه مسلمة يعني تخاف ربها ..
فوز: تحسبت والله ..

أول ما وصلوا البيت .. فوز سارت تشوف أختها .. ولهانة عليها وايد .. وعتها م الرقاد وندى لمن شافتها استانست ..

ندى: فوووووز ..
فوز: هلا حبيبتي ..
ندى: متى ييتي ..؟
فوز: أحينه حبي واصلين .. فديتج ولهت عليج وايد
ندى: وأنا بعد .. بس ما بسافر مرة ثانية عنج ..
فوز: الحمدلله شي تطور .. صرتي تنطقين حرف الراء مثل الأوادم
ندى: وين باباتي وماماتي ..؟
فوز: بالصالة .. ياللا خل نروح عندهم .. حمد بعد ولهان عليج ويبا يشوفج ..
ندى: إنزين ..

يلست فوز عن أهلها شوية .. خذت علومهم وعقبها استأذنت بتروح ترقد لأنها تعبانة وايد .. كانت الساعة وقتها 9 ونص تقريباً .. حتى تعبها ما خلاها تشوف جمال بريطانيا وروعة الجو والطبيعة الخضرا ..!


دشت ريم الغرفة عشان توعي فوز حق الصلاة والغدا .. وفوز من زود التعب أول ما حطت راسها ما حست بشي ..

ريم: فووووز ..
فوز: هاه ..
ريم: نشي يسدج رقااااد بتخيسين علينا ..
فوز: تعبانة خليني أرقد .. بعدني ما شبعت ..
ريم: فديتج .. اللي إيي هنيه ما يرقد .. بس يتحوط
فوز: خليني أريح جسمي وعقب بنش .. ما رقدت من يومين
ريم: إنزين كيفج .. بس ترا احينه بيي حمد وبيوعيج بطريقته ..
فوز: أوووف خلاص بنش ..
ريم: ياللا بسرعة أشوف ..
فوز: نشيت .. الساعة جم أحينه ..؟
ريم: 1 ونص ..
فوز: متى يأذن الظهر ..؟
ريم: مأذن عاد من ربع ساعة ..
فوز: إنزين ..
ريم: هيه ما قلت لج .. أبويه خذ لج بطاقة حطيتها ع الطاولة عقب ركبيها ف تليفونج ..
فوز: إن شاء الله ..

سارت فوز تتغسل وتتمسح عشان تصلي .. وعقبها نزلت تحت تشوف أهلها .. كانت أمها ف المطبخ تزهب السفرة وسارت تساعدها .. حطوا الغدا وتغدوا وبعد الغد أبو حمد وأم حمد ساروا يرقدون .. وندوش سارت تلعب ف الحديقة ويا عيال الحرمة راعية البيت .. أما حمد ف يالس ع اللاب توب ويرمس فطيم ع المسن .. وريم تذاكر ف الصالة ..!

فوز سارت فوق .. فتحت اللاب توب ودشت المسن .. كانت ميرة داشة المسن فهالوقت .. وع طول رمستها .. :

" بين الضلوع الحدب أنا كنت مخفيك لأني أحبك فوق حبي لذاتي" (فوز) : السلام عليكم



" كلهم يبغون قلبي وإنت بس اللي خذيته " (ميرة) : وعليكم السلام والرحمة .. هلا والله هلا .. شحالج يالغلا ..؟!

" بين الضلوع الحدب أنا كنت مخفيك لأني أحبك فوق حبي لذاتي" : بخير ربي يعافيج .. شحالج إنتي ..؟

" كلهم يبغون قلبي وإنت بس اللي خذيته ": بخير دامج بخير .. هاه متى وصلتوا ..؟!!

" بين الضلوع الحدب أنا كنت مخفيك لأني أحبك فوق حبي لذاتي": ع الساعة 8 الصبح ..

" كلهم يبغون قلبي وإنت بس اللي خذيته ": الحمدلله ع السلامة

" بين الضلوع الحدب أنا كنت مخفيك لأني أحبك فوق حبي لذاتي": ربي يسلمج ..

" كلهم يبغون قلبي وإنت بس اللي خذيته ": شو الجو عندكم ..؟

" بين الضلوع الحدب أنا كنت مخفيك لأني أحبك فوق حبي لذاتي": لين أحينه ما شفت الشمس ^_^ والجو بارد وحلو وينزل مطر خفيف ..

" كلهم يبغون قلبي وإنت بس اللي خذيته ": يا حظج والله .. لو تيي تشوفين شو مسوي الحر فينا هنيه .. ملعوزنا ..

" بين الضلوع الحدب أنا كنت مخفيك لأني أحبك فوق حبي لذاتي": ههههههه الله يعينج عيل .. أخاف لبداية الداوم تصيرين سوووودة ..
" كلهم يبغون قلبي وإنت بس اللي خذيته ": فال الله ولا فالج ..

" بين الضلوع الحدب أنا كنت مخفيك لأني أحبك فوق حبي لذاتي": هههههههههه أتخيلج والله .. المهم ما قلتيلي شخبارج إنتي وشخبار الأهل .. وشو الإجازة ..؟

" كلهم يبغون قلبي وإنت بس اللي خذيته ": كِل شي منيح .. والإجازة مملة .. ما عندي شي أسويه يالسة بس ع النت ..

" بين الضلوع الحدب أنا كنت مخفيك لأني أحبك فوق حبي لذاتي": توها بادية وتقولين مملة ..؟!!!

" كلهم يبغون قلبي وإنت بس اللي خذيته ": تدرين بعد بروحي ف البيت .. عبدالله أغلب وقته برع .. وخولة ف بيت أهلها من جم يوم .. وعلاوي لسه جدامه شهر لين إيي ..

" بين الضلوع الحدب أنا كنت مخفيك لأني أحبك فوق حبي لذاتي": وخولة ليش ف بيت أهلها ..؟!! زعلانة شو ...؟؟


" كلهم يبغون قلبي وإنت بس اللي خذيته ": بيني وبينج حالتها النفسية دااااون من عقب ملجة عبدالله .. وهي أصلا كانت تتريا دوام المدارس يخلص عشان تروح بيت أهلها .. قالت بتيلس هناك لعقب العرس ..

" بين الضلوع الحدب أنا كنت مخفيك لأني أحبك فوق حبي لذاتي": الله يعينها .. بصراحة موقفها صعب .. يعني تشوف حرمة ثانية تاخذ منها ريلها .. لا وبعد راح يكونن ف نفس البيت ..



" كلهم يبغون قلبي وإنت بس اللي خذيته ": تصدقي أنا مش خايفة إلا م المشاكل .. يعني حتى لو هي اللي مختارة العروس بس بعد الغيرة تسوي وايد .. وحرمتين ف نفس البيت وايد صعب ..!

" بين الضلوع الحدب أنا كنت مخفيك لأني أحبك فوق حبي لذاتي": طيب أخوج ليش خلاهم ف نفس البيت ..؟؟

" كلهم يبغون قلبي وإنت بس اللي خذيته ": ها هو شرط خولة ما تبيه يكون بعيد عنها ..

" بين الضلوع الحدب أنا كنت مخفيك لأني أحبك فوق حبي لذاتي": ياللا الله يجدم اللي فيه الخير .. وترا أولاً وأخيراً أخوج جان بيعرس دامه يحلم باليهال والله يعطيه ع قد نيته ..

" كلهم يبغون قلبي وإنت بس اللي خذيته ": آمين يا رب .. ما قلتيلي .. شخباره سلطان العرب ..؟! يطرشلج رسايل وإلا وقف ..؟؟

" بين الضلوع الحدب أنا كنت مخفيك لأني أحبك فوق حبي لذاتي": تدرين عاد .. أنا أكره أرمسج لأني أدريبج ما ترومين ما تسألين عنه ..

" كلهم يبغون قلبي وإنت بس اللي خذيته ": هههههههههههه شو أسوي بعد الصراحة كاسر خاطريه ..

" بين الضلوع الحدب أنا كنت مخفيك لأني أحبك فوق حبي لذاتي": لا فديتج لا يكسر خاطرج .. ترا هو مب أحسن عن غيره ..
" كلهم يبغون قلبي وإنت بس اللي خذيته ": ليش شو مستوي ..؟؟

" بين الضلوع الحدب أنا كنت مخفيك لأني أحبك فوق حبي لذاتي": وايد أشياء استوت .. تدرين قلتلكم بسأل هبه عنه .. وياليتني ما سألت ولا عرفت ..

" كلهم يبغون قلبي وإنت بس اللي خذيته ": ليش عاد .. شو قالت لج ...؟!!!

" كلهم يبغون قلبي وإنت بس اللي خذيته ": بخبرج لمن أشوفج ..

" كلهم يبغون قلبي وإنت بس اللي خذيته ": شوووو ..؟؟ إنتي ما تيوزين عن حركات النذالة .. لا فديتج أحينه بتقولين وإلا عادي أركب أول طيارة حق لندن وأيي أترفس ف كرشتج ..

" بين الضلوع الحدب أنا كنت مخفيك لأني أحبك فوق حبي لذاتي": هههههههههههههه كنت متوقعة الصراحة .. إنزين بقوولج ترا مب إنه شي يستاهل ينقال بس بقول ..

" كلهم يبغون قلبي وإنت بس اللي خذيته ":ياللا أسمعج .. أقصد أشوفج .. اكتبي اللي صار ..

" بين الضلوع الحدب أنا كنت مخفيك لأني أحبك فوق حبي لذاتي": رمست هبه .. وقلت لها أبا أسالج ف موضوع بس أبغيج تجاوبيني بكل صراحة ..

هبه: تفضلي الغلا .. أسمعج ..
فوز: إنتي تعرفين سلطان صح ..؟!
هبه: سلطان اللي يدرس ويانا .. هيه أعرفه ليش ..؟؟
فوز: أقصد بينكم معرفة شخصية ..؟!!
هبه: من قالج هالحجي ..؟
فوز: أنا ما ياية أفتح وياج استجواب .. أنا كل اللي أبا أعرفه هو شو يبا مني ..؟!!
هبه: ما فهمت ..
فوز: سلطان يطرش لي رسايل ع المنتدى من فترة .. أونه يحبني ويبيني .. وبصراحة أنا هالرمسة مب داشة عقلي .. يعني مب إني تعاملت وياه عشان يكون في بينا حب او يحس بشي صوبي ..
هبه: هو قالج جيه ..؟
فوز: هيه ..
هبه: بصراحة ما أدري ..
فوز: هبه مب معقولة ما تدرين .. بليز قولي كل اللي تعرفينه ..
هبه: ما أدري يا فوز .. أنا ما أعرف إنه يحبج إلا منج أحينه .. صحيح نحن نرمس ويا بعض .. بس هو دايماً يقولي إنه يكرهج .. وما يطيق إييب سيرتج ع لسانه ..
فوز باستغراب: يكرهني ..؟!
هبه: هيه ..
فوز: وليش عاد .. شمسويتله .. مآكله حلاله ..؟!!!
هبه: عاد ما أدري والله ..
فوز: ودامه يكرهني ليش قالج تسألين عن مشاعري صوبه ..؟
هبه: مب هو اللي قالي اسأل ..
فوز: هبه .. سلطان قال كل شي ..
هبه: أوكي هو بس أنا جذبت لأنه قالي ما أخبرج ..
فوز: بس إنتي حلفتي إن هو ما يخصه ف السالفة ..
هبه: صار اللي صار عاد .. وهو فعلاً قالي اسأل لأنه يلاحظ إنج وايد تطالعينه ف قال يمكن ف خاطرج شي صوبه ..
فوز: لا والله ما بطالعه إلا هو ..
هبه: ها كل اللي صار .. وسلطان يقرب لنا م بعيد وكنا متواصلين ويا بعض .. بس عقب صارت مشاكل وأنا أحينه ما أعرف شي عنه ..
فوز: أوكي .. مشكوورة وايد لأنج حافظتي ع الثقة اللي بينا ..
هبه: فوز .. وربي جان غصب عني .. أنا أتحسب غرضه شريف .. وعشان جيه كنت أساعده ..
فوز: تساعدينه .. هاي هي آخرة ثقتي فيج يا هبه .. ما قصرتي والله ..
هبه: أتمنى إنج تسامحيني .. وأنا آسفة ع اللي سويته .. بس هو لو ما يحبج ما يا لعندج وقالج ولا سأل عنج ..


" كلهم يبغون قلبي وإنت بس اللي خذيته ": ما شاء الله عليها وعليه .. وشو سالفة الكره بعد .. ترا مش فاهمة شي .. يقولها إنه يكرهج .. ويرد يقولج أحبج .. كيف تستوي هذي ...؟!!

" بين الضلوع الحدب أنا كنت مخفيك لأني أحبك فوق حبي لذاتي":أقولج أول ما بندت عنها حسيت راسي بينفجر .. وبصراحة تنرفزت وايد من أسلوبها وياي .. وطبعاً ما سكتت طرشتله رسالة .. وبردت حرّتي فيه ..


" كلهم يبغون قلبي وإنت بس اللي خذيته ": ورد عليج ..؟!!

" بين الضلوع الحدب أنا كنت مخفيك لأني أحبك فوق حبي لذاتي":هيه .. برسالة طويلة عريضة .. قبل لا أسافر رديت عليها عشان أنهي الموضوع ..

" كلهم يبغون قلبي وإنت بس اللي خذيته ": شو قالج ..؟!!!
" بين الضلوع الحدب أنا كنت مخفيك لأني أحبك فوق حبي لذاتي": وايد كلام .. أول شي أتمنى إنج تفهمين كلامي عدل .. وتستوعبين كل كلمة بقولها لج .. وعقبها اتخذي القرار اللي يناسبج وأنا راضي فيه ..
أنا عمري ما كرهتج .. ما أنكر قلتها هالكلمة ع لساني بس قلبي ينكرها .. وأكيد تبين تعرفين ليش ..؟! جان دايماً يوصلني إنج ترمسين عني بالشين .. وإنج تقولين إنج تكرهيني .. وإني شايف نفسي وايد ومغرور .. ومن هالكلام .. وبصراحة كردة فعل طبيعي أنا قلت إني أكرهج .. بس هالشي مب معناته إني ما أحبج ..

أنا حبيتج إنتي .. حبيت كل شي فيج .. مع إني أدري إن قلبج عند واحد ثاني .. وأدري إنج ما تبادليني المشاعر .. بس أنا متمسك فيج للنهاية .. رغم عنادج وأسلوبج وياي .. تخيلي شكثر أنا أعاني والسبب لا مبالاتج وإهمالج .. وعدم استيعابج لمشاعري ..!

بصراحة إنتي وايد جرحتيني .. وأنا عمري ما انجرحت بهالطريقة .. يعني عقب هاك الحب كله وعقب كل الكلام اللي قلته تروحين تسألين أنا شو أبا منج ..؟!! ما عرفتي شو أبا ..؟!! أبيج لي .. أبيج تكونين زوجة لي ع سنة الله ورسوله ..!

أنا خسرت أهلي وزعلت ناسي عشانج .. الكل حاط أمل إني بآخذ بنت عمي .. بس أنا قلت لهم غيرج ما أبا .. منعت أي حد يدش حياتي بس عشان تكونين إنتي فيها .. !

يا فوز إنتي غيرتي حياتي .. كل اللي يعرفوني كانوا يقولون إن ما عندي إحساس .. وإن قلبي حجر .. بس إنتي حولتيني لشخص ثاني .. أو بالأحرى حبج هو اللي حولني لإنسان ثاني .. أنا أحبج يا فوز وتأكدي إن مهما صار .. عقب ما أكون نفسي باب بيتكم بدجه برضاج أو غصب عنج .. لأني شاريج ومستحيل أفرط فيج .. إنتي لي أنا وبس فاهمة وإلا لا ...!!
أنا ما بضغط عليج .. أنا أبيج تسافرين وتفكرين ف كل شي صار .. تفكرين ف رمستي وكلامي .. فكري ف كل شي سويته عشانج .. وعقبها قرري .. هيه أو لا ..؟! أتريا ردج عقب ما ترجعين م السفر .. وصدقيني راح أتقبله مهما جان ..!

وربي لو تعرفين شكثر سفرج مأثر فيني .. ورغم كل شي أقولج ديري بالج ع روحج واهتمي ف نفسج .. وطمنيني عليج بليز ..
أحبج ..!

" كلهم يبغون قلبي وإنت بس اللي خذيته ": أنا اللي عورني راسي من ها كله .. شرايج إنتي ..؟! صدقتيه ...؟!!

بين الضلوع الحدب أنا كنت مخفيك لأني أحبك فوق حبي لذاتي":
بصراحة رمسته أثرت فيني .. أنا وايد صديته .. ومع ذلك يحاول .. لا وشو قال .. أونه هبه ما يخصها هو جان يستغلها عشان يعرف الأشياء اللي عرفها عني .. وجان يسألها دوم عن مكاني ولهالسبب كان دوم يصادفني .. وطبعاً هي بحسن نية تجاوب ما تدري إنه هو يحبني ..

" كلهم يبغون قلبي وإنت بس اللي خذيته ": إنتي شو تحسين صوبه ...؟!!!

" بين الضلوع الحدب أنا كنت مخفيك لأني أحبك فوق حبي لذاتي": ما أقدر أحس بشي .. بصراحة أنا مب مطمنة .. واتصاله ويا هبه مب مريحني .. هي تقول يقرب لها من بعيد بس أنا شاكة ف أمر هالعلاقة ..

" كلهم يبغون قلبي وإنت بس اللي خذيته ": أنا أقولج .. ابعدي عن الشر وغنيله .. ولين ما تخلصون دراسة .. إذا يا يخطب أثبت صدق حبه ونيته وساعتها ما أعتقد إنج بتبين وقت تفكرين .. وإذا ما يا خلاص إنتي مب خسرانة شي لأنج ما انتظرتيه .. وإذا حد سبقه وخطبج لا تفكري فيه فكري ف اللي ياينج وشوفي مصلحتج وين ..

" بين الضلوع الحدب أنا كنت مخفيك لأني أحبك فوق حبي لذاتي":أنا أصلاً رديت عليه وقلت له ما يحتاي أفكر .. وعطيته ردي وصكرت خاصية الرسايل عشان أتجنب أشوف أي رسالة منه .. ياية هنيه أبا أنسى كل شي يذكرني بالدراسة وبالناس اللي شفتهم فيها ..

" كلهم يبغون قلبي وإنت بس اللي خذيته ": تبين الصج أحسن لج بدل عوار الراس .. استانسي بإجازتج ولا تفكرين ف شي موول ..

" بين الضلوع الحدب أنا كنت مخفيك لأني أحبك فوق حبي لذاتي": لا توصين فديتج .. بخليج أحينه الظاهر إنهم بيظهرون .. بنش أتزهب حق الظهرة ..

" كلهم يبغون قلبي وإنت بس اللي خذيته ": أوكي فديتج وديري بالج ع روحج .. وسلامي حق الأهل ..

" بين الضلوع الحدب أنا كنت مخفيك لأني أحبك فوق حبي لذاتي": إن شاء الله الغلا .. بقولج وإنتي بعد سلمي بس ع منو بتسلمين هههههه

" كلهم يبغون قلبي وإنت بس اللي خذيته" : هههههههه هيه والله ترا محد هنيه .. ياللا فمان الله ..
" بين الضلوع الحدب أنا كنت مخفيك لأني أحبك فوق حبي لذاتي": مع السلامة ..

بندت فوز المسن .. وسارت تتزهب لأنهم بيظهرون يحوطونها ف المنطقة اللي ساكنين فيها .. تغسلت ولبست لها ملابس مناسبة حق الظهرة .. وسارت تيلس ف الصالة الأهل كلهم زاهبين عدا حمد اللي مب عارف شو يلبس .. يلبس ويبدل من نص ساعة ولين أحينه ما استقر ع شي ..!!!


نهاية الجزء
ترقبوا الجزء السابع عشر

​

 

[ذات أثر]

اسجل حضوري . . *

 

[أم حور]

اسجل حضوري . . *

حضوركِ تشريف يآ غلآ !
سلمتِ​

 

[أم حور]

(( طولت بالي وخذها اليوم لك شكراً ما ينزل الراس دام الروح بي حية ))

الجزء السابع عشر


بيت أبو عبد العزيز
يوم الثلاثاء
الساعة 7:14 مساءاً

تمت خطوبة أحمد ع حصة يوم اليمعة .. وموزة من عقبها يلست عند أختها أسبوع تغير جو .. ميثة وزوجها ظاهرين ياخذون أغراض حق البيت .. وموزة يالسة مع روضة ف الصالة .. دق تليفونها كانت نورة رفيجتها هي اللي متصلة .. فردت عليها وخذت علومها ..

نورة: شخبارج مواز ..؟
موزة: الحمدلله بخير .. شخبارج إنتي ..؟ يالقاطعة صايرة شرات هلال العيد ..
نورة: وربي ولهانة عليج وعلى فواز وايد ..
موزة: حتى نحن ولهانين عليج ..وفوز دوم تسألني عنج ..
نورة: تسأل عنها العافية يا رب .. إلا هي شحالها ..؟
موزة: الحمدلله بخير .. سافرت قبل فترة بريطانيا ..
نورة: اهااا .. عشان جيه أدق عليها جهازها مغلق .. ومتى بترجع ..؟!
موزة: على حد علمي بيلسون شهرين .. بس جان تبين بطرشلج رقمها هناك ..
نورة: أوكي .. المهم أنا داقة أعزمج ع عرسي .. وإن شاء الله البطاقة بتوصلج البيت ..
موزة: شو .. عيدي الرمسة ما سمعت ..؟
نورة: أقولج داقة أعزمج ع عرسي ..
موزة: بتعرسين ..؟ متى وليش وكيف ..؟
نورة: ههههههههه بلاج مواز .. شوي شوي علي ..
موزة: إنتي من صدقج وإلا تجذبين عليه ..؟
نورة: لا ما أجذب .. زواجي عقب أسبوعين ..
موزة: قوليلي كل شي بسرعة .. منو المعرس وكيف عرفتيه .. وليش وافقتي عليه و و و
نورة: تحيدين سالم ولد عمي .. رمست مرة عنه جدامج ..
موزة: اللي قلتي إنه يحبج ويبيج
نورة: هيه ..
موزة: أخيراً .. حليله ذليتيه من زود ما ترفضينه ..
نورة: وهو ذلني من كثر إصراره ووافقت ..
موزة: ومقتنعة فيه وإلا بس جيه ..؟!
نورة: ما أدري أنا لين أحين أشوفه مثل خلوف .. يمكن عقب الزواج تتغير هالنظرة ..
موزة: مليار مبارك يا نورة .. وربي يسعدج إن شاء الله
نورة: ربي يبارك فيج .. والله يسمع منج .. ومب تتعذرين يسد إن فوز مب فالبلاد وما بتحضر ..
موزة: لا إن شاء الله بحضر .. أفا عليج جم نوارة عندنا ..
نورة: تسلمين والله .. بخليج أحين ولا تنسين اطرشين رقم فوز
موزة: إن شاء الله أحينه بطرشه
نورة: مع السلامة
موزة: ربي يحفظج

بندت نورة عن موزة .. اللي استغربت عدم وجود روضة بالصالة .. ويلست تزاقرها بس ما ترد عليها ..

موزة: ياربي .. هذي وين سارت ..؟!

مشت صوب الباب الرئيسي .. عشان تظهر تشوفها خاري ووقفت مكانها أول ما شافت سيف ف ويهها ..

سيف: شحالج مواز ..؟!
موزة: الحمدلله .. ممكن توسع لي .. أبا أظهر ..
سيف: لا هب ممكن .. لازم نرمس
موزة: ف شو ..؟ أعتقد رمسنا وايد وخلصنا ..
سيف: رمسنا .. بس ما خلصنا .. موزان أنا أحبج
موزة: وأنا ما أحبك .. فلا اتعب نفسك ع الفاضي ..
سيف: بتعبها .. لأني أدري إنج تحبيني بس تكابرين
موزة: لا ما أحبك يا سيف .. ووخر عن طريقي .. روح حق حبيبة القلب مايا ..

مشت موزة عنه بتروح دارها .. بس سيف جان أسرع منها ووقف جدامها ..

سيف: وربي ودرتها من هاك اليوم .. وما عدت أرمسها ولا أرمس غيرها .. أنا أبيج إنتي وبس .. ليش مب قادرة تحسين فيني
موزة بعصبية: مب قادرة أحس ..؟! كنت شوي وأموت وأنا أسمع رمستك وياها .. غلا قلبي .. وفديتج .. ولهان عليج .. وحياتي وحبي .. حط نفسك ف مكاني .. تخيل أنك يالس ويا واحد م الربع وأنا اتصلت عليه وخلاه سبيكر .. وسمعت نفس الرمسة اللي إنت قايلنها حق مايا .. شو بيكون إحساسك ..؟! وقتها وأنا ممثلة جدامك دور العاشقة الولهانة وأرمس غيرك .. فكر زين يا سيف وراح تعرف حجم الغلط اللي ارتكبته ف حقي .. وراح تعرف إن آسف ما تبري الجرح اللي سويته ف قلبي ..

سارت موزة دارها تركض .. بس هالمرة كانت أقوى ما سمحت لنفسها تبجي ع انسان ما يستاهل ..!
أما سيف .. رمسة موزة عورتله قلبه .. وع طول ظهر م البيت وركب سيارته يلف ف الشوارع مب عارف وين يسير ..!

أول ما شافت روضة عمها ظاهر دشت البيت .. هو جان متفق وياها تخليه بروحه عند موزة عشان يرمسها .. وتوقف برع تشوف ابوها وأمها لمن إييون وتقوله ..

سارت فوق تشوف خالتها .. موزة قافلة الباب ما تبا ترمس حد ..

روضة: مواز فجي الباب
موزة: شتبين..؟
روضة: ليش قافلة الباب .. أبا أيلس عندج
موزة: ما أبا أشوف حد ولا أرمس حد .. خليني بروحي يا روضة
روضة: ليش شو صار ..؟!
موزة: ما صار شي
روضة: عميه ضايجج ف شي ..؟
موزة: لا .. ولا تطرينه لي .. وروحي منيه لأني تعبانة وأبا أرقد
روضة: أوكي ع راحتج

سارت روضة تشوف أختها سارة لقتها راقدة .. وعقبها سارت بيت يدها تشوف حصة إذا رجعت م دبي او لا لأنها رايحة تشوف أختها مهرة .. سألت يدتها عنها وقالت لها إنها يات وأحينه ف دارها وسارت روضة صوب دار عمتها حصة .. دقت الباب ودشت

روضة: هلا عمووووه ..
حصة: هلا رويض .. شحالج ؟؟
روضة: الحمدلله .. شخبارها عمتيييه ...؟؟
حصة: الحمدلله بخير ..
روضة: والبيبي شحاله ..؟؟
حصة: عسل .. فديته والله كنت بييبه ويايه بس ما رضت ..
روضة: ههههههه شو بترضعينه وبتحفظينه .. وبتهتمين فيه ..؟
حصة: سخيييييفة .. قوليلي شعندج يايه هنيه .. وليش خليتي مواز بروحها ..؟؟
روضة: شو أقولج .. مواز قافلة الدار ومب راضية تفج الباب
حصة: ليش شو مستوي ..؟
روضة: عميييه سيف قالي يبا يرمسها وأنا ظهرت عشان ياخذون راحتهم .. وعقبها شفته ظاهر معصب ولمن دشيت هي كانت ف دارها وقالت ما تبا تشوف حد ولا ترمس حد ..
حصة: تهقين شو صار بينهم ..؟
روضة: شدراني .. أخافها تزعل والله ..
حصة: مواز قلبها طيب .. خلينا نروح نشوفها ..
روضة: إنتي رمسيها أنا بيلس هنيه عند يدووه وعقب بييج
حصة: اظهري ببدل ملابسي وبتغسل وبصلي العشاء وعقبها بسير أشوفها
روضة: مب تتأخرين .. لا ترقد
حصة: ما بتأخر ..

سارت روضة تيلس عند يدتها .. وحصة خلصت شغلها وعقبها سارت عند موزة تشوف شفيها .. أكيد تناجروا هي وسيف .. أخويه ها ما أدري متى بيعقل وبيخلي البنت ف حالها .. كانت ف إيده .. وضيعها .. شو يبا بعد ...؟!!!


بــريطـانيا

البيت / أبو حمد
يوم الإثنين
الساعة 2:24 ظهراً


ريم قبل شوية واصلة م الجامعة .. بدلت ملابسها وصلت وارتاحت ليمن يحطون الغدا .. كانت فوز وياها ف الغرفة ويالسة تطالع الناس اللي خاري .. جدام البيت اللي ساكنينه كلية .. وتشوف الطلاب سايرين رادين عليها ..

فوز: ليش ما درستي فهالكلية ..؟!
ريم: اللي يدرسون فيها تخصصهم هندسة بس ..
فوز: وإلا جان بتريحين .. فرة حصاه وتوصلين بدل عذاب الباص
ريم: هيه .. بس حتى الجامعة مب بعيدة عشرين دقيقة بالباص وأحياناً أقل ع حسب الزحمة ..
فوز: أهااا .. وكيف الدراسة هنيه ..؟
ريم: صعبة .. بس ممشين الحال .. كأنها أمي تزقرنا خل ننزل نتغدا ..
فوز: أوكي ..

نزلت فوز تحت .. وزهبت السفرة ويا أمها كالعادة .. وتيمعوا كلهم ع الغدا ..
أبو حمد: باجر السبت .. وين تبونا نسير ..؟!
حمد: نسير العاصمة قبل .. وعقب المناطق الثانية
فوز: وأنا رأيي من راي حمد ..
أبو حمد: خلاص عيل باجر بنوديكم تتحوطون ف لندن ..
ندى: باباتي ..
أبو حمد: هلا حبيبتي
ندى: أبا أروح الملاهي ..
أبو حمد: إن شاء الله .. ما يصير خاطرج إلا طيب باجر بوديج وين ما تبين ..

كملوا غداهم .. وعقبها كل واحد سار يرتاح .. عدا فوز وندى .. فوز يلست تطالع التليفزيون .. وندى كانت يالسة عندها وعقبها ظهرت خاري تلعب في المطر .. جان مطر خفيف ينزل والجو كالعادة حلو وبارد
مر من صوبها الطالب اللي تعود كل يوم يرمسها .. من لمن يات بريطانيا ..

سعيد: شحالج حبوبة ..؟!
ندى بابتسامة: إنته هنيييه .. أنا بخير
سعيد: شو يالسة تسوين بروحج ..؟!
ندى: يالسة ألعب ..
سعيد: وينج من جم يوم ما أشوفج ..
ندى: من وصلوا خواني فوز وحمد ما نيلس هنيه .. كله نظهر
سعيد: أختج اسمها فوز ..؟!
ندى: هيه ..

تذكر سعيد رفيجة ميرة فوز .. اللي شافها جدام السكن لمن كانوا رايحين إييبون ميرة ..

سعيد: إنزين أتخبرج متى بتردون البلاد ..؟!
ندى: ما أعرف .. بعدنا يالسين .. لين تيي المدرسة
سعيد: مش ولهانة ع المدرسة ..؟
ندى: امبلا ولهانة .. المعلمة من شهر أحينه ما تيي
سعيد: ليش ..؟!
ندى: باباتي يكول إنها سارت تزور أهلها ف اسكوتلندا
سعيد: ومتى بترجع ..؟!
ندى: ما أعرف

انتبهت فوز إن ندى مب موجودة .. وسارت تشوفها وين .. صعدت فوق محد .. ونزلت تدورها ف الحديقة .. بعد محد .. الحديقة ورا البيت وندى متعودة تروح تلعب ويا عيال راعية البيت .. شافتها ف المطبخ بعد محد ..

فوز: ياربي .. وين بتروح ..؟!! أستغفر الله العظيم ..

لبست شيلتها .. وظهرت خاري تشوفها .. وتفاجأت أول ما شافتها يالسة ترمس ويا واحد .. ويهه مب غريب عليها .. عقب ما دققت ف ملامحه .. عرفت منو هو .. كانت مرة تسأل ريم إذا شي عرب ف المنطقة .. وقالت لها إن شي طلاب خليجيين يدرسون ف الكلية وكل يوم تقريباً يمرون من جدام بيتهم ومرة مروا وراوتها إياهم ..!

وقفت من بعيد وزقرتها ..

فوز: ندى .. ندى .. تعالي شو تسوين هناك ..؟!!

ندى: سعيد .. هذي هي فوز .. لحظة لا تروح بخليها تسلم عليك
سعيد بابتسامة: إنزين ..

سارت ندى تركض صوب اختها .. ويودتها من إيدها وشدتها صوب سعيد .. وفوز متفاجأة من تصرف اختها ..

ندى: فوز .. this is my friend . his name is saeed and saeed this is my sister. Her name is fouz
سعيد: السلام عليكم ..
فوز: وعليكم السلام والرحمة ..
سعيد: السموحة منج .. بس ندى أصرت إنها تعرفني عليج .. تقول إنها وايد تحبج ..
ندى: فوز .. سلمي عليييييه ..

فوز مب مستوعبة اللي قاعد يصير وياها .. وما عرفت شلون تتصرف .. وفاجأتها اختها وايد وهي ترمس انجلش ..

فوز: ندى خل ندش داخل ..
ندى: ما أبا .. بيلس عند سعيد ..
سعيد: ندى أنا بروح ..
ندى: ليش ..؟!
سعيد: بس جيه .. ياللا أشوفج باجر زين .. وسلمي ع باباتج
ندى: إنزين ..

سار سعيد .. وصورة فوز ف باله .. يحس إنه يعرفها .. يمكن ذكرته بفوز رفيجة ميرة .. بس هو ما عرف إنهن نفس الشخص لأنه ويه فوز ما جان واضح وايد لمن شافها عند السكن الجامعي ..!

ندى: ليش إنتي جيييه ..؟!
فوز: شو ليش بعد .. يالسة ترمسين ويا واحد غريب لا وبعد ساحبتني وياج أسلم عليه ..
ندى: سعيد مب غريب .. أنا كل يوم أشوفه وأرمسه من يوم وصلنا.. وهو طيب وايد .. أحياناً يرمس ويايه إنجلش ..
فوز: حتى لو .. مب حلوة يا ندى .. شو بيقول الريال عنا ..
ندى: خلاص إنزين .. إنتي مب لازم ترمسينه .. أنا برمسه
فوز: أوكي خلينا ندش داخل ..
ندى: ما أبا .. فوز
فوز: شو تبين بعد ..؟!
ندى: لا تزعلين .. أنا ما أحبج يوم تعصبين وتزعلين
فوز بابتسامة: ما بزعل .. بس لا تتصرفين جيه مرة ثانية
ندى: إنزين .. ممممممم فوز
فوز: هلا ..
ندى: خلينا نروح نتحوط ..
فوز: وين ..؟!
ندى: بنروح هاك الصوب .. وبندور وبنرجع ..
فوز: ما يصير حبيبتي ..
ندى: ليش ما يصير ..؟!
فوز: كلهم راقدين أحينه .. ما يصير نظهر وهم ما يدرون .. أخاف نظهر وعقب لمن ينشوون يدورون علينا ..
ندى: إنزين طرشي مسج ع تليفون ريم وخبريها .. أبا أروح اتحوط
فوز: أوكي .. بروح أييب المظلة والجاكيت وبيي ..
ندى: and my jacket please
فوز: ok my darling

سارت فوز داخل تييب جاكيتها وجاكيت ندى والمظلة .. وظهرن يتحوطن ف المنطقة .. الحواطة صارت هواية يومية بالنسبة لفوز بس مع أهلها .. يعني إذا مب أمها ف مع ريم أو حمد .. هذي أول مرة تظهر بروحها ويا ندى بس ..

فوز: ندوووش قوليلي منو علمج ترمسين إنجلش جيه ..؟!
ندى: المعلمة كل يوم كانت تيي تعلمني .. بس عقب سارت عند أهلها ف اسكوتلندا .. وسعيد بعد كل يوم لمن إيي يرمسني إنجليزي ويعلمني شلون أرد عليه ..
فوز: حلو .. بتحطمين الدنيا إنتي عيل لمن تداومين المدرسة
ندى: هيه بغلبهم كلهم .. فوز ..؟
فوز: هلا فديتج ..
ندى: تعرفين هذيج الشقة منو يسكن فيها ..؟!!
فوز: منو ..؟!
ندى: سعيد .. ووياه واحد يكربله اسمه علي
فوز: وإنتي شدراج ..؟!
ندى: مرة كنا نتحوط هنيه أنا وباباتي وشفت سعيد وسلم علينا
فوز: ما شاء الله عيل العائلة كلها تعرف ها سعيد
ندى: هيه .. وباباتي عزمهم ع الغدا عندنا بعد
فوز: صج والله ..
ندى: هيه وماماتي اطرشلهم ورا بيتر أكل أحياناً ..
فوز: بيتر ولد راعية البيت ...؟؟
ندى: هيه

دق تليفون فوز ف هاللحظة .. وردت عليه .. كانت نورة هي اللي متصلة فيها .. وفوز تفاجأت م الإتصال حست إن نورة عندها شي بتقوله ...!


شقة علي
يوم الإثنين
الساعة 3:14 ظهراً


وصل سعيد الشقة .. وهو يفكر ف الموقف اللي صار وياه .. وابتسم ع سوالف ندى .. وعلى ردة فعل فوز أول ما شافته .. علي جان يالس ف الصالة .. ميود أوراق أونه يذاكر ..

علي باستغراب: شفيك اليوم ..؟!
سعيد: شو ..؟!
علي: مستانس على غير العادة ..
سعيد: هيه ..
علي: شو مستوي ..؟!
سعيد: وأنا راجع م الكولج مريت ع ندى .. ويلست أسولف وياها .. ظهرت أختها تزقرها وسارت ندى صوبها يودتها من إيدها ويابتها لعندي .. أونها بتعرفني عليها ..
علي: لا والله ..
سعيد: صج والله ..

نش علي من مكانه وسار صوب الدريشة .. المطر بدا ينزل .. ويطالع الناس وف نفس الوقت يرمس ويا سعيد ..

علي: أختها هاي اللي تدرس هنيه ..؟!
سعيد: لا .. اللي يات عقب ويا أخوها
علي: اهاا .. تصدق ..؟
سعيد: شو ..؟
علي: مب بس يودتها ويابتها لعندك عشان تعرفك عليها .. يايبتها لهنيه بعد عشان تعرفها ع شقتنا ..
سعيد: شقصدك ..؟!
علي: تعال شوفها ..

نش سعيد وسار صوب علي يطالعهم من الدريشة .. فوز كانت واقفة ترمس ف التليفون وندى واقفة حذالها وميودة المظلة ..

سعيد: ما شاء الله عليها
علي: منو ..؟
سعيد: ندى
علي: ندى وإلا أختها ..؟!
سعيد بنص عين: شقصدك ..؟!
علي: ماشي
سعيد: حتى أختها ما شاء الله عليها ..
علي: شو ولد الخالة .. كأنه بدينا نحب ..؟!
سعيد: شو ..؟! ما أدري ليش تفكيرك دوم جيه ..؟
علي: شفيه ..؟
سعيد: شفيه بعد .. خايس .. دوم يروح عند الحب .. أخ عليك
علي: هههههههههههه لا بس أشوفك وايد مهتم فيها
سعيد: فمنو ..؟
علي: ندى لاه ..
سعيد: تعيبني .. ولا مرة شفتها متبهذلة أحسها جيه ستايل وذوق وترمس شرات الكبار .. بصراحة ونعم التربية
علي: هم ناس طيبين الصراحة .. شفت أخوها قبل جم يوم وأنا ياي م الكلية .. وسلم عليييه ..
سعيد: صج .. حمد صح ..؟؟
علي: هيه ..
سعيد: أفكر آخذ رقم أبوها أول ما نرد البلاد نعزمهم .. ما قصروا ويانا أي شي يسوونه إييبولنا منه ..
علي: ياربييي المطر زاد .. بلاهن واقفات جيه ..؟!!
سعيد: لا وبعد عندهن مظلة وحده .. طالع ندى ميودتنها .. أنا بنزل بسير أعطيها مظلة مب زين جيه ..
علي: سعيد البيت اللي يسكنون فيه مب من بعده ..
سعيد: حتى لو .. أخاف تمرض أو يصير فيها شي ..

خذ سعيد المظلة وظهر م الشقة .. أول ما نزل انتبهت عليه ندى وسارت عنده وفوز كانت ترمس نورة ومتفاجأة بخبر زواجها ف ما انتبهت عليها لمن سارت ولا انتبهت ع سعيد ..

سعيد: ليش واقفين هنيه ..؟!
ندى: فوز ترمس رفيجتها من ساعة .. طالع المطر كيف ..
سعيد: روحي عطيها هالمظلة ..
ندى: إنزين ..

خذت ندى المظلة وودتها عند فوز اللي خلصت مكالمتها ..

ندى: هاج فوز ..
فوز: من وين يبتيها ..؟!!
ندى: إنتي قبل خذيها وحطيها ع راسج .. طالعي كيف المطر خيسج

خذت فوز المظلة وبطلتها .. وحطتها ع راسها وهي مب عارفة ندى من وين يابتها ..

فوز: من وين هالمظلة ..؟!

ندى أشرت ع سعيد اللي جان يطالعهن .. وفوز طالعت ع المكان اللي ندى أشرت عليه .. وتفاجأت أول ما شافت سعيد اللي عطاها ابتسامة تذوب الصخر ..

فوز: سيري قوليله شكراً .. وتعالي بنرد البيت تأخرنا
ندى: إنزين ..

ندى: سعيد ..
سعيد: هلا فديتج
ندى: فوز تكولك شكراً .. ونحن أحينه بنرد البيت
سعيد: هههههه قوليلها العفو .. وديروا بالكم ع روحكم زين
ندى: إنزين
سعيد: ياللا مع السلامة ندوووشة
ندى: مع السلامة

سارت ندى عند فوز .. وكملوا طريقهم راجعين للبيت .. وفوز مستغربة من تصرفات سعيد الغريبة .. معقولة حبه لندى يخليه يسوي جيه ...؟!!!

أما سعيد فرد الشقة .. وطبعاً يوده علي اللي يالس يراقب الأحداث من فوق ..

علي: شو هالإبتسامات اللي قاعد اطرشهن حق البنت ..؟؟
سعيد: شو تباني عيل..؟ أكشر ف ويهها ..
علي: لا .. ما يصير بعد .. وإلا أونه شو .. خايف عليها لا تمرض
سعيد: ترا ما في شي م اللي ف بالك يا علوووي .. لا تيلس تظهر اشاعات .. يعني لو مكاني ما بتسوي اللي سويته ..؟؟
علي: بسويه .. بس مب مثل حماسك يا ولد الخالة ..
سعيد: أحبها .. بوله عليها وايد لمن نرد البلاد ..
علي: منو تحب ..؟!
سعيد: ندى منو بعد .. علاوي تبيني أترفس ف كرشتك أحينه قول ترا زاهب ..
علي: لا وييييه .. أحسن أسكت .. وهاه صكيت حلجي شو تبا بعد
سعيد: هيه جيه أباك . خلينا نلعب سوني شوية .. قبل لا يأذن العصر ..
علي: أوكي ..



بيت أبو سعيد
يوم الجمعة
الساعة 8:35 مساءاً


ميرة يات بيت خالتها .. لأن عبدالله سافر ويا حرمته شهر العسل .. أمس جان العرس .. عرس بسيط وايد .. وميرة ف البداية كانت مترددة وايد إذا تحضر أو لا .. لأن عبدالله ما سوا شي .. بس المراسيم ف بيت العروس بما إنها أول مرة تعرس وأهلها يبون يفرحون فيها .. محد ف البيت غير ميرة والبشكارة وعشان جيه يات عند خالتها .. خولة بيت أهلها وحالتها النفسية تعبانة من عقب زواج ريلها ..

ميرة يالسة ف الصالة عند بنت خالتها أمون ..

أمون: بلاج ميراني ..؟!
ميرة: بلاني ..؟
أمون: ما ترمسين .. جأنه في شي شاغل بالج ..؟
ميرة: هيه والله ..
أمون: شو ..؟
ميرة: أفكر ف خولة .. وايد أحاتيها
أمون: حليلها خولة ما تستاهل والله .. بس ها كله من عند الله والواحد لازم يرضى بقضاء الله وقدره ..
ميرة: والنعم بالله ..
أمون: إنتي دقيتي عليها تشوفينها ..؟!
ميرة: هيه اليوم العصر رمستها .. ومسوية نفسها عادي تقول عقب ما يرد عبدالله بترد البيت ..
أمون: اهااا .. ما أدري شلون بيعيشن ويا بعض ..؟
ميرة: ها جان شرط من شروط خولة .. بس تدرين ..؟
أمون: شو ..؟
ميرة: أنا خايفة عبدالله يتغير عقب الزواج .. ما أدري أحس كل الرياييل جيه ..
أمون: لا إن شاء الله .. عبدالله يحب خولة مستحيل يتغير عليها ..
ميرة: الله يسمع منج ..

دق تليفون ميرة .. كانت موزة متصلة فيها تسأل عنها .. صار لها فترة ما تعرف شي عنها .. وبما إنها صارت رفيجتهم فالمفروض تدق تتطمن عليها ..

موزة: السلام عليكم
ميرة: وعليكم السلام والرحمة
موزة: شحالج ميراني ..؟
ميرة: الحمدلله بخير .. منو ويايه ..؟
موزة: شو نسيتي صوتي ..؟ وياج مواز
ميرة: مواااز .. شحالج يالدبة ..؟!
موزة: الحمدلله بخير .. السموحة منج خذيت رقمج من عند فوز ..وقلت بدق اسأل عنج
ميرة: فيج الخير والله .. هاه شو الإجازة ..؟
موزة: شو أقولج .. ماشي حالها
ميرة: أونج .. أحيدج كنتي مستعيلة تبين الصيف إيي .. أحينه ماشي حالها ..؟
موزة: شو أقولج ملل .. ما عندي شي أسويه ..؟
ميرة: ما سرتي العين ..؟
موزة: أكرهج قسم بالله ..
ميرة: ههههههههه ليش عاد ..؟
موزة: ما أدري عنج .. أنا داقة أرمسج وأسولف وياج .. لازم تذكريني بالعين ..؟
ميرة: شو ..؟ أكيد صار يديد وياه ..؟
موزة: يعني .. حليله يحاول يراضيني بس أنا طاف .. مطنشة ع الآخر .. خلاص النفس طابت مثل ما يقولون ..
ميرة: علييييه هالحجي ..؟؟! أكيد شي عالق فالفواد فديتج .. بس أونج مسوية نفسج مستقوية ..
موزة: خليها على الله .. تدرين والله أسبوع كامل يقنعون فيني يبوني أسير وياهم صلالة ..
ميرة: شو ..؟ ليكون رفضتي العرض..؟
موزة: هيه طبعاً .. مستحيل أروح معه أي مكان ..
ميرة: حد صاحله يروح صلالة يتحوط .. ويقول لا ..؟
موزة: أنا قلت لا .. دام سيف بروح مب سايرة ..
ميرة: أسمينج بنت أبوج ما تنغلبين ..
موزة: احم .. فديتني والله ..
ميرة: والعرض فاتج خلاص وإلا شي مجال تغيرين رايج ؟
موزة: هههههههههه العرض كله تكنسل فديتج
ميرة: ليش..؟
موزة: ما أدري .. قالوا دام أنا مب سايرة خلاص ما بيسيرون .. وأصلاً خالد ريل أختييه ظهر له شغل ..
ميرة: أهااا .. ما عليه خيرها ف غيرها ..
موزة: وشخبارج إنتي ..؟! شمسوية ف الإجازة..؟
ميرة: والله الحمدلله .. الإجازة حلوة .. أمس جان عرس أخويه عبدالله ..
موزة: عرس ع حرمته ..؟!!
ميرة: هيه ..
موزة: وشخبارها حرمته .. أقصد كيف نفسيتها ..؟
ميرة: ريلها معرس عليها .. وهي مريضة وما تييب عيال .. شو تبين نفسيتها تكون ..؟ أكيد زفته
موزة: ربي يعينها ..
ميرة: آمين يا رب ..
موزة: وفوز ما رمستيها ..؟؟
ميرة: لا والله .. بس أحياناً أشوفها ع المسن
موزة: فديتها والله ولهانة عليها وايد .. ما أدري متى بترد قالت لي بس شهرين ..
ميرة: لا تخافين كلها جم أسبوع وبترد .. هي قالت لي ع بداية شهر 8 بتكون ف البلاد ..
موزة: أهم شي تستانس .. هالإجازة يات فوقتها بالنسبة لها ..
ميرة: هيه والله .. آخر الأيام حالتها النفسية كانت مب لذاك الزود
موزة: وما رمستج عن سلطان العرب ..؟
ميرة: إمبلا .. قالت إنها صكت خدمة الرسايل الخاصة عشان ما اتعب نفسها واتعبه هو بعد ف كتابة التعابير الشفوية
موزة: ههههههه حليله الريال متعذب وياها
ميرة: خليها جيه أحسن .. تمشي ينب الحيطة
موزة: هيه والله .. المهم بخليج أحينه ..
ميرة: اوكي فديتج وتسلمين ع اتصالج
موزة: أفا عليج .. عاد قلت بسمع صوتج وبآخذ علومج
ميرة: فيج الخير والله
موزة: أشوفج ع خير .. ولا تقطعيني وإلا بييج الشارجة وبترفس ف بطنج
ميرة: ههههههههههه لا توصين ..
موزة: فمان الله
ميرة: ربي يحفظج


بندت ميرة عن موزة .. وحست براحة شوية .. سبحان الله ناس ما تجمع بينهم إلا دراسة .. وتشوفهم مثل النسمة ع فوادها .. وناس تعرفهم ويقربون لها وما تأقلمت وياهم هالكثر ..

أمون: منو هاي ..؟
ميرة: رفيجتي ف الجامعة ..
أمون: من عندنا ..؟!
ميرة: لا .. ليش..؟
أمون: لا بس كأنج وايد ماخذة عليها
ميرة: أقولج رفيجتي .. أكيد بكون مآخذة عليها ..
أمون: إنزين أمايه تزقرنا حق العشا .. ياللا نشي ..
ميرة: أوكي .. بس لحظات بطرش مسج وبيي
أمون: أنا بسبقج ..
ميرة: تمام ..

طرشت ميرة مسج حق فوز .. تقولها إدش المسن ع الساعة 10 عشان ترمسها .. ولهانة عليها وايد .. وقالت بالمرة بترمس علي بعد .. قبل لا ينشغل بامتحانات الفاينل وما ترمسه خير شر ...!!


نهاية الجزء
ترقبوا الجزء الـ 18
​

 

[أم حور]

(( طولت بالي وخذها اليوم لك شكراً ما ينزل الراس دام الروح بي حية))

الجزء الثامن عشر


بــريطــانيا

عائلة أبو حمد / البيت
يوم الأحد
الساعة 1:30 ظهراً


هالويكند قررت عائلة أبو حمد إيلسون ف البيت .. بناءاً على طلب ريم .. لأن عندها إمتحانات وتبا تذاكر .. وف نفس الوقت تبا تروح المنطقة اللي بيروحون لها .. اسمها york فقالوا عشانها بيقضون الإجازة ف البيت والأسبوع الياي بيروحون .. عقب ما خلصوا متغدين .. نشوا أبو حمد وأم حمد يرتاحون .. وفوز وحمد وندى ظهروا خاري .. حمد راكب دراجة هوائية ويسوق ف الشارع .. وندى يالسة تزرع نباتات جدام البيت .. أما فوز ف ميودة دفترها وتكتب .. جان المطر ينزل بس بشكل خفيف .. :


أحبك ..
هذا هو اعترافُ قلمي على الورق ..
هذا هو سرّي الصغير ..
أحبك ..
وأتمناك لي وحدي دون سواي ..
لي أنا فقط ..
أحبك ..
وسـ أبقى ..
وإن غبت .. إن تخليت .. إن ابتعدت .. إن عشقت غيري ..
سـ أبقى أحبك ..!
وسـ يبقى حباً مميزاً .. أشعرني بـ نفسي .. بـ قلمي .. وبـ كياني المنكسر ..!

قد يقتلنا الغياب .. وينهينا البعد
ولكنهُ يبقى الحب .. وتبقى الذاكرة ترسم أطيافك في عيني ..
أحبك .. وسـ أستمر ..
إلى أن تضيع من يدي إلى الأبد ..!
أو أضيع أنا
إلى الأبد ....!


ندى: فوووز ..؟؟
فوز: هلا ندوووش
ندى: هدي هالدفتر وتعالي ساعديني ..
فوز: إنزين لحظات بس ..

الوجع جسّدهُ غيابك ..
قتلتني مراتٍ كثيرة .. ولازلتُ أحبك ..
ولكنني أتساءل ..
إلـى متـى ..؟!!

كتبت هالعبارة ف الدفتر وصكته .. وسارت تدخله وعقبها ظهرت تساعد ندى ..

ندى: فوز ..؟
فوز: هلا فديتج ..؟
ندى: أمس شفت سعيد ..
فوز: وبعدين ..؟
ندى: يسلم عليج ..
فوز: الله يسلمه ..
ندى: تدرين فوز ..؟
فوز: شو ..؟
ندى: سعيد كال خلاص بيردون البلاد عكب أسبوع
فوز: صج ..؟
ندى: هيه .. وخلاص مب رادين هنيه مرة ثانية ..
فوز: اهاا .. زين بيفتكون م الغربة .. تدرين عاد أنا ولهانة ع البلاد وايد ..
ندى: حتى أنا .. بس باباتي كال بنرد كلنا ويا ريم
فوز: هيه أدري .. أقولج أنا بروح أييب الكاميرا بصور
ندى: مب تتأخرين ..
فوز: أوكي

دشت فوز داخل .. غسلت إيدها وسارت تييب الكاميرا ..شغلت الفيديو .. ويلست تصور ..

حمد: فوووووز ..؟
فوز: هلا
حمد: صوريني أبا أطرش الصور حق فطيم
فوز: قاعدة أصور فيديو أحينه ..

حمد واقف يتريا فوز تصوره وهي تصرخ عليه تقوله أصور فيديو .. والظاهر إنه ما يسمعها ..

فوز: حمد شفيك .. قاعدة أقولك أصور فيديو ..

أخيراً تحرك حمد من مكانه بالدراجة الهوائية .. وأونه بيستعرض مهاراته .. وفوز كانت مشغولة بتصوير ندى وهي تزرع .. وأول ما سمعت صرخة حمد .. حركت الكاميرا صوبه .. وقدرت تلقط الحركة اللي صارت .. طاح حمد من ع الدراجة .. وفوز تصور وناقعة م الضحك ع شكله .. أما ندى فسارت تركض تشوفه ..

فوز: ههههههههههههه أونك بتستعرض عضلاتك ..
ندى: هههههههههه حمد شكلك حلو ..
حمد: اضحكن شعليكن .. آآخ .. عورتني ريوولي ويا راسج ..

نش حمد وجان يمشي بصعوبة .. وسار ييلس ع الكراسي الموجودة خاري البيت ..

فوز: تعورت ..؟!!
حمد: بس شوية ..
فوز: لا صج والله ..؟
حمد: لا قلت لج .. أقول دخلي الدراجة داخل أنا بدش أتغسل
فوز: عادي أجربها ..؟!
حمد: جربيها .. بس أخاف أطيحين .. طالعي المطر شقايل
فوز: هيه والله .. لا ما أبا أخاطر ..
ندى: أنا بخاطر ..
فوز: فديتج أخاف تتعورين .. خلج ف زرعج أحسن ..

دش حمد داخل .. وفوز دخلت الدراجة داخل البيت وظهرت تشوف ندى شو تسوي ..

ندى: فوز ..؟
فوز: هلا تبين شي ..؟
ندى: هيه تعالي يودي هالنبتة .. بروح داخل أييب السكاية وبيي
فوز: مب تتأخرين ..
ندى: وبروح بعد ..
فوز: وين ..؟
ندى: الـ bath room
فوز: ههههههه إنزين

سارت ندى داخل وفوز يلست ع الأرض وميودة النبتة .. وعقبها قررت تزرعها لين ما ندى تيي ويسقون الزرع .. المطر وقف .. مروا جدامها حرمة وبنتها والكلب حقهم ظاهرين يتحوطون .. قالولها هالووو وردت عليهم وعقبها ساروا .. يلست تطالعهم وتفكر ف حياتهم .. رغم إنهم مب مسلمين .. بس تحس حياتهم حلوة .. هدوء ونظام واحترام ما بينهم .. والواحد يحس بأمان حتى لو جان بروحه .. تفكيرها العميق ونظراتها للصوب اللي راحت فيه العائلة ما خلاها تنتبه حق سعيد اللي واقف جدامها بمسافة ..

سعيد: السلام عليكم .. فوووز ..
فوز: هاه حمد شتبي .. فهاللحظة طالعت فوز ع الريال اللي واقف جدامها وانتبهت إنه مب حمد ..
سعيد بابتسامة: الظاهر كنتي بعيد .. ما انتبهتي عليه .. شحالج..؟
فوز: الحمدلله بخير ..
سعيد: شو كنتي يالسة تزرعين ..؟
فوز: مب أنا هاي ندى ..
سعيد: وينها ..؟ أنا ياي أسلم عليها ..
فوز: أحينه بروح أزقرها لك ..
سعيد: بتيي بروحها أكيد .. لا اتعبين نفسج

سكتت فوز .. وهي حاسة بإحراج من وقفة سعيد ورمسته وياها .. كانت تبا ندى تيي بسرعة عشان تنسحب بهدوء من عنده ..

فوز: تذكرت .. لحظات بس أحينه بييك ..
سعيد: وين بتروحين..؟

ما ردت عليه ودشت البيت ويابت مظلة سعيد عشان تعطيها حقه .. سعيد جان حاس إن فوز بتروح تييب له المظلة ..

فوز: هاك ..
سعيد: شو هاي ..؟
فوز: المظلة اللي عطيتنا إياها هاك اليوم .. السموحة منك ما صارت فرصة نييبها لك ..
سعيد: ومنو قالج إني بآخذها ..؟
فوز: أنا أقول ..
سعيد: خليها لج ..
فوز: شو أباها ..؟ عندي مظلة
سعيد: أدري .. بس أنا بعد ما أباها .. ع نهاية الأسبوع بنرد البلاد وخلاص مش راجعين هنيه مرة ثانية ..
فوز: سوري بس ما أقدر آخذها .. مالي حاية فيها ..
سعيد: اعتبريها هدية ..
فوز: هدية ..؟ شو المناسبة ..؟
سعيد: بدون مناسبة ..
فوز: آسفة ..
سعيد: أوكي ممممممم بمناسبة يوم ميلادج اللي جان قبل أسبوعين وظهرتوا تتعشون برع بهالمناسبة ولا عزمتونا ..
فوز باستنكار: وإنت شدراك ..؟؟

أشر سعيد ع ندى اللي توها ظاهرة م البيت .. وطالعت فوز صوبها .. وفخاطرها تبا تذبح أختها .. صج دبة ما تخبي شي عليه

ندى: سعييييييييد ..
سعيد: هلا والله هلا ..
ندى: فوز ليش ما تكولين إن سعيد هنيه ..؟
فوز: السموحة منج .. خذوا راحتكم أنا بدش .. أخ سعيد لا تنسى تاخذ المظلة وياك .. أنا بحطها ع الكرسي ..
سعيد: يعني مصرة ..؟
فوز: هيه ..
سعيد: شو المناسبة ما أقنعتج ..؟
فوز: لا ..
سعيد: خلاص عيل اعتبريها عربون شكر ع كل اللي سويتوه لنا
فوز: فهالحالة المفروض الهدية تكون حق ندى وإلا أبويه وإلا امييه .. مب أنا
سعيد: أوكي .. أهم شي تكون لكم ..
ندى: أي هدية ..؟
سعيد: المظلة اللي عطيتج إياها هاك اليوم .. أختج ردتها أونها ما تبيها ..
ندى: أنا بآخذها ..
سعيد: فديتج والله ..

وصل علي .. سعيد وعلي متفقين يروحون يتحوطون ويآخذون هدايا حق الأهل .. وعلي جان مب زاهب فقال سعيد بيتجدمه بيشوف ندى إذا ظاهرة أو لا وبيرمسها ..

علي: السلام عليكم .. سعيد شو مب سايرين ..؟
سعيد: هلا علاوي ..

علي جان يطالع ع فوز .. أول مرة يشوفها بوضوح ومن جريب .. وفوز كانت واقفة تطالعه مب عشان شي بس حست إنها شايفته من قبل .. أو يمكن تكون شايفة حد يشبهه .. ميرة وعلي ياخذون من بعض شوية .. بس فوز أبداً ما راح تفكيرها عند ميرة ..

سعيد: بلاك واقف هناك .. قلت بنسلم ع العم محمد وعقبها بنروح
ندى: باباتي راقد ..
علي: وأخوج حمد ..؟؟

دشت فوز داخل بهدوء وبدون لاحد يلاحظها .. وعلي وسعيد جانوا يرمسون ويا ندى ..

ندى: حمد ههههههههههه
علي: شفيج تضحكين يالدبة ..؟
ندى: أنا مب دبة ..
سعيد: إنتي مش دبة .. بس ليش تضحكين ..؟
ندى: لأن حمد طاح جان يسوك الدراجة وطاح
سعيد: ههههههههه صج والله ..؟
ندى: هيه وفوز كانت تصور .. وصورته ..
علي بفضول: فوز تحب تصور ..؟
ندى: هيه تصور .. وتحب تكتب بعد ..

جان بيتعمق أكثر في الأسئلة .. لولا إن حمد ظهر يسلم عليهم عقب ما فوز قالت له .. ويلسوا يسولفون شوية وعقبها استأذنوا الشباب وقالوا بيروحون التاون سنتر واحتمال يمرون ف يوم ثاني عشان يسلمون عليهم ...!!


بيت عبدالله
يوم السبت
الساعة 10:23 مساءاً

ميرة يالسة ف الصالة .. تطالع التليفزيون .. ملانة ومب عارفة شو تسوي .. عبدالله ما رد من شهر العسل بعده .. وعلي أحينه نازل من داره شكله يبا يظهر ..

علي: هلااااااااااوي ..
ميرة: شو الأخو أشوف تحية الإسلام نسيتها من رجعت ..؟
علي: ههههههههه السلام عليكم ورحمة الله وبركاته
ميرة: خلاص مب مقبول أحينه .. خذيت الإثم ونقصت حسنة
علي: أعوذ بالله منج .. شدراج إنتي ..؟ نزل عليج الوحي تقولين جيه ..؟ فديتج ربج أعلم بكل واحد ونيته ..
ميرة: والنعم بالله ..
علي: ملانة صح ..؟
ميرة: تصدق وايد ..
علي: تبين تتحوطين ..؟
ميرة ترمسه بدون لا تطالع ع ويهه : وين ..؟
علي بتفكير: مممممممم شرايج نسير دبي..؟
ميرة: دبي ..؟ شو نسوي ..؟
علي: نتحوط شو بعد ..؟
ميرة: بس أحينه الوقت متأخر ..
علي: هيه والله .. باجر عيل تزهبي م العصر بنظهر ..
ميرة: أوكي ..
علي: عبدالله متى بيرد من شهر العسل ..؟

ميرة جان واصلنها مسج من عند فوز تقولها يديد أخبارها .. ويلست تقرا المسج ونست علي اللي يالس يرمسها ..

علي: ميرووووووه ..؟؟
ميرة: هاه
علي: شفيج أسألج ما تردين عليه ..؟ وبعدين ليش ما تطالعيني لمن تجاوبين على أسئلتي ..؟؟
ميرة: سوري كنت أقرا مسج ربيعتي مطرشتنه لي .. عقب برد عليها .. شو كنت تقول ..؟!
علي: منو رفيجتج ..؟
ميرة: فوز .. اللي ويايه بالغرفة
علي: أهااا .. مبين عليج وايد تحبينها .. لدرجة إني أرمسج ولابستني ..
ميرة: هههههههههه فديتها والله .. طيبة وحبوبة وعليها سوالف .. وما شفت منها إلا كل خير من يوم ما عرفتها .. ف لازم أحبها ..
علي: وايد ناس طيبين .. وحبوبين وعليهم سوالف يات ع هاي ...؟
ميرة: أولاً البنت اسمها فوووووز مش هااااي .. ثانياً طيبة عن طيبة تفرق .. ثالثاً أنا عرفتها هي ما عرفت غيرها را.......
علي يقاطعها: تبيني أخطبها ..؟
ميرة: تخطبها ..؟!
علي: هيه .. تقولين تحبينها ..؟
ميرة: أنا أحبها .. إنت شله تخطبها ..؟
علي: أفكر ع الصيف الياي أعرس ومافي حد فبالي ودامج تحبينها وتمدحينها أكيد راح تسعدني .. وأضمن بعد إنها تحبج وما تصير بينكم مشاكل ..
ميرة: ما أبا أظلم البنت
علي: وليش تظلمينها .. شو شايفتني واحد صايع ضايع بتظلمينها ويايه ..؟
ميرة: لا مش جيه .. بس إنت ما تحبها ولا شايفنها ولا تعرف عنها شي ..
علي: مب لازم .. إنتي تعرفينها .. ولو مب بنت ناس وحشيم ما بترافجينها ..
ميرة: البنت والنعم فيها .. بس ها زواج مش لعبة وبعدين فوز ما تفكر بالزواج إلا ليمن تخلص دراسة ..
علي: خلاص إنزين صكي ع السالفة .. اللي خلق فوز خلق عشر غيرها ..
ميرة: شفيك عصبت ..؟
علي: ما عصبت عادي ..
ميرة: إنزين العضوة اللي اتابع كتاباتها .. شصار عليها ..؟
علي: ولا شي ..
ميرة: مش ع أساس معجب فيها وغيره وغيره ..
علي: فقدت الأمل فيها ..
ميرة: ليش..؟
علي: ما قدرت أعرف عنها شي
ميرة: تحبها ..؟
علي: ما أعرف ..
ميرة: لازم تعرف ..
علي: أفقد حسها بالمنتدى إذا ما دشت .. وأوله عليها قبل لا أوله ع كتاباتها وصورها
ميرة: يعني تحبها ..؟
علي: يمكن
ميرة: أستغرب كيف تحب شخص بدون لا تشوفه أو تعرفه
علي: يكفي إنك تحس بقيمة هالشخص فحياتك عشان تحبه
ميرة: تبيني أساعدك ..؟
علي: ما تقدرين
ميرة: بحاول
علي: ما أدري
ميرة: تأكد من مشاعرك قبل وعقبها أنا مستعدة أساعدك
علي: يصير خير .. أنا بظهر أحينه .. احتمال أسير صوب سعيد شرايج تروحين معي ..؟
ميرة: باجر بمرهم
علي: ع راحتج

ظهر علي .. ويلست ميرة بروحها .. مب عارفة شو تسوي .. قلبت ف القنوات مافي شي .. حطت ع نجوم كالعادة .. كانت ظاهرة أغنية اليازية ..


خلاص ببعد ودرب الـود سديتـه
واليوم رّوح و قلبي راح بسكاتـه
روّح وهذا طريقـك لـي تمنيتـه
ما عاد باقي لقلبـي غيـر ونّاتـه
قطعت حبل الموده وانـت خليتـه
للهم وظنون بالـه تتبـع آهاتـه
صنت المحبه وقلبك صدق داريتـه
وانته خفوقي تركته فـي معاناتـه
شيّدت صرح الغلا لك ..كيف هدّيته
من بعد ذاك الوداد وطيـب نيّاتـه
ليتك تحس بعذابٍ منـك حسيتـه
والصدر ضايق وزادت فيه حرّاتـه
خسارة الدمع لي في حبك اصخيته
وخسارة الجفن لى هلّيت عبراتـه
لكنه اللي بتالـي الامـر عانيتـه
خلاني انسى هوى الغالي ومدراته
هذا كياني تخيّـل كيـف هزّيتـه
ياهي خساره وقلبي راح بسكاتـه



ويلست تدندن وياها .. وعقبها قررت تدق حق فوز بدل لا اطرش لها مسج .. ولهانة عليها وايد صار لها فترة ما رمستها ع المسن .. وكل ما تدش فوز ما تكون موجودة ..
فوز: آلوو .. السلام عليكم ..
ميرة: وعليكم السلام والرحمة
فوز: منو ميراااني ..؟ شحالج يالدبة ..؟
ميرة: الحمدلله بخير .. شحالج إنتي ..؟؟
فوز: والله بخير وعافية .. عاش من سمع هالصوت
ميرة: عاشت أيامج
فوز: شو الأخبار عندج ..؟؟
ميرة: والله ماشي أخبار .. غير إن أخويه وولد خالتيه رجعوا م السفر .. وتوظفوا وخلاص ع بداية الشهر بيداومون ..
فوز: ما شاء الله أخبارج حلوة عيل ..
ميرة: تقدرين تقولين
فوز: وولد خالتج شفتيه ..؟
ميرة: تبين الصج لا .. قلت باجر بروح صوبهم .. لو إني ما أبا أشوفه
فوز: ههههههه لين أحينه معصبة عليه
ميرة: لباجر معصبة عليه .. مش متخيلة إن سعيد تييه الجرأة ويقولي أنا الرمسة اللي قالها ..
فوز: إنسي فديتج لا تكدرين خاطرج ..
ميرة: جان زين أقدر أنسى .. ولد خالتيه شلون أنساه ..؟!
فوز: تقدرين تنسينه .. بس إنتي ما تبين
ميرة: تصدقين .. أحياناً أفكر أقول لو وافقت ع راشد كنت بقدر أنساه .. بس أنا رفضت راشد لأني متمسكة فيه ..
فوز: ههههههههه والله نحن غبيات .. شاغلين بالنا بسوالف الحب والخرابيط .. أنا من ييت هنيه ضربت الكل طاف .. حتى محمد اللي هو محمد ما بقولج نسيته بس تناسيته
ميرة:صج غبيات .. أصلاً سعيد لو يحبني وإلا حتى يفكر فيني مجرد تفكير جان بيّن هالشي أول ما درا برغبة راشد ف إنه يخطبني .. بس هو لا فوق ها كله ياي يهازب ليش رفضته ..
فوز: الله كريم..
ميرة: اسمحيلي فديتج كدرتج بسوالفي .. شخبارج إنتي ..؟ وشو الجو هناك ..؟ عساكم استانستوا ..؟
فوز: تبين الصدج .. وااااااايد .. كل شي حلو هنيه .. وحالياً ف اسكوتلندا .. زرنا العاصمة وأحينه ف جلاسكو ..
ميرة: يا حظج والله .. وشو السكوووتش هناك ..؟
فوز: هههههههههه مسوين العجب .. ويا البلوووزة الحمرا والخضرا
ميرة: هههههههه تمزحين ..
فوز: والله .. بس شعب حبوب وهادي
ميرة: ياللا أهم شي تستانسين .. ترا كلها 3 أسابيع ويبدا الدوام
فوز: يب أدري .. بس مب مداومين وايد .. شهر وعقبها إجازة العيد
ميرة: هيه والله .. المهم الغلا بخليج أحينه
فوز: اوكي فديتج
ميرة: ديري بالج ع روحج غناتي ..
فوز: إن شاء الله .. وتسلمين ع اتصالج
ميرة: أفا عليج نحن خوات المفروض نسأل ع بعض
فوز: فيج الخير والله
ميرة: فمان الله
فوز: ربي يحفظج ..


عقب ما بندت ميرة عن فوز .. زقرت ع البشكارة عشان تييب لها شي تشربه .. وتفاجأت أول ما سمعت الرد ..! الرد ما جان من البشكارة .. جان من ولد خالتها .. سعيد ..!

ميرة من وصلوا م السفر ما شافته .. ويوم عن يوم تأجل سيرتها لبيت خالتها بسبب سعيد .. ما تبا تشوفه .. خصوصاً عقب السالفة اللي صارت .. سعيد جان واصل ف نص المحادثة عقب ما دق الجرس وفتحت له البشكارة .. وميرة ما انتبهت عليه ..

سعيد: شحالج ميرة ..؟
ميرة: الحمدلله بخير .. شحالك إنته ..؟
سعيد: بخير وسهالة ..

تحرك سعيد من مكانه .. وسار ييلس ع القنفة اللي مقابلة ميرة .. ويطالعها بنظرات غريبة .. وميرة ف بالها تفكر سعيد من متى هنيه ..؟! وسمع رمستها ويا فوز ..؟ تعتقد إنه ما سمع لأن فآخر المحادثة كانوا يرمسون عن بريطانيا ..

ميرة: من متى هنيه ..؟
سعيد: ما أدري والله .. 5 دقايق .. أو يمكن عشر ..
ميرة: اهاااااا .. علاوي جان ياي صوبك ..
سعيد: صج والله .. غريبة ما دق عليه .. أنا ياي عنده ..
ميرة وهي مستغربة من رمسة سعيد وبدا الخوف يسيطر عليها .. : جان دقيت عليه .. اللي أعرفه إنتوا ما تلتقون إلا بمواعيد .. معقولة ما اتصل فيك ..؟
سعيد: والله يمكن اتصل .. ترا أنا تليفوني نسيته ف البيت
ميرة: تبا تشرب شي ..؟
سعيد: لا ما أبا .. أبا أرمسج ف سالفة ..
ميرة: سالفة شو ..؟
سعيد: قررت أخطب ..


ابعز الدموع الي غشت خدي عقب فرقاك
وأداوي نزف جرح انسان دمه من شراييني

وعز النفس عن حبك مدام اني عجزت القاك
تعبت من الصبر واتعبت من كثر السهر عيني

تعبت استعطفك وارجيك وامشي في سبيل ارضاك
وتلعب بي على كيفك تبعدني وتدنيني

تحملتك وانا صابر وادورلك عذر يبطاك
ولاكن مانفع صبري معاك واليوم يكفيني

خلاص اليوم قررت انسحب من دنيتك واسلاك
ابرحل مالتفت لو صاح صوتك يناديني

ابرحل للبعيد اللي ينسيني اسى ذكراك
وبترك كل شيء منك لشفته يبكيني

وبخفي عنك وين ارحل ولا تسأل على انهاك
اذا قادك فضولك يوم انسى انك تلاقيني

بعوض مامضي لي من سنين عشتها وياك
كفى ماضاع من شانك من احلى واجمل سنيني

ابركب مركبي وابحر ودورلي بدل مرفاك
شواطيك كئيبه حطمت كل الامل فيني

بكن الهم في صدري واسافر للبعيد هناك
عسى الايام و الغربة من جروحك تداويني

صحيح فغربتي بتعب ولاكن في سبيل انساك

بعزي "ب" الصبر نفسي ولو محدن يعزيني

نعم مليت نكران الجميل وطبعك ومبداك

وقلت البعد عنك ارحم مدامك ترفض اتجيني






أول ما سمعت ميرة رمسة سعيد تفاجأت .. يخطب ..؟!!! حست نفسها بتصيح .. وفعلاً عيونها بدت تدمع بس ما خلت سعيد ينتبه عليها .. وتأكدت فعلاً إن سعيد ما سمع رمستها ويا فوز وإلا ما بيطلب منها هالطلب ...!!

ميرة: وأنا شو يخصني ..؟
سعيد: أبيج ترمسين البنت ..
ميرة باستغراب : أي بنت هذي اللي أرمسها ..؟
سعيد: شفيج ..؟
ميرة: ما فيني شي ..
سعيد: توقعتج بتستانسين ..
ميرة: ومنو قالج إني مب مستانسة .. هاي حياتك وإنت حر فيها .. تخطب اللي تباها أنا مالي علاقة فيك ..
سعيد: أبي مساعدتج ..
ميرة: شو ..؟
سعيد: أبيج تساعديني ..
ميرة: فشو أساعدك ..؟!
سعيد: ترمسين البنت ..
ميرة: وليش أنا أرمسها .. خل أهلك يرمسونها ..
سعيد: لأن إنتي اللي تعرفينها .. وهي تعرفج إنتي ..
ميرة: أعرفها ..؟
سعيد: هيه
ميرة: منو ...؟!!
سعيد: فوز ..
ميرة: منو فوز ..؟!!
سعيد: فوز رفيجتج ف الجامعة ..!


كانت ميرة تحاول تستوعب الصدمة .. إن أخوها يرمسها عن فوز وإنه يبيها وهو مب شايفنها .. هالشي خلاها تتفاجأ وتستغرب وتنصدم بعد .. بس إن إيي حبيبها ويرمسها عن نفس البنت وفنفس اليوم .. هالشي خلا صدمتها تكون أكبر وأكبر ..!

سعيد: شفيج ميرة ..؟!!
ميرة: هاه .. لا .. مافيني شي ..
سعيد: شو قلتي ..؟ بتساعديني ..؟!!
ميرة بغصة : تحبها ..؟
سعيد: هيه .. من يوم شفتها هاك اليوم وهي ف بالي .. صورتها ما تفارقني .. ولمن سمعت صوتها تعلقت فيها أكثر وأكثر .. أنا أبيها لي وعشان جيه بخطبها أخافها تضيع مني .. شو قلتي ..؟؟

ميرة كانت بعيد .. حاسة نفسها بتنفجر ف ويه سعيد لو ما سارت عنه أحين .. بس هي ما تبا تحسس سعيد إن الموضوع أثر فيها .. وسعيد جان مدقق ع كل حركاتها ..

سعيد: ميرة .. شو قلتي ..؟
ميرة: بخصوص شو ..؟
سعيد: بترمسيها ..؟!
ميرة: إن شاء الله ..
سعيد: ولا تتأخرين عليه ف الرد ..
ميرة: إن شاء الله ..

نشت ميرة سايرة صوب المطبخ .. أونها بتييب حق سعيد شي يشربه .. بس هي خافت دمعتها تطيح وتنفضح .. ف اختارت إنها تشرد .. يلست تبجي لين ما البشكارة زهبت العصير .. كانت تبجي بصمت .. خلصت البشكارة وقالت لها توديه الصالة .. وهي غسلت ويهها وظهرت ..

سعيد: وينج ..؟ كا ها تقولين حق البشكارة تسوي عصير..؟؟
ميرة: يلست أساعدها ..
سعيد: أهاااا .. إنزين ميراني ..؟
ميرة: هلا
سعيد: رمسيني عنها ..؟؟
ميرة: عن منو ..؟
سعيد: فوز .. قوليلي كل شي عنها ..
ميرة: لمن توافق البنت عليك .. ساعتها بقولك كل شي عنها ..
سعيد: إنزين إنتي شرايج فيها ..؟
ميرة: رأيي مب مهم .. دامك تحبها وتبيها ..
سعيد: إنزين هي حد ف حياتها ..؟!

طالعته ميرة بنظرة غريبة .. فهمها سعيد ع طول .. لأنه تذكر إن سأل ميرة هالسؤال من قبل وميرة كانت معصبة عليه فشرحلها شو قصده ..

سعيد: أقصد .. أخاف تكون مخطوبة ..؟؟
ميرة: لا مش مخطوبة ..
سعيد: إنزين متى بترمسينها ..؟؟
ميرة: أول ما ترد م السفر
سعيد: ليش هي مسافرة ..؟!!
ميرة: هيه
سعيد: وين ..؟؟
ميرة: بريطانيا ..
سعيد: أهااااا .. تدرين لمن كنا هناك تعرفنا ع بنوووتة صغيرة .. أختها بعد اسمها فوز .. وتعرفنا ع عائلتهم بكبرها ..
ميرة ما عطت الموضوع أهمية .. ف خاطرها تقول وأنا شو يخصني ..؟؟!!

وصل علي .. وكانت فرصة ميرة إنها تشرد عقب ما استأذنت منهم وسارت دارها تركض .. قفلت الباب ع روحها ويلست تبجي ..

علي: إنت هنيه .. وأنا صار لي ساعة مجابل أمون هناك أترياك تيي
سعيد: جان دقيت عليه وريحت عمرك
علي: ومنو قال إني ما دقيت بس حضرتك ما ترد
سعيد: أوووه جهازي ف البيت ..
علي: ليش ياي عندنا ..؟؟
سعيد: شو ما تباني أيي أشوفكم ..؟؟
علي: لا بس إنك تيي بدون لا تقولي .. ها شي يدعو للإستغراب
سعيد: كنت أبا ميرة ف موضوع ..
علي: موضوع شو
سعيد: قررت أخطب ..
علي: صج .. منو هاي عاد .. قلت بتخبرني لمن تحصلها .. وإلا نسيت ..؟؟
سعيد: بخبرك أكيد .. صديقي وولد خالتيه لازم أخبرك .. بس مب أحينه .. خل البنت توافق وعقب يصير خير
علي: أوكي ع راحتك ..
سعيد: ما خبرتك أمس دقيت حق العم محمد ..
علي: والله .. شحاله ..؟؟ عساه بخير ..؟
سعيد: الحمدلله بخير يقول عقب جم يوم بيردون البلاد
علي: يوصلون بالسلامة إن شاء الله .. ورمست ندوش ..؟؟
سعيد: أكيد .. تسلم عليك وتقولك لا تنسى الوعد
علي: أي وعد ..؟؟
سعيد: أي وعد ..؟؟ لا عيل أحسن لها تغسل إيدها منه ..
علي: هييييه .. لا مب ناسنه .. بس خل إييون وعقب يصير خير
سعيد: شخباره راشد ..؟؟
علي: الحمدلله .. رمسته اليوم العصر .. يقول قرر يخطب بنت خاله ..
سعيد: ما شاء الله .. بسرعة فقد الأمل من أختك ..
علي: يعني رفضته أول مرة .. شو بيخليها ترد توافق عليه
سعيد: ما علينا .. أنا بروح أحينه ..
علي: وين يالسين ..؟؟
سعيد: بسير أخاف أميي تتوشل عليه لمن تشوفني ما أرد ع جهازي
علي: أوكي .. خلينا نشوفك عاد ..
سعيد: أكيد .. ياللا تصبح ع خير
علي: تلقى الخير ..

سار سعيد .. وعلي يلس ع النت كالعادة يرمس اللي يعرفه واللي ما يعرفه لين الساعة 2 .. وعقبها سار يرقد ...!!


نهاية الجزء
ترقبوا الجزء التاسع عشر​

 

[كلي حلا]

ماشاءالله وااايد طووويله بس حلوووة

يسلموووووو

يلا اتريا لا تتطولين

 

[أم حور]

ماشاءالله وااايد طووويله بس حلوووة

يسلموووووو

يلا اتريا لا تتطولين

كلج حلآ

ربي يسلمج ويعآفيج
أشكر لج مرورج ومتآبعتج ^^​

 

[أم حور]

(( طولت بالي وخذها اليوم لك شكراً ما ينزل الراس دام الروح بي حية ))

الجزء التاسع عشر


بيت أبو حمد
يوم الإثنين
الساعة 1:00 ظهراً


أول ما فتحت عينها .. انتبهت إنها ف غرفتها .. ف بيتهم عقب ما ركزت عدل .. تذكرت الرحلة الشاقة اللي مرت فيها أمس .. أول ما وصلوا البلاد كانت الساعة 2 .. ولين ما خذوا أغراضهم ووصلوا البيت كانت الساعة 4 .. وهي مب راقدة ف الطايرة ف حست بإرهاق وتعب ..
دق باب غرفتها .. ودشت ندى من ورا الباب ..

ندى : فووووز .. يالكسولة الساعة 1 .. وإنتي توج ناشة
فوز: وإنتي متى ناشة ..؟؟
ندى: الساعة 8 ..
فوز: تمزحين ..؟
ندى: والله
فوز: لاااااازم .. مب إنتي الرحلة كلها قضيتيها رقاد
ندى: fouz don't say that
فوز: why?
ندى: بس ياخي .. أنا كنت مغمضة عيوني بس .. يعني مب راقدة
فوز: علينا ندووش ..
ندى: والله ..
فوز: لا تحلفين مب زين ..
ندى: إنزين .. أمايه تكول صلي بسرعة وياللا انزلي بتتغدين
فوز: إن شاء الله ..

نشت فوز .. تسبحت ع السريع وصلت وعقبها نزلت تحت تتغدا .. العايلة كلها كانت متيمعة وناقص وجودها بس ..

أم حمد: شو تسوين ..؟؟ كل ها صلاة ..؟؟
فوز: السموحة أمايه بس قلت بسبح بالمرة .. تأخرت وايد ؟؟
أبو حمد: لا فديتج .. تعالي إيلس حذالي تغدي ..
فوز: إن شاء الله أبويه ..
ريم: أبويه ..؟
أبو حمد: هلا فديتج
ريم: نبا نروح ناخذ قطع وأغراض حق العيد ..
فوز بابتسامة: وحق الجامعة بعد ..
أبو حمد: إنزين .. متى ما تبون تروحون قولوا حق حمد بيوديكم
فوز: الدراسة عقب أسبوع وجم يوم تقريباً ..
أبو حمد : عيل حمد شوف وقت مناسب ووديهم ..
حمد: إن شاء الله أبويه ..
فوز: حمد .. أبغيك بعد تطلع لي بطاقة بدل فاقد
حمد: ليش بطاقتج وين ؟؟
فوز: ما أعرف .. ضيعتها .. الظاهر نسيتها ف بريطانيا .. لمن فجيتها وفتحت بطاقة الـ o2
حمد: إن شاء الله ..
فوز: مشكور حمد .. ما تقصر ..
حمد: أووه شو هالأدب اللي طاح عليج فجأة ..
فوز: فديتني بنت أمييه وأبوويه امبوني أعرف الأدب والذوق ..

دق تليفون أبو حمد .. جان سعيد هو اللي متصل فيه ..

سعيد: السلام عليكم
أبو حمد: وعليكم السلام والرحمة ..
سعيد: شحالك عمي بو حمد ..؟؟
أبو حمد: الحمدلله بخير ..
سعيد: أكيد ما عرفت صوتي .. أنا سعيد
أبو حمد: سعيد .. هلا والله شحالك يا ولدي ..؟؟
سعيد: الحمدلله بخير .. الحمدلله ع السلامة
أبو حمد: الله يسلمك .. شو صحتك يا سعيد .. وشخبار علي والأهل عساهم أطياب ..؟؟
سعيد: الحمدلله كلهم بخير وما يشكون باس .. إنتو طمنا عليكم عساكم بخير .. عمتي أم حمد وندووش والعيال .. عساهم بخير ..؟
أبو حمد: بخير وعافية يا ولدي ..
سعيد: عسى دوم يا رب ..
أبو حمد: يدوم عزك .. شو توظفتوا ..؟؟
سعيد: هيه الحمدلله .. قبل جم يوم بدينا الدوام ..
أبو حمد: الحمدلله .. تستاهلون والله .. الله يعطيكم خيرها ويكفيكم شرها إن شاء الله ..
سعيد: آمين يا رب .. عمي ..؟
أبو حمد: هلا ولدي ..
سعيد: طلبتك قول تم ..؟
أبو حمد: أفا عليك .. والله ما أردك .. تم .. آمر
سعيد: نبييكم تييون صوبنا .. الصراحة الأهل يبون يتعرفون عليكم .. وواجبنا نرد لكم اللي سويتوه لنا ف بريطانيا ..
أبو حمد: ما سوينا إلا الواجب .. نحن أهل وما بينا هالأمور ..
سعيد: إنت قلت تم .. وحلفت ما تردنيه .. وأنا داق أعزمكم يوم الخميس ف بيتنا ع الغدا .. وإلا العشا اللي يريحكم ..
أبو حمد: والله ما أعرف شو أقولك يا ولدي .. عندي شغل وايد وما بقدر أهده ..
سعيد: يعني بتردنيه ..؟؟
أبو حمد: لا خلاص .. بنييكم يوم الخميس وبنتعشى عندكم ..
سعيد: نترياكم عيل .. مب تهونون وييب الأهل كلهم
أبو حمد: إن شاء الله .. وتسلم يا سعيد فيك الخير والله
سعيد: ربي يسلمك يا عمي .. بخليك أحينه ومب تنسى الخميس عشاكم عندنا ..
أبو حمد: مب ناسي إن شاء الله .. سلم ع الأهل ..
سعيد: إن شاء الله .. وإنت بعد رد السلام عليهم كلهم
أبو حمد: يوصل ..
سعيد: فمان الله
أبو حمد: ربي يحفظك

أم حمد: منو ها ..؟
أبو حمد: سعيد .. اللي تعرفنا عليه ف بريطانيا .. ولد والنعم فيه والله
ندى: سعييييد .. ليش ما خليتني أرمسه ..
أبو حمد: ما عندنا بنات يرمسون شباب .. خلي عنج هالسوالف
ندى: ما أحبك ..
أبو حمد: أفاااا يا ندوووشه .. تقولين حق أبوج جيه ..
ندى بزعل: ليش ما تخليني أرمس سعيد ..
أبو حمد: يوم الخميس بوديج عنده ..
ندى: والله ..؟؟ ااااااااااااالله .. بشووف سعيد .. فوز بشوف سعيد
فوز باستنكار: منو بتشوفين الأمير تشارلز ..
أم حمد: ليش داق ..؟؟
أبو حمد: داق يعزمنا عندهم يوم الخميس ع الغدا أو العشا .. وقلت له بنييكم ع العشا..
أم حمد: إنت وحمد ..؟؟
أبو حمد: لا كلنا .. يقول أهله يبون يتعرفون علينا ..
فوز: أبووويه .. نحن متفقين نسير الشارجة يوم الخميس ناخذ أغراض حق الجامعة والعيد .. كلها أسبوعين وبيدش رمضان ونحن ما نبا نتسوق ف رمضان ..
أبو حمد: أدري .. وعشان جيه وافقت
حمد: ليش أبويه هم ف الشارجة ..؟؟
أبو حمد: هيه .. بنظهر من وقت وبتروحون تتسوقون وعقب المغرب بنسير صوبهم ..
ندى: أمايه شو ألبس يوم بسير عند سعيد ؟؟
ريم: خيبة .. جدامج جم يوم .. وعادج تفكرين شو بتلبسين ؟؟
فوز: ها مب سعيد مسولج جيه ..
ندى: فوز .. إنتي ليش ما تحبينه .. باباتي سعيد طيب وحبوب صح
أبو حمد: هيه فديتج .. جان تبين بنخطبه حقج ..
ندى: هيه أبا أبويه .. فووووز سعيد بيستوي خطيبي ..
حمد: هههههههههههه صدقت البنت .. والله ندووش اللي يشوفج ما يقول عمرج 6 سنوات ..

نشت فوز عنهم .. وهي مستغربة تصرفات سعيد .. رمسته وياها ف بريطانيا .. حبه لندى .. واتصاله بأبوها ورغبته ف إن يتعرفوا ع أهله .. وايد أشياء فوز مب فاهمتنها فيه .. وخاطرها تعرف شو ورا هالويه .. ومنو ورا هالإنسان ...!!!!


بيت أبو عبد العزيز - العين
يوم الأربعاء
الساعة 9:00 مساءاً


قبل شوية وصلت موزة ويا أخوها أحمد .. مقررة تقضي الويكند ف العين عسب تاخذ لها أغراض حق الجامعة .. خلاص باجي أسبوع ويبدون الدوام ..! دشت غرفتها حطت أغراضها بدلت ملابسها وعقبها نزلت ف الصالة ..

محد جان موجود غير أختها وروضة وأخوها أحمد .. خالد لين أحين ما رد البيت .. وحصة ف بيتهم متعودة الساعة 10 تيي عندهم تسهر .. وقالت موزة تبا تفاجئها ..

روضة: مواز .. شحالها أمييه العودة ليش ما يبتوها وياكم ؟؟
موزة: قالت ما تروم ع طريج العين .. ظهرها يعورها
ميثة: من متى ؟؟
موزة: من جم يوم بس ..
ميثة: وبعيد الشر ولا تقولون ؟؟
موزة: مب شي جايد .. عادي بس تدرين أمييه الله يهديها ما تيلس مكان واحد .. منيه ومناك
ميثة: فديتها والله .. وأبويه شحاله ؟؟
موزة: يسلم عليج وايد .. ويقولج يتريااج تزورينه
ميثة: أدري والله إني مقصرة فيهم .. بس شو أسوي العيال هنيه .. وخالد من صوب .. وغير جيه منو بييبني ..
أحمد: طالعوا الحية عاد .. جان تبين دقي عليه وأنا بييج
ميثة: خلاص عيل .. خالد بيسافر اليمعة وبييلس أسبوع .. وبقوله إني بسير عندهم أيلس ..
أحمد: ميثوووه
ميثة: هلا
أحمد: شو عن موضوعي أنا وحصة ..؟؟
ميثة: شو بعد ؟؟
أحمد: متى بنعرس ...؟؟
ميثة: إنت سلم المهر قبل .. وخل البنت تاخذ اللي تبيه وعقب فكر ف العرس
أحمد: المهر زاهب والله .. وعن البيت خلاص انحلت المشكلة
ميثة: كيف انحلت عاد ؟؟
أحمد: حميد الله يخليه .. قالي بيعطيني قسم منه .. عاد أنا اختار شو أبا .. فوق أو تحت ..
ميثة: لا والله .. مستحيل ما أصدق ..؟؟
أحمد: وليش ما تصدقين إن شاء الله ..
ميثة: لا بس حليله تعبان عليه .. وجان يحلم يعرس فيه ويشوف عياله وآخر شي إنت بتاخذه
موزة: والله أنا قلت له ماله داعي كل ها .. بيتنا يسد محد فيه .. يفتح غرفة حميد القبلية ع غرفته ويكبرهم ويسوي صالة .. حصوووه مب متشرطة فديتها .. قنوووعة
أحمد: أنا وأخويه متفاهمين إنتو شو يخصكم .. بعدين أنا بآخذ رأي حصة وعقب بقرر ..
ميثة: الله يجدم اللي فيه الخير فديتك .. وحصة والنعم فيها ما بتلقى شراتها
أحمد: أدري بس بسرعة نبا نعرس
ميثة: دام أمورك مترتبة .. برمس عمي ويشوف شو يقول
أحمد: فديتج والله فديتج .. ربي يخليج لي يالغالية
موزة: خالد متى بيي .. يوعانين ؟؟
ميثة: أحينه بدق عليه بشوفه وين ..؟؟

نشت ميثة تشوف ريلها وين .. عسب إيي يتعشى .. ونش أحمد عقب ما دق تليفونه وظهر يرمس برع عن حشرة البنات ..

موزة: روضووه .. عزوز وين ؟؟
روضة: عند عمي سيف .. سايرين صالة التزلج ف العين مول
موزة: لا والله .. شالطاري ..؟
روضة: ما أدري والله .. قلتلهم ياخذوني وياهم ما رضوا .. مالت
موزة: ههههههه شو تسوين ..؟؟
روضة: شو أسوي أتزلج
موزة: تبين حمود يقصبج
روضة: فديته والله .. آآآه متى أخلص دراسة وأعرس
موزة: ما شاء الله عليج .. مول ماشي طموح
روضة: طموحي آخذ حمود ..
موزة: عاد مب طموح .. الله يعينج ولا ياية تفلحين جان تميتي ع هالحالة ..
روضة: مب لازم أفلح .. أصلا شو أبا الدراسة دام بيلس ف البيت .. حمود ما يباني أشتغل أونه يغار عليه .. وما يبيني أتعب
موزة: يا ربي ع الرومانسيات .. بموووت منج ومن حمود
روضة: شو مواز تغارين منا ..؟؟ عندج حبيب بس بروحج رفستيه ..
موزة: وع .. عاد سيفان حبيب .. صخي عني لا أترفس فيج أحينه
روضة: ما ترومين .. بعلم عليج حبيبي وبيأدبج
موزة: طالعوا جليلة الحيا .. صج إنج مضيعة المذهب ..
روضة: آآآه شو أسوي .. أحبه .. أحبه .. بس صخي أمييه ياية
موزة: أقولها عن سواد ويهج ..؟؟
روضة: جربي جان تبيني أفضحج إنتي وسواف
موزة: انا وسواف ما بينا شي ..
ميثة: أحينه ياي .. ياللا نزهب السفرة ليمن يوصل ..
موزة: إن شاء الله ..


أحمد ف الحوش يرمس ف التليفون .. ويسمع صوت حصة ف حوش بيتهم تزاقر ع أمها وتقولها إنها بتسير بيت أخوها .. ابتسم وتفداها ف خاطره .. وبند بسرعة عن رفيجه ..

أول ما دشت حصة من الباب اللي يربط بين بيت أخوها وبيتهم .. انتبهت ع الريال اللي واقف وعاطنها ظهره .. وسارت صوبه تبا تعرف منو ها .. ما وحت توصل إلا أحمد صاد عليها وتقابلوا ويه بويه ..

حصة: بسم الله .. آآآه خرعتني ..
أحمد بابتسامة: ها بدل لا تقولين هلا والله .. تقولين خرعتني ..؟؟
حصة: السموحة منك ..
أحمد: شحالج ؟؟
حصة: الحمدلله بخير .. شحالك إنته ؟؟ ما شاء الله هنيه
أحمد: هيه .. ولهت عليج وياي أشوفج ..
حصة: قول والله ..؟
أحمد: عندج شك يعني ..؟؟
حصة: لا بس أكيد شي سبب ثاني ..
أحمد: السبب الثاني خاص ف مواز .. بس أنا ياي عشانج
حصة: مواز بعد ياية .. فديتها ولهت عليها ..
أحمد: طالعوا .. احينه مواز فديتها .. وولهت عليها وأنا استخسرتي هالرمسة فيني ..
حصة: أحمدوووو ياللا عاد ..
أحمد: شو قلتي ..؟؟
حصة: شو قلت ؟؟
أحمد: قولي اسمي مرة ثانية ..
حصة: أحمدووو .. ليش ..؟
أحمد: حلاته والله .. أول مرة أحس إن اسمي حلوو بس لانه طلع من لسانج ..
حصة بحيا : أنا بدش عنك .. إنت ما تستحي ..
أحمد: ههههههههه حصووص شكلج يتغير لمن تستحيين

راحت حصة داخل تركض .. وأحمد يطالعها ويبتسم وفخاطره يقول وينها من زمان عني ..؟!!!

عقبها دش داخل عندهم .. كانوا مزهبين السفرة عسب يتعشون .. دش عليهم خالد وسلم ع موزة وأحمد وعقبها نشوا يتعشوا وعقب العشا يلسوا ف الصالة يرمسوا لين الساعة 12 .. ميثة وريلها ساروا يرقدوا .. وأحمد ظهر سار عند ربعه .. وموزة ويا حصة قررن يروحن إيلسن ف الحوش يسوولفن .. وعقبها يات روضة تيلس معهن ..

موزة: حصيص
حصة: هلا
موزة: إنتي متأكدة إنج بتقدرين تتأقلمين ع حياتنا ؟؟
حصة: وليش ما أقدر ..؟
موزة: ما أدري .. بس أسمع عن وايد ناس يعرسون وياخذون من بعيد وعقب فترة الحرمة ما تقدر تتأقلم وتطلب الطلاق
حصة: أعوذ بالله منج ومن أفكارج الخايسة .. طلاق مرة وحده ..
موزة: ترا يصير ها ..
حصة: مواز أنا أحب أخوج .. ووين ما يوديني بروح ..
روضة: يا عيني يا عيني .. خالوووه شوفي الحب .. مب إنتي
موزة: أنا شفيني ..؟
روضة: مطنشة عميييه حليله ما يستاهل ..
موزة: بسوي نفسي ما سمعتج
حصة: إلا صج مواز .. إنتي مب ناوية ترضين ع سيف ..؟ عذبتي الريال تراج ..
موزة: حصة لا تناقشوني ف هالموضوع .. سيف أصلاً ما يحبني .. يمكن معجب بس .. لأنه لو يحبني صج ما بيسوي اللي سواه
حصة: اعتبريها نزوة .. غلطة صغيرة ..
موزة: لا والله .. هالنزوة لو صايرة وأنا مب ف حياته بعديها .. بس صارت وأنا فيها ويقول إنه يحبني .. شلون قلبه يطاوعه يسوي جيه .. أبا أفهم
روضة: ما بيكررها صدقيني ..
موزة: اللي يخون مرة .. مستعد يخون ألف مرة ..
حصة: إنزين عطيه فرصة .. والله حرام سواف يحبج ويبيج
موزة: صكن ع السالفة .. لا أترفس فيكن أحنيه ..
روضة: كيفج .. بس عقب لا سار وخذ غيرج مب تبجين وتسوين مناحة ..
موزة: حلال علييييه اللي بياخذها ..
حصة: أتخبركن بسير المطبخ أييب لنا آيس كريم ..
موزة: زين والله .. أنا محتاية أبرد فوادي بآيس كريم ..
روضة: وأنا بسير أييب الأونوو بنلعب جم دور

سارت حصة المطبخ .. وتبعتها روضة تييب الأونو من داخل .. ويلست موزة تفكر ف رمسة روضة وحصة بخصوص سيف ..؟ هل هي مستعده تخسره وللأبد .. أو لا ..؟ وشو سيف بالنسبة لها أصلاً .. اندماجها ف السوالف ما خلاها تنتبه ع عزوز اللي ياي من برع عقب ما نزله سيف جدام بيتهم .. غافلها وسار من وراها .. وخرعها .. ونشت موزة وهي تصارخ .. وعقب انتبهت إنه عزوز ولد أختها ..

موزة: عنلاتك يالخسف .. ما عليه إن ما علمت عليك أبوويه .. وأبوك .. عنبووه شو شايفني أصغر عيالك أنا ..
عبدالعزيز: هههههههههههههههه خالوووه تهبلين وإنتي متخرعة ..

سيف اللي جان بيدش البيت انتبه ع الصراخ ف بيت أخوه وياي يركض يشوف شو استوى ..

سيف اللي ما انتبه ع موزة لأنها عاطتنه الظهر : شفيكم .. عزوز منو يصارخ ..؟؟
عبدالعزيز: هههههههههههه هذي مواز .. خرعتها ويلست تصارخ
سيف: منو مواز ..؟؟

أول ما سمعت اسمها .. لفت موزة صوبه وطالعت سيف بنظرة بريئة .. وسيف طاحت عينه ف عينها .. وما عرف شو يسوي أو شو يقول ..

موزة: أنا مواز .. شو حتى اسمي نسيته ..؟؟

سيف يأشر ع عزوز عسب يروح عنهم .. وعبدالعزيز ما قصر ع طول شل بعمره ودش داخل وصادف هناك روضة بتنزل ويودها ..

سيف: شحالج ..؟؟
موزة: الحمدلله بخير .. شحالك إنته ..؟؟
سيف: بخير دامج بخير يا ويه الخير .. لين أحينه زعلانة مني؟؟
موزة: هيه ..
سيف: مب شكلج زعلانة .. أكيد تتغلين ..
موزة: ليش خليت عزوز يروح ..؟
سيف: أبا أرمسج ..
موزة: وأنا ما أبا أرمسك .. وإني واقفة أرمسك أحينه وأرد عليك مب معناته نسيت اللي سويته .. بس أنا قررت .. ما أهتـــــــم ..
سيف: إنتي تحبيني .. وما تقدرين تنكرين هالشي ..؟؟ احلفي إنج ما تحبيني .. وعقبها بخليج ف حالج ..
موزة: كنت أحبك صح .. بس حبك مات .. تعرف شو يعني مات ..؟؟ يعني إنت كلك ع بعضك .. ما تهمني ..!!!!


مات حبك بعد لا تسأل عليه
مات حبك إنت هذا اللي تبيه
مات حبك روح وانثر له ورود
وابكي يا خاين على اللي صار فيه
إنتهى اللي بيننا ولا تظن أعود
ما بقى لك عند صدك أي وجود
إنتهيت وبعد شاللي ترتجيه
مات حبك
كيف سميتك حبيبي
وكيف حبيتك سنيني
الفرق واضح واكتشفته
إنت وين وأنا وين
يا خسارة عمري كله
ودمعتي وقلب الحنين
ف لحظة بعت سنين حلوة
حتى غيري تشتريه

مشت موزة عنه .. وسارت تيلس ف نفس المكان اللي كانت يالسة فيه .. وهالمرة سيف حس بإهانة .. ما يدري شو سببها .. بس هالإهانة خلته يشل كبرياءه ويروح بيتهم بدون لا يقول أي شي ..!


السيتي سنتـر / الشارجة
يوم الخميس
الساعة 5:00 عصراً


قوم فوز ..

حمد وصل أمه وخواته السنتر .. وأبوه سار يشوف واحد م الربع ويسلم عليه .. قبل لا يروحون عند أهل سعيد .. أم حمد ويا ريم وندى ساروا صوب الملابس الجاهزة .. وفوز وصت أختها ريم تاخذ لها .. لأنهن نفس الذوق .. وقالت هي بتروح صوب العطور والإكسسوارات والجنط عسب يخلصون كل شي .. جان حمد وياها وطبعاً لين أحينه ما ودر عاداته الجديمة .. كل ما شاف بنت لازم يعلق ..
فوز: حمد ترا عادي أدق حق فطيم أحينه وأخبرها .. عنبوك كلها جم شهر وبتعرس .. مب زين
حمد: شو سويت أنا ..
فوز: هالتعليقات وما سويت شي ..؟؟
حمد: أحياناً .. أحياناً هاه الوضع يستدعي إنك تعلق
فوز: الله يعين فطيم والله
حمد: فديتها فطيم .. محد يسواها والله
فوز: ودام محد يسواها شلك ف بنات الأوادم .. خلهن يسون اللي يبن يسونه .. ما يخصك فيهن
حمد: إنزيييين .. أقول فوز ..؟
فوز: هلا
حمد: عيد ميلاد فطيم عقب أسبوع .. شو آخذ لها هدية؟
فوز: ما أدري .. مممممم شوف لها عطر ..
حمد: المرة اللي طافت خذيت لها عطر ..
فوز: طيب .. خذ لها جنطة ..؟
حمد: خذيت لها من بريطانيا جنطة.. شو نسيتي ؟؟
فوز: مممممم طيب .. ساعة
حمد: ساعة .. إنزين أتخبرج من تخلصي بنمر ع الساعات واختاري شي ع ذوقج ..
فوز: فالك طيب ..


دشت فوز محل الإكسسوارات .. واختارت لها جم قطعة وجمعت الألوان ويا بعض .. وحمد يطالع ويقول ف خاطره هالحريم .. صج إنهن يلعبن .. ويفكر باجر لي عرس ..

حمد: ع جيه .. باجر لي خذيت فطيم .. بفتقر ..
فوز: ليش ؟؟
حمد: شو ليش بعد ..؟؟ شوز وجنطة وشيلة واكسسوارات كلها نفس اللون ..
فوز: هاي الموضة .. والإستايل يتطلب .. والكشخة ما تستوي إلا جيه .. وأحينه عاد اللي يسمعك يقول إنتو مول ما تسوون هالأشياء .. كندورة نفس لون النعال .. نفس لون الساعة .. نفس لون الغترة ..
حمد: احم .. لا تعليق .. ^_^
فوز: أحسنلك ما تعلق .. ياللا خلينا نحاسب خلصت ..
حمد: أوكي ..


قوم ميرة
في مكان آخر في السنتر


ميرة طلبت من أخوها يوديها السنتر تاخذ لها أغراض حق الدراسة .. والساعة 2 ظهروا .. وقرروا بالمرة يتغدون ف السنتر .. وعقب الغدا بدوا رحلة التسوق .. وما شاء الله عليها ميرة خمت السنتر بكبره .. واضطر علي يروح يودي الأكياس السيارة ويردلها تكمل تسوق .. قالت بالمرة بتاخذ أغراض العيد .. وعلي حليله مسولها سالفة ويسمع كلامها ..

قرروا إيلسون يشربون لهم شي .. وجان علي فاتح البلوتوث ويلعب ب تليفونه ..

ميرة: شو يالس تسوي ..؟
علي: ماشي .. ليش ؟؟
ميرة: ما طلبت لنا شي .. شو يالسين جيه بس
علي: ههههه سوري فديتج نسيت .. شو تبين ..؟
ميرة: أبا عصير كوكتيل ..

طلب له عصير مانجو وطلب حق أخته الكوكتيل .. ورد يلعب بالتليفون .. حد طرشله بلوتوث وع طول سوا قبول .. وفتح الملف اللي وصله .. :

واااااااو شحلاتك بالأسود .. طالع كشخة ^_~

ابتسم علي .. ويلس يدور منو صاحب الرسالة .. انتبه ع بنت يالسة ويا رفيجتها ف آخر الكوفي وتطالعه وتبتسم له .. وعرف إنها هي صاحبة الرسالة .. ورد عليها .. :

احم .. امبوني كشخة فديتني .. وع العموم تسلمين ..!

ردت عليه .. :

يالخقة .. أكيد أكيد شرجاوي .. امبونهم شباب الشارجة بطرانين .. المهم .. منو البنت اللي عندك ..؟ لا تقول حبيبتك .. ~_~ .. بمووووووت ..

علي :

هههههههههههههههه شرجاوي وأفتخر .. ههههههه تموتين ..؟ ليش تموتين ..؟؟ بعيد الشر عنج .. لا مب حبيبتي .. هاي حياتي

..:

احلف إنت بس .. هههههههه لا صج صج .. منو تطلع ..؟؟

علي:

أختيه ..

ميرة: شفيك تضحك ..؟؟ ينيت ..؟؟
علي: لا ..
ميرة: علاوي .. أنا عارفة إن شي تحت راسك .. قولي شو تسوي ؟؟ وشفيك كل شوي تطالع الصوب الثاني ..؟
علي: ما شي .. اشربي عصيرج خلينا نروح ..

فهمت ميرة السالفة .. من نظرات البنت لعلي .. وتأكدت إنهم يالسين يتراسلون بالبلوتوث ..

ميرة: ها عاد اللي يفكر يعرس .. الله يعينك .. والله يعين اللي بتاخذها ..
علي: ههههههههه ليش ..؟؟ شو سويت ..؟؟
ميرة: ما أدري عنك .. جدامي وتسوي هالحركات .. الله العالم شو يستوي من ورايه ..
علي: ياللا عاد .. ما سويت شي هي يلست تراسلني .. ما يصير ما أرد عليها ..
ميرة: أونه .. أنا خلصت خلينا نكمل تسوق ونرد البيت ..

بند علي البلوتوث .. عقب ما استلم آخر رسالة من البنت .. وجان فيها رقمها .. وقبل لا ينش من مكانه دق تليفونه وجان سعيد متصل فيه ..

علي: هلا والله بولد الخالة ..
سعيد: السلام عليكم
علي: وعليكم السلام والرحمة ..
سعيد: شحالك ..؟؟
علي: الحمدلله بخير .. من صوبك ..؟؟
سعيد: بخير وعافية ..
علي: وينك يا ريال .. ما تيي صوبنا .. حشا مقاطعنا خير شر ..
سعيد: عاد اللي يسمع إنتو مكسرين عمركم من زود ما تيون عندنا
علي: والله من بديت أداوم .. ما أظهر مكان ..
سعيد: وأنا بعد نفس الحالة .. وين دارك ..؟؟
علي: والله ف السنتر .. يايب ميرووه تاخذ لها أغراض
سعيد: أهاااا .. إنزين أقولك حاولوا تخلصون من وقت .. عقب المغرب أبيكم عندنا ف البيت
علي: ليش ..؟؟ شو مستوي ..؟؟
سعيد: عزمت العم محمد ع العشا اليوم ..
علي: منو العم محمد ؟؟
سعيد: شو .. نسيته ..؟؟ أبو ندوش ..
علي: هيييييه .. ولا تقول يالدب .. شو الحبيب كأنك عادنا غرب
سعيد: لا والله .. بس انشغلت ونسيت أخبرك ..
علي: ومتى بييون ..؟؟
سعيد: عقب صلاة العشاء أظن .. قالي بيتصل قبل عسب يعرف البيت وين
علي: اهاااا .. وبروحه بيي ..؟؟
سعيد: لا طبعاً .. أهله بيون بعد
علي: أووهوووو .. عيل إنت اليوم محد قدك ..
سعيد: ههههههههه ليش ..؟؟
علي: احم .. ندووش وأختها بييون عندكم .. وبتعيد ذكريات بريطانيا
سعيد: ف عينك .. إنت بس لا تنسى وعدك حق ندوش وإلا بتذبحك
علي: هههههههه مب ناسي والله .. إن شاء الله بسوي اللي قلت لها عليه .. ولازم بعد أختها تكون ويانا عشانك ..
سعيد: أووف ع سخافتك .. بتذبحني .. أقول اجلب ويهك عني أحينه .. ولا تنسى عقب المغرب أبيك عندنا .. وييب ميروه وياك
علي: إن شاء الله
سعيد: ياللا عيل .. فمان الله
علي: ربي يحفظك

ميرة: شفيه سعيد ..؟؟
علي: اليوم ضيوف بييون عندهم .. ويبينا نروح ..
ميرة: ونحن شو يخصنا بضيوفهم ..؟
علي: أنا بعد أعرفهم .. ناس تعرفنا عليهم ف بريطانيا .. وما قصروا ويانا والله ..
ميرة: أهاااا .. إنزين عيل خلينا نكمل تسوق .. وعقبها وديني البيت وسير عنده
علي: ليش ما بتروحين ..؟
ميرة: شو يوديني ..؟؟
علي: دبه لازم تسيرين .. بييون كلهم .. وعندهم بنات ف عمرج
ميرة: مالي خلق والله ..
علي: ما أدري .. فكري إنتي بس صج بتستانسين
ميرة: أوكي خلينا نروح ..

نشوا ميرة وعلي .. يكملون حملة التسوق اللي بدوها .. وميرة كانت تفكر ف رمسة علي ويا سعيد .. ندوش وأختها بييون عندكم وبتعيدون ذكريات بريطانيا ..!! شو يقصد ...؟!!!


قوم فوز ..

دشت فوز محل الساعات والعطور ووراها حمد ع طول .. اختارت لها عطر وعقبها سارت تشوف الساعات .. حمد جان واقف ف نص المحل يطالع ع الساعات المعروضة وانتبه على علي اللي داش نفس المحل .. وعلي بعد من شافه عرفه ع طول وسار صوبه .. سلموا ع بعض وخذوا العلوم ..

علي: ما شاء الله تسوون شوبنج ..؟
حمد: هيه والله .. أختي يايه تاخذ لها أغراض حق الجامعة
علي: وأنا بعد نفس الحالة .. شو العلوم .؟؟
حمد: علوم الخير والله
علي: عسى دوم .. هاه كيف متى العرس إن شاء الله ..؟؟
حمد: ع الصيف الياي ..
علي: مب جأنك مطول ..؟
حمد: هيه والله .. بس الحرمة عندها دوام .. وقالت تبا العرس ف الصيف ..
علي: أهااااااا .. ياللا الله يوفقكم ..
حمد: آمين .. وعقبالك
علي: إن شاء الله

اختارت فوز الساعة .. وطالعت ع ورا وف نفس اللحظة زقرت أخوها حمد ..

فوز: حمد تعال شوف هالسـ ........

تفاجأت لمن شافت حمد واقف عند علي .. احساس غريب صادرها .. حست قلبها بيطيح .. بس اللي طاح ع الأرض .. الساعة .. وتصكر صندوقها .. وعلي طالع البنت اللي تزقر حمد ولاحظ ارتباكها .. هو نفسه حس بإحساس غريب أول ما شافها .. مع إنها مب أول مرة يشوف فيها فوز .. شو السبب ما يدري ...؟!!! أما حمد ف سار عند أخته وشل الصندوق من الأرض ..


يوم شفتك خفت من عيني عليك ... من كثر سحر العيون الناعسات
كنه حسن الكون كله بين إيديك ... التقى بين الرموش الساحرات

في عيوني شي ياعمري يبيك ... في حياتي لك ياروحي حياة
لاتلوم اللي تولع حيل فيك ... غير شوف العين ماله سواة

من جمالك هزني كل شي فيك ... من عيون وجيد وأهداب وشفاة
لك بنار الحب قلب يرتجيك ... ولي عيون في دلالك حايرات

لا دلال ولا جمال معتليك ... فوق مدلول الحلا حلو الصفات
إن بعدت الشوق يجبرني أجيك ... وإن لمحتك أذكر الله في سكات




حمد: بلاج فوز ..؟؟
فوز: هاه .. ماشي

فوز كانت مرتبكة م الموقف اللي صار .. ومن نظرات علي لها

حمد: كنتي تبيني أشوف الساعة ..؟؟
فوز: هاه ..
حمد: شفيج ..؟؟ الظاهر إنج تعبانة خلينا نروح ..
فوز: مستحيل ..!
حمد: شو المستحيل ..؟!!!

فهالوقت يات ميرة عند أخوها .. وما شافت فوز لأن حمد جان مغطي عليها .. بس فوز شافتها ..

ميرة: علاوي خذيت لك عطر ..؟؟
علي: لا بعدني ..
ميرة: شو تتريا ..؟؟ جرب يأذن المغرب بيحشرك سعيد لو تأخرت
علي: خلاص بآخذ وقت ثاني .. بس لحظة بقول حق حمد إني بسير

زقر علي ع حمد .. طالع حمد صوبه وظهرت فوز واضحة .. وميرة طالعت ع حمد وانتبهت ع البنت اللي واقفه وراه ..

ميرة: no way
علي: شفيج ..؟؟

تجدمت ميرة صوب فوز .. وفوز كملت نص المسافة .. سلمن ع بعض بحرارة وحمد وعلي مب فاهمين شي

فوز: شحالج يالدبة ..؟؟ ولهت عليج وايد
ميرة: وربي وأنا بعد .. إنتي وين ..؟؟ أدقلج جهازج مبند .. وما تدشين المسن عسب أطمن عليج
فوز: فديتج ضيعت بطاقتي ف بريطانيا وقبل يومين طلعت بدل فاقد
ميرة: اهاااا .. وما شاء الله عندنا .. أكيد يايه تاخذين أغراض حق الجامعة ..؟؟
فوز: هيه والله .. وإنتي أكيد ياية لنفس السبب
ميرة: هههههههه عندنا شغلة ثانيه نحن ..؟؟
فوز: ما أظن هههههههه
ميرة: شخبارج بعد ..؟؟
فوز: الحمدلله الأخبار طيبة .. من صوبج ..؟؟
ميرة: ما في شي important من صوبي
فوز: خذيتي كل شي ..؟؟
ميرة: يب الحمدلله .. خميت السنتر بكبره ..
فوز: هههههه ما شاء الله عليج .. شو من متى هنيه ..؟؟
ميرة: م الساعة 2 الظهر هنيه .. تدرين لو كنا مخططين نشوف بعض .. ما راح يصير ..
فوز: هيه والله .. سبحان الله .. بس إنتي بصراحة ييتي ف وقتج نقذتيني ..
ميرة: ههههههه ليش شو مستوي ..؟؟
فوز: ما أدري شو ياني .. تخرعت أول ما شفت حمد واقف ويا الريال .. حسيت بشي ف داخلي يتحرك .. كنت زايغة ومرتبكة بس ربج ستر ..
ميرة: منو تقصدين اللي واقف عنده ..؟؟
فوز: هيه
ميرة: تعرفين إن ها أخوي علي ..؟؟
فوز: تمزحين ..؟؟
ميرة: والله .. شو ما لاحظتي الشبه ..؟؟
فوز: وأنا أقول شكله مب غريب وكنت أحاول أتذكر وين شفته قبل بس ما عرفت ..
ميرة: هههههههه بس أخوج من وين يعرف علاوي ..؟؟

فوز تذكرت سعيد فجأة .. إذا جان علي أخو ميرة .. هالشي معناته إن ........ إن ....... معقولة ...؟!!!!!

ميرة: فواز شفيج ..؟؟
فوز: هلا ميراني .. شو كنتي تقولي ..؟؟
ميرة: أقولج أخوج شدراه بعلاوي ..؟؟
فوز: تعرفوا ع بعض لمن كنا ف بريطانيا .. كنا نسكن جريب من بعض وكانوا تقريباً كل يوم يمرون جدام بيتنا لأن كليتهم جدام البيت اللي سكنا فيه ..

كانوا ..؟!! يمرون ..؟!! عرفت ميرة إن فوز ترمس عن علي وسعيد .. وف لحظة تذكرت رمسة سعيد وياها .. لمن قالها ..:

سعيد: تدرين لمن كنا هناك تعرفنا ع بنوووتة صغيرة .. أختها بعد اسمها فوز .. وتعرفنا ع عائلتهم بكبرها ..

وتذكرت رمسة علي ويا سعيد ..:

علي: : احم .. ندووش وأختها بييون عندكم .. وبتعيد ذكريات بريطانيا .. هههههههه مب ناسي والله .. إن شاء الله بسوي اللي قلت لها عليه .. ولازم بعد أختها تكون ويانا عشانك ..!!

قطع تفكيرها صوت علي اللي زقرها عسب يروحون .. استأذنت ميرة من فوز وقالت لها عقب بتشوفها ف بيت خالتها .. !!

في الوقت اللي كانن فيه فوز وميرة يرمسن ويا بعض .. علي سار صوب حمد وخبره إنه ياي ياخذ ساعة حق خطيبته وشافوا الساعة اللي اختارتها فوز .. عيبتهم وايد وحمد خذها حق فطيم .. وعلي خذ وحده بعد .. بس حق منو ..؟؟ ما قال .! وعقبها استأذن من حمد وزقر ميرة وساروا ...!!!!


ف السيارة ..

علي: من وين تعرفين أخت حمد ..؟!

ميرة كانت ما ترمس .. وساكته وتفكر باللي يصير .. سعيد يحب فوز رفيجتي .. وفوز نفسها البنت اللي سعيد شافها ف بريطانيا واللي حكالها علي عن مواقف سعيد وياها .. وإنه يغايظه فيها لأنه يحس إنه معجب بشخصيتها .. سبحان الله .. ع جيه سعيد بيستانس لو درا إن فوز رفيجتي هي نفسها فوز أخت ندى .. وع جيه ما بيتريا لين ما أنا أييب له موافقتها ...!!

علي: ميررررررة ..؟؟
ميرة: شفيك علاوي خرعتني ..!
علي: وين وصلتي ..؟
ميرة: إلا هنيه
علي: أرمسج وإنتي ولا ع بالج
ميرة: شو تبا ..؟
علي: أقولج من وين تعرفين أخت حمد ..؟
ميرة: فوز .. رفيجتي ف الجامعة
علي بصدمة : شو..؟؟ ضغط ع البريك بالقو ..
ميرة: بسم الله شفيك بتجتلنا
علي: شو قلتي ؟؟
ميرة: فوز رفيجتي ومعي ف نفس الغرفة
علي: مب صحيح ..؟
ميرة: والله

لسبب حس علي بحزن .. ما جان يعرف ليش هالإحساس بالذات .. يمكن لأنه فكر فيها وطلعت نفس البنت اللي يحس سعيد معجب فيها .. ويمكن من نظراتها اليوم وردة فعلها أول ما شافته حس إن شي ف خاطرها ..

ميرة: بلاك علاوي ..؟
علي بابتسامة: ماشي .. يعني هاي فوز اللي قلت لج بخطبها ؟؟
ميرة: هيه
علي: لا عيل ما أباها
ميرة: ليش؟؟
علي بكبرياء : مب مناسبين حق بعض .. بعدين أنا بآخذ البنت اللي أحبها إن شاء الله ..

وصلوا البيت .. نزل علي وقال حق البشكارة تروح تنزل الأغراض .. أما ميرة ف حست نفسها تبا تصيح ولا شعورياً نزلت دمعتها ..
نزلت م السيارة وسارت دارها وع طول فرغت الدموع ف وسادتها وعقبها سارت تتسبح عسب تحس براحه وتصلي .. وبعدين تزهبت لأنها بتروح بيت خالتها ..!!


بيت أبو سعيد
يوم الخميس
الساعة 8:00 مساءاً


وصلوا أهل فوز .. وجان سعيد ويا أبوه وأخوه غيث وعلي ف استقبالهم .. دشوا الرياييل الميلس وعقب ظهرن أم سعيد وأمون وميرة عسب يستقبلوا الحريم

ف ميلس الرياييل ..

أبو حمد يرمس ويا أبو سعيد .. وحمد ويا غيث وسعيد .. أما علي ف جان بروحه ف عالم ..

حمد: سعيد إنت شو سويت حق ندوش .. قسم بالله حاشرتنا ف البيت .. سعيد وسعيد .. وعاد لو دقيت وما خليناها ترمسك بتحتشر علينا
سعيد: ههههههههه فديتها والله .. جان بتعطوني إياها بآخذها .. بزوجها ولدي
حمد: شو بتربيه ..؟؟ لين إيي ولدك بتنا صكت الأربعين هههههه
غيث:ترا حتى هو صدع لنا راسنا .. من رد م السفر ما عنده سالفة غيرها.. غيوث والله حبوبه .. غيوث إنت ما شفتها وإلا بتموت عليها .. سوالفها حلوة شراتها وكل شي فيها حلو ..
حمد: له له له .. شكلها بنتنا طيحت الريال
غيث: أقولك لو تناسبه جان زوجناه ..
حمد: جان بيترياها لين تكبر بنزوجه .. ترا هي موافقة بدون لا نشاورها .. وأبويه قالها بنخطب سعيد حقج ما صدقت .. جان تقول الله سعيد خطيبي هههههههههه
سعيد: لا تتطنزون علينا لو سمحتوا ..

استأذن علي وظهر .. سار ييلس ف الحديقة والشباب كملوا سوالفهم ..!!


ف ميلس الحريم ..


السوالف كانت عادية .. طبعاً البداية كانت تعريفيه يعني كل حد يسأل عن الثاني .. والحريم يسألن عن البنات جم عمرهن ووين يدرسن ومن هالسوالف .. ندوش يالسة ومتمللة مب عارفة شو تسوي .. تبا تقولهم إنها بتروح عند سعيد بس مب قادرة .. الحيا مانعنها .. وفوز ترمس ويا ميرة اللي سألتها عن بريطانيا والأشياء اللي صارت .. وفوز كانت ترمس بحذر.. عشان لا تغلط وتذكر اسم سعيد وميرة تتحسس م السالفة .. ما تدري إن ميرة تعرف كل شي لأن علي ما قصر ..

فوز: الحمدلله استانسنا .. وأحينه عن نفسي متهيأة حق الدراسة .. أترياها بفارغ الصبر
أم سعيد: الحمدلله .. وإنتي فوز جم سنة باجتلج ..؟؟
فوز: سنتين إن شاء الله وبخلص ..
أم سعيد: بالتوفيج فديتج
فوز: تسلمين خالتي ..

ندى: فوز ..؟؟
فوز: هلا فديتج
ندى بهمس: أبا أسير الحمام ..
فوز: ميرة .. ندوش تبا تسير الحمام .. ممكن تودينها ..؟
ميرة: من عيوني ..
ندى: فوز إنتي وديني ..
فوز: ندى أنا ما أدل الحمام ..
أمون: وديها داري .. المغاسل هنيه مشتركة بين ميلس الرياييل والحريم ..
ميرة: أوكي .. تعالي فوز ويا أختج يمكن تستحي تروح ويايه ..

نشت فوز وسارت ويا ميرة وندى اللي أصرت ع فوز تاخذ جنطتها وياها .. ليش ما تدري ..؟؟ .. صعدوا الدري وساروا غرفة أمون .. ميرة خلتهم بروحهم ونزلت عسب يزهبون حق العشا .. وفوز يلست تتريا أختها تظهر م الحمام ..

ندى: سارت ..؟؟
فوز: منو سار ..؟؟
ندى: رفيجتج
فوز: هيه سارت ليش ..؟؟
ندى: أنا ما أبا أيي الحمام ..
فوز: عيل ..؟؟
ندى: فوز أبا أشوف سعيد
فوز: نعم ..؟؟ عيدي فديتج ما سمعت
ندى: أبا أشوف سعيد .. عيل أنا ليش يايه هنيه ..؟؟
فوز: ما شاء الله عليج .. وأنا شو أسويلج .. خلينا ننزل لا نتأخر عليهم ..

نزلن فوز وندى .. ولمن كانت بتسير صوب ميلس الحريم زقرتها ندى مرة ثانية ..

ندى: فوز إنزين بكولج شي ..؟؟
فوز: شو عندج ؟؟
ندى: تعالي ويايه .. وبكولج
فوز: مب متحركة من مكاني
ندى: الله يخليج .. الله يخليج ..!


في الحديقة ..


جان علي يالس ع الكراسي ويرمس ف التليفون .. منو يرمس ..؟!!! أكيد عرفتوا .. البنت اللي تعرف عليها ف السنتر .. حس نفسه مضايج وجان محتاي يرمس حد .. وما لقى غيرها .. دق عليها ورمسها ..

علي: شوق .. حلو اسمج
شوق: أدري .. وإنت شو إسمك ..؟؟
علي: علي ..
شوق: أووه إنت ف كل شي كشخة حتى الاسم ..
علي: هههههههه لا تبالغين عاد
شوق: لا والله صج .. شو تسوي أحينه ..؟؟
علي: يالس ف حديقة البيت .. أطالع القمر .. شكله حلو اليوم .. منور بقووة ..
شوق: يا عيني ع الرومانسي .. ههههههههه
علي: أنا رومانسي ع حسب المزاج
شوق: بعد .. إنزين شرايك أحينه أيي أيلس وياك ..؟؟
علي: حياج الله ..
شوق: الله يحييك .. بس ترا صج أسويها وأيي
علي: تعالي ..
شوق: تتحداني يعني ..؟؟
علي: هيه ..
شوق: أوكي .. قولي وين البيت ..؟؟ ف أي منطقة وأحينه بتشوفني جدامك
علي: من صجج إنتي ..؟؟
شوق: هيه ..
علي: إنتي جم عمرج ..؟؟
شوق: 21 ..
علي: العمر كله ..
شوق: المهم شو احينه .. ما بتقولي وين البيت ..؟؟
علي: لا خلاص صدقت إنج بتيين ..
شوق: هيه مرة ثانية لا تتحداني .. ترا أنا مينونه وأسويها ..


طلعت فوز ويا ندى .. اللي تسحبها خاري بالقو .. بس عشان تقولها شو تبا .. وفوز بدت تعصب من تصرفات ندى ..

فوز: ندى شو هالتصرفات الغبية ..؟؟ تتحسبين نحن ف بيتنا
ندى: فوز والله بس بكولج شي ..
فوز: وهالشي ما ينقال إلا هنيه ..؟؟
بوزت ندى
فوز: قولي شو تبين ..؟؟
ندى: اتصلي حك سعيد كوليله إيي أبا أشوفه
فوز: أستغفر الله العظيم .. أحينه مظهرتني بس عشان تقولين لي أدق حق سعيد .. ما عندي رقمه
ندى: أنا عندي ..

مشت فوز بتسير داخل .. حست إن أختها وايد سخيفة .. وندى يودت جنطتها عسب ما تخليها تروح ..

ندى: فوز لا تروحي ..
فوز: هدي جنطتي .. وخليني أدش ولمن نرد الفندق بيكون لي حساب ثاني معج ..
ندى: فوووووز ..

كملت فوز طريقها وندى ميوده الجنطة وتبطلت الجنطة من إيدها وتناثرن الأغراض اللي فيها .. طالعتها فوز بعصبية .. ولو ما تعوذت م الشيطان كانت بتصفعها كف ع ويهها .. وندى م الخوف يلست تصيح ..

هالشي كله صار جدام عيون علي .. طبعاً فوز ما كانت منتبهة لوجوده .. وهو أول ما شافهن بند عن شوق ويلس يطالعهن .. في شي غريب يشده حق فوز .. ما يقدر يمنع عينه من إنها تشوفها .. أو تراقبها وتسمعها .. يحس نفسه عايش ف دوامة لازم يطلع منها قبل لا يتورط .. بس هالإحساس إييه غصب عنه .. جان مدقق ف كل حركاتها وتصرفاتها ..



حبيتها حبيتها حبيتها حبيتها
ما كنت أفكر فيها أبد
وما كان في بالي أحد
ومن جت عيني بعينها حبيتها
خذتني في عالم جديد
عالم عن العالم بعيد
نسيت حالي والظروف
ما غيرها بعيني أشوف
الوقت أصبح ملكها
وتغيرت كل الحروف
صار الحكي كله لها
غصبن علي حبيتها
ما دام ما في مثلها
يكفي معاها راحتي
صارت هناي وبسمتي
أرتاح لما أشوفها
ومهما أشوف بدنيتي
محدن يعوض عن حبها
وشلون أنا ما أحبها




بدت ندى تلم الأغراض اللي تناثرن وهي تبجي .. طالعتها فوز بنظرة غريبة .. شكل ندى كسر خاطرها .. ويلست تساعدها ف لم الأغراض ..

فوز: بس خلاص لا تبجين .. ما صار شي ..
ندى: أنا آسفة ..
فوز: هاج التليفون .. رمسيه بس لا تقولين له إن ها رقمي .. تفهمين ..؟؟
ندى: إنزين ..

يودت ندى التليفون .. وكانت بتدق الرقم بس ما وحت .. لأن علي تدخل ف السالفة ..

علي: فوز

أول ما سمعت اسمها .. حست نفسها بتموت .. صوت ريال .. بس منو مب عارفة .. طالعت ع ورا .. ومن شافت علي يبست ف مكانها ..!

علي: مب لازم تخليها تدق له .. أنا بقوله يظهر أحينه ..
فوز: شكراً ..

وعقبها طالع علي ع ندى .. عسب يخفف الإرتباك اللي بدا ع ويه فوز من شافته ..

علي: ندوش ليش تبجين ..؟؟؟
ندى: ماشي ..
علي: تبين تشوفين سعيد ..؟؟
ندى: هيه ..
علي: جان قلتيلي .. أنا بوديج عنده
ندى: أنا ما شفتك ..
علي: سعيد لو يبا يشوفج بيحتشر .. بس هو ما يبا يشوفج
ندى: لا تكول جيه ..
علي: ههههههه إنزين ما بكول هههههههههه
ندى: صح صح صح ..
علي: شفيج ؟؟
ندى: إنت كلت بتوديني تحوطني يوم بيي عندكم
علي: هيه وأنا عند وعدي ..
ندى: متى بنروح ؟؟
فوز: ندى شو هالرمسة .. عيب عليج
علي: خليها أنا وعدتها .. ولازم أنفذ وعدي ..
ندى: هيه صح لازم ..
علي: تعشوا قبل وعقب بنظهر نحوطكم .. شرايج ؟؟
فوز: لا تاخذ ع رمستها ..
ندى: ليش .. ما أبا .. أبا أروح أتحوط .. وبناخذ سعيد ويانا بعد
علي: ع أمرج اللي تبينه بيصير
ندى: إنزين
فوز: لا ما بيصير .. لين ما يتعشون يبيلهم وقت وعقبها بنروح ع طول ..
علي: بتردون البيت ..؟؟
فوز: لا .. بنروح الفندق
علي: وليش الفندق .. بتباتون عندنا اليوم ..
فوز: خلاص نحن حاجزين ف الفندق وأغراضنا هناك ..
علي: دام جيه .. خلاص ندوش اليوم الوقت ما يسمح نظهر بس أوعدج باجر إن شاء الله أوديج وين ما تبين ..
ندى: ليش مب اليوم ؟؟
علي: أحينه الساعة 9 .. ويبيلهم ساعة لين يخلصون متعشين .. وعقبها ما بنواحي نروح مكان .. أبا أحوطج ف دبي أنا ..
ندى: إنزين ..

فوز تطالع علي ونظراته لندى .. وتفكر بالإحساس الغريب اللي إييها أول ما تشوفه .. احساس الخوف والرهبة منه ..

علي: فوز ..
فوز: هلا
علي: أهنيج ..
فوز: ع شو ..؟؟
علي: ع طولة بالج .. وصبرج .. وطيبة قلبج

ظهر سعيد م الميلس .. وف نفس الوقت ظهرت ميرة من داخل تشوف فوز وينها .. وليش بطت .. كانت تبا تزقرها عسب يتعشون .. كانت فوز واقفة ب النص .. سعيد ع يسارها .. وعلي ع يمينها وميرة جدامها ..

أول ما شافها سعيد .. حس قلبه يرقص م الفرح .. وسارت ندى تركض صوبه .. ميرة علامات تعجب ع ويهها .. فوز شو تسوي خاري .. وف وجود علي وسعيد ..؟!!! أما علي فحس إن اللي يسويه غلط .. هو يدري إن سعيد معجب بفوز والمفروض ما يوقف وياها ولا يرمسها ..

سعيد عقب ما سلم ع ندى .. مشى صوب فوز عسب يسلم عليها بعد ..

سعيد: شحالج فوز ..؟؟
فوز : الحمدلله طيبة ..

كانت ف موقف بايخ .. ما عرفت شلون تظهر منه .. وميرة حست بهالشي .. وعشان جيه زقرتها ..

ميرة: فوز ..؟؟
فوز فخاطرها : الحمدلله .. اليوم ميرة المنقذة .. استأذنت وسارت عنهم ..

سارت فوز .. وسعيد يطالعها ويطالع ع ميرة اللي الغيرة مبينة عليها ..

ندى: سعيد ..؟
سعيد: هلا فديتج
ندى: علي يكول إنت ما تبا تشوفني ..
سعيد: لا والله .. حبيبتي إنتي شلون ما أبا أشوفج .. ما عليج منه ها يبا يزرع الفتنة بينا ..
ندى: عيل ليش ما ييت تشوفني ..؟؟
سعيد: لأني سرت أيلس عند الرياييل ما يصير أخليهم بروحهم .. بس أحينه ظهرت عسب أشوفج
ندى: انزين .. علي كال باجر بيوديني أتحوط ف دبي .. وبنشلك معنا ..
سعيد: صج والله ..
ندى: هيه ..
سعيد: إنزين فديتج سيري تعشي أحينه .. وخليني أسير المطبخ أقولهم إييبون العشا حق الرياييل .. زين
ندى: زين ..

سار سعيد صوب المطبخ .. وعلي سأل ندى عن الفندق اللي حاجزين فيه عسب باجر يروح يشلها .. وقالت له وعقبها دشت داخل تتعشى .. وهو سار صوب الميلس عسب ييلس عن الرياييل .. ولمن جان يمشي لاحظ إنه داس ع شي .. واستغرب شو هالشي ..؟؟

كانت مذكرة صغيرة .. خذها من ع الأرض وفتحها .. ف أول صفحة مكتوب فيها اسم فوز .. بخط حلو ومرتب .. عرف إن المذكرة تخصها .. خشها ف مخباه وعقبها دش داخل ....!!!



نهاية الجزء
تعقيبكم

ترقبوا الجزء الـ 20

​

 

[أم حور]

(( طولت بالي وخذها اليوم لك شكراً ما ينزل الراس دام الروح بي حية ))


الجزء العشرون


كوفي شوب الجامعة
يوم الثلاثاء
الساعة 8:10 مساءاً


فوز وموزة يالسات ف الكوفي شوب .. ها أول لقاء بينهن من يوم ما بدا شهر رمضان .. وجان المفروض ميرة تكون وياهم بس اعتذرت وقالت إنها تعبانة .. فوز ملاحظة إن ميرة من بدا الدوام وهي متغيرة .. ما ترمس وياها وايد .. وما تيلس ف الغرفة ف الوقت اللي فوز تكون موجودة فيها .. وكانت تحكي حق موزة هالشي ..

موزة: طيب إنتي ما سألتيها ..؟؟
فوز: لا .. قلت يمكن البنت مب متغيرة .. يعني يتهيأ لي
موزة: لا والله ..
فوز: بيني وبينج أنا أحس إن السبب يخص ولد خالتها
موزة: سعيد ..؟؟
فوز: هيه
موزة: وإنتي شو يخصج فيه ..؟؟
فوز: تعرفنا عليهم ف بريطانيا .. ومستوي صديق ندى .. عادي ترمس وياه ساعة ساعتين ع الفون .. تقولين خطيبها وإلا حبيبها
موزة: صج ..؟؟
فوز: والله .. المهم ما أدري بس أنا مب مرتاحة أحس إن سعيد قال لها شي عني ..
موزة: شي عنج ..؟؟ وليش يرمسها عنج وهو شدراه إن إنتي رفيجتها ..؟؟
فوز: مواز ركزي ويايه .. أنا تعرفت ع سعيد وعلى أخو ميرة ف بريطانيا .. وقبل 3 أو 4 أسابيع عزمونا عندهم ف البيت وشفت ميرة وتفاجأت إن ميرة أخت علي .. وإن سعيد اللي أنا أعرفه نفسه اللي ميرة تحبه ..
موزة: إنزين .. ليش بيرمسها عنج ..؟؟
فوز: صارت بينا مواقف .. وأخاف يكون قالها وإنتي تدرين إنها تحبه .. أنا ما أبا أخرب علاقتي ف ميرة يا موزة ..
موزة: ممممممم طيب سعيد يدري إنج رفيجة ميرة بالجامعة ..؟؟
فوز: ما أظن .. إلا إذا ميرة قالت له ..
موزة: أحسن شي ترمسينها .. وتفهمين منها هي ليش متغيرة ..
فوز: بحاول ..
موزة: وأخوها وسيم ..؟؟
فوز: أخو منو ..؟؟
موزة: فوز بلاج .. ركزي ويايه ^_* .. أخو ميرة ..؟؟
فوز: هيييه .. هههههههه ليش تسألين عنه ؟؟
موزة: جان وسيم بخطبه ..
فوز: حق منو ..؟؟
موزة: حقي بعد حق منو
فوز: وسواف شو صار عليه ...؟؟
موزة: ماااااااااااااات حبه .. بعد لا تسأل علييييه
فوز: لا والله بهالسهولة ..
موزة: يب
فوز: ع منو تجذبين يا حلوة .. يبين عليج إنه ولهانة عليه وايد وتبين تسامحينه بس تخافين إنه يرد يسويها مرة ثانية صح ..؟؟
موزة: آآآآآه .. هيه والله ياختي .. مب عارفة شو أسوي .. روضووه وحصيص محتشرات عليه .. أونه بيضيع منج .. ولا تصدينه وايد ترا سواف عنده كبرياء وإذا شافج جيه .. بينساج ودامه يحبج وشاريج سامحيه ..
فوز: مب كأنج وايد عاقبتيه ..؟؟
موزة: إمبلا .. بس يستاهل
فوز: هههههههههه إنزين وشو ناوية تسوين ؟؟
موزة: مممممممم ما أعرف .. هو جان مطنش جيه أسبوع .. وأحينه أشوف رد يطرش مسجات مرة ثانية .. وأنا أحياناً أرد عليه وأحياناً أطنش ..
فوز: فكري عدل ولا تتسرعين بقرارج .. وإذا فعلاً تحبيه عطيه فرصة .. جل من لا يسهو ..
موزة: إن شاء الله .. قوليلي إنتي دامج سرتي الشارجة أكيد سرتوا صوب أهلكم ..؟؟
فوز: لا والله .. كانوا سايرين العمرة
موزة: أهااااا ..
فوز بابتسامة: بس ما عليه كلها أسبوعين وبيي العيد وبنروح صوبهم ..
موزة: هيه والله الأيام تركض .. أمس أول رمضان واليوم الشهر انتصف ..
فوز: الحمدلله ع كل حال ..
موزة: وسلطان ..؟؟
فوز: ما أعرف عنه شي .. ^_^ .. وهالفصل ما أشوفه لأنه مب ويايه ف ولا محاضرة .. الحمدلله جان اختيار موفق لـ الـ time table
موزة: اهاااا .. صح ما خبرتج ..
فوز: شو ..؟؟
موزة: ع إجازة نص السنة أحمد بيعرس
فوز: صج .. مب ع أساس يكون العرس ف الصيف ؟؟
موزة: إمبلا .. بس أحمد زاهب ويبا يعرس
فوز: ياللا مبارك عليهم إن شاء الله وربي يسعدهم
موزة: آمين يا رب ..
فوز: شو مب جأنه يا وقت الردة للسكن ..؟
موزة: هيه والله 8 ونص عااد .. والوقت مضى بسرعة
فوز: من كثر السوالف
موزة: ههههههه عاد اللي يسمع السوالف يقول قاعدين نناقش قضية الشرق الأوسط
فوز: ههههههههه

السكن الجامعي
يوم الثلاثاء
الساعة 9:00 مساءاً

ميرة كانت يالسة ف الغرفة .. أول مرة تحس نفسها ما تبا تداوم مع إنها قبل كانت تتمنى الاجازة تخلص وتبدا دوام بس عقب التطورات اللي صارت حست إن موقعها غلط ف حياة فوز .. فوز رفيجتها وسعيد حبيبها ولازم تتنازل عن واحد منهم .. أو تخسر الإثنين مع بعض ..
دق تليفونها جان علي متصل فيها .. وردت عليه ع طول ..

علي: السلام عليكم
ميرة: وعليكم السلام والرحمة
علي: شحالج فديتج ..؟؟ وشو الدراسة ..؟؟
ميرة: الحمدلله أنا بخير والدراسة ماشي حالها .. شحالك إنته .. وشحال عبدالله وحريمه ..؟؟
علي: ههههههههه الحمدلله كلنا بخير .. وعبدالله شاقح مثل ما يقولون .. منو قده عنده ثنتين ويتأمر ع كيف كيفه
ميرة: هههههههه وخوله شحالها ..؟؟
علي: من بدا الدوام ما أشوفها وايد .. أغلب وقتها ف المدرسة ومن ترد ف دارها ما تظهر وما أشوفها إلا عند الفطور ..
ميرة: حليلها الله يعينها ..
علي: وإنتي شو الصوم وياج ..؟
ميرة: مول ماشي تعب .. الحمد لله
علي: ههههههههه الظاهر محد غيري متلعوز
ميرة: أستغفر الله .. شو هالرمسة
علي: أسولف وياج يالدبه .. بس صج والله أتعب وايد خصوصاً أول الصبح ..
ميرة: علاوي تصدج إنك تتدلع
علي: أنا ...؟؟ ليش ..؟؟
ميرة: يعني جم سنة ف بريطانيا وكنت تصوم وهناك النهار طويل عندهم وييين لين يأذن المغرب .. ما اشتكيت ولا قلت شي
علي: فديتج لأن الجو عندهم بارد فما تحسين بس هنيه عندنا حر وعطش
ميرة: ههههههههه معقولة مب قادر تتأقلم .. مرن أسبوعين من بدا رمضان وإنت بعدك ع حالتك
علي: عاد إنتي بالمرة تصدقيين ويا فيسج .. قوليلي ..؟
ميرة: شو ..؟
علي: فوز شحالها ..؟؟
ميرة باستغراب: ليش تسأل عنها ..؟؟
علي: رفيجتج ووياج ف نفس الغرفة لازم اسأل عنها
ميرة: لا والله
علي: هيه
ميرة: بس جيه ...؟؟
علي: شو قصدج ..؟؟ لا فديتج تطمني مافي شي م اللي ف بالج .. أصلاً خلاص أنا حجزتها حق سعيد مبين عليه يحبها ويبيها

حست ميرة كأن حد صب سطل ماي بارد عليها .. ما قدرت ترمس م الغصة اللي ياتهااا ..

علي: هووو شفيج صخيتي ؟؟
ميرة: هاه .. ولاشي ..
علي: المهم شحالها ..؟؟
ميرة: الحمدلله بخير ..
علي: سلمي عليها وايد
ميرة باستغراب: شو ..؟؟ بعد أسلم عليها
علي: هيه ..
ميرة: علاوي إنت شو سالفتك ..؟؟
علي: شو سالفتي ..؟؟
ميرة: داق عليه وتسألني عن فوز وتباني أوصل لها سلامك .. شو هناك ..؟؟
علي: بصراحة عندي شي يخصها من فترة أحينه .. بس اللي استغربت منه إنها ما طرته ولا سألت عنه
ميرة: شي يخصها ..؟؟ شو هالشي ..؟؟
علي: لما كانوا يايين بيت خالتي الظاهر إنه طاح منها دفتر مذكرات صغير وأنا شفته وخذيته
ميرة: غريبة .. ما قالت ولا علقت إن في شي ضايع منها
علي: يمكن مب منتبهه ..
ميرة: يمكن والله المهم باجر ييبه وياك لمن تيي تاخذني عسب أعطيها إياه
علي: لا ما أبا .. خلاص أنا شفته وخذيته وصار ملكي
ميرة: لا والله
علي: هيه شو بعد .. بصراحة عيبني
ميرة: قريت اللي فيه ..؟؟؟
علي: أكييييد
ميرة: طالعوا ها .. شلون تقرا شي مش لك .. المفروض تستأذن قبل يمكن فيه أسرارها
علي: فيه أسرار .. بس عادي أسرارها ف بير هههههههههه
ميرة: أقول ترا أنا بديت أشك إنك شارب شي
علي: هههههههههههههههههه خس الله بليسج شو شايفتني .. أعوذ بالله الله يبعدني عن الحرام ويبعد الحرام عني
ميرة: آمين .. بس بصراحة رمستك مخزبقة ..
علي: ما عليج مني المهم إنتي وصلي سلامي لها ..
ميرة: إن شاء الله
علي: ياللا عيل بخليج أحينه .. اهتمي ف دراستج وديري بالج ع روحج
ميرة: إن شاء الله وإنت بعد دير بالك ع روحك
علي: لا توصين ياللا فمان الله
ميرة: ربي يحفظك



بند علي عنها .. عقب ما زرع الشك ف قلبها بخصوص سعيد وفوز .. صحيح سعيد خبرها إنه يبا فوز ويحبها بس إنها تسمع هالرمسة من عند علي هالشي معناته إن سعيد صادق ف رمسته وفعلاً يبا فوز .. لأنه من هاك اليوم ما فتح معها الموضوع ف أكيد راح يرمس أهلها بالمرة وبدون لا يتريا ردي .. كانت تبا تصيح بس دخول فوز فهاللحظة للغرفة منعها ..

فوز: السلام عليكم
ميرة: وعليكم السلام
فوز: مواز تسلم عليج ..
ميرة: ربي يسلمها .. إنتي بعد أخويه علي يسلم عليج
فوز باستغراب: ربي يسلمج ويسلمه من كل شر

خذت ميرة كتابها وكانت بتظهر م الغرفة بس فوز وقفتها ..

فوز: ميرة ..؟؟
ميرة: نعم .. بغيتي شي ..؟؟
فوز: هيه .. أبا أعرف إنتي شفيج ؟؟
ميرة: شفيني ؟؟
فوز: من بدا الدوام وإنتي مب طبيعية .. شو مستوي؟؟
ميرة: ما فهمت .. شو تقصدين؟؟
فوز: يعني ما ترمسين ويايه مثل قبل .. أغلب وقتج برع الغرفة خصوصاً إذا كنت أنا موجودة فيها .. أنا ضايجتج بشي ؟؟
ميرة: شو هالرمسة يا فوز .. يتهيألج
فوز: لا ما يتهيأ لي .. إنتي فيج شي .. وأحينه بتقولين شو هالشي اللي مخلنج تتغيرين عليّ جيه ..؟؟
ميرة: قلت لج ما فيني شي يا فوز .. هالسنة ضغط الدراسة زاد وما عندي وقت أضيعه ف الرمسة والهذربة ..
فوز: تونا ف بداية الدراسة .. ومن متى صارت الرمسة ويايه مضيعة وقت ..؟؟
ميرة: فوز ليش تبين تكبرين السالفة .. قلت لج ما فيني شي
فوز: أبا أكبر السالفة.. إنتي ما تشوفين نفسج كيف ترمسين ويايه .. من يوم ما تعرفت عليج ولا عمرج سويتي هالشي ولا رمستيني بهالأسلوب .. إذا أنا سويت شي غلط ومب عايبنج قولي يمكن أكون مب منتبهه ع غلطي ..
ميرة: ما عندي شي أقوله .. ومب أنا اللي بقولج شو أغلاطج كل واحد يعرف شو مسوي ويشوف إذا اللي مسونه صح وإلا غلط

ظهرت ميرة من الغرفة .. وخلت فوز ف حيرة كبيرة .. فوز الحساسة اللي دوم تنجرح من أقرب الناس لها .. هالمرة ما كانت تبا تصيح لأن صدمتها أقوى .. رمسة ميرة وياها وأسلوبها خلوها تتأكد إن سبب تغيرها له علاقة ف سعيد .. بس شو مستوي فوز مب عارفة ...!!

سارت حق جنطتها .. تبا تطلع مذكرتها الصغيرة .. هالمذكرة تكتب فيها المواقف اللي تصير وياها بس .. وبدون لا تذكر ويا منو صار الموقف .. دورتها بس ما حصلتها .. قلبت الغرفة وبدون نتيجة وعقب يلست تحاول تتذكر متى آخر مرة شافتها فيه .. بس للأسف ما قدرت ...!
عقب ما يأست من البحث .. فكرت إنها يمكن تكون نستها ف البيت وقالت باجر بترد البيت وبتدورها .. فتحت اللاب توب ودشت النت قبل فترة كانت منزلة خاطره ويلست تشوف التعليقات عليها ..!!!!


عقب مرور أسبوعين

بيت أبو محمد
يوم الإثنين
الساعة 11:00 صباحاً


3 أيام العيد



كان هالعيد بالنسبة لفوز غير .. تحس إنه أول عيد يمر عليها وتكون مستانسة فيه وايد .. بالرغم من علاقتها المتوترة بميرة بس احساسها بوجودها وسط أهلها خلاها تكون مستانسة .. فوز عندها أهلها بالدنيا كلها ودامها بينهم مستحيل تبين حق أي واحد منهم إن في شي مضايجنها ..!

وصلوا بيت أبو محمد .. متعودين كل عيد يزورونهم بس هالمرة الزيارة كانت غير بالنسبة لفوز .. هالمرة شوقها زايد لمحمد وجان خاطرها تشوفه ولو لمحه من بعيد .. شو السبب ما تعرف ؟؟ يمكن لأن أول وثاني أيام العيد مرن عليها وهي ف قمة وناستها وتبا تخلّد هالوناسة بشي أكبر وهو إنها تشوف الشخص الوحيد اللي حبته من قلبها .. وللأسف ما يدري عنها ..!

دشوا ميلس الحريم الـ 2 .. وجان ف استقبالهم أم محمد وسما بس .. أما شما فكانت ف بيت ريلها وواعدتهم تييهم عقب الغدا .

أم محمد: حيالله من يانا ..
أم حمد: الله يحيج فديتج .. شحالج وشحال عربانج عساهم بخير؟؟
أم محمد: الحمدلله كلهم بخير والله .. شحالكم إنتو ؟؟
أم حمد: نشكر الله ونحمده ..
سما: والله يا خالتيه ولهانين عليكم وايد .. زين ييتوا صوبنا
أم حمد: هيه ولهانين علينا ولا تييون ولا تمرونا ..
سما: تعرفين بعد مشاغل ..
فوز: أونج .. لو عندج ريل بقول مشغولة فيه ..
سما: ههههههههه لو عندي ريل ما بنشغل جيه
ريم: إلا شمّا وين ؟؟
سما: شمّا بيت ريلها .. قالت بتيي عقب الغدا ..
ريم: اهااااا
أم محمد: أبو حمد يايبنكم ..؟؟
أم حمد: هيه .. وحمد ياي ويانا بعد
أم محمد: شحاله حمد ..؟؟ ما ناوي يعرس ..؟؟
أم حمد: إمبلا .. خاطبين له وحده يقربولنا من بعيد والعرس ع الصيف الياي إن شاء الله
أم محمد: الله يتمم فرحتكم ع خير إن شاء الله
أم حمد: آمين يا رب .. ومحمد شحاله ..؟؟
أم محمد: الحمدلله بخير ..

فهاللحظة دشت حرمة الميلس .. أم حمد وريم وفوز أول مرة يشوفونها .. وفوز وهي تسلم عليها حست باحساس غريب .. الحرمة سلمت عليهن وظهرت بالمرة لأن محمد زقرها ..

أم حمد: منو هالبنت ما عرفتها ..؟؟
أم محمد: هاي سلامة حرمة محمد ..

أول ما سمعت فوز رمسة أم محمد حسّت إن حد صب سطل ماي بارد عليها .. حرمة محمد ..؟؟!!!! متى عرّس وليش ..؟؟؟؟

أم حمد: ليش محمد متى عرّس ..؟؟؟
أم محمد: من شهرين أحينه .. ودقينا عليكم عسب نعزمكم أجهزتكم كلها مبندة .. وعقب عاد عرفنا إنكم كنتوا مسافرين

فوز تحاول تستوعب الصدمة .. كانت يالسة مقابل أم محمد ع طول وأم محمد وهي ترمس كأنها تحكي حق فوز .. شو تسوي مب عارفة .. خافت تبجي وتنكشف .. ما قدرت تغطي دموع عينها فابتسمت ابتسامة أقرب للضحك يمكن يختفي الجرح اللي باين فيها

أم محمد: أبوه اختارله العروس وهو وافق بالمرة .. قلت له لا تستعيل يمكن باجر تشوف لك وحده تعيبك وتحبها وتباها .. قال لا دام أبويه اختارها لي أكيد بتكون بنت ناس وحشيم ..

فوز .. عرّس .. يسد إني طول حياتي فاقدتنه .. أيي هالمرة وأفقده للأبد ..؟؟ ليش .. ليش أنا الوحيدة اللي يصير معي جيه .. ليش حظي دوم معاندني .. ياربي سترك ..

ريم كانت حاسة باختها .. وبالألم اللي تركه زواج محمد ف قلبها .. خصوصاً عقب ما شافت حرمته وسلمت عليها بعد .. بس ما جان ف إيدها أي شي تسويه ..

استأذنت فوز بتروح الحمّام .. جان الحمّام برع الميلس لأنهم يسوون صيانة حق البيت .. وع طول دشت الحمّام وصكت الباب عليها ويلست تبجي بقو ..

ياربي .. معقولة ..؟؟ مستحيل أكيد أنا ف حلم .. مستحيل محمد يعرس .. وأنا .. وأحلامي ..؟!! ما قدرت تيود نفسها كانت تطالع المنظرة وتبجي .. وتشوف دموعها اللي تطيح .. يا ليت محمد يطيح من قلبها مثل هالدموع اللي تطيح من عينها ..!
أنا غبية .. كل اللي كنت عايشتنه وهم .. وكنت متأكدة إن هاليوم بيي ومع ذلك ما حاولت أنساه .. بالعكس كنت أحبه أكثر وأكثر .. يلست فوز تمسح دموعها .. وعقب ما غسلت ويهها وتمكيجت عسب ما يعرفون إنها كانت تبجي .. ظهرت م الحمّام .. وكانت بتروح صوب الميلس مرة 2 .. بس وقفت بنص الغرفة اللي فيها الحمام وهي تسمع صوت محمد يرمس ويا حرمته .. فهاللحظة كانت تكتب ف عقلها خاطرة تناسب هالموقف ..

كنتُ أنتشي بـ فرحةِ العيد .. طوال الأيام الماضية ..
عيدٌ سعيد .. وفرحٌ يتجدد .. بـ لقاء من نحب ..
ولـ أولِ مرة .. أشعر بـ أن لـ أيامِ العيد .. طعمٌ مختلف عما سبق ..
طعمٌ جماله يكمن .. في لمةِ الأهلِ والأحباب ..
عشتُ الفرح .. في أيامِ العيد ..
بـ استثناءِ اليوم ..
كان كئيباً .. شاحباً .. منذ بدايته .. وما أصعب " يوم الإثنين " ..
وما أقساهُ من تاريخٍ .. صادف أن يكون فيه ..
لم اشأ أن أبكـي .. وخشيتُ أن تفضحني دموعي ..
فـ توشحتُ بـ ابتسـامتي التي اعتدتها .. لـ تغطي الحزن في قلبي ..!

:

صدمتُ .. وذهِلت .. وأنا أسمع ذاك الخبـر ..
الذي قضـى على كلِ حلمٍ جميـل .. عشتُ لـ تحقيقه ..
خيوط الشمس التي تسربت إلى غرفتي صباحاً ..
وانفجرت في مخيلتي ..
أوحت لي .. بـ أن اليوم يخبئ لي مفاجأة أليمـة ..
ذهبتُ إلى هناك .. وأنا أحمـل أماني .. تجمعت في ذهني ..
وأحلام .. عشتها وأنا طفلة .. ودثرتها .. عندما بلغتُ سن الرشد ..
وها أنا اليوم .. أعلنتُ وفاتها.. فـ دفنتها .. ودفنتُ الحب معها ..!

سخيفٌ هو حب الطفـولة .. اليوم تيقنت ..
واليوم .. شعرتُ بـ غصة في قلبي .. كادت تقتلني ..
رغم أنني نسيتُ ذاك الماضي .. بـ من حمل معه .. إلا أنني كنتُ أبكي في داخلي ..
لم أبكي حبّي .. فـ حبي مات منذ أزل .. ولكن بكيته هو ..
بكيتُ طفولتي التي قضيتها وأنا أرسمه سجّاني ..
بكيتُ هوسي المجنون به .. وبـ اسمهِ ورسمه ..!
بكيتُ الحال التي آل إليها ..
يبقى اختيـاره .. وتبقـى حياته ..
وأبقـى أنا ..
ضحية حبٍ صامت ..
عاش سنوات .. ومات فـي غمضةِ عيـن ...!

تحاياي له ..
دم بـ سعـادةٍ يـ أنت .. هذا أقصى ما أتمنــى ...!


تعرف إن اللي تسويه بيعذبها زيادة .. بس يمكن كانت تتمنى تشوفه آخر مرة لأنها راح تبدا م اليوم تغير الصورة اللي كانت تشوف محمد فيها .. من حبيب لأخو .. أو لولا شي ..!!

سلامة: حبيبي خلني أسير عند الحريم .. فضيحة والله ما يلست وياهم .. سلمت وبالمرة زقرتني ..
محمد: ما أبا .. عندهم سما وأمييه .. وبعدين إنتي ما تعرفينهم
سلامة: ما أعرفهم وعشان جيه أبا أتعرف عليهم
محمد: ليش ..؟؟
سلامة: شو ليش .. مب أهلك .. لازم أعرفهم لأنهم صاروا أهلي بعد
محمد: خل عنج والله بتواحين عقب الغدا سيري عندهم
سلامة: يعني أنا من متى عندك فالدار ما قلت لي أسويلك شي .. احينه ياي ..
محمد: حرمتييييه لازم تسوين اللي أباه ف أي وقت أباه وبعدين ما كنت أعرف إن بسير بوظبي أحينه الشباب دقوا عليه وقرروا
سلامة: إنزين .. ومتى بتروح ؟؟
محمد: عقب الغدا بنظهر ..
سلامة: وبتخلي الرياييل بروحهم ..؟؟
محمد: أبويه هنيه وفهد وعيال عمي يعني مب بروحهم ..
سلامة: إنزين عيل أنا أبا أسير بيت أهلي .. ما بيلس هنيه
محمد: أوكي خلي فهد يوصلج عقب ما يروحون العرب
سلامة: إن شاء الله

لو مهما حاولت تمحي الحزن اللي ف قلبها ما بتقدر .. ولو مهما حاولت توقف دموعها بعد ما بتعرف .. كانت واقفة والدموع بدون وعي منها تنزل .. آآآآآآه يحبها .. يا رب صبرني .. أكيد يحبها مب حرمته .. تفكيرها العميق ودموعها اللي تنزل وصدمتها باللي سمعته .. ما خلوها تنتبه ع الريال اللي واقف وراها ع طول ..

فهد: سمااااااااااا

زاغت فوز لمن حست إن الريال صوته جريب منها .. وطالعت ف ويهه وهو تفاجأ لمن شافها ع باله أخته سما .. فهد أخو محمد من أم توفى أبوه قبل لا يشوفه .. وعقبها أمه خذت أبو محمد .. فهد جان معرس وحرمته توفت قبل سنتين فحادث .. وما جان عنده عيال وعقبها قرر إنه ما يعرس ..

أول ما شاف فوز .. كسر خاطره شكلها وهي تبجي .. بس ما عرف منو هالبنت لأنه من يوم توفت حرمته سافر برع وشغل نفسه باستكمال الماستر ومن عقبها الدكتوراه .. مع إنه يعرف فوز بس شكلها تغير وآخر مرة شايفنها جان عمرها تقريبا 13 سنة .. أما فوز ف عرفت ع طول إنه أخو محمد لأن الشبه بينهم كبير .. كل اللي قدرت تسويه وهي ف هالموقف ونظرات فهد ما خلتها ف حالها إنها تمسح دموعها ..

فهد: السموحة منج .. تحسبتج سما أختيه ..
فوز: سما ف الميلس .. أزقرها لك
فهد: لو ما عليج أمر ..
فوز: إن شاء الله

كانت بتدش بس فهد زقرها ..

فهد: لو سمحتي ..؟
فوز: هلا ..
فهد: إنتي منو ..؟!
فوز بابتسامة : الظاهر مب عارفني يا فهد .. أنا فوز
فهد: فوز ..؟؟ مستحيل
فوز: شو المستحيل ..؟؟
فهد: كبرتي وايد .. والله ما عرفتج .. وين فوز هذيج الصغيرة .. ياربي جريب بتصيرين طولي وأخاف تسبقيني ..
فوز: مب لهالدرجة عاد .. بعدين خلاص وقف طولي ..
فهد: شحالج ..؟؟
فوز: الحمدلله بخير .. شحالك إنته ؟؟ متى ييت م السفر ؟؟
فهد: قبل جم يوم ..
فوز: خلاص خلصت دراسة ؟؟
فهد: هيه الحمدلله .. بس أفكر أشتغل هناك
فوز: ليش عاد ..؟؟
فهد: ما أدري .. مب حاب أيلس ف البلاد ..
فوز: سوي اللي يريحك والله يوفقك
فهد: تسلمين والله .. خاطريه أيلس أسولف وياج وآخذ علومج .. هاه صف جم أحينه ..؟؟ خلصتي دراسة وإلا بعدج ترسبين .. وتعيدين السنة ..
فوز تطالعه بنص عين : ف عينك والله .. فديتني شطورة عمري ما عدت السنة طول دراستيه .. بعدين شو صف جم .. تتحسبني ياهل .. خلصت مدرسة من سنتين وأحينه ف الجامعة
فهد: ما شاء الله ..
فوز: شو ما تباني أدش أزقر سما ..؟؟
فهد: إمبلا أبيج .. بس بسألج قبل
فوز: شو ؟؟
فهد: ليش كنتي تصيحين ؟؟
فوز: ما أصيح .. عيوني جيه بروحها تنزل دموع
فهد: ههههههههه تعرفين تنكتين بعد ..
فوز: شو ؟ صج ترا ما كنت أصيح
فهد: إمبلا كنتي تصيحين .. مممممم وأدري ليش ..
فوز: ليش ..؟
فهد: عسب محمد صح ..؟؟
فوز: شفيه محمد ..؟؟
فهد: فوز كل شي فهالدنيا قسمة ونصيب .. والله ما كتب لج محمد لأنج تستاهلين اللي أحسن منه ..
فوز: ما فهمت عن شو ترمس ؟؟
فهد: أفاااا يا فوز .. نسيتي إن بينا أسرار من صغرنا .. للحين أذكر اليوم اللي رمسنا فيه وقلتيلي إنج تحبين محمد .. وقلت لج إنتي صغيرة أحينه وباجر لي كبرتي بتعرفين إنه مش حب ..
فوز: بس طلع حب ..
فهد: يمكن .. بس هالحب جان من طرف واحد ولازم يموت ..
فوز: راح يموت اليوم يا فهد ..
فهد: أنا متأكد من هالشي .. وأحينه ياللا مسحي دموعج وسيري عند الحريم وزقريلي سما ..
فوز: إن شاء الله

سارت فوز .. وهي حاسة براحة شويه عقب ما رمست فهد .. علاقتها بفهد قوية وايد دوم جان يوقف وياها ويساعدها ف صغرها .. بس حبها وقلبها عطتهن لمحمد .. وهي بعد كانت تساعده ف صغرها .. يطرشها تودي رسايل حق البنت اللي جان يحبها .. واللي تزوجها بس القدر خذها منه عقب سنة من زواجهم .. دشت الميلس وسارت تيلس ف النص بين ريم وسما .. وقالت حق سما إن فهد يباها ..

ريم: وين سرتي .. بطيتي ..؟؟
فوز: سرت الحمام .. وبطيت لأني شفت فهد ويلست أرمس وياه
ريم: منو فهد ..؟؟
فوز: فهد أخو محمد ..
ريم: ما شاء الله عليج .. وليش ترمسين وياه ..؟؟
فوز: شفيج أنا وهو متعودين ع بعض .. أنا أشوفه أخو وهو يشوفني أخت ..
ريم: حتى لو .. مب حلوة ترمسين وياه ..
فوز: رمسنا وخلصنا ..
ريم: تدرين من ظهرتي لين أحينه وهم يرمسون عن محمد
فوز: شفيه بعد ..؟؟
ريم: أمه كانت ترمس عن زواجه .. وإنه صار بسرعة وما جان يحبها بس أحينه عقب ماخذها تحس إنه مرتاح وياها وايد وبدا يحبها وما يروم عنها مول ..
فوز: الله يسعدهم ..
ريم: فديتج كل شي فهالدنيا نصيب ..
فوز: أدري .. وأدري بعد إن نصيبي ما جان عند محمد
ريم: لا تضايجين بروحج
فوز: عادي الموضوع مب مآثر فيني .. من قبل عارفة إن هاليوم بيي ..!!


أما عند فهد ..

فأول ما ظهرت سما من الميلس سارت عند فهد .. اللي جان ف الغرفة اللي شاف فيها فوز .. ووياه محمد ويرمسون ف موضوع مبين عليه خطير ..

محمد: وإنت ليش واقف وياها ..؟؟
فهد: أستغفر الله العظيم .. لا تنسى ترا انا أكبر منك .. مب ترمسني بهالأسلوب ..؟؟
محمد: يعني حلوة الحركة اللي سويتها ..؟؟
فهد: ما سويت شي .. والبنت متربية ويانا ومثل أختيه .. ودامها راضية إنت ما عليك من شي .. خلك ف حالك أحسن
محمد: لا والله .. شرايك عيل لو قلت حق أبويه عن اللي صار
فهد: شو الأخو يالس تهددني .. بعدين أنا أبا أفهم إنت ليش محتر جيه
محمد: محتر هيه محتر لأنه اللي سويته غلط .. واقف وياها وترمس وتسولفون ..
فهد: ف شو سولفنا ..؟؟ قلت لها أنا أحبج .. وقالت لي أنا أموت فيك ..؟؟ محمد لا تكبر السالفة وهي ما ترزا .. أنا كنت أتحسبها سما وعقب تفاجأت إنها فوز .. وشي أكيد بسلم عليها

سما : شفيكم .. ليش أصواتكم عالية جيه .. فضيجة جدام الناس أحينه بيوصل صوتكم الميلس .. شو مستوي ؟؟؟
محمد: تعالي شوفي أخوج .. واقف ويا فوز بروحهم هنيه ويالسين يرمسون ..
سما: إنزين شفيها ..؟؟ فهد وفوز متعودين ع بعض .. عادي
فهد: قوليله ..
محمد: لمن كانوا صغار .. بس أحينه البنت كبرت
سما: والبنت ما اعترضت ولو ما تبا ترمسه ما بترمسه ..
فهد: طالعوا ها .. والله أحس إنك أكبر مني ويالس تعلمني الأدب والإحترام ..
سما: خلاص عاد ..
فهد: محمد إذا كنت سامع الرمسة اللي بينا .. ف لازم تعرف إن خلاص كل شي انتهى .. وإنت أحينه ريال معرس وانسى اللي انقال كله .. لأنه ما منه فايدة ..
سما : أي رمسة ..؟؟ إنتو شفيكم ...؟!!!!
محمد: هيه سمعتها .. وأحينه عاد خلها لك ..
فهد: شو قصدك ..؟؟؟
محمد: يعني جان تباها خذها بالعافية عليييييك

ما حس فهد إلا بإيده ع خد محمد .. وسما تشوف الموقف ..

فهد: لو كنت ريال .. ما قلت هالرمسة .. ويمكن هالطراق يخليك تنتبه مرة ثانية ع رمستك .. وتحشم بنات الناس يا محترم ..

ظهر محمد عقب ما صك الباب بقوة .. حتى الحريم سمعن صوت الباب وهو يتصكر .. وأم محمد استغربت منو صك الباب جيه .. أما فهد ف جان يحاول يمسك أعصابه .. ويهدي نفسه بس ما قدر محمد استفزه برمسته ..

سما : ممكن أفهم شو اللي صاير هنيه ..؟؟؟ شو هالسالفة اللي صايرة تخليك تمد إيدك ع أخوك ..
فهد: يعني ما شفتي وقاحته ..؟؟
سما: بس بعد المفروض ما تطقه .. محمد مب ياهل أحينه ريال وعنده حرمة
فهد: لا ياهل ونص بعد .. اللي يفكر تفكير أخوج أنا أشوفه ياهل
سما: إنزين شو مستوي قولي ..؟؟
فهد: ماشي شفت فوز واقفة تحسبتها إنتي وييت صوبها .. وعقب لمن دريت إنها فوز سلمت عليها ووقفت آخذ علومها ورمسنا شوية والأخو واقف يسمع رمستنا .. ومحرّج لأني واقف وياها أرمس
سما: بس جيه ؟؟
فهد: هيه
سما: وليش قلت له خلاص كل شي انتهى .. وإنت أحينه ريال معرس وانسى اللي انقال كله .. لأنه ما منه فايدة ..؟!!!
فهد: ما أقدر أقول .. ها سر وإنتي بعد انسي اللي صار ..
سما: لا ما بنسى .. أبا أعرف ليش تقوله جيه ..؟؟ محمد مستحيل يعصب لأنك ترمس ويا فوز لو ما جان صاير شي ..؟؟
فهد: بقولج بس اوعديني محد يدري .. ولا تبينين حق فوز إنج تدرين بالسالفة ..
سما: أوعدك ..
فهد: فوز تحب محمد .. وأنا أدري هالشي من سنين أحينه .. ولمن دشيت الغرفة كانت تبجي لأنها درت إن محمد عرّس .. وكنا نرمس ف هالموضوع .. ومحمد سمع هالسالفة وعرف إن فوز تحبه ..
سما: فوز تحب محمد ..؟؟؟ معقولة ..؟؟؟ بس مب مبين عليها إنها تحمل له مشاعر .. دوم نرمس عنه وهي عادي ..
فهد: شو يعني تبيها تقول حق كل واحد تشوفه أنا أحبه ..؟؟
سما: لا بس .. ما أدري .. إنزين ومحمد شو اللي مضايجنه
فهد: يعني ما تعرفين أخوج .. بيبي كل شي له .. حتى لو ما جان ف يوم له ..
سما: يعني .. شو المقصود من هالرمسة ..؟؟
فهد: الحبيب جان ف خاطره شي صوبها .. بس أونه يحس إنها تكرهه وما تطيقه .. وعشان جيه ما فكر فيها .. ولا قالها أو حتى رمسها ..
سما: سبحان الله .. ومحرّج عشان جيه ..؟؟
فهد: لا .. منقهر لأني واقف أرمس وياها .. يمكن يغار ..
سما: يغار ..؟؟ شو هالرمسة .. أحينه هو ريال معرس وما كمل 3 شهور من عرس ويفكر جيه .. أستغفر الله العظيم ..
فهد: ما عليج منه .. محمد طول عمره جيه ولا راح يتغير .. ما يفكر إلا بنفسه وهو شو يبا .. وما عليه من غيره ..
سما: والله فوز حبوبه وما تستاهل اللي صار لها .. وهاي غلطته لو جان يباها المفروض يرمس ويقول ولمن خطب له أبويه يقول إنه ف خاطره حد .. حليلها عمرها ما رمست عنه إلا بالزين وين تكرهه وما تطيقه ..
فهد: ما تنفع هالرمسة أحينه .. هو شاف طريقه وهي إن شاء الله بتشوف طريقها وبتحصل اللي يستاهلها .. فوز طيبة ومحمد ما يستاهلها .. عشان جيه ربج ما كتب إنهم يكونون حق بعض


عقب ما ظهر محمد من عندهم سار ييلس ف الحديقة .. حاس نفسه بينفجر .. شو السبب ما يعرف ..؟؟ محمد طول عمره لا مبالي .. دوم يبين إنه واحد ما عنده مشاعر ولا أحاسيس .. انسان جاف وقاسي القلب .. للحظة نسى إنه معرس .. وتفكيره جان بفوز .. أحينه استوعب رمستها له آخر مرة لمن قالت له إذا أنا باردة عيل إنت شو تطلع ..؟؟!!!!!
يااااه يا فوز تحبيني ومن زمان وأنا توني أدري .. ليتج قلتيلي عن اللي فخاطرج .. كنتي احينه لي أنا .. يا ربي شو هالرمسة .. أعوذ بالله من الشيطان الرجيم .. مش زين أفكر ف وحده 2 .. والله سلامة طيبة وما فيه مثلها .. حرام أفرط فالنعمة اللي عندي .. وبعدني ما كملت 3 شهور من عرست .. أكيد أنا ينيت .. بس فوز .. أنا أبيها .. أحبها .. عيل ليش انقهرت أول ما شفتها واقفة ويا فهد .. وسلامة شو ؟؟ سلامة بعد أحبها حرمتيه لازم أحبها .. ما بخلي فوز تضيع مني دامها تحبني .. دش ميلس الرياييل سلم عليهم واستأذن إنه بيروح .. قرر ما ييلس حتى حق الغدا عقب اللي صار .. وخذ أغراضه وظهر م البيت وعقب طرش مسج حق حرمته إنه سار بوظبي وبيرد عقب يومين ...!!!!



بيت عبدالله
يوم الأربعاء
الساعة 8:00 مساءاً


خولة ف الصالة ويا ميرة .. علي محد وعبدالله ظاهر ويا حرمته سايرين المستشفى يسوون فحص لأنها من جم يوم مريضة .. ميرة حاطة أغنية ميريام فارس أنا مش أنانية .. خولة اللي نادراً ما تسمع أغاني كانت يالسة تسمع كلمات الأغنية وتحس إنها ترمس عنها .. وميرة نفس الحالة تسمع الأغنية وهي تفكر بسعيد وفوز ..


حاول تختار بيني وبينها
حاول ...حاول
احسن تضلمني وتضلمها
حاول...حاول
خلي بقلبك وحده وبس
وحده ...وحده
علشان تقدر بيها تحس
حِب وحده
اما لو احنا معاك الاتنين
انت مفيش عندك قلبين
علشان بيها وبيا تحس
انا مش انانيه...انانيه ...انانيه
انا عايزاك ليه لوحدي
انا مش انانيه ...انانيه...انانيه
انا ممكن اسيبكم وامشي
قرر تبقى معايا ولا معاها
لامحصلش وكل ده كدب
انا من بعدك عمري مااحب
مهما تقولي ومهما تعيدي انت لوحدك جوه القلب
اوعي تقولي كلام مش صح
لا ياحياتي كلام مش صح
انت عايش لي وعايش بيها
عايش ...عايش
نصك ليا ونصك ليها
عايش ...عايش
كذب عليا وكذب عليها
كذبه ...كذبه
لابترضيني ولاترضيها
صعب نحس
قاسم قلبك ليه نصين ؟
عشان كدا ما احناش حاسين
لا انا ولا هي هنرضى بنص
انا مش انانيه...انانيه ...انانيه
انا عايزاك ليه لوحدي
انا مش انانيه ...انانيه...انانيه
انا ممكن اسيبكم وامشي
قرر تبقى معايا ولا معاه


عقب ما خلصت الأغنية .. نشت خولة وميرة ما انتبهت عليها .. خولة حاسة إن عبدالله متغير وايد عليها .. أغلب وقته ويا شما بس ما كانت تبا توضح له هالشي .. تقول أكيد بيحس بروحه وبما إنه توه معرس يديد تبا تعطيه راحته .. لو ما تحبه ما تحملت هالشي ولا وافقت إنه يتزوج .. ومنو ياخذ البنت اللي جان يحبها .. هالشي أكيد له تأثير كبير عليها ..!!

أما ميرة .. فمن خلصت الأغنية يلست تفكر بعلاقتها بفوز .. فوز مالها ذنب إذا جان سعيد يحبها ويبيها .. حرام تعاملها بطريقة مب زينة وهي ما شافت منها إلا كل خير .. اندماجها ف التفكير ما خلاها تنتبه ع سعيد اللي داش الصالة وميرة أول ما لمحته زاغت خصوصاً إنها ما كانت لابسه شيله ومتبهذلة ع الآخر .. فالة شعرها ومتسدحة ع القنفة .. وأول ما شافته فزّت من مكانها وخذت شيلتها وتغطت ..

ميرة: بسم الله الرحمن الرحيم .. الناس يهودون لمن يدشون .. شو هااا ..
سعيد: هههههههههه السموحة منج
ميرة بنص عين: عقب شو ..؟؟
سعيد: شدراني بشوف هالشكل .. زين ما ركضت برع من الزيااااغ
ميرة: شقصدك ؟؟
سعيد: شقصدي بعد .. تزيغين بصراحة ويا هالكشة المنفووشة
ميرة: ماااااااصخ .. كريييييييييييييه .. ما أحبك .. وع وع وع .. الله يعييييين حرمتك يالسخيف
سعيد: أوووووي شويه شويه ع عمرج لا ينط لج عرج أحينه .. ههههههههه إنتي تتمنين تكونين حرمتيه .. مب حاصللج
ميرة: شو ..؟؟ هه وايد واثق الأخو .. شو أتمنى قال أتمنى الله لا يقووولها إن شاء الله
سعيد: ههههههههههه آميييين يا رب لأن أنا أصلاً ما أبااااج .. أتخيل باجر لو خذيتج .. بنش من رقادي بشوف هالكشة المنفووشة .. بزيغ وبشرد .. إنتي لو بليس شافج جيه بيزيغ
ميرة: ولا أنا ميتة عليك .. أصلا إنت منو يباك .. مقييييت وما تنطاق .. وتلوع بالجبد .. ع شو شايف نفسك ..
سعيد: قولي اللي تبين تقولينه ..
ميرة: خلصني قول شو تبا مشرفنا بزيارتك اليوم .. ما أبا أيلس مع هالأشكال
سعيد: أبيج إنتي .. يلسي خلينا نسولف شويه .. ولهت عليج وع سوالفج الحلوة يالحلوة ..
ميرة قلبها بدا يدق وفخاطرها تقول بلاه ها جيه يرمس ويا راسه .. هالصايع .. يبيني أترفس ف كرشته أحينه ..

سعيد: شفيج أقولج إيلسي برمسج
ميرة وهي تيلس : خير شعندك ..
سعيد: ما رديتي عليه .. إذا رمستي ربيعتج أو لا .. أنا من يوم خبرتج ما سألتج قلت إنتي بتردين عليه خبر .. بس إنتي طاف
ميرة: ما قدرت أرمسها ..
سعيد: ليش ؟؟
ميرة: بس ما قدرت .. خفت أحرجها وتوافق بس لأنها ما تبا تردنيه ..
سعيد: لا والله ..
ميرة: هيه
سعيد: إنزين ما أبا منج شي .. لأني رمست أخوها حمد وقلت له إني أبيها وقالي بيرد عليه عقب ما يرمسها ويرمس أهله ..
ميرة بصدمة: شو ..؟؟؟
سعيد وهو مدقق ع ملامحها اللي فجأة تغيرت ..: شفيج شو شو بعد ..؟؟ أقولج رمست أخوها وقال بيرد عليه
ميرة: متى رمسته ..؟؟
سعيد: قبل يومين .. التقينا ف السنتر كانوا يايين يزورون أهلهم ف الشارجة واتصل فيني وتواعدنا ف السنتر ..
ميرة: فوز كانت ياية الشارجة ولا قالت لي ..؟؟
سعيد: وليش تقولج ؟؟
ميرة: بس جيه لازم تقولي .. عسب أخليها تيي تزورني ..
سعيد: اونج ..
ميرة: هيه
سعيد: المهم أنا بعد رمست أختها ندووش وقالت لي إنها تسلم عليه .. قلت بس البنت أكيد محد ف حياتها وأكيد ف خاطرها شي صوبي ..
ميرة تبا تصيح .. بس ميودة دموعها عسب ما تبين حق سعيد شي .. رغم إن رمسته تقهرها وايد .. معقولة فوز جيه ..؟؟ تعرف إني أحب سعيد وتطرش له سلام ..؟؟؟ لهالدرجة كنت مخدوعة فيج يا فوز ..؟!!!!

سعيد: ميييييرووه .. وين رحتي ؟؟
ميرة: وياك ..
سعيد: لا مش ويايه .. المهم أنا أحينه أبيج تدقين لها تسألينها إذا أخوها رمسها أو لا .. وإذا رمسها هي شو رايها
ميرة: مب داقة حق حد زييييين .. ودامك سرت وخبرت أخوها تريا رد أخوها عليك .. ومبارك عليكم فوز تستاهل كل خير ..

نشت ميرة وسارت فوق بدون لا تعطي سعيد أي مجال إنه يرمس أو يقولها شي .. لأن دمعتها متهيأة إنها تنزل وخافت سعيد يشوف دموعها ف شردت بسرعة .. وسعيد أبداً ما استغرب تصرفها .. ابتسم ع شكلها وهي سايرة تركض .. ويلس ف الصالة يطالع التليفزيون .. وانتبه ع تليفون ميرة اللي يدق .. كانت فوز متصلة فيها .. وسعيد جان متردد وايد .. هل يرد عليها أو لا ..؟؟ وبدون وعي منه رد ..

فوز: السلام عليكم
سعيد: وعليكم السلام والرحمة .. هلا والله
فوز باستغراب منو ها .. ليكون أخوها علي ..
سعيد: شحالج ؟؟
فوز: الحمدلله بخير .. ميرة هنيه ؟؟
سعيد: هيه .. منو أقولها ..
فوز ف خاطرها ها يستهبل .. أكيد ظاهر اسمي ف التليفون ..
فوز: رفيجتها فوز ..
سعيد: أووووه فوز .. شحالج ؟؟ وشحال ندوش ؟؟
فوز: الحمدلله كلنا بخير ..
سعيد: شو ما عرفتيني ؟؟
فوز: لا والله
سعيد: أنا سعيد ..
فوز: سعيد ..؟؟ ليش ترد ع تليفون ميرة ..؟؟
سعيد: لانها محد وجان حذالي .. وشفت اسمج ورديت
فوز: وبكل غباء تسأل منو وياك ؟؟
سعيد: هههههههههه أستهبل ..
فوز: لو سمحت بغيت ميرة ..
سعيد: بعطيج إياها .. بس قبل ممكن أرمس وياج ..
فوز: نعم ؟؟؟
سعيد: أبا أرمسج ف سالفة .. ممكن ؟؟
فوز: تفضل ..
سعيد: اوعديني إنج تفكرين عدل وتقررين عقب .. أنا ما أبا أضغط عليج ..
فوز: أفكر بشو ..؟؟
سعيد: إذا موافقة أو لا ...؟؟
فوز: موافقة أو لا .. ما فهمت ..

قال سعيد اللي عنده .. وفوز انصدمت من رمسته .. كانت متفاجأة م الرمسة اللي قالها سعيد لها .. وعمرها ما تصورت إن هالشي بيصير .. وع طول بندت التليفون عقب ما قالها سعيد تفكر وترد له خبر عقب .. أما سعيد فجان حاس براحة عقب ما رمس فوز وقالها اللي عنده ...!!!!!


نهاية الجزء

ترقبوا الجزء الـ 21

​

 

[أم حور]

(( طولت بالي وخذها اليوم لك شكراً ما ينزل الراس دام الروح بي حيه ))


الجزء الحادي والعشرون


بيت أبو سعيد
يوم الخميس
الساعة 8:00 مساءاً

سعيد يالس ف الصالة ويا أمه وأخته أمون .. جان أبوه وغيث ظاهرين .. وهم يالسين يسولفون .. أمه تبيه يعرس .. كل ما يلس وياها لازم تفتح وياه هالموضوع ..

سعيد: أمايه وربي أنا أبا أعرس .. بس بعدني ما خذيت رأي حبيبتي يمكن ما تبا نعرس أحينه
أم سعيد: مسود الويه .. شو هالرمسة ..؟؟ ليكون ترمس بنات من ورانا ..
سعيد: حشا .. والحشا عن ألف يمين ما أرمس حد
أمون: ههههههههههه خليك تستاهل يالس تستعبط ع أميه
أم سعيد: عيل منو هاي حبيبتك اللي تبا تاخذ رايها بعد ؟؟
سعيد: إنزين أمايه .. إنتي لو .. لو يعني بغيتي تخطبين لي منو بتخطبين لي ..؟؟
أم سعيد: أكيد بخطب لك وحده من أهلنا .. نعرفها وتعرفنا .. ما ببدي الغريب ع الجريب ..
سعيد: بس أمايه يقولون الغريب أحسن م الجريب أحينه
أم سعيد: والله جان تبا الصج أنا أبيلك بنت خالتك .. يتيمة وما بتحصل أحسن منها ..
سعيد: منو بنت خالتيه ؟؟
أم سعيد: جم بنت خاله عندك مسود الويه ؟؟
سعيد: هييييييه .. لا تقولين ميرووووه
أمون: شفيها ميروه ..؟
سعيد: ما فيها شي .. بس لسانها طويل أمايه بتعذبج صدقيني .. أنا أبيلج وحده تحطج ف عيونها يالحلوة
أم سعيد: فديتها ميرة والله .. لا تقول عنها جيه .. محد غيرك لسانه طويل
سعيد: حاضر يا أم سعيد ما بقول ..
أمون: أمايه ميروه خقاقه ما يباها ..
سعيد يطالعها بنص عين .. بس سكت عنها وما قال شي
أم سعيد: بلاكم ع البنت .. يعني شو ما تباها...؟
سعيد: إنزين عندج حد غير ..؟
أم سعيد: شرايك أخطب لك وحده من بنات العرب اللي يووا عندنا ..؟؟
سعيد بابتسامة: منو ..؟؟
أمون: أونه بيسوي نفسه ما يعرف منو
أم سعيد: الصراحة بناتهم حلوات وما عليهن رمسة .. أدب وأخلاق
سعيد: شدراج أمايه إنتي ما شفتيهم إلا مرة وحده
أم سعيد: حتى لو .. أهم شي إنك يوم تيلس عندهم ترتاح
أمون: سعيد قول إنك تبا فوز ..
أم سعيد: فوز ؟؟
أمون: هيه أمايه .. أصلاً سعيد يحبها من يوم شافها ف بريطانيا بس ما قال حق حد ..
سعيد: وإنتي شو يخصج ..؟؟ هالسوالف خلج بعيد عنها واهتمي ف دراستج .. ودري عنج يحبها وما يحبها ..
أم سعيد: تبيها يا سعيد ..؟؟ ترا أحينه أدق حق أهلها وأقولهم ..
سعيد: ههههههههه أمايه إنتي مستعيلة وايد .. بقولكم عقب أنا منو أبا وشو أبا ومتى أبا .. لا تستعيلون أنا بعدني توني ف بداية حياتي ..

دق تليفون سعيد .. وأول ما شاف الرقم عرف إنه فوز داقة تقوله قرارها .. نش من عند هله وظهر خاري يرمس .. بس اللي جان متصل مب فوز .. ندى هي اللي متصلة ..

ندى: السلام عليكم
سعيد: وعليكم السلام .. هلا والله بهالصوت
ندى: هلا هلا هلا سعيد ..
سعيد: حلات سعيد من لسانج يا عسل .. شحالج ؟؟
ندى: الحمدلله بخير .. شحالك إنته ؟؟
سعيد: بخير دام سمعت صوتج .. أكيد ولهانة عليه ..
ندى: هيه .. إنت ليش ما ييت عندنا .. أنا بس ما بيي مرة ثانية
سعيد: والله بزي فديتج .. بس إن شاء الله بييج العيد الياي
ندى: أوووووه العيد بعيد ..
سعيد: لا مش بعيد شهرين تقريباً ..
ندى: انزين ..
سعيد: شو سر هالإتصال ..؟؟
ندى: فوز كالت لي أتصل ..
سعيد: ليش ..؟؟
ندى: تباني أكولك شي ..
سعيد: هاه بشري .. شو ؟؟؟
ندى: تكولك فوز .. أون هي موافكة ..
سعيد: والله ...؟؟
ندى: هيه .. بس على شو موافكة .. ما عرفت ؟؟
سعيد: موافقة إني أيي عندكم وأشلج أحوطج
ندى: متى متى متى ..؟؟
سعيد: ههههههههه حق العيد ترا ..
ندى: انزيييييييييين بسير أكول حك باباتي والله ..
سعيد: لا وين تبين .. لا تفضحينا .. خليه سر لين إيي العيد وعقب قوليله
ندى: انزين ..
سعيد: وشخبارها هي ..؟؟
ندى: منو ؟؟
سعيد: فوز


وصل علي ووياه ميرة .. اللي قرروا إييون يسلمون ع خالتهم لأنهم ما شافوها من جم يوم .. وهي دوم تزعل عليهم لهالسبب .. فقررت ميرة تيي تسلم عليها .. وعلي هو اللي يابها .. دشوا وسعيد يرمس ف الحديقة عن فوز .. ميرة ما سمعت سعيد وهو يقول اسم فوز .. بس علي سمع .. ودرا إن سعيد يرمس ندى ..
أشر سعيد عقب ما شافهم بإيده .. يعني دشوا انا أحينه بيي ..
ميرة ما سوت له اهتمام .. ودشت ع طول أما علي ف حز ف خاطره اللي قاعد يصير وياه .. مب قادر يتحكم ف مشاعره .. وغصب عنه يفكر بفوز .. خصوصاً عقب ما قرا دفترها الصغير ..


ندى: فوز بخير ..
سعيد: هي عندج أحينه ؟؟
ندى: لا .. سارت دارها
سعيد: إنزين سلمي عليها وايد ..
ندى: سعيد إنت تحبها ..؟؟
سعيد: هيه أحبها .. مب اختج لازم أحبها
ندى: هيه صح ..
سعيد: إنزين فديتج ندوش بخليج أحينه .. علاوي ويا اخته يايين عندنا
ندى: إنزيييين .. سلم على علاوي وييبه وياك يوم بتيي
سعيد: إنتي تآمرين أمر ..
ندى: مع السلامة
سعيد: ربي يحفظج يالغلا


بند سعيد عنها .. ودش داخل البيت .. وفخاطره مستانس ع موافقة فوز ..

سلم ع سعيد وميرة وعقبها سار ييلس صوب سعيد .. وميرة تطالعه بنظرات غريبة ..

أم سعيد: كل ها ترمس ف التليفون ..؟؟
أمون: أكيد يرمس الحبيبة
سعيد: هيه كانت داقة تقولي متى تبا العرس .. وخلاص حددنا كل شي
علي: شو مستوي..؟؟
سعيد: ماشي .. أمايه تباني أعرس وقلت لها بتفق ويا حبيبتي متى نسوي العرس ..
ميرة: وشو قالت لك ..؟؟
سعيد بابتسامة: قالت لي موافقة ع كل شي أنا أسويه
علي: ومنو العروس عاد .. ما خبرتني ..؟؟
سعيد وهو يطالع ع ميرة : بتعرفونها جريب ..

ميرة فاهمة هالنظرات عدل وعارفة إن سعيد يقصد فوز وعشان جيه يطالعها .. لأن محد غير ميرة يعرف ومتأكد إن البنت اللي يرمس سعيد عنها هي فوز ..

سعيد: صحيح علاوي تسلم عليك ندوش ..
علي: ربي يسلمها م الشر .. شحالها ...؟؟
سعيد: الحمدلله طيبة ..
علي: أفكر أسير صوبهم جريب بس ماشي فرصة
سعيد: قلت لها بسير لها حق العيد ..
أمون: عيد الفطر توه مخلص وإنتو تفكرون بالعيد الياي
سعيد: هيه عادي ..
أم سعيد: ميرة ..؟؟
ميرة: هلا خالتيه ..
أم سعيد: باجر بتداومين ..؟؟
ميرة: هيه والله
أم سعيد: منو بيوديج ..؟؟
ميرة: ما اعرف يمكن عبدالله .. لأن علاوي قال عنده شغل
سعيد: جان تبيني بوديج .. ويغمز لها ..
ميرة: لا شكراً ما أبا .. عبدالله بيوديني ..
علي: ليش قلتيله ..؟؟
ميرة: لا .. بشوفه عقب ..
علي: ما أدري أخاف يطلع مشغول وما يوديج ..
أمون: أصلا منو يخلصه يوديج .. الطريج بعييييد
ميرة: لا هم ما يودوني الجامعة .. أنزل عن فوز وعقب نسير ويا بعض ..
أم سعيد: ومنو يشلكم ..؟؟
ميرة: ع حسب أحياناً أبوها .. وأحياناً أخوها وأحياناً الباص
سعيد: يعني تروحين بيتهم ..؟؟
ميرة: هيه .. ها بس إذا عبدالله هو اللي وداني ..
علي: وأنا حليلي طول ذيج الفترة أوديج وأييبج وتخليني أوصل للجامعة .. صج إنج شريرة ..
ميرة: إنت متعودة عليك وأحب سوالفك .. عبدالله ما يرمس إلا نادراً ويضربني ملل فضيع ..
علي: إنزين بوصلج باجر بس بوديج بيتهم فوز ..

أول ما سمع سعيد اسم فوز طالع ع علي بسرعة .. اللي حس إن سعيد ما عيبته رمسته .. بس ما علق ..

سعيد: وجان تبون بسير وياكم ..
ميرة: لا علاوي إذا بتوديني .. وديني الجامعة ما أبا أثقل ع البنت وبعدين أنا طول هالفترة ما سرت وياها ..
سعيد: ليش ؟؟
ميرة: عندي أهل وهم ملزومين يودوني .. مش يفروني ع الغرب
سعيد: وفوز من متى صارت غريبة ..؟؟
طالعته ميرة بس ما ردت ع سؤاله .. وعلي حس إن في شي صاير بين فوز وميرة .. لأن ميرة هالفترة أبداً ما ترمس عنها .. وإذا رمست ترمس بطريقة غريبة ..

أم سعيد: ياللا خلونا نتعشى .. وخلوا عنكم هالسوالف .. نشوا غسلوا إيدكم السفرة زاهبة ..
نشوا الشباب يتغسلون .. وميرة قالت ما تبا عشا .. وظهرت خاري تتحوط ف الحديقة .. كانت تفكر تدق حق فوز ودقت .. بس قبل لا ترد فوز .. ميرة صكت التليفون لأنها تفاجأت بسعيد وراها ع طول .. وهالشي خرعها ..

ميرة: إنت اختصاصك ف الحياة تخرع الأوادم ..؟؟
سعيد: هههههههههه لا .. أنا اختصاصي في الحياة أخرعج إنتي بس
ميرة: ليش ما تعشيت ..؟؟
سعيد: شربت حليب بس .. ما أبا أتعشى .. دامج ما تبين تتعشين
ميرة: وإنت شو يخصك فيني ..؟؟
سعيد: كيفي بنت خالتيه ولازم أداريج ..
ميرة: مشكور ما تقصر .. أعرف أداري ع روحي ..
سعيد: شحالج ..؟؟
ميرة: شو تشوفني ..؟؟
سعيد: أشوفج على أحسن ما يرام ..
ميرة: الحمدلله إنك تشوف ..
سعيد: ههههههههههههههه .. حق منو كنتي تدقين ؟؟
ميرة: ما يخصك ..
سعيد: لا صج قولي ..
ميرة: قلت ما يخصك ..
سعيد: إنزين أوكي .. بقولج شي ..
ميرة: شو ؟
سعيد: توني كنت أرمس فوز ..
ميرة: ترمسها ؟؟ ليش عندك رقمها ....؟؟
سعيد: لا والله بس جريب بآخذه .. كنت أرمسها من رقم أخوها
ميرة: لا والله .. ما شاء الله شي تطور ..
سعيد: هيه ..
ميرة: وأنا شو يخصني .. رمستها وإلا ما رمستها ..؟؟
سعيد: لا بس كنت أبا أقولج إني هاك اليوم لمن كنت ف بيتكم هي دقت وأنا رمستها وقلت لها عن سالفة الخطوبة .. وعطيتها وقت تفكر ..
ميرة بصدمة: رمستها من تليفوني ..؟؟؟
سعيد: هيه .. شفت رقمها ورديت لأني كنت أبا أرمسها
ميرة: لا والله وإنت منو سمح لك ترد ع التليفون ؟؟
سعيد: انا سمحت حق نفسي .. المهم ما علينا عاد اليوم هي دقت عسب تعطيني رايها ..
ميرة بغصة: وشو قالت لك ؟؟
سعيد: شو تتوقعين ..؟؟
ميرة: ما أدري والله ما سألتها ..
سعيد: موافقة ..
ميرة: ما فهمت..؟؟؟
سعيد: موافقة أخطبها وتترياني ..

جان الخبر مثل الصاعقة ع ميرة .. فوز .. الطاهرة النقية تطلع جيه .. ها وهي تعرف إني أحب سعيد .. ليش الناس ما يفكرون إلا ف مصلحتهم .. ليش يا ربي .. ليش ...؟؟!!!

دق تليفون ميرة .. كانت فوز هي اللي متصلة .. بس ميرة ساعتها ف موقف يخليها ما تبا ترد على أي حد .. كيف لو جان هالشخص هو فوز .. فوز اللي بتسرق حب طفولتها .. بس عقب قررت ترد خصوصاً إن سعيد يطالعها وأكيد يبا يعرف منو متصل وما ردت عليه ..

ميرة: وعليكم السلام .. نعم منو بغيتي ؟؟!! لا والله ها مب رقمها .. فمان الله ..

سعيد: منو داق ..؟؟
ميرة: وحده مغلطة ف الرقم ..
سعيد: أهااااااا .. إنزين ما باركتيلي ..؟؟
ميرة: لا باركت لك من قبل .. وأرد أبارك لك أحينه .. مبارك عليكم يا سعيد ..
سعيد: الله يبارك فيج وعقبالج

سار سعيد .. وخلى ميرة ف وضع محرج .. تمنت إنها ما يات بيتهم ولا شافته .. كرهت حياتها وكرهت سعيد وكرهت فوز .. كرهت كل شي .. دشت داخل وطلبت من علي يردون البيت وعقب ما سلمت عليهم ظهرت .. وطول الطريج كانت هادية وعلي مستغرب هدوئها .. ميرة من جم يوم مب طبيعية .. بس شو فيها مب عارف؟!! جان بيسألها بس تليفونه دق .. وكانت شوق هي اللي متصلة فيه .. رد عليها وقالها بيرمسها عقب .. وأول ما وصلوا البيت .. ميرة نزلت .. وعلي يلس ف السيارة يرمس شوق ..!!!!


بيت أبو حمد
يوم الجمعة
الساعة 11:00 مساءاً


قبل شوية وصل حمد من المطار .. جان ساير يوصل ريم لأنها بترد بريطانيا .. خلاص الكورس بيبدا .. ومن رد سار ييلس ف غرفته يرمس فطيم ف التليفون .. كل يوم ع نفس الحالة .. إذا حمد اختفى م البيت معناته ف غرفته أو الحديقة يهذرب ف التليفون ..
أما فوز فكانت يالسة ف الغرفة .. وتتذكر موقف ميرة أمس لمن دقت عليها تبا ترمسها وتاخذ أخبارها .. وتفاجأت وايد من ردة فعل ميرة .. هي متأكدة إن اللي رمستها ميرة .. بس ليش ميرة سوت نفسها مب عارفتنها وصكت التليفون بدون لا تعطيها أي مجال ..؟!!!! معقولة متعمدة تسوي هالحركة ..؟؟ أو يمكن مشغولة ..؟؟ أو حد عندها وما قدرت ترمسني .. يلست فوز تحط مية عذر وعذر حق ميرة .. مع إن تصرفها أبداً ما عيبها .. بس مهما جان ميرة رفيجتها والعلاقة ما بينهم الفترة الأخيرة كانت وايد متوترة .. وتتوقع منها أي شي .. وقالت باجر بيداومون وبتسألها .. ليش إن باجر آخر يوم إجازة ويوم الأحد راح يبدا الدوام.!!!!

كانت مضايجة وايد .. ما حست بنفسها إلا داشة النت وتكتب ..


من الصعب أن نقرر فراق من نحب .. والأصعب أن نمني النفس بأن من تركناهم لا يملكون العيش بدوننا وسيعودون سريعاً ..!

جميعُ القرارات نستسهلها عندما نفكرُ بالقرارِ الأصعب
ولا شيء أصعب من قرارِ الفراق واستنزافِ المشاعر واستهلاكِ كلماتِ الحب ..!

تتشوهُ تلك الصورة الجميلة التي رسمناها لهم .. وتندثر كل اللحظات المميزة التي عشناها معهم .. يوم يختارون الرحيل .. يوم تسيطر الأنا عليهم ..
فلا يفكرون بتلك القلوب التي خلّفوها ورائهم ..
انكسرتُ مراتٍ كثيرة .. ولكن ما يؤلم في الأمر أن الكسر في كل مرة .. يتكرر بصورة أقوى مما قبلها ..!
وأمام لحظاتِ الانكسار ..
لا أملكُ سوى أن أصمت ..
ليس لأنني لا أملكُ الرد .. ولكن لأنني أخشى أن أؤذيهم أو أجرحهم
رغم أنهم لم يأبهوا لمشاعري .. ولم يفكروا إن كانت تصرفاتهم الطائشة تخدش في روحي النقاء ...!
أبقى أنا الساذجة بينهم .. لأنني وبرغمِ جراحهم
لازلتُ أفكرُ بهم
ولازلتُ أحبهم ...!

لا أستطيع أن أحصي أولئك الذي تخلوا عني وفارقوني .. وفي كل لحظةِ تخلي يقرّونها هم .. أقفُ أنا أتساءل .. لماذا يرحلون جميعهم ..؟!!
وفي كل مرة يسري في خاطري نفس الجواب ..
ربما لأنني أخطأتُ بحقهم .. وربما خنقتهم بمشاعري فـ هربوا ..
وربما لأنني لا أستحقهم ..!

عانيتُ الجرح كثيراً .. لذا لن أرضى أن أكررهُ في غيري ..
فمن قاسى آلامهُ .. كان صعباً عليهِ أن يرمي بهِ على الآخرين ..!


عقبها بندت النت .. وسارت تشوف أخوها حمد وتسأله عن ريم .. جان توه ظاهر من داره ساير ييلس ف الصالة .. والتقوا ف الطريق وساروا إيلسوا ف الصالة ..

فوز: شخبارها ريموو؟
حمد: الحمدلله طيبة ..
فوز: دبه والله ما خلتنا نسير وياها ..
حمد: ههههههههه وين تروحين .. أنا ساير وراها وعيونها تدمع .. لو إنتي سرتي والله بتصيح صدج ..
فوز: حليلها مع إنها سارت من قبل .. بس والله صعب تروح أكيد تفكر إنها بتكون وحيدة ..
حمد: تدرين منو شفنا ف المطار ..؟؟
فوز: منو ..؟؟
حمد: احم احم .. هذيلاك العرب ..
فوز باستغراب: منو ؟؟
حمد: ناس الله يستر عليهم ..
فوز: لا تستهبل قول عاااااااااد ..
حمد: هو صح مب وياهم .. بس يعني شفنا حد من ريحتهم ..
فوز: سخييييييف قسم بالله اجلب ويهك عني
حمد: هههههههههه انزين ..
فوز: بعدين عيب عليك الريال معرس أحينه
حمد: هيه والله .. سبقني الدب
فوز: إنزين قولي عاد منو شفت ؟؟
حمد: شفت فهد
فوز: والله ..؟؟
حمد: هيه وسلمت عليه ..
فوز: شو يسوي ف المطار ..؟؟
حمد: هو بعد مسافر .. يقول يايينه عرض يشتغل هناك ووافق عليه ..
فوز: اهاااا .. ربي يوفقه ..
حمد: عاد ريم ارتاحت شوية .. صج ما تعرفه وايد بس تطمنت إن حد وياها ف الطايرة إذا احتاجت شي ..
فوز: ليش هو معها ف نفس الرحلة ..؟؟
حمد: هيه .. ووصيته عليها ..
فوز: وشو قالك ؟؟
حمد: قال أختك هي أختيه وإن شاء الله راح أكون موجود إذا احتايت أي شي
فوز: حليله فهد والله ريال وينشد الظهر فيه
حمد: هيه والله ..

دق تليفون فوز .. وكانت موزة هي اللي متصلة فيها .. استانست وايد ع اتصالها .. وردت عليها ع طول .. فوز لين أحينه ما قالت حق حد إن محمد عرّس .. وفخاطرها تقول يمكن موزة حاسة إن عندها علوم ف أكيد داقة عليها تسألها .. خصوصاً إنها تدري إنها بتروح بيت أهل محمد ف العيد .. خذت تليفونها ونشت .. وسارت خاري ترمس .. جان الجو حلو وبارد ..

فوز: علومج إنتي ..؟؟
موزة: الحمدلله بخير .. شو الأخبار ..؟؟
فوز: أخبار شو بالضبط ؟؟
موزة: ما أدري قوليلي إنتي ..
فوز: شو أقولج ..؟
موزة: علومج بعد شو ..
فوز: ما عندي علوم
موزة: اونج ..؟؟ دوم تسوين نفس حركة النذالة .. قوليلي سرتي بيتهم محمد ...؟!!
فوز: وييييييه من زمان إنتي توج تسألين ..
موزة: كنت بدق عليج اسألج من قبل بس انشغلت وايد ..
فوز: تبين الصج مع إن الخبر اللي عندي ما يتخبى .. والمفروض أنا اللي اتصل فيج أخبرج .. بس حسيت نفسي أبا أنسى اللي صار وعشان جيه ما قلت حق حد ..
موزة: ليش شو مستوي ..؟؟؟
فوز: كنت مستانسة إني بسير خبرتج .. بس هالوناسة اختفت فجأة ..
موزة: خرعتيني يالويه قوليلي شو صار ؟؟
فوز: محمد تزوج لمن كنا ف بريطانيا ..
موزة بصدمة: شو ؟؟؟؟؟
فوز: اللي سمعتيه ..
موزة: مستحيل .. أكيد ها مقلب .. دبه خلي عنج حركات النذالة وقولي الصج ..
فوز: جان زين لو مقلب .. أو حركة من حركات النذالة حقي .. بس ها هو الصدج يا مواز .. محمد عمره ما جان لي .. بس أنا اللي أوهمت نفسي بهالشي .. وكنت عارفة إن بيي يوم بكون مجبورة أنساه .. وهاليوم فعلاً يا ..
موزة: سوري والله .. ما أدري ليش كنت أحس إنكم راح تكونون حق بعض .. وإنه يحبج ويبيج ..
فوز: ههه .. ها مب إحساسج .. هاي أمنيتج وما تحققت ..
موزة: وشفتي حرمته ..؟؟
فوز: هيه شفتها .. اسمها سلامة .. حلوة ويبين عليها تحبه وهو بعد يحبها ..
موزة: يعني ماخذين بعض عن حب ؟؟
فوز: لا ما أظن .. أبوه اقترح عليه وهو وافق ع طول ..
موزة: شو ها منتزق يبا يعرس ..
فوز: عرس وخلص ..
موزة: أكيد ما يستاهلج .. عشان جيه ربج ما كتبه من نصيبج
فوز: أو يمكن أنا ما أستاهله ..
موزة: لا فديتج إنتي شيخة البنات .. يحمد ربه اللي بياخذج
فوز: تسلمين والله ..
موزة: إنزين ممممممم ميرة شحالها ؟؟!!
فوز: ما أدري والله .. حاولت أرمسها بس ما ردت عليه
موزة: قبل لا أدق عليج كانت ترمسني ..
فوز: والله .. ؟؟ غريبة هالشي معناته إنها ما تبا ترمسني
موزة: الظاهر جيه .. بس ليش؟؟
فوز: ما أعرف .. ما أذكر إني سويت لها شي ..
موزة: متأكدة ..؟!!
فوز: هيه ..
موزة: بس رمسة ميرة تقول إنج مسويتلها شي .. وشي كبير بعد
فوز: شو ..؟؟ أنا ...؟!!!
موزة: هيه .. وبصراحة أنا ما قدرت أصدق وعشان جيه دقيت لج أبا أتأكد من رمستها ..
فوز: قوليلي أنا شو سويت لها ..؟!!
موزة: ميرة مضايجة منج وايد .. وفنفس الوقت منصدمة من اللي سويتيه .. كانت تبجي وبصراحة قطعت قلبي ..
فوز: مواز لا تيلسين تطولين ف الرمسة قولي أنا شو سويت حق ميرة ..؟؟ شو هالشي اللي سويته ويخليها تصك التليفون ف ويهي وفوق ها تقول إنها ما تعرفني وإني مغلطة ف الرقم ..
موزة: هيه قالت لي إنها سوت جيه .. بس البنت معذورة ف هاك الوقت سعيد جان يرمسها
فوز: يعني عشان سعيد جان يرمسها تتبرا من رفيجتها ..؟؟
موزة: فوز .. سعيد قال حق ميرة إنه خطبج وإنتي وافقتي .. هالرمسة صج ؟؟؟
فوز بصدمة: شو ..؟!!!!!!!! خطبني ..؟؟ من منو ...؟؟
موزة: رمسج إنتي ورديتي عليه بالموافقة ..
فوز: متى صار هالحجي ..؟؟
موزة: أمس ..!
فوز: مواز شو هالكلام .. وربي ما صار شي من ها كله ..
موزة: ميرة تقول إن سعيد رمسج من تليفونها .. وأمس بعد رمستيه إنتي من رقم أخوج عسب تعطينه ردج ..

فوز كانت شوي وبتصيح .. مب قادرة تستوعب اللي صاير .. شو هالكلام .. سعيد خطبني وأنا وافقت ..؟!! ورمسته بعد .. شو هالقصة ..؟!!!

موزة: فوز قولي الصدج عادي .. إذا ف خاطرج شي صوب سعيد قولي .. مع إني ما أظن إنج تحبينه بس صدمتج من محمد خلتج تقررين هالقرار ..

رمسة موزة كانت صدمة بالنسبة لفوز .. خلاص انفجرت ويلست تبجي .. إذا رفيجتها وأقرب وحده وأغلى وحده ع قلبها تقول جيه .. شو تتريا من باجي الناس ..

فوز: ها تفكيرج فيني يا موزة ..؟!!! من متى أنا آخذ شي مب لي ..؟!!! من متى كنت سبب ف تعاسة غيري ..؟؟ من متى فكرت ف نفسي قبل لا أفكر ف غيري ..؟!!!!
موزة: أنا آسفة يا فوز .. بس
فوز: بس شو ..؟؟؟ قبل لا تقولون أي شي تأكدوا قبل .. الظلم مب زين .. وربي مب زين ..
موزة: يعني إنتي ما رمستي سعيد ..؟؟
فوز: رمسته .. ما بجذب عليج .. بس والله ما طرالي شي يخص الخطوبة أو إنه يبيني .. وربي ما صار شي من ها كله
موزة: عيل ميرة ليش تقول إن سعيد خطبج .. من وين يابت هالرمسة لو مب صايرة ..؟؟؟
فوز: يعني أنا أجذب ..؟؟ موزة أنا قاعدة أحلفلج بربي إن هالشي ما صار .. إذا إنتي مب مصدقتني .. عيل محد ياي يصدقني ..!!

ما قدرت فوز تكمل المكالمة وصكت التليفون .. كانت منقهرة وحاسة بالظلم .. وحاسة نفسها ف موقف لازم تدافع فيه عن نفسها .. رغم إن الوقت تآخر وصارت الساعة 12 ونص بس هي ما فكرت ف شي غير إنها كيف تدافع عن نفسها جدام موزة وميرة ومن عقبها ما تبا شي ..

ردت موزة تتصل ع فوز .. بس فوز ما ترد .. ع طول تضغط ع الزر الأحمر .. وسارت فوق عند ندى وطلبت منها رقم سعيد وبدون لا تفكر اتصلت .. مع إن سعيد ما يعرف رقمها .. بس هي وقتها كانت معصبة وحاسة بجرح ..

دق تليفون سعيد وما رد .. بس عقب رد يتصل مرة 2 .. ولمن شافت رقمه ردت ع طول ..

سعيد: السلام عليكم
فوز: وعليكم السلام
سعيد: نعم أختي .. منو بغيتي ؟؟
فوز: مب إنته سعيد
سعيد: هيه نعم .. تعرفيني ...؟!!!
فوز: هيه .. أنا فوز أخت ندى ..
سعيد: فوز ..؟؟ شحالج فوز ...؟!!!
فوز بعصبية: وتسأل عن حالي ...؟! بذمتك أي حال ها اللي بكون عليه وإنت بتصرفاتك الغبية خليتني أخسر أعز ربعي ..
سعيد: فهميني شو مستوي ..؟؟؟
فوز: شو مستوي ..؟!!! سعيد أقصد أخ سعيد نحن شو جان اتفاقنا ..؟؟
سعيد: إنج توافقين ع اللي أسويه .. يعني إذا حد قالج شي تقولين هيه .. وهالشي فعلاً صار ..
فوز: مب ع أساس إنه مقلب ف ميرة .. ومب ع أساس إنك تباها تعترف إنها تحبك ..
سعيد: إنزين .. شو اللي صار ...؟؟
فوز: شدخل ها كله ف سالفة الخطوبة .. ليش تقولها إنك خطبتني وإني وافقت ؟؟
سعيد: ها جان جزء من اتفاقنا ..
فوز: أنا وافقت عشان خاطر ميرة بس .. وما وافقت ع هالشي .. إنت ما قلت لي إن المقلب جيه بيكون وإنك عشان تخليها تعترف بتجذب عليها هالجذبة .. إنت جيه خربت صداقتنا .. خربت كل شي حلو بينا .. وصرت ف نظرها وحده نذله .. سرقت حبيبها .. ليش جيه ..؟؟
سعيد: هدي يا فوز .. وخليني أفهم السالفة
فوز: شو تفهم يا سعيد..؟؟ شو تفهم .. أستغفر الله العظيم ..
سعيد: فوز .. إنتي شرات أختيه وأنا أعزج وأغليج .. وربي شاهد ع جيه .. وعمري ما فكرت أخرب علاقتج بميرة .. ما بجذب عليج أنا فعلاً كنت أفكر فيج من أول ما شفتج وكنت معجب فيج وزاد هالإعجاب بعد رمسة ميرة عنج ومدحها فيج .. بس لما شفت فوز الثانية اللي هي أخت ندوش تغير كل شي .. حسيت إني أعرفج من زمان وإني راح أكون مستانس لو كنتي إنتي ف حياتي والمواقف اللي صارت بينا جان لها دور فهالشي .. ما كنت متأكد إن فوز رفيجة ميرة هي نفسها فوز أخت ندى .. بس إحساسي جان يقولي إن فعلاً الثنتين شخص واحد .. وقررت أرمس ميرة عنج وف اليوم اللي سرت بيتهم عسب أخبرها عن شعوري صوبج .. وإني أبيج .. سمعتها بالغلط ترمسج ف التليفون وتقولج إنها تحبني .. وعقبها تأكدت فعلاً إنكم نفس الشخص .. يلست أفكر ف كل المواقف اللي جمعتني بميرة وف كل موقف هي كانت تحاول تبين لي هالحب بس أنا عمري ما فكرت فميرة إلا كأخت وبس .. ما قدرت آخذ قرار .. ميرة بنت خالتيه الله يرحمها .. وباجر محد بيكون لها خصوصا لو علي عرس .. وفنفس الوقت أنا مش قادر أحس بحب صوبها .. بس أحاول أعود نفسي على إنها تكون حرمتيه ..
فوز وهي منصدمة من رمسة سعيد .. ما جان عندها شي تقوله .. بس آخر رمسة قالها عن ميرة استفزتها إنها ترمس ..

فوز: بس إنت جيه بتظلمها .. ميرة أفضل لها تفقدك وإنت موجود ف حياتها ولا تكون ف حياتها وفاقدتك .. ميرة تحبك يا سعيد والله إنها تحبك .. وحرام تفرط فهالحب لأنك ما بتحصل حد يحبك شراتها .. تحبك وعشان جيه رفضت راشد وقالت لك إن في حد بحياتها .. هي ما كانت تجذب لأن هالشخص هو إنت
سعيد: يمكن ما أحصل حد يحبني شراتها صح .. بس أنا بعد أتمنى أحب وأحس بالشخص اللي راح يشاركني حياتيه ..
فوز: سعيد صدقني إنت لو عطيت نفسك فرصة تفكر فيها راح تحبها .. لأن ميرة تدش القلب ع طول .. ودامها تحبك راح تخليك ف عيونها وتغمض عليك ..
سعيد: وعشان جيه أنا سويت كل ها .. أبيها تعترف بهالحب وتقولي .. مب تسكت ولا جأن هامنها شي ..
فوز: إنت باللي سويته ما خليتها تعترف وتصارحك بحبها .. إنت ذليتها وكسرتها .. لأنك دشيت عليها من أقرب الناس لها اللي هو أنا .. شوهت صورتي جدامها .. وما أظن إنها بتسامحك أو حتى بتسامحني ..
سعيد: أنا آسف يا فوز لأني خليتج فهالموقف .. وصدقيني كل شي راح يتصلح
فوز: أتمنى هالشي يا سعيد .. أنا خسرت وايد ناس ومب مستعدة أخسر ميرة بعد ..
سعيد: ما راح تخسرينها .. أوعدج
فوز: سعيد ..
سعيد: هلا
فوز: لي طلب أخير لو سمحت
سعيد: آمري ..
فوز: إذا بتصارح ميرة بكل شي .. لا تقولها إنك تحبها إلا عقب ما تطالعها كحبيبة .. مب كزوجة بس لأن زواج بدون حب خصوصاً م الريال راح يأثر ع العلاقة ويدمرها ..
سعيد: إن شاء الله يا فوز .. أشكرج ع كلامج والله ووقفتج ويايه .. وأعتذر مرة ثانية ع الأذى اللي سببته لج
فوز: حصل خير يا سعيد .. اهم شي تقول حق ميرة كل اللي صار .. ما فيني بعد تتحسب إني بسرق حبيبها .. والله العلاقة بينا الفترة الأخيرة كانت متوترة لهالسبب وميرة ما كانت ترمسني .. وما ألومها بصراحة دامها تحسب إن أعز رفيجاتها بتاخذ حبيبها منها
سعيد: إنتي درة يا فوز .. يا بخت اللي بياخذج والله
فوز: تسلم يا خوي .. وما عليك مافي إنسان كامل وأكيد كل واحد له عيبه ..
سعيد: صح .. بس نادراً ما تطغى مزايا الشخص ع عيوبه .. وإنتي من هالناس ..
فوز: شكراً .. وأعتذر ع إزعاجك بس صج كنت معصبة وايد م اللي صار
سعيد: ههههههههه حصل خير ..
فوز: بخليك أحينه الوقت تأخر .. تصبح ع خير
سعيد: وإنتي من هله
فوز: فمان الله
سعيد: ربي يحفظج


بندت فوز عن سعيد .. وعقبها حست براحة يمكن لأنها قدرت تفسر تصرفات ميرة الفترة اللي طافت .. بس اللي جان حاز ف خاطرها موقف موزة .. وتصديقها لرمسة ميرة .. صحيح هي ما تلومها بس فنفس الوقت كانت تبا حد يوقف وياها ويدافع عنها مب يتهمها ..!!


بيت عبدالله
يوم السبت
الساعة 5:18 عصراً


كانت ميرة فدارها تتزهب .. بتسير الجامعة لأن باجر راح يبدا الدوام من عقب إجازة العيد .. حاسة بضيج لأنها بتسير ما تبا تشوف فوز ولا ترمسها .. وقررت تطلب نقل من الغرفة بتسير أي مكان ثاني بعيد عن فوز .. ما تتخيل إنها تكون وياها ف نفس الغرفة وتسمعها ترمس ويا سعيد .. هالشي بيذبحها .. دق باب غرفتها .. وجان علي هو اللي ياي ودش ع طول ..

علي: هلاوي ..
ميرة: مرحبا علاوي ..
علي: شو خلصتي ..؟؟
ميرة: تقريباً ..
علي: عيل ايلسي برمسج ..
ميرة: شو مستوي ..؟!!
علي: أنا اللي أبيج تقولين لي شو مستوي ..؟؟
ميرة: ما صاير شي ..
علي: لا والله .. عيل شفيج من فترة وإنتي مش طبيعية ..
ميرة: يمكن بسبب ضغط الدراسة
علي: أوووونه .. أنا أخوج وأدري فيج عدل .. قوليلي شفيج ..
ميرة: مضايجة شوي ..
علي: من شو ؟؟ ومنو اللي ضايجج قوليلي وأنا أراويج فيه
ميرة: جان زين تقدر تراويني فيه
علي: ليش منو ها ؟!!
ميرة: صايرة مشكلة بيني وبين فوز ..
علي باستغراب: فوز ..؟؟ شو صاير ..؟؟
ميرة: مشكلة صغيرة وإن شاء الله بتنحل ..
علي: يعني هالمشكلة سبب ضيجج ؟؟
ميرة: هيه
علي: بس فوز شكلها ما يقول إنها راعية مشاكل ..

ميرة ف خاطرها تقول .. كلهم انخدعوا ف برائتها وطيبتها .. بس خلاص أحينه كل شي انكشف ..
ميرة: قلت لك مشكلة صغيرة
علي: ميراني فديتج .. إذا الدراسة هناك مضايجتنج ترا إنتي مش محتايتلها وخليها ..
ميرة: شو أخليها .. أضيع مستقبلي على شي تافه .. لا طبعاً
علي: عيل لا تخلي هالمشاكل الصغيرة تأثر فيج
ميرة: إن شاء الله .. شو متى بنظهر ..؟!!
علي: مممممممم فديتج أنا بزي والله ما بقدر أوديج
ميرة: عيل منو بيوديني ..؟؟ عبدالله قالي إنه بيسير بوظبي وأظنه تغدا وسار .. وأنا قلت له إنك إنت بتوديني
علي: والله أدري بس شو أسوي ظهر لي شغل .. ما أقدر أخليه فقلت حق سعيد يوديج ..
ميرة: شو ..؟؟!!!!
علي: شفيج سعيد ولد خالتيه بيوديج .. هو اقترح هالشي
ميرة: ما أبا ..
علي: ليش ..؟؟
ميرة: بس جيه سعيد غلس .. ما أبا أسير وياه مكان
علي: إنزين بيوصلج بيتهم فوز وعقب سيري وياها
ميرة: علاوي أقولك صايرة مشكلة بينا .. كيف أسير وياها
علي: خلاص عيل محد غير سعيد
ميرة: مش لازم أداوم ..
علي: تمزحين .. لا فديتج بتداومين .. وسعيد بيوديج ونزلي أغراضج لأنه دق عليه وقالي إنه جريب يوصل وخل ميرة تنزل تحت ..
ميرة باستسلام : إن شاء الله ..

وصل سعيد .. ونزلت ميرة أغراضها وخلت البشكارة تحطهم لها في السيارة .. وعقبها سلمت ع علي وسارت تركب .. جان سعيد يالس ف السيارة .. وأول ما دشت سلمت ويلست .. ما كانت تبا تتعرض لهالموقف .. أو إنها تشوف سعيد لانها بالمرة تحس نفسها تبا تصيح خصوصاً عقب ما تتذكر رمسته آخر مرة ..

سعيد: شحالج ..؟؟
ميرة: الحمدلله ..
سعيد: بلاج زايغة ..؟!!
ميرة تطالعه بنص عين : مش زايغة ..
سعيد: طيب

تحركت السيارة وساروا ف طريقهم صوب الجامعة .. وطول الطريق سعيد جان متردد هل يفتح الموضوع ويا ميرة أو لا .. هو وعد فوز ولازم يحل الأمر قبل لا توصل ميرة السكن ولهالسبب طلب من علي إن هو يوصلها .. وغير جيه وايد فكر ف رمسة فوز .. ومن كلام فوز هي ما تحمل له سوا مشاعر أخوة .. وميرة تحبه وايد .. طالعها وحس بإحساس أول مرة يحس فيه .. نظرته لها ما كانت نظرة لميرة الياهل اللي دوم يناقرها .. دقق ف ملامحها .. أول مرة يعرف إن ميرة حلوة وايد .. وناعمة .. تنهد تنهيدة غريبة .. لفتت انتباه ميرة اللي طالعته وردت تطالع الصوب الثاني .. شغل سعيد الإذاعة .. الإذاعة تنتقل من أغنية لأغنية وميرة كانت تسمع وساكتة أما سعيد فجان مبين عليه إنه يفكر بعمق .. ظهرت أغنية راشد الماجد أغلى الغاليات.. انتبه سعيد وطوّل عليها وعطى ميرة نظرة غريبة خلتها تذوب ولو كانت ما تدري عن حبه لفوز كانت قالت إن من هالنظرة سعيد يقولها إن الاغنية إهداء حقها .. ها هو تفكير سعيد بس ميرة اللي صار وياها ما خلاها تفكر بهالطريقة ..

إنتي أغلى شي عندي وإنتي في عمري أمل
وإنتي قلبي وإنتي روحي وإنتي كل الأمنيات
إنتي الحاجة الوحيدة اللي منها ما أمل
باختصار إنتي بصفاتج جامعة كل الصفات
يوم أشوفج أشعر إن الهم من قلبي رحل
وأقعد أتأمل حلاتج يحفظ الله هالحلاة
يا حلو منج السوالف يا حلو منج الغزل
أشعر إني بين يدينج بين موتي والحياة
والله يوم إنج معايا أنسى شي اسمه ملل
في وجودج صارت الساعة مجرد ثانيات
ما أحتمل بعدج عن عيوني أبد ما أحتمل
ما أقوى بعدج لو دقيقة يا بعد كل البنات
حبي لج يا أغلى ناسي والله إنه م الأزل
شقي صدري شوفي قلبي ناقش اسمج وبثبات
حافره بعروق قلبي وثابتٍ مثل الجبل
من جديم الوقت والله وإني أغلى الغاليات


أول ما خلصت الأغنية بند سعيد الإذاعة .. مر تقريباً ساعتين والهدوء هو سيد الموقف حتى ميرة استغربت سكوت سعيد .. سعيد مستحيل يسكت أقل عن 5 دقايق .. خصوصاً لو ميرة وياه لأنه دوم يحب يناقرها ويقهرها .. بس شو اللي يخليه ساكت هالوقت كله .. أكيد في شي شاغل باله .. فجأة وقّف سعيد السيارة وميرة طالعته بنظرة استغراب ..

ميرة: ليش وقفت ..؟!!

بدون لا يرد عليها .. كمل طريقه ووقف عند سلسلة مطاعم موجودة ع البحر .. كانت الساعة وقتها 7 المغرب تقريباً .. وميرة مستغربة تصرفات سعيد .. حاسة إن سعيد فيه شي .. والأفكار توديها وتييبها .. وأول شي فكرت فيه إن فوز ردت عليه وقالت له ما تباه .. وإنهم تركوا بعض .. حالة سعيد الغير طبيعية ما خلتها تكون أنانية وفخاطرها عتبانة ع فوز إذا فعلاً كانت مسوية جيه ..

سعيد: نزلي ..
ميرة: وين أنزل ..؟!!
سعيد: نزلي برمسج وبنتعشى ..
ميرة: بس أنا مش يوعانة ..
سعيد: أدري .. بناكل شي خفيف ..
ميرة: إذا تبا تآكل سير أنا بترياك هنيه
سعيد: لازم تنزلين .. أبا أرمسج شو ما تفهمين ؟؟؟
ميرة بخوف: إن شاء الله

نزلت ميرة .. واختاروا لهم طاولة جريب البحر ويلسوا .. كانت وايد خايفة بس ليش ما تعرف .. تحس إن رمسة سعيد راح تصدمها بأي شكل م الأشكال .. رغم إن الصدمات اللي خذتها الفترة الأخيرة عطتها مناعة بس بعدها خايفة ..

سعيد: شو تبين ؟؟
ميرة: ما أبا شي .. سعيد خلصنا جدامنا ساعتين لين نوصل وإنت عقب بترد وبيكون الوقت متأخر
سعيد: لا تحاتيني ..
ميرة: ما احاتيك .. أحاتي نفسي أخاف أوصل متأخر السكن ويكتبوني تأخير
سعيد: ما بيكتبونج تأخير .. بتوصلين ف وقتج .. شو تبين ؟؟
ميرة: عصير ليمون ..
سعيد: ما تبين تاكلين شي ؟؟
ميرة: لا .. مش يوعانة قلت لك ..
سعيد: أوكي ..

سار سعيد وطلب عصير ليمون حق ميرة وطلب له سلطة فواكه ورد ييلس ع الطاولة .. كانت ميرة تحس نفسها ف حلم .. يمكن تمنت هاللحظة وايد .. بس تمنتها وسعيد وياها بقلبه وعواطفه وسعيد يحبها .. مب وياها وقلبه عند وحده ثانية .. أو وياها وهو خاطب غيرها .. سعيد جان يطالعها بنظرات غريبة وهي نزلت راسها عشان تتحاشى هالنظرات ..

سعيد: لين متى بتمين جيه ..؟!!!

رفعت ميرة راسها باستغراب .. ما فهمت سؤاله .. شو يقصد وليش يقولها جيه ..

ميرة: شو يعني ..؟!!
سعيد: ما تعبتي من التمثيل ..؟!!!
ميرة: تمثيل ..؟!!
سعيد: هيه .. ترا خلاص المسرحية خلصت ووصلنا للنهاية
ميرة: عن شو ترمس ..؟؟
سعيد: ليش تكابرين .. وتسوين نفسج مش مهتمة لأني خطبت فوز .. وإنتي فداخلج تنزفين ..؟!!
ميرة: أنا .. وليش أهتم هاي حياتك وإنت حر فيها .. وفوز تستاهل كل خير
سعيد: لا والله .. من قلبج هالرمسة ..؟!!
ميرة: هيه
سعيد: عيل ليش ما ترمسين فوز .. وليش هاك اليوم صكيتي التليفون ف ويهها .. وقلتيلها الرقم غلط ..؟!!!
ميرة: أنا ..؟ متى ما أذكر
سعيد: ميرة الإنسان لمن يحب .. يتمسك بحبيبه لين يتأكد إنه مش له .. بس إنتي بالمرة استسلمتي .. وتخليتي عن حبج
ميرة: أي حب ..؟!!
سعيد: تعرفيني صريح وما أحب اللف والدوران فلا تعورين راسي بهالأسئلة ..
ميرة: سعيد إنت عن شو ترمس ..؟!!!
سعيد: أرمس عنج وعن حبج لي
ميرة: شهالرمسة .. أي حب وأي خرابيط منو قالك إني أحبك ؟؟
سعيد: إنتي ..
ميرة: أنا ..؟ سعيد إنت خاطب ومش حلوة منك تفكر جيه .. وأنا عمري ما فكرت فيك إلا كأخو وبس
سعيد: هههههههههه أقولج وصلنا للنهاية وإنتي بعدج ف الفصل الأول ..؟؟
ميرة: شو يعني ..؟!!
سعيد: أنا أدري إنج تحبيني .. بس للأسف عرفت هالشي متأخر .. يمكن لو فكرت من قبل ف كلامج اللي كنتي تفريه عليه .. كنت عرفت بهالحب .. بس أنا ما عطيت نفسي مجال إني أفكر ..

حست ميرة إنها خلاص انكشفت .. كانت حاسة إن طلب سعيد إنه ييبها جان وراه شي .. بس ليش فتح وياها هالموضوع .. هو خلاص خطب فوز وكل شي انتهى .. ما حست نفسها إلا وهي تبجي .. ما كانت تشهق بس الدموع كانت تنزل بكل هدوء من عيونها ..

سعيد: سمعتج بالغلط تقولين حق فوز عن هالحب .. وتشتكين من برودي وياج وعدم مبالاتي .. بس أنا لو كنت أعرف بمشاعرج كنت فكرت فيج ع الأقل ..
ميرة: مستحيل أقول حق أي شخص إني أحبه ..
سعيد: ليش ؟؟
ميرة: كرامتي ما تسمح ..
سعيد: الكرامة مالها وجود إذا جان فيه حب ..
ميرة: خفت أنجرح .. وأنا ما اتحمل هالشي .. بس إنت جرحتني أعظم جرح .. لمن خطبت فوز .. ورغم كل ها أنا ما قلت شي .. اللي حز ف خاطريه إن فوز وافقت عليك وهي تدري إني أحبك
سعيد: يعني عادي عندج تخسرين الشخص اللي تحبينه بس لأنج تخافين تنجرحين ؟؟
ميرة: عادي عندي ..
سعيد: عيل ليش تقولين إني جرحتج ؟؟
ميرة: لأني لمن خسرتك .. ما خسرتك بروحك .. خسرت إنسانة غالية ع قلبي وايد .. وما كنت أبا أفرط فيها ..
سعيد: فوز تحبج يا ميرة .. وهي بعد ما تبا تخسرج
ميرة: بس خسرتني .. سعيد إنت كنت حياتي كلها .. كنت أشوفك لي أنا وبس ملك لي .. ما أبا أي حد ياخذه مني .. كيف لو جان اللي خذاك أعز ناسي ..؟؟
سعيد: ميرة فوز مالها ذنب .. أنا حبيتها وقلت لها إني أبيها
ميرة: ووافقت .. رغم إنها تدري باللي ف خاطريه صوبك .. كيف باجر لو عرستوا بتطالع ف عيني ؟؟ أو أنا كيف بتعامل وياها وأنا أحس إنها سرقت قطعة من قلبي ..

ابتسم سعيد ع تعبير ميرة .. قطعة من قلبي .. ميرة كانت ترمس بعفوية .. يمكن م القهر اللي فيها ..

سعيد: يعني أنا مش قلبج ؟؟ بس قطعة منه ...؟!!!
ميرة: سعيد أنا من صغري وأنا أشوفك حلمي اللي أتمنى أحققه .. ما كنت بالنسبة لي ولد خالة وبس .. كنت كل شي ف حياتيه ..
سعيد: بس ليش ما رمستيني ..؟؟
ميرة: حاولت بس ما قدرت .. كل اللي قدرت عليه إني ألمح لك .. وإنت ما فهمت .. أو ما كلفت ع نفسك تفكر بكلامي .. كنت وايد تجرحني بس أنا أمشيها وأقول حبيبي وكل شي منه يهون .. إلا الجرح اللي خليته ف قلبي لمن رفضت راشد .. ومع ذلك تناسيته وبدل لا أكرهك كنت أحبك أكثر .. فوز عاشت ويايه وتعرف تفاصيل هالحب .. تعرف احساسي صوبك .. تعرف الجرح اللي عشته وياك والألم اللي عانيته ..
سعيد: ميرة مسحي دموعج ..

عطاها كلينكس تمسح دموعها .. ميرة ساعتها كانت حاسة بالضعف .. ورمسة سعيد وياها ردت لها الحياة من يديد .. تحس إن في شي راح يتغير ..

سعيد: تدرين .. شكلج يصير مش حلو لمن تبجين .. ما أبا أشوف هالدموع مرة ثانية ..
ميرة ما علقت .. بس مستغربة حنان سعيد وتصرفاته وياها .. معقولة ها كله يكون شفقة بس ..؟!! وإلا شو يخليه يسوي كل هاا وهو خطب فوز ويحبها ..؟!!! ليش يعاملني بهالطريقة .. وشو سر هالنظرات ..

ميرة: سعيد .. صدقني بفرح لك حتى لو قلبي يتقطع .. ما بكون أنانية وبفكر بنفسي .. أنا اخترتك إنت وإنت من حقك تختار اللي تحس إنها فعلاً راح تسعدك .. واختيارك جان فوز .. إنسى كل اللي قلته وعيش حياتك .. هي أيام بتمر وعقبها بنسى كل شي .. فوز تستاهل كل خير .. وأنا راح أبارك لها أول ما أشوفها ..
سعيد: أنا ما اخترت فوز .. أنا اخترتج إنتي ..

أول ما سمعت ميرة رمسة سعيد .. حست إن قلبها بيطيح .. ما كانت تبا تصدق لأنها تخاف تكون ف حلم ..

سعيد: ميرة .. أنا أبيج إنتي ..
ميرة: وفوز ..؟!! لا أنا مش أنانية لهالدرجة حتى لو كنت أحبك .. بس ما راح أكون مثل فوز وأفكر بنفسي .. حرام تخليها عقب ما خطبتها ورمست أخوها ..
سعيد: ميرة .. فوز مش أنانية فوز تحبج .. وما تبا تخسر صداقتج .. أنا ما خطبتها .. ولا رمست أخوها .. وهي ما وافقت عليه ..
ميرة بصدمة: شو .......؟!!!!!!!! عيل ليش قلت لي إنك رمست أخوها .. ورمستها ف التليفون وقالت لك إنها موافقة ...؟!!!!!
سعيد: ها كانت خطة أنا سويتها لأني كنت أبيج تعترفين بحبج .. وتقولين لي .. ما بجذب عليج كنت أستانس وأنا أشوف الغيرة مبينة ف عيونج .. فوز ما تدري عن شي أنا اللي خططت
ميرة: يعني إنت ما رمستها ..؟!!
سعيد: رمستها ف التليفون .. وقلت لها إني عرفت بحبج لي .. وأبيها تساعدني ..
ميرة: تساعدك بشو ؟؟
سعيد: إن إذا وصلها خبر .. تأكده وتقول إنه صار .. حتى لو ما صار .. لأني خفت إنج تدقين عليها تسأليها .. وهي وافقت لأنها حست إن هالشي راح يسعدج ..
ميرة: يسعدني ..؟!!
سعيد: هيه .. هي ما كانت تدري أنا شو بقولج .. وتحسبت إن الخطة راح تخليج تعترفين بمشاعرج لي وعقبها أرمسج أنا .. وتفاجأت لمن درت إني خبرتج عن سالفة الخطوبة وموافقتها ورمستني وكانت مضايجة وايد بسبب تعاملج وياها الفترة اللي طافت .. ومعصبة ف نفس الوقت لأنها ما تصورت إني بقولج عن موافقتها ع الخطوبة ..
ميرة: تسوي كل ها .. تحرق لي قلبي .. وتخليني أكره البنت اللي اعتبرتها أخت وصديقة .. بس لأنك تباني أعترف لك بمشاعري صوبك ..؟؟ وليش أعترف بشي إنت تعرفه ...؟!!! إنت شو ..؟!!! ما عندك إحساس ...؟!!! لهالدرجة مشاعر الناس لعبة ف إيدك ..؟؟

كانت نوبة بكاء يديدة ف طريقها .. ما قدرت تتحمل رمسة سعيد .. نشت من ع الكرسي وسارت صوب البحر تمشي وهي تبجي .. حاسة بالقهر حاسة إنها صارت لعبة ف إيد سعيد .. حاسة بالذل والمهانة .. حاسة بالندم لأنها فكرت بفوز تفكير مب زين .. وايد أحاسيس كانت تمر عليها .. بس أحاسيس قاسية ..!!!

نش سعيد وراها ..

سعيد: أنا آسف يا ميرة .. وربي ما كنت أبي هالشي يصير
ميرة: ما كنت تبيه ..؟!! كل شي كنت تسويه بس عسب تقهرني وتذلني .. وتقول ما كنت تبيه يصير ..
سعيد: ميرة .. أنا ما لعبت بمشاعر حد .. قلت لج كل شي .. وقلت حق فوز بعد .. واعتذرت منها ع اللي صار .. وعشانج إنتي بس هي تقبلت الوضع لأنها تبي سعادتج .. بس إنتي ما عندج ثقة ف أقرب الناس لج .. شلون فكرتي إن رفيجتج وأعز رفيجة عندج راح توافق ع هالشي وهي تدري بحبج ..؟!! ميرة نحن ما نحس بقيمة الناس اللي نحبهم إلا لمن نفقدهم .. وإحساس مش حلو إنج تفقدين ناس كانوا مالين عليج حياتج وكنتي تشوفيهم كل شي بالنسبة لج .. ف لا تخربين علاقتج بفوز .. لأنج ما بتحصلين رفيجة مثلها .. والله إنها بنت أصول .. وتعرف السنع .. وما بجذب عليج أنا كنت معجب فيها وف شخصيتها .. بس فوز ما انخلقت عسب تكون لي .. أنا ما بضغط عليج إنتي فكري ف كل شي وعقبها ردي عليه .. وتأكدي إني لمن ييتج أحينه ورمستج وقلت لج إني أبيج .. قلتها وأنا متأكد إني أبيج .. مش لأني عرفت إن فوز ما تبادلني مشاعري .. ولا تزعلين مني .. تعرفين حركاتي والمفروض تكونين تعودتي عليها بعد ..

سارت ميرة صوب السيارة بدون لا تقول شي .. وسعيد لحقها وكمل طريقه صوب الجامعة .. طول الطريج كانت ميرة تبجي وتفكر كيف راح تقابل فوز .. أصلا ما فيها ويه ترمسها أو تقولها أي شي .. أما سعيد ف جان يفكر هل تسرع ف قراره أو لا .. وهل هو متأكد من حبه لميرة أو هالإحساس شي ثاني غير الحب ...؟!!!!!!


نهاية الجزء
ترقبوا الجزء الـ 22

 

[أم حور]

(( طولت بالي وخذها اليوم لك شكراً ما ينزل الراس دام الروح بي حيه ))


الجزء الثاني والعشرون


السكن الجامعي
يوم الإثنين
الساعة 7:00 مساءاً


مرن ثلاثة أيام .. ميرة ما شافت فوز فيهن .. كانت قبل لا تدش السكن تفكر كيف راح تقابل فوز وكيف بترمسها وبتعتذر منها ع اللي سوته .. أول ما دشت الغرفة تفاجأت إن الغرفة مثل ما مخلينها آخر يوم .. ما تغير شي فيها .. هالشي يعني إن فوز ما ياية .. كانت تنتظرها .. بس طال انتظارها ورقدت وتوقعت أول ما تنش الصبح تحصلها .. بس سريرها ما تغير .. مر يوم الأحد ومر الإثنين وفوز مالها حس .. قررت ميرة تتصل فيها بس جهازها مغلق .. وهالشي خلاها تخاف .. تفكيرها راح بعييييد .. إن فوز زعلانة عليها وطلبت نقل م الغرفة وغيرت رقم تليفونها .. ما شافت نفسها إلا تتزهب وسارت صوب موزة ..
أول ما وصلت سكنهم موزة .. دقت عليها عسب تسألها عن رقم الغرفة لأنها ما تتذكرها .. ونزلت موزة تستقبلها وسارن مع بعض الغرفة ..

موزة: شحالج فديتج ؟؟
ميرة: الحمدلله بخير .. شحالج إنتي ؟؟
موزة: والله .. ماشي الحال .. ممممممم استغربت زيارتج بالعادة ما تيين إلا ويا فوز ..
ميرة: بصراحة أنا ياية عسب فوز ..
موزة: ليش صار شي يديد ؟؟
ميرة: إنتي رمستيها ؟؟
موزة: هيه .. وشو أقولج الظاهر زعلت من رمستي .. وصكت التليفون ف ويهي ورديت أتصل فيها عقب بس ما ترد .. وحاولت أمس أتصل جهازها مغلق ..
ميرة: أنا آسفة يا موزة .. مش قصدي أخرب بينج وبين فوز ..
موزة: فديتج ما صار شي .. وفوز أنا برمسها وبعتذر منها .. وأكيد بتسامحني ..
ميرة: إنزين ترا فوز ما داومت .. أنا بصراحة أحاتيها ..
موزة: شو؟؟ ما داومت ...!!
ميرة: لا .. أو يمكن تكون مداومة بس ما تبا تشوفني وانتقلت من الغرفة ..
موزة: مستحيل فوز ما تسويها .. بس شو يخليها ما تداوم ؟؟
ميرة: ما أدري ..
موزة: أخبرج .. انتظريني 5 دقايق بتزهب وبنسير السكن نسأل المشرفة عنها ..
ميرة: أوكي ..

تزهبت موزة .. وسارن هي وميرة صوب سكنهم .. ودقوا الباب ع المشرفة عسب يسألوها عنها .. قالت إنها ما تعرف وحاولت تدق عليها وجهازها مبند .. هالشي خلا ميرة وموزة يخافن وايد .. وطلبن م المشرفة تدق ع أبوها وتسأله عن السبب اللي يخليها ما تداوم ..
وفعلاً المشرفة سارت تدور ملف فوز عسب تاخذ رقم أبوها أو أمها وتدق عليهم تسألهم .. اتصلت ف أبو حمد ورد عليها وقالها عن فوز وليش ما داومت .. تفهمت المشرفة الوضع وقالت حق موزة وميرة .. اللي انصدمن م الرمسة اللي سمعنها ...!!!!!

عقب سارن الغرفة .. كانت ميرة حاسة بتأنيب ضمير فضيع .. وموزة بعد ضميرها جان يأنبها .. والمشكلة مب عارفات كيف يطمنن عليها .. موزة عندها رقم ريم أختها .. بس ريم ف بريطانيا .. وأكيد ما تعرف شي ..!!

ع الساعة 9 .. روحت موزة السكن .. وهي تحاول تدق ع فوز يمكن تفتح جهازها وترمسها .. أما ميرة ف من سارت موزة عنها سارت تصلي وعقبها يلست تفكر بكل اللي صار .. دقت حق علي وخبرته اللي صاير وطلبت منه يتصل ف أخوها حمد ويسأل عنها وعقب يرد يطمنها .. وبعدها دقت حق سعيد ..

ميرة: السلام عليكم
سعيد: وعليكم السلام والرحمة .. هلا والله بهالصوت .. شحالج ؟؟
ميرة: الحمدلله ..
سعيد: شفيج ميرة ..؟؟ بلاه صوتج جيه ؟؟
ميرة: ماشي ..
سعيد: شو مستوي ..؟!!
ميرة: سعيد .. لو صار ف فوز شي .. مستحيل أسامحك أو أسامح نفسي ..
سعيد: ليش شو صاير ؟؟ شفيها فوز ؟؟
ميرة: فوز من يومين ف المستشفى .. عندها إلتهاب رئوي وضيق تنفس ..
سعيد: شو ؟؟؟ منو قالج ؟؟؟
ميرة: هالأسبوع ما داومت .. وقبل شوية خلينا المشرفة ترمس أبوها .. لأن هي جهازها مغلق ..
سعيد: أستغفر الله العظيم .. متى صار هالشي ؟؟
ميرة: ما أدري .. الله يسامحك يا سعيد ع اللي سويته ..
سعيد: بس أنا ما سويت شي .. وكنت مرمسنها آخر يوم وكل شي جان طبيعي وما كانت زعلانة ولا مضايجة ..
ميرة: أبوها قال إن هي من قبل عندها ضيج تنفس ولمن تتضايج ما تقدر لازم تروح المستشفى عسب يضربونها إبر .. والإلتهاب اللي عندها زاد م المشكلة .. وحالتها مش مستقرة ..
سعيد: لا حول ولا قوة إلا بالله .. ربي يشفيها ..
ميرة: سعيد
سعيد: هلا ميرة
ميرة: بزوال هالحب .. إذا جان راح يخليني أخسر أعز رفيجة عندي ..

قالت هالعبارة .. وصكت التليفون ف ويه سعيد .. اللي صدمته بالخبر ما خلته يستوعب أي شي .. معقولة يكون السبب ف مرض فوز ..؟!!!! هو مستبعد هالشي لأن لمن فوز رمسته كل شي جان طبيعي .. صحيح ف البداية كانت معصبة ومضايجة بس لمن شرح لها الموضوع تفهمت ..!!

دق تليفون ميرة .. جان علي متصل فيها يخبرها عن فوز .. وع طول ردت عليه

ميرة: هلا علاوي .. بشّر ..؟
علي: أهلين .. رمست أخوها حمد ..
ميرة: وشو قالك ؟؟
علي: قال إن صحتها الحمدلله أحسن من قبل .. بس لين أحينه ف العناية عسب يتأكدون إنها طلعت من مرحلة الخطر ..
ميرة: وما قالك شو السبب .. يعني فجأة مرضت وإلا شو ؟؟
علي: يقول إنها كانت بخير والمفروض تداوم السبت ومزهبة كل أغراضها .. بس العصر طاحت عليهم ..
ميرة: ياربي .. الله يشفيها إن شاء الله
علي: غريبة .. خايفة عليها أحينه .. وإنتي زعلانة منها .. وما تبين ترمسينها ...؟؟
ميرة: كنت زعلانة بس أحينه لا .. وأنا كنت فاهمة الموضوع غلط .. ولمن وضحت الصورة خلاص ما حاطة ف خاطريه عليها ..
علي: قلت لج يا ميرة .. فوز بنت والنعم فيها ..
ميرة: هيه والله .. الله يسامح اللي جان بيخرب بينا ..
علي: المهم بخليج أحينه عندي موعد ..
ميرة: موعد ..؟؟؟ مع منو ؟؟؟
علي: مع ناس عيونهم ف راسهم ..
ميرة: علاااووي .. مع منو الموعد ...؟!!!
علي: ناس قلت لج .. شو يخصج إنتي .. ياللا بخليج ديري بالج ع روحج
ميرة: لو إني متأكدة مليون ف المائة إنك ساير تشوف بنت .. بس ما عليه عقب بنتحاسب ..
علي: ههههههه ياللا مع السلامة
ميرة: مع السلامة

عقب ما تطمنت ميرة ع فوز .. طمنت موزة لأنها ما تعرف شي بعد .. وقررت يوم الأربعاء تخلي علي يوديها تشوفها ...!!!!!


المستشفــى
يوم الأربعاء
الساعة 5:00 عصراً


أبو حمد ف المكتب عنده اجتماع اليوم وما يا .. وقبل شوية حمد سار يودي أمه البيت عسب ترتاح شوية .. لانها من دشت فوز المستشفى وهي وياها وما رجعت البيت .. وندى ف البيت ويا البشكارة .. وقالت بتروح تتطمن عليها ..

كانت فوز راقدة .. عقب ما نقلوها لغرفة خاصة .. ظهرت من مرحلة الخطر .. بس وضعها مب مستقر لين أحين .. خصوصاً إن هي ما تساعد نفسها عسب تنسى شو اللي صار .. وكل ما تذكرت زادت حالتها سوء .. كانت تتذكر الموقف اللي مرت فيه .. وخلا كل هالشي يصير .. أو يمكن كانت تحلم باللي صار ..

جان يوم السبت .. الساعة 3 ونص الظهر تقريباً .. فوز بدارها .. ترتب أغراضها اللي ناقصة لأنها العصر بتسير الجامعة .. دق تليفونها .. جان رقم غريب ف ما اهتمت وخلته يدق .. وعقبها سكت ورد يدق مرة 2 .. قالت بتشوف منو يمكن تكون وحده من رفيجاتها .. وفعلاً ردت ..

المتصل : السلام عليكم
فوز فخاطرها ها صوت ريال ..؟؟ منو ؟!!
فوز: وعليكم السلام والرحمة
المتصل: شحالج ؟؟
فوز: الحمدلله بخير .. منو بغيت ؟؟
المتصل: بغيتج
فوز: نعم ..؟!! أخوي الظاهر إنك غلطان
المتصل: لا مش غلطان أنا داق لج إنتي

صكت فوز التليفون ف ويهه .. أوف سخيف وما عنده سالفة بس مب منه مني أنا لو ما رديت أحسن ..

رد يتصل .. وفوز تحاول تركز ف الرقم يمكن تعرف صاحبه بس ما عرفته أول مرة تشوفه .. حشرها اتصالات لين ما وصلن 7 مكالمات لم يرد عليها .. وعقبها ردت عليه مرة 2 ..

فوز: وبعدين يعني ..؟!!
المتصل: بلاج جيه .. مش إنتي فوز ..

فوز .. يعرف اسمي .. منو ها ؟؟!! معقولة سلطان ؟؟ لا وييين من وين بييب رقمي .. علي ؟!! لا طبعاً ما يسويها .. سعيد عندي رقمه .. فكرت ف الكل .. إلا ف شخص واحد ..

المتصل: فوز ..؟؟
فوز: منو إنت .. وكيف تعرفني ..؟!!!
المتصل : أنا الوحيد اللي قدر يسكن قلبج من سنين .. أنا اللي كنتي تبني أحلامج معه ..

وهي تسمع رمسته .. حست برعشة ف جسمها .. وتفكيرها بسرعة سار عند محمد .. ليييييش ...؟!!!!

فوز بارتجاف : م .. ح .. مد ....!!!!
محمد: هيه محمد .. شحالج ؟؟
فوز: الحمدلله
محمد: بلاج شو اتصالي فاجئج ؟؟
فوز: من وين يبت رقمي ؟؟
محمد: خذيته من جهاز سما .. اتصالي ضايجج ؟؟
فوز: شو تبا ..؟؟
محمد: أبا أرمسج
فوز: ترمسني ..؟؟ فشو إن شاء الله
محمد: ليش ما قلتيلي ..؟؟
فوز: شو أقولك ؟؟
محمد: إنج تحبيني
فوز بصدمة: شو .. شهالرمسة يا محمد ..؟؟؟
محمد: ها الصدج يا فوز .. ليش ما قلتيلي إنج تحبيني ..؟؟
فوز: منو قالك إني أحبك ؟؟
محمد: سمعتج ترمسين فهد هاك اليوم ف بيتنا ..

فوز مب عارفة شو تقول .. أو كيف تدافع عن نفسها .. مرن جم يوم من درت بخبر زواجه .. ومن هاك اليوم وهي تحاول تنساه .. وتمحيه من قلبها وحياتها .. وفجأة تشوفه جدامها ..

محمد: فوز ..
فوز: نعم ..؟
محمد: أنا أحبج ..

كل شي ف داخلها يرفض هالشي .. كل شي فيها يصرخ لا .. لا تقولها .. خلاص مب قادرة تتحمل انهارت فوز ويلست تبجي .. محمد يحبها ...؟!!! عقب شو .......؟!!! ليش يبا يخليني فهالموقف ..؟؟ ليش يحب عذابي ..؟؟ يدري إني ما بقدر أصبر .. يدري إني بضعف .. وبطيعه .. يدري بهالشي ..

محمد: وربي أحبج .. بس ما قدرت أقولج .. لأنج ما شجعتيني .. كنت أحس إنج ما تحبيني .. ولا تواطنيني .. أسلوبج جان جاف ويايه .. فوز أنا أبيج صدقيني .. ومستعد أخطبج من أهلج ..

فوز ما ترمس .. تسمع وتبجي .. أحبج ..؟؟ ولا قدرت أقولج .. معقولة كل حبي وكل مشاعري ولا فهم إني أحبه ..؟؟ يبيني أحين ..؟؟ عقب شو .. عقب ما دشت ف حياته وحده 2 .. آآآآآه يا محمد كل كلمة تقولها تخليني أندم إني حبيتك ف يوم ..

محمد: فوز قولي شي .. لا تسكتين بليز .. لا تعذبيني بزود .. فوووز ...؟؟ رمسي أرجوج رمسي ..

ليش أنا ضعيفة ..؟؟ لازم أرمس .. لازم أوقفه عند حده .. لازم أنهي كل شي .. حرام أبني سعادتي ع تعاسة غيري .. يمكن واحد فينا غلط لأنه ما رمس .. بس حرمته مالها ذنب تتحمل أغلاطنا ..

محمد: صدقيني قولي إنج موافقة وبيي أحينه بيتكم أخطبج .. أنا أبيج يا فوز .. بس عطيني موافقتج ..
فوز: عقب شو يا محمد ..؟!! إنت أحينه معرس وما كملت 3 شهور من زواجك وتبا تاخذ حرمة ثانية ع حرمتك ..؟؟؟ إذا إنت تقدر تظلمها وتاخذني .. أنا ما أقدر أظلمها وأوافق ..
محمد: بس أنا أحبج .. وإنتي تحبيني ؟؟
فوز: كنت أحبك .. ومن دريت إنك تزوجت خلاص كل هالحب مات
محمد: لا تقولين جيه .. إنتي لي يا فوز تفهمين ..؟!!

كانت شوي وبتنفجر .. خلاص مب قادرة حاسه إنها بتموت .. بتختنق .. رمسة محمد عورت لها قلبها .. كانت وايد مقهورة .. وليش ما تنقهر .. والشخص اللي كانت تحلم فيه .. طلع يحبها ويبيها .. بس قالها عقب فوات الآوان .. ليش أحينه يا محمد .. ليش مب قبل ..

محمد: فوز أنا أدري إنج موافقة ع كلامي .. لأنج تحبيني وتبيني وتحلمين فيني من صغرج ..
فوز: لا ما أحبك .. أحينه بس اكتشفت إني ما أحبك .. أنا حبيت واحد ثاني .. مب إنته إنت واحد أناني وما تفكر إلا بنفسك .. شو تتحسب ..؟!! بنات الناس لعبة ..؟! اللي تأشر عليها بتييك لعندك ؟؟ لا يا محمد .. اصحى .. مب أنا اللي أبني سعادتي ع تعاسة غيري .. أنا إذا ما كنت الأولى والأخيرة ف حياة الشخص اللي بآخذه .. فأفضّل أيلس ف بيت هلي معززة ومكرمة
محمد: يعني شو تبيني أطلقها ..؟!!
فوز: شو ؟؟ تطلقها ....؟!! اللي أبيه تخليني بعيد .. وتنسى الرمسة اللي سمعتني أقولها حق فهد ..
محمد: ترديني يا فوز ...؟!! تصكين الباب ف ويهي ؟!!!
فوز: ما فتحته لك .. عسب أصكه ف ويهك يا محمد ..
محمد: بس يا فوز حرام تضيعين حبنا ..
فوز: أي حب هاا .. حبك نسيته خلاص .. ويكون ف علمك إني انخطبت وعقب جم يوم راح أرد ع أبويه بالموافقة ..!!
محمد: راح تندمين يا فوز .. وتتحسرين لأنج رفضتي هالعرض .. صدقيني ما بتقدرين تعيشين مع غيري لأنج تحبيني أنا .. وتبيني أنا .. مستحيل تقدرين تفكيرين ف غيري ..
فوز: أندم ..؟!!! إذا بندم .. فبندم ع شي واحد بس .. إني حبيت واحد تافه مثلك ..

صكت فوز التليفون ف ويه محمد .. وهي تحس بحرارة فكل جسمها .. ها غير الدموع اللي كانت تنزل من عيونها بدون توقف والضيج اللي حست فيه .. حست إن الدنيا تدور فيها ..وما جان جدامها غير إنها تحاول تمشي للباب .. وتزقر أمها أو أي حد عسب يساعدونها .. وقفت عند الباب ..

فوز: أماااااااايه .. أماااااايه لحقي عليه بموووت ..

سمعتها ندى من دارها ويات تركض .. وأول ما شافت أختها يلست تصيح ..

ندى: شو فيج فوز ؟؟
فوز: نــد ..ى .. زقري أأ م يييييييييه

سارت ندى تزقر أمها اللي يات تركض وأول ما شافت بنتها طايحة ع الأرض وعندها نوبة سعال قوية زاغت .. وزقرت ع حمد اللي يا وساعدها وخذوها المستشفى ....!


كانت ميرة اللي وصلت قبل شوية ويا أخوها علي عقب ما أقنعته ولزمت عليه إنه ييبها المستشفى قبل لا يردها البيت .. تطالع ع فوز الممددة ع السرير .. وانتبهت ع الدموع اللي بدت تنزل من عيونها .. واستغربت ..

ميرة: علاوي ..؟
علي: هلا
ميرة: تعال شوف فوز ..

علي اللي واقف بعيد .. جرّب صوب ميرة .. ويلس يطالع ع فوز ..

علي: بلاها ...؟!!
ميرة: قاعدة تبجي .. شوف دموعها تنزل ..
علي: يمكن تحلم إنها تبجي .. وبجت ف الحقيقة ..
ميرة: شلون تصير هذي ..؟؟
علي: شدراني .. سيري تقربي منها ويودي إيدها أكيد بتحس فيج

تقربت ميرة صوب فوز .. ويودت إيدها .. وفعلاً بدت فوز تفتح عيونها بهدوء .. بس ما كانت تشوف شي من مفعول المخدر ..

علي: الظاهر إن المخدر مأثر عليها وايد ..
ميرة: هيه .. ما قاعدة تشوفنا ..
علي: اتريي عليها شوية .. بتنتبه عقب ما تتعود عيونها ع اللي تشوفه ..
ميرة: ياربي كيف شكلها .. والله كانت وردة طالع شلون ذبلت
علي: إن شاء الله بترد أحسن عن قبل .. لا تخافين عليها
ميرة: أنا السبب .. ما بسامح نفسي ع اللي سويته فيها
علي: لا تيلسين تلومين روحج أحينه .. ترا بشلج أحينه وبوديج البيت
ميرة: ما بسير إلا عقب ما أرمسها ..

فوز بدون انتباه للبنت اللي واقفة حذالها ... : أبااا .. مااي ..
ميرة: شو فديتج ؟؟
فوز: ماااا ااا ي ..
ميرة: لحظة فديتج .. أحينه بصبلج
علي: وين تصبين لها .. يمكن ما يبون يعطونها
ميرة: ليش إن شاء الله ؟؟
علي: ما أدري بس صج أحياناً يقولون لا تعطون المريض يشرب أو ياكل أي شي ..
ميرة: إنزين عيل .. سير شوف حد م الممرضات ..

سار علي يشوف الممرضات ويسألهن عن حالة فوز .. وعقبها رد يقول حق ميرة شو قالوا له .. اللي سارت صوب الماي وصبت حق فوز .. وعطتها تشرب .. علي جان يطالع فوز شكلها جان تعبان وايد .. بطريقة غريبة .. مب جأنها فوز اللي شافها ف بريطانيا .. أو حتى شافها ف بيتهم خالته .. دق تليفونه وكانت شوق متصلة ف خلاه سايلنت .. ورد يطالع ع فوز .. ما يقدر يمنع نفسه من إنه يفكر فيها .. يحاول يشغل نفسه بالتفكير ف شوق أو العضوة اللي معجب فيها .. بس ما يقدر .. رغم إنه يحس إن هالشي فيه خيانة لولد خالته ...!!

أما فوز .. من شربت الماي حست بإنها ارتاحت .. كانت ميتة م العطش .. بس الماي خلا نوبة السعال تييها من يديد بدرجات خفيفة .. طالعت ع البنت اللي واقفة حذال راسها .. وركزت فيها ..

فوز باستغراب وبصوت تعبان: ميرة ..؟!!
ميرة بابتسامة: هيه فديتج .. سلامتج ما تشوفين شر يالغالية
فوز: كح .. كح .. كح كح .. الله يسلمج والشر ما إييج
ميرة: شو صحتج أحينه ؟؟
فوز: الحمدلله ..
علي: فوز .. سلامتج يالغالية .. ما تشوفين شر
طالعته فوز .. وابتسمت له ابتسامة باهتة ..: ربي يسلمك يا علي والشر ما إييك ..
ياااااااه .. علي .. أول مرة فوز تقول اسمه .. حس نفسه راح ينفجر لو يلس ف الغرفة .. وع طول ظهر منها ..!!!
ميرة: خرعتينا عليج يا فوز .. ربي يسامحج .. والله خفت لمن شفت إنج ما داومتي .. قلت أكيد شي مستوي .. ومواز بعد كانت تحاتيج
فوز وهي تطالع ميرة .. وفخاطرها تقول هي هذي ميرة اللي عرفتها .. أكيد سعيد قالها كل شي .. عشان جيه هي هنيه اليوم ..

ميرة: فوز أنا آسفة .. وربي مش قصدي أسوي اللي سويته .. ما كنت أعرف اللي صاير بالضبط ..
فوز: هالموضوع خلصنا منه يا ميرة .. ما يهمني شي أحينه كثر ما يهمني إن إنتي وموزة تعرفون إن مالي أي علاقة بالموضوع .. وإني شاركت ف خطة سعيد بدون لا أعرف شو هي ..
ميرة: أدري والله .. سعيد قالي كل شي.. وأتمنى إنج تسامحيني أحس نفسي غلطت عليج وايد .. جدامج وإلا من وراج
فوز: يمكن ها من حقج .. لأنج توقعتي إن أعز رفيجاتج بتاخذ حبيبج .. بس المفروض يا ميرة بما إني اعز رفيجاتج ما تصدقين إني بسوي جيه .. شلون أرضى بهالشي وأنا أعرف تفاصيل علاقتج بسعيد .. لهالدرجة أنا حقيرة ف نظركم ؟؟؟
ميرة: محشوومة يا فوز .. الله يسامح اللي جان السبب .. ونحن عيال اليوم .. وأتمنى تنسين كل شي ..
فوز: لا تخافين .. الموضوع نسيته من رمست سعيد وقلت له يقولج الحقيقة .. يمكن ردة فعلج وفعل موزة أثرت فيني .. ما بجذب عليج .. بس حاولت أتناسى لأني أدري إن بيي يوم بتعرفون كل شي .. وبتتأكدون إن مالي علاقة ف اللي صار .. كح .. كح ..ككككح ..
ميرة: ارتاحي يا فوز .. لا ترمسين عسب ما تتعبين .. ممممممم
فوز: شفيج ..؟ تبين تقولين شي ؟؟
ميرة: عندي شي لج .. ما أدري بنت من كليتكم ياتني الغرفة اليوم قبل لا أظهر .. وعطتني ظرف لج وقالت لي أعطيج إياه ..
فوز: منو هالبنت ..؟؟ ما قالت اسمها ..؟؟
ميرة: لا والله .. هاج ..

يودت فوز الظرف .. واستغربت من شكله .. يبين عليه رسالة.. بس رسالة شو ؟؟ وحق شوو ..؟؟ ومن منو ..؟!! هالأسئلة كلها بتعرف أجوبتها لو فتحت الظرف .. وكانت فعلاً بتفتحه بس ما قدرت لأن دشت عليها أمها .. ف حطت الظرف ع صوب ..!!

عند علي ..

أول ما ظهر علي .. انتبه ع تليفونه يدق مرة عاشرة .. وكانت شوق ف رد عليها .. علاقته فيها الفترة الأخيرة زادت بشكل كبير .. حتى العضوة اللي يتابع كتاباتها مع إنها تمر ف باله بين اللحظة واللحظة بس صار له فترة طويلة ما قرأ لها أوتابع أخبارها ..

شوق: وينك ؟؟ أدق عليك .. يعطيني مغلق وأحياناً ما ترد
علي: أنا ف المستشفى .. عسب جيه ماشي تغطية م الشبكة
شوق: المستشفى ؟؟ شو تسوي هناك ؟؟
علي: يايب أختيه تزور وحده رفيجتها
شوق: يا سلام ..
علي: شفيج ؟؟
شوق: ماشي
علي: قولي شفيج ؟؟
شوق: دشيت إنت بعد وياها ...؟؟
علي: هيه
شوق: احلف ؟؟
علي: والله .. ليش ؟؟؟
شوق: وليش تدش ..؟؟ ما أبغي حد يشوفك عقب بتسرقك مني
علي: هههههههه تسرقني ليش ..؟؟ لا تخافين البنت حاجزينها حق ولد خالتيه ..
شوق: الحمدلله .. وحتى لو مش محجوزة أحسن لها تكون بعيد لأن إنت لي أنا وبس .. فاهم
علي: ههههههههههههه لا مش فاهم
شوق: علاوي حبيبي ..
علي: هلا ..
شوق: أبغي أشوفك .. شرايك أيي البيت وتعرفني بالمرة ع أختك
علي: آر يو جوكنج ؟؟
شوق: ليش شفيها ؟؟
علي: ماشي .. بس أنا بزي هالجم يوم ..
شوق: أوكي قولي البيت وين وأنا بيي
علي: أونج .. لا ارتاحي ف بيتكم لا اتعبين روحج
شوق: يعني إنت ما تبا تعرفني ع أهلك ؟؟
علي: ليش أعرفج ..؟!!
شوق: شو ليش بعد .. مش إنت حبيبي وأنا حبيبتك
علي: أقول أنا ببند عنج أحينه .. واحد م الربع ياي صوبي ..

بند علي التليفون .. لأن فعلاً حمد جان ياي صوبه .. وسلموا ع بعض وقاله إنه يايب اخته عسب تشوف فوز .. ويلسوا يسولفون ويا بعض .. بس علي جان تفكيره ف شوق .. شوق اللي بدت تتعلق فيه بصورة عجيبة .. وهو ما حاط باله من هالشي .. لأنه عمره ما قال لها أحبج .. أو من هالكلام .. وكل اللي بينهم اتصالات ومسجات وأحياناً كانوا يلتقون .. بس ها كله ف نظر علي بعيد عن مسمى الحب .. لأنه ما يفكر يرتبط ف بنت تعرف عليها عن طريق البلوتوث ف المول وهي بعد اللي عطته رقمها ...!!!


بيت أبو حمد
يوم الجمعة
الساعة 10:00 صباحاً


قبل شوية وصلت فوز م المستشفى عقب ما عطاها الدكتور رخصة وقالها تبتعد عن الانفعالات هالفترة .. وعن الأخبار اللي مب زينة أو اللي ممكن تأثر ف نفسيتها .. وعطاها أدوية حق الإلتهاب اللي بدا يروح وإجازة لمدة يومين .. وصلت دارها بمساعدة أمها .. وارتاحت ع سريرها .. وهي تفكر ف الرسالة اللي قررت ما تفتحها إلا لمن ترد البيت .. شافت إن الوقت مناسب أحينه .. طلعتها من جنطتها وفتحت الظرف .. جان فيه رسالة ومعها بطاقة تعرفها الرسالة من عند منو وأول ما شافت الإسم .. انصدمت ..!!!

سلطان .. بخط كبير .. أتمنى تكونين بخير .. لأن المكان بدونج مظلم ..!!

فتحت الرسالة .. وبدت تقرا المكتوب فيها .. :

السـلام عليكم ورحمة الله وبركاته

شحالج فوز ..؟! ليش هالغياب كله ..؟؟ عسى ما شر ....؟!!! أتمنى ما يكون فيج شي لأني صدج راح أموت .. فقدتج وايد هالأسبوع .. وفقدت ابتسامتج .. ووجودج ف الكلية .. وسمعت أخبار مش طيبة وبصراحة ما أبا أصدقها .. لأن عادي أسويها وأيي أشوفج!

ما جان عندي غير هالحل .. خصوصاً عقب ما صكيتي خاصية الرسايل عني .. ما عرفت كيف أقدر أوصلّج ..

فوز أنا ما أبا منج شي .. وربي يكفيني تكونين بخير ومرتاحة .. هالشي يسعدني وايد .. حتى لو كنت أتعذب ف داخلي .. بس والله عشانج مستعد أتحمل أي شي ومستعد أصبر لأني متمسك فيج أكثر مما تتصوري .. أنا ما أقدر أعيش حياتي إذا ما كنتي إنتي فيها .. حاولت أفكر بغيرج وأنساج .. بس حتى التفكير ما قدرت لأني ما أتخيل نفسي ويا غيرج .. أنا أبا أعيش حياتي معج إنتي وبس ..!
أنا أدري إنج ما تبادليني هالمشاعر .. وإنج ما تحبيني وتقدرين تقولين ف ويهي هالشي .. بس والله بتم أحبج .. لأن هالشي مش فإيدي .. لو كنت أقدر أمنع نفسي عن هالحب كنت منعتها والله .. لأني أنا المتعذب والمتضرر .. بس يمكن عشقت هالعذاب لأن إنتي سبب فيه ..
بعدج عني معذبني .. إنتي يمكن مش حاسة بهالشي .. ولا راح تحسين .. بس والله غيابج بالنسبة لي مش هين أبداً .. أنا أول ما دريت إنج غايبة بسبب المرض .. حسيت بألم ف قلبي .. وربي لو ينتقل المرض .. ما خليت أي مرض يأذيج .. ياليته فيني ولا فيج حبيبتي ..

فوز .. فكري ف رمستي عدل ... فكري فيني كحبيب مرة وحده بس .. وربي راح تتغير وايد أمور .. أنا أبيج لي ومستعد أضحي بأي شي عشانج .. واللي تقولينه أنا حاضر من عيوني هذي قبل هذي .. حسى فيني شوية .. حسى ف عذابي وشوقي واحتياجي لج .. أنا أبيج ومستعد أخطبج والله وبابكم بدقه بس أبا أدقه وإنتي راضية .. لأني ما راح أتحمل الرفض عقب .. !!
الوالدة توصل لج سلامها .. وجان خاطرها ترمسج خصوصا لمن درت إنج مريضة بس طبعاً ما يصير ..
وآسف إذا طولت عليج .. ديري بالج ع روحج
ونترياج تنورين لنا الجامعة
ربي يحفظج


صكت فوز الرسالة .. متفاجأة إن سلطان تييه الجرأة ويطرش لها رسالة ويا وحده م البنات .. عصبت من حركته وتصرفه .. وقررت أول ما تداوم توقفه عند حده ..

يات أمها وكانت يايبتلها شوربة .. لأن الدكتور وصى تشرب أشياء ساخنة .. ناولتها ويلست حذالها ..

أم حمد: اشربيها كلها ..
فوز: مالي نفس أمايه ..
أم حمد: لازم تشربينها .. وخلي عنج الدلع .. ترا بزقر لج أبوج
فوز: إن شاء الله ..
أم حمد: ريم تسلم عليج .. أمس اتصلت ف الليل
فوز: الله يسلمج ويسلمها .. شحالها ..؟؟
أم حمد: الحمدلله بخير .. تقول كانت تدق لج وجهازج مبند وخافت تحسبت شي صاير
فوز: هيه ترا جان هنيه ف البيت .. وقلتيلها إني كنت ف المستشفى؟؟
أم حمد: لا .. خفت تيلس تحاتي تعرفين أختج عاد ..
فوز: أحسن .. وإلا ما بتسوي شي .. بتيلس تفكر بس
أم حمد: عشان جيه ما خبرتها ..
فوز: ندوش وين ؟؟
أم حمد: لين أحينه راقدة ..
فوز: فديتها والله ولهانة عليها وايد

دق تليفون فوز .. كانت نورة رفيجتها متصلة فيها .. عقب ما خبرتها موزة عن مرضها .. قالت بتدق تتطمن عليها .. ردت فوز عليها .. وأمها انسحبت بهدوء وراحت تشوف ندى إذا نشت ..

نورة: شو صحتج ألحين ؟؟
فوز: الحمدلله أحسن عن قبل بوايد
نورة: دبة والله أول ما خبرتني مواز تخرعت .. شو ياج ؟؟
فوز: ما أدري فجأة صارلي جيه ..
نورة: يعني ألحين صحتج أفضل عن قبل ؟؟
فوز: هيه والله ..
نورة: ما تشوفين شر فديتج
فوز: الشر ما إييج .. ما قلتيلي شخبارج إنتي ؟؟
نورة: الحمدلله بخير
فوز: شو الزواج وياج ؟؟ عساج مرتاحة؟؟ شو ماشي نونو ف الطريج ؟؟
نورة: ماشي الحال .. لا طبعاً
فوز: شو يعني ماشي الحال .. مب مرتاحة ..؟ مب مستانسة؟؟
نورة: ماشي الحال
فوز: نورة شفيج ...؟!! ليكون مب مستانسة ف زواجج ؟؟
نورة: خليها على الله يا فوز
فوز: شو صاير ..؟؟
نورة: ما أقدر أقولج تفاصيل أحينه .. بس احتمال كبير ننفصل
فوز بصدمة: شووو؟؟ تنفصلون ؟؟ شو السبب انزين .. نورة شو مستوي بينج وبين ريلج .. تبون تنفصلون وإنتو ما كملتوا 3 شهور من تزوجتوا ...؟!!!
نورة: صارت مشاكل وايد من بداية ما تزوجنا
فوز: بس هو يحبج .. شو هالمشاكل اللي تخليكم تنفصلون وتهدون بعض ..؟؟
نورة: ما أقدر أرمس ألحين يا فوز .. لازم أبند ..
فوز: لا تتهورين يا نورة وتخربين حياتج ..
نورة: إنتي لا تفكرين فيني .. اهتمي ف نفسج وصحتج .. وإن شاء الله برد أتصل فيج .. ياللا مع السلامة
فوز باستسلام : مع السلامة

يلست فوز تفكر .. شو ممكن يكون صاير ويا نورة ..؟؟ وليش تبي تنفصل ويا زوجها ؟؟ مع إنه اللي تعرفه إنه جان يحبها من زمان وجم مرة خطبها .. صحيح هي ما كانت تحبه بس أكيد دام يحبها راح يخليها سعيدة .. ياااربي والله ما عرفنا منو ناخذ اللي نحبه .. وإلا اللي يحبنا ..؟!!!

يات ندى تركض صوب فوز .. وطاحت ف حظنها .. وانتبهت عليها فوز اللي كانت سرحانة وتفكر ف موضوع نورة ..

فوز: هلا والله
ندى: دبه فوز .. ليش رحتي ؟؟
فوز: كاني ييت فديتج
ندى: والله خفت عليج ..
فوز: لا تخافين أنا بخير .. ورديت لج مرة ثانية .. طمنيني شو المدرسة ؟؟
ندى: الحمدلله حلوووة ..
فوز: أدري حلوة .. شو مسوية فيها ؟؟
ندى: أنا شطورة .. كلهم يكولون لي .. ندى إنتي شطورة
فوز: جيه أباج فديتج .. تريقتي ..؟؟
ندى: لا ..
فوز: ياللا عيل سيري تريقي ..
ندى: عادي أكولهم إييبون الريوك هنيه ..؟؟
فوز: هيه غلاتي عادي ..
ندى: زيييييييين

سارت ندى تخبرهم إنها تبا الريوق ف غرفة فوز .. وفوز كانت اطالعها وتبتسم ع براءتها .. فديتها والله ربي يحفظها ...!


السكن الجامعي
يوم الثلاثاء
الساعة 1:15 ظهراً


فوز يالسة ف الغرفة تنتظر ميرة ترد م الدوام .. تبا تقولها عن الشي اللي سوته .. وتاخذ رايها فيه .. فتحت النت وبالأخص المنتدى اللي تحط كتاباتها فيه .. صار لها فترة طويلة ما نزلت شي .. وقررت تطرح الخاطرة اللي كتبتها لما درت بزواج محمد .. وعقبها بدت تكتب خاطرة يديدة .. فتحت صفحة المواضيع وبدت تكتب .. :

" يا سيد جرحي ..
علّمني جرحك ألا أحــزن .. فـ الحزنُ على أمثالك عـارٌ .." ..!

هل شعرتم يوماً أن إحساس الحب لديكم كان خائباً ..؟!
وأن مشاعر الشوق واللهفةِ والانتظار ..
تحولت فجأة إلى مشاعر أشبه بـ الكره والاحتقار ..؟!
في لحظة فقط ..
تحول حب السنين .. إلى نقطة غباءٍ في حياتي ..
أتمنى أن لا تتكرر ..
فقد
اكتشفتُ مؤخراً ..

دق تليفونها .. كانت موزة متصلة فيها تبيها تنزل تعطيها أوراق ومذكرات .. هدت فوز كل شي ونزلت تحت عند موزة ..

موزة: شحالج ؟؟
فوز: الحمدلله طيبة .. شحالج إنتي ؟؟
موزة: منيحة .. كيف بتداومون الأسبوع الياي ؟؟
فوز: لا .. أنا بيلس ف البيت أذاكر ..
موزة: وأنا بعد الظاهر جيه بسوي .. وميرة ؟؟
فوز: ما أدري والله .. بس ميراني هالكورس تخلص قبلنا امتحانات
موزة: يا حظها .. طبعاً أنا كالعادة آخر وحده أخلص
فوز: ما عليه عقب بتاخذين شهر إجازة ..
موزة: هيه والله .. المهم بسير عنج
فوز: ليش .. دشي ع الأقل شوية .. أحين بتيي ميرة وبتسلمين عليها
موزة: ما أقدر فديتج لازم أسير أرتب أغراضي ..
فوز: ليش ع وين إن شاء الله ؟؟
موزة: برد البيت .. أحمد اتصل فيني وقال بيي العصر ياخذني
فوز: ليش باجر ما عندج دوام ؟؟
موزة: لا .. شو نسيتي .. كل أربعاء أنا فري
فوز: هيه صح .. يا حظج خلاص عيل ما بعطلج .. سلمي ع الأهل
موزة: إن شاء الله .. وإنتي بعد سلمي ع ميروه
فوز: إن شاء الله


سارت موزة .. وصعدت فوز الغرفة .. وتفاجأت لمن شافت ميرة ف الغرفة .. وبالتحديد عند جهازها وتقرا .. طالعتها ميرة بنظرة استغراب أو عدم استيعاب .. أما فوز فكانت مستغربة من نظرات ميرة لها ..

فوز: ويا راسج خرعتيني .. متى رجعتي م الدوام ؟؟
ميرة: قبل شوية
فوز: يمه .. شفيج تطالعيني جيه ؟
ميرة: ماشي
فوز: ميروووه ..؟؟ شو مستوي بلاج جيه جأنه حد صافعنج ؟؟
ميرة: ما فيني شي دبه .. إنتي من وين يايه هاه ؟؟
فوز: نزلت تحت .. مواز كانت يايه .. يايبتلي مذكرات وأوراق .. تسلم عليج
ميرة: ربي يسلمج ويسلمها ..
فوز: صليتي؟؟
ميرة: هيه صليت في الكلية ..
فوز: ما تبين تتغدين؟
ميرة: لا شبعانة ..
فوز: عيل سيري بدلي ملابسج وتغسلي وتعالي برمسج ف سالفة
ميرة: أنا بعد أبيج ف سالفة .. دقايق بس

ظهرت ميرة تبدل وتتغسل وفوز ردت تكمل اللي كانت تكتبه ..


اكتشفتُ مؤخراً ..
أن تلك الأشواق التي تحملني إليهِ .. كانت عبث ..
مشاعر بالية .. رثة ..
لا أساس لها من الصحة ..
وأن من أحببت .. لم يكن يوماً ملاكاً ..
قبل فترة ليست ببعيدة ..
خلع لباس الطهر والعفاف .. ورأيتهُ بصورةِ العار ..
بقناع الزيف ..
وبانكسارِ الأنثـى في روحي ..!

نحنُ ننكسر بقوة .. يوم ندرك أن اختياراتنا كانت فاشلة ..
وننكسر بذاتِ القوة .. يوم ندرك أن الخسارة كانت فادحة ...!

وفي معادلةِ الحب التي جمعتني فيه ..
كنتُ أنا الخاسرة .. بجميع المقاييس ...!
وما أقسـى وجع
الفشــل ..!



ميرة: خلصت .. وهاي قعدة .. شو مستوي ؟؟
فوز: تدرين مع إن عندي وايد خيارات وأقدر أرمس مع أي حد عن اللي ف خاطري بس ما رمست .. يمكن كنت أبا أنسى قبل عسب لمن أيي أقولكم .. يصير الأمر عادي
ميرة باستغراب: خير إن شاء الله .. شو مستوي ؟؟
فوز: تحيدين الرسالة اللي عطيتيني إياها لمن كنت ف المستشفى؟
ميرة: هيه .. بلاها ؟؟
فوز: هالرسالة كانت من عند سلطان
ميرة: أكيد تمزحين
فوز: ما أمزح ..
ميرة: وينها .. أبا أقرا شو فيها ..
فوز: للأسف ما عندي
ميرة: عيل وين ...؟!!!!

فوز: أنا فتحتها لمن ترخصت م المستشفى .. قريتها وعصبت من اللي فيها ومن طريقة توصيلها لي .. وقررت لمن أبدا دوام أوقفه عند حده .. طول الفترة اللي داومت فيها ما شفته لأنه مب وياي ف المحاضرات .. وسبحان الله اليوم لمن كنت بدش الكلاس .. شفته ف الكلاس اللي حذالنا بروحه وما أعرف كيف ياتني الجرأة أدش وأرمسه ..

فوز: أخ سلطان ..

لف ويهه علي وأول ما شافني ابتسم ابتسامة غريبة .. تقولين مستانس إنه شافني ..

سلطان: الناس يسلمون لمن يدشون مكان ومحد فيه .. كيف عاد لو داشين مكان وفيه أوادم ؟؟
فوز بقهر: إنت متى ناوي تخلي حركاتك الصبيانية ..؟؟ شوف ترا لين أحينه أنا ما خبرت حد لأني ما أبا أسوي مشاكل ولا أبا أخرب عليك دراستك بس إذا شفت إن تصرفاتك السخيفة بعدها مستمرة .. لا تلومني ساعتها
سلطان: ليش ..؟؟ أنا بشو ضايجتج؟؟
فوز: بشو ضايجتني؟؟ توصل فيك الجرأة اطرشلي مكاتيب .. وتقولي بشو ضايجتني؟؟
سلطان: أنا بس كنت أبا أطمن عليج .. وبعدين هذي غلطتج .. إنتي صكيتي خاصية الرسايل .. وأنا كنت أحاتيج .. أدري إنتي ما يهمج ها كله بس أنا كنت أموت كل يوم وإنتي غايبة ..

طلعت الرسالة وطالعته ..

فوز: تشوف هالرسالة ..؟!!! مثل ما بفرها أحين لأنها ما تهمني .. إنت بعد مثلها بالضبط .. ما تهمني ..

فريت الرسالة ف ويهه .. وهو منصدم من الحركة اللي سويتها .. بس ما علق ..

فوز: أعتقد نحن هنيه يايين ندرس ونتعلم وبس .. اصحى حق نفسك يا محترم وانتبه لدراستك أحسن .. وابتعد عن الأوهام .. ترا عيب اللي تسويه ودام ما ترضى هالشي حق خواتك .. لا ترضاه حق بنات الناس

مشيت عنه .. وكنت متوقعة إنه يقول شي .. وفعلاً ما وحيت أطلع م الكلاس اللي هو مرمس ..

سلطان: مشكورة يا فوز .. وما تقصرين .. بس مب أنا اللي يستسلم وراح أثبت لج إني صادق وإن مشاعري صوبج ماهي لعب ورغم كل اللي تسوينه فيني بتم أحبج وما راح أتنازل عنج


فوز: ظهرت م الكلاس عقب ما صكيت الباب بالقو .. ياخي هالإنسان يقهرني مع إني حاسة بتأنيب الضمير من أسلوبي وياه
ميرة: فديتج ما جان في أسلوب ثاني أفضل من ها ؟؟
فوز: كنت معصبة ساعتها .. ما حسبت حساب أي رمسة أقولها
ميرة: الحلو إنج وقفتيه عند حده .. بس حرام جرحتيه .. خصوصاً لمن فريتي الرسالة ف ويهه
فوز: لا تيلسين تلوميني زيادة .. أنا أبا حد يقولي موقفج صح مب يلومني زيادة
ميرة: لا لا أنا ما ألومج .. فديتج إنتي صح وموقفج صح .. لأن هو طريقته كانت خطأ وخل يتحمل نتايجها ..
فوز: حتى لو كنت أنا غلط .. وموقفي غلط ما بيتغير شي لأن اللي صار صار .. أحين عسى بس يفهم ويخليني ف حالي
ميرة: فواز .. إنتي ليش ما تعطينه فرصة ؟؟ يبين عليه فعلاً يحبج ويبيج
فوز: وليش أعطيه فرصة ؟؟ وأفتح لنفسي مجال أعيش قصة يديدة ومعاناة ثانية ؟؟؟ حتى لو جان صادق .. ما يهمني
ميرة: ما تبين تعطينه فرصة .. لأنج حاطة أمل ف محمد ؟؟؟
فوز: محمد ..؟؟ منو محمد ...؟!!!!
ميرة: شو بتستهبلين ؟؟ محمد الحب الأول ..
فوز: هههههههههه ليش إنتي ما تدرين ؟؟؟
ميرة: عن شو ؟؟
فوز: محمد تزوج من فترة أحين ..
ميرة بصدمة: مستحيل .. أكيد تستهبلين عليه
فوز: لا والله .. صج عرس قبل فترة .. ما تبين تصدقين كيفج
ميرة: معقولة ..؟!! مش قادرة أستوعب .. شلون ؟؟
فوز: تدرين يا ميرة .. كنت وايد مضايجة لأنه تزوج وفقدته للأبد .. بس أحين عادي عندي .. بالعكس يمكن أكون مستانسة بعد لأنه ما صار من نصيبي ..
ميرة: ليش ..؟؟
فوز: لأني توني اكتشفت بس إني ما عرفته ..
ميرة: بعد هالسنين كلها .. تقولين جيه؟؟
فوز: أنا حبيت صورة وهمية رسمتها لمحمد .. ما حبيت محمد الحقيقي .. محمد الحقيقي ما يستاهل إني أحبه ..
ميرة: مش فاهمة سر هالرمسة الغريبة يا فوز .. كل ها بس لأنه تزوج ..؟؟؟
فوز: كل ها بس لأنه لما تزوج .. اكتشفت إنه جان يحبني واكتشف إني أحبه ..!!
ميرة بصدمة: شووووو ..؟!!!!!
فوز: ف نفس اليوم اللي دشيت فيه المستشفى .. اتصل فيني محمد وقالي إنه يحبني .. بس ما قدر يقولي لأنه جان يحس إني ما أستلطفه .. وأنا اللي ذابحة روحي عشانه ..
ميرة:ولهالسبب دشيتي المستشفى ..؟؟
فوز: تقريباً ..
ميرة: بس كيف يقولج جيه .. وهو متزوج ...؟!!!
فوز: عشان جيه أقولج إني ما عرفته .. يبيني أكون حرمة ثانية له .. ع وحده ما كمل وياها 3 شهور
ميرة: صج نذل .. شو يتحسب بنات الناس لعبة ..؟؟
فوز: صدقيني يا ميرة مب ها محمد اللي أنا حبيته .. ها واحد ثاني .. يحب نفسه ومستعد يسوي أي شي عسب يرضيها ..
ميرة: ربي يحبج يا فوز .. وصدقيني إنتي تستاهلين واحد أحسن عنه بمية مرة .. ولا تفكرين فيه حتى ..
فوز: لا تحاتين .. أنا عطيت نفسي وقت وايد عسب أنساه وأطلعه من حياتي .. وخلاص طلعته وللأبد منها .. ما فقلبي أي شي صوبه .. وعسب أفتك منه قلت له اني انخطبت وجريب برد بالموافقة
ميرة: أحسن شي سويتيه .. ما أدري بس أنا من لمن رمستيني عنه .. حسيت إنكم مش مناسبين حق بعض ..
فوز: هههههههه خلينا مني .. هو شاف حياته وأنا بعد بشوف حياتي .. قوليلي إنتي شخبارج ويا سعيد ..؟؟
ميرة: سعيد .. آآآآه شو أقولج خليني ساكتة أحسن
فوز: أفااا .. ليش عاد ؟؟
ميرة: ما أدري .. خايفة يا فوز ..
فوز: من شو ؟؟
ميرة: خايفة إن شعوره صوبي ما يكون حب ..
فوز: وليش ما يكون حب ..؟؟ لو ما يحبج ما جان صارحج .. بالعكس بيسوي نفسه ما سمعج لمن كنتي ترمسيني وتقولين إنج تحبيه .. سعيد ريال والنعم فيه لا تخلينه يضيع منج وربي لو مكانج .. ما بعطي نفسي فرصة أفكر شو شعوره صوبي دام أنا متأكدة إني أحبه .. وبهالحب إنتي تقدرين تخلينه يتعلق فيج ويحبج .. ها ع فرض إنه ما يحبج ..
ميرة: هو قالي ما بيدق ولا بيرمسني إلا لمن أرد عليه ..
فوز: بخصوص شو ؟؟
ميرة: إذا أبيه لين أحينه أو هونت ..
فوز: ومن متى هالشي مستوي ؟؟
ميرة: من عقب ما ظهرتي م المستشفى تقريباً ..
فوز: صج دبه .. طول هالفترة .. اسمعي ترا سعيد أخويه وما يرضيني تعذبينه جيه تفهمين .. دقي عليه وقوليله اللي يبا يسمعه وخلونا نفرح فيكم
ميرة بحيا: إن شاء الله
فوز: صحيح .. إنتي الأسبوع الياي بتداومين وإلا بتيلسين ف البيت حق المذاكرة ..؟؟
ميرة: ما أعرف .. محتارة بصراحة
فوز: ليش عاد ..؟؟
ميرة: لو يلست هنيه بكون بروحي ف السكن لأنج بتردين البيت .. ولو سرت البيت ما أظن بحصل الجو الملائم للمذاكرة ..
فوز: أفااا .. ليش شو صاير ؟؟
ميرة: شو أقولج .. البيت صاير كريه عافانا الله .. من حملت شما والبيت متكهرب .. وعبدالله متغير 360 درجة ..
فوز: للأفضل وإلا للأسوأ ..؟؟؟
ميرة: للأسوأ طبعاً .. ومحد متضرر من ها كله غير خولة حليلها .. تصدقي من تزوج عبدالله بشما .. أهمل خولة ولا قام يروح صوبها .. وخولة فديتها ما رمست ولا قالت شي .. تعرفي ف بالها إن شما عروس يديدة ولازم أول الأيام يكون وياها .. بس عقب الوضع زاد عن حده .. تخيلي تمر أيام ما يروح صوبها ع الأقل يشوفها إذا ناقصنها شي .. محتاية شي ..
فوز: حليلها والله مب زين جيه .. طيب رمسوه قولوله غلط اللي قاعد يسويه
ميرة: ومنو قالج ما رمسناه .. رمسته أنا ورمسه علاوي .. وعصب علينا .. قال هاي حياتي وإنتو ما يخصكم فيها ..
فوز: لهالدرجة ؟؟
ميرة: وأكثر .. حتى علاوي أحينه يأثث بيته عسب ننتقل فيه ..
فوز: لا حول ولا قوة إلا بالله ..
ميرة: تصدقين من حملت شما .. صارت هي الناهية الآمرة ف البيت .. واللي تبينه بييبه لها .. وماشي رمسة من عقب رمستها .. مع إنها كانت طيبة .. بس أحينه لمن عاشرناها عرفناها ع حقيقتها .. وخولة لمن درت إن نحن بننتقل قالت لو ظهرتوا أنا بعد بظهر وبسير بيت هلي مالي حاية هنيه ..
فوز: وربي تكسر الخاطر .. الله يسامح أخوج ع اللي يسويه فيها
ميرة: صدقيني راح يندم .. خولة دانة .. غبي اللي يفرط فيها
فوز: الله يعينها ..

بندت فوز اللاب توب وحطته ع صوب .. عقب ما سوت تسجيل خروج .. وميرة تطالعها باهتمام وفداخلها محتارة هل تقول لها أو لا ..

فوز: ميرة بلاج ..؟؟ فمنو سرحانة هاه ؟؟
ميرة: هاه .. مش سرحانة
فوز: شو اللي شاغل بالج عيل ؟؟ قولي ترا اليوم فاتحينه لاستقبال الهموم والمشاكل
ميرة: هههههههههه هيه والله من سالفة لسالفة
فوز: مبين عليج عندج سالفة وتبين تقولينها
ميرة: يب ..
فوز: خل نصلي العصر .. وبنستكمل ما تبقى من القضايا
ميرة: أوكي ..

نشن البنات يصلن .. وعقبها رجعن مرة ثانية يكملن سوالفهن ..

فوز: هاج عصير ..
ميرة: شكراً ..
فوز: ياللا قولي .. شو السالفة اللي عندج
ميرة: تدرين ممممممم أحينه بنكمل سنتين ويا بعض وتوني أعرف إنج تكتبين ..
فوز بابتسامة: اهاااا .. يعني قريتي الكلام اللي كنت كاتبته ؟؟
ميرة: هيه .. ولو مش قارتنه .. ما كنت بعرف إنج تكتبين .. إنتي ما تبين حد يعرف ؟؟
فوز: لا عادي
ميرة: عيل ليش ما قلتيلي ؟؟
فوز: ما أدري .. يمكن ما صارت فرصة .. أو حسيت ماله داعي أقولج
ميرة: لو كنت أعرف .. يمكن وايد أمور تغيرت
فوز: ما فهمت ..؟
ميرة: أول ما قريت اللي كاتبتنه وشفت نكج ف المنتدى .. اكتشفت إني أعرفج من زمان .. من قبل لا أتعرف عليج ف الجامعة ..
فوز باستغراب: من وين تعرفيني ؟؟
ميرة: من كتاباتج .. علاوي حشرنا ف البيت بكتاباتج .. جان دوم يقرالنا شي منها ويوميا يدش النت بس عسب يشوف إذا حطيتي شي يديد أو لا .. وهو اللي خلاني أقرالج وكنت دوم أفتح النت أشوف يديدج .. جان شعوره صوبج إعجاب ورمسنا وايد بهالخصوص ..

فوز كانت ساكتة وتسمع رمسة ميرة .. ما قدرت تفسر إحساسها ف هاللحظة شو .. بس يمكن فكرة إن في شخص مهتم لكتاباتها ومتابعنها بشكل دايم خلتها تحس بالغرور ..

ميرة: حاول يعرف أكثر عن هالعضوة .. وسجل ف نفس المنتدى بس عسب يطرش لها رسالة وما قدر .. لأنها كانت صاكة خاصية الرسايل .. جان دوم يحاتيها خصوصاً إذا تعود إنه يشوف كتاباتها ودش وما شافهن .. أو لاحظ إنها من فترة ما تدش المنتدى .. عصب مرة عليه لأني قلت له احتمال تكون عرست .. وكنت دوم أنصحه يبعد تفكيره عنها .. لأنها مجرد شخصية بالنت ومستحيل يصير شي .. أول ما قريت النك نيم حقج والكلام اللي كاتبتنه تفاجأت ما قدرت أستوعب هالشي وتأكدت إن الدنيا فعلاً صغيرة

فوز: سبحان الله .. يمكن أحين بس قدرت أفسر شعور الرهبة اللي أحس فيه أول ما أشوف أخوج
ميرة: هههههههههه لهالدرجة علاوي يخرع ..
فوز: لا مب جيه .. بس ما أدري يمكن ..
ميرة: تدرين حتى سعيد يعرفج .. علاوي ما خلا حد ما قاله عن كتاباتج
فوز: مب لهالدرجة عاد
ميرة: صج والله .. أنا ف البداية حسيته يبالغ .. وأنا وسعيد كنا دوم نعلق عليه ونقوله إنت ف خاطرك شي صوبها .. عشان جيه مهتم لكتاباتها .. وسعيد يقوله أنا متأكد إنك تحبها .. وهو ينكر هالشي .. بس عقب لمن قريت كتاباتج بديت أحس نفس احساسه وعرفت إنه معه حق ف كل اللي يقوله
فوز: بس أخوج مب مبين عليه إنه له شغل ف القراءة وهالسوالف
ميرة: أدري وأنا بعد قلت له جيه .. قال أنا ما أقرا أي شي .. ولا أقرا حق أي حد .. وفي كتابات تخليك تقراها غصب عنك .. يعني المفروض تستانسين إن الشيخ علي يقرالج
فوز: ههههههه يزاه الله ألف خير ..
ميرة: هو بعد يحب التصوير .. واكتشف إنج تشاركينه هالهواية وعشان جيه دوم ينزل صوره ف المنتدى أونه بينافسج .. أكيد شفتيله شي ..؟؟
فوز: هو شو نكه ؟؟
ميرة: vip
فوز: ههههههههه أخوج وايد خقاق .. هيه شفت له جم صورة .. ما شاء الله عليه محترف ..
ميرة: هيه .. أنا أحب صوره وايد .. لأنه يعرف كيف يضبط الصورة ويخليها حلووة .. وبعدين ترا أخويه محد يروم عليه ف الخقة ..
فوز: من حقه يخق بصراحة ..
ميرة: الشيمة لا يسمعج والله ما بيصدج روحه
فوز: ههههههههه لا عيل لا تقولين له ..
ميرة بخبث: فوواااااز ..
فوز: هاه
ميرة: ف راسي فكرة .. ما أدري بتوافقيني عليها
فوز: شكلج يقول تبين تسوين حركة نذالة ف حد ..؟؟ شو وراج اعترفي
ميرة: تبين الصج .. هيه
فوز: منو هالفقير اللي حاطة عليه ؟؟؟
ميرة: علاوي
فوز: هههههههههههههههه .. شو تبين تسويله ؟؟
ميرة: فديتج إنتي قولي تم ..
فوز: تم ع شو ؟؟ خليني أعرف الموضوع قبل
ميرة: الموضوع سهل .. وما يبيله شي .. عشاني ياللا بلييييز
فوز: شو ؟؟
ميرة: قولي تم ..
فوز باستسلام : تم .. هاه شو عندج ؟؟
ميرة: طرشيله رسالة ع الخاص
فوز : شو ؟؟ ف عينج .. جلبي فيسج
ميرة: ياللا عاد .. عشان خاطر رفيجتج
فوز: ما أبا ..
ميرة: طيب .. مممممممم عطيني الباس وأنا بدش بنكج وبطرشله
فوز: آسفة ..
ميرة: أفاااااا يعني بتزعليني ..
فوز: ما أقدر أعطيج .. عقب بيتحسب أنا .. لا ما أبا
ميرة: بلعب بأعصابه شويه .. وعقب بقوله إني أنا
فوز: تبين تستوين نذلة ع أخوج ؟؟
ميرة: خليه شوية يتحرقص ..
فوز: أخاف يعصب
ميرة: ما بيعصب صدقيني .. وبعدين حتى لو عصب راح يعصب عليه أنا .. إنتي ما يخصج
فوز: أوكي ..
ميرة: أنا أحينه بتصل فيه وبقوله إنج نزلتي شي يديد عسب يدش .. وعقبها بنطرشله
فوز: بيشك جيه صدقيني
ميرة: ما راح يشك .. مممممممم وإلا أقولج بنطرش الرسالة قبل
فوز: والله إنج نذلة
ميرة: هههههههه عادي حلو الواحد يكون نذل

وفعلاً فتحن اللاب توب .. والرسالة اللي جان المفروض علي يطرشها حق فوز .. هي اللي طرشتها .. عقب ما ضبطن الكلام سون إرسال لـ vip .. ودقت ميرة حق علي ..

ميرة: السلام علييييييكم
علي: وعليكم السلام والرحمة
ميرة: شحالك يالدب ؟؟
علي: الحمدلله بخير .. شحالج إنتي ؟؟
ميرة: الحمدلله طيبة طاب حالك .. وين دارك ؟؟
علي: أحينه ناش م الرقاد
ميرة: يالكسول .. من متى راقد ؟؟
علي: الساعة 2 تقريباً ..
ميرة: إنزين ماشي أخبار ف البيت ؟؟
علي: لا والله .. إنتي باجر بتيين ؟؟
ميرة: هيه
علي: منو بييبج ؟؟
ميرة: بيي ويا فوز وعقب تعال إنت شلني من بيتهم
علي: أوكي .. شحالها هي ؟؟
ميرة: بخير تسلم عليك ..
علي: ردي السلام عليها ..
ميرة: هيه صح .. دشيت المنتدى جريب ؟؟
علي: لا والله ..
ميرة: احم .. هذيج العضوة منزلة موضوعين ..
علي: صج والله ..؟؟ ما بغت .. أشوفها هاي قامت تذلنا بعد .. زين منا نتابع كتاباتها .. تاخذ لها سنة لين تنزل موضوع يديد
ميرة ناقعة م الضحك ع تحرطيمة علي .. خصوصاً إنها حاطة سبيكر وفوز تسمع رمسته ..
ميرة: عاد ما أدري كل واحد وظروفه .. وصح بعد منزلة صور يديدة .. الظاهر إنها كانت مسافرة بريطانيا هالصيف وحاطة تقرير كامل عن رحلتها والمناطق اللي زارتها
علي: حلفي ؟؟
ميرة: والله ..
علي: شت .. يعني كانت ف بريطانيا ويا راسها .. جان زين لو كنت أعرفها
ميرة: ههههههههههه ليش إن شاء الله ؟؟
علي: ماشي .. بس دام نحن كنا هناك .. بنسوي وياها الواجب
ميرة تطالع فوز : فديتك أخوويه إنته راعي واجب امررررة .. تعرف السنع والأصول
علي: المهم خليني أسير أًصلي وعقب بدش أشوف شو يديد هالعضوووة
ميرة: أوكي .. ياللا سلم عليهم هناك
علي: إن شاء الله
ميرة: مع السلامة
علي: ربي يحفظج


ميرة: ههههههههههههههه شفتي كيف يتحرطم عليج .. أقولج يعصب يوم ما يشوف كتاباتج
فوز: صج دب والله .. شويه وبيسبني ..
ميرة: لا تلومينه مشتااق حق حروفج
فوز: أونه ..
ميرة: أحينه خلينا نتريا لين ما يدش .. أقص إيدي بالنص إذا ما اتصل فيني يقولي إنج مطرشة رسالة
فوز: هههههههههههه لهالدرجة ..؟؟
ميرة: أتريي شوية بس .. لين ما يخلص مصلي ويدش
فوز: أوكي بنتريا شو ورانا ..

كلام ميرة جان ف محله .. أول ما خلص علي مصلي سار صوب اللاب توب .. وفتحه ودش المنتدى ع طول .. طبعاً بين عندهن إنه أون لاين ..
فوز: دش أخوج .. ههههههههه
ميرة: أكيد أحينه منصدم لأنه شاف رسالة منج .. وأكيد مش مستوعب .. وأكيد يالس يقرا شو فيها
فوز: أنا ما يخصني فيج إذا عصب ..
ميرة: ما راح يعصب بالعكس بيستانس

دق تليفون ميرة .. اللي خذت تليفونها وعطت فوز تشوف منو متصل .. جان فعلاً علاوي هو اللي داق

ميرة: هلا علاوي ..
علي: ميروووووووووه ..
ميرة وهي كاتمة ضحكتها: شفيك شو مستوي ؟؟
علي: مستحيل ما بتصدقين ..
ميرة: شو ؟؟
علي: العضوة ..
ميرة: بلاها ؟؟
علي: مطرشتلي رسالة ع الخاص
ميرة: شو ؟؟ ما أصدج .. أكيد تخرط عليه
علي: ف عينج والله .. شو أخرط هي مطرشة والله نكها ها أنا متأكد
ميرة: علاوي بسم الله عليك .. شفيك إنزين .. خاف لا يصير فيك شي ..
علي: مب مصدق ..
ميرة: شو تقولك ؟؟؟
علي: مالج خص .. بس جلبي ويهج خليني أرد عليها
ميرة: لا والله .. عيل حق شو متصل فيني ..
علي: أقولج بس إنها طرشتلي رسالة
ميرة: صج صج .. مالت
علي: آآآآه يا قلبي .. فديتني والله أنا كلهم يحبوني أدري .. كنت عارف إنها بطرشلي ..
ميرة: أحينه عاااد بتصدق روحك ..؟؟
علي: من حقي ..
ميرة: إنزين قولي شو قالت لك ؟؟
علي: ماشي .. ياللا برايج خليني أرد عليها
ميرة: أوكي .. مع السلامة


ميرة: شفتي .. شو قلت لج ؟؟
فوز: بلاه أخوج جيه منتزق ..؟؟
ميرة: أحينه من سنتين وهو يحاول يوصلج .. ما تبينه ينتزق لأنه شاف رسالة منج
فوز: ههههههههههههه بتخلوني أخق أحينه ..
ميرة: لا تخقين بليز .. ترا والله بحلف عليج تاخذين أخويه
فوز: هههههههه ليش ؟؟
ميرة: خقتج مع خقته وبتكتمل اللوحة
فوز: لا خلاص بسكت انزين ..

انتظرن البنات ليمن علي رد ع الرسالة .. وعقبها كملن المقلب .. وكانت ميرة هي اللي اطرش المسجات .. أما فوز فسارت ترتب أغراضها لأنها باجر م الصبح بتروح البيت ..

فوز: صح دبه .. ترا باجر حمد بيي الساعة 10 الصبح
ميرة: ياربي ليش من وقت .. علاوي إذا يا ياخذني بيي ع العصر .. تدرين بعد عنده دوام الصبح
فوز: إنزين عادي بتتغدين عندنا ف البيت وبنيلس ويا بعض وعقبها خليه إييج .. حتى جان يبا إيي المسا
ميرة: أخاف أثقل عليكم
فوز: شهالرمسة ويا راسج .. نحن أهل وما بينا هالسوالف
ميرة: تمام عيل بخبره عقب ..
فوز: شو رد ع رسالتج ؟؟
ميرة: هيه .. وطرشتله وخلاص ظهرت .. باجر بنكمل المسرحية
فوز: شكلج تبين تنضربين ع إيد أخوج
ميرة: لا والله .. ما يسويها علاوي
فوز: صج يالويه .. تراج ما رمستي ولد خالتج
ميرة: سعيد ؟؟
فوز: هيه .. سعيد شو قلنا نحن ..؟؟ ياللا دقي عليه وتفاهمي وياه
ميرة: لازم ؟؟
فوز: هيه لازم .. وإلا ترا بغير رايي وبخذه صج عنج .. لأن إنتي شكلج ما تبينه ..
ميرة: ف عينج
فوز: ههههههه ياللا عيل رمسيه .. أنا بظهر عسب تاخذين راحتج
ميرة: اوكي ..


ظهرت فوز .. ودقت ميرة حق سعيد وقالت له كل اللي ف خاطرها .. سعيد أول مرة يحس إنه مشتاق حق ميرة وسوالفها .. صار لها فترة قاطعتنه .. ولا شافها أو حتى رمسها .. وحس فعلاً إنه ميرة هي البنت اللي راح تسعده إن شاء الله ...!!





نهاية الجزء
ترقبوا الجزء الـ 23
​

 

[كلي حلا]

دخييييييييييييييييلج كملي

بلييييز

 

[كلي حلا]

اتريااااااااااج

لا تتطولين

متابعتج اول بأول