ريم القطرية قصة حلوة..

صقر قريش

¬°•| فخر المنتدى |•°¬
إنضم
13 أبريل 2010
المشاركات
2,391
الإقامة
في كل مكان
الجزء الأول

الساعة الثامنة الا ربع مساءا بتوقيت الرياض ..يعني السادسة الا ربع بتوقيت لندن وبلاني الله بشايب يسوق التاكسي أقول له ما بقى ألا ربع ساعة على الطيارة وهو كل عشر دقايق يهدي يأخذ أدويته وبعدين يكمل وأنا أحترق المهم وصلنا مطار هيثرو الساعة السادسة ونصف مساءا و أنا توني نازل من التاكسي ...الا أشوف طيارة الخطوط السعودية طايرة في الجو ... ومزعجين العالم الساعة ست الأقلاع بس يعني وش نقول تعودنا ..المهم وأطمر على كاونتر السعودية ويا عيني على الأخلاق والمعاملة والبشاشة ...

أنا : لو سمحت يا أخوي أنا فاتتني الطيارة ما في طيارة ثانية ..

الموظف : وفرحان أنت و خشتك أن الطيارة فاتتك وش أسوي لك يعني .. يعني دبروا لي طيارة ثانية ..ما درينا عنك طال عمرك كان خلينا الطيارة توقف لين ..تجي أنت طال عمرك..

أنا : الله يهديك لو أني ولد فلان وعلان والله أن ما يركب الطيارة أحد قبلي بس خلها على ربك ريحتكم فايحة يكفي أن المطارات الكبيرة صارت تنحش منكم ولا تحطكم بآخر مدرج ..ثانيا طال عمرك يعني الأمر ما يخلى من هنا ولا هنا طيارة أمير ولا طيارة عفش تدحشوني فيها ..

الموظف : يا أخوي أنت ما تفهم توكل على الله خلاص بنمشي بنروح نسهر في الادوار روود اذا عندك شي هناك مكتب للخدمات حاطينه البريطانين يمكن ينفعك .. و تركوني وسكروا النور ...

المهم مشيت ورحت للمكتب و توني بأحط أغراضي ألا تجي بنت وراها عربانتين كلها مليانة شنط غير شنطتين كبار في فيدها وتركض ركض ...وتصطدم فيني وتطمر على المسئول البريطاني ...

البنت : ايسكيوز مي , ماي اير بلاين ليفت مي ..ات وينت تو كاتر ( الطيارة حقتي فاتتني وراحت لقطر )

أنا : أجل فاتتك والله من شافك وشاف قطار العفش وراك عرف أنك ما ذكرتي طيارتك الا قبل ساعة ...

البنت : مو شغلك أنت فاهم ..يالله على هالخليجين نفتك منهم في أوروبا ومضايقاتهم بس ما فيه في المطار اذا قربت الرجعة بدى شرهم يطلع ... اني واي سير تيل مي وات أي كان دو از ثير اني بلاين أي كان جو ثرو ات تو كاتر ...( الله يسلمك مافي طيارة ثانية توديني قطر )

الموظف : اوكيه مس يو كان وايت فايف منت تو سي وات أي كان دو ... وات اباوت يو سير وات دو يو وانت ( اصبري بس نشوف وش نقدر نسوي لك ..وأنت يالأخو وش تبي )

أنا : ذا سيم ماي بلاين ليفت مي اند وينت تو سوديا ارابيا اف ثير اني بلاين فور سوديا ارابيا أي ويل ثانك يو ( وانا بعد طيارتي فاتتني وراحت للسعودية ما تخبر لنا الله يستر عليك طيارة توديني للسعودية )

الموظف : اوه ما ي جود هي بيبول وين يو ويل اندرستاند تو اتيند يور فلايت تايم يور ار جلف بيبول دو ثات ايفري تايم والله هرام اليكم .... ثير از فلايت ويل جو تو كويت افتر تو هورس اند ثير از تو سيت يو كان جو تو كويت ثين جو تو يور كونتري اوثر وزايز يو ويل لوس يور تيكت ( غربلكم الله يالخليجين أنتم كفو طيارات وتجون لندن حدكم الصمّان يا تموتون يا تنقلبون ضفادع ما تعرفون للطيارات مواعيد تحضرونها فيها في طيارة بتروح الكويت بعد ساعتين فيها مقعدين فاضين بأحطكم فيها ومن الكويت دبروا أنفسكم ..)

وبالفعل رحنا لكاونتر الخطوط الكويتية ويعطوننا تذاكر وصعدنا للطيارة و يحطوننا أنا والبنت القطرية في كرسيين جنب بعض ... في درجة الأفق بيني وبينكم البنت حليوة ومواصفاتها قياسية جسمها مو نحيف ولا دبة ممتلي عز الطلب يعين بين قوسين جسم من ماركة أبو تموجات ..وشعرها طويل شوي وبيضا على خمري .. ويقولون الخمر ممنوع في الخليج ....والواحد راجع للرياض يعني وده يضبط نفسه ... و جايب معي فوق 30 جريدة ومجلة ( للي ما يعرف خطة الجرايد والمجلات ..الواحد أذا في رحلة دولية على الأقل يجيب معه 30 جريدة ومجلة علشان لو تجي جنبه بنت أما هي تطلب منه أن تقرا كذا مجلة أو جريدة أو لو على بالها هي ثقيلة تقوم تعرض عليها أنت أذا تبي تقرا ما تستحي منك .وعلى كل جريدة ولا مجلة تحط اسمك ورقمك و ايميلك .. وملحوظة ما ينفع الواحد يأخذ معه جريدتين ولا مجلة .فرضا قالت البنت أبي المجلة الفلانية وش تسوي وقتها تفك خشتك ..وأذا لا سمح الله طلع اللي جنبك رجال ..وطلب منك جرايد قل له مش خشمك ) .. المشكلة شوي والبنت تطلع مجلة مختصه بالرسم وتجلس تمخمخ فيها ساعتها أدركت أن خطة الجرائد والمجلات راحت ملح ..فقمت أفكر بخطة ثانية علشان أسولف مع البنت ..وأحك رأسي وكل شوي صايد لي قملة متوزيه في طعوس القشرة لين لقيت الفكرة ..

أنا : لو سمحتي ما أدري احنا قد تقابلنا من قبل مشبه عليك بصراحة ... هالوجه الحلو ما ينسى بصراحة ..

البنت : الله يسلمك من ذوقك , بس ما أدري والله أنت قد جيت قطر ولا وين تسكن في أي فنادق أذا سافرت ؟

أنا : لا والله ما عمري رحت قطر ..بس مدري أنتي تدخلين شات البال تالك وتفتحين الكاميرا ؟؟

البنت : أقول انطم زين انطم البال تاك لك ولأشكالك أنا موب حقت بال تالك ..و أياني وأياك تكلمني زين ...

أنا : هدي أعصابك بس يعني بنات البال تاك وش فيهم ملح وقبلة ..على العموم أنا بقرا جرايدي أصرف من مقابلك ..

البنت : سو اللي تبي بس لا تسندر رأسي فاهم ( تسندر = تزعج بس بالقطري ) ... يا راعي البال تاك أنت كفو لندن حدك مانيلا ويخب عليك ...

أنا : بشويش لا تطيح هالكشة أنتي اللي عاد كأنك خبله في هالمطار وراك عشرين عربية وألف شنطة شكلك أول مرة تسافرين وآخر مرة ..

البنت : يا بابا لندن من كثر ما جيتها طلعت من خشمي الحمدلله ما علي قاصر يوم في لندن ويوم في باريس ويوم في أمريكا مو زي بعض الناس معشعشين على البال تاك ...ما شافو خير..

أنا : ( وجالس أرن على جرس استدعاء المظيفين ) ..أنا أوريك شغلك وشوي ويجي رئيس المظيفين ..شاب كويتي لطيف ... وأكلمه ..لو سمحت فكوني من هالعلة بدلوها وجيبوا لي واحدة غيرها يمكن تلقون لبنانية سورية أي شي ابرك منها ...

البنت : لا هذا المزعج المغازلجي الصايع راعي البال تاك ..ما بيّه من يوم صعدنا على الطيارة وهو يهذر فوق رأسي

المضيف : الله يهديكم لو سمحتوا هدوا أعصابكم المشكلة ما في أي مقاعد فاضية في الطيارة ولا نقدر نبدلكم مع أحد ناسين أننا مستضيفينكم علشان اتفاقيه بين الخطوط الخليجية ومطار هيثرو من كثر الخليجين اللي يفوتون مواعيد رحلاتهم فياليت تتحملون بعض وتسكتون عن بعض لين نوصل باقي 6 ساعات انشاءالله ونوصل الكويت .

أنا : صاحي أنت تبيني أجلس 6 ساعات جنب هالملسونة أم لسان طويل لو تقول عشر دقايق ما تحملتها هالمرة 6 ساعات يا شيخ اصفطوا الطيارة على جنب ونزلوها ولا أقول لك ما تستاهل من يوقف على جنب علشانها عطوها براشوت وارموها أبرك ...

البنت : وخروه عني أحسن ولا والله أقوم و أزنطه وأتك روحه تك ... أصلا هو من يوم شافني وهو مذيني ( مذيني = مؤذيني بس بالقطري بعد ..مدري وشلون يقولون انهم يحكون عربي )

المضيف : الله يخليكم خلوا الرحلة تكمل على خير ما صارت .. ما عمرها صارت ... شوفوا عاد أنا بروح الآن وقسما بالله أشوف واحد منكم مكلم الثاني أني أحطه ويّا العفش زين ...

وبعد ساعة من السكوت جا وقت العشاء ..وبحكم أنا وهالبنت المزعجة كنا في آخر الصف وعلى ما وصل دورنا ..المهم جت المضيفة وسألتني قبل بحكم أني جالس عند الممر .. واخترت وجبة دجاج وبعدين جا دورها ..

المضيفة : مساء الخير يا مودموزيل ايش تحبين تاخذين على العشاء ؟

البنت : ياليت وجبة دجاج لو سمحتي ؟؟

أنا : يا شين التقليد ..لو طالب عكرة ظب كان بعض الناس قلدوني ... أبوك يالحب من أول نظرة ..

المضيفة : آسفة والله الدجاج خلص وكمان البيف خلص ما بقى ألا الربيان ..

البنت : يوووه المشكلة ما أحب الربيان عندي حساسية .. منه وواجد جوعانة على ما كنت أجهز أغراضي والطريق نسيت أكل .. وبعض الناس بعد ما قصروا لعوزوني ...

المضيفة : أذا مرة جوعانة ممكن أشوف لك وجبة دجاج بس وجبة أطفال يعني شي عن الجوع ...

أنا : ههههههههههههاااااااااااي ملعوبة كبر ..... وتأكل أكل أطفال عسا بس في أخر الوجبة لعبة هدية هذي ما ينفع لها وجبة أطفال ..هذي جيبوا لها أطفال تأكلهم يمكن تشبع ..

البنت : أنت تسكت لا والله أزتك برا الطيارة أنت أصلا ويهك فقر نحس يمشي

أنا : بشويش يا ست الحسن المهم بأكون أحسن منك وبأعطيك وجبة الدجاج حقتي وبأخذ الربيان قطرية وما تأكل ربيان ... شكلك مو قطرية اصليه ..اعترفي من وين .. متى عطوكم الجواز

البنت : مابي منك شي ..ثانيا أنا قطرية أبا عن جد وأهلي ناس معروفين في قطر ..فاهم ..بس الربيان يجيب لي حساسية ..أموت جوع أصرف من أني اخذ منك شي ..

أنا : لا والله خلاص هدنة باقي خمس ساعات مو ممكن نستمر كذا خذي وجبة الدجاج وأنا باخذ وجبة الربيان أصلا أنا مشتهي ربيان بس خفت أنه يكون خلص ..لو سمحتي يا مضيفة عطيني وجبة الربيان ...

وأخذت البنت وجبة الدجاج وأخذت أنا وجبة الريان .. ولما خلصنا الأكل ..

أنا : بالعافية ..انشالله هني محل ما يسري يمري ..

البنت : الله يعافي قلبك ... والله ودي أشكرك على موقفك النبيل وياليت تكون هذي صفحة جديدة بيننا ..

أنا : الله ما أسرع ما توقعت بهالسرعة ...

البنت : شنو وش صار في شي فهمني لو سمحت ؟

أنا : لا بس يقولون البنت اللي تأكل من صحن بعد ولد بعد فترة تصير تحبه وتموت فيه ...

البنت : قول آمين حبتك حية ولدغتك عقربة .. بتمن علي بهالوجبة ..

أنا : صدق أذا أنت أكرمت الكريم ملكته و أذا أكرمت اللئيم تمردا ...هذا الحين جزاي يوم تنازلت لك عن وجبتي ...

البنت : اوووف مو أنا شكرتك شنو تبي أكثر من جذي لا تبط جبدي عاد ...

أنا : بسم الله على جبدك ..كل هذا علشان البال تاك ..كلمة وقلناها ..آسفين ..

البنت : خلاص سامحتك بس فج عني واسكت زين ..خلني اكمل المجلة حقتي ...

المهم وصلنا لمطار الكويت ورحت الكاونتر اسأل عن أقرب رحلة للسعودية قالوا لي بكرة و عطوني تذكرة على الخطوط السعودية للرياض .. و جاني موظف من الخطوط الكويتية يقول لي انهم بيستضيفوني ليلة في فندق السفير هدية من الخطوط الكويتية ..الله يعز الخليج صدق خليجنا واحد وشعبنا واحد .. على ما وصلت الفندق وحطيت راسي و انخمدت ما صحيت ألا ثاني يوم الصبح الساعة 8 الصباح ونزلت أكل فطوري ..لقيت نص طاولات المطعم محجوزة علشان في وفود رسمية ..وما بقى ألا نص الطاولات و توني مالي صحني من هالبوفية المفتوح وسميت بالله أبي أكل الا أشوف الجرسون يجي يمي ..

الجيرسون : لو سمحت يا أستاذ ... بما أنك بروحك على الطاولة ممكن تسمح للآنسة تجلس معك على نفس الطاولة مثل ما أنت شايف كل الطاولات مليانة ...

أنا : ( رفعت رأسي وشفت البنت حقت الطيارة القطريه ) ... ايه حياها الله ما عندي مشكلة

البنت : بس مو تقول لي يقولون البنت اللي تأكل في نفس الطاولة مع ولد بعد فترة تصير تموت فيه ...من الحين

أنا : لا الضرب في الميت حرام ملاحقتني حتى في الفطور ما يبيلها ما بقى ألا تنطين في حظني وتخميني

البنت : ياربييه يا جيرسون وينك ما بي فطور خله بروحه يشبع ...

أنا : لا خلاص اجلسي ما راح أضايقك ..كلي واشبعي وملي عينك مني ..

البنت : وووععع شنو أملي عيني منك من زينك أنت عاد يبه روح طالع بالمراية .. صج مصدق روحك أنتا تدري وشلون هونت ما أبي فطور أنت اشبع بروحك

أنا : لا بس خلاص والله لو أنها طاولة أبوي ..كلها وجبة فطور بعدين بروح للمطار و اتقلع عند أهلي ..

البنت : صدق والله متى رحلتك .. أنا رحلتي الساعة 12 للدوحة على الخطوط القطرية ...

أنا : أنا رحلتي للرياض الساعة 11 شكلنا بنروح مع بعض للمطار ...

البنت : ايه أنا لازم أروح أبكر علشان معي عفش كثير وبادفع قيمة العفش الزائد ... ابتلشت

أنا : أذا تبين مساعدة تراني جاهز صحيح كان بيينا هواش بس ولو يعني في الأخير احنا عيال خليج واحد ..

البنت : مشكور والله من ذوقك .. على قولتك عيال خليج واحد وأنت والله يعلم مثل أخوي ..

أنا : ( بيني وبين نفسي .. مالت عليك مثل أخوك هذي آخرتها طيب ) طيب بما أني مثل أخوك عطييني تذكرتك وعفشك و أنا أخلص أوراقك و أنتي تنتظريني في الانتظار ...

البنت : يووه ما أبي اثقل عليك وش دعوة أنا أقدر أسوي هالشغلات بروحي ...

أنا : وش تثقلين علي الله يهديك لا تقولين هالحكي ... مافي تعب ولا شي

وعطتني تذكرتها وأول ما وصلنا للمطار .. نصيت كاونتر الخطوط السعودية ...

أنا : لو سمحت يا أخوي هذي تذكرتي ياليت تسوي لي بطاقة صعود وهذي تذكرة بنت خالتي وخطيبتي في نفس الوقت تطاقينا أمس وصممت ترجع قطر ياليت تحولها من عندك للرياض أمي تبي تشوفها ..وأمي مريضة وأخاف تدري أننا تطاقينا تتعب أكثر

الموظف : والله ما أقدر أحولها لين تجي هي بنفسها وتحضر جوازها معها هذي رحلات دولية ما أقدر ألعب فيها و أغيرها من دون علمها ..

أنا : يعني وش الحل ما ني مخليها تروح كذا بروحها وهي معصبة وطاقة معها ..

الموظف : والله ما أدري وش أقول لك بس ما أقدر أحول تذكرتها من الدوحة للرياض ...

أنا : طيب تقدر تحول تذكرتي من الرياض للدوحة على الخطوط القطرية نفس الرحلة ولا ما تقدر ..

الموظف : لا هذي سهلة عطني تذكرتك بس وعطني جوازك .. وأصلحها لك في دقائق ...

وحولت تذكرتي على الدوحة وبعدين رحت كاونتر الخطوط القطرية وصلحت التذكرتين وسويت بطاقتين صعود طائرة بحيث نكون في مقاعد جنب بعض ورجعت للبنت بكل برائه

أنا : تفضلي هذي بطاقة صعود الطائرة حقتك ..وبطاقة العفش بعد يالله أشوفك على خير رحلتي للرياض بعد خمس دقايق بينادون عليها .. واستري على ما واجهتي ألا ما بعد تعرفت عليك الى الآن ...

البنت : أنا ريم من قطر طالبة فنون ..في كلية فرجينيا في قطر .. وأنت بعد استر على ما واجهت

أنا : ماشاءالله طالبة فنون بعذرك طول هالوقت مطنشتني وأنتي في الطيارة وجالسة تقرين كتاب الصور ... يالله مع السلامة ... وأروح أتوزى في جهة في مطار الكويت لين جا وقت طيارة قطر ويوم بيسكرون الباب حق الطيارة وأنط للطيارة .. واروح لمقعدي اللي هو جنب مقعد ريم ... ( هي عند النافذة وأنا عند الممر ) .. وأطب عليها

ريم : وجع شنو جابك وش فيك رديت هييي أنتا طيارتك للسعودية فج عنا وش جايبك هني

أنا : آها بس من يوم شفت وجهك والنحس ملاحقني ملاحق في وفد ديبلوماسي كبير جا على غفلة واضطروا يفضون لهم الدرجة الأولى كلها ونزلونا وخيروني يا أنتظر لرحلة جدة ولا أروح قطر ومن قطر للرياض .. وش أقول بس خليني ساكت لا يظهر اللي في القلب ...

ريم : والله ما يندرى عنك مو مصدقتك .. شكلك مسوي مصيبة بس وش هي ما أعرف

أنا : تكفين لا تظنين أني مسوي كذا علشان معجب فيك وميت عليك يا شين البنت أذا خذت في نفسها مقلب ذكرتيني بواحدة كنت أمشي وراها في السوق ويوم جيت بأعطس واطلع المنديل من جيبي قالت لي لا تعطيني الرقم الآن أخوي قريب مني ..صدق أنتم يالبنات أذا شفتوا ولد وسيم تخربونها مرة معه

ريم: طالع عاد من الوسيم لا يكون أنت .. بصراحة لقب قرد وسيم ما أعطيك أياه

أنا : القرد بعين أمه غزال يا أم القرد ..أنتي وش فيك مو مصدقتني أذا وصلنا مطار الدوحة أوديك كاونتر السعودية تتأكدين منهم هذا اللي ناقص بعد .. ترى ما ودي أحطمك بس ما بقى ألا أني أنا أفكر أغازلك هذا اللي ناقص ...

ريم : انطم زين انطم تراك في طيارتنا والله لا افتح الباب وأقطك في البحر ..يعني خلك مؤدب ..

أنا : أشوفك صايرة زي قناة الجزيرة شر يتطاير ..كأنك أبو شعر ابيض أذا قام يعبس ويغمز بعيونه أبد يبي مشكلة على تالي الليل .. وش طيارتكم ..مركبيني ببلاش الحمدلله تذكرتي معي ..

ريم : آص بس تراك سندرتني وعورت راسي ولعوزتني لعوزة ممكن تسكت .أنا أصلا قايلة خليجي سنع ما يصير يشوف بنت ويهدها طل بويهي ( ويهي = وجهي ليه أهل قطر حاقرين حرف الجيم ) متى نوصل قطر ...

وبعد ثلث س اعة يبدون في توزيع الغدا وتجيب ا لمضيفة الأكل

المضيفة : تفضل يا أستاذ هذي وجبة الدجاج .. مثل ما طلبت ...وأنتي يا مودموزيل تفضلي وجبة الربيان

ريم : بس أنا ما احب الربيان أبي يا دجاج يا لحم ...

المضيفة : آسفة يا مودموزيل بس الوجبات أولا خلصت ثانيا أنتي مسوية طلب تكون وجبة الغداء حقتك ربيان ومسوينها لك مخصوص

ريم : أنا طالبة وجبة ربيان لا مو صحيح أكيد في غلط ..نادي رئيس المضيفين لازم اتأكد منه .. وشوي ويجي رئيس المضيفين ...

ريم : لو سمحت في غلط أنتم تقولون أني طالبة وجبة ربيان مع أني ما أحب الربيان والمشكلة تقولون أني مسوية أوردر مع أن هالكلام كله مو صج ..

رئيس المضيفين : عفوا يا آنسة ريم بس كلامك أنتي مو صحيح ... عندنا هنا في ليستة الركاب أنتي طالبة وجبة ربيان وبالأمارة خطيبك هو اللي سوى لك الأوردر ..

ريم : خطيبي منو هذا خطيبي وش جالسين تخربطون ..

أنا : عن أذنكم بس بروح دورة المياة في واحد دق علي بيجر

رئيس المضيفين : لحظة يا آنسة الأوردر كان من خطيبك اللي على المقعد اللي جنبك الأستاذ عبدالعزيز مو هو خطيبك ..

ريم : خطيبي ايه صح تصدقون أحنا متفقين هالموضوع يبقى سر بس هو الله يهديه على العموم ما في مشكلة كلها نص ساعة ونوصل الدوحة بس حبيت اسأل سؤال بسيط

رئيس الملاحين : تفضلي يا ست ريم اسألي على كيفك احنا كلنا تحت أمرك

ريم : أنا الفيزا كارد مالتي انتهت .. ممكن اشتري من المبيعات الجوية عن طريق الفيزا كارد مالت خطيبي ..

أنا : فيزا كاردتي قصدي تقصدين بطاقتي ما فيها فلوس شوي وتخلص ..معليش يا حبيبتي أذا وصلنا للدوحة تشترين على كيفك زين ..

ريم : ( همسا) والله أذا ما طلعت بطاقتك الحين لا أفضحك في الطيارة وأقول أنك مو خطيبي وانك جالس تتبلى علي هاه بتطلعها ولا وشلون

أنا : ايه تذكرت معي بطاقة فيزا ثانية ما في مشكلة جيبوا لها المبيعات الجوية على حسابي مو مشكلة .. الواحد أذا ما دلع خطيبته من بيدلع ..

ويجيبون لها المبيعات الجوية وياليتهم ما جابوها ..

ريم : أبي من هالعطر 3 غرش واحدة لي وواحدة لبنت خالتي وواحدة لبنت عمتي . وأبي من هالعطر 6 حبات

أنا : بس هالعطر مخيس ليه تجيبين منه 6 حبات

ريم : ايه مو لي في بنات ما أحبهم ولا أواطنهم بعيشة الله ما كنت ناوية أجيب لهم هدية بس بما أنك لزمت علي اشتري على كيفي يالله خل أذلهم بهدايا .. المهم .وأبي من علبة المكياج الفخمة أربع حبات لي واحدة ولأمي واحدة .. ولخالاتي حبتين .. ومن علبة المكياج السكة أبي 3 حبات لشغالاتنا .. أزعجوني يبّون هدايا من لندن يالله وش بيدريهم أنها من الطيارة مو من لندن ... و شنو ذي بعد الله نظارات شمسية أي ماركة راي بان .. عنود بنت عمي تحبها ..وعذيه رفيجتي هم تحبها يالله أبي 4 نظارات شمسية .. ألقى عندكم ألعاب لأخواني الصغار ..

أنا : بس بس الله يهديك أنتي بتشترين هدايا ولا بتفتحين محل هدايا ..

ريم : خلني ساكتة زين يا خطيبي ..أجل وفد ديبلوماسي وأخذوا مقاعد الدرجة الأولى كلها ولا أنا ويهي نحس عليك انزين .. وفوق هذا كله ربيان تطلب لي مخصوص ربيان ...أقول لو سمحت ياأخوي ما تبيعون مجوهرات شي دسم

رئيس الملاحين : أكيد عندنا مجوهرات بس وش تبين خواتم ولا قلائد ولا ايش بالضبط .

ريم : الزين كله راوني اياه وأنا أختار بنفسي الله يخلي لي خطيبي ولا يحرمني منه آمين يا رب ..

وتخلص المشتريات قصدي تخلص بطاقتي ..كان فيها 8000 ريال سعودي ما بقى فيها ألا 3 ريال بس .. وهي تخزني بعيونها خز وكأنها تقول تستاهل المهم وصلت الطيارة الدوحة وأنا مفلس مرة واحدة .. لا في جيبي ولا ريال وبطاقة الفيزا اللي كنت معتمد عليها شفطتها هالمفترسة بمشترياتها .. وأنا بعد ما خلصت كل شي في مطار الدوحة ..طلعت بشنطتي وحالتي مزرية حطيت شنطتي على الأرض وجلست فوقها ..وعبرتي في عيني الا شوي تجي سيارة فياغرا سوداء .. مضللة .. وتهدي جنبي ..وتنزل الدريشة الخلفية وفيها بنت متغطية بطرحة خفيفة

البنت : أقول يا أخوي ..تعال اركب ويانا

أنا : ( في نفسي ) اخس يا بو ناصر وجاك اليوم البنات يتعازمون عليك سو نفسك ثقل

البنت :يا أخوي هي أنت يا سعودي ...

أنا : نعم يا أختي في شي تعرفيني ... ما عمرك شفتي ولد وسيم ...

البنت : بل بل أي وسامة يا شيخ روح انزين هذا يزاي رحمتك ما معك بيزة قلت شلون بيروح الدوحة ووين بيسكن تدري .. أحسن خذ لك وانيت يوديك واسكن مع هنود ..

أنا : لا أمزح معك طال عمرك وش دعوى بس وش دراك أني مفلس ..

البنت : اركب انزين ..لا يشوفونّا شباب الدوحة والله يسوون لنا مسيرة ولا مسيرات شارع السد اركب يالله

وجيت بافتح الباب الخلفي الثاني ... الا تصرخ البنت في وجهي

البنت : صدق تمون أنت ويك اركب قدام يالله جنب السايق عمي مرة شايف نفسه روميو بيركب جنبي ورى روح انطق قدام يالله خل نمشي ترى تأخرنا

واركب الا وأشوف ريم راكبة ورى جنب البنت اللي كانت تحاكيني ...

أنا : اها أنتي وراي وراي وش تبين مو انتقمتي مني وقضيتي فلوسي كلها

ريم : تشوف تشوف الحين مرة أنت بريء ولا جالس تلاحقني وتوهقني بالربيان ومشوه سمعتي بأني خطيبتك احمد ربك ما قلت لهم أنك نصاب ..ثانيا هذا جزاي أني رحمتك يوم شفتك ما معاك فلوس قلت نأخذك نوديك فندق نسكنك على حسابنا ونسفرك للرياض بس المعروف ما يبين معك قايلة لج يالعنود يا بنت عمي هذا صبي راعي مغازل راعي بنات خزني و أخزك ..

أنا : وش سويت يعني مو مصدقتني أن الطيارة اللي كانت بتروح للرياض وفد ديبلوماسي اخذوا مقاعد الدرجة الأولى و أظطروا أن يبدلون تذكرتي .

البنت ( العنود بنت عم ريم ) : ايه يوم بدلوا تذكرتك يا مسكين تروح وتلزق بالبنت وتقول أنها خطيبتك وتطلب لها ربيان صدق أنك ظالم ... مشكلة بنت عمي مو أنها ما تحب الربيان بس ألا يجيب لها حساسية ... يصير ويهها كله حبوب ويحمر ...

أنا : هذا جزاي أبي أخدمها أخلي وجهها أحمر أوفر لها من المكياج و الخرابيط ... ألا الحين قولوا لي وين بتودوني وش بتسوون فيني تراني صرت أخاف من بنت عمك عقب ما خلتني على الحديدة

العنود : احمد ربك مخليتنك على الحديدة هذا عشانك خطيبها بس ... لو بعد أنت زوجها كان حتى الحديدة ما بتحصلنها ..ثانيا لا تخاف ... أحنا بنوديك ونسكنك فندق على حسابنا يعني كتعويض على هالخساير اللي خسرتك اياها ريموه ... هاه وين تبي تسكن الشيراتون ولا فندق الريتز هاه وين تبي نوديك ولا تخاف على حسابنا ..

أنا : الله يسلمك والله كلك ذوق يالعنود ليت بعض الناس بس يتعلمون

ريم : يالله وش فيك علي أنتا الى الآن حاقد علي بسبب اللي شريته ببطاقتك احمد ربك بنسكنك في فنادق ولا عمرك تحلم فيها

أنا : وش دعوى قالوا لك عايش في خرايب الحمدلله أني كنت راجع من لندن .. يعني بين قوسين كشخه

ريم : أي كشخة يبه خلني ساكتة بس لابس لي هالجنز المخيس وقميص بني وععع مالت عليك ما عندك ذوق

أنا : أزين من هالبنطلون اللي لابسته اللي مدري كأنه ايش ..خمسمية لون في بعض

ريم : قايلتنلج ( قايلة لك ) يالعنود بيسندرنا بيعور رأسنا المفروض معطينه ثلاثمية ريال يبدر عمره فيها يرجع للسعودية ولا يشوف له صرفة

العنود : لا حرام شكله يونس يضحك كأنه محمد هنيدي ...

أنا : يا عمي وقف السيارة خلني أنزل بكرامتي واحدة تقول ثلاثمية ريال عقب ما خسرتني فوق 8000 ريال والثانية قال بتجبر بخاطري كأني محمد هنيدي ....

تتوقعون عبدالعزيز بينزل من السيارة ..تبون تعرفون تابعوا الجزء الثاني
وانتظر ردوودكم وتفاعلكم حبايبي
تحياااااااااااتي
.................................................. ....................................

وهااااذااا الجزء الثاااني

حب بلا حدود الجزء الثاني

العنود : بل بل فلفل خبري أهل السعودية باردين وما يعزون شي كثر مزح البنات .. متأكد انك سعودي ..

أنا : لا روسي ما تشوفين بوهتي كأنها بوهة يلتسين .( البوهة لمحة من الوجه تشمل الفم والأنف والعين والحاجب ) متى تفهمون أن اصابع يدك ما تتساوى أنا مو مثل غيري من الشباب التافه عندي أشياء كثيرة أهتم بها

ريم : يا هووووه كومار سو لنا خمستين أموت في الشاب الجد الله يرحم والديك اسكت لين نوصلك للفندق ساعتها انهبل على كيفك يا بو ربيان ...

أنا : طيب طلب أخير لو سمحتي جوالك بس آخر طلب ...

ريم : شايفة يالعنود مو كفو حشيمة ويبّي جوالي مرة واحدة يمون رشدي أباظة على غفلة

أنا : لا مو قصدي كذا بس جوالي مو معمم وأبي أكلم أخوي في الرياض علشان يرسل لي فلوس أدبر عمري فيها هنا ..انتم كثر الله خيركم يكفي توصلوني للفندق وتدفعون ثمن هالليلة ...

العنود : يالله يكسرون الخاطر السعوديين عندهم شركة اتصالات ما تخاف الله الله يخلي لنا الكيوتيل صدق أنهم حرامية بس جنب شركة الاتصالات السعودية يصيرون ملائكة ما تبّي جوالي أنا

أنا: لا الله يسلمك جوالها هي على الأقل كفارة عن الثمانية الآلآف ريال اللي شرت بها من الطيارة

ريم : ياربيه ما راح أخلص منك امسك بس لا تطول كلها كلمتين تقول له أنك في قطر واسم الفندق وخلاص زين مو تهذر أنت وأياه يالله خذ

وآخذ جوالها و لحسن الحظ كنت مخلي جوالي على السايلنت .. وأدق على جوالي وبعد شوي أرجع لها جوالها

أنا : يووه أخوي مقفل جواله شكله نايم بأكلمه من الفندق أذا وصلت انشاءالله

ريم : أحسن توفر والله عسا أخوك بس ما هو مثلك ..الله يصبر أمك عليك

أنا : ويصبر أهلك عليك .. ألا ليه ما جوا معك شكلهم مسفرينك طفشتيهم وأنتي في لندن

ريم : لا والله أصلا أنا فاكهة البيت بس رجعت الدوحة لأني اشتقت للدوحة وغير جذيه عرس صديقتي نورة يوم الخميس فسبقت أهلي و جيت هني .أنت اللي أهلك في ديرة و هادينك في ديرة تطلع شرك بعيد عنهم

أنا : لا أهلي ما هم راعين سفر حدهم جدة بس أنا غير ...

العنود : توني أصدقج يا ريم شكله أبو لمعة يجذب الجذبة ويصدقها .. على العموم يا عبدالعزيز وصلنا الفندق هذا فندق الريتز أحدث فندق في الدوحة .. ولا تشيل هم الحساب تراه علي أنا تقدر تعتبرني أختك هني في الدوحة

ريم : يابنت الحلال ذي علة والله بكرة ينشب لك انزل يا عزوز يالله لا تعطلنا ...

أنا : مشكورة أختي العنود ومشكورة وانشاءالله أذا جيتي الرياض تذكري لك أخو اسمه عبدالعزيز

ونزلت الفندق ورقيت غرفتي وبعد ما صليت وارتحت شوي جلست أتمشى في الدوحة وبما أني مطفر فماغير أمشي بس ولا قدرت أروح السينما مع أني مشتهي أشوف لي فيلم وفي الطريق كلمت أخوي من جوالي اللي هو في الأساس معمم ووصيته يحول لي على الأقل 5 الآلآف ريال على بطاقة الفيزا حقتي وطبعا على ما يحولون لي الفلوس يبغا لها على الأقل يوم ..والى بكرة وش أسوي رجعت الفندق وطلبت عشاء طبعا على حساب الغرفة يعني على حساب العنود بعدين مسكت جوالي وقلت أدق على ريم واستهبل عليها ترن ترن ترن

أنا : الو الأخت ريم من قطر ولا أنا غلطان

ريم: الو .. أي نعم وصلت يا أخوي بس مين معاي ومن وين تكلم يا أخوي هالرقم غريب

أنا : أنا خالد أخو عبدالعزيز اللي من الرياض اللي دق علي اليوم الصباح من جوالك رجع وكلمني وفهمني القصة .. بصراحة أنا مستحي منك والله أنتي ما قصرتي معاه ..بس عبدالعزيز أخوي بعد ما ينلام

ريم : هو اللي سواه أخوك شوية ..وليه ما ينلام عشان أخوك بس .. يا أخوي أخوك لزق لي لزقة

أنا : والله بصراحة لو تعرفين قصته أن تعذرينه هو قبل كم سنة كان يحب بنت وكان ناوي يتزوجها بس دروا أهلها وزوجوها غصب عنها وفرقوهم عن بعض .. من ذاك الوقت حاول ينتحر أربع مرات المشكلة تشوفينه يضحك ومبسوط وفجأة يقول لك مشكور ما قصرت أنا لازم أمشي وارجع لأهلي يعني معناها أنه يبي ينتحر فلازم أحد يبقى جنبه ويمسك يده بحنية ..حتى دكتوره اللي كان في لندن عجز يلقى له علاج علشان كذا هو رجع للرياض .. دايما يكره الفراق فاذا صمم على أنه يكون بروحه فالله يستر

ريم : يا حرام ...طيب هو كذا يلزق بأي بنت يشوفها ولا وشلون

أنا: لا مو أي بنت بصراحة الأطباء احتاروا ناس يقولون البنت اللي تشبه البنت اللي كان يحبها وناس تقول بنت حلوة مرة مرة هي اللي تسوي به كذا .. أنا اعتقد من كلامه عنك أنك حلوة مرة مرة ..

ريم : الله يسلمك والله من ذوق أخوك ..شوف أخوك خفيف دم وحليو بس فيه شوية حنة ( حنة = أزعاج ) ولا أخوك بصراحة ما عليه قاصر

أنا : الله يسلمك على العموم يا أخت ريم ياليت تاخذين بالك عليه أنا حولت له فلوس والمفروض توصله بعد بكرة وعلى طول بيجي للرياض

ريم : افا عليك لا توصي حريص بكرة أروح افطر معه وأجلس معاه أنا وبنت عمي الى الليل كل شي ألا عزوز عاد

أنا : شكرا ما تقصرين والله كل أهل قطر خير وبركة ...

وثاني يوم من الصبح ألقى ريم وبنت عمها العنود في صالة الطعام حقت الفندق وأنا نازل افطر

ريم : حيالله عزوزي يا صباح النور ..تو ما أنورت قطر ...

أنا : الله يسلمك ويعافي قلبك ..وش عندكم في الفندق أخبرك ما ودك تشوفين رقعة وجهي

العنود : ولو يا عبدالعزيز يعني ما تدري عن ريم أنها تحب تغشمر ..ثانيا معزة أهل السعودية غير والله غير ..

ريم : وهي صادقة بنت عمي معزة أهل السعودية غير على وزن جدة غير أنت أجلس بس افطر معنا وش دعوى الى الآن شايل علي في قلبك والله كنت أتغشمر معاك وش فيك أنت

أنا : لا ابد ما فيني شي بس بروح أفطر علشان بأمشي وأرجع لأهلي خلاص تأخرت عليهم كثير

ريم : لا شنو ترجع لأهلك والله ما يصير ما قمنا بحقك ما راويناك الدوحة ما مشينك فيها ما شفت شارع السد ولا اللاند مارك والسيتي سنتر ولا رحت مزرعتنا عندي خيل باراوايك أياها وش فيك مستعجل على الردة يبه ما شبعنا منك

أنا : لا مشكورة ما قصرتي بس صدق مستعجل أني أرجع لأهلي اعذروني .لازم أروح

العنود : يبه رح ييب ( ييب = جب = احضر ) فطورك قبل لا يخلص البوفية ترى نص سكان قطر أجانب يحبون يبلعون خصوصا من هالبوفيهات .. بعدين يحلها حلاّل ...وأقوم أروح أجيب فطوري من البوفيه المفتوح

ريم : ( تكلم العنود ) ما قلت لك ناويها عز الله أنه ناوي ينتحر هني في الدوحة ويفنقش وشلون نمنعه

العنود : ( تكلم ريم ) أي والله شايفة الأصرار عنده أبي ارجع لأهلي مرتين ما في أذنه ماي ناويها من قلب الله يستر بس والله الولد ما يستاهل طيب وشلون نمنعه ...

ريم : ( تكلم العنود ) أنا عندي حل بس سايريني زين .... وارجع بعد ما عبيت صحني أكل

ريم : أقول دامك مصر ترجع لأهلك خلاص ولا يهمك أحنا نوديك للمطار بأنفسنا ومنها ولد خالة العنود يشتغل هناك يدخلك من الصالة الخاصة حقت التشريفات اقل شي في حقك يا عزوز

أنا : لا ماله داعي لا تتعبون أنفسكم ..صدقوني خلاص والله تأخرت على أهلي أنتم ما قصرتوا معي

العنود : لا لا تقول ما قصرنا ألا قصرنا ونص ناسي وش سوت معك ريم صدق أنها ما تستحي على ويهها تخلص بطاقتك بخرابيطها ..ثانيا يا أخي نبي نقوم بواجبك اقل شي تسافر من صالة التشريفات أنت مو أي أحد ..بس أكل فطورك

أنا : طيب براحتكم بس ما أبي أتعبكم أنا أبغى أروح بروحي أريح لكم وأريح لي

ريم ( وهي بدت تمسك يدي ) : ليه جذي مليت مني لا ما يصير وش دعوة .يالعنود أمسكي يده الثانية ..والله ثم والله ما يوديك المطار الا حنّا

أنا : باقي على الرحلة حوالي 10 ساعات ..بروح المطار على طول مشتاق لأمي أذا مسكت يدي كانت تفركها بشوية حنية ودفء

العنود : سامعه يا ريم أمه تفرك ايده افركي يده زين .عوضيه عن حنان أمه

ريم : شوف أنت ضيفنا الى موعد الطيارة بنوديك الهابي لاند وشارع السد و نوديك السينما ونفرجيك قطر ..

أنا : ما أدري طيب بس ما أحب أركب مع السواق ريحته خياس ...سواقكم ما يتسبح وأنا أقرف

العنود : بس يبه أنت تآمر أمر الدريول نخليه ينتظر هني لين نرجع بس لا أنا ولا ريم نعرف نسوق أنت تعرف تسوق

أنا : أسوق بس ما أدل شي في الدوحة ..بس لازم اللي يدلني يكون جالس جنبي قدام

ريم : ما يصير ما نقدر نركب جدام يمّك بروحنا نركب معاك ,الله يستر ترى الدوحة صغيرة وكل شي ينتشر فيها بسرعة

أنا : قلت لكم أبي ارجع للرياض هناك أمي كانت تركب قدام جنبي .مع السلامة خلاص بروح الرياض بأمشي ديرتي اصرف لي

العنود : لا لا لا وش تمشي بروحك أنا بأركب جدام يمّك وباتلثم يا عزوزي وش ديرتك ووش ديرتنا .ما حفظت الأنشودة اللي تقول خليجنا واحد وشعبنا واحد ..يالله يا ريم صفقي ويّاي يعييش فليعيش تبارك يا خليجي ..

أنا : خلاص أجل يالله نمشي بسرعة .... وبالفعل نركب السيارة وندور ..ومشغل على أذاعة صوت الخليج وأغاني ومسرع ... ويوم وصلت قريب اللاند مارك اللي فيه ستار بكس ...قلت لهم أبي أنزل مشتهي أشرب من ستار بكس

ريم : وش دعوة توك مفطر ...ثاني تبّي تطلب أطلب من التيك اواي وخلنا نمشي مو عدلة هني مكان مرة مزحوم كله شباب أخاف أحد يعرفنا ولا يعرف السيارة

العنود : وهي صاجة ريم هالمنطقة مرة خطرة واللي يعافيك يا عزوز لا توقف هني ... مع الدريول مانستجري نمر فيها بروحنا هالمرة وأنت ويّانا

أنا : خلاص مو مشكلة أصلا أنا عارف كذا من الأول أنا برجعكم للفندق وخذوا سيارتكم وروحوا مع دريولكم مدري وش تسمونه وأنا بروح للرياض أمشي في شارع التخصصي بروحي أحسن لي ولكم

ريم : سامعتنه يا عنووددي منيشن بعد على المكان .. لا يبه أنزل وخذ راحتك أذا تبينا ننزل و أياك هم ما عندنا مشكلة أهم شي أنك تنبسط أنت كم عندنا من عزوزي انزلي يا عنوودي الله يستر بس وش تاليتها

أنا : بس من بيدفع الحساب ما معي فلوس

ريم : يبه ما عليك أطلب اللي ودك كاوبتشينو استبريسو أن بغيت فرابتشنو بالكاراميل و أن حبيت تأكل بعد خذ راحتك لا تشيل هم فلوس ...

أنا : ما اقبل بنت تدفع لي وش ناقص فشايل يعني بتذلوني وتقولون لي ليه أبي ارجع للرياض , ..لا وفي سوق بعد يعني فضيحتي بتصير في جلاجل . ألا كم ارتفاعه هاللاند مارك شكله عالي مرة ..

العنود : سامعة يالخبلة يسأل عن أدوار اللاند مارك نواها عز الله المصيبة قربت طلعي الفلوس اللي وياج كلها أنا معي 463 ريال قطري فقط لا غير والله على ما أقول شهيد

ريم : الحمدلله أن اللاند مارك دور واحد ولا كانت مصيبه أنا معاي 600 ريال قطري ..هاك يبه بس لا تزعل ...

ونزلنا السوق ودخلنا و أروح لستار بكس وفي طاولات برى قدام الناس .و أسحب الكرسي علشان أجلس وأقول لهم أجلسوا وش تنتظرون

ريم : الله فاتج يا العنود شايفة كذا موديل جديد في لندن في فرع زارا تعالي وياي أراويج أياهم

أنا : اصبروا نشرب كابتشينو شوي ثم نروح كلنا ..وش فيكم مستعجلين ..

العنود: لا عليك بالعافية أحنا ما راح نتأخر بس نشوف هالموديلات اللي تقول عنها ريم ونرجع شغلات حريم ماحنا متأخرين ..

أنا : خلاص أذا مو متأخرين أجل أجي وأياكم ونرجع كلنا نشرب كابتشينو هنا

ريم : عزوزي والله نص الدوحة هني صعبة نجلس وأياك بكرة نلقى خبرنا في جريدة الشرق ولا الراية أنت أشرب الكابتشينو وبعدين نطلع هاه وش قلت عزوزي

أنا : اها أصلا أنا عارف ما أحد يحبني ولا يقدر يستحملني ..طول عمري كنت كذا وبأتم كذا خلاص روحوا وهذي مفاتيح سيارتكم وكثر الله خيركم ....

ريم : تشوفين اللي اشوفه يا عنود الريّال ( الريّال = مو عملة السعودية ولا قطر هنا بمعنى الرجل والرجل مو المجلة الشهرية هنا بمعنى مان .. ومان مو معناه يذلك بشي أنما كلمة أنجليزية ) يطالع السقف ..الله يستر ..شوف عزوزي بالطقاق زارا ونينا ريتشي بنشرب ويّاك كابتشينو بس مو هني ذي ستار بكس يهودي وش رأيك نقاطعهم ونروح الأوبرا كافيه دورين وقطرية ومضمونة هاه وش قلت أكيد موافق ..

أنا : مقاطعة ولا ما تبون الناس يشوفونكم معي مو مشكلة طول عمري كنت وبأتم منبوذ ..خلاص يالله مع السلامة

العنود : شنو مع السلامة لا يبه وين ما يروح العنابي أنا و أياه قصدي يروح عزوزي ..يبه هني هني .الله يلعن أبو المقاطعة ايلسي ( ايلسي = اجلسي) يا ريموه وشافونا اهل الدوحة خير يا طير ( وتشفط هوا من العبرة ) الله يستر بس ..آمر عمي عبدالعزيز وش تريد تشرب وتأكل ... يا جيرسون يب لوحة كبيرة أكتب ريم والعنود مع عبدالعزيز خل الناس تشوفونا مع عزوزي ..ولا أقول لك هذا رقم وكالة الأنباء القطرية خلهم ييون يأخذون لنا صورة جماعية

ريم : العنود وش فييج وش صار لعقلج ... عنوودي ردي علي

العنود : ولا شي بس عندي أحساس غريب يشبه أحساس خروف في عيد الضحية . أتصور أبوي أذا درى ..هو ذابحني ذابحني ما فيها شك بس يا هل ترى كيف الطريقة بيزنطني ولا بيخنقني ولا وشلون بالضبط

ريم : أي والله يا عنوود عاد أنتي أمج هني و أخوانك هني يمكن يمكن يدافعون عنج ... بس المصيبة أنا أهلي مدري في لندن ولا راحوا باريس ومن زين الحظ أبوي بروحه في الدوحة والله بلشه أنا اصلا وش ييبني أحضر عرس نورة أحد يسوي عرسه في الصيف وهني بالدوحة ... أنا أخاف أبوي يطبق علي حركات المصارعة الحرة أبوي يعزهم وايد خصوصا اندر تيكر أذا تك الواحد من رقبته ورفعه فوق فوق ثم يقطه في الأرض وينط فوقه

أنا : وش تحكون عنه .. لا تجلسون تحكون مع بعض وتطنشوني متمللين مني

العنود : استغفر الله أحنا نمل منك أنتا ودي تيجي يا راجل بس نودع بعضنا ..خبرك نهايتنا قربت على ايدك الله يسلمك ولا يحرمنا منك أجل عمي يا ريم هالأيام معجب باندر تيكر ... أنا أبوي من زمان عن المصارعة آخر خبره بيوكوزنا ذاك الياباني المتين ..اللي يبرك فوق المصارعين ويفطسون اهيء اهيء اهيء

أنا : الله عندكم سينما يا حظكم ( منتهى تبلد الحس ) احنا ما عندنا سينما في السعودية مدري ليه رافضين مع أن مافيها شي والله ..قهر ..لحظة بروح أشوف الأفلام اللي عندهم ... ولا أقول لكم ستار بكس حقكم في الدوحة مو زين تعالوا كلنا نروح سوى نشوف الأفلام اللي عندهم ونحضر لنا فيلم

ريم : على أمرك أنت بس تمشي وأحنا وراك ... أقول يا عنودي ظنتج بيذبحونا فرادى ولا جملة وفي البيت ولا في ميدان عام ...

العنود : مو باط جبدي أنه ولا حاس خير شر ..يبّي يشوف أفلام ويحضر سينما ..متفرغ الأخ مرة ...

ريم : طالعيني عدل ودي أشوف ويهج كله قبل ما يذبحونج ... والله أنك حسافة على الموت يا عنود

أنا : يالله حركوا بسرعة يا سلام سبايدر مان نزل في قطر حركات رهيب كان ودي أشوف هالفيلم ..هييه هييه

ريم : يالله يا عنود أذا بنموت على الأقل نشوف فيلم قبل ما نموت ..

العنود : بس عاد مب سبايدر مان أذا بنشوف نشوف فيلم كوميدي شوي ..بس وش نسوي عاد حكم القوي

وندخل ونشوف الفيلم وطبعا أنا جالس في النص .. ريم ماسكه الفشار الحلو والعنود ماسكه الفشار المالح وأنا أكل شوي من هذا وشوي من هذا ويوم خلص الفيلم طلعنا

ريم: يالله يا عزوز نطلع من هنا بسرعة شوي وينزحم السوق في نهاية الظهر اللي بيتغدون واللي يبّون يحضرون سينما ...

العنود : وهي صاجة ريم ..مو أنت شفت الفيلم سبايدر مان ..خل نروح أي مكان ثاني

أنا : زي ما توقعت على طول مليتوا مني ..على العموم مشكورات ...هذي مفاتيح سيارتكم ..روحوا بروحكم أنا بروح أشوف السيتي سنتر اللي دايما يطلع في التلفزيون ..وثم بأطلع للمطار بروحي بأمشي ما أبي أزعجكم أكثر اللي مثلي أحسن له يتم بروحه طول الوقت بروحه ولا يزعج الناس ...

ريم : سامعة يا عنووودي بيروح الستي سنتر .. فاهمتني الستي سنتر 3 طوابق يعني فوق فوق فوق تحت تحت

العنود : والله سامعتنه يا ريم ..أقول عزوزي ما بتروح السنتي سنتر بروحك..وش رأيك أحنا بنروح و أياك أنا وريم

أنا : لا لا ماله داعي أنتم بنات الله يستر عليكم ..يشوفكم أحد معي في الستي سنتر تنفضحون يكفي اللي شافوكم معي هنا في اللاند مارك ...أنا ما راح أطول في الستي سنتر كلها شغلة سريعة بأطلع فوق ثم بأنهيها

ريم : وش تطلع فوق وتنهيها نو نو نو سوري أنت في قطر يعني أنت ضيفنا بنروح و أياك الستي سنتر وبعدين نتمشى على الكورنيش وفي الليل بنعزمك على العشاء ...كم عزوزي عندنا

أنا : لا وش عشا ناسين أن رحلتي آخر العصر ... تذكرتي معي ..و أغراضي جاهزة في الفندق ..

العنود : أهليين معاه التذكرة وأخوه ما طرش له البيزات ...ويبّي يروح الستي سنتر .. عزوزي والله ثم والله .. ما بتسافر اليوم ..حلفت أنا عاد يالله وش عندك ...علي الطلاق من جاسم ولد عمتي اللي ناشب في بلاعيمي وأنا ما أبيه ..ما بتروح اليوم ..هاه ناوي تشرد جاسم وتخليه مطلق ...

ريم : أي والله ..عليها الطلاق من جاسم ...ما بتروح .. ألا قولي لي يا عنود عمي ألى الآن ملزم على جاسم ... مو راضي يقتنع أنج ما تواطنينه بعيشة الله

العنود : أي والله شايفة وشلون ..وش جاب لجاب ..هو بدوي بحت .. من بر لبر وكل سنة يطلع للمقناص .. وأنا حدي أزرع ورد واسبح في بركتنا ... هو يحب سلامة العبدلله و أنا مالت عبدالمجيد عبدالله وراشد الماجد وطقتهم ..وغير ذي كله ..اذا جا بيدلعني يقول لي يا هيش ( هيش = كلمة بدوية تعني يا مرة )

ريم : الله يهديه عمي بس وش لج بجاسم ..والله الزين سعود ولد خالتك .. ولا ثامر ..ولد خالج .ناس هاي وكشخة ومتخرجين من أمريكا ..مو جاسم راح يدرس ببريطانيا لغة ..رجع معلمهم العربي و حمس القهوة ..وصيد الضبان

العنود : ويرحم والدينج لا تذكريني ..ترى يضيق خلقي ..أنا أصلا مابي من عايلتنا هالمرة ابتلش في جسوم ..شايله هم أذا طلع البر وصاد حبارى أو ضب وقطع لي عكرته و لا شي ثاني بيقطه علي ويقول يالله اطبخيه ..والله لا أدوخ وأطيح في المطبخ

ريم : طيب كلمي امج يمكن تلقى لك حل ..وتقدر تقنع ابوج بيني وبينك أنا شايلة هم لو تزوجتي جسوم وشلون بأشوفج وأطلع معج .. أخاف يكون زي أخوه حمد تم حابس مرته ما تطلع الا في العيد تزور أهلها نص ساعة وترجع

أنا: أقول تبون شي تشربونه فيما تخلصون سالفتكم وش دخلنا بجاسم وثامر وحمد ومرته ... داخ رأسي أنا بروح الستي سنتر هاه بتجون معي ولا لا

العنود : لا أمش و أحنا وراك ..قصدي ريلنا على ريلك ما بنهدك تروح مكان بروحك .., ونروح للستي سنتر ..طبعا سوق كبير وكشخه ومليان ناس ... ومن خوفهم علي كل واحدة ماسكة يد من يديني ..وكل شوي ساحب أيديهم بشويش ومقربها لي أكثر يعني زي مشية العرسان أول الزواج ( حطوا مية خط تحت أول الزواج ) .. وجلسنا نمشي في السوق وكل ما حسيت أهتماهم قل فيني أطمر للدور الثالث ساعتها يلزقون فيني بقوة .ويمر الوقت ويخلص العصر ويجي المغرب و أجوع وأبي أتغدى وندخل مطعم ايطالي في السيتي سنتر ..وياليتنا ما دخلنا المطعم ,, طبعا ما في هناك قسم عوائل ولا أفراد كلهم صالة واحدة ..وجلسنا على الطاولة ..وطلبت الأكل وجلست اشفط العصير فيما يجي الأكل ... والا بنت متلثمة جالسة على طاولة مع عائلتها مشتغلة قزقزة فيني ( قزقزة كلمة سعودية تعني مطالع بالخليجي تخزني بعيونها ) .. طبعا التفسير المنطقي اللي في رأسي أنها بنت مقهورة شافتني مع بنتين وكل واحدة تمسك في يدي و تدلعني ... طبعا أنا أطبق الحكمة القائلة زيادة الخير خيرين وقمت أشتغل مع البنت نظرة بنظرة ..ولا بيهمني حاجة ... وجا الأكل وقمت أكل وأطالع البنت ..وهي وعائلتها خلصوا أكل وطلعوا أهلها وسبقوها وجت البنت ناحيتي وياليتها ما جت

يا ترى من هالبنت و وش تبي بعبدالعزيز ..تبون تعرفون تابعوا الجزء الثالث....


..................................................

 

شووق قطر

¬°•| مراقبة عامة سابقة وصاحبة العطاء المميز |•°¬
إنضم
29 سبتمبر 2009
المشاركات
27,429
الإقامة
قـــلــبي""الـــدفــــنــــه""
قريت الجزء الآوول
ولي عوده لقرآة الجزء الثآني

صقر مشكوووووووووووووور ع المجهود

بآلقسم
 

بنت محضه

¬°•| صاحبة التميز|•°¬
إنضم
25 سبتمبر 2007
المشاركات
1,757
الإقامة
الباطنه شمال
حلووووووووو وانتظار الجزء الثاني
 

لسعـۃ ع ـَـَذآب

¬°•| عضو مميز |•°¬
إنضم
9 يونيو 2010
المشاركات
311
الإقامة
دار بني كعب
واو حلوه القصه

اسمييني بنزل الجزء الثالث من قصة لحظة شقا
ونرقب الزود من جداج
تحياتي لسعة
 
أعلى