|--*¨ لاحـــظ تــصــور الــشــاشـــة ¨*--|

رثام

¬°•| عضو فعّال |•°¬
إنضم
4 نوفمبر 2008
المشاركات
165
الإقامة
دبـــــــــي
السلام عليكم ورحمة الله وبركاته ..


عقب ما انتهيت من كتابه موضوع ..

وخذت ( قسط ) من الراحة ..

جابلت ( التلفزيون ) ..

تميت أتنقل من قناة لقناة .. ( يالسه آكل أناناس أتعشى اللي فبالي بتذبحني ) ..


شفت اختلاف في تصور كل برنامج ..

أو كل مسلسل ..

أو فيلم ..

عسب يدخلون الصورة فعقولنا ( ونفهم ) ..



لو تلاحظون :



* المسلسلات الاسلامية :


يصورون المسلمين بملابس بيضا .. والكفار بملابس سوده .. والحواجب غليظه وأصواتهم تخوف .. ( هذا فالافلام القديمه ) .


أما حالياً فتلقى المسلمين بملابس ملونه بألوان غريبه وتلمع .. والكفار بعقود
وسلاسل .



* المسلسلات والافلام ( العصور السابقه ) :


- العصر الحجري : لازم تلقاهم كشيش .. والقب ( العصا الحجري ) .. واللحيه الخايسه .. ولابسين ملابس ممزقه .. وبعض اللقطات الحرمه يجرها الريال من شعرها ( عنبو هب شعر ) .. وما يموتون يوم يضربون بعض بهالقب أو العصا .


- الفراعنه : فحدث ولا حرج خط الجحال ( الكحل ) شي غريب .. وحركه اليد
( كلكم تعرفونها ) .. ولحيه الريال معقصه او مربوطه .. والحرمه قصتها غاويه .. وملابسهن كانهن عارضات ازياء .. والرياييل فقارى ما يعرفون يلبسون .


- اوروبا القديمه : الفساتين المنفوشه ( الكلاسيكيه ) .. الايتيكيت .. الغنى الفاحش .. او الفقر والوصخ ( القذاره ) .. والسيطره .. والرياييل كاشخين فكل وقت .. حتى لو بيموت ما يحب يهتز .. ( خقاق ) .



* المسلسلات الخليجية :

قبل تلقى المسلسلات الخفيفه .. تموت من الضحك .. وما تشبع منهم ..

اليوم كله نكد في نكد .. ضرب .. وصفعات .. وصراخ .. وصياح .. مكياج صارخ ( حتى وهي راقده ) .. فساتين وكنادير وتسريحات مبالغ فيها .. تصوير الشعب الخليجي في غنى فاحش ..

أما كوميديا هالايام فغصب تضحك .



* المسلسلات العربيه :


دلع البنت ما ينهضم .. الاكشن يجيب القهر ( سيارة تصيح ويلات فالصحرا ) .. الحرمه أكثر شي تلقاها فالمطبخ تطبخ ..

وايد يرمسون ويتخققون بالماركات والمواتر .. ووايد يذكرون الفلوس .



* الافلام الاجنبيه :


الاكشن مبالغ فيه .. البطل يتفادى الرصاص ويطير .. فالسياسه يظهرون عيوب رؤساءهم ويغسلونهم عقب ما ينعزل ..

فالسحر ومصاصي الدماء ( الله يلوع جبودهم ) .. العرافه تارسه عمرها
خواتم وحيل وسلاسل ( مادري كيف تتحرك ) .. يا حبهم يصورون الحرمه رخيصه عندهم .



* الافلام الهنديه :


هذيل ربعنا .. الافلام الجديمه البطل ينقز من الجبل وينزل وهو واقف ( خيبه ) .. الحصان يطير .. والسيارة تعفد .. البطل لو ينصاب بكل الرصاصات ما يموت ( قطو ) .. واذا مات البطل .. البطله حليلها لازم تموت .. يموتون عالرومانسيه .

حديثاُ زاد عندهم التعري .. والرقص ( هذا لازم ) .. والكلمات الهندية اقل من الانجليزيه .. وتصويرهم فالاغلب خارج دولتهم ( مع العلم عندهم مناظر خلابه فبلادهم ) ..



* المسلسلات المكسيكيه ( الكوريه والتركيه ) :


عندهم الرومانسيه والحب شي رخيص .. والبطل فالمكيسيه لازم معضل .. والبطله غاويه وعارضه أزياء .. و( التركيه ) اسمحوا لي ما ادانيهم البطل مادري شو ممكن تقول عنه .. والكوريين وايد يهتمون بالعلاقات الاسريه ساعات من تشابه الاشكال لازم تتابع أكثر من حلقه عسب تميز وتحفظ اسماءهم .



* الأغاني ( الفيديو كليب ) :


قبل تلقى المطرب أو المطربه واقفين ومن النادر يتحركون ( فقارى ) يأدون اغنيتهم ويتوكلون بكل احترام .. ومن النادر تلقى حد يرقص ..

وفيومنا .. ( الله المستعان ) شي من النادر تلقى تشاهده ويا العايله .. وكلكم شايفين وعندكم خبر ( ماروم اشرح ) .



* الكرتون ( الرسوم المتحركه ) :


يا حليلهم عيالنا .. قبل تلقى ( توم وجيري ) و ( عدنان ولينا ) و ( سالي ) و ( فلونه ) و ( سندي بل ) و ( جونقر ) و ( كابتن ماجد) المباراه تاخذ يومين ويركضون فالملعب من مرمى لمرمى لمده حلقه .............................. الخ .

وتحولوا عيالنا لشياطين والسبب العنف اللي نلقاه فالكرتون .. افلام كرتونيه من النادر تلقاها تتحدث عن الطيبه والاخلاق أكثر شي ( قتل .. وحرق .. ومسدسات .......... الخ ) ... اسمحوا لي ما اذكر اسماء هالافلام .



* برامج الحظ والجدل والعلاج الطبيعي :


والله من اشكال مقدمين البرامج تلقاهم ( لصوص ) مخادعين .. قصوا عالناس بالوصفات .. عنبو شوفوا أشكالهم اللي تلقاه ( حفار قبور ) .. واللي تلقاه ( ساحر ) أو ( شرات المارد ) مادري كيف يثقون بهم .



* برامج راسين بالحلال ( القنوات ) :


معقوله كل هالناس يبون يعرسون .. اللي مب لاقي بنت الحلال .. واللي يبا يتزوج مسيار .. واللي توصف نفسها .. واللي يقول أنا غني ( يبا يسحر الي يموتن عالبيزه ) .



يا ناس يا عالم ..

وايد ..

وكثير ..

وتعبت وأنا اذكرهم ..


واسمحوا لي اذا غلطت أو بالغت ..



:patch_music:
 

ولد شيوخ

¬°•| عضو مميز |•°¬
إنضم
12 سبتمبر 2008
المشاركات
349
العمر
39
الإقامة
العين دار الزين
كلامج كله صح 100% ومانقول غير ((الله يعين ويهدي))
ومشكوره على الطرح الاكثر من رائع

وربي يعطيج العافيه
 

ليونيل ميسي

¬°•| عضو مبتدى |•°¬
إنضم
12 فبراير 2009
المشاركات
21
الإقامة
البريمي
والله اختي الكل صار يتابع الزين و مو زين بحجت التسلية !!!
الله يعين اللي جاي .

تسلمين على الطرح القيم ...
 

غٌَ ـلآ بُنٍيً گـ عُ ــبُ

¬°•| םـشُرٍَفٍة سْابِقِهْ|•°¬
إنضم
6 يونيو 2008
المشاركات
5,921
العمر
36
الإقامة
му σωη ωσяℓD
تميت أتنقل من قناة لقناة .. ( يالسه آكل أناناس أتعشى اللي فبالي بتذبحني ) ..


موضوعج يصير خير برد عليه بس سويلي زوم ع هالجمله وذكريني فيها لا شفتج
 

غٌَ ـلآ بُنٍيً گـ عُ ــبُ

¬°•| םـشُرٍَفٍة سْابِقِهْ|•°¬
إنضم
6 يونيو 2008
المشاركات
5,921
العمر
36
الإقامة
му σωη ωσяℓD
* الأغاني ( الفيديو كليب ) :


قبل تلقى المطرب أو المطربه واقفين ومن النادر يتحركون ( فقارى ) يأدون اغنيتهم ويتوكلون بكل احترام .. ومن النادر تلقى حد يرقص ..

وفيومنا .. ( الله المستعان ) شي من النادر تلقى تشاهده ويا العايله .. وكلكم شايفين وعندكم خبر ( ماروم اشرح ) .


وين تلقين حد واقف الكل يرقص حتى المغني عاد لا تعليق ع المودلز ولا ع المكياج واللبس


خليها ع ربج ها قله ادب اشكره عيني عينك
 

رثام

¬°•| عضو فعّال |•°¬
إنضم
4 نوفمبر 2008
المشاركات
165
الإقامة
دبـــــــــي
ليونيل ميسي


المشكله ان الغث صار منتشر اكثر من الزين ..

ولكن علينا الاختيار الصحيح ..


كل الود ..



:patch_music:
 

رثام

¬°•| عضو فعّال |•°¬
إنضم
4 نوفمبر 2008
المشاركات
165
الإقامة
دبـــــــــي
غلا بني كعب



هلااااااااااااااااااااااااااااا حبيبتي ..

ان شا الله من اشوفج بذكرج :patch_swit:


اما عن الاغاني ( الله يلوع جبودهم ) مادانيهم ..


مودتي يا حلوة ..



:patch_lov:
 
أعلى