[خذ] °•.♥.•° من ثيابك ومن عطرك شوي[واعمل]°•.♥.•°عليه كفاني في المماتي

رَحِيْلُ الْودّ

¬°•| مراقبة سابقة|•°¬
إنضم
2 نوفمبر 2008
المشاركات
1,633
الإقامة
عَابِرَةُ سَـبِيْل
الســلام عليكم ورحمة الله وبركاته ،،



[خذ] °•.♥.•° من ثيابك ومن عطرك شوي[واعمل]°•.♥.•°عليه كفاني في المماتي


هذي قصة آحداثها حقيقة وبدات في عام 2003 ومازالت الشخصيات موجودة إلى يومنا هذا ،،
بس الكاتبة أضافت بعض الاشياء من خيالها ،،

القصة لـ[صديقتي] ،أقصد من تأليفها وخذت منها الإذن بنشر القصة عندكم ،، والقصة طويلة ياريت انها تعجبكم


وتابعونا !!

والسلام عليكم ورحمة الله وبركاته
 
التعديل الأخير:

رَحِيْلُ الْودّ

¬°•| مراقبة سابقة|•°¬
إنضم
2 نوفمبر 2008
المشاركات
1,633
الإقامة
عَابِرَةُ سَـبِيْل
الشخصيات الاساسيه


عايله المرحووم
يدتهم صبحه عايشه وياهم
سعيد عمره 26 يشتغل فالجيش
راشد عمره 18 في صف ثالث ثانوي ادبي
حصه عمرها 22 تدرس فالجامعه
شما عمرها 16 سنه في ثاني ثانوي ادبي

عبدالله ولد عمهم هادف عمره 18 في صف اول ثاوني ( واايد يرسب )
وباجي الشخصيات بتظهر لكم فالقصه
 

رَحِيْلُ الْودّ

¬°•| مراقبة سابقة|•°¬
إنضم
2 نوفمبر 2008
المشاركات
1,633
الإقامة
عَابِرَةُ سَـبِيْل
الجزء الاول

في مدينة العين وفي جامعة الامارات وبالتحديد في مبنى 66

كانن حصة واربيعتها ميثه في كلاس المجتمع

حصة : ميثا مليت عادي افتح الاب
ميثه : وهذا الدكتور لي عيونه تقول كشافات بيطالعج لا اتحرينه يالس ع الكرسي يعني ما يشوف
حصة : لا تحاتين البنات لي جدامنا بيغطن علينا
ميثه : كيفج بس لو يودج نصور انا مايخصنيه
حصة : ميثوه والله مليت وراسي يعورنيه
ميثه : اسكتي نصور يطالعنا
حصة : منو نصور لا يكون اصغر عيالج
ميثه : كيفي دكتورنا وادلعه
ويقطع عليهم الدكتور رمستهم : ميثه قومي جاوبي
ميثا كانت مرتبكه وما تعرف الجواب كيف بتعرف واصلا هب مركزه
ميثاوهي تصاصر حصه ( ماعيله ياحصوه جي تخلين الدكتور ايودنيه خلي المحاظره تخلص وانا اروايج )
الدكتور : ايه ياميثه مش عاوزه تجاوبي
ميثه : لابجاوب بس ذكرنيه بالسؤال
وتجاوب ميثه وطبعا الجواب غلط
والدكتور محرج عليها لانها هب مركزه
\
/
\
وبعد المحاضرة طلعو كل البنات الا ميثا وحصة
حصه: ميثوه يلا عاد عن الغلاسة وانج عاد زعلانة
ميثه ما ترد على حصه
حصه :ميثوه والله صدق زعلانه
ميثه : ليش هذا يهمج
حصه :كيف ما يهمنيه وانا من لي غيرج
ميثه : (وهي بدت تعصب ) عندج اهلج
هني ميثه نست ان ام وابو متوفين قبل سنتين في حادث وهالشيء اثر على نفسيه حصه واااااااايد ، لدرجة ان حصه وقفت كورس كامل وما كانت تبا تكمل ف الجامعه وكانت ما تطلع من البيت ، وحصه بنت حساسه وطيبه واايد وتحب اهلها بشكل فضيع ، ماكانت تعرف ان في يوم من الايام ممكن تفقد واحد منهم ، حصه تمت ساكته وما ترمس سرحت شوي وانعاد عليها شريط ذكرياتها ويا امها وابوها ، تذكر امها وحنانها وبعد رحيل امها تحول عبء البيت كله عليها ، وابوها لي تعودت انه هو لي يوصلها الجامعه ، كانت واايد جريبه منه وكانت ما اطيع الا هي تعطيه الدوا بيدينها وعمرها ما نست موعد دواء ابوها كل يوم الساعه 9:30 بعد العشا ، وكيف يوم تشوف امها وابوها يسولفون ارباعه وهم مستانسين اتي واتغلس عليهم ومسميه ابوها عاشق البدو ،، ايام ولحظات ما تنسا ، نزلت دمعه من عينها

ميثوه حست بالذنب ليش تسوي جذي بربيعتها الغاليه ، كيف نست وزلت بلسانها هي ما صدقت يوم خلتها ترجع شرات قبل سوالف وضحك وكانت بالحيل مرحه لكن هذا قبل وفات والديها ، وميثه هي لي اقنعتها ترد الجامعه وبما ان حصوه شاطره وذكيه بتقدر تعوض لي طافها بسرعه
\
/
\


ميثه : حصوه انا اسفه وربي ما كان قصدي والله العظيم ما كان قصدي
حصه حاولت تبين لميثه ان مافيها شيء وانها عادي
ميثه : حصوه شو فيج
حصه : لا مافينيه شيء
ميثه : عيل ضحكي عسب اتاكد
حصه : مالي خاطر
ميثه : والله نسيت وانا آسفه
حصه : ليش تتاسفين الموت علينا حق وانا هب اول وحده يرحلون عنها اهلها ولا اخر وحده وانا لازم انسى
ميثه : انزين فديتج لا تزعلين وربي ما اروم على زعلج
حصه : هب زعلانه
ميثه : انزين خلينها نسير نفتر ف الجامعه شوي عقب ناكل لنا عيشه وباخذلج الحلاوه لي تحبنها
حصه : جنيه بيبي تقولين لي باخذلج حلاوه
ميثه : هي بيبي
حصه : والدكتور خلنا نسير نعتذر منه
ميثه : اوكي
سارن الرباعيه يتريقن وعقب لقن اربيعاتهن ويلسن يسولفون شوي عقب سارن يتمشن وهن يتمشن وقفن عن الثلاجات لي في 66 اونها ميثوه بتاخذ حلاوه حق حصوه وشافن الدكتور ناصر يمشي جان يسيرن يستسمحن منه وهم طالعين من مكاتب المدرسين يصيح تيلفون ميثوه
ميثه : الووووووو السلام عليكم
ام ميثه : وعليكم السلام والرحمه شحالج
ميثه : بخير يعلج الخير ، بس شو السالفه يا ست الحبايب
ام ميثه : أي سالفه
ميثه :لا بس غريبه اميه داقه لي وبعدنيه ما خلصت كل كلاساتي
ام ميثه : يعني ما اسال عنج
ميثه :فديت عيوزي لي تسال عنيه
ام ميثه : عيوز في عينج يلا عاد بسج دهان سير ، اخبرج ترانيه بسير بوظبي وباخذ الدريول وانتي ردي ويا بنات عمج
ميثه : اميه ليش بتسيرون بوظبي وبعدين ما ابا ارد ويا بنات عميه استحي
ام ميثه : بنسير ويا اختج امربي يابت ولد
ميثه : والله انزين تروينه بسير فياكم
ام ميثه : ماشيء وقت انا ارمسج من الدرب ، يلا فداعة الله مع السلامة
وتسكر في ويه ميثه وتمت ميثه محرجه واتحرطم ، ليش يسيرون وما يشلونيه ولا فوق كل هذا يبونيه ارد ويا بنات عميه شو هالموقف المحرج لي حطتنيه فيه اميه .
حصه : ميثوه شو بلاج اتحرطمين
ميثه : امايا تبانيه ارد ويا بنات عميه
حصه :ليش
ميثه : القوم كله سايرين بوظبي موزه مربي ويابت ولد وانا اخر من يعلم
حصه : مبروووووووك الف مبروك غديتي خاله
ميثه : الله يبارك فيج

\
/
\
ع الساعة 1 الظهر ميثوه وحصوه خلصن محاظراتهن ،، ميثوه تتصل على بنت عمها بس ما ترد عليها قالت يمكن تكون فالكلاس ، وبعدين ردت عليها ويوم ميثوه تخبرتها وين انتي قالت لها انها فالبيت ف استحت تقولها اطرش الدريول عسب ترد البيت ..

حصه : ميثوه خلاص انا بوصلج
ميثه : بس لا ،، لا ما ابا اعبل عليج
حصه : وابوي عليج شو تعبلين علي تونسينيه فالدرب
ميثه : حصووه استحي
حصه : اشو تستحين ،، تستحين من عبدالخالق حرام عليج هذا شيبتنا
ميثه : لا بس اخاف اااخرج
حصه : لا ما بتاخرينيه ،، ميثوه لو سمحتي عطينيه تيلفونج بدق حق الدريول اشوفه تحير ( حصوه ما عندها تيلفون لانه من الاشياء الممنوعه في عايلتهم )
ميثه : اندوج
\
/
\
الدريول : ألو .. مرخبا
حصه : وين انت جيه ما يت
الدريول :ماماه انا الخين في سوق مال سمج ما يقدر اجي الخين في واجد سامان مافي خلص
حصه : ومتى بتينه ان شاء الله
الدريول : ماما كبير في يقول بابا سعيد اجي يشيل انته
حصووه شافت موتر اخوها سعيد جان تسكر في ويه الدريول

حصه : يلا ميثوه
ميثه : وهي توايج من الدريشه ... ما احيده هذا موتركم
حصه :هيه هذا اخوي سعيد ياي يشلنيه فديته انا
ميثه : بس .. انتي ما قلتيليه ان اخوج بي يشلج
حصه : لانيه ما كنت اعرف .. يوم دقيت حق عبدالخالق قاليه ..
ميثه : حصووه استحي لا خلاص مابروح
حصه : اشو بعد تستحين
ميثه : استحي اركب ويا اخوج
حصه : ميثوه ويا هالراس مع منو بتردين بنت عمج وراحت والا تبين تباتبن فالجامعه
ميثه : لا ما ابا ابات اروحي ازيغ من بنات السكن
حصه : عيل يلا انقفضي جدامي ..
ميثه : يلا امري لله
\
/
\
واجهتكم صدفه وفيكم تولعت .. يالتني ما شفتكم في حياتي

ركبن في السيت الوراني عسب حصووه ما تبا تخلي اربيعتها تيلس روحها . وفي هالوقت كان سعيد يرمس ف التلفون وما حس ان حد ركب ويا حصووه وبعد ما سكر من التيلفون
سعيد : (وهو ما يدري ان اربيعة اخته راكبه وياهم لان ما حس فيهم يوم ركبن ) ساعه اتريا لين ما تشرف الانسه حصه
حصه :اسفه سعيد ما كان قصدي
حصه تصد صوب ميثوه وتصاصرها : يتنا هزبه من تحت راسج ساعه تفكرين لين ما تين تركبين
سعيد انتبه ان حد راكب ويا حصوه ف حب يستهبل شوي
سعيد : حصوه ليش راكبه ورى تعالي جدام والا تتحرينيه عبدالخالق
حصه : اربيعنيا وياي ممكن توصلنيه بيتهم
سعيد يقول في خاطره اكملت : فالج طيب بس ادلين وين البيت عسب توصفنيه
حصه : هيد ادله

\
/
\
 

رَحِيْلُ الْودّ

¬°•| مراقبة سابقة|•°¬
إنضم
2 نوفمبر 2008
المشاركات
1,633
الإقامة
عَابِرَةُ سَـبِيْل
\
/

سعيد طول الدرب و هو ساكت بس غصبا عنه .. هو مب متعود على الهدو بس احتراما لوجود ميثه غصبا عنه بينطم اما حصوه وميثه يالسات يتصاصرن طول الدرب .. سعيد كان شوي سرحان ف يوم وصلو عند الاشاره ما كان منتبه ف عطا بريك وطاحت غشوه ميثه وبدون قصد شافها من الجامه والتقت عيونه بعيونها سعيد ارتبك جان يوخي راسه ميثوه تغشت بسرعه ..سعيد وهو موخي يتخبر حصوه عن بيت ميثا وحصوه ادليه وصلو بيت ميثه نزلت ميثه وسارت صوب بيتهم سعيد كان يراقبها وهي نازله كانت عيونه تتبعها .. ما درى الا بحصه يايه تيلس حذاله .. كان هادي حتى بعد ما نزلت ميثه كان يفكر باللي شافه ويقول في خاطره ) معقوله انيه افكر في بنيه يا الله كيف كيف عيونها قدرت تاخذ فكري مني .. ليش اسمح لنفس انيه افكر في انسانه ما اعرف عنها أي شيء )
وتقطع عليه حصوه حبا افكاره بعد ما لاحظت سرحانه عنها


حصوه : سعود ليش عبدالخالق (تطري الدريول ) ما يا يشلنيه
سعيد : اصغر عيالج تنعتينيه بسعود
حصوه : اسفه بوعسكوور
سعيد : جي اباج .. عبدالخالق يدووه مطرشتنه سوق السمج تقول ماشيء سمج
حصوه: وانت ما سرت الدوام
سعيد : مداوم بس مترخص قلت بي اوطي راسي شوي بس اوامر السلطات العيا تقول انيه لازم أي اشلج من الجامعه
حصوه : فديت يدووه عني ماخلا منها
سعيد : ربي يخليها لنا
وكملو سوالفهم لين ما وصلو البيت
ويوم وصلو حصوه سلمت على يدتها وباستها ع راسها وسارت تبدل ملابسها وتصلي الظهر لانها ما صلت فالجامعه سعيد يلس حذال يدته
سعيد : شحالج يدووه ربج الا بخير
يدوه : بخير يعلك الخير .. يسدنيه اشوفكم حولي واجحل عيوني ابكم
سعيد :ربي يطول انا بعمرج يالغاليه
يدوه : ويخيكم لي يارب
سعيد: آآمين .. الا وين رشود بعده ما ضو وشمووه متى ترجع من المدرسه
يدوه : زين ذكرتنيه .. سعيد فديتك سير هات شمووه من المدرسه
سعيد : عبدالخالق ما رجع
يدوه : لابعده .. فديتك قم هات شمووه
سعيد: لا لا حرام عليج يدووه ..جان قلتيليه مره وحده خليتنيه اوصل الجامعه والحين تبنيه اسير مدرسه شمووه
يدووه : انزين وين المدرسه الا فرة حصاه
سعيد: ان شاء الله بنسير نيب شمووه بس يخوفي القاها يالسه ادق سوالف عاد توها فاجه المدرسه وشو يخليها تهدهم .
يدووه : سير فديتك عن تبطي عليها
سعيد: من عيوني يالغاليه
ويظهر سعيد من البيت وساير صوب مدرسه ( مريجب الثانويه ) اول ما وصل كانت الساعه ع 1:50 تقريبا بركن سيارته ويلس يتريا اخته وشغل FM كان ما يعرف ليش يفكر فيها .. ومر الوقت دون لا يحس بعمره .. وما يدري الا بواحد يدق عليه الجامه وصد صوبه وشاف الشرطي واقف ويخزه بعين وفز بسرعه من الموتر ..الشرطي : انت شو تسو اهني
سعيد (برتباك ) : يالس اتريا ختيه تظهر
الشرطي : وما لقيت غير هالمكان تبركن فيه موترك امره مجابل الباب اطالع بنات خلق الله .. صدق ما عندك مذهب ..
سعيد : انزين relax , relax , relax عطنيه فرصه امره خذتنيه بشراع وميداف
وفي هالوقت كانت شمووه واربيعاتها وافقات عند القلعه لي مجابله الباب عسب اول ما يشوفن مواترهن ويظهرن وشافن الشرطي وسعيد
وديمة : طالعن هالمغازلجي هههههههه صدق يستاهل
شمووه ( وياهم ع الخط ) : صدق ماعنده مذهب
مريوم : الله والله انه رحيم .. حرام عليكن احس انه مظلووم
شمووه : ابا اشوف هذا لي بتموتين عليه ..
وديمة : شوفي . .. اخافج انتي بعد اطيحين من طولج
صدت شمووه اطالع : اخوي سعيد
وبسرعه ومن غير ماحد يحس فيها تسحبت وسارت صوب اخوها

سعيد : هذي هي ختيه .. اسالها جانك هب مصدقنيه
الشرطي : هذا اخوج
شما : هيه .. والله عزيز انه اخوي
سعيد : سيري ركبي الموتر
الشرطي : هالمره عدت بس مره ثانيه لو لقيتك مبركن هني بيكون لي تصرف ثاني
سعيد : لامره ثانيه ولا ثالثه .. ما بتشوفنيه بعد هاليوم

وفي الموتر سعيد محرج ع شما
سعيد : ساعه لين ما تظهرين
شما : والله العظيم . ما ادري ش سمه
سعيد : بعد شو هاي ما تدرين
شما : لمعلمة اخرتنا وما طلعتنا بسرعه وصفنا واايد بعيد
سعيد : احيد اول اسبوع ما يدرسون
شما : من قالك ما يدرسون
سعيد من ركبت شما وهو فاتج لها تحقيق لانها تحيرت عليه وهي يالسه ادق سوالف ويا ربيعاتها
وصلو البيت وهو منهند حيله اروحه مترخص من الدوام ع اساس يرتاح بس يدته طرشته ايب البنات .. لو انه تام في الدوام اخير له من هالدوخه ..
\
/
\
اول ما حدرت شمووه الصاله سيده سارت صوب يدتها تلوي عليها وباستها ع راسها واسترخصت عسب تسير تبدل ملابسها

يدوه : سعيد
سعيد ما يرد عليها تعبان
يدوه ( وهي تهزه من جتفه ) سعيد
سعيد : يدووه شو فيج زيغتينيه
يدوه : انت ياللي شفيك ساعه ازقر عليك وانت ما تسمع قلت أي اشوف شوفيك
سعيد : مافينيه شيء فديتج .. بس متى بتحطون الغدى ابا اسير اوطي راسي
يدوه : حصووه والخدامه يحطنه على ما تنزل شميم من فوق
سعيد من سمع طاري حصووه تذكر اربيعتها ميثه .. كان يسال عمره منو هالمزيونه لي صوبتني من عيونها ؟؟ كيف رامت تخلينيه افكر فيها ؟؟
شمعنه هي من بد كل البنات انا شفت واايد بنات . بس هي غير عنهن هي شيختهن .. لازم اعرف هي بنت منو وشو اسمها بس لو سالت حصووه بتفهمنيه غلط .. ليش ما اسحب الرمسه من يدووه .. بس يدووه ما تخش شيء عن حصووه بتسير تخبرها .. ماشيء غير شمووه الساحره ..
شوي ويسمعو صوت حصووه تنادي يدووه عسب يتغدون
حصووه : يدووه فديتج الغدى جاهز
قام سعيد ومسك ايد يدووه عسب يساعدها ووصلها غرفة الطعام ويصد صوب حصوه وكانو كلهم قاعدين وجاهزين للغدى
سعيد : وانا مافي سعيد فديتك تعال تغدى
حصه :تراك تسمعنيه ازقر على يدووه تعال وياها
سعيد : الحين انا يحليلي الفقير المسكين محد يسويليه سالفه ولا كنيه رادنج من الجامعه ولا فوق هذا موصل اربيعتج وياج
راشد : ياحظك شفت المزاين لي فالجامعه
شما : سعيد من وصلت ويا حصه
سعيد ( كان يبا يعرف فقال في خاطره هذا احسن شيء تسويه شمووه اليوم ) : ما اعرف منو
وبدو ياكلو بس شمووه ما طاعت تسكت الا تبا تعرف منو لي وصلها سعيد ويا حصووه
شما : حصه منو لي كانت راده معاج من الجامعه
حصه : اربيعتيا
راشد : ندري اربيعتج .. بس منو من ربيعاتج .. يعني شو اسمها
حصه : وانت شلك
راشد :ابا اركز في غداي واكل ع راحتيه وهذي ( وهو ياشر ع شمووه ) بتسوي لنا حشره وبتيلس تحن ع روسنا لين ما تعرف يابوج خبريها وفكي بقاج
وترمس يدتهم بعد الصمت الطويل : حصه فديتج بنت منو لي وصلتيها وياج
حصه : بنت محمد بن سيف
يدتهم : والنعم فيهم
سعيد يقول في خاطره ( هاي مستحيل ترمس عن حد من اربيعاتها جدامنا ) وينتبه ع شمووه وهي تقول : قولي من الصبح انها ميثووه
سعيد : شموه خلاص نبا ناكل ما يسد لي مسوتنه لنا جدام المدرسه
راشد : شو مسويه الشيخة شما
شما : رشوود ممكن تكرمنا بسكوتك
حصه : ويا هالراس توها فاجه المدرسه وتسوين لنا مشاكل ويا البنات
سعيد: ياليت هذا لي مسوتنه
راشد : عيل شو مسويه
شما ( ما تبا راشد يعرف تدريبه بيذلها ودووم بييلس يعلق عليها ) : رشود الفضول ما يمدحونه
راشد : سكتي يا مسودة الويه المفروض ما ترمسين
يدتهم : صخو خلو سعيد يخبرنا السالفه

وخبرهم سعيد السالفه وطول وقت الغدا رشود يعلق على شمووه امره ما خلاها في حالها ، وبعد الغدا راحو كلهم يرقدوون ما عدا شمووه سارت تيلس ع النت عسب تكمل القصه لي تقراها ..

/
\
 
التعديل الأخير:

رَحِيْلُ الْودّ

¬°•| مراقبة سابقة|•°¬
إنضم
2 نوفمبر 2008
المشاركات
1,633
الإقامة
عَابِرَةُ سَـبِيْل
::
::
::


وفي مكان ثاني من مدينه العين كانت ميثا يالسه في الصاله ترمس امها ع التيلفون وتتحرطم على امها لان مافي حد فالبيت يهتم في خوانها غيرها وبعد حوار طويل اقتنعت ميثا انها تيلس فالبيت وانها بتروح هي وخواتها ( وديمة وشيخة ) يوم الاربعاء بعد ما يرجعون من المدرسه بيسيرن بوظبي وبيباتن عند ختهن لمربي

] ملاحظة : وديمة وشيخة يدرسن في نفس مدرسه شموه ، وديمة في ثاني ثانوي علمي وشيخة بعدها في اول ثانوي [
سكرت ميثا السماعه وسارت تربع فوق تخبر خواتها
بطلت حجرة وديمة وشافتها يالسه تدرس
ميثا : صدق انج متفيجة من الحين تدرسين
وديمة : شو اسوي فيكم الساعه 3 ولين الحين ما غرفتوا الغدى :: بعدين لازم اراجع اول باول
ميثا : ربي يوفقج .. علووم شمووه
وديمة : يحليلها كانت تبانيه ادش وياها ادبي .. تصدقين ما اشوفها الا في الفسحة وما اشبع منها وبعدين بنات الصف لي وياي كلهن مصريات وما ارووم اشاغب شرات يوم كنت ويا شمووه
ميثا : احسن لج عسب تدرسين .. اوووه نسيتنيه شو كنت ابا اقول
وقبل لا تخلص ميثا رمستها تحدر عليهم شيخة وتقول
شيخة : شو تسووون
ميثا : غربل الله بليسج زيغتينه
شيخة : احسن .. جيه تدعين علي
وديمة : ميثووه طبيها .. خلها تولي .. وخبرينيه شو كنتي تبين تقولين ..
شيخة : هيه هيه شو كنتوا تقولون
ميثا : بس صخن بخبركن السالفة
شيخة : هيه شو السالفه
ميثا : بنسير عند مووزووه بوظبي وبنبات عندها
وديمة : والله .. انزين ليش
ميثا : جيه ما تعروفن موزه مربي ويابت ولد
شيخة : كيف وليش ما قلتوليه
عقب ما استوعبن ( شيخة ووديمة ) الموضوع قامن يناقزن ويصارخن ..
وديمة : وانا اقول ليش مطرشين البشكاره ويا دريول عميه
شيخة : تصدقن ما حسيت ان اميه محد اتحسبها سايره العزبة ويا ابويه
ميثووه : لا غناتي اميه ما تريت ابويه راحت بوظبي بروحها ويا الدريول وعقب ابويه لحقها ..
شيخة : وطبعن نحن بنتم ارواحنا في البيت واميه بتبات عند موزان
ميثا : ما تخبرتها .. .. بعدين بكلمها انا بسير اوطي راسي خلو البشكاره تحطي لكم غدا
وديمة : وانتي ما تبين تغدين
ميثا : من قال انيه اترياكم عسب اتغدى .. انا هني من الساعه 1 تقريبا وتغديت وترست الكرشه ..
وديمة : يعني خونتي فينا وتغديتي
ميثا : ش سوي كنت مقهووره ومعصبه حتى تضاربت ويا سيف عقب ما هان علي زقرته وتغدينا رباعه
شيخة من سمعت طاري سيف ثارت من مكانها وتتخبر ميثووه : اعترفي شو سويتي فيه قبل لا اضربج
ميثا : لا لا ما سويت فيه شيء وطلعت تربع خاري الغرفه

ملاحضة : سيف هو توام شيخة كلا يييلسون مع بعض وعاد معرووف عن شيخة الدفاشه ويوم بتضرب تضرب من الخاطر .. ماخذه اطباع اخوها سيف ..

\

انتهى الجزء الأول ،، انتظرو الجزء الثاني :)
 

♦L♦

زعيم المبدعين
إنضم
27 أغسطس 2008
المشاركات
4,828
الإقامة
.♣In The Sadness♣.
ماشاء الله عليج أختي رحيل الود
.
الصراحة القصة عجيييييبة
.
أنتضر الجزء الثاني بفارغ الصبر خخخخ^^
.
تستاهلين مني النجوم الخمس
.
نظير للتميز
.
السموحة^^
 

السَعيدي

<font color="#ff0000">¬°•| إداري سابق|•°¬</span></
إنضم
21 سبتمبر 2007
المشاركات
9,912
الإقامة
توام


عيبتني القصة
مسليه واحداثها مرتبه

وطريقة بداية الحدث مميزه

عيبتني اول ما سعيد شاف ميثا
هع هع

ما شاء اله عليها ربيعتج كتاباتها مميزه

الف شكر لج رحيل على طرح القصه علينا
وعاد خبريني يوم بتحطي الجزء الثاني

اترياج

 

دانة غزر

صاحبة الروح الطيّبة
إنضم
15 أبريل 2008
المشاركات
20,153
الإقامة
البـــــــــــريمي
الله القصه وااااااااايد حلوووووووووووووه

هذا التاااااااليف ولالالالالا بلالالالالالالالاش


صراحه قصه طر ونتريا الجزء اليديد


لا تبطين علينا والله يعطيج العااااااااافيه
 

حشيمة القلب

<font color="#DA0202"><b> ¬°•| إدارية سابقة |•°¬<
إنضم
29 يوليو 2008
المشاركات
24,489
العمر
37
الإقامة
°• مِنْ رَحِمْ الحُزنْ أتيتْ .. وسأبقىْ ..! °•
عيبتني القصه وايد وبصراحه مافيها حيله ابد اربيعتج ذكرتني بعبير الورد تكتب شرات هالقصص ^^

وانا من النوع احب هالقصص واتابعهم

عيبني خبال وفرفشة شمووه


وياعيني ع اللي راح فيها من اول نظره خخخخخ


بس قلبي عورني ع حصووه يوم اهلها متوفين



يالله دبوووه نتريى ا لجزء الثاني





 

آسمحڷې اخۈْڼڪ

¬°•| عضو فعّال |•°¬
إنضم
20 نوفمبر 2008
المشاركات
126
الإقامة
"فقلب العشاق "
وايد حلوة القصة ..


نتريا الجزء الثاني ..

^^
 

رَحِيْلُ الْودّ

¬°•| مراقبة سابقة|•°¬
إنضم
2 نوفمبر 2008
المشاركات
1,633
الإقامة
عَابِرَةُ سَـبِيْل
في بيت المرحووم

الساعة 5:30 العصر .. كانت شمووه ويا حصووه يالسات في حديقة البيت حصه تلعب في كرسيها ترده على ورى من يلست ما قرت في بقعه وشمووه تسولف وتخبرها عن معلماتها اليداد
شما :حصه ابا اسير العين مول
حصه : سعيد ما بيطيع يشلنا .. بيقول ترين لين يوم الخميس بشلكم الصبح
شما : بنقول حق يدوه تقنعه
حصه : حتى يدووه ما بطيع
شما : انزين بنشل ويانا رشوود
حصه : هذا بكبره بيسوي لنا سالفه .. ما بيخلينا نعرف نتشرى كل دقيقه بيقول تغشو وامشو جذي ولا تسيرن هناك ..
وفجأه يظهر رشوود من البيت ويمشي لين ما وصل باب الدروازة العود وطلع بس ما حس فيهم ..
حصه : الحمدلله يوم ما شافنا ولا سمعنا نرمس عنه
شما : خلاص حصووه نروح دوون لا يعرفون
حصه من سمعت رمسه شما طاحت على وراها وهي اصلا من الصبح يالسه تلعب بالكرسي .. وحليلها تشمخت في ايدها .. شمووه ربعت تساعدها وهي تضحك
حصه : جيه تضحكين .. ضحكة بليا ضرووس ان شاء الله
شما : والله شكلج كان يضحك .. حسافه طاف المشهد على رشوود
حصه : تبين تضحكين رشوود علي عسب يزخها علي سنه .. خلاص ما بشلج المول
شما : آآسفه حصه اخر مره ..
حصه : ما ابا سيري روحج
شما : حصه اسفه خلاص
حصه : اوكي اوكي بس عن تصيحين علينا .. بنروح بس شو نقولهم
شما : بنقول بنسير المكتبه
حصه : الشيخة شما مزهبه الاعذار
شما : صدق ابا اغراض من المكتبه
حصه : شو تبين من المكتبه .. ما خلصتي اغراضج
شما : هيه خلصت بس باقي جلاد ملون حق كتبيه
حصه : بس ما ينفع نسير المول والمكتبه بنتحير .. انتي شو تبين من المول
شما : ابا قميص قميصيه مخالف
حصه : ما ينفع اختاري يا المكتبه يا المول
شما : اوكيه خلاص بنسير المول
حصه : والجلاد
شما : باخذه من تهاني الخليج
حصه : انزين متى نسير
شما : ياليت لو الحين عسب نرجع قبل لا يرجع سعيد
حصه : بس ماشيء باقي عن صلاة المغرب .. احسن نصلي وخلاف نسير
شما : خلاص ترتوب
حدرن داخل البيت عسب يخبرن يدووه و حصووه سارت اطهر الجرح وتحطي لصقه وشمووه سارت صوب حجرة يدتها دقت الباب
شما : يدووه راقده
يدووه : لا فديتج تعالي
شما : شحالج يدووه ربج الا بخير
يدووه : بخير يعلج الخير .. خلصتي واجباتج
شما : من زمان ( خريط ما جاست الشنطة )
يدووه : شاطره بنيتي جي اباج عسب تظهرين الاولى عليهم
شما : ان شاء الله
شما : يدوووه ممكن طلب
يدووه : آآمري يالغاليه
شما : ابا اسير المكتبه
يدووه : فديتج تصبري شوي من يظوي سعيد بخليه يشلج
شما : بس سعيد بيرجع من المزرعه تعبان وما بيتبرضليه
يدووه : انزين راشد وينه
شما : ظهر من شوي ما ادل وين سار
يدووه : انزين ما ترومين تتصبرين لين باجر
شما : لا ما ارووم لازم احل الواجب
شما : انزين يدووه بشل ويايه البشكاره وحصه وااوعدج ما ابطي
يدووه : يمكن حصووه عندها دراسه
شما : لا لا ما عندها
يدووه : سيري تخبريها يمكن تبا تدرس
شما تتقرب من صوب يدتها وتقول : يدووه اقولج تخبرتها وقالت ما عندها شيء
يدووه : سيرو بس عن تبطوون و تحملو على عماركم
شما وهي تبوس راس يدتها : ان شاء الله يا الغاليه
::

::

::

وبعد صلاة المغرب :: شمووه لابسه عباتها ويالسه تتحرطم على حصه لانها تحيرت
شما : حصووه بسرعه ولبسي غشوه غليضه
حصه : انزين بس ليش
شما : يالذكيه يمكن نحصل حد نعرفه
حصه : هيه صدقج .. اقول شمووه
شما : لبيه
حصه : شو رايج نلبس كارلا ( بشكارتهم ) عباه عسب محد يعرفنا
شما : هيه احسن .. دامنا قالصينها ورانا بيعرفونا منها .. حصووه بعد بنلبسها غشوه
حصه : انزين انزين يلا تحيرنا نبا نرد قبل صلاة العشا
شما : ترى انتي لي ماخرتنيه هب انا... انا من الصبح جاهزه
حصه : اوكيه يلا نزلنا
\
/
\
وهم ظاهرين من البيت يدخل موتر عمهم هادف
وصلو المول حصوه توصي عبدالخالق عسب ما يروح مكان لانهم ما بيبطوون .. وهبطو المول شمووه كانت حاشره كارلا كل شوي تقولها تتغشا


حصه : شمووه خلاص عن الحشره تراها قالت بتتغشا
شما : انزين نسير تهاني الخليج خلينا نخلص
حصه : انزين تنقي بسرعه ما نبا نبطي
شما : لا تحاتين باخذ بسرعه .. لانيه ابا ارد احل والواجب
حصه وشما كانن يمشن بسرعه وكارلا ما تروم تلحق عليهن ::: وصلن تهاني الخليج وحصووه كل دقيقه تستعيل شمووه
حصه :
ها خلصتي والا بعدج
شما : هيه خلصت :: بس خبرينه شو رايج في هذا الجلاد
حصه : وااايد حلو بتاخذينه
شما : هيه باخذه ( وانتبهت على كارلا انها هب متغشيه ) حصووه قولي حق هالبغام تتغشا
حصه : يحليلها شدراها شقى يتغشون
تشرن وظهرن من تهاني الخليج وتمن يحاوطن عسب شمووه تبا تاخذ قميص .. و كان 3 شباب يمشون جدامهن وشالين البقعة بصواتهم وضحكهم .. شمووه تير عباة حصه
حصه : شمووه بلاج لقيتي المحل
شما : شوفي منو جدامنا
حصه : غربلات بليسج يا شمووه .. كلا منج كيف طاوعتج وسمعت رمستج
شما : حصه شو انسوي .. اخاف شافنا
حصة : ربي يستر
::

::

::
هزركم شما وحصه منو شافو فالموول ؟؟
وسعيد .. هل يحب ميثا او انه معجب ابها ؟
وراشد .. امره ما يخصه في حد !!
شما .. ليش ما اداني المدرسه ؟
وحصه .. بعدها تذكر ابوها ؟؟
هذا لي بتعرفونه فالجزء اليااي

\
/
\
 
التعديل الأخير:

رَحِيْلُ الْودّ

¬°•| مراقبة سابقة|•°¬
إنضم
2 نوفمبر 2008
المشاركات
1,633
الإقامة
عَابِرَةُ سَـبِيْل
\
/
\
الجزء الثاني

وفي بيت المرحووم


هادف : اميه وينهم ما اشوف حد منهم
يدووه : فديتك سعيد جريب بيضوي ورشوود ما ادله سار وما خطف يسلم علي والبنات سارن المكتبه
هادف : هيييه .. اقول اميه ما بتين تيلسين ويانا كمن يوم ؟؟
يدووه : لا يالغالي .. ما ارووم اهد عيال اخوك ارواحهم
هادف : انزين اميه .. شو رايج نسير نقيل فالمزرعة يوم الخميس
يدووه : انزين بس يوم بيون العيال شاورهم
هادف : اميه
يدووه : مستوي شرى اليهال .. كل دقيقه قلت اميه
هادف : وهو يضحك .. خلاص بسكت .. بس مب جنيه عفت ومحد يابليه فواله
يدووه : وابوي عليك .. جيه انت هب غريب .. ازقر على وحده من البشكارات وهي بتحطي لك كل لي تباه ..
هادف : خلاص زعلتينيه منج


::

::

في العين موول

حصه وشما كانن مرتبكات وهب عارفات شو بيسون .. وكان اقرب محل لهن لايف ستايل وحدرنه ..


كارلا : ماما حصه انا يسوف بابا راشد ...
شمه: سكتي الله ينطبج .. وجيه عاقه الغشوه ؟.. تغشي ..
كارلا : شين ماماه .. وحطت الغشوه على راسها ..
حصه وهي اطالع من حدر المحل : شمووه ترى راشد حدر المحل ..
شمة : ربي يستر .. شكله اليوم ما بيعدي على خير

كانن يحاولن بي طريقه بس عسب رشوود ما يشوفهن ونخشن في مكان بين الشمووع ويلسن يراقبن يترين راشد يظهر من المحل ..
\
/
\

شمة : حصه تراهم ياين صوبنا
حصة : ياويل حالي بننذبح اليوم
شمة : لالا سارو صوب الدباديب .. حصه اشوف رشود يتنقى .. شكلهم بياخذون هديه .. هزرج حق من
حصة : صدق متفيجة وما عندج سالفه ..
شمة : انزين هزرج حق من هالهديه
حصة : احر ما عندي ابرد ما عندج
وشافن رشوود واربيعه سايرين صوب الكونتر عسب يحاسبون وبعد ما خلصو ظهرو من المحل
حصه : الحمدلله .. يلا شمووه خلينا نرد البيت
شمة : لحظه لحظه في دبدووب عيبنيه .. بروح اخذه
حصة : ( وهي بدت تعصب ) لا بنرد البيت
شمة : بس حرام واايد عايبنيه ( ويوم شافت نظرت حصه لي بادي عليها العصبيه ) قالت خلاص يلا نرد البيت ..
حصة ما هانت عليها شمووه جان تقول : يلا سيري خذي الدبدووب .. ترانا تحيرنا ع البيت .. واكيد يدووه تحاتينا ...

شمووه استانست وسارت وخذت شرات الدبدوب لي خذاه اربيع رشوود .. وبعدين ظهرو من المول وردو البيت
يوم وصلو البيت لقوا موتر اخوهم سعيد وموتر عمهم هادف .. وقبل لا يهبطون الصالة عطو كارلا الاكياس عسب ما يعرفون انهم سارو المول وقالو لها تحطهم في غرفة الغسيل ..
يالسات يوايقن من عند باب الصالة


شمة : حصيص سعيد وعميه هادف فالصالة ويدووه وياهم ..
حصة : انزين انزين .. خلاص نحن كنا فالمكتبة ..
شمة : خلاص ترتوب
ويحدرن
حصة + شمة : السلام عليكم
الكل : وعليكم السلام والرحمه
شمووه راحت تخاشم عمها ولصقه فيه وما طاعت تخوز عنه

شمة : عميه وين البنات ما يبتهم ..
هادف : ان شاء الله بتشوفينهم يوم الخميس فالمزرعة
شمة : صدق بنسير المزرعة .. احس بنستانس
سعيد : شمووه عن الهذرة الزايدة .. عورتي راس عمج
هادف : سعيد برايها .. خلها .. هذربتها حلوه
ويلسو يسولفون لين وقت العشا . . وتعشو وعقب سار عمهم وسعيد ظهر من البيت .. حصوه وشميم ع التيلفزيون ويدووه سارت ترقد ..

\
/
\

حصة : شميم سيري هاتي اغراضج من عند كارلا عقب هي بترقد وبتسكر البيبان
شمة : هيه صدقج ما جلت كتبيه .. وعنديه واجب رياضيات ما حليته ..ونسيت اخذليه دفتر بياني ..
حصة : الساعه جريب 11:30 وتوج تذكرين الواجب بس الحوامة ما نسيتيها
شمة : خلاص حصيص تعرفينيه ما اداني الدراسه اخيرليه اسير ايب الاكياس

وظهرت شموه من الصاله وسارت صوب غرفة الغسيل وهي تمشي في الحوش لقت راشد داش البيت ..

راشد : شموه وين سايره
شما : بسم الله زيغتنيه
راشد : هههههه ههههه شمووه تخاف
شما : جيه انا هب انسانه عسب ما ازيغ والا يمكن عديمة مشاعر ( وتنتبه على كيس في ايد راشد ) رشود شو يايب وياك

راشد : عشاي ..طال عمرج
شما : اشوف اشوف .. من كوخ الدياي اكيد شرتيليه وياك ..
راشد : لا هذا اربيعي شارليه العشا
شما : من من ربعك راعي الدبدوب
راشد : شو ..
شما : اقصد ربيعك دبدوب
راشد : شموه .. سعيد داخل البيت .. ويدووه راقده والا بعدها ..
شما : يدوووه يالسه في الصاله تترياك .. بس انت عطانيه العشا وانا بقول لها انك راقد فوق
راشد : عادي خليها تهزبنيه وتضربنيه بعد .. بس مستحيل اتنازل عن عشاي حقج ..
شما : وين الاخوة
راشد : ( وهو يالس يمشي ومجبل صوب البيت ) دام السالفه فيها اكل ماشيء اخوه
شما : راشد
راشد : شو .. قلت لج ما بعطيج
شما : ما ابا عشاك .. بس باتخبرك عندك دفتر بياني
راشد : هيه ..شعنه
شما : عطنيه ورقه وحده منه
راشد : جيه انتي ما عندج
شما : لا ما عندية
راشد : انزين سيري حجرتيه بتلاقينه فالسير شليه ويوم بسج رديه
شما : مشكووره يابو سنيده .. اقولك ترى يدووه راقده وسعيد محد
راشد : ( وهو مخلي عمره جنه يعرف ) اصلن اعرف بس ماخذنج على قد عقلج ( ويربع قبل لا ترد عليه )

شما : صدق انه هرم

وتسير صوب غرفة الغسيل عسب تشل اغراضها \\ حدرت الصاله وشافت حصه تاشر لها لان رشود فالمطبخ التحظيري \\ شميم من الاتباك سارت تحت الدري بس يوم ظهرت شافها رشود ..

راشد : اعوذ بالله .. سكنيه شو تسوين تحت الدري ...
شما : ( ما عرفت ترد ) قالت بكلمات متقطعه ) كنت ادوور جوتي الرياضة
راشد : خذتي ورقة والا بعدج
شما : لا بعدنيه .. انت سير هاتلي اخاف اخرب اغراضك ..
راشد : ( وهو يطالع شمووه ) حصووه امنتج الله ما تخلين هذي تسك شيء من عشاي
شما : اصلن انا بسير ايب كتابي الرياضيات عسب احل الواجب ..
راشد : يكون احسن ( وطلع فوق )
شميم شلت الاكياس بسرعه وسارت وفرتهن في حجرتها وشلت شنطتها .. وسارت صوب حجرة رشوود .
.
شما : رشوود
راشد : انتي جيه ما ادقين الباب قبل لا تحدرين
شما : عادي عادي .. رشود ممكن تحل لي الواجب
راشد : وانتي شو خانتج
شما : والله صدق ما فهمت على المعلمة
راشد : انتي لو كنتي داشه علمي شو بتسوين
شما : حزتها بنتحر
راشد : انزين عشاي برد .. بتعشا عقب يصير خير واندوج الدفتر
شما : قلنا بس ورقه وحده
راشد : كله واصل من صوبج
وهدها تتحرطم روحها ونزل تحت نزلت شموه وراه وهي اطالعه بنص عين
راشد :
( وهو يتعشا ) شموه تبين مافنيه بطني يعورنيه
شما : لا مشكوور تعشيت قبلك
وشوي الا يحدر عليهم سعيد
سعيد : السلام عليكم
الكل : وعليكم السلام ...
سعيد : جيه لين الحين هب راقدين
حصه : باجر الاربعاء وما عنديه دووام
سعيد : وانت يا راشد وينك ما يت تتعشا فيانا ..
راشد : كنت عند عبدالله ..
شما : كان فالعين مول
حصه : وانتي شدراج
شما : مجرد توقع
سعيد : صدق كنت فالمول
راشد : هيه :: صدق ان اختكم ساحرة
شما : ( وهي تصاصر حصه ) حصوه اخاف يشك فيا قبل شوي قايله له اربيعك راعي الدبدوب والحين قلت له كنت فالعين موول ..
حصه : خلاص خلج عادي وهو ما بيعرف
::

::

::


يوم الاربعاء الفير

يدتهم صبحة ميوده عصا ويالسه توعيهم حق صلاة الفير .. الكل نش الا رشوود ( مدمن رقاد )


يدوه : راشد قم احينا بيقيمنها الصلاه
راشد : ان شاء الله ( ويمط البرنوص ويرد يرقد )
يدووه : بتقوم والا اخلي هالعصا تلعب ع ظهرك .. وتمط البرنوص وتشيطه ..
راشد : آآآآه .. يدووه جيه تضربين
يدووه : دواك .. حصوه لي ما اطيع تنش نشت قبلك
راشد نش وهو مجبل صوب الحمام عسب يتيدد جان يظرب بالطاوله وطاحن كتبه
راشد هو يطالع يدووه : استغفر الله .. ودش الحمام
سعيد كان يترياه في الصاله وتوه راشد ينزل ويسمعون صوت المؤذن يقيم الصلاه
سعيد : لو المسيد هب حذال البيت شو كنت بتسو
راشد : آسف سعيد خلنا نلحق ع الصلاة
\
/
\
 

كيـِـآטּ

¬°•| مشرفة سابقة|•°¬
إنضم
7 مارس 2008
المشاركات
2,284
الإقامة
ليس في مخيلت أحد
رائع

أحب أقرا هالنوعية من القصص
me%20(17).gif
.... بس من زمان


...أنقطعت عن قراته.... لاني وايد أتاثر
me%20(47).gif




رحيل الود:


سلمت يمناك غاليتي على القصة الرائعة... ونترقب

القادم..... وتحية خاصة حق ربيعتج
me%20(16).gif
....
 
أعلى