مجروحة المشاعر
¬°•| عضــو مــهــم|•°¬
}من تهمه جروحي وانا فيني من الجروح اطعون{
البارت الاول:
اول رواية لي ما راح ابداء بتعريف الشخصيات راح تعرفونها وانتوا تقرون الرواية
اتصل عليها و هي بدون ما تنتبه ان الرقم غريب من كثر ما هي منذمجه في الرواية الي تقراها ردت عليه
مهرة: الوووو
...:هلا بالزين والي جابه
هلا بالصوت لحل حيابه
وبراعيه عسى يبقى مع احبابه
مهرة تشوف الرقم غريب: منو معي؟
...:معاك قلب يشيل حبك
وده بس بحضنه يلمك
مهرة: شو تبي؟
...:ابي لا غبت تذكرني
ولا مت تدفني
مهرة:اووووف.. شوووو فيك؟
...:ما فيني غير مشاعر
ودها تحتويك
تلمك يوم تلقاك
ودايم تداريك
مهرة: اقول روح لاه انت واحد فاضي
...:وين ما تبي امشي على كيفك
بشرط يدي ما تفارقها يدينك
مهرة عصبت: منو حضرتك؟
...:عاشق مغرم ولهان
مات بحبك وصابه جنان
سحرته عيونك من زمان
مهرة وهي تتافف :خلاص عاد مصختها تراك
....: لا هب خلاص ترى باقي لك بيتين
بيت تسكنه متى تبي والثاني تراك سكنته من زمان ..(تسكر التلفون في ويهه و هي معصبة و رجعت تقراء الرواية مالها)
امها تنادي عليها : مهرة...مهرة
مهرة منذمجة في الرواية و اختها هنادي تدخل من وراها و تمسكها من شعرها
مهرة: ويعه ...كسر يكسر ايدج ..
هنادي: امي تباج ..
مهرة: ماشي اسلوب ..ما تشوفيني منذمجة في الرواية
هنادي: اسكتي يا ام اسلوب ...ما تسمعين امي تباج
مهرة: انتي روحي لها انا ما فاضية
هنادي: اوكى انتي ما فاضية بوصل لها هالكلام
مهرة: ومرة ثانية دق الباب قبل ما ادخلين غرفتي
هنادي طلعت لسانها عليها و طلعت
مهرة: ياهله هالبنت ما راح تكبر ما كانها في اخر سنة في المدرسة
تذكرت ايام المدرسة حنت لذيك الايام ...من زمان ما شافت ربيعاتها ..ما تواصلت وياهم من فترة ...معقولة؟؟كم سنة مرة احين؟؟ 2...3...4 سنوات مرت يااااه كيف الزمن يمشي وين ذيك الايام؟؟ اشتقت لها ...صج ما كنت احب كل البنات بس بعدني اشتاق لايام المدرسة..وصل لها مسج الي ضيع عليها افكارها
شافت المسج تضايقت و مسحت المسج بدون ما ترد
(...مالك فالبشر مثيل
واحد باخلاقه اصيل
يفوق وصفه المستحيل
لو يطوف العالم طواف شراته بالحسن ما يجي ولا له مثيل...)
نترك بطلة قصتنا تكمل الرواية مالها ونروح نشوف امها و اختها
هنادي : امي مهرة تقولج ما فاضية
ام علي: هاي البنت كله ما فاضية...شو جالسة تسوي؟
هنادي: طبعا كالعادة قاعدة على اللاب
ام علي و هي تشرب القهوة مالها: الله يهديها هالبنت ...من راحت السكن رجعت رديه ما مثل اول
هنادي: امي انا من اخلص دراسة مابى اروح ادرس بعيد ابى ادرس قريب من بيتنا
ام علي: الله يوفقج يا بنتي ... بس شو تبين تصيرين؟
هنادي: ابى اصير دكتورة
ام علي: ان شاء الله بنتي تصيرين اكبر دكتورة و احسن دكتورة في البلاد
هنادي: امين امي...تبين شي امي ؟؟
ام علي: كنت ابى اختج بس الله يهديها
هنادي : انا بسير اذاكر امي
ام علي: الله يوفقج يا بنتي
تروح هنادي في غرفتها تذاكر
يدخل علي عند امه و هو معصب
علي: السلام عليكم
ام علي: و عليكم السلام ورحمة الله شو فيك ولدي؟
علي: ماشي امي
ام علي: معصب و تقول ماشي
علي: امي الله يخليج مالي خلج راسي يعورني و هو يخلي راسه على الكنبة
ام علي: ابوك وينه؟؟
علي: مادري انا طلعت من الدوام و جيت هنا
ام علي: علي ولدي ابوك قالك شي؟
علي: امي انا ما ولده ليش يعاملني كذا؟ ليش يميز سلطان وانا لا ؟؟ ما انا ولده العود؟ شو فيني انا؟يحط يده على ويهه
ام علي اطبطب على ظهر ولدها: علي ابوك يحبك و يقسى عليك مرات بس تحمله ترى هو ابوك
علي: انا ما كنت ابى اشتغل وياه بس اشتغل عشانج و يذلني قدام الموظفين ...كاني موظف عنده ما ولده
ام علي حزنت على حالة ولدها: ما عليه يا ولدي الله بيجازيك خير
علي قام بيسير غرفته: انا بسير ارقد امي
ام علي: صبر بحط لك غداء
علي: مابي امي وعوني حق الصلاة
ام علي: ان شاء الله ولدي
يطلع علي يروح غرفته ام علي فى خاطرها ودها تسوي شي يسعد ولدها
في بيت ثاني او بالاحرى شقة على قد حالهم فيها غرفة للتوائم و غرفة البنت و غرفة امهم و ابوهم و الصالة والمطبخ
حمد و خالد عمرهم 10 سنوات توام و قاعدين يتضاربون تدخل امهم جواهر و هي شايله بنتها ريم الي عمرها سنتين
جواهر: حمد خالد عيب تتضاربون انتوا اخوان
خالد: امي هذا حمد كله يغش في اللعبه
حمد: امي هو يغش ..كل ما اغلبه ما يعجبه ويقول انا اغش
جواهر : الله يهديكم يا عيال..ترى ما بخذكم معي
خالد يترك حمد: وين بنسير؟
جواهر: هههههههاي... ما بقول لكم
حمد: وين بنسير امي؟
جواهر: اول قولوا لي انكم ما راح تتضاربون مرة ثانية بعدين بخبركم
حمد و خالد: ما راح نتضارب مرة ثانية
جواهر : خلوها مفأجاة احسن ...يالله قوموا تجهزوا
حمد: انا بلبس قميص مال فريق برشلونه
خالد: سير العب انته انا بلبس مال ريال مدريد
جواهر:ههههه...خلوا عنكم البسوا ثياب المكان الي بنسيره ما يبى قمصان
حمد: مكان يبى له ثياب ...امممم... عرفته ..و يركض يروح يلبس ثيابه
خالد: تعال قولي وين ؟...حمد؟؟يروح يركض وراه
جواهر: ههههه .. الله يخليكم لي يا رب ..قاعدة تلاعب ريم لحد ما يتجهزون الاولاد...اتصل عليها خليفة زوجها مسمتنه (نبض القلب)يتصل بك ابتسمت و ردت عليه
جواهر: السلام عليكم
خليفة: وعليكم السلام ورحمة الله ...هاااا جاهزين
جواهر: يعني بس العيال بعدهم شوي ..
خليفة: ليش ما قلتي لهم؟
جواهر: قلت اسويها لهم مفأجاة
خليفة: هههههه... وانتي دوم كذا
جواهر: اقول حبيبي.
خليفة: امري يا عيون حبيبي
جواهر:انت وين ؟
خليفة : ف قلبج
جواهر: اووووه ...خلوف يالله عاد انت وين
خليفة: اه يا قلب و روح خلوف ...وين تبيني اكون انا بكون
جواهر: اتمنى لو انك في البيت
يدخل خليفة البيت قبل ما تقول و هي ما حست فيه
خليفة: شوفي وراج
جواهر تشوف وراها و تتفأجى ان خليفه يحضنها من وراء بعد ما خلت ريم على الكنبة ريم مستانسة على امها وابوها على بالها ابوها يلاعب امها ...جواهر ما قالت ولا كلمة نزلت التلفون من يدها و هي مغمضه عيونها ما مصدقه ان خليفة الشخص الي تحبه هو نفسه صار زوجها و هو نفسه الي حاضننها الحين تمنت ان هالحلم ما يروح عنها ما تبى تصحى منه ابد ...بس انتبهت لما خليفة كان قاعدة يكلمها
خليفة: جواهر...جواهر..شو فيج حبيبتي خفتي؟
جواهر:....خل..خليفة (الدموع في عيونها)
خليفة نزلها على الكنبة وقعد عدالها: عيون خليفة شو فيج عيوني ؟؟ليش هالدموع؟؟ من مضايقنج؟؟
جواهر:....(قاعدة وماسكتنه و تصيح في حضنه مثل طفلة صغيرة)
خليفة: ارجوج يا جواهر قطعتي قلبي ...انا ضايقتج بشي؟
جواهر تهز راسها بـــ لا
خليفة: ليش هالدموع عيل؟
جواهر: بعدني ما مصدقه انك زوجي...خايفة يكون حلم و اصحى منه..
خليفة: يا عمري يا جواهر هالكثر تحبيني
جواهر:ما تتخيل شكثر احبك
خليفة: لا انتي ما ف حلم انا الي عايش في احلى حلم دام انتي زوجتي ...ومابى اصحى منه للابد
جواهر: معقولة احين من 12 سنة نحن متزوجين؟
خليفة: باقي اسبوعين و نكمل 12 سنة
جواهر: ما شاء الله عليك حتى الاسابيع حاسبهم؟
خليفة: انا ما يهمني شي في هاي الدنيا كثرج انتي يا جواهر
جواهر: و عيالي؟
خليفة: هم عيالي بعد والا نسيتي
جواهر: من شفتك نسيت كل شي
خليفة: يكون صرتي عجوز؟
جواهر تضربه على صدره ضربة خفيفة تعاتبه: انا عجوووووز؟ انزين وانت شيبة
خليفة: اه صدري ...(يتصنع الالم)
جواهر وقفت متروعه: اسفه حبيبي عورتك؟؟اسفه والله ما كنت اقصد
خليفة يضحك:هههههههه...اسف والله ما كنت اقصد
جواهر عصبت و وقفت بتروح عنه مسكها من ايدها : وين رايحه؟
جواهر: اترك ايدي
خليفة: واذا ما تركتها ؟
جواهر: خلوف اترك ايدي
خليفة: عيون خلوف ...حياتي لا تزعلين مني والله ما اقصد
جواهر: ليش تسوي فيني كذا؟
خليفة: لاني احبج
جواهر استحت و بعدها تبى تروح: خلاص احين خلني اروح
خليفة: وين بتروحين؟
جواهر: بروح اشوف العيال ..وبصلح الكحال الي راح
خليفة : يعني ما زعلانه مني؟
جواهر: وانا اقدر ازعل منك؟
خليفة: اذا ما زعلانه عطيني بوسة
جواهر: مابي
خليفة: عيل ما بخليج تروحي ...
جواهر:اوكى بس غمض عيونك
خليفة: لازم؟
جواهر: اذا تبى البوسة؟
خليفة غمض عيونه:هااااا
جواهر تعطيه بوسة على خدة وتهد يدها و تركض عنه ما تبى تسمع شو بيقول..مع ان خاطرها تعرف شو بيقول.. وقفت وراء باب الصالة عشان تسمع
خليفة بعد ما استوعب الامر فتح عيونه و حط يده مكان البوسة كانه ما يباها تروح: اه يا حبي لج يا جواهر والله احبج...خذ ريم في حضنه و عطاها بوسة و قعد يلاعبها
انت وانا قلب انقسم نصين
مستحيل يعيش واحد دون الثاني....))
جواهر استانست بعد ما سمعت الي تباه راحت تشوف حمد و خالد و كل واحد كاشخ حمد لابس ثوب لونه بني و طالع عليه مرة حلو و خالد لابس ثوب لونه اسود و هاللون مخلنه كشخه ((انا يعجبني هاللون اكثر))
جواهر قاعدة تشوف عيالها و تحمد الله في خاطرها ان الله عطاها هالاولاد الله يخليهم لي : ليش ما لبستوا نفس اللون؟
خالد: امي هذاك يوم نحن صغار نلبس نفس الشي
حمد: انا ماحب اقلد حد
خالد: شو قصدك؟
حمد: ما قصدي شي
جواهر: وانتو كله تتضاربون؟
خالد: امي انا عاقل هو الياهل
حمد يمسك خالد يبى يضربه:عن الغلط
جواهر: خلاص ما بتروحون ويانا بنروح انا و ابوكم و ريم
حمد: خلاص امي توبة ..ابوي جاء؟
جواهر: هيه ابوكم جاء
خالد يعدل ثوبه وهو يبى يروح عند ابوه: انا رايح اسلم على ابوي
حمد:وانا بعد
جواهر: الله يخليكم لي يا عيال
...تروح تشوفهم...و تلقى حمد و خالد قاعدين كل واح في صوب و ابوهم في الوسط و هو ماسك ريم ...طلعت تلفونها و صورتهم كم صورة عجبتها لامت عائلتها و بعدين طلعوا كلهم راحوا السيارة الاولاد يسالون ابوهم و ين بيروحون و هو ما رضى يقول لهم قعدوا هادين و المسجل مشغل على سورة البقرة في الاذاعة عم السكون في الجو و الهدوء و الطمانينة .
في بيت بو جاسم
قاعدين يتغدون كلها العائلة ما ناقصنهم الا اخوهم الي صار له فترة متغيرة وما يرجع البيت مثل قبل و اخوهم الثاني كله برع البيت
ام جاسم: كيف كان الدوام بو جاسم؟
ابو جاسم: الحمد لله كان زين
عهود: امي فلفل وايد ف الاكل
ام جاسم: اكلي وانتي ساكته
مروان: ووووييييه سكتوها
ابو جاسم: وانت اسكت بعد
عهود تشوف اخوها بنظرات انتصار ان ابوها وقف وياها و سكت اخوها في خاطرها تقول شي بس سكتت
في وحدة من الصوب الثاني ما كلت شي و قاعدة سرحانه ..
ام جاسم: خلود شو فيج ما كليتي شي؟
خلود: هااا امي ؟؟لا ما فيني شي بس عشان الامتحانات و قاعدة احاتي
ابو جاسم: لا تحاتين وانا ابوج ...و كلي احين
خلود: ان شاء الله ابوي..قعدت تاكل غصب عنها و هي مالها نفس ...امتحانات الثانوية شاغله بالها و سالفة صديقتها ما عارفه كيف تساعدها ..
((..ما ينفع الندم يا صاح
عيش دنيتك وانت مرتاح
محد ب هالزمن يستاهل
ولو شفت دمعه طاح..))
خلود ما كانت الشخص الوحيد الي سرحان على الغداء اخوها معتز بعد صج انه قاعد مع اهله بس باله مكان ثاني مكان بعيد عنهم مكان فيه ....وحدة يتمنى لو يعرف منو هي
ابو جاسم: جاسم وينه؟
ام جاسم ارتبكت ما عارفه شو تقول: هااا جاسم... قال انه بيتغداء مع صديقه
ابو جاسم: كل يوم يتغداء مع حد ما عنده بيت ؟؟
ام جاسم: ترى ربيعه عازمنه ما يصير يرد العزيمة
ابو جاسم: باكر يتغداء ويانا مفهوم؟
ام جاسم: ان شاء الله
عهود: امي عيل حمود بعده ما يا ؟
ام جاسم معصبه حدها و عهود تزيدها: مادري عنه اسكتي وخلينا ناكل
عهود تسب نفسها ليش سالت لو انها كانت ساكته احسن لها ..طالعت صوب اخوها و عرفت انه في عيونه بتلقى كلام و شافته مستانس حده
خلصوا اكلهم بهدوء و لحد تكلم و كل واحد راح غرفته عهود و خلود في غرفة وحدة و معتز راح غرفته يفكر و مروان قاعد مع امه و ابوه يشرب شاي و يشوف التلفزيون بو جاسم خلص و راح غرفته يرقد مروان يشوف ابوه بعد ما راح طالع امه
مروان: امي روحي وراه ليش قاعدة؟
ام جاسم: قاعدة على راسك انا
مروان: شفت ابوي يعطيج نظرات ..يعني تعالي وراي بعد ما اروح..ما قدر يقول وانا هنا
ام جاسم تضرب مروان: عيب يا ولد استحى على ويهك
مروان: امي انا ما صغير اعرف السوالف
ام جاسم: دامك ما صغير شوف لك بنت و تزوج والا انا بختار لك عمرك وصل 26 وبعدك ما متزوج والي كبرك عندهم 5 عيال والي يشوف حركاتك يقول ياهل ..قامت تروح غرفتها
مروان : عيل العيوز مستحيه تروح مع الشيبة؟
ام جاسم طالعت على مروان و عطته نظرة خلته يسكت ...قعد يطالعها لحد ما راحت..قال في خاطره حركات هالشواب و قعد يشوف التلفزيون..و يشرب شاي جات خلود تجلس عنده و تشرب شاي
مروان: انتي شو ماخذ علمي والا ادبي؟
خلود كانت سرحانه:هاااا..انا ادبي(انا احين اخر سنة و احين جاي يسالني ادبي والا علمي؟)
مروان: خلود شو فيج؟
خلود: ما فيني شي ..بس خايفة امتحانات اخر السنة قريبة
مروان: لا تحاتين ..اي نسبة تجيبينها توديج الكلية عادي
خلود: ان شاء الله خير ...رجعت سرحت و هي تفكر في حل لمشلكة صديقتها ..الله يهديج يا نورة كان لازم تكلمينه يعني ...من يقدريساعدني يا ربي؟؟
مروان: خلود متأكدة ان ما فيج شي؟
خلود: بصراحه(فكرت انها تقول حق اخوها يمكن يساعده بعدين غيرت رايها )...امممم ماشي خلاص... قامت تبى تروح غرفتها .
مروان: اذا بغيتي شي قولي لي لا تستحي...و قولي حق عهود تستاهل..
راحت خلود فوق و قعد مروان يفكر بكلام امه ...صج هو كمل 26 و ما تزوج لحد احين والي كبره عندهم عيال ...يالله يا امي زرعتي في بالي فكرة الزواج بس ما عندي حد في بالي ...اوووف من هاي الي بتسعدني؟؟كيف بيكون شكلها؟؟قطع عليه افكاره دخول جاسم اخوه و ثيابه متبهدله و شعره مبعثر و الغترة على ايده
جاسم: السلام عليكم
مروان: و عليكم السلام
جاسم: شي غداء؟
مروان: مادري ..وانت ليش كل يوم تتأخر عن البيت؟
جاسم: على ما اعتقد انا اخوك العود ما انت الي تحاسبني متى ارجع البيت
مروان: انزين احين محد قالك شي..اخوي العود على عيني و على رأسي من فوق
جاسم: اووووف منك اروح اشوف لي غداء احسن من مقابل ويهك...يطلع عن مروان و راح المطبخ
مروان: روح ...روح الله وياك...اخوي العود وكذا ...الله يهديك يا اخوي كله منها هي الي سوت فيك كذا الله يسامحها ..رجع يشوف التلفزيون و يشرب شاي ...
نهاية البارت الاول ..ترقبوا البارت الثاني
