{ طولت بآلي وخذهآ آليوم لك شكراً , / تأليفي !

الحالة
مغلق و غير مفتوح للمزيد من الردود.

أم حور

¬°•| عضــو شرف |•°¬
إنضم
26 فبراير 2011
المشاركات
502
العمر
34
الإقامة
SoHaR
عقب مرور أسبوعين

" ملجة هند وزياد "
يوم الخميس
الساعة 8:00 مساءاً



رجعوا الكل من ألمانيا .. أهل ذياب وفوز وحتى موزة وغيث .. تقرر عمل الملجة ف بيتهم هند .. والملجة كانت عائلية يعني اللي حاضرين أهل هند وصديقاتها وأهل زياد !!

كانت الساعة 8 ونص .. لما وصلت فوز لبيتهم هند وقفت سيارتها ونزلت بتدش البيت بس اللي وقفها كان أقوى من إنها تستوعبه !!

علي وشوق اللي ميوده بنتها ينزلون م السيارة ف نفس اللحظة اللي كانت فوز تمشي فيها صوبهم بتدش البيت !! وقفت وهي مو مصدجة اللي قاعد يصير ! علي اللي يرسل لها ويتصل فيها يترجاها تسامحه رجع لحرمته !! وين كلامه إنه يبيها وإنه ما راح يخليها .. وين الفرصة اللي عطاها إياها تفكر فيها .. وهي اللي راجعة وحاطة أمل كبير إن اللي بينهم يتصلح وإنها تسامحه .. معقولة يا علي !!

ليش جيه تسوي فيني ؟!! كم صفعة عطيتني من يوم ما عرفتك لليوم !! خلاص كل شي انتهى بالنسبة لك ! ما قدرت تصبر لين ما أنسى صدمة زواجك إلا تصدمني بهالشي ! وأنا وين من كل ها ! بس لأني ما رديت ؟؟ بس لأني كنت أبيك تحس بالجرح اللي جرحتني إياه !!

دشت شوق داخل البيت .. وسار علي صوب الميلس ! بس تذكر إنه نسى فونه ورجع صوب السيارة .. انتبه ع البنت اللي رايحة صوب الحديقة ومنزله راسها .. ما قدر يعرف منو بس تصرفها خلاه يتبعها لين ما وصلت نص الحديقة وشافت لها كرسي ويلست فيه !!

علي: فوز !!!!!!

رفعت فوز راسها .. وشافت علي واقف جدامها بمسافة !! نشت من مكانها بتروح بس علي يودها !!

فوز: هد إيدي يالوصخ !!
علي: فوز شفيج ؟؟
فوز: ما يخصك .. خوز عني !!
توقع علي إنها شافته ويا شوق .. وما عرف شو يسوي أو شو يقول بالضبط !!

علي: فوز خليني أفهمج
فوز: شو تفهمني ..؟؟ ما مداك من أسبوعين تقول لي أحبج وأبيج وما أتخيل حياتي بدونج .. واللي أشوفه أحين شو !!؟
علي: إنتي حتى ما كلفتي ع روحج تردين علي !! أنا غلطت واعترفت واعتذرت ألف مرة بس إنتي ما قدرتي تعطيني فرصة أو تعطين نفسج حتى !!
فوز: أنا فعلاً ندمانة .. بس مو لأني ما عطيتك فرصة !! لأني كنت بحرم غيرك من فرصة يستاهلها !!
علي: شو قصدج ؟!!

طلعت فوز تليفونها جدام علي اللي مستغرب هي شو تبا تسوي !! دقت رقم ذياب واتصلت فيه , وهي تمسح دموعها !!

فوز: ذياب
ذياب: منو فوز ؟! بلاج صاير شي ؟!
فوز: لا مو صاير شي .. بس حبيت أقولك إني موافقة أتزوجك وتقدر باجر تيي ترمس أبويه !!
ذياب: والله ؟!! قولي إن هالكلام صدج ؟؟ قولي إنج ما تتغشمرين ؟؟
فوز: صدج يا ذياب .. مو إنت عطيتني فرصة لملجة هند ..
ذياب: إيه ..
فوز: خلاص أنا أبيك وموافقة عليك !
ذياب: إنتي اليوم خليتيني أسعد انسان فهالدنيا .. من غير ما تقولين باجر إن شاء الله نيي .. عقب بتصل ف الوالد وأقوله !
فوز: أوكي .. بخليك أحينه
ذياب: أوكي حبي .. ديري بالج ع روحج !
فوز: وإنت بعد

علي: إنتي شو قاعدة تسوين ؟!!
فوز: أشوف حياتي اللي ضاعت وأنا انتظرك .. أشوف نصيبي اللي وقفته عشانك !
علي: إنتي ينيتي ؟؟ منو ها ؟!
فوز: ها ذياب أخو هند رفيجتي .. يحبني ويموت فيني ولو أقول له أبي عيونك ما راح يبخل علي فيها .. ويدري عن كل تفاصيل حياتي ويدري بعد إني أحبك وترجاني وايد إني أنساك وأوافق عليه بس أنا كنت غبية وقسيت عليه وأهنته وايد ومع ذلك ما تخلى عني !!
علي: إنتي تدمرين حياتج بهالطريقة !؟
فوز: حياتي إنت وأمثالك اللي دمروها !
علي: فوز بسوي اللي تبيه بس لا توافقين عليه !! أنا أحبج وشاريج !!
فوز: اسكت واللي يعافيك .. خل حبك لك .. ما يلزمني .. ومشكور وايد يا علي لأنك فعلاً قدرت تخليني أكرهك !!

مشت فوز عنه ويودها من إيدها !! , وما حست إلا الإيد الثانية تنمد عليه !!
فوز: احترم نفسك ! أنا مو أختك ولا حليلتك تيودني بهالطريقة وهاي آخر مرة تسمح لنفسك تسوي جيه !!

دشت فوز داخل بعد ما مسحت كل دموعها وخلت علي فصدمة وفموقف لا يحسد عليه !! هو يدري إنه وايد أذاها وضايجها بس يحبها .. الشي اللي الريال مستحيل يتقبله إن اللي يحبها تروح لواحد ثاني .. حتى لو كان عنده غيرها 2 و3 و4 !!

اللي ما قدرت تعرفه فوز .. علي ليش هنيه !!؟ شو علاقته بأهل هند ؟؟ وتفاجأت أول ما دشت وشافت ميرة موجودة .. سلمت عليها بحرارة ليش إنها صار لها زمان مو شايفتنها ..

ميرة: فواز .. يمممه شو تسوين هنيه ؟؟
فوز: إنتي شو تسوين هنيه يالسخيفة ؟؟
ميرة: هههههه العروس ماخذه ولد عمي !!
فوز: شو !!؟؟ زياد ولد عمج ؟؟
ميرة: هيه ما تدرين ؟؟
فوز: لا والله .. أول مرة أدري بهالشي !!
ميرة: مو هو جان كله برع حتى ما إيي صوبنا عسب جيه ما صارت فرصة أرمسج عنه
فوز: سبحان الله .. صدج الدنيا صغيرة !! وشو أخبارج بعد ؟؟
ميرة: أخباري .. فيه نونو بالطريج
فوز: قولي والله ؟؟
ميرة: والله ..
فوز: عيل أكيد سعيد مستانس !!؟
ميرة: إلا طاير م الوناسة
فوز: بالمبارك فديتج والله يقومج بالسلامة
ميرة: الله يبارك فيج ..
فوز: باركي حق سعيد عني وسلمي عليه وايد
ميرة: وإنتي شو تسوين هنيه ؟؟ لا تقولين العروس من هلج ؟؟
فوز: لا مو من هلي .. هي رفيجتي تعرفت عليها بألمانيا !!
ميرة: ما شاء الله .. وشخبارج بعد ؟؟
فوز: أخباري طيبة .. جريب بتوصلج إن شاء الله !
ميرة: شو؟ فيه مشروع زواج يعني ؟!
فوز: إن شاء الله !
ميرة: منو سعيد الحظ ها ؟!
فوز: ذياب أخو العروس !
ميرة: والله !!
فوز: هيه
ميرة: بالمبارك غناتي وربي تستاهلين !!
فوز: تسلمين لي !

شافت فوز ع شوق اللي يالسة حذال ميرة وميودة بنتها .. لفتت انتباهها البنت اللي تشبه علي وايد .. وتذكرت ان اسمها فوز ع اسمها .. كانت وايد مقهورة بس حاولت ما تبين هالشي جدام حد .. خصوصاً جدام شوق اللي سرقت منها أحلامها !

فوز: إنتي شوق ؟!!
شوق: هيه
فوز: آنتبهت عليج وإنتي نازلة ويا علي .. سوري نسيت أبارك لج ليش إنكم رديتوا حق بعض !!
شوق: ما عليه .. كل شي صار بسرعة !
فوز: الله يهنيكم !!
شوق: تسلمين ! وإنتي بعد مبروك
فوز: ع شو ؟!
شوق: ع خطوبتج من ذياب !
فوز: الله يبارك فيج !
ميرة: فواز ما قلتيلي شلون جيه طيحتي الريال ؟؟
فوز: تدرين بعد اللي طاحوا وايدين بس الواحد ما يدري وين نصيبه
ميرة: ههههههههه يمه ع الخقة !!
فوز: خلينا شو ورانا !
ميرة: شعليج .. صج والله جم واحد جان يبيج هههه
فوز: ميروووه لا تتمصخرين .. شسوي دام الله خلقني حلوة
ميرة: فديتج .. وربي إنج حلوة بكل شي !!
فوز: الله لا يحرمني منج يا قلبي
ميرة: ولا منج !!

فهاللحظة دق فون شوق .. وجان علي يتصل فيها !! ما نشت م مكانها لأن فوز كانت عليها وردت عليه !

شوق: هلا علاوي
علي: أنا رايح .. خبري ميرة وسعيد يوصلونج !
شوق: ليش عاد .. وين بتروح ؟
علي: ظهر لي شغل ضروري !!
شوق: شو هالشغل .. مو ع أساس عقب الملجة نروح نتعشى برع ؟
علي: مو وقته أحين يا شوق .. ياللا سلام !

بند علي عن شوق بدون لا يعطيها فرصة تسأله شو هالشغل اللي ظهر فجأة .. وكانت حاسة إن الموضوع يخص فوز .. أكيد شافها أو عرف إنها هنيه وتضايج !!

فوز كانت تسمع المحادثة .. رغم حبها لعلي بس استانست وايد إنه تضايج ويمكن اللي صار يخليه يحس بالجروح اللي سببها لها من يوم ما عرفته !!

الساعة 11 ونص باركت فوز حق هند وزياد اللي دش عقب يلبسها الدبلة واستأذنت إنها تروح ليش إن الوقت متأخر وهي يايه بروحها .. وفي الطريق اتصل فيها علي .. ما ردت عليه ورجع يتصل مرة 2 و3 .. وهي مطنشة لين ما حرق جهازها وردت !!

فوز: نعم !؟ شعندك داق !!؟
علي: لازم نرمس !
فوز: اللي بينا انتهى يا علي .. متى تقتنع بهالشي ؟؟
علي: فوز لازم أشوفج .. ترا والله أييج للبيت واللي يصير يصير !!
فوز: لا تين يا علي
علي: إنتي وين ؟!!
فوز: أحين راجعة البيت !!
علي: بشوفج !
فوز: إنت مو صاحي .. الساعة 12 إلا ربع وين تشوفني هالحزة !
علي: فوز إحنا لازم نرمس !!
فوز: حتى لو رمسنا يا علي ما راح يتغير شي !
علي: أنا اللي أقرر هالشي !
فوز: حلوة هاي بصراحة .. تصدج أساساً مو منك مني أنا اللي رديت ع اتصالك !

بندت فوز الفون ف ويهه م الضيج اللي فيها .. شو يتحرا نفسه ! عشان أحبه بذل نفسي له .. لا والله !

رد يتصل فيها مرة 2 بس ما ردت عليه وعقبها حطت الفون سايلنت .. وأول ما وصلت البيت جان علي موجود جدام بيتهم بسيارته !!

فوز .. مستحيل هالإنسان شو يبا مني !! ها أكيد مو ف وعيه .. شلون يتصرف هالتصرفات الغبية !

انتبهت ع فونها يدق وجان ذياب متصل فيها يطمن وصلت البيت أو لا !!

فوز: هلا ذياب
ذياب: هلا غناتي .. وينج فيه ؟
فوز: أحين جدام البيت !
ذياب: دقيت أطمن إذا وصلتي وإلا لسه
فوز: وصلت لا تحاتي
ذياب: شفيه صوتج ؟
فوز: ولا شي
ذياب: فوز قوليلي إذا فيج شي .. مو تخبين علي !
فوز وهي تبلع ريقها: علي هنيه !
ذياب: وين يعني هنيه ؟؟
فوز: جدام بيتنا !
ذياب: شو يبا !
فوز: درا عن موضوع الخطوبة ويبي يرمسني !
ذياب: ها مينون ؟؟ فهالحزة ياي يبي يرمسج ! أنا أحين ياي كلها 5 دقايق وبكون عندج
فوز: لا ذياب واللي يسلمك مابي مشاكل
ذياب: يعني شلون أخليه يضايجج وأسكت !
فوز: برمسه وبقوله يروح !
ذياب: وإذا ما رضى يروح ؟
فوز: بحاول أقنعه بقوله أي شي !
ذياب: خليني أيي .. ما راح يخليج ف حالج إلا إذا ييت أوقفه عند حده
فوز: عشان خاطري يا ذياب
ذياب: أوكي يا فوز بس عشان خاطرج .. وها اللي اسمه علي حسابه وياي بعدين
فوز: أوكي ببند أحين
ذياب: اوك فديتج .. ودقي علي طمنيني أول ما تدشين دارج
فوز: إن شاء الله

دقت فوز على علي .. اللي شافها وهي موقفة سيارتها جريب البيت .. وطبعاً رد عليها بالمرة !

فوز: ما تفهمني إنت شتبي مني ؟
علي: ليش سويتي اللي سويتيه ؟!
فوز: أنا وإلا إنت !!؟ شوف علي لا تلعب علي أنا دور المظلوم لأن هالدور أبداً ما يناسبك ! لهنيه وبس آسمحلي بس بصراحة
It’s too much ..
علي: أنا أحبج .. تفهمين وإلا ما تفهمين .. أحبج !!
فوز: وأنا ما أحبك .. واذا عندك ذرة كرامة .. خلني ف حالي وابعد عن طريقي
علي: بهالسهولة !؟
فوز: هيه نعم ..
علي: ليش تدوسين ع قلبج بهالطريقة وإنتي عارفة إنج مستحيل تتقبلين تعيشين مع واحد غيري !
فوز: كاهو إنت سويتها وعشت مع وحده غيري ! الحياة تمشي لا تظن إنها بتوقف عندك ! أنا لقيت آنسان يبديني ع روحه , لقيت الإنسان اللي قبل لا أقول أبي .. أشوف اللي أبيه جدامي .. وذليته وايد وجرحته وكسرته ومع ذلك تمسك فيني .. وأصر إنه يكون وياي ! وإنت .. تبيني أرد أفتح الملفات الجديمة عسب تشوف إنت شو سويت لي !!؟ خلنا نحسب الصدمات اللي عطيتني أياها من يوم ما عرفتك ! أول صدمة تدز لي رسالة إنك تبيني وبعدها تدز رسالة ثانية إنك هونت ! ثاني صدمة تحبني وترمس وحده ثانية ! ثالث صدمة قبل ملجتنا بيوم أكتشف إنك كنت متزوج وعندك بنت .. وآخر صدمة تقول لي للحين أبيج وإنت رجعت حرمتك لذمتك !! وأنا وين من كل ها .. ما عندي شغلة غير أسامح وأغفر وأرد لك بس لأني أحبك !! أحين خذها مني يا علي .. سويت كل اللي سويته وضحيت لأني أحبك .. بس اليوم أنا مو مستعدة أضحي لأنك فعلاً طحت من عيني ومن قلبي وما عدت أحس بأي شيء صوبك !! صرت بالنسبة لي ولا شيء !!
علي: ما راح تقدرين تعيشين وياه .. حتى لو خذاج ما راح تستانسين وياه يا فوز .. تدرين ليش ؟؟ لأنج تحبيني أنا .. ما راح تتهنين ف حياتج .. راح يبقى خيالي وطيفي يحاصرج .. راح تشوفيني أنا ف كل مكان .. لا تتهورين وتدمرين حياتج بإيدج يا فوز .. فكري قبل لا توافقين ع ذياب .. فكري مليون مرة .. قبل لا تندمين ع قرارج ها .. مو تحطمين حياتج عسب تنتقمين مني !!
فوز: قلتها بنفسك .. حياتي ! وأنا حرة فيها إنت مالك خص ومو إنت تقرر إذا كنت بستانس ويا ذياب أو لا !! واحين لو سمحت روح م هنيه ولا عاد أبي أشوفك ولا أشوف رقمك ف تليفوني !!
علي: تقدرين تمسحيني م حياتج .. وتمسحين رقمي بس ما تقدرين تمسحين الذكريات اللي امبينا !
فوز: ما كان امبينا غير الوجع يا علي ! ومحد يبي يتذكر مواجعه !!
علي: يعني أنا صرت وجع بالنسبة لج ؟؟
فوز: وأكثر !!
علي: أوكي يا فوز .. اللي تشوفينه بس لازم تعرفين إنج الإنسانة الوحيدة اللي حبيتها من قلبي .. وإن كل اللي سويته إنتي تتحملين جزء منه .. لأنه لولاج ما كنت سويته ! طول عمرج تكابرين .. وهاي هي النتيجة !!
فوز: فمان الله !!

بندت فوز الفون .. بدون لا تقول شيء زيادة .. وكملت طريقها بتدش البيت .. علي جان واقف يشوف عليها والدمعة تنزل م عينه .. ودمعتها هي نزلت وهي تشوف عليه ومن عقبها دشت بسيارتها داخل البيت !!

أول ما وصلت دارها .. اتصل فيها ذياب مرة 2 .. وردت عليه ! كانت واقفة عند الدريشة وهي ترمس ذياب وعيونها ع سيارة علي اللي للحين جدام بيتهم واقفة ولا تحركت !!

ذياب: طمنيني شو صار ؟!
فوز: ولا شي .. اتصلت فيه وتكلمنا وخلاص
ذياب: شو يعني خلاص ؟!
فوز: يعني خلاص ما أعتقد عقب الكلام اللي قلت له راح يفكر يضايجني !
ذياب: متأكدة !!؟
فوز: يب
ذياب: وراح م جدام بيتكم !؟
فوز بتردد: لا
ذياب: تبين أدق للشرطة !!
فوز: شهالرمسة يا ذياب .. مهما جان علي يبقى واحد م الأهل
ذياب: خلاص حبي زين لا تتضايجين .. بس والله قاهرني

كانت ترمس ذياب .. بس عقلها وقلبها وآحسآسهآ ودموعها كلها كانت ملك علي .. خلاص اليوم انتهى كل شي ممكن يربطها فيه .. حتى فكرة إنها تسامحه ما عاد لها أي مجال عقب اللي صار .. هو شاف حياته واختار يرد لشوق ولبنته .. وهي لازم تقرر بين إنها ترتبط في ذياب .. أو توقف حياتها عند علي .. اللي خذلها وايد .. واللي جرحها ضعف جرح محمد لها !

ذياب: فوز !!
فوز: هاه .. هلا
ذياب: وين رحتي ؟!
فوز: وياك .. بخليك أحين بنام
ذياب: طيب .. بنكون باجر ع تواصل وبخبرج متى بنيي
فوز: إن شاء الله , تصبح ع خير
ذياب: وإنتي من هله غلاي

بندت فوز عن ذياب .. وهي تحس إنها تسرعت بقرارها .. رغم إنها تدري إن ذياب يحبها ويبيها بس خايفة إن بتهورها تقضي على ذياب !!


عقب مرور 6 شهور
" إجـــآزة آلصيــــــف "


آسكوتلنـــدآ – آلفنــدق
يوم السبت
الساعة 5:00 عصراً


قبل أسبوع جان زفاف فوز وذياب .. وسافروا على طول شهر العسل لأن عقبها راح تبدا فوز آخر كورس لها في الجامعة .. ورغم حب ذياب لفوز ومعاملته اللي أكثر من ممتازة لها .. للحين ما قادرة تنسى علي .. تدري إنه مو زين تفكر فريال وهي على ذمة واحد ثاني .. تدري إن هالشي حرام بس ما تقدر تمنع نفسها وذياب يدري إنها للحين تحب علي !!

دشت الشقة وصكرت الباب بالقو .. مو قادرة توصف شعورها لحظتها .. تعصب أو تبجي أو تضحك .. فرت جنطتها ع القنفة وراحت صوب البلكونة تنتظر ذياب إيي ويشرح لها اللي قاعد يصير !!

واقفة جدام البلكونة وتشوف الناس برع .. مع إنه صيف بس الجو جان بارد وايد .. تذكرت اللي صار بينها وبين ذياب قبل جم يوم وهي واقفة نفس الوقفة بنفس المكان ..

جان واقف وراها ويشوف عليها وهي سرحانة وشكلها جان بعيد وبعيد وايد لدرجة إنها ما انتبهت على ذياب اللي نزل ياخذ لهم الغدا لمن رجع ..

ذياب: فووز ,,
ذياب: حبيبي .. فووزي حياتي

لفت فوز على ذياب عقب ما انتبهت عليه .. وبدل لا تزقره باسمه ..
فوز بابتسامة: هلا علاوي ييت !!؟

ذياب انتبه .. بس فوز للحين مو منتبهه إنها زقرت ريلها باسم واحد ثاني .. ومو حاسة بهالشي .. ع عكس ذياب اللي حس بالموت لأن هالشي معناته إن فوز للحين تفكر بعلي !!

فوز: شو صاير ؟؟ ليش سكتت؟!
ذياب: كاهو الغدا .. تغدي إنتي أنا مالي نفس بدش أحط راسي شوي
فوز: ذياب شفيك !؟
ذياب: قلت لج ما فيني شي .. تعبان وأبي أرتاح !!
فوز: مو ع أساس عقب الغدا نطلع .. شفيك تعبان ؟

ما رد عليها ودش الغرفة ياخذ دواه ليش إنه حس بتعب .. وفهاللحظة دشت فوز عليه واستغربت من الحبوب اللي ياخذها ذياب يومياً وعلى فترات .. ومستغربة أكثر من تصرفه ليش جيه يعاملها !!؟

فوز: ذياب شو الحبوب اللي كل يوم تاخذها ؟؟
ذياب: ليش نسيتي إن أنا عندي التهابات !؟
فوز: لا ما نسيت .. بس خبري إن الإلتهاب راح خلاص يعني هالحبوب مالها داعي !
ذياب: بلا إلها داعي ..
فوز بشك : إنت متأكد إن هالحبوب حق الإلتهاب !
ذياب: هيه !
فوز: وليش إحساسي يقولي شي ثاني !!
ذياب: فوز شفيج ؟؟ يعني معقولة آخذ حبوب جيه بس لأني أبي آخذ !! لا تنسين إني دكتور
فوز: أوكي آسفة .. ما يحتاي تصارخ جيه وبلاها هالمعاملة شسويت أنا عسب تعاملني بهالطريقة !!
ذياب: تبين تعرفين شو سويتي ؟!! أوكي أنا بقولج .. ما صار لنا أسبوع متزوجين .. ولما أدش على زوجتي حبيبتي أحصلها سرحانة .. ولما أزقرها ترد علي باسم واحد ثاني !! لا وفوق ها مو منتبهه ع نفسها !
فوز: أنا ؟؟ باسم منو زقرتك !؟
ذياب: علي !

أول ما سمعت فوز اسم علي نزلت دمعتها .. مو لأنه ذكرها فيه بس حست نفسها جرحت ذياب بهالشي .. يلست ع الشبرية وحطت إيدها ع ويهها !

راح ذياب صوبها .. تقرب منها شال إيدها من ويهها ومسح دموعها وباسها ع يبهتها ..
ذياب: معاد أبي أشوف هالدمعة !
فوز: أنا آسفة
ذياب: فوز أنا عارف إن النسيان ما إيي بسهولة .. ويبيلج وقت ليمن تمحين علي من ذاكرتج .. بس ف نفس الوقت مابيج تعطين نفسج الفرصة تفكرين فيه !!
فوز: أنا آسفة ,
ذياب: حصل خير .. ياللا قومي غسلي ويهج وحطي لنا الغدا بنظهر نتحوط عقب
فوز: توك تقول تعبان ؟؟
ذياب بإبتسامة : راح التعب !!


يحبها ويموت فيها .. فوز تدري بهالشي .. بس اللي قهرها ليش يخبي عليها .. حست بالبرد ودشت داخل ف نفس اللحظة اللي جان ذياب ياي فيها من برع .. اليوم عقب الغدا قبل لا يطلع خبرها إنه عنده موعد مع واحد م الربع وبيروح يشوفه وقالها ما راح يتأخر وعقب ما يرجع بيوديها يتحوطون فـ أدنبره عاصمة اسكوتلندا ! وهي استغلت الفرصة وقررت تروح الصيدلية تسأل عن الحبوب اللي ذياب ياخذها ! ما تدري ليش قلبها ما جان مرتاح من هالسالفة !!

ذياب: هلا حبيبي .. شلونج ؟؟
فوز: الحمدلله
ذياب: تأخرت عليج ؟؟
فوز: لا عادي ..
ذياب: طيب شو زاهبة نطلع !؟
فوز: هيه أترياك
ذياب: طيب بدش أتغسل وأبدل ملابسي ورايحين !

دش ذياب الغرفة .. وغسل ويهه وبدل ملابسه وبعدها راح ياخذ دواه .. واستغرب إن الحبوب مو موجود بالغرفة وين ما كان حاطنهم .. يلس يدورهم ودشت فوز الغرفة بس كانت واقفة عند الباب وتشوف عليه وهو يدور الحبوب من درج لدرج !!

فوز: كاهو اللي تدوره !!

فرت فوز الحبوب على الشبرية .. وذياب استغرب من تصرفها وليش الحبوب عندها !!؟

ذياب: الحبوب شو يسوي عندج ؟؟
فوز: ليش ما قلت لي الحقيقة ؟؟
ذياب: حقيقة شو ؟؟
فوز: ليش جذبت علي .. وقلت لي إن هالحبوب حق إلإلتهابات !؟
ذياب: ما جذبت .. أنا مريض وأتعالج وين المشكلة !!
فوز: وين المشكلة ؟؟ المشكلة لما أسألك هالحبوب حق شو وتقولي حق التهابات الصدر .. وتطلع في الأخير حبوب حق مريضي القلب .. هنيه المشكلة !!

كانت فوز ترمس وهي تحاول إنها ما تنزل ولا دمعة .. لازم تكون قوية وتواجه ذياب .. ليش جذب عليها ليش ما قالها الحقيقة !!

ذياب: إنتي شدراج ؟؟ منو ها اللي قالج !
فوز: خذت الحبوب الصيدلية وسألت .. قالوا لي هالحبوب ياخذها اللي فيه مرض القلب !! ليش جذبت علي ليش ما خبرتني إنك مريض!!
ذياب: فوز هدي شوي خلينا نتفاهم !!
فوز: إنت ما خليت فيها تفاهم .. أنا مو زوجتك مو المفروض أعرف هالشي ليش ما قلت لي !!
ذياب: كنت ناوي أخبرج عقب ما نرد ألمانيا !
فوز: وليش ما قلت لي قبل لا نتزوج .. ليش ما خبرتني لمن ييت تخطبني أو حتى لمن قلت لي إنك تحبني وتبيني !! طول هالفترة وأنا مخدوعة ؟؟ وهاك اليوم لما طحت بالمستشفى مو عشان ألتهاب الصدر .. عشان هالسبب !! وأنا وين عنك !
ذياب: خفت .. لا تلوميني .. خفت أقولج وتكون موافقتج علي شفقة بس وأنا أكره هـ الإحساس !!
فوز: شفقة !! ومنو قالك لو كنت أدري إنك مريض بوافق عليك !!؟

فوز معصبة وقاعدة تخبص في الرمسة ومو عارفة شو تقول .. وذياب مو قادر يستوعب إن اللي جدامه فوز اللي يحبها .. معقولة توصل فيها تقول له جيه !!؟

فوز: مو مستعدة أقضي حياتي تعيسة بس لأني حاسة بشفقة صوبك .. لازم تعرف هالشي عدل !!

بدا ذياب وقتها يفقد حواسه .. جان يتوجع وحاس بألم قوي .. بس معطي فوز فرصة تطلع كل اللي ف خاطرها ..

فوز: تعبت أكون طيبة .. تعبت من كثر ما أتغاضى ترا أنا بشر حسوا فيني حرام عليكم .. ليش خذيتني وإنت تدري إنك مريض .. تبي تروح عني وتخليني إنت بعد .. ما ترمس شفيك ساكت !!

كل اللي قاله ذياب قبل لا يفقد وعيه .. أنا أحبج !!
وفوز للحين مو مستوعبة إن ذياب طايح .. تشوف عليه جأنها ما تعرفه ومو عارفة شلون تتصرف أصلاً .. راحت صوبه تحاول توعيه ..
فوز: ذياب .. قوم لا تخليني بروحي .. ذياب لا تروح عني .. أنا أبيك وربي ما عاد أزعلك ذياب قوم ؟؟

فوز: ذياب .. قوم مو قصدي أزعلك .. كنت أمزح وياك .. ذياب لا تموت ..

كانت منهارة خلاص .. راحت صوب التليفون واتصلت ع الريسبيشن وخبرتهم يدقون للإسعاف وكلها 5 دقايق والإسعاف يايين وماخذين ذياب ع المستشفى !!!


آلمستشفـــــى
الساعة 6:15 مساءاً


أول ما وصلوا المستشفى دخلوا ذياب غرفة الإنعاش .. كانت فوز وياهم بس ما خلوها تدش داخل .. واقفة عند الباب وتبجي .. للحين فيها قوة إنها توقف ع ريولها مع إنها عارفة ومتاكدة إن ذياب خلاص مات وما راح تشوفه مرة 2 .. مو متخيلة إنها سبب فموت الإنسان اللي يحبها ويموت عليها .. مو متصورة إنها كانت قاسية وياه لدرجة إنها ما انتبهت لحجم الغلط اللي قاعده تغلطه وهي تدري إنه مريض وأي شي ممكن يأثر فيه .. كانت تبجي وتلوم نفسها ع اللي سوته .. شراح تقول حق أهله !! تزوجت ولدهم وعقب أسبوع ذبحته !!

يلست تتذكر أول يوم لهم في آسكوتلندا ووشلون كانت علاقتهم ف بعض .. ووشلون ذياب جان يعاملها !!

ذياب: فوز حبيبي
فوز: هلا ذياب
ذياب: مستانسة ؟!
فوز: أكيد
ذياب: مو مبين عليج ترا ؟
فوز: توعدني ما تخليني ؟؟
ذياب: حبيبي شو هالكلام ؟؟ أنا ما صدجت أحصلج تبين أخليج .. أكون مينون لو أسويها
فوز: الله لا يحرمني منك
ذياب: ولا منج يا قلبي .. ياللا روحي بدلي ملابسج بنظهر
فوز: شقايل نطلع ما تشوف المطر ؟؟
ذياب: ليش ما تحبين المطر؟
فوز: أحبه .. بس مابيك تمرض
ذياب: خايفة علي يعني ؟؟
فوز: هيه إنت حساس بسرعة تمرض ..
ذياب: يعني إنتي مول مب حساسه
فوز بابتسامة: شويه بس
ذياب: فديت الحساس والله ..

فهاللحظة دق تليفون فوز .. وصحاها من حلمها الجميل لواقعها المر .. اللي يقول إنها صارت أرملة بعد أسبوع من زواجها !! كانت ميرة اللي مع سعيد ف لندن متصلة فيها تبارك لها وتسلم عليها وتاخذ علومها ! مسحت فوز دموعها وردت عليها ..

ميرة: السلام عليكم ,
فوز: وعليكم السلام
ميرة: فوز هاي إنتي ؟؟
فوز: هيه
ميرة: شفيه صوتج ؟؟ ليش تبجين ؟؟

انهارت فوز ويلست تبجي ..
ميرة: فوز شفيج ؟؟
فوز: ميرة ..
ميرة: شفيج فوز لا تخرعيني شو مستوي ؟؟
فوز: ذياب يا ميرة

كانت فوز تتكلم وصوتها متقطع من البجي .. وميرة مو قادرة تعرف شو صاير ..

ميرة: بلاه ذياب؟ صاير فيه شي؟ سوابج شي ؟؟ شو ؟؟
فوز: ميرة ذياب مات
ميرة بصدمة: شو !!؟؟؟
فوز: ذياب مات .. أنا ذبحته .. ذبحت ذياب يا ميرة
ميرة: شلون يعني؟؟ مو فاهمة عليج ؟؟ هدي يا فوز وفهميني شو صاير بالضبط؟
فوز: أقولج ذياب مات مات .. ما تفهمين مات
ميرة: شلون مات ؟؟ فوز شفيج لا تمزحين وياي شلون يموت ؟؟
فوز: ماني قاعدة أمزح .. أنا ف المستشفى .. دخلوه غرفة الإنعاش .. ميرة ذياب راح وخلاني .. شسوي أنا .. ليش كلهم يتخلون عني ويروحون ؟؟
ميرة: هدي يا فوز لا تسوين بروحج جيه .. سمعي أنا برمس سعيد وعلى أول طيارة لأدنبرة راح نييج
فوز: إيه .. تعالي ميرة .. أنا مو عارفة شلون أتصرف!!
ميرة: حاولي تهدين إن شاء الله ف أقرب فرصة راح نكون عندج
فوز: إن شاء الله !!


إنجلتـرآ - الفندق
يوم السبت
الساعة 7:00 مساءاً


أول ما بندت ميرة عن فوز انهارت .. مو قادرة تستوعب اللي يصير .. شلون ذياب يموت !! وعقب زواجه من فوز بأسبوع بس ! يلست تصيح وانتبه عليها سعيد اللي جان طالع م الحمام سابح ,

سعيد: ميرة شفيج ؟؟ ليش تبجين؟؟ بسم الله عليج
ميرة: سعيد مو معقول اللي قاعد يصير .. مو معقول
سعيد: شو مستوي ؟؟
ميرة: دقيت حق فوز

أول ما سمع اسم فوز طاح قلبه .. كله ولا فوز سعيد وايد يحب فوز ويتمنالها الخير وما تهون عليه أبداً ,

سعيد: شفيها فوز ؟؟
ميرة: مب فوز .. ذياب
سعيد: ميرة هدي شوي وخليني أفهم .. منو فوز وإلا ذياب ؟؟
ميرة: ذياب
سعيد بتوتر: شفيه ذياب ؟!! لا تبجين وقولي شفيه ذياب؟
ميرة: فوز تقول ذياب مات !!
سعيد بصدمة: شنو !!!!؟؟

زاد بجي ميرة .. وسعيد صدمته خلت لسانه مشلول مو قادر يرمس .. حضن حرمته وحاول يهديها لأنه يبي يفهم اللي صاير .. شلون ذياب مات ؟!!

ميرة: فوز بروحها ومو عارفة شو تسوي .. لازم نروح لها ما يصير نخليها بروحها !! فوز منهارة وتبجي !!
سعيد: هي ما قالت لج شلون مات ؟؟
ميرة: كل اللي قالته .. ذياب مات وأنا ذبحته ماقدرت أفهم شلون مات
سعيد: طيب ميرة .. اهدي أحين مو زين عشان اللي ف بطنج
ميرة: إن شاء الله .. بس لازم نروح لها
سعيد: ع أمرج اللي تبينه بيصير أحين بروح أشوف الرحلات الداخلية وإذا لقيت حجز بخبرج ع أساس تزهبين نفسج
ميرة: أوكي .. بس مو تتأخر !!
سعيد: إن شاء الله

لبس سعيد وطلع ع طول .. ومن العيلة نسى ياخذ تليفونه وياه .. تفكيره جان ف فوز شو حالتها .. وذياب شلون مات !! يعني فجأة وبدون سابق إنذآر وعقب أسبوع من زواجهم يموت ! سبحان الله , صدج الدنيا مالها أمان ف لحظة وحده بس تآخذ ناس غالية ع قلوبنا !!

أما ميرة .. فرجعت تدق لفوز تخبرها إن سعيد راح يشوف لهم حجز وتتطمن عليها بس فوز ما كانت ترد !! وهالشي خلاها تخاف ليكون فوز صار فيها شي .. خصوصاً هي تدري إنها لا تضايجت حالة ضيق التنفس تييها .. وما عرفت شو تسوي يلست تحاتيها وما كان فإيدها شي غير إنها تتريا سعيد يرجع بسرعة ويكون حصل حجز عسب تروح تشوف رفيجتها !!
 

أم حور

¬°•| عضــو شرف |•°¬
إنضم
26 فبراير 2011
المشاركات
502
العمر
34
الإقامة
SoHaR

المستشفــــــــى
يوم الأحد
الساعة 1:00 بعد منتصف الليل



ميرة وسعيد واقفين جدام سرير فوز ينتظرونها تقوم عقب الصدمة اللي خذتها من الدكتور .. أول ما وصلوا وسألوا عن ذياب دلوهم على غرفة فوز .. ميرة كانت حاسة إن فوز فيها شي وعسب جيه ما كانت ترد عليها .. كانت تبجي بهدوء وهي ف حضن سعيد اللي يحاول يهديها .. رغم إنه قلبه معورنه وايد على فوز اللي متمدده جدامه والمغذي في إيدها !!

كانت واقفة جدام باب غرفة الإنعاش تتريا الدكتور يطلع ويقولها أي شيء عن حالة ذياب .. تبي تعرف شو صار وياه ! أول ما طلع الدكتور وقالها إنّ المريض مات وما قدروا يسوون شي حست الدنيا تدور وفقدت الوعي على طول !!
عقلها يعيد سرد الأحداث بسرعة .. لين ما فزّت من نومها وهي تبجي وتصارخ ..
راحت ميرة صوبها وحضنتها وهي تحاول تهديها ..

فوز: ميرة .. شفتي شصار فيني ؟؟ ذياب مات .. ميرة خلوه يرد أنا أبيه .. والله ما عاد أزعله ردوه حقي أبيه .. أحبّه .. وين ذياب بس أبي أقوله إني أحبه وما قصدت أزعله ..
ميرة: هدي يا فوز لا تسوين ف روحج جيه ..

كانت ميرة تصيح على حال رفيجتها .. وسعيد ما قدر يتحمل اللي قاعد يصير ومنظر فوز بهالطريقة وفضّل إنه يطلع وميره هي اللي تقولها كل شي !!

فوز: ما راح أسامح نفسي ع اللي سويته .. أنا السبب في اللي صار ويّاه .. أنا اللي ذبحته .. خلوه يرجع لي .. لا يروح ..
ميرة: فوز .. فوز هدي واللي يسلمج لا تسوين ف روحج جيه

كانت فوز تصارخ وتضرب روحها من القهر اللي فيها .. وميرة مو قادرة تهديها .. وما حست إلا بإيدها تنمد على خد فوز !!

أول ما ياتها الصفعة ع خدها بدت تنتبه للي قاعد يصير .. كانت تبجي والدموع تنزل من عيونها بس ما عادت تتكلم ..

ميرة: جان لازم أسوي جيه عسب توعين وتنتبهين إنج قاعدة تأذين نفسج ..
ما قالت شي .. وميرة ما سمعت غير صوت شهقاتها وعيونها تشوف على مكان معين وكأن كل تركيزها فهاك المكان !!

ميرة: فوز .. سمعيني ذياب للحين عايش .. ما مات

طالعتها فوز وهي مو مصدجة .. أكيد تجذب شلون ما مات والدكتور بنفسه قالها إن ذياب مات !! شلون ؟؟

فوز: إنتي جذابة ؟؟
ميرة: مشكورة يا فوز .. بس الصج إن ذياب مو ميت .. وربي قبل شوي يايين أنا وسعيد من عنده وشفناه .. هو بخير
فوز: عيل ليش الدكتور قال إنه مات ؟؟
ميرة: فوز .. الدكتور لخبط .. جان فيه مريض ثاني في قسم الإنعاش غير ذياب وهو اللي توفّى مب ذياب !!
فوز: قولي إنج ما تجذبين ؟؟ قولي إن هالكلام صج ؟
ميرة: وربي إنه صج .. إرتاحي أحين وعقب بوديج عنده تشوفينه
فوز: لا مابي أرتاح وديني أحين أبي أشوفه أبي أتطمن عليه بنفسي
ميرة: طيب أتريي بخلي سعيد يشوف الدكتور
فوز: بسرعة ميرة أبي أشوفه

راحت ميرة تشوف سعيد وتقوله يبلغ الدكتور إن فوز نشت عسب إيي يشيك عليها ويخليها تروح تشوف ريلها ! وعقبها رجعت ويا فوز يتريون الدكتور ..

ميرة: عقب شوي بيي الدكتور
فوز: طيب
ميرة: مسحي دموعج ياللا .. ذياب بخير ومافيه شي
فوز: إن شاء الله
ميرة: فوز
فوز: هلا ميرة ؟؟
ميرة: ذياب شفيه .. ليش طاح فجأة شصار بينكم ؟؟
فوز: ذياب مريض
ميرة: شفيه ؟!
فوز: القلب !
ميرة بصدمة: شو ؟!!
فوز: وأنا اليوم اكتشفت .. وعصبت وتضايجت ليش إنه ما خبرني .. وسمعته رمسة مثل السم .. وما قدر يتحمل وطاح !!
ميرة: لا حول ولا قوة إلا بالله ..
فوز: اللي سويته غلط .. ما جان المفروض أنفعل .. ذياب ما يستاهل هالشي مني
ميرة: خلاص يا فوز لا عاد تلومين نفسج .. اللي صار صار .. والحمدلله إنها يات ع جيه وذياب بخير ومافيه شي
فوز: الحمدلله .. وربي خفت عليه .. عقلي ما جان مستوعب إنه مات .. لو مات أنا شو بيصير فيني
ميرة: هو للحين عايش .. وإنتي أحين عرفتي شفيه .. يعني حاولي كثر ما ترومين إنج تسعدينه ..
فوز: تدرين ميرة .. من قلبي أتمنى هالشي .. بس تفكيري بعلي مخلني مو عارفة أتأقلم مع حياتي اليديدة ويا ذياب .. رغم إنه يسوي المستحيل عشاني .. بس حتى كلمة حبيبي ما تطلع مني بسهولة
ميرة: فوز .. علي أخوي صح .. بس إنتي غاليه علي وايد وتدرين إنج مثل أختي .. عيشي حياتج مع ذياب .. وأنا متأكدة إن حب ذياب لج راح يخليج تنسيه .. وعارفة إن ذياب بيعوضج عن كل شي فقدتيه من قبل .. خلاص علاوي أختار حياته وهو ويا شوق أحين وبنته .. وعلى فكرة ترا شوق وايد مريضة .. والفترة الأخيرة كله ف المستشفى .. وهو منشغل فيها حتى خذ إجازة م الدوام .. وخولة تقول إن فوز أغلب وقتها عندهم لأن علاوي بالمستشفى ويا حرمته
فوز: الله يشفيها .. ويخليها حق بنتها
ميرة: آمين يا رب


يا الدكتور وبطل المغذي عنها وسمح لها تروح تشوف ذياب ! وأول ما وصلت فوز الغرفة اللي جان ذياب راقد فيها .. حست قلبها يدق بالقو .. كأنها أول مرة تشوف ذياب .. بدت دموعها تنزل مرة 2 وهي تتذكر اللي سوته فيه .. مهما جان ذياب ما يستاهل الكلام اللي قالته .. شلون نست كل اللي سواه عشانها ولامته بس لأنه ما جان يبيها توافق عليه لأنها تحس بالشفقة .. وفعلاً لو كانت تدري عن مرضه جان وافقت عليه من زمان بس عسب ما تزعله وتضايجه وهي تدري إن هالشي ممكن يأثر ع صحته !!
راحت صوبه .. ويودت إيده وطبعت بوسه عليها ..

فوز: أنا آسفة .. أوعدك ما راح أزعلك مرة ثانية .. بس إنت قوم ورد لي مثل قبل ..

فوز: ذياب .. أنا مالي غيرك .. ياللا قوم مو إنت قلت ما راح تخليني .. قوم عشاني

كانوا ميرة وسعيد يشوفون عليها من برع .. ويشوفون حالتها شلون صايرة .. من يوم عرفوها وهي تطلع من شي وتدش ف شي ثاني .. عمرها ما تهنت ف الشي اللي تسويه جأن حد داعي عليها !!

سعيد: ميرة دشي عليها خبريها إني بيلس وياه وإنتو رجعوا الفندق
ميرة: ما راح ترضى
سعيد: حاولي تقنعيها
ميرة: إن شاء الله

دشت ميرة عند فوز .. وطلبت منها تظهر عسب يرمسون ع راحتهم .. خبرتها بتيي وظهرت ميرة خاري تتريا فوز تطلع !!

فوز: الله يشفيك ويقومك بالسلامة

هدت فوز إيد ذياب .. وباسته ع يبهته قبل لا تطلع من عنده .. وسارت عند ميرة تشوف شو تبي !!

سعيد: هلا فوز .. شحالج ؟
فوز: الحمدلله .. السموحة منك ما صارت فرصة أسلم عليك
سعيد: لا عادي .. ما صار شي
فوز: ميرة شو كنتي تبين ؟؟
ميرة: شرايج نروح الفندق أنا وإنتي .. سعيد بيقعد ويا ذياب
فوز: لا مابي ..
سعيد: لازم ترتاحي يا فوز ما يصير جيه
فوز: مابي أرتاح وماني ظاهرة من المستشفى إلا وذياب وياي
سعيد: فوز لا تعاندي ترا مو زين هالشي عشانج
فوز: خلاص يا سعيد خلوني ع راحتي مابي أخليه
ميرة: فواز .. ذياب راقد ما راح يقوم لباجر وإنتي لازم ترتاحين.. وإذا نش ترا سعيد هنيه ما راح يخليه
فوز: لا ميرة .. إنتو روحوا ارتاحوا .. كافي عبلت عليكم وخليتكم تقطعون رحلتكم .. إنتو يايين تستانسون مو تعبلون روحكم فيني
ميرة: شو هالكلام يا فوز .. لا تقولين جيه تفهمين
فوز: إن شاء الله
ميرة: واحين شو ؟!
فوز: روحوا ارتاحوا .. أنا بقعد هنيه قلبي ما يطاوعني أخليه
سعيد: طيب فوز إذا بغيتي شي دقي علي .. كنت بيلس وياج بس ما أقدر أخلي ميرة بروحها
فوز بابتسامة: أدري يا سعيد .. ما تقصر
سعيد: بنخليج أحين .. وباجر أول الصباح راح نكون هنيه إن شاء الله
فوز: إن شاء الله

ساروا ميرة وسعيد الفندق يرتاحون .. ورجعت فوز لغرفة ذياب .. ونفس الوضعية اللي كانت عليها .. ميودته من إيده وتكلمه .. ما تدري إن ذياب جان يحس باللي حوله وسمع كل كلمة قالتها له فوز .. لو شو ما تسوي يحبها وايد وما تهون عليه .. ودمعتها وايد تضايجه !!

ع الساعة 4 الفير ..

فتح ذياب عيونه .. وأول ما أنتبهت له فوز حست بالسعادة .. كانت توها يايه مصلية الفير .. ورغم إن شكلها جان تعبان بس ويهها منور ..

ذياب: فـ وز ..
فوز: آششششش .. لا اتعب نفسك
ذياب: أحبّج ..
فوز: خفت عليك وايد .. مابي شي يصير فيك
ذياب: ما راح يصير فيني إلا اللي الله كاتبه
فوز: حسيت بالموت لما شفتك طايح .. أنا آسفة ما جان قصدي أزعلك
ذياب: لا تفتحين هالموضوع مرة 2 ..
فوز: بس
ذياب يقاطعها: مو أنا أحبج ؟؟
فوز: هيه
ذياب: وأنا عندي المحبوب ماله ذنوب ..
فوز: الله لا يحرمني منك حبيبي
ذياب: ولا منج قلبي

يلسوا يسولفون للصبح .. كانت فوز هي اللي تتكلم أكثر شي لأنها ما تبي اتعب ذياب .. كانت تخبره باللي صار فيها من عقب ما طاح .. وتحكيله كل شي بالتفصيل .. وذياب جان مندمج ف ملامحها وتعابير ويهها اللي تتغير بين فترة والثانية !!


يوم الأربعاء
بيت أبو عبد العزيز – العين
الساعة 6:00 مساءاً


موزة بالصالة تتريا أختها تيي وتسلم عليها قبل لا ترجع بيتهم ليش إنها خلصت كل تجهيزات العرس وما باقي شي .. دق فونها وجان ريلها متصل فيها ..

غيث: هلا حبي
موزة: أهلين
غيث: شحالج ؟؟
موزة: الحمدلله بخير .. شخبارك إنت ؟؟
غيث: يسرج الحال .. شو وينج ؟
موزة: بيت أختي
غيث: منو يردج البيت ؟؟
موزة: اتصلت ف أحمد قال هو ويا حرمته في بوظبي يخلصون شوبنق ويمرون علي
غيث: أخاف يتأخرون عليج
موزة: مو مشكلة ترا قاعدة ف بيت أختي
غيث: تدرين عاد .. ما أرتاح لما تكونين بيت أختج
موزة: ليش عاد ؟؟
غيث: بس جيه
موزة: زين ترا برد البيت اليوم لا تخاف
غيث: تبين أيي أردج ؟؟
موزة: لا والله .. عرسنا عقب أسبوعين ما بيك تشوفني
غيث: أونج .. عاد أنا ها اللي ما أدانيه أونه العروس ما تشوف ريلها قبل العرس بأسبوعين ومدري شو
موزة: أحسن جيه عسب تشتاق لي
غيث: إنتي عندي وأحس نفسي مشتاق لج يعني ما يحتاي تمنعيني من إني أشوفج لأني ف كل الأحوال مشتاق لج
موزة: تبي الصدج ؟؟
غيث: أبيه وأبيج وياه
موزة: غيث عاااد
غيث: زين ياللا قولي
موزة: وأنا بعد حاسه إني ولهانة عليك وايد
غيث: يا ويل حالي .. هالكلام اللي الواحد ينقز م الوناسة لا سمعه .. وبعد شو ؟؟
موزة: صج ما تنعطى ويه .. ياللا بند
غيث: ههههه شفيج أمزح وياج
موزة: كريه
غيث: مقبولة منج وشو ما تقولين أحبج
موزة: وأنا بعد
غيث: بخليج أحين سعيد يتصل فيني
موزة: طيب قلبي دير بالك ع روحك
غيث: وإنتي بعد حبي دزيلي مسج أول ما تطلعون
موزة: أوكيك ..

بندت موزة عن غيث .. يوم ورا يوم تحس إن غيث دش قلبها من أوسع أبوابه وكل ها بسبب معاملته الحلوة لها .. الله عوضها عن كل اللي صار وياها واللي سواه سيف معها بريال ماكو وحده ما تتمناه .. ف عز تفكيرها ما انتبهت ع الشخص اللي واقف بمسافة ويشوف عليها .. وأول ما انتبهت من سرحانها رفعت راسها تشوف منو هالريال انصدمت بوجود سيف في الصالة .. ما صدمها وجوده كثر ما صدمها شكله اللي متغير 360 درجة .. وحالته اللي تبين إنها مو بس مأساويه إلا كارثة .. ها غير إن عقلها بدا يتذكر اللي سواه فيها سيف آخر مرة كانت موجودة فيها ف بيت أختها .. وقفت موزة بتروح فوق !
سيف: موزة !

تحركت موزة وعطته ظهرها ..

سيف: موزة اسمعيني شوي مابي منج شي غير إنج تسمعيني !!

وقفت موزة والدموع تنزل من عيونها .. بس للحين عاطيه سيف ظهرها وهو واقف وراها مباشرة بس بمسافة بعيدة .. !!

موزة: لا تييب طاري اسمي ع لسانك
سيف: لازم أرمسج ومن بعدها لوحبيتي تعديني ميت ما عندي مانع بس لازم أرمس وياج وتسامحيني !!
موزة: مابي منك شي يا سيف .. أنا وحده معرسه وأحب ريلي فبليز خلك بعيد عن حياتي ولا عاد تتدخل فيها .. وكافي اللي صار لي بسببك !!

تحركت موزة بتروح .. بس حست إنها للحين ما شفت غليلها من سيف .. للحين فيه شي ما سوته ممكن إنه يبرد القهر اللي فيها طالعت عليه وتجدمت صوبه وويها كله دموع وسيف متفاجئ من تصرفها بس ما تحرك من مكانه !!



آسكوتلندآ – الفندق
يوم الخميس
الساعة 2:00 ظهراً



طلع ذياب م المستشفى أمس وفهالأيام زادت علاقته بفوز وايد .. وبين عليهم إنهم عرسان يدد .. فوز من بعد ما حست إنها ممكن تفقد ذياب .. تعاملها وياه وايد تغير .. صارت تحس فعلاً بإنه زوجها وحبيبها .. وهو الوحيد اللي يحسسها بالأمان

اليوم كانوا عازمين ع الغدا ميرة وسعيد اللي كملوا رحلتهم في اسكوتلندا وما رجعوا انجلترا مرة 2

سعيد: متى ناوين تردون ألمانيا ؟!
طالعت فوز على ذياب .. اللي ابتسم ابتسامة هادية .. ورد بالنيابة عنها ..

ذياب: لا شبعنا بنرد .. ومو ألمانيا .. بنرجع البلاد لأن فوز تبي تشوف أهلها .. وتبي تحضر عرس رفيجتها
فوز: إيه صح
ميرة: عرس منو ؟!
فوز: مواز وإلا نسيتي !!
ميرة: تبين الصدج نسيت .. ومول ما حاطة ف بالي
فوز: هذا والمعرس أخو ريلج وولد خالتج
ميرة: تدرين بعد ما شاء الله من زود الأشياء اللي تصير الواحد ما يستوعب
فوز: هيه والله .. زين وإنتو متى راجعين ؟؟
سعيد: بعد يومين
ذياب: ما يلستو وايد ؟؟
سعيد: لا تنسى قبل لا نيي هنيه كنا ف لندن .. كافي علينا وبعدين إجازتي بتخلص
ميرة: ما عليك منه عنده رصيد إجازات وايد
سعيد: طيب ما اختلفنا بس موفرنهم حق ولادتج .. وإلا ما تبيني أكون وياج
ميرة: أكيد أبيك
سعيد: عيل لا تتحرطمين
فوز: ههههههه أدري فيها لو عليها ما تبيك حتى تداوم .. تقعد مجابلنها ليل نهار
ميرة: مو جيه فواز .. ما شفتي شصار أول الشهور
سعيد: اسكتي دخيلج لا تذكريني
فوز: هههههههه ليش شو صار ؟؟
ميرة: قمت ما أطيقه ..
فوز: شت توحمتي عليه !!؟

ذياب يشوف ع فوز اللي تضحك .. مركز ف كل تفاصيلها مو كأنها زوجته ومجابلتنه طول الوقت كأنها وحده أول مرة يشوفها .. أما سعيد ف منزل راسه وهو يتذكر اللي كانت ميرة تسويه فيه فترة الوحام

ميرة: أقولج ما أطيقه .. أول ما أشم ريحته أحس بغثيان وسرت عندهم علاوي فترة !!

أول ما طرت ميرة اسم علي .. رفعت فوز راسها تشوف على ذياب اللي كان يشوف عليها وابتسمت له .. كأنها تطمنه إنه خلاص علي ما يهمها لو إن الحقيقة هي شي ثاني حتى لو نكرتها فوز !!

فوز: لهالدرجة ؟؟ الله لا يبليني مابي أتوحم جيه
ميرة: هههههه وأنا أقولج بعد ما تبين
فوز: ها من كثر ما تحبين سعيد
ميرة بحيا: أكيد
سعيد: الحمدلله إنّ وحامها خلص وافتكينا وإلا عاد خلاص أنا كنت ناوي آخذها الثانية قلت الحرمة شكلها عافتني
ميرة: ف عينك تاخذ الثانية .. جرب انت بس بذبحك وبذبحها وياك
ذياب: هههههههه أنا بعد مفكر أسويها
سعيد: توك ف شهر العسل وعاد تبي تاخذ الثانية .. فوز قولي شي ؟؟
فوز: أدري إنه ما يقدر يسويها
ميرة: وليش واثقة هالكثر يعني ترا كلهم رياييل ف الأخير

طالعت فوز ع ذياب وابتسمت له ورد لها نفس الإبتسامة .. وردت ترمس ميرة ..

فوز: لأنه يحبني
ميرة: يعني سعيد ما يحبني ؟؟ كاهو سعيد يحبني وأحبّه وفكّر السخيف إنه ياخذ الثانية
ذياب: فوز قصدها لأني تعبت وايد ليمن حصلتها ف مستحيل أفرط فيها !

طالعه سعيد .. من نظرات ذياب لفوز حس شكثر هو يحبها وراح يحطها ف عيونه .. وفداخله يتمنا إن الله يسعدهم وتقدر فوز تنسى علي وتطلعه من حياتها للأبد !!

فوز: وأنا بعد تعبت وايد ليمن لقيتك
ميرة: ربي يسعدكم ..
فوز وذياب وسعيد: آمين يا رب

ترخصوا ميرة وسعيد بيروحون وسلموا عليهم لانهم خلاص ما راح يشوفونهم لين عرس موزة بعد أسبوعين ..

ذياب: فوز
فوز: هلا
ذياب: فوز
فوز: شو؟؟
ذياب: فوز
فوز: ذياب وبعدين ؟؟
ذياب: فوز
فوز: ذياب عن اللعب
ذياب: ما ألعب
فوز: قول عيل شو تبا ؟؟
ذياب: تعالي يلسي حذالي بقولج شي
فوز: شو ؟؟
ذياب: تعالي إنزين

جربت فوز صوبه ويلست حذاله .. اقترب منها ذياب وحط إيده ع ظهرها .. وقرب صوب إذنها وهمس لها ..

ذياب: أحبج

ابتسمت فوز .. وشافت ع ذياب وحست قلبها بيطيح من نظرات ذياب لها ..

فوز: وأنا بعد
ذياب: إنتي شو ؟؟
فوز: ما أحبك
ذياب: أدري إنزين بهالشي .. مو مهم دام أنا أحبج
فوز: واللي يفكر ياخذ الثانية ؟؟
ذياب: غبي وما يفهم
فوز بابتسامة: قوله عيل .. شكله صدج ما يفهم
ذياب: مستانسة ؟؟
فوز: دامك وياي وبخير .. أكيد مستانسة
ذياب: تبين نطلع ؟؟
فوز: لا .. أبيك تاخذ دواك وترتاح
ذياب: راحتي ف قربج ووجودج معي
فوز: بقوم أييب الدوا .. وبتنام وعقب بنظهر
ذياب: ع أمرج دكتورة .. اللي تبينه بسويه بس بشرط إنتي ترقديني
فوز: عن العيارة .. قوم ياللا ارتاح بييب الماي وبييك
ذياب: زين ما عليه .. ما تبين ترقديني الحرمة الثانية بترقدني

كانت فوز ف المطبخ وتضحك ع ذياب .. هالموضوع ما ينرفزها وايد لأنها واثقة من ذياب وتدري عدل إنه يحبها ومستحيل يفكر فهالشي .. طالعته م الباب بترد عليه ..

فوز: احلم فيها إنت هالثانية ..
ذياب: لو بغيت الثانية أبيها تكون إنتي

استحت فوز ودشت المطبخ يابت كوب الماي ورجعت الصالة مرة 2 .. جان ذياب للحين ع نفس الهيئة اللي مخلتنه فيها ..

ذياب: تعالي يلسي يمي
فوز: ليش؟؟
ذياب: شو ليش أبيج تيلسين حذالي
فوز: شو ما ناوي تدش ترتاح
ذياب بعيارة: حاس بتعب مو قادر حتى أقوم .. خلاص بنام هنيه
فوز: لا والله .. بشو تحس ؟؟ ها أكيد لانك ما خذت الدوا .. اصبر لحظة بروح أييبه لك ..

ابتسم ذياب .. رغم إنه يدري إن فوز ما تحبه وتعاملها وياه بس بحكم إنه زوجها بس ف نفس الوقت يدري هي شكثر حنونة وقلبها طيب .. يابت فوز الدوا وخذاه ذياب عنها وعقب خلاها تيلس ع القنفة .. وحط راسه ع ريولها .. وجان يشوف عليها وهي مستحية من نظراته ..

فوز: لا تشوفني جيه
ذياب: حرام ؟؟
فوز: هيه حرام
ذياب: منو حرّمه ؟؟
فوز: ياللا عاد ذياب ترا أدش داخل وأخليك
ذياب: زين بنام شوفي غمضت عيوني
فوز بابتسامة: صدجت
ذياب وهو مغمض : لازم تصدجين .. بنام
فوز: طيب ياللا نام ..

ما كمل ربع ساعة إلا وهو راقد .. وها من تأثير الدوا اللي ياخذه ها غير التعب اللي يحس فيه بين فترة والثانية .. يلست فوز تلعب بشعره وتفكر لو كانت متزوجة علي شلون حياتها راح تكون ؟؟ وهل تعاملها وياه راح يختلف عن تعاملها أحين مع ذياب .. هي تحاول تبذل جهدها عسب تحسس ذياب بالحب .. وتخليه مستانس .. بس فيه شي ف داخلها يقول لها إنها ظلمت نفسها بهالزواج وظلمت ذياب وعلي !!



المستشفــــــى - آلشآرجة
يوم الإثنين
الساعة 8:00 مساءاً



شوق من جم يوم ف المستشفى .. حالتها يوم عن يوم تزيد .. وشكلها متغير وايد بسبب المرض .. شوق الجميلة اللي أي حد يشوفها ينبهر ف شكلها وجمالها صارت وردة ذبلانة من عقب المرض ..

شوق: علي
علي: هلا حبيبي ..
شوق: خلاص رد البيت .. يلستك هنيه مالها داعي
علي: ما بخليج ..
شوق: أبيك تروح تتطمن ع فوز
علي: فوز ما عليها شر .. عند خولة وراح تحطها ف عيونها
شوق: بس إنت من جم يوم هنيه وما ارتحت .. عشان خاطري روح البيت ارتاح والصبح تعال
علي: مابي شوق ما بخليج
شوق: طلبتك .. بتردني ؟!!
علي: لا يا قلبي ما ودي أردج بس بعد ما ودي أخليج
شوق: علي
علي: آمري فديتج
شوق: ما أوصيك ع فوز .. حاول تسوي المستحيل عشان ما تحس إن ما عاد لها أم .. تزوج يا علي وييب لها أم ثانية تربيها
علي: شهالرمسة يا شوق .. إن شاء الله بتقومين بالسلامة وإنتي اللي بتربينها وبتشوفينها عروس بعد
شوق: أنا تعبانه .. خلاص ما عاد فيني حيل .. وجسمي مو قادر يشيلني ..
علي: كلها جم يوم وتطلعين من هنيه يا شوق
شوق: لا نجذب ع روحنا يا علي .. أدري إني دام دشيت هالمستشفى ما راح أطلع منه إلا ع قبري
علي: بعيد الشر عنج لا تقولين جيه يا شوق
شوق: بنتي يا علي .. أمانه ف رقبتك ..

يود علي إيد شوق اللي خلاص وكأنها بدت تودع الدنيا .. وتعد آخر لحظاتها فيها ..

علي: شوق ..
شوق تقاطعه: بروح عنك بس غصب عني .. تأكد إنك الوحيد اللي حبيته .. وبظل أحبه .. ما قصرت يا علي سويت عشاني وايد وضحيت بحياتك وبوايد أشياء غيرك ما جان سواها
علي: شوق إنتي حرمتيه وحبيبتي .. وهالشي واجب علي بدون لا تقولين

كانت شوق تلفظ آخر أنفاسها .. وعلي شبه منهار وهو يشوف شوق بهالحالة .. جان يتمنى إنه يسوي أي شي بس ما تروح عنه .. بس هو عاجز وما فـ إيده شي ..

آخر كلمة قالتها شوق قبل لا تنتقل روحها لخالقها ..

شوق: فوز يا علي .. فوز

ما أمهلته لحظة يقولها إنه يحبها .. ولا القدر أمهله يعبر لها عن مشاعره اللي نمت خلال الأشهر الماضية اللي قضاها وياها .. ما نسى فوز صح .. بس شعوره صوب شوق جان يوم عن يوم يتطور .. ويوم عن يوم كان متمسك بأمل أنها تعيش ويكونون أسرة صغيرة ويا بنتهم .. بس حكم القدر جان أقوى .. !!

علي: شوق .. شوق

نزلت دمعة علي .. حاول يوعيها بس بدون فايدة خلاص روحها طلعت .. يلس يفكر بحال بنته من عقبها .. وشلون راح يربيها بروحه وبدون أم .. شوق قبل لا تموت وصته عليها .. هي بنته وأكيد راح يخليها ف عينه بس بعد ما يقدر ع تربيتها بروحه .. لازم تحتاي لأمها !

وصلوا الأطباء وحاولوا إنهم ينعشونها بس بدون فايدة .. حتى علي مع إنه جان متوقع هاليوم إيي بس مو بهالسرعة .. جان واقف وما تحرك من صدمته .. لولا إنّ خولة دقت عليه وخلته يصحى من اللي فيه !!

خولة: السلام عليكم
علي: وعليكم السلام .. هلا خولة
خولة: إنت وين ؟!
علي: بالمستشفى .. ليش فوز فيها شي ؟؟
خولة: لا ما فيها شي .. شوق شحالها ؟!
علي: شوق شوق ماتت يا خولة
خولة بصدمة: شو ؟!!
علي: قبل شوي .. إذا ما عليج أمر خبري عبدالله ايي المستشفى
خولة : إن شاء الله يا علي

بند علي عن خولة .. وراح ويا الطبيب يخلص الإجراءات وتقرر إنهم يحطونها ف الثلاجة والفير ياخذونها ويخلصون أمور الدفن !!


بعد مرور أشهر


المستشفى - الشارجة
يوم الجمعة
الساعة 4:00 عصراً


فوز وذياب رايحين يشوفون ميرة اللي ولدت اليوم ويابت ولد .. كانت فوز يايه من ألمانيا تشوف أهلها ولأن ميرة ولدت قالت بتيي تشوفها قبل لا يردون ألمانيا مرة ثانية .. خصوصاً إن ذياب للحين ما خلص دراسته يكمل الماستر أحين أما فوز ف اكتفت بالبكالوريوس وطول الوقت ف شقتهم أهل ذياب خصوصاً ف الفترة اللي يكون ذياب فيها في الجامعة ..

ذياب: شكلج مول مو عايبني اليوم
فوز: شفيني ؟؟
ذياب: مدري أحس لونج مخطوف .. حاسة بشي ؟؟
فوز: مدري أحس نفسي تعبانه ومالي خلق حق شي .. لو مب ميرة جان ما ييت بس ما بغيت أسافر وما أشوفها فرصة دامنا هنيه
ذياب: إذا جيه مو مشكلة خلينا نرد الفندق عقب بييبج .. إحنا مو مسافرين إلا عقب كم يوم يمديج باجر أو اللي عقبه تيين
فوز: لا عادي .. دامنا واصلين خلنا ندش
ذياب: متأكدة ؟؟
فوز: هيه لا تحاتي أنا بخير ..


وصلوا الغرفة الخاصة الموجودة فيها ميرة .. اللي كانت والدة اليوم الفير .. دقوا الباب ودشو ..

محد جان موجود بالغرفة غير ميرة وسعيد اللي تفاجئوا بيية فوز وذياب هم يدرون إنهم موجودين بس ما توقعوا إن فوز تيي الشارجة تشوف ميرة .. سلمت فوز ع ميرة وذياب سلم ع سعيد .. بعد ما حط باقة الورد والحلاوة اللي يايبينها وياهم .. وراحت فوز صوب البيبي تشوفه ..

ميرة: سعيد ناول فوز الياهل خل تشله
فوز: لا فديتج .. خليه راقد بشوفه من هنيه
سعيد: ما يصير ما تشيلينه
فوز: لا والله خليه
سعيد: طيب ع راحتج ..
فوز: شو قررتوا تسمونه ؟؟
ميرة: للحين مو مقررين .. خليت الإسم ع سعيد
فوز: ها سعيد شو ؟؟
سعيد: محتار بين محمد وراشد ..
فوز: الاسمين حلوين ..

ذياب: الحمدلله ع سلامتج ميرة
ميرة: الله يسلمك ..
ذياب: فوز أنا أترياج خاري .. خذي راحتج
فوز: إن شاء الله
سعيد: عيل أنا بروح وياك .. خلنا نقعد ف الكوفي شوب نشرب شي
ذياب: ياللا مشينا ..


ميرة: شفيج فواز شكلج تعبانة ؟؟
فوز: شوي فديتج .. علومج إنتي ؟؟
ميرة: الحمدلله علوم الخير .. طمنيني عنج شلونج ويا ذياب؟؟
فوز: الحمدلله أمورنا طيبة ..
ميرة: فواز فديتج
فوز: آمري
ميرة: ساعديني بدش الحمام الله يعزج
فوز: إن شاء الله

ساعدت فوز ميرة ف إنها تقوم ووصلتها لباب الحمام وعقبها رجعت تشوف البيبي .. فوز وايد تحب اليهال وتموت عليهم .. كانت عاطية ظهرها الباب وهي تشوف ع الياهل وميوده إيده .. وما انتبهت ع الباب لما دق ولا على الريال اللي دش الغرفة ..

علي اللي ميود باقة الورد العوده كانت مغطية عليه وما انتبه للبنت اللي واقفة وعاطيته ظهرها إلا عقب ما حط باقة الورد ع الطاولة ..

علي بحماس: السلام عليكم

لمن سمعت صوت الريال ع بالها سعيد رجع .. ما ركزت عدل ف الصوت .. ف طالعت تشوف منو !!

علي تصنم مكانه أول ما طاحت عينه ف عين فوز .. انصدمت فوز من شكل علي اللي متغير وايد .. تبادلوا النظرات فترة وهي مو قادرة تنطق بشي .. وتحس دمعتها راح تنزل خلاص .. آخر شي كانت تتمناه إنها تشوف علي .. لا وبهالمنظر بعد !! وآخر شي توقعه علي إنه يشوف فوز عند ميرة خصوصاً إنه ما جان يدري بوجودها ف البلاد يتحراها فألمانيا .. دمعت عيونها بس حاولت إنها ما تنزل ..

علي: شحالج فوز ؟؟
فوز بغصة : بخير .. شحالك إنت ؟؟
علي بابتسامة: الحمدلله يسرج الحال .. إلا ميرة وين ؟؟
فوز: دشت التواليت ..
علي: للحين محد ياي ؟؟

أسئلة علي كانت تزيد فوز وجع وألم .. وتعب فوق التعب اللي حاسه فيه .. بس كانت تحاول تخلي الوضع طبيعي !!

فوز: لا ..
علي: إنتي يايه بروحج ؟؟

شترد عليه .. ريلي يايبني وإلا حبيبي وإلا شو ؟؟ فهم علي من سكوتها إن ذياب هو اللي يايبنها فغير الموضوع ..

علي: مستانسة يا فوز ؟!
فوز: أهم شي إني مرتاحة ..
علي: بس لازم تكونين مستانسة بعد
فوز: ذياب مو مقصر وياي
علي: تحبيه ؟!!

صدمها سؤاله .. حسته سؤال غبي .. آخر شخص المفروض يسأل هالسؤال هو علي .. بس هي تدري ليش سألها يبي يبين لها إنها للحين تحبه ومو قادرة تنساه .. وإنها ما تحب ذياب .. طالعت فوز ف عيون علي وشافت عليه بنظرة خلته يكره نفسه لأنه سألها مثل هالسؤال .. كانت الدمعة متعلقة ف عيونها .. للحظة انتبهت إن وجودها مع علي غلط .. وإنها ع ذمة ريال ومو زين اللي تسويه ..

فوز بتحدي: أحبّه .. وما أتخيل حياتي بدونه واللي عجزت إنت تسويه .. ما عجز عنه ذياب بس عسب يشوفني مستانسة وسعيدة .. يستاهل إني احبه ويستاهل أضحي بعمري كله عشانه ..
علي بغصة: تتهنون !!

فهاللحظة ظهرت ميرة .. اللي انتبهت على مدى توتر الجو ف الغرفة .. راح علي صوبها وسلم عليها وباسها ع يبهتها وبارك لها .. وساعدها ترتاح ع سريرها .. أما فوز ف للحين واقفة ومو مصدجة إنها موجودة ويا علي بنفس الغرفة ..

ميرة: شحالها فوز ما يبتها وياك ؟؟
علي: كانت راقدة لمن ظهرت
ميرة: فديتها والله .. فوز شفيج ؟؟
فوز: ولا شي .. تعبانه شوي
ميرة: زين ارتاحي لين يرد ذياب !!
فوز: بدق عليه لازم نروح
ميرة: تو الناس
فوز: محتايه أرتاح حاسه بتعب مو طبيعي
ميرة: سلامتج فديتج
فوز: الله يسلمج

جان علي يشوف عليها وما خاز عيونه عنها .. وهي متوترة وايد من نظراته .. دق الباب ودشت موزة ويا غيث .. ومن عقبها دشوا سعيد وذياب .. اللي تفاجأ أول ما شاف علي موجود .. وانتبه ع فوز اللي مبين عليها التعب والضيج .. هي أصلاً تعبانه وأكيد شوفتها لعلي ضايجتها زيادة ..

سلمت موزة ع الكل .. وباركوا حق ميرة ويلسوا يسولفوا .. جان الوضع متوتر وايد بسبب النظرات المتبادلة بين ذياب وعلي .. ونظرات علي لفوز اللي مو قادرة تتحمل وجودها هناك .. وعسب جيه قالت فوز لذياب إنها تعبانه وتبي تروح .. وطبعاً استجاب لرغبتها ولرغبته هو بعد .. علي ميود ولد أخته ويشوف على فوز حبيبته اللي كانت تهمس لذياب .. وهو يشوف قربه منها شلون .. وجان يتحسف على اللي صار له .. وهو يقول ف خاطره إن المفروض هو اللي يالس حذال فوز مو ذياب .. !!

وقف ذياب .. ووقفت فوز بعده ع طول .. بس كانت خلاص ريولها مو قادرة تشيلها .. حست براسها يدور .... أغمى عليها وطاحت لولا إن ذياب يودها بقوة بعد ما صرخ علي باسمها وهو منتبه ع الحركة اللي صارت .. الكل يشوفها والكل خاف عليها .. حاول ذياب يصحيها بس بدون فايدة كانت فاقدة الوعي .. راح سعيد يزقر النيرسز اللي يووا وخذوها ..

الكل جان خايف عليها .. أصلاً من يوم يات وهي مو طبيعية ومبين الإرهاق والتعب عليها ..

ميرة: ذياب طمنا عليها ..
ذياب: إن شاء الله

راح ذياب ويا النيرسز وراحت وياه موزة وغيث يشوفون فوز شفيها .. أما علي ف لحظتها تمنى يكون هو مكان ذياب .. جان وايد خايف عليها .. حتى لما زقر اسمها رغم إن هالحركة لفتت انتباه الكل وهي أكبر دليل إن علي جان يشوف على فوز .. بس محد قال شي ولا تكلم لحظتها .. جان وايد يحاتيها لولا إن ذياب موجود جان راح وياهم يطمن عليها بنفسه ..!!


عند فوز ..

دخلوها ف غرفة وحاولوا يوعونها .. وفعلاً استجابت وفتحت عيونها .. عطوها مغذي وسووا لها فحوصات .. وقالوا النتيجة تطلع بعد ربع ساعة .. يلست موزة عندها وراحو ذياب وغيث يشوفون الدكتورة ويسألون عنها .. وشو سبب حالة الإغماء اللي ياتها .. فوز فوق ما هي تعبانة أصلاً شوفتها لعلي أثرت فيها وايد .. ما كانت تتمنى تشوف علي أساساً ف كيف عاد لما تشوفه وهو بهالحالة اللي يرثى لها .. وآخر شي تتذكره قبل لا اطيح لما زقر اسمها .. حست شكثر علي للحين يحبها .. بس شو تقدر تسوي ها نصيبها من الدنيا !!

موزة: خوفتينا عليج
فوز وهي تصيح : شفتي علي ؟؟
موزة: إنتي للحين تفكرين فيه ؟؟
فوز: كسر خاطري شكله
موزة: فوز اللي صار ويا علي مو شويه محد ينكر هالشي .. بس بليز لا تعطين نفسج فرصة إنج ترجعين تفكرين فيه مرة ثانية .. عشان خاطري
فوز: غصب عني !!
موزة: لا تقولين إن طيحتج سببها علي !
فوز: لا أصلاً كنت تعبانه من قبل لا أيي المستشفى مدري شفيني
موزة: بس شوفة علي أثرت فيج
فوز: وايد .. آخر شي كنت أتمناه إني أشوفه لا وبهالحالة بعد !
موزة: انسيه يا فوز ..
فوز ودموعها تنزل م عيونها : حاولت يا موزة .. وربي حاولت
موزة: حاسة فيج .. اللي صار لج مو سهل .. بس كاني أنا بعد صارلي اللي صار وياج وقدرت أنسى سيف .. غيث عوضني عن وايد أشياء وعطاني وايد أشياء لو كنت خذت سيف يمكن ما حسيت فيها ولا لقيتها عنده .. أهم شي إن خذينا اشخاص يحبونا والله هالشي نعمة يا فوز بغض النظر إنتي منو تبين ومنو تحبين .. لا تخلين حياتج تعيسة وتدمرينها عشان ماضي راح وانتهى
فوز: ذياب ما يستاهلني .. وربي أحاول أسوي كل شي عسب أرضيه بس شوفتي لعلي اليوم وايد أثرت فيني وذكرتني بكل شي صار !!
موزة: كل شي صار بإختيارج يا فوز .. محد جبرج عليه
فوز: أدري !

دق الباب ودش ذياب اللي وياه غيث .. عقب ما خبرتهم الدكتورة بنتيجة الفحوصات ..


موزة: رحتوا عند الدكتورة ؟؟ شقالت ؟؟

راح ذياب صوب فوز ويلس حذالها .. باسها ع يبهتها ..

ذياب: الحمدلله ع سلامتج
فوز: الله يسلمك ..

موزة: شفيكم جيه .. خبرونا شقالت الدكتورة ؟؟ شفيها فوز ؟؟
غيث: أنا بترخص بروح عند ميرة أطمنهم .. تعالي وياي موزة
موزة: وبعدين يعني ؟؟
غيث: بقولج ف الدرب .. وخلي ذياب هو اللي يقول حق فوز ياللا !!
موزة: طيب

ترخصوا موزة وغيث .. وبقت فوز بروحها مع ذياب اللي الوناسة مبينه ف عيونه ..

فوز: شصاير ؟؟ شفيني أنا ؟؟

ذياب جان يشوف على فوز وهي مستغربة شفيه يطالعها جيه .. بدت تخاف إنه فيها شي جايد ..

فوز: شفيك تطالع جيه .. ذياب ؟؟
ذياب: أشوف حبيبتي وأتخيل شكلها وفيها بطن صغير
فوز: شقصدك ؟؟
ذياب: طلعت نتيجة الفحوصات .. إنتي حامل !! راح أصير أبوو وتصيرين أحلا أم !

فوز بصدمة : شو !!!؟؟
ذياب: أقولج إنتي حامل .. لازم تديرين بالج أحين تراج شايله روح ف بطنج ما أبيج اتعبين نفسج مول .. تفهمين !!

فوز للحين مو مستوعبة .. شلون يعني حامل !!؟ ما كانت تفكر فهالشي حالياً .. توهم معرسين ما كملوا 4 شهور لسه ..

ذياب: حبيبي شفيج ساكته ؟؟ مب مستانسة ؟؟
فوز: إنت مستانس ؟؟
ذياب: فوق ما تتصورين
فوز: عيل أكيد أنا مستانسة بس مدري
ذياب: شو ؟
فوز: يعني تونا معرسين
ذياب: أدري شتبين تقولين .. بس ها رزق من عند الله يا فوز .. ومحد يرد نعمة ربه
فوز: الحمدلله ..
ذياب: ياللا فديتج ارتاحي أحين
فوز: ما بنروح ؟؟
ذياب: بلا .. بس الدكتور قال نتريا المغذي يخلص وعقب بيرخصج
فوز: طيب !!


عند ميرة ..

دشوا غيث وموزة الغرفة .. للحين موزة ما عرفت فوز شفيها .. ويلست تحاول ويا غيث يخبرها ما رضا قالها بتعرف لمن يوصلون عند ميرة عسب يخبرهم كلهم ..

ميرة: تطمنتوا ع فوز .. شفيها ؟؟

كان علي يطالع عليهم بإهتمام .. يبي يعرف فوز شفيها وايد يحاتيها .. ومهم عنده يعرف إنها بخير وما تشكي من شي .. وهالشعور نفسه جان شعور سعيد لحظتها ..

موزة: مو راضي يقول شفيها .. راح ويا ذياب عند الدكتورة يرمسونها .. ومدري شقالت لهم ..
غيث: البنت ما فيها شي ..
ميرة: عيل ليش اغمى عليها فجأة ..؟ ليكون حامل ؟؟

رفع علي راسه وطالع ع ميرة .. وبدا الكل يشك ف كلام ميرة .. ممكن يكون هالشي صح .. الغريب إنه ما مر ف بال ولا واحد فيهم .. وطبعاً انتظروا الرد من غيث اللي أكد صحة كلام ميرة ..

غيث: يب
ميرة: صج والله ؟؟ وهي درت وإلا لسه ؟؟
غيث: أكيد درت لأن ريلها دش عندها يخبرها .. يمديه بلغها بالخبر
موزة: والله وسوتها فواز

علي: أنا بترخص !!
سعيد: ع وين ؟؟
علي: بسير البيت

انسحب علي بكل هدوء من الغرفة بعد ما خذ وياه صدمه ثانية .. بعد ما كانت الصدمة الأولى هي شوفته لفوز .. الصدمة الثانية إنها تكون حامل بهالسرعة .. وفخاطره يقول إن الياهل اللي ف بطن فوز جان مفروض يكون منه مو من ريال ثاني .. بس ها هو حكم القدر اللي ما يقدر يعترض عليه !!

طبعاً الكل حس إن علي تضايج من الموضوع .. بس ما يقدرون يقولون شي .. كاهو هو عاش حياته وتزوج وياب بنت بعد .. ليش يبي يحرم فوز من أبسط حقوقها !!؟

لحق سعيد علي .. حس إنه محتاي يتكلم ويقول اللي ف خاطره .. وهو ربيعه ولازم يكون معه ..

سعيد: علي ؟؟

طالع علي ع ورا يشوف منو يزقره ..

علي: هلا سعيد .. بغيت شي ؟؟
سعيد: شفيك ؟؟
علي: ماكو
سعيد: شكلك تضايجت .. تعال خلينا نرمس
علي: مافي شي نرمس عنه
سعيد: بلا فيه .. تعال وياي

طلعوا برع المستشفى .. وشافوا لهم كوفي شوب جريب يقعدون فيه وياخذون راحتهم ف السوالف .. طلبوا لهم عصير وبدوا يتكلمون ف الموضوع

سعيد: وأحين قولي شفيك ؟؟
علي: أحسده !
سعيد: منو ؟؟
علي: ذياب .. أحسده لأنه فوز صارت له .. أحسده لان ف بطنها ياهل منه .. أحسده
سعيد: شو هالرمسه يا علي !
علي: سعيد أنا أحبها .. ما قدرت أنساها والله .. حتى ف وجود شوق ف حياتي فوز كانت هي الحاضرة الغايبة بالنسبة لي .. وشلون بقدر أنساها وأنا بنتي كل يوم أشوفها وأزقرها باسمها .. شلون أقدر أنسى ؟؟
سعيد: اللي قاعد تسويه ما منه فايده .. فوز تزوجت وكاهي حامل .. وريلها يحبها وايد .. ومو مقصر وياها بشي .. فيه وايد أشياء إنت ما تعرفها .. ذياب وايد عانى ويا فوز ومو بسهولة قدرت تتقبله .. بس ف الأخير تقبلته .. لأنها تدري إنها ف أي لحظة ممكن إنها تفقده !!
علي: شو تقصد ؟؟ ما فهمت عليك .. شلون يعني ممكن تفقده ؟؟
سعيد: اللي خلا فوز تعدل معاملتها ويا ذياب .. وتحسسه بحبها له لأنها عاشت لحظة توقعت فيها إن ذياب خلاص راح وما بيرجع لها !!
علي: سعيد شفيك ترمس بالألغاز .. فهمني شصاير ؟؟
سعيد: لما جانوا ف شهر العسل .. ذياب طاح مريض بسبب تعامل فوز الجاف وياه ..
علي: لا عاد .. أكيد يحاول يسوي أي شي عسب البنت تحبه .. وإلا ريال بيطيح مريض من تعامل حرمته الجاف هاي اول مرة أسمعها !
سعيد: علي .. لا تظلم الريال .. ترا إنت ما عطيته فرصه ولا عطيت نفسك فرصه تتعرف عليه .. بالعكس هو انسان طيب وايد ومحترم .. ومشكلتك الوحيدة وياه ..
علي يقاطعه: مشكلتي الوحيدة وياه انه سرق حب حياتي !! مابي أظلمه بس ذياب يحاول يسوي أي شي عسب يخلي فوز تحبه .. واكيد المرض جان عذر خصوصاً لما يمرض ف أول أسبوع من زواجهم !! وبعدين إنت شدراك بكل ها ؟؟
سعيد: اتصلت ميرة ف فوز لما كنا بلندن تتطمن عليها .. وقتها فوز كانت بالمستشفى وتبجي ومو عارفة شلون تتصرف .. وكل اللي قالته لنا إن ذياب مات .. حجزنا ع اسكوتلندا ف نفس اليوم ورحنا عندها .. وفعلاً جان ذياب ف العنايه بس وضعه أفضل عقب ما طمنا الدكتور !!
علي: العنايه !! ليش شفيه ؟؟
سعيد: علي ذياب مريض بالقلب !
علي بصدمة: شو !!
سعيد: اللي سمعته .. وفوز لما درت بالموضوع تهاوشت وياه ولهالسبب طاح .. ومن وقتها فوز تحاول تحسسه بحبها واهتمامها لأنها كانت راح تفقده .. وهالشي خوفها وايد .. كافي اللي عانته من قبل ما كانت تتحمل صدمه يديده ف حياتها !
علي: شوفتها وياه اليوم ذبحتني .. ما تتخيل شو جان شعوري وأنا أشوفها واقفة حذاله وتهمس له .. تمنيت أكون مكانه .. تمنيتها ترد لي .. تمنيت هالياهل يكون مني !!
سعيد: عشت حياتك وسويت كل اللي ب راسك .. ولما خسرت كل شي ياي تتمنى ؟! إنت اللي ضيعت فوز م البدايه .. لا تيي تلومها أحين يا علي .. لا تكون أناني بتصرفاتك .. وخلك متذكر عدل إنك عشت حياتك ويا شوق الله يرحمها .. لا تحرم فوز أحين من إنها تعيش حياتها ويا الريال اللي يحبها ومحافظ عليها !!
علي: شوفتها اليوم هي اللي أثرت فيني وخلتني أفكر بهالطريقة .. ما توقعت إني راح أشوفها من عقب ما تزوجت .. وما كنت أبي أشوفها !!
سعيد: وشفتها ؟؟ ويمكن تشوفها غير هالمرة .. لازم تقوي نفسك وتخلي الوضع طبيعي من بينكم .. إحنا أهل .. انسى الماضي يا علي خلاص ما صار لك نصيب ويا البنت وانتهى الموضوع لا تيلس تضارب ع شي م البداية ما جان ملك لك !!
علي: أدري .. بس اللي تطلبه وايد صعب .. ما أقدر أنساها لو شو ما تسوون ما أقدر .. فوز هنيه .. تعرف شو يعني هنيه !! تمشي بعروقي !
سعيد: هدي أعصابك يا علي
علي: فراقها ما جان سهل يا سعيد .. بس حاولت أتناسى إنها اختارت ذياب وفضلته علي .. حاولت أشغل نفسي بوجود شوق الله يرحمها ف حياتي بس هم ماقدرت .. ما تدري هالبنت شو سوت فيني لخبطت حياتي من يوم ما عرفتها وحبيتها
سعيد: البنت ع ذمة ريال ثاني .. لازم تنتبه لهالشي .. خلاص ما عادت تحللك ..
علي: أدري .. وها اللي قاهرني !!
سعيد: علي اتمنالها الخير والسعادة ويا ريلها .. لا تتصرف بأنانية
علي: الله يوفقهم !!

نش علي م مكانه .. وسعيد يدري بحجم الضيج اللي ف صدره ف ما قاله شي وخلاه ع راحته .. صعد علي سيارته بدون لا يحدد وجهته .. أما سعيد ف رجع المستشفى عند حرمته !!


 

أم حور

¬°•| عضــو شرف |•°¬
إنضم
26 فبراير 2011
المشاركات
502
العمر
34
الإقامة
SoHaR

بيت أبو حمد
يوم الخميس
الساعة 4:00 عصراً



ذياب وفوز متغدين عند أهلها اليوم .. باجر بالليل طيارتهم ع ألمانيا .. وقالت تبي تيلس عند أهلها ليش إنها خلاص ما راح تشوفهم إلا عقب جم شهر .. كانت ريم ويا ولدها موجودة عندهم بعد قبل لا تسافر هي الثانية انجلترا بحكم إنه ريلها يشتغل هناك ..

ندى: فوز
فوز: ها حبيبي ؟؟
ندى: متى تعرفين الياهل ف بطنج بنت أو ولد ؟؟
فوز: مدري فديتج يمكن ف الشهر الخامس
ندى: وإنتي أحين ف أي شهر ؟؟
فوز: بدش الثاني عقب جم يوم
ندى: ااالله .. أبا أشوف البيبي حقج ..
فوز: اتريي 9 شهور وبتشوفينه
أم حمد: فوز هالله هالله بعمرج .. لا اتعبين روحج هالفترة لين ما يثبت الحمل ..
فوز: إن شاء الله يمه .. إلا ريم وينها ؟؟
أم حمد: صعدت فوق ترقد ولدها
فوز: ما شاء الله عليه وايد يصيح
أم حمد: هيه .. من يوم يات ما سكت إلا عقب شوي .. ريلج وين راح ؟؟
فوز: ظهر يمه .. يقول بيشوف ربعه وبيسلم عليهم

ف هاللحظة دق فون فوز .. كانت موزة متصلة فيها .. استغربت اتصالها هالوقت ف ردت عليها ع طول ..

فوز: هلا والله مواز ..
موزة: شحالج فديتج ؟؟
فوز: الحمدلله بخير .. شحالج إنتي ؟؟
موزة: يسرج الحال .. وين دارج ؟
فوز: عند الأهل ..
موزة: ههههه وأنا بعد عند أهلي
فوز: ما شاء الله ..
موزة: يب .. غيث مسافر الكويت جم يوم عنده شغل وخبرته بقعد ويا هلي
فوز: حلو والله .. أكيد ولهانين عليج
موزة: أونهم .. زين أقولج
فوز: آمري ؟؟
موزة: شرايج تيين عندي اليوم ع العشا ؟؟ نرجع ذكريات زمان
فوز: فكرة حلوة والله .. ممممم
موزة: شو ؟؟
فوز: شرايج أدق على نورة بعد .. خل تيي صارلنا فترة طويلة ما شفناها ..
موزة: كنت بعزمها بروحي بس رقمها مو عندي
فوز: مو مشكلة انا بدق عليها وبخبرها
موزة: حلوو .. ع الساعة 7 إنتو هنيه
فوز: ولا يهمج بس خليني استأذن من ذياب قبل
موزة: أوكيك .. أتريا رد منج
فوز: ع خير ..


بندت فوز عن موزة .. وقبل لا تدق حق ذياب هو اللي دق عليها .. ما يرتاح لمن يكون بعيد عنها ييلس يحاتيها وايد .. بين كل ربع ساعة يدق يسأل عنها ..

ذياب: هلا حبيبي
فوز: أهلين ..
ذياب: شحالج ؟؟
فوز: الحمدلله بخير .. يالله يا ذياب مو جأنه قبل ربع ساعه داق
ذياب: زين قلبي خليني أتطمن عليج
فوز: وينك فيه ؟؟
ذياب: أحين جدام بيتكم .. بدش الميلس تعالي
فوز: أوكيك

بندت فوز عنه .. وراحت تترياه ف الميلس .. شوي ودش ذياب عندها ..

ذياب: هلا بقلبي هلا
فوز بابتسامة: هلا فيك .. شو ما تأخرت ع طول رجعت
ذياب: اشتقت لج
فوز: صج والله ؟؟
ذياب: عندج شك فهالشي ؟؟
فوز: ممممم لا ..
ذياب: فديتج والله .. تدرين اتفقنا اليوم نلتقي ع العشا بس مدري ما أكدت عليهم .. مابي أخليج بروحج
فوز: زين روح .. لأن أنا بعد مواز دقت علي وتبيني أروح عندها اليوم .. قلت لها بآخذ رايك قبل بالعادة تكون مخطط حق شي وأيي ف آخر لحظة أخرب خططك
ذياب: هو أنا مخطط حق شي .. بس ياللا ما عليه يوم غير .. روحي عند رفيجتج واستانسي
فوز: طيب عقب بدز لها أخبرها
ذياب: الساعة جم بتروحين ؟؟
فوز: الساعة 7
ذياب: عيل بوصلج وعقب بروح عند الربع ليمن تخلصين
فوز: بروح بروحي ..
ذياب: نو واي .. لا تحاولين
فوز: ليش ؟؟ صار لي فترة ما سقت بنسى السياقه جيه
ذياب: أولاً عندج اللي يوديج ف مو محتايه تسوقين .. ثانياً إنتي حامل ومابيج اتعبين روحج .. ثالثاً وهو الأهم لأني أبا أتطمن عليج ف أحسن أوصلج بنفسي لأني لو خليتج بروحج تروحين بقعد أحاتي
فوز: ياربي يا ذياب .. زين خلاص .. شرايك بعد نروح نبيع السيارة شفايدتها
ذياب: ههههههه تدرين عاد شكلج يصير حلو وإنتي معصبة
فوز: مو معصبه
ذياب: بلا معصبه .. وهاي بوسه للحلو

باسها ع خدها .. وفوز تشوف عليه مستغربة منه هالإنسان .. يعني مو معقولة يعاملها جأنها ياهل ..

ذياب: شفيج تشوفين جيه بسم الله
فوز: ما أحبك
ذياب: مو ضروري ..أنا أحبج وأحب اللي ف بطنج
فوز: ذياب
ذياب: عيونه
فوز: لا تعاملني جيه .. تحسسني إني ياهل والله مب شي
ذياب: أنا اول مرة أشوف حد يضايج إذا أكو حد ثاني يعني يهتم فيه
فوز: مو جيه بس إنت وايد تبالغ ترا
ذياب: من حقي أبالغ
فوز: ليش ؟؟
ذياب: لأني أحبج واللي يحب يسوي أي شي
فوز: خلاص أوكي
ذياب: قلبي لا تعصبين .. شفيها يعني إذا وصلتج
فوز: مو سالفة إنك بتوصلني بالعكس ها شي يفرحني بس اهتمامك المبالغ فيه يضايجني
ذياب: أحين صار اهتمامي مبالغ فيه ؟؟ طيب يا فوز ماني مهتم وروحي وين ما تبين ..

نش ذياب أونه زعلان بس هو ما يقدر يزعل ع فوز .. وسوا روحه بيظهر .. وقفت فوز وتزقره ومو مسولها سالفه ..

فوز: ذياب !!

مشى ذياب عنها وفجأة حست نفسها بترجع وراحت صوب المغاسل تركض .. انتبه عليها ذياب وراح لها ع طول ..

ذياب: شفيج فوز ؟؟
فوز: حاسه بغثيان

بدت فوز ترجع وذياب واقف حذالها وميودنها لا اطيح .. وساعدها تغسل وردها تقعد ع القنفه ..

ذياب: بشو حاسه أحين ؟؟
فوز: الحمدلله أحسن
ذياب: شو مآكله إنتي ؟؟
فوز: ماكو بس يمكن هاي أعراض الحمل
ذياب: لا تقولين بتمين جيه طول التسعة شهور؟؟
فوز تطالعه بنص عين : شلون يعني ؟؟
ذياب: شو شلون يعني .. حبيبي بتختفين لو تميتي جيه
فوز: لا عاد مو لهالدرجة بعدين ها م الحمل أول الشهور عقب الوضع عادي ..
ذياب: ما تهونين علي .. لو أدري الحمل بيسوي فيج جيه ما بغيت يهال
فوز: وينه اللي قبل شوي زعلان وازقره ومسولي طاف
ذياب: يا عمري إنتي تدرين إني ما أقدر ازعل عليج
فوز: يب يب أدري
ذياب: شو حبي بتروحين عند مواز ؟
فوز: يب أنا بخير مافيني شي
ذياب: أوكي .. صحيح دقت هند وتسلم عليج
فوز: صج .. شخبارها ؟؟
ذياب: تقول وايد مستانسه .. هم ف ألمانيا ردوا من فرنسا قبل جم يوم
فوز: فديتها ولهت عليها وايد
ذياب: هي دقت ع فونج ترا بس تقول جان بزي وعسب جيه اتصلت فيني ..
فوز: يمكن دقت لما كنت أرمس مواز .. بس ما ظهر عندي إن حد يتصل ..
ذياب: ما عليه ما صار شي .. صح بشرتها إنج حامل
فوز: سخيف ليش ما خليتني أنا أقولها
ذياب: كيفي .. ولدي وأنا حر
فوز: شدراك إنه ولد يمكن بنت
ذياب: دام منج كلهم حلوين
فوز: ذياب بس عاد

يلسوا يسولفون ويا بعض .. وعقب ترخصت فوز بتزهب روحها حق الطلعة وذياب قعد ف الميلس شوي وياه حمد قعدوا يسولفون لين ما أذن المغرب .. سار يصلي وبعدها تزهب واتريا فوز ع أساس يوصلها عند موزة وعقبها يروح ويا ربعه !!!



يوم الخميس
بيت أبو حميد
الساعة 7:15 مساءاً



فوز وموزة ف ميلس الحريم يسولفن .. للحين نورة ما يات مع إن فوز خبرتها بالموعد .. بس بما إنها ما دزت لهم تعتذر ف أكيد راح تيي ويمكن صادفها ظرف خلاها تتأخر

موزة: لما رمستيها شقالت لج ؟؟
فوز: وايد قالت .. استانست طبعاً وقالت بتيي ولهانه علينا حيل .. وصار لها فترة ما ظهرت م البيت وودها تغير جو ..
موزة: فديتها .. اللي صار لها مو شويه
فوز: يب .. بس الحمدلله ع كل حال .. كل وحده منا كانت لها تجربتها القاسية .. وفي الأخير الله سهل أمورنا وكانا الحمدلله عايشين
موزة: هي ما تزوجت من عقب طلاقها ؟
فوز: لا .. مع إن ريلها حاول يردها بس ما رضت .. عقب شو يردها اللي ياها منه مو شويه ..
موزة: مسكينه نواره .. أقلنا حظ طلعت مع إنها أول وحده عرست
فوز: ها نصيبها ف الدنيا وإن شاء الله بتحصل ولد الحلال اللي يحافظ عليها ويصونها
موزة: إن شاء الله
فوز: علومج إنتي ويا غيث ؟؟
موزة: الحمدلله .. حدي مستانسة والله
فوز: ومممم سيف ماكو آخبار عنه ؟؟
موزة: لا .. من يوم ما تكلمنا هاك اليوم قبل العرس ما شفته ولا أدري عنه شي ولا مهتمة إني أعرف
فوز: تكلمتو ؟ ف شو ؟؟ ووين شفتيه ؟؟
موزة: مو كنت ف بيت أختي ويا .. ما قدرت أيود نفسي يا فوز ..
فوز: شو سويتي ؟؟

موزة وهي تتذكر تفاصيل هاك اليوم .. مستحيل تنسى اليوم اللي قدرت فيه إنها ترد ربع اللي سواه سيف فيها ..

موزة: ف البداية رفضت أتكلم وياه .. بس ما قدرت حسيت إن ف داخلي شي لازم أطلعه ..

مدت إيدي ع خده .. ضربته طراق ع ويهه

موزة: هذا لأني فكرت أحب واحد مثلك

ضربته الطراق الثاني .. وسيف ما تحرك ولا سوا أي شي .. يمكن منصدم أو إنه يشوف نفسه مستحق لهالطراقات اللي تييه

موزة: هذا لأنك خليتني أنتظرك وسافرت وخذت وحده خايسه

ضربته الطراق الثالث .. وللحين سيف ع هيئته ..

موزة: وهذا عشان أبوي .. اللي فكرت تقهره وتعتدي ع بنته !!

كنت وايد أصيح .. ما قدرت أتحمل ومشيت وخليته .. وهو متصنم مكانه مو مستوعب اللي قاعد يصير .. بس أخيراً نطق !!

سيف: أنا آسف وربي ما قصدت أأذيج يا موزة .. وربي إني أحبج وكنت أبيج تكونين لي بأي طريقة .. وقتها ما كنت ف وعيي .. سامحيني !!
كملت طريقي وخليته بحسرته .. خلاص هو خسرني ليش ياي يراهن ع ورقة خسرانه أحين .. شلون يعتقد إني ممكن أسامحه ع اللي سواه .. واللي سواه مب هين شلون ؟؟؟

فوز: معقولة كل ها صار ؟؟
موزة: هيه .. بس ما قلت حق حد .. غير إنتي أحين
فوز: وغيث ؟؟
موزة: ما حبيت أقوله لأني عارفة إنه بيتضايج .. وعادي يمنعني أروح أشوف أختي وعيالها ..
فوز: مدري جان المفروض تخبرينه ..
موزة: خلاص الموضوع مر عليه فترة .. وسيف طلع م حياتي للأبد
فوز: سبحان الله .. شفتي النصيب شلون ؟؟
موزة: هيه والله .. منو قال إنج بتاخذين ذياب .. وإلا أنا بخذ غيث ..
فوز: صج مو كأنها نورة تأخرت ! هالسبالة مشتاقتنها ويالسه تتغلا علينا
موزة: هيه والله .. اتصلي فيها شوفي وينها فيه


عند نورة ..

تأخرت نوره لأنها راحت تاخذ هدية حق موزة وفوز .. صار لها فترة طويلة ما شافتهن وولهانه عليهن وايد .. وشافت مو حلوة تيي تشوفهن وإيدها خاليه .. صار لها موقف ف السنتر وتنرفزت من اللي صار بس ما بغت تخرب ع نفسها وناستها بشوفة رفيجاتها .. أول ما وصلت بيتهم موزة .. وف نفس اللحظة اللي تبركن فيها سيارتها .. سيارة 2 بركنت جدام البيت .. نزلت نورة ونزل الريال اللي ف السيارة ..

انصدمت نورة أول ما شافته .. وهو وضعه نفس وضعها بالضبط .. شافت عليه بنظرة استغراب إنه شو يسوي هنيه .. وهو مستغرب هي شو تسوي هنيه ..

نورة: إنت ما تستحي ع ويهك لاحقني لهنيه ؟؟ شو تبا ؟؟ السيارة وقلت لك بصلحها بروحي مابي حد يصلحها
حميد: لا والله .. وإنتي مصدجة إني لاحقننج .. إنتي اللي لا حقتني مو أنا !!
نورة: أنا .. تخسي والله مو لاقيه ألحقك إلا أنت
حميد: عيل شو يايه تسوين بيتنا !!؟؟
نورة بصدمة: شو !!؟

وكأنها بدت تتذكر هالويه وين شايفتنه من قبل .. شلون يعني بيتهم ها بيت مواز .. معقولة ها واحد م خوانها !!

حميد: هيه بيتنا .. شعندج يايه هنيه ؟؟
نورة: يايه عند موزة !!
حميد: شو؟؟
نورة: ع العموم أنا آسفة .. بس استغربت وجودك هنيه
حميد: وأنا أسف .. أعتذر ع أسلوبي وياج .. لحظة بزقر لج موزة

دش حميد داخل البيت يشوف مواز .. ونورة ما عارفه وين تودي ويهها .. كانت تتمنى الأرض تنشق وتبلعها ولا تتعرض لهالموقف !! نزلت الأكياس م السيارة ووقفت تتريا مواز تييها ..

يات موزة ع طول من خبرها حميد وقربت نورة وسلمت عليها .. وعقبها دشن الميلس عند فوز وسلمت نورة ع فوز اللي ولهانه عليها وايد ..
فوز: تعبتي نفسج نواره ما يحتاي كل ها والله
نورة: ما يصير عاد .. هدية الزواج كافي إني ما حضرت مع إن جان ودي أحضر والله
موزة: معذورة فديتج ..
فوز: شفناج تأخرتي قلنا خلاص هونتي .. مو يايه
ابتسمت نورة: ووين أهون والله ما تدرون شكثر ولهانه عليكن ..
موزة: وشاللي أخرج هالكثر !!؟
نورة: سكتن سكتن .. استوا أكشن
فوز: هههههه شو م الآكشنات !!
نورة: والله للحين مو مصدجة .. عقلي ما قادر يستوعب
موزة: شو مستوي ؟؟ قولي لاه
نورة: مريت السنتر آخذ الهدايا وأنا طالعة عند الباركنات .. واحد موقف سيارته حذال سيارتي .. وأنا داخل السيارة لسه ما تحركت .. بطل باب سيارته بالقو وضرب ف سيارتي
فوز: شت !!
نورة: حسيت قلبي وقف وتنرفزت السيارة ما كملت شهر عندي .. قلت ها شو يخبص !! ونزلت


نورة: لو سمحت !! شو إنت ما تشوف ؟؟
حميد: السموحة والله .. ما انتبهت
نورة: شو ما انتبهت سيارة هاي واقفة حذالك مو قطوة عسب ما تنتبه
حميد: قلت السموحة ليش تصارخين بعد ؟؟
نورة: يعني ما منتبه إن السيارة يديدة .. شوف شو سويت
حميد: زين خلاص بصلحها لج .. قولي جم تبين؟؟
نورة: جم أبا ؟؟ خلي فلوسك لك .. بس مرة 2 انتبه
حميد: لا حول ولا قوة إلا بالله .. قلت لج لا تصارخين
نورة: شرايك تذلف من ويهي لأني واصلة حدي
حميد: إنتي شفيج جيه .. قلت لج ما انتبهت واعتذرت منج والسيارة بصلحها .. صج ماله داعي ترا كل هالشي
نورة وهي تحاول تهدي نفسها : أستغفر الله العظيم

نورة: ههههه قلت جيه ورحت عنه بس والله الود ودي أذبحه
موزة: ههههههههه منو هالمسكين اللي طاح ف لسانج !!

صخت نورة كأنها تذكرت السالفة .. هي ما كملت اللي صار !!
فوز: شفيج نواره ؟؟
نورة: تعرفون منو ها ؟؟ توني جدام بيتكم مواز متناقرة وياه !! أتحراه لاحقني !!
موزة: لاحقنج لهنيه ؟؟
نورة: لا ..
موزة: عيل شو ؟؟
نورة: طلع أخوج !!
فوز وموزة بصدمة: شو ؟؟؟
نورة: أول ما نزلت هو ينزل م سيارته .. أشوف عليه مو مستوعبه وتناقرت وياه قلت له لاحقني لهنيه بعد .. قال لا إنتي اللي لاحقتني
موزة: حميد !!
نورة : ها حميد ؟؟؟ مستحيل شكله وايد متغير
فوز: هههههههههههه والله انج فلم يا نورة
نورة: سكتي فواز .. كرهت حياتي لما قالي ها بيتنا إنتي شو يايه تسوين هنيه ؟؟
فوز: ما عرفت وين أودي ويهي
موزة: ههههههه حصل خير
نورة: لا صج والله اعتذريلي منه مو قصدي بس سيارتي حرام يديدة عورني قلبي عليها
موزة: هههههه إن شاء الله ولا يهمج .. بخبرهم يحطون العشا ..
فوز: أوكي .. ترا تأخرت ذياب داز مسج يسأل إذا خلصت أو لا
موزة: قوليله تو الناس ..
فوز: خلاص رديت عليه خبرته ع 9 إيي ياخذني
نورة: قبل يومين خلوف جأن يسألني عنج
فوز: للحين ما تزوج ؟؟
نورة: لا .. يقول ما يبي يعرس .. تدرين إنتي بعد
فوز: يب أدري .. إن شاء الله بيلقى البنت اللي يحبها وتحبه وتحافظ عليه
نورة : إن شاء الله !! وإنتي شخبارج ؟؟ شلون ريلج ؟؟
فوز: الحمدلله .. ماكو منه والله .. وأحين نتريا ياهل ف الطريق
نورة: صج ؟؟ بالمبارك فديتج
فوز: الله يبارك فيج .. وإنتي علومج طمنينا عنج ؟؟
نورة: الحمدلله .. كاني ف البيت من خلصت جلسات العلاج
فوز: وسالم ؟؟
نورة: ماكو اخبار عنه من لمن حاول يردني ورفضت ..
فوز: هو تعالج ؟
نورة: مدري والله .. يمكن ! بس المشكلة إني من البداية لما وافقت عليه ما كنت أحبه .. وافقت بس لأني كنت أبي أتزوج وهو أصر إنه يباني .. ياللا الحمدلله ع كل حال
فوز: بييج نصيبج جريب إن شاء الله
نورة: ما عاد يهمني
فوز: الزواج حلو ترآ .. كل ما في الأمر إنج لما تزوجتي اخترتي الشخص الخطأ .. صدجيني بتحسي بقيمة الزواج لا ياج اللي يحافظ عليج !!
نورة: عسى خير !!

تعشن البنات مع بعض وعقبها كل وحده رجعت بيتها .. نورة اللي مو متخيلة الموقف اللي صار لها اليوم ويا حميد أخو موزة .. القدر شلون جمعهم وتشوفه بنفس اليوم مرتين وفوق ها يطلع أخو رفيجتها !!


بعد مرور 8 أشهر


بيت عبدالعزيز ( أبو عبدالله )
يوم الأربعاء
الساعة 8:00 مساءاً



علي ويا بنته ف بيت أخوه .. كل يوم تقريباً إيي يتغدا ويتعشا عندهم ع حسب ما يكون فاضي .. كانت خولة بالصالة وياه يسولفون .. وعبدالله ترخص عنهم عند شغل ..

علي: فوز ولدت ؟!
خولة: شو هالسؤال الغريب ؟
علي: مو غريب .. المفروض تولد هالشهر وإلا أنا غلطان ؟؟
خولة: مدري والله الأخبار عند ميرة .. بس ليش تسأل عنها
علي: ماكو !
خولة: للحين تحبها ؟؟
علي: وايد !!
خولة: علي إنت مو ناوي تعرس ؟!!
علي: لا طبعاً !
خولة: وبنتك ؟؟ حرام مخلي بنتك جيه .. فوز محتايه لأم ترعاها إنت أغلب وقتك في الدوام لين متى بتخلي البنت ف إيد مربية !!؟
علي: مدري .. بس زواج مابي اتزوج
خولة: فكر في الموضوع عدل يا علي .. مو عشانك عشان فوز .. باجر بتكبر وبتحتاي اللي يعلمها ويفهمها وتربية البنت غير عن تربية الولد
علي: مابي أكرر اللي صار مع شوق .. ومابي أعيش حياتي مع وحده ما أحبها بس عشان تربيلي بنتي !! في الأخير هالوحده راح يكون اسمها زوجتي
خولة: واللي تحبها متزوجة وتتريا مولود !! يعني لمتى بتم جيه ؟؟
علي: ما أعرف .. من يدري يمكن إيي يوم أصادف وحده وأحبها لو إني مستبعد إن هاليوم إيي لأن فوز الوحيدة اللي قدرت تدش قلبي !!
خولة: الله يهديك يا علي .. تفكر ف حرمة معرسه خلاص فوز اختارت دربها .. ومستانسه ويا ريلها .. عيش حياتك لأنك ما تقدر تغير الواقع !
علي: يمكن ما أقدر أغير الواقع .. بس محد يدري القدر شو مخبي لنا !!

دق الجرس .. وكانت ميرة يايه ويايبه وياها ولدها محمد .. نزلها سعيد وراح جان مواعد ربعه ..

ميرة :شحالكم ؟؟
خولة: الحمدلله شحالج إنتي ؟؟ شخباره هالعسل ؟؟
ميرة: الحمدلله بخير .. وهالعسل ما شاء الله عليه ماكو مثله
خولة: فديته .. كبر ما شاء الله
ميرة: هيه مستوي ريال وييلس أحين
خولة: هههههه زين والله
ميرة: علاوي شفيك ساكت ؟
علي: ماكو بس جيه مالي خلق أرمس
ميرة: أونه .. خلقك وين ؟؟
علي: راح يتحوط
ميرة: لاه .. إلا فوز وينها ؟؟
علي: عند المربية تعشيها
ميرة: أهاا زين .. شو الأخبار بعد ؟!!

فهاللحظة دق تليفون علي .. كان رقم غريب يتصل فيه .. ما رد عليه .. بس لما وصله مسج من نفس الرقم طلع من عند خولة وراح يتكلم في التليفون خاري !!

ميرة: شفيه مضايج ؟؟
خولة: كنت أحاول أقنعه يتزوج بس مول مو راضي
ميرة: توقعت !
خولة: للحين يفكر ف فوز .. تصدجين سألني إذا ولدت أو لا ؟
ميرة: شدراه إن ها آخر شهر لها ؟
خولة: مدري استغربت
ميرة: مرمستنها أمس تقول للحين مافي شي بس موعدها عقب أسبوع
خولة: الله يسهل عليها ويقومها بالسلامة
ميرة: آمين يا رب
خولة: ما يات خالتي وياج ؟؟
ميرة: ف البيت تقول تعبانه وبتنام
خولة: وسعيد ليش ما نزل ؟؟
ميرة: مواعد ربعه
خولة: ياللا زين يابج هنيه تيلسين ويايه حدي ملانه
ميرة: عيالج وين ؟؟
خولة: عند فوز
ميرة: اهاا .. حجزيلها واحد منهم
خولة: ههههههههه أخاف لا كبروا يتضاربون عليها
ميرة: يسوونها والله .. وهي فديتها ما شاء الله ماخذه الحلا من أمها وأبوها
خولة: هيه ما شاء الله ..

رجع علي .. كان يبين عليه التوتر .. الاتصال اللي ياه جلب وضعه .. وخلاه ف صدمه .. مو عارف يعبر عن مشاعره رغم احساسه بالحزن والضيج !!

علي: بترخص عنكم .. خولة لو ما عليج أمر خبري المربية بنروح
ميرة: ع وين يالسين ؟؟
علي: وإلا أقول خلو فوز هنيه .. باجر بيي آخذها
ميرة: وين بتروح ؟؟
علي: مالي خلق أتكلم احين ..
خولة: تمام .. لا تحاتي فوز ف عيونا
علي: طيب .. ياللا مع السلامة !!

ترخص علي بسرعة .. وميرة وخولة مستغربات شفيه ؟؟ ومنو اللي متصل فيه وخلاه بهالحالة !!؟؟ بس ولا وحده تكلمت ! قامت خولة تشوف اليهال وميرة يلست تلاعب ولدها لين ما يا سعيد وخذاها !!

بيت ذياب
يوم الأحد
الساعة 5:00 عصراً



فوز ف آخر الأيام .. ما باجي شي على ولادتها ومن شهر استقروا ف البلاد .. تبي تربي ف بلادها بين أهلها وناسها .. طول فترة الحمل جان ذياب وياها وما خلاها أبداً .. حست شكثر هي ف نعمة بوجود ذياب ف حياتها .. يهتم فيها ويداريها .. وكل ما يكون نفسها ف شي ع طول إييبه لها .. كانوا يالسين في الصالة .. ملاحظة عليه من جم يوم متغير مو قل اهتمامه بالعكس زاد وزاد وايد بعد .. يمكن لانها جريب بتولد وما يبي يحسسها إنها بروحها .. مع ذلك تشوفه سرحان وايد ويفكر جأن فيه شي شاغل باله ..

فوز: حبيبي
ذياب: هلا حبي ؟؟
فوز: مممم أبي أقولك شي
ذياب: آمري غناتي
فوز: مابي أرد ألمانيا .. أبي أستقر هنيه .. تعبت م السفر والسيرات والردات وأحين بيكون عندنا ياهل بعد
ذياب بابتسامة: فديتج أدري والله بس شسوي ظروف دراستي وشغلي هناك وفنفس الوقت ما أقدر أخليج هنيه وأروح عنج
فوز: ولا أنا أبيك تخليني .. بس يعني ماكو حل ؟؟
ذياب: بشوف إذا يصير أكمل هنيه أو لا .. وإن شاء الله خير
ولا يهمج خلاص راح تستقرين هنيه إن شاء الله

سرح ذياب .. راح بعيييييد .. وفوز تشوف عليه مو معقول هالإنسان عمره ما رد لها طلب .. ولا حتى ضايجها وكدرها ..

فوز: ذياب .. ذياب
ذياب: هاه حبيبي
فوز: فشو تفكر ؟؟
ذياب: ولا شي .. شو حاسه بشي ؟؟ بتولدين ؟؟
فوز: هههههه لا شفيك مستعيل علي
ذياب: أبي أشوف ولدي
فوز: يمكن بنت
ذياب: محد قالج ما تروحين تشوفين ف الجهاز .. كنا عرفنا وخلصنا
فوز: مو حلو جيه .. أحسن نتفاجأ عقب
ذياب: زين خبرتج قبل ترا كلهم حلوين
فوز: أدري .. ممم ما قلت لي شو بتسمي الياهل ؟؟
ذياب: إذا بنت انتي سميها .. وإذا ولد سميه ذياب !!
فوز: شو ؟؟
ذياب: شفيج .. أبيج تسميه ذياب
فوز: شلون يعني ؟؟ ذياب من صدجك ؟؟
ذياب: هيه
فوز: مابي طبعاً
ذياب: تراهنين ع هالشي ؟؟
فوز: ذياب !!
ذياب: زين لا تعصبين هههههه لا تولدين أحين م العصبية
فوز: ما يضحك .. سخيف ما أحبك
ذياب: أعشقج

نشت فوز عنه .. رفع لها ضغطها .. بس وقفها ويود لها إيدها ..

ذياب: تعالي وين رايحه
فوز: تعبانه بسير أرتاح
ذياب: حبيبي عاد عن الزعل أسولف وياج
فوز: زين خلني أروح بتصل حق نورة آخذ علومها
ذياب: كاهو الفون دقي عليها هنيه
فوز: ياربي كل ها عسب ما أروح
ذياب: ما أبيج تمشين واتعبين نفسج
فوز: المشي مفيد في الأشهر الأخيرة
ذياب: طيب ما أبيج تفارقين عيني .. خليني أشبع منج
فوز: مجابلتك 24 ساعة وللحين ما شبعت ؟؟
ذياب: لا ولا راح أشبع .. أحبببببببج
فوز: ذياب عن الخبال
ذياب: أوكي قلبي يلسي ياللا ودقي حق ربيعتج
فوز: أوكي

يلست فوز ويودت فونها تدق ع نورة .. وذياب يشوف عليها والحب يبين ف عيونه .. يالس يشاغلها أونه يبي يسمع ولده ويلعب ف بطنها ويرسم دوائر ..

فوز: ذياب
ذياب: عيونه
فوز: خلني أعرف أتكلم .. إذا ردت البنت وإنت تسوي هالحركات يا ويلك
ذياب: ههههههه زين زين

فوز: السلام عليكم ..
نورة: وعليكم السلام والرحمة
فوز: هلا والله بالعروس .. شحالج ؟؟
نورة: الحمدلله بخير .. شحالج إنتي ؟؟
فوز: يسرج الحال .. وحميد شحاله ؟؟
نورة: طيب الحمدلله
فوز: مستانسة ؟؟
نورة: وايد .. الحمدلله الله عوضني خير
فوز: شفتي الدنيا شلون صغيرة منو يقول إنج بتاخذين أخو مواز
نورة: هيه والله .. سبحان الله كل شي قسمة ونصيب
فوز: أهم شي تكوني مرتاحة
نورة: فوق ما تتصورين فديتج
فوز: الحمدلله .. شو متى رجعتو م السفر ؟؟
نورة: قبل يومين تقريباً
فوز: نايس والله
نورة: شخبارج إنتي ؟؟ شو هباتج؟؟
فوز: ههههه والله أساحب ع قولة العيايز .. بس الحمدلله
نورة: مو خايفة ؟؟
فوز: أكيد خايفة بس ربج يسهلها
نورة: آمين يا رب

فوز: ذياااااب
ذياب: أحبج

نورة: ههههه شفيه ريلج؟؟
فوز: ما عليج منه .. بيشوف شغله بعدين
نورة: هههه خفي ع الريال
فوز: متعمد والله يطفربي
نورة: الله يخليكم حق بعض
فوز: آمين يا رب .. زين فديتج بخليج أحين قلت بآخذ علومج
نورة: ما تقصرين حبيبتي .. ديري بالج ع روحج ولا تنسين تخبرينا لا ولدتي
فوز: إن شاء الله غلاتي .. ياللا فمان الله
نورة: ربي يحفظج

فوز بعصبية: ذياب !!
ذياب: عيونه وروحه
فوز: شفيك إنت ما خليتني أعرف أتكلم ويا البنت
ذياب: زين لا تعصبين .. أنا حاس إنج اليوم بتولدين والسبه هالعصبية اللي فيج
فوز: إذا ولدت اليوم كله من تحت راسك
ذياب: هههههه زين تراني مستعيل أبا أشوف ولدي حبيبي
فوز: مستانس ؟؟
ذياب: وايد يا فوز .. من قلبي أشكرج لانج عيشتيني هالسعادة .. أدري إني آثرت سعادتي ع سعادتج بس والله من حبي لج
فوز: اششششش لا تقول شي .. تأكد إنك أصح قرار اتخذته ف حياتي
ذياب: من قلبج هالكلام ؟؟
فوز: من قلبي يا ذياب

حس ذياب بألم ف قلبه بس ما قال شي وحاول إن فوز ما تنتبه له .. رغم إن ويهه مبين عليه التعب .. يلسوا يسولفون شوي وعقبها راح ذياب داره يآخذ له شور !!



بعد مرور شهر

بيت أبو ذياب
يوم الخميس
الساعة 2:00 ظهراً


فوز ف دار ذياب .. حاطة ولدها ذياب ع ريولها .. اللي جان ذياب يبيه صار .. وسمت ولدهم ذياب .. للحين فوز مو قادرة تنسى الوجع اللي سببه لها غياب ذياب عن حياتها .. وللحين تذكر اليوم اللي توفى فيه.. اليوم اللي قالها إنه يبي اسم ولده يكون ذياب وعصبت عليه .. كأنه حاس إنه ولده راح إيي ع الدنيا وما بيشوفه .. اليوم اللي قالها إنها خلاص بتستقر ف البلاد وما راح تسافر .. اليوم اللي ......


فوز: شكلك تعبان .. سير ارتاح
ذياب: مابي .. ودي أيلس وأجابلج بس
فوز: ذياب
ذياب: تدرين أحياناً الواحد يسوي أمور غصب عنه .. وتصير له أمور هم غصب عنه .. بس كل شي بإرادة الله ..
فوز: ما فهمت شو تقصد
ذياب: راح تفهمين كلامي عقب .. فوز إنتي مسامحتني ؟؟
فوز: شفيك ذياب .. أسامحك ع شو ؟؟
ذياب: لأني خذيتج من علي
فوز: شو هالرمسة يا ذياب .. علي بالنسبة لي ماضي إنتهى .. إنت ريلي وحبيبي وكل شي ف حياتي ..
ذياب: يمكن كنت أناني لما فكرت ف نفسي وشو أبا .. وما فكرت فيج
فوز: ذياب أنا اخترتك عن قناعة .. مالها داعي هالرمسة أحين
ذياب: أبيج تسامحيني يا فوز ..
فوز: شكلك صج صج ناوي تخليني أولد اليوم .. خلاص عاد
ذياب: زين لا تعصبين ويا ويهج
فوز: ويهي الحلو
ذياب بابتسامة: اللي أحبه وايد وبفتقده وايد
فوز: ليش وين ناوي تروح ؟؟
ذياب: أروح آخذ شور
فوز: أوكي .. نعيماً مقدماً حبي
ذياب: الله ينعم عليج حبيبي

مشى ووقف بنص الدرب وشاف على فوز بنظرة ما فهمتها ..

فوز: شو ؟؟
ذياب: أنا وايد أحبج ..
فوز بابتسامة: وأنا بعد أحبك وايد

ابتسم وعطاها نظرة حزينة استغربتها فوز وايد .. وراح عنها .. كانت آخر كلمة سمعتها من ذياب وآخر ابتسامة كانت تصيح .. دموعها للحين ما جفت .. وذاكرتها ما نست كلام ذياب لها جأنه بكل كلمة وكل حرف كان يودعها .. جأنه جان حاس إنه خلاص راح يهد هالدنيا باللي فيها ..
قبل لا المفروض يروح ياخذ له شآور .. تفاجأت لما راحت دارها ترتاح إن ذياب راقد .. خلته ع راحته شكله جان يبين إنه تعبان ومرهق .. وعقب نص ساعة جان جريب يأذن المغرب قالت بتوعيه

فوز: ذياب .. حبيبي .. ذياب

ما جان يتحرك مول .. وهي تحاول تلعب بشعره بس للحين على هيئته

فوز: حبيبي قوم ياللا أحين بيأذن المغرب .. باسته ع خده .. إذا ولدت أحين كله منك ياللا قوم شكلي صج بولد اليوم من تحت راسك .. ذياااااب !!

أخيراً انتبهت إن ذياب ما يتحرك .. وبدا الخوف يبين على ويهها .. وهي تصيح

فوز: ذياب ؟؟ ذياب شفيك ؟؟ لا تلعب وياي ذياب ؟ أدري فيك تبي تعذبني بس .. وإلا شلون راقد وتبتسم .. حبيبي قوم !! ذياااااااااااب

كانت تهز جسمه بقوة تبيه يقوم .. بس ذياب ما يتحرك خلاص روحه طلعت .. بدت فوز تستوعب وهي تتذكر اللي صار لها ف شهر العسل .. يمكن تكون نوبه عاديه ولازم تتصرف مع الوضع المرة الماضية الدكتور قال زين لحقتوا عليه .. اتصلت ف حمد وخبرته يدق للإسعاف بسرعه وكلها 10 دقايق إلا الاسعاف عند البيت وحمد ياي وياه أمه وأمون ..

دموع فوز تنزل على ولدها اللي راقد ع ريولها .. فز ذياب ويلس يصيح .. وفوز تصيح وياه للحين مو مصدجة إنها خلاص ما عاد تشوف ذياب .. مو مصدجة إن ذياب راح .. وإن ولدها بيعيش من غير أبو .. مو مصدجة إن ذياب توفى ومو شايف ولده .. مو قادرة تستوعب حياتها بدون وجود ذياب فيها ..


الدكتور: للأسف ما قدرنا نسوي شي .. الله يصبركم
فوز: شو ؟؟ شو يعني ؟؟ إنت شقاعد تقول ؟؟ يمه ها شو يقول يمه .. ذياب ما مات .. قولي إنه ما مات

كانت بتدش عليه لولا إن حمد يودها وما خلاها .. وهي تصارخ ف المستشفى .. وأم حمد تصيح ع حالة بنتها واللي صار لها ..

فوز: خلني أشوفه يا حمد .. واللي يسلمك .. ذياب ما مات .. أبي أشوفه .. ذياب لازم يقوم .. لازم يشوف ولده ..
حمد: لا تسوين ف روحج جيه يا فوز .. مو زين عشان اللي ف بطنج
فوز: شلون يروح عني جيه .. حمد خلوني أشوفه أبي أشوفه .. يمه قوليلهم يخلوني أشوفه


مسحت دموعها .. رضعت ولدها ورقد مرة ثانية .. وراحت تغسل ويهها بتنزل تحت عند أم ذياب .. اللي الحزن والهم مبين عليها .. شلون لا وها ولدها الغالي .. ولدها اللي راح بدون لا تشوفه .. لما نزلت كانت أم ذياب ف الصالة يالسة وتقرا قرآن .. شوي وخلصت

فوز: شحالج خالتي ؟
أم ذياب: نشكر الله يا بنتي .. ذياب راقد ؟؟
فوز: هيه خالتي .. إلا علي وينه ؟
أم ذياب: سار ويا أخوج حمد قال بيروح يلعب مع ندى
فوز: أحسن له .. جو البيت مرة كئيب
أم ذياب: فوز
فوز: هلا خالتي
أم ذياب: فكرتي بعد ما تخلصين العدة وين بتقعدين
فوز: مو ناويه أسافر مرة ثانية .. بقعد هنيه
أم ذياب: بروحج ؟؟ ما يصير يا بنتي
فوز: لا بقعد عند هلي خالتي ..
أم ذياب: والبيت شو بتسوين فيه ؟؟
فوز: البيت فيه ذكرياتي ويا الغالي .. أكيد ما راح أفرط فيه هي فترة اللي بقعدها عند هلي وعقبها برد لبيتي
أم ذياب: ودي أقعد وياج بس إنتي تدرين ما أقدر أخلي أبو ذياب
فوز: معذورة يا خالتي .. وبعدين بيت هلي مو من بعده وإن بغيت شي أكيد ما راح يقصرون ..
أم ذياب: وشو عن أغراضه ؟

بدت فوز تنزل دموعها من يديد .. سؤال صعب .. أغراضه .. ؟؟ ما فكرت فيهن ولا فكرت شو بتسوي بأغراضه ..

فوز: مدري .. بيمعهم كلهم وإنتي تصرفي فيهم .. واللي بالشقة ف ألمانيا خليهم لا ييت صوب هناك بسويهم بروحي ..
أم ذياب: يصير خير .. بس حاولي ف أقرب وقت تدرين أنا مسافرة عقب أسبوع
فوز: من باجر إن شاء الله .. وبقول لأمي تيي تساعدني
أم ذياب: لا تعبلين عليها .. أنا هنيه وبساعدج
فوز: ما عليه عسب نخلص بسرعه
أم ذياب: جريب يأذن العصر بقوم أتوضأ
فوز: الله يتقبل منج خالتي
أم ذياب: مني ومنج صالح الأعمال

راحت أم ذياب .. ويلست فوز تفكر ف حياتها .. ف ولدها اللي راح يكبر وهو ما يعرف منو أبوه .. ولا حتى شافه !! وايد أشياء راح تتغير من عقب وفاة ذياب .. لازم تبدا تفكر تأمن حياة ولدها .. صحيح ذياب ترك لها خير وايد .. بس لازم تعتمد ع نفسها .. محد راح يكون لولدها غيرها ..!!


بيت علي
يوم الأحد
الساعة 2:00 ظهراً


ميرة وسعيد متغدين عند علي اليوم .. علي اللي من توفى ذياب وحالته حاله .. نفسيته وايد تعبانه بسبب اللي صار .. ومحد يدري شو السبب اللي مخلي علي جيه .. يالسين ع سفرة الأكل وعلي ف عالم ثاني بعيييييد ..

سعيد: ميرة متى بتروحين تشوفين فوز ؟
ميرة: بالأربعاء .. مممم أبي أقعد عندها جم يوم عادي ؟؟
سعيد: لا مو عادي
ميرة: سعييييد .. فواز ف بيت ريلها محد هناك غريب .. عندها بس عمتها .. ياللا عشاني
سعيد: خليني أفكر
ميرة: فوز محتايه حد وياها مابي أخليها بروحها .. ومواز مسافرة ويا ريلها يعني محد بيكون عندها
سعيد: علاوي .. علاوي
علي: هاه ؟؟
سعيد: شفيك .. وين وصلت ؟؟
علي: وياكم ..
سعيد: لا مول مب ويانا .. شفيك إنت مب طبيعي شصاير وياك؟؟
علي: ماكو .. بنش أتغسل كملو غداكم إنتو
ميرة: وإنت أكلت شي أصلا
علي: مب شبعان
سعيد: هههه مب شو ؟؟
ميرة: مب شبعان .. زين آكل يوم مب شبعان
علي: قصدي مب يوعان ..
ميرة: ههههه والله مدري وين عقلك

نش علي يتغسل .. وكملوا ميرة وسعيد الغدا وعقب ما خلصوا يلسوو ف الصالة ويا بعض ..

سعيد: اسمع عاد أنا اليوم مب متحرك من هنيه ليمن تقولي شصاير ؟؟
علي: مب صاير شي
ميرة: علاوي إنت مو طبيعي .. لازم صاير شي
علي: للحين مب قادر أستوعب إن ذياب مات
ميرة: الله يرحمه .. كلنا والله انصدمنا بخبر وفاته
سعيد: الله يرحمه ويغفر له .. بس الريال صار له شهر وشي متوفي
علي: أدري
سعيد: وعلاقتك فيه مب لذاك الزود .. اللي تخليك بهالحالة ! يعني ما جان رفيجك وإلا علاقتك فيه قويه بالعكس .. وما كنت تحبه لأنه تزوج فوز ..
علي: إنتو مب فاهمين شي ..
سعيد: فهمنا !!؟

ردت فيه الذاكرة لليوم اللي ياه اتصال من رقم غريب وما رد عليه وعقب دز له مسج يقوله يرد عليه ضروري ..


علي: السلام عليكم
ذياب: وعليكم السلام والرحمة .. هلا علي
علي: أهلين شيخ ..
ذياب: شحالك ؟؟
علي: الحمدلله بخير .. من صوبك ؟؟
ذياب: يسرك الحال ..
علي: عفواً بس ما عرفت منو وياي ؟؟
ذياب: أنا ذياب !!
علي باستنكار: منو ذياب ؟؟
ذياب: أنا ...
علي يقاطعه : ذياااااب .. خلاص عرفتك .. شعندك داق علي ؟؟ شتبي مني ؟؟
ذياب: ممكن تسمعني ؟
علي: ما امبينا كلام .. ولا يربطنا ف بعض شي عسب أسمعك ورجاءً لا عاد تدق علي مرة 2
ذياب: علي خلني أقول اللي عندي بليز
علي: إنت ما تقولي شتبي مني ؟؟
ذياب: أبيك تسامحني
علي: أسامحك ؟؟ ع شو !؟
ذياب: لأني آثرت سعادتي على سعادتك .. لأني خذيت منك حب حياتك بس مثل ما إنت حبيت فوز هم أنا حبيتها ..
علي: وفوز اختارتك وهي أحين حليلتك والموضوع إنتهى .. تبيني أسامحك ع شو ؟؟
ذياب: ما طلبت منك غير إنك تسامحني .. تقدر ع هالشي ؟؟
علي: إنت ما غلطت علي .. يعني المفروض ما تطلب مني هالشي
ذياب: يمكن بس أبي أبري ذمتي .. مابي أروح من هالدنيا وفيه حد شايل ف قلبه علي .. خصوصاً إنت

بعد فترة صمت ..

علي: كل شي في الدنيا قسمة ونصيب يا ذياب .. وأنا مب شايل ف قلبي عليك .. مسامحنك ومحللنك .. والله يوفقكم ويسعدكم مع بعض !
ذياب: ألحين ارتحت .. مشكور يا علي
علي: ما سويت شي ..
ذياب: اسمحلي أحين بخليك ..
علي: ربي يحفظك !!


ميرة: معقولة ؟؟
سعيد: ذياب اتصل فيك يستسمح منك ؟؟
علي: هيه
ميرة: متى جان ها ؟؟
علي: قبل وفاته بفترة .. ما أذكر متى بالضبط بس يومها كنت ف بيتهم عبدالله .. تحيدين لمن طلعت م البيت وكنت حيل مضايج
ميرة: هييييييييه .. لما ظهرت خاري ترمس ف الفون
علي: هيه
سعيد: وإنت مضايج لهالسبب ؟؟
علي: لا ..
ميرة: عيل شو مضايجنك هالكثر ومتعبنك جيه ؟؟
علي: ذياب اتصل فيني ف اليوم اللي توفى فيه
سعيد: ليش ؟؟ يسلم عليك ؟؟
علي: لا
ميرة: عيل شو ؟؟
علي: يبيني أتزوج فوز !!

ميرة وسعيد من صدمتهم ما قدروا يتكلموا .. شلون يعني يتزوج فوز !! معقولة هالكثر جان حاس إنه خلاص راح يموت !!!؟؟

ميرة: مستحيل !!
سعيد: تتزوج فوز !؟؟
علي: اتصل فيني يوم وفاته العصر .. ما استغربت الاتصال يومها .. الفترة الأخيرة كانت امبينا مسجات عادية .. وتوقعت إنه داق يسلم لا أكثر ولا أقل .. قلت يمكن يبي يحسن العلاقة بينا .. بس فاجأني ..

ذياب: أكيد مستغرب اتصالي
علي: لا والله .. تدق ف أي وقت
ذياب: فيك الخير يا علي .. مابي أطول وياك
علي: خير فيه شي ؟؟
ذياب: أبي أطلب منك طلب .. ومابيك تردني
علي: أفا عليك ما عاش اللي يردك .. آمر ؟؟
ذياب: علي أنا مريض بالقلب .. ومن فترة أعالج رغم إني عارف إني مستحيل أخف م المرض اللي فيني .. صحيح آخذ دواي بانتظام بس هالدوا عسب أعيش حياتي بشكل طبيعي .. مو عسب يروح المرض نهائياً .. وأدري بيي اليوم اللي ما رح يكون لي وجود بينكم إلا اسمي .. ويمكن تذكرونه ويمكن لا .. ومحد يدري الأعمار بيدين الله .. يمكن اليوم وإلا باجر وإلا عقبه الله ياخذ أمانته ..
علي: بعيد الشر عنك لا تقول جيه يا ذياب .. الله يطول بعمرك ويخليك حق حرمتك وولدك ..
ذياب: اسمع يا علي .. أبيك توعدني وعد حر .. ووعد الحر دين
علي بخوف: أوعدك بشو ؟
ذياب: توعدني إن عقب وفاتي .. تتزوج فوز
علي بصدمة: شو ؟؟؟؟
ذياب: اوعدني يا علي ..
علي: ها عمر يا ذياب .. محد يدري يمكن أموت قبلك
ذياب: أدري .. بس أنا أبيك توعدني إن صار والله خذ أمانتي محد يتزوج فوز غيرك !!
علي: صعب !
ذياب: ليش صعب ؟؟ إنت ما تحبها ؟؟
علي: ويمكن فوز ما ترضى .. لا تخلينا نتكلم ف شي ممكن يصير وممكن لا ..
ذياب: قلت لك إن صار .. ما أبيك إلا توعدني .. وفوز خلياها علي أنا بقنعها !!
علي: ما أدري شو أقولك .. طلبك صدمني يا ذياب ..
ذياب: اسمع يا علي .. أنا أدري إن فوز لما وافقت علي .. بس عسب تقهرك وترد لك جزء م الألم اللي سببته لها .. علي يمكن المفروض ما أقولك هالشي بس فوز للحين تحبك .. ومو قادرة تنساك .. إحنا تزوجنا صح بس الشي الوحيد اللي ما قدرت عليه إني أخليها تنساك .. يمكن تحبني .. تحترمني ومو مقصرة وياي .. بس أنا عارف إنك للحين تنبض فيها ..
علي: واللي يسلمك يا ذياب كافي ..
ذياب: أوعدني يا علي .. يمكن أقدر أغير شي م الواقع .. يمكن أقدر أصلح اللي انكسر .. أنا ما أامن حرمتي وولدي اللي ياي ف الطريق على حد غيرك .. أدري إنك بتحطهم ف عيونك .. اوعدني وغلاة بنتك عندك .. لا تردني
علي بتردد : .. أوعدك !!
ذياب: أحين بس ارتحت .. مشكور يا علي ..
علي: لا تشكرني وإن شاء الله ما راح يصير هالشي .. لك طولة العمر يا ذياب ..
ذياب: الحمدلله ع كل حال .. بخليك أحين لأني حاس بتعب
علي: سلامتك ما تشوف شر
ذياب: الشر ما إييك !!


كانت ميرة تصيح .. وعيون سعيد متروسة دموع .. أما علي اللي من يوم ما سمع بوفاة ذياب .. ومن زود ما جان يبجي دموعه جفت ..

ميرة: هالانسان مب طبيعي معقولة تييه الجرأة يطلب منك هالطلب ؟؟
سعيد: شفت يا علي .. قلت لك ذياب غير عن الصورة اللي إنت رسمتها له ..
علي: أدري .. الله يرحمه للأسف إني انتبهت متأخر وايد شكثر هالإنسان طيب ..
ميرة: والطيب ما يبقى فهالدنيا .. الله يجعل مثواه الجنة ..
علي وسعيد: آمين يا رب
سعيد: وأحين شو بتسوي يا علي .. ؟؟ بتكلم فوز فالموضوع ؟؟
ميرة: ما أعتقد إنها راح توافق !!
سعيد: ولا أنا .. بس هو قالك إنه يراح يقنعها
ميرة: يعني تهقه كلمها ف هالموضوع بعد وخلاها توعده ؟؟
علي: مدري .. خلو الموضوع أحين لين ما تطلع فوز م العدة وبعدها يصير خير .. لا تنسون إن فوز عندها ولد احين .. ويمكن أهل ذياب يعارضون فكرة زواجها .. مدري بس حاس بتأنيب ضمير .. حتى لما بيصير لي اللي أبيه مو قادر أحس بفرح
سعيد: شي طبيعي .. لأن اللي بيصير ضريبته كانت وايد غالية !!
ميرة: لا رحت عند فوز بحاول اعرف شي عن هالموضوع .. وأكيد راح تقول لي إذا فيه شي ..
علي: ليش تأجلين سيرتج للأربعاء .. حاولي تروحين لها باجر
ميرة: اقنع الأخ .. واقنعه بعد يخليني أبات عندها
سعيد: ما يحتاي بروحي بوديج ويوم تبين تردين قوليلي وبيي آخذج
ميرة: أوكي .. زين بعد أبي أرتاح منك شوي
سعيد: لا والله .. سيري إن ما رجعتي وشفتي حرمة ثانية ف البيت
ميرة بشهقة: ف عينك والله .. عيل مب سايرة مكان
علي: سعيد شتبيها .. ما صدجنا احنا
سعيد: إنزين خلاص .. ياللا قومي خلينا نروح
علي: يالسين ؟؟
سعيد: يمديها تروح البيت تزهب أغراضها .. اليوم بوديها
ميرة: حشا ؟؟ هالكثر مستعيل علي زين خلني أدق للبنت بالأول
سعيد: دقي عليها وخبريها ..
ميرة: أوكي
علي: لا تنسين تطمنيني عليها ..
ميرة: ولا يهمك !!

ترخصوا سعيد وميرة .. ويلس علي يفكر باللي راح يصير .. معقولة هو وفوز يردون حق بعض ويصيرون ف بيت واحد .. ما يبي يحلم وايد لأن يمكن فعلاً فوز ترفض إنها تتزوج من عقب ذياب !!
 

أم حور

¬°•| عضــو شرف |•°¬
إنضم
26 فبراير 2011
المشاركات
502
العمر
34
الإقامة
SoHaR
بيت ذياب
يوم الأحد
الساعة 9:00 مساءاً



فوز ويا ميرة وأم ذياب وأمها في الصالة .. قبل شوي مخلصين متعشين .. فوز كانت مستانسة بوجود ميرة عندها .. ع الاقل تقدر تشكيلها همها ..

فوز: سعيد رجع على طول ؟
ميرة: قال بيمر يسلم على حمد قبل وعقبها بيروح
فوز: زين وافق تقعدين عندي هاليومين
ميرة: ما عليج دام عندج أكيد بيطيع
فوز: ما يقصر
أم حمد: ياللا أنا بترخص عنكم
فوز: وين يمه؟؟
أم حمد: أختج هناك بروحها بسير أشوفها
فوز: ليش أمون وين ؟؟
أم حمد: سايرة عند أهلها
فوز: اهااا .. زين يمه سلمي ع أبويه وايد
أم حمد: يوصل إن شاء الله .. ديري بالج ع روحج باجر إن شاء الله بييج م الصبح
فوز: إن شاء الله يمه

ترخصت أم حمد .. وعقبها بشوي ترخصت أم ذياب ليش إنها تعبانه م الصبح ناشة ويا فوز يلمون أغراض ذياب .. وتقريباً خلصوا من كل شي .. وباجي الشي الأهم اللي هي أغراضه ف غرفة نومه ..

ميرة: فواز
فوز: هلا عيوني
ميرة: شهالصناديق كلها ؟؟
فوز: أغراض ذياب ..
ميرة: خلاص لميتوا كل شي ؟؟
فوز: باجيه أغراض غرفة النوم .. تبين الصدج مو قادرة أدشها
ميرة: ليش إنتي ما دشيتيها من عقب وفاته ؟
فوز: لا .. أرقد عند ولدي .. أحس إني بنهار لو دشيت الغرفة .. مو سهل تدشين غرفة نومج وتشوفين ريلج راقد .. ويطلع في الحقيقة ميت مب راقد ..
ميرة: أدري والله .. بس الواحد شو يسوي .. ها النصيب وها المقدر والمكتوب .. وكلنا ماشين فهالدرب !!
فوز: والنعم بالله .. تدرين وايد اشتاق له .. أشتاق لحسه بالبيت .. أشتاق لدلعه .. أشتاق لكلامه ولكل شي فيه ..
ميرة: ربي يصبرج يا فوز .. والحمدلله الله عوضج بياهل يشبه أبوه
فوز: الحمدلله ع كل حال
ميرة: إذا تبين راح أساعدج ونروح نلم الأغراض م الغرفة ..
فوز: لا ما يحتاي بروح بروحي .. إنتي أكيد تعبانه أمشي خل أراويج دارج
ميرة: لا مب تعبانه .. بس إذا حابه تكونين بروحج راح أخليج ع راحتج
فوز: أوكي .. إذا بغيت شي راح أقولج
ميرة: تمام .. عيل ياللا وديني داري
فوز: اوكي


نشت فوز ووياها ميرة .. راحت تعلمها مكان دارها اللي جان جريب من الغرفة الرئيسية اللي هي غرفة فوز وذياب .. بس قبل مرن يشوفن عيالهن .. اللي كانوا نايمين والمربيات معهم .. وبعد ما دشت ميرة دارها ترتاح .. سارت فوز صوب دارهم كانت وايد مترددة تدش أو لا .. بس هالشي راح تسويه عاجلاً أو آجلاً .. فتحت الباب ودشت !
حال الغرفة مثل آخر يوم خلتها فيها .. حتى من بعد ما توفى ذياب منعت البشكارة إنها تدش الغرفة تنظفها أو تسوي فيها أي شي ..

بدت دموعها تنزل من يديد وهي تتذكر ذياب .. شلون نايم .. تذكر نفسها وهي تحاول تصحيه ..

فوز .. آه يا ذياب .. رحت وخليتني بروحي فهالدنيا .. شلون رحت عني ؟؟ شلون قلبك طاوعك تخليني جيه .. أستغفر الله يارب تغفر لي وتسامحني يا رب ..

نشت بتغسل ويهها .. لازم تكون قويه لمرة وحده ف حياتها وما تخلي الدموع تهزمها .. صعب تدري إن هالشي صعب بس ماهو مستحيل .. ريلها وسندها وحبيبها راح من هالدنيا وهم توهم معرسين .. وزواجهم ما كمل سنة ونص !

بعد ما صارت عندها الشجاعة إنها تواجه واقعها .. بدت فوز تلم أغراض ذياب .. بطلت الكبت وصكرته أول ما شافت ملابسه ما تقدر تلم ملابسه بتشوف عقب حد غيرها يقوم بهالمهمة .. بطلت الكبت الثاني كان فيه الأدوات اللي يستخدمها .. يابت صندوق كبير وبدت تحط الأغراض ودموعها تنزل من عيونها .. خلاص كل شي انتهى .. والريال اللي جان أمس ريلها .. صار غريب بالنسبة لها .. فضّت الدرج الأول والثاني والثالث .. .. ولما يات ع آخر واحد .. يلست ع الأرض تلم الأغراض انتبهت ع صندوق مقفول أول مرة تشوفه وما انتبهت عليه من قبل ف ما تعرف الصندوق من وين يا ؟ وشو فيه ؟؟ رغم ثقله بس كان خفيف وايد .. حاولت تبطله بس ما قدرت !توقعت إنه ممكن يكون ما فيه شي .. صندوق فاضي بس لما حركته فيه شي يتحرك داخل .. خلته ع صوب وراحت تلم الأغراض اللي ع الطاولة وأوراقه وملفاته .. يلست ع السرير تمسح ع المكان اللي جان ذياب راقد فيه .. قلبها يعورها .. حست إنها بتختنق بطلت الفرش اللي ع الشبريه كله وطلعته برع الغرفة .. انتبهت ع الخزنة .. للحين ما راحت تشوف شو فيها .. بس ذياب بالعادة يحط فيها المستندات والأغراض والمفاتيح المهمة وإذا فيه بيزات وايد يحطهن ف الخزنة بس هي عمرها ما سألته شو فهالخزنة ولا احتايت إنها تروح تشوف شو فيها .. تذكرت ذياب لما قالها إن الخزنة فيها كل شي مهم بالنسبة له وإنها إذا ضيعت شي مهم يخصه أو يخصها بدون لا تحتار تروح الخزنة وبتحصله .. يا ف بالها ممكن مفتاح الصندوق يكون فيه .. حتى لما احتاجوا جواز السفر ووثيقة الزواج هي دلتهم ع الخزنة لأنها تدري إن ذياب حاط كل هالمستندات فيها .. فتحتها جان فيها وايد مفاتيح وأوراق وشهايد وجان فيها دفتر صغير أول مرة تشوفه فوز .. خذت الدفتر ويلست تقرا المكتوب فيه !!
انصدمت فوز إن ذياب موثق كل شي له علاقه فيها وفيه وبتاريخه .. من يوم ما شافها وحتى بعد زواجهم !! الغريب إن عمرها ما شافت ذياب يكتب !! وعمره ما ياب لها طاري عن هالدفتر .. بدت تقرا بعض الأوراق المكتوبة ..

اليوم شفتها عند اللفت .. سلمت علي سلام عابر وراحت .. رغم إني ما أحبها .. ولا أطيق طاري البنات بس أحس هالبنت غير .. باختصار أحس إنها اسرتني !!

/ / م

قلبت كم صفحة ..

ما توقعت ف حياتي بنت تصفعني طراق ع ويهي .. فوز سوتها .. تلومت وايد لأني كنت غبي وياها .. بس تمنيت ما أغسل خدي فهاك اليوم عشان ما تروح بصمات إيدها من عليه ..

/ / م

اليوم تصرفت تصرف غبي .. كنت بتهور وأخلي فوز تكرهني .. بس غصب عني .. الحمدلله يات هند وأنقذت الموقف .. بس شسوي الحب أحياناً يخليك تتهور !!

/ / م

ف كل صلاة أدعي الله إنها توافق .. قلت لها تفكر ف موضوع زواجنا .. أدري قلبها متعلق ف شخص ثاني .. بس ما يستاهلها .. أملي بالله كبير وعندي احساس إنها راح تكون من نصيبي !!

/ / م


اليوم حبيبتي سافرت .. فيه ف راسي فكرة مينونة .. تقول لي إلحقها .. لا تخليها بروحها .. ولعيونها راح أسويها !!

/ / م

قلبت الأوراق وبدت تقرا الاشياء اللي كتبها ذياب بعد زواجهم ..


تزوجنا .. أخيراً البنت اللي أحبها صارت لي .. تعبت وايد لين ما حصلتها بس الله عوضني .. ما راح أخليها ولا أفرط فيها .. حصلتها بصعوبة ومو سهل أخليها تروح عني .. !

/ / م


مقهور وايد .. حسيت بالموت وأنا أسمع فوز تزقرني ب اسم ريال ثاني .. ما ألومها أدري إنها للحين تحب خطيبها القبلي .. وللحين تفكر فيه .. بس أنا خذيت وعد ع نفسي إني أخليها تنساه .. أو ع الأقل تتناساه .. راح أخليها تحبني !!

/ / م

فوز معصبة علي .. لأني ما خبرتها عن موضوع مرضي .. بس طيحتي ف المستشفى هدتها .. ويمكن غيرت تفكيرها بعد .. أدري إني غلطت والمفروض أقولها بس لما بغيتها توافق علي .. ما كنت أبي شي يشوش عليها .. كلامها جان وايد قاسي .. بس منها كل شي عسل .. لأني وايد أحبها !!

/ / م

هي الوحيدة اللي تخليني سعيد .. ولما تستانس أنا بعد أستانس .. أول ما عرفت خبر حملها كنت بطير م الوناسه .. بصير أبوو .. وأمه احلا أم ف الدنيا .. حسيت إن فوز مضايجة وايد م الموضوع مدري ليش ؟؟ هي قالت إن تونا معرسين .. بس آحساسي يقول إن فيه سبب ثاني .. أياً كان أدري ف داخلها مستانسة إنها راح تصير أم مثل ما أنا مستانس ..

/ / م



فوز .. يالله يا ذياب .. شكثر عانيت وياي .. وشكثر كنت تحس فيني .. وشكثر كنت أنانية وياك وما فكرت إلا بنفسي .. مدري إذا إنت فعلا كنت سعيد وياي وإلا لا .. مدري إذا أنا عطيتك السعادة اللي تبيها وإلا كنت تشحذها مني .. أنا حبيتك وحبيتك وايد بعد بس القدر ما أمهلني إني أعبر عن هالمشاعر .. ما كنت أبي أقول هالشي إلا وأنا حاسة فيه .. كنت ريال وزوج وحبيب والنعم فيه ..

فتحت فوز آخر صفحة .. تاريخها قبل وفاته بيوم ..

ولدي راح إيي خلال هالأيام وراح أصير أبوو .. متشوق وايد أشوفه وولهان وايد ع شوفته .. وأبي اعرف بيطلع بنت أو ولد .. حبيبتي محلوة أكثر من قبل بعد ما بانت كرشتها الصغيرة .. ما رضت تروح تشوف إذا ولد أو بنت بس راح أخلي اسم الولد علي واسم البنت عليها .. مدري إذا راح أشوفه أو لا .. بس حتى لو ما شفته هو أكيد راح يعرف إني أحبه واحب امه بعد .. وإنهم اغلا اثنين ف حياتي .. الله يقوم حبيبتي بالسلامة .. ماتهون علي .. بس كله يهون إذا بتييب لي بيبي قمر مثلها ..


/ / م


ياربي يا ذياب شكثر كنت حاس إنك راح تروح .. معقولة الإنسان يحس بقرب موته لهالدرجة .. معقولة يدري إنه راح يروح من هالدنيا جريب وف أي لحظة .. سبحان الله
حضنت الدفتر .. مستحيل تفرط فيه كل ما حست بإنها مفتقدة ذياب راح تقراه .. عشان تحس إنه وياها .. انتبهت ع بوكس صغير وايد ف الخزنة لما فتحته حصلت فيه مفتاح صغير .. خذته يا ف بالها إنه ممكن يكون مفتاح الصندوق اللي لقته ف الكبت .. ف خذت المفتاح وراحت تجربه ع الصندوق !!

انفتح الصندوق .. بس فوز ما كانت تدري إن راحت تنبش ورا صدمة يديدة .. ما كانت تدري إن الصندوق هذا راح يلزمها بشي هي ما تبيه ولا تفكر فيه ..

كان فيه صندوق صغير بطلته سلسله ألماس .. وفيه بطاقة عند الصندوق مكتوب عليها .. الحمدلله ع سلامتج يا أحلا أم ف الدنيا .. هاي هديتج بمناسبة الولادة .. أتمنى إنها تعيبج اسمها واسم ذياب محفور فيها .. اسمها واسم ريلها واسم ولدها .. انتبهت ع ظرفين ف الصندوق الظرف الأول باسمها والظرف الثاني باسم أم ذياب .. ترددت وايد تفتح الظرف أو لا .. شو ممكن يكون فيه !!؟

قررت تحط الظرف ع صوب .. وترد الأشياء مكانها .. دشت الحمام تتغسل .. كانت تحس نفسها محتايه إنها تصلي بس هالشي طبعاً ما يصير .. غسلت ويهها وتوضت .. ويلست تدعي الله يصبرها وتدعي حق ذياب بالرحمة والمغفرة .. !!

عقب ما خلصت .. يلست تشوف ع الظرف .. تبي تفتحه رغم إن فيه شي قوي يمنعها .. تحس إنها راح تتألم أكثر إذا تحت الظرف وقرت اللي فيه .. بس ف نفس الوقت ودها تعرف شو مكتوب ف الظرف .. وليش فيه ظرفين وشمعنى لها ولأمه بس .. كأن ذياب حاب يوصل لهم شي عن طريق هالأظرف .. توكلت على الله وفتحته .. !!

بسم الله الرحمن الرحيم ..

ببداها ب أحبج .. مدري متى راح تفتحين هالرسالة .. وتقرين اللي فيها .. بس أتمنى هالشي يكون ف أقرب فرصة .. يمكن بعد شهر .. شهرين .. عشرة أو حتى سنة .. ع حسب الظروف اللي راح تخليج تفتحين الكبت وتنتبهين ع الصندوق الموجود فيه .. وقتها ما راح أكون عندج .. ولا لي وجود ف حياتج .. ويمكن أتحول لشخص غريب بالنسبة لج .. بس ها حال الدنيا ..
أنا أحبج .. وأحبج وايد بس كل شي في الدنيا مقدر ومكتوب ومحد يدري شو ممكن يصير ف أي لحظة .. ف أقل من ثانية ناس تنولد وناس تموت .. وأنا ما أدري هل بشوف ولدي أو لا .. وبعرف إذا بنت أو ولد أو لا .. بس ف كل الأحوال متأكد إنج راح تربينه التربية الصالحة !
حبيبتي .. طول فترة زواجنا إنتي ما قصرتي معي بشي .. كنتي الزوجة والحبيبة والأخت كنتي كل شي حلو بالنسبة لي .. لا تسألين نفسج إذا أنا كنت سعيد وياج أو لا .. لأني عشت أجمل أيام حياتي بقربي منج .. ولآخر يوم ف حياتي بظل أتذكر السعادة اللي هديتيني إياها .. أدري إني كنت أناني لما خذيتج من الشخص اللي تحبيه وأدري إني استغليت كل اللي سواه علي فيج عسب أخليج توافقين ع زواجنا .. وأدري إن حتى بعد ما تزوجنا جان علي ف حياتج هو الحاضر الغايب .. حاولت أنسيج إياه .. حاولت أسوي المستحيل بس فشلت .. لأن قلبج جان متعلق فيه وايد .. أنا كتبت هالرسالة مو لأني أبي أزيد وجعج وإنتي أكيد حزينة ع فراقي .. بس كتبتها لأني أبيج تكملين جميلج وياي .. أبيج تريحيني وأنا ف قبري .. أبي أرتاح من عذاب الضمير .. أبي أحس إني قدمت لج شي .. واني قدرت أصلح جزء م اللي انكسر .. ما أبيج تصيحين وتعذبين نفسج زيادة لا .. أبيج تكونين أقوى من جيه وأدري إنج قوية وقادرة إنج تتغلبين ع مرحلة الحزن اللي انتي فيها !!

للحين فوز مو عارفة ذياب شو يبا منها .. وشو مناسبة هالرسالة .. وشو هالكلام اللي كاتبنه وليش ؟؟ كانت تصيح كأن ذياب حاس فيها ويقرأ أفكارها فهاللحظة .. كأنه عارف شو راح يكون وضعها وحالها لما تقرا الرسالة ..

قلبت الصفحة .. وكملت باقي الرسالة ..

علي وايد يحبج .. يمكن الظروف خلته يسوي كل اللي سواه .. بس ف أفعاله ظل فيه موقف شهامة منه .. رغم إن اللي صار كان لصالحي بس ف داخلي كنت أقول إن تصرف علي كان صح وإن كانت تصرفات ف حالة لا وعي .. وإن كنتي تعذبتي وايد وعشتي حالة من الحزن بفقدانج له .. ورغم كل ها بعد يحبج !!

ما أقولج هالشي عسب تلومين نفسج .. اللي صار صار والأيام اللي راحت عمرها ما راح ترد .. ويمكن ما نقدر نغير القدر بس بإيدنا نغير الواقع اللي إحنا نعيشه .. وعشان جيه يا فوز .. وصيتي لج إنج توافقين على علي إذا يا وخطبج !!

غصّت فوز .. ما قدرت تكمل .. مستحيل ذياب يسوي فيها هالشي !! ليش ؟؟ يردها لنقطة الصفر مرة ثانية !!

فوز: شوووو ؟؟ مستحيل !!

بدت تصيح وتصارخ .. فرت الرسالة ويلست تكسر الأشياء اللي جدامها من القهر ..

فوز: مستحيل ليش تسوي فيني جيه ؟؟ ليش يا ذياب ؟؟

يات ميرة تركض من دارها .. وأم ذياب اللي فزت من رقادها بعد ما سمعت صراخ فوز ..

انفتح الباب .. كانت ميرة واقفة وحذالها أم ذياب اللي مستغربات حالة الغرفة .. ووضع فوز اللي تصيح وهي تضرب ايدها بالقو ع الطاولة وتقول كلام مب مفهموم بالنسبة لهم ..

فوز: ليش تعاقبني بهالطريقة يا ذياب .. ليش تحملني شي ما أقدر أسويه ..
ميرة: شفيج يا فوز .. مو زين اللي قاعدة تسويه
أم ذياب: شفيج يا فوز .. شسوا ذياب ؟؟ اذكري الله يا بنتي
فوز: خالتي .. ميرة قولوا إن ذياب مو من صدجه .. قولوا إني مو ملزومة أسوي اللي يبيه ..
ميرة: شو يبيج تسوين ؟؟

راحت فوز صوب أم ذياب عقب ما عطت ميرة الرسالة .. وطاحت فحضنها ..

فوز: خالتي ذياب يبيني أتزوج من عقبه .. ليش يسوي جيه ؟؟
أم ذياب: شو ؟؟
فوز وهي تشهق : كاهي رسالته .. وحط لج إنتي بعد رسالة ..

ميرة وهي تقرا رسالة ذياب .. :

ويمكن ما نقدر نغير القدر بس بإيدنا نغير الواقع اللي إحنا نعيشه .. وعشان جيه يا فوز .. وصيتي لج إنج توافقين على علي إذا يا وخطبج !! علي الوحيد اللي متأكد إنه راح يحميج ويصونج ويحافظ عليج وعلى ولدي أو بنتي .. أبيه يكون أبو لولدي .. وغلاتي عندج يا فوز لازم توافقين ..

فوز: بس يا ميرة تكفين .. مابي أسمع شي !! خالتي ليش يجبرني ع شي ما أبيه .. ما أبي أتزوج لا أحين ولا عقب مية سنة .. ما أبي لا علي ولا غيره

أم ذياب للحين ف صدمتها !! معقولة ذياب يسوي جيه ..؟؟ ليش !!؟ أما ميرة ف كملت قراءة الرسالة للنهاية بس بدون صوت ..

فوز: خالتي تكفين قولي شي ..
أم ذياب: شقول يا بنتي .. أنا مثلج منصدمة
ميرة: هدي يا فوز مب زين اللي تسوينه .. لا تفكرين فهالموضوع أحين تونا كملنا شهر ع وفاته الله يرحمه .. خلصي العدة وعقبها يصير خير
فوز: مابي اتزوج .. مابي
أم ذياب: لا حول ولا قوة إلا بالله ..

انتبهت ميرة ع الرسالة اللي مكتوب فيها اسم أم ذياب .. راحت تاخذها وناولتها ..

فوز بهدوء: هاي رسالتج .. حاط ف الصندوق رسالتين وحده لي والثانية لج
ميرة: هاج خالتي ..

خذت أم ذياب الرسالة بس ما فتحتها .. حاسة نفسها مهمومة .. شلون ولدها يسوي جيه .. مستحيل يوافقون ع موضوع إن فوز تاخذ ريال ثاني .. مستحيل يخلون ريال ثاني هو اللي يربي الياهل .. بس ما أبدت هالشي ساعتها لأنها تدري إن هالكلام مو وقته !!

أم ذياب: بشوفها عقب .. روحي غسلي ويهج يا فوز وأجلي هالموضوع لبعدين
فوز: إن شاء الله خالتي ..

طلعت أم ذياب .. وبقت ميرة ويا فوز .. انتظرتها ليمن طلعت م الحمام .. تبيها تهدا شوي وما تفكر فهالموضوع ألحين ..

أول ما طلعت فوز .. يلست ع القنفة بدون لا تقول أي شي .. سارت ميرة صوبها ويودت إيدها ..

ميرة: الحب خلاه يسوي جيه
فوز: الحب ؟؟
ميرة: ذياب يحبج .. يدري إن قلبج متعلق ف علي ولهالسبب طلب منج هالطلب
فوز: شلون يطلب مني أنا أوافق ع علي بالذات .. لو تهمه مصلحتي ومصلحة ولده ما جان حصر زواجي على علي بس .. شدراه إن علي راح ايي ويخطبني ! شدراه إن علي يبيني للحين ؟
ميرة: يمكن لأنه يدري إنج تحبيه .. ويمكن لأنه يدري إن علي بعد يحبج وهو الوحيد اللي راح يحافظ عليج ويكون واثق إنه راح يربي ولدكم وما راح يقصر بشي وياكم
فوز: ما أبا أفكر ف الزواج .. ولدي بربيه بروحي .. مو محتايه حد يربيه وياي !!
ميرة: لا شفتيه يكبر جدام عينج بدون أبو ساعتها راح تحسين بأهمية إن يكون فيه أبو لولدج
فوز: إنتي تقولين جيه عسب أخوج !
ميرة: لا يا فوز .. لا تنسين إن علي بعد حياته مثل حياتج بالضبط .. ومع إن وضعه وايد صعب وهو يربي بنته بروحه .. وكم مرة كلمناه عسب يتزوج وييب لها أم تربيها بس هو رافض .. دوم يتحجج إنه ما يضمن يتزوج أي وحده وعقب تعامل بنته معاملة مش زينة .. أنا ما أبيج تفكري ف شي ألحين .. إنتي توج طالعه من صدمة محد يدري شكثر توجع إلا رب العالمين .. وما ألومج ع ردة فعلج اليوم لأن فعلاً صدمة بالنسبة لج .. بس مع الأيام راح تحسين إن ذياب سوا الشي الصح !!
فوز: تعبانة وأبي أنام
ميرة: طيب فديتج امشي خلينا نطلع من هنيه

خذت ميرة فوز لغرفة ولدها ذياب ترتاح .. وعقبها سارت دارها .. وهي تقريباً عرفت كل اللي تبي تعرفه وأهم شي ذياب شلون بيقنع فوز بزواجها من علي !! أما فوز ف للحين مو قادرة تستوعب ولا تصدج إنها ملزومة تنفذ وصية ذياب وتتزوج من منو .. علي !!!


بعد مرور سنة


حمد وأمون عايشين حياتهم مستانسين .. صار عندهم بنت وولد وحياتهم ماشية بانتظام .. رغم المشاكل البسيطة اللي تعرضولها الفترة الأخيرة .. بس المشاكل هي ملح الحياة !!

ميرة وسعيد يربون ولدهم محمد .. ميرة وايد مستانسه وما صدجت إن سعيد يوافق إنها تداوم وبدت تداوم ف وزارة العدل وأمورهم ماشية تمام !!

هند وزياد .. علاقتهم ف بعض كبرت وايد وردت مثل قبل وأحسن وهند أحين حامل في الشهر الخامس وهو أول مولود ينتظرونه .. حياتها كلها كانت سفر ف سفر لين ما استقرت في الإمارات عند أهل زياد !!


موزة وغيث .. طلعوا من بيت أهل غيث وانتقلوا لبيتهم اليديد ومواز صار عندها بنت .. وعايشة حياتها سعيدة ومستانسة ويا غيث اللي مو مخلي عليها قاصر !!

نورة وحميد .. مستانسين ف حياتهم .. وكل واحد عوض الثاني عن اللي فقده .. خصوصاً إن الاثنين مروا بتجربة صعبة .. وحياتهم مستقرة ونورة أحين حامل في الشهر الثاني !!


علي وفوز .. ؟؟؟

بيت أبو حمد
يوم الخميس
الساعة 5:00 عصراً


فوز يايه عند أهلها اليوم .. متعودة خميس وجمعة تيي عندهم وتيلس م الصبح لليل .. وذياب وياها طبعاً .. كانت أمون موجودة ويا أم حمد بالصالة ..

أمون: ما شاء الله ذيوب كبر
فوز: هيه خلاص صار ريال
أمون: فديته والله
فوز: إلا عيالج وين ؟؟
أمون: رقود
فوز: رقود هالحزة
أمون: شسوي خلاص تعودوا بس الحمدلله بالليل ما يسهرون وايد .. وذياب شمسويه وياه ؟؟
فوز: ذياب فديته عسسسل
أم حمد: فوز
فوز: هلا يمه
أم حمد: أبكلمج ف موضوع
أمون: عيل بخليكم تاخذون راحتكم
أم حمد: خليج يا بنتي إنتي مو غريبة
أمون: بسير أشوف اليهال خالتي ..
فوز: شصاير يمه ؟؟

سارت أمون .. وفتحت أم حمد الموضوع مع فوز ..

أم حمد: فوز لا أنا ولا أبوج عايبتنا يلستج ف بيتج بروحج
فوز: إحنا تكلمنا فهالموضوع وايد وقلت لكم ما أقدر أخلي البيت جيه
أم حمد: فوز البيت ما فيه ريال .. وإنتي ويا ولدج بروحج هناك ما يصير
فوز: ما علينا شر .. الله الحافظ
أم حمد: إنتي انخطبتي وأنا عن نفسي موافقة وأبوج بعد موافق
فوز بصدمة: شو !!؟ شلون يعني انخطبت وانتو موافقين ؟؟ يمه إنتي يايه تآخذين رايي وإلا تقولين لي شي انحسم خلاص !
أم حمد: الموضوع ما انحسم لأن رايج مهم .. بس أنا قاعدة أقولج إن احنا موافقين باجي رايج ..
فوز: يعني رايي مو مهم ولهالسبب يايين تاخذونه آخر شي ! ومنو ها اللي ياي يخطبني !؟ أنا ما أدي ليش دوم تردون تفتحون معي نفس السالفة .. يعني كم واحد يا من قبل وقلت لكم مابي أعرس مابي أعرس
أم حمد: اللي يوج قبل أبوج رفضهم لأنه يعرف مصلحتج عدل
فوز: هيه ووافق أحين على ها هم لأنه يدري مصلحتي عدل .. ليش منو ها وشفيه عسب يوافق عليه !!
أم حمد: علي
فوز: منو علي ؟؟
أم حمد: أخو ميرة

انصدمت فوز آخر شخص تترياه إيي يخطبها هو علي .. لأنها ما تقدر تقول لا .. ما تقدر ترفض .. تذكرت رسالة ذياب اللي صار لها أكثر من سنة تحاول تنساها ..

أم حمد: شفيج سكتي ؟!
فوز: متى رمس أبويه ؟
أم حمد: قبل يومين وأبوج أمس فتح وياي الموضوع .. وأبيج تفكري عدل ف حياتج وحياة ولدج .. علي شاريج ويبيج وهو أكثر واحد أبوج يثق فيه وعارف إنه راح يسعدج ويحافظ عليج ويربي ولدج تربية صالحة .. وإنتي بعد بتربين بنته
فوز: بنته ؟؟

دق تليفون فوز .. كانت أم ذياب تتصل فيها .. ف حاولت تضبط نفسها وتهدي من حالها .. وهي فرصة إنها تشرد من الموضوع اللي أمها تكلمها فيه .. وراحت صوب ميلس الحريم ترمس ع راحتها ..

فوز: الحمدلله بخير خالتي الله يسلمج .. شحالكم إنتو ؟؟ علاوي شلونه ؟؟
أم ذياب: الحمدلله .. ما تشوفينه شلون يزن على راسي
فوز: ههههه شو يبا ؟؟
أم ذياب: يبي إيي عندكم مشتاق ذياب الصغير ومشتاق ندى
فوز: فديته والله .. زين حاولوا تييون صوبنا ولهنا عليكم وايد
أم ذياب: إن شاء الله غناتي .. وينج ف البيت ؟؟
فوز: لا والله عند هلي خالتي
أم ذياب: ما شاء الله .. شخبارهم ؟؟
فوز: الحمدلله يسلمون عليج
أم ذياب: الله يسلمج .. انزين يا بنتي ما بطول عليج بس أبي أكلمج ف موضوع
فوز: آمري خالتي
أم ذياب: وصية ذياب الله يرحمه .. ما أبيج تنسينها مر عليها سنة وشي أحين .. وأنا أدري إن الشخص اللي ذياب يبيج توافقين عليه يا وخطبج .. أنا أم ويعز علي هالطلب وايد .. ويمكن أكون معارضة هالشي لأني ما أبي ولد ذياب بتربي ف بيت ريال غريب .. بس هاي وصية ولدي .. ومثل ما وصاج إنتي توافقين وصاني أنا وأبوه نوافق بعد .. أدري إنج رافضة فكرة الزواج .. بس هاي دنيا ومحد يعلم باجر شو بيصيرفيها .. وذياب الصغير محتاي له أبو يربيه ويعلمه الصح م الغلط .. هيه نعم إنتي موجودة بس ما راح تعوضينه عن فقدان الأبو .. توكلي على الله ووافقي يا بنتي .. وتأكدي إن أنا وعمج راضين عليج وموافقين ع اللي بتسوينه
فوز: بس يا خالتي ..
أم ذياب: أدري إنج بتسوين شي ما تبينه .. بس هاي وصية ذياب .. خليه يرتاح ونفذيله وصيته يا فوز ..

نزلت دموعها .. على كثر ما كانت تحب علي .. على كثر ما رافضة موضوع إنها تتزوج من عقب ذياب .. ما تبي تفقد الأحاسيس الحلوة اللي عيشها ذياب فيها .. ما تبي تحس إنها خانته عقب وفاته وراحت خذت الريال اللي كانت تحبه .. مو عارفة شو تقول لأم ذياب .. مو قادرة تقرر .. قالت بتشرد من أمها ما درت إنها طاحت ف نفس المطب بعد ردها ع اتصال أم ذياب !!

أم ذياب: وافقي يا فوزعشان ذياب يرتاح ف تربته ..
فوز بغصه: إن شاء الله يا خالتي .. اللي تشوفونه
أم ذياب: هذا عشمي فيج يا فوز .. والله يبارك لكم هالزواج ويسعدكم .. بخليج أحين سلمي ع أهلج وايد .. مع السلامة
فوز: مع السلامة !

بندت أم ذياب .. وفوز مو قادرة تشيل نفسها م الموقف اللي خلتها فيه أم ذياب .. وحالة الضغط اللي عيشتها فيها .. سارت صوب أمها اللي كانت ف الصالة ..

أم حمد: شفيج يا بنتي ؟؟ ليش تبجين ؟؟ منو داق عليج ؟؟
فوز: أمايه ..
أم حمد: هلا
فوز: قولي حق أبويه إني موافقة أتزوج علي !!


الخبر فاجأ أم حمد وايد .. شاللي غير رايها فجأة ومنو متصل فيها خلاها تغير رايها بهالسرعة .. أما فوز فمن قالت هالكلمة صعدت دارها .. تبي تكون بروحها وتفكر بقرارها زين !



بيت غيث
يوم الإثنين
الساعة 9:30 مساءاً


ميرة وسعيد وعلي ف بيت غيث .. اليوم عازمنهم ع العشا عنده .. كانت ميرة تسولف ويا موزة .. وعلي وسعيد ويا غيث .. ف نفس المكان بس الصالة الثانية المفتوحة على الصالة الأولى ..

موزة: تدرين صارلي فترة ما شفت فواز
ميرة: تصدجين ولا أنا شفتها .. مخططة أسير عندها هالأسبوع شرايج تخاويني
موزة: بشوف غيث وأرد عليج ..
ميرة: أوكي .. مسكينه فواز
موزة: هيه والله .. اللي عانته ف حياتها مب شويه وما مداها تفرح بزواجها إلا والموت خذ منها ريلها .. مدري شلون صابرة
ميرة: الله وياها .. توها ف بداية شبابها ويصير فيها كل اللي صار
موزة: أكيد .. أهم شي هي صابرة .. مدري والله منو داعي عليها ما تفرح .. كل ما تطلع من سالفة تدش ف سالفة ثانية .. ما يمديها تفرح إلا مصيبة طايحة ع راسها
ميرة: فديتها فواز .. إلا صج ما قلتيلي شخبارها نورة ؟
موزة: الحمدلله مستانسة ويا حميد .. وحميد ماشي متخبل عليها
ميرة: هههههههه الله يسعدهم ..
موزة: آمين يا رب

دق تليفون علي وظهر خاري يرمس .. كان أبو حمد متصل فيه وما حب يتكلم جدامهم لأنه جان عارف إن اتصال أبو حمد فيه عسب يقوله عن قرار فوز اللي وايد خايف منه ..

ميرة: سعيد وين سار علاوي ؟؟
سعيد: يرمس ف الفون
ميرة: أتحراه بيروح
موزة: وين يروح لسه باقي الحلو ما أكلتو
ميرة: أنا بطني خلاص متروس م العشا بعد تقولين لي حلو
موزة: لازم عاد ما يصير .. نتريا علي يرد وبنحطه
ميرة: ههههه شكلج تبين تخربين الريجيم
موزة: ما راح يخترب يوم واحد

عند علي

علي: الحمدلله يا عمي .. شحالكم إنتو ؟؟
أبو حمد: يسرك الحال يا ولدي .. اسمع يا علي
علي: آمر يا عمي
أبو حمد: ما يآمر عليك عدوو .. أنا رمست فوز وهي موافقة
علي: صج والله .. الله يبشرك بالجنة ..
أبو حمد: يميع إن شاء الله بس ..
علي يقاطعه: بس شو ؟؟
أبو حمد: عندها شرط
علي: شو شرطها ؟؟
أبو حمد: ما تبي عرس .. تملجون وتاخذها ع بيتك
علي: حاضر يا عمي اللي تبيه فوز بيصير
أبو حمد: خلاص يا ولدي .. باجي الأشياء اتفقوا عليها بروحكم ومدري شوف متى يناسبك عسب نحدد موعد الملجة
علي: فالك طيب يا عمي لا تشيل هم .. ومشكور وايد وإن شاء الله ما راح أقصر لا معها ولا مع ولدها
أبو حمد: هذا العشم فيك يا ولدي .. سلم ع الأهل
علي: يبلغ إن شاء الله وإنت بعد رد السلام
أبو حمد: إن شاء الله ..

بند علي عن أبو حمد .. والفرحة مو شايلتنه من الوناسه .. صحيح إن شرط فوز ضايجه خصوصاً إنه ابداً ما حس بفرحة الزواج ولا عاشها بس مو مهم اللي تبيه فوز راح يصير وها من حقها .. بس ع الأقل لو يسوون حفلة صغيرة بين الأهل .. فكر إنه راح يقنعها بعدين .. مع إنه مو متأكد هل فوز راح تقتنع بهالشي أو لا !!

عقبها دش داخل وكان الفرح مبين عليه والإبتسامة شاجة الحلج .. مو قادر يخبي فرحته وسعادته ..

غيث: شفيك بسم الله ؟؟
سعيد: ههههههه منو هاي متصلة فيك مخلتنك جيه توزع ابتسامات توك حالتك مكتئب وما ترمس سبحان مغير الأحوال
علي: وافقت أخيراً وافقت .. يس

ميرة: ههههه علاوي شفيك تصارخ أويه تخبلت ؟؟
موزة: شفيه أخوج ؟؟
ميرة: مدري عنه .. قومي قومي خلا عندهم

سعيد: يا فضول الحريم شفيكن يايات
ميرة: نبي نعرف شو مستوي ؟؟
علي وهو يتنفس الصعداء: فوز وافقت ع الزواج
ميرة: قول والله ؟؟
علي: والله أحين أبوها داق يخبرني .. ياني مستانس ياني بطير م الفرح مو مصدج ..
سعيد: هههههههههه لا ها صج صج استخف
علي: أحبها والله إني أحبها
موزة بابتسامة: مبارك عليكم يا علي .. ربي يتمم ع خير
علي: تسلمين .. الله يبارك فيج
ميرة: ومتى العرس ؟؟
علي: ماكو عرس .. فوز ما تبي عرس بس ملجة
ميرة: بس نبي نفرح فيك
سعيد: صح إنت ما جربت هالشعور
علي: مو مهم أهم شي رضاها .. اللي تبيه فوز بسويه
موزة: أحس معها حق ما تبي عرس ..
غيث: وأنا بعد .. يعني هي خلاص معرسة م قبل وعندها ولد وغير جيه ريلها من سنة وشي بس متوفي .. ما تبي تفتح مجال للقيل والقال كأنها مستانسة
علي: الله كريم ..
موزة: ميرة تعالي معي نحط الحلو
ميرة: أوكي فديتج

سارن ميرة وموزة صوب المطبخ والشباب كملو سوالفهم .. بعد ما حطو الحلو وكلوو .. ترخص علي وترخصوا عقبه ميرة وسعيد .. ويلسوا غيث وموزة يتناقشون ف موضوع زواج فوز من علي !!


ف السيارة عند علي .. الساعة 11:30 مساءاً

وايد مستانس إن فوز وافقت عليه .. دز مسج لميرة عسب تطرش له رقم فوز .. وكلها دقيقتين ووصله الرقم .. لازم يتصل فيها ويتفاهمون ويحددون كل شي .. سار صوب البحر وقف سيارته ونزل عسب يرمس ع راحته .. الجو هادي والقمر منور المكان .. دق عليها بس ما ردت .. وعقب رد يدق مرة 2 .. هم ما ردت .. دز لها رسالة وعقبها اتصل فيها .. وردت بدون لا تدري منو كانت بعيد عن الفون ولما يات بتفتح الرسالة اتصل علي مرة 2 ..

علي: السلام عليكم
فوز: وعليكم السلام
علي: شحالج فوز ؟؟
فوز باستغراب: الحمدلله بخير .. بس عفواً منو إنت ؟!
علي: كل شي تغير بالنسبة لج .. حتى صوتي ؟؟
فوز: إنت منو ؟؟
علي: أنا علي !

أول ما قال اسمه حست قلبها طاح .. علي !!؟ ليش داق وشو يبا فهالوقت المتأخر ..

فوز: صاير شي ؟؟
علي: هيه
فوز: شو ؟؟ لا تخرعني
علي: اليوم خليتيني أسعد انسان ف العالم .. ما تتصورين شكثر مستانس
فوز: سويت هالشي مجبورة !!
علي: فوز
فوز تقاطعه: اسمعني .. لو علي ترا ولله آخر شي أفكر فيه أني اتزوج عقب ريلي .. إنت مستانس ياتك الفرصة .. وصار لك اللي تبيه لازم تستانس .. بس محد يعلم بالوجع اللي ف داخلي .. محد يقدر يحس إني أموت من داخل ..
علي: فوز
فوز: خلني أكمل كلامي .. وافقت نتزوج بس لازم تعرف إن علاقتنا لها حد وخط أحمر ما أبيك تتجاوزه
علي: شقصدج ؟؟
فوز: إحنا جدام الناس بس متزوجين !! وف بيتنا إنت ف صوب وأنا ف صوب !!
علي: ليش تسوين جيه وياي ؟؟ ليش تتصرفين بهالطريقة .. مو قادرة تنسين للحين اللي سويته فيج ؟؟
فوز: نسيت اللي سويته فيني .. بس ما أقدر انسى الإنسان الوحيد اللي قدم لي السعادة ع طبق من ذهب .. ما أقدر أنسى ريلي أبو ولدي .. ما أقدر أنساه ولا أنسى كل اللي سواه لي .. ما أقدر أخونه بهالطريقة البشعة حتى لو موافقتي يات بطلب منه
علي: حبيتيه ؟؟
فوز: كل شي سواه لي خلاني أحبه .. طيبته وحنيته وحلاة قلبه كل شي خلاني أتعلق فيه وأحبه .. مو بسهولة أقدر أنساه يا علي .. إذا إنت راضي إنك تاخذ وحده جيه .. أوكي .. بس إذا لا ما راح أحاسبك إذا غيرت رايك .. بالعكس راح أكون مستانسة بهالقرار !!
علي: راح تكونين مستانسة إذا ما خذيتج ؟؟ تدرين شي يمكن أكون مستانس لأني بخذج .. بس لازم تعرفين إنتي بعد إني ما كنت تجرأت وخطبتج لو ذياب الله يرحمه ما طلب مني هالشي !! حتى لو كنت للحين أحبج وأبيج .. بس كنت عارف إنج راح ترفضين وقلت لذياب يومها وقالي إنه راح يقنعج وراح توافقين !
فوز بصدمة: شو ؟؟؟ إنت شقاعد تخربط !!
علي: أنا كنت متواصل ويا ذياب الله يرحمه الفترة اللي قبل لا يتوفى فيها .. وفي اليوم اللي توفى فيه دق علي وطلب مني هالشي لأنه يدري إني للحين أحبج وشاريج .. وخذ علي وعد إني أخطبج .. ما كنت أبي هالشي مو لأني ما أحبج .. بس لأنه جان وايد صعب علي أقول لريال إني أوعدك لا توفيت أتزوج حرمتك !! ومع ذلك ما قدرت إلا إني أوعده وكاني لمن خطبتج قاعد أنفذ وعدي لذياب !
فوز: واللي يعافيك مابي أسمع شي خلاص .. اللي فيني مكفيني .. مو قادرة أصدج إن ذياب سوا جيه ..
علي: لأنه يحبج سوا جيه
فوز: بس كل اللي قلته ما راح يغير رايي ..
علي: اللي تشوفينه يا فوز .. حددي متى تبين الملجة ودزيلي مسج !!
فوز: تصبح ع خير
علي: وإنت من هله !

بندت فوز عن علي وخلته ف صدمة .. ما توقع إن ردة فعلها تكون جيه .. صدمته بكلامها وأسلوبها الجاف وياه .. جان داق يتفاهمون ع موضوع الملجة .. خلته يعيف كل شي .. حتى موضوع الزواج لو مب وعد ذياب يمكن يهون عنه !! بس ما عليه مع الأيام أكيد راح تتغير هذا هو تفكير علي .. لازم يغير رايها وطريقة تفكيرها !!


بعد مرور أيام
يوم الخميس – يوم الملجة
بيت علي
الساعة 10:00 مساءاً


كانت يالسة ف الصالة .. عقب الملجة يلسوا بيت أهلها شوي وبعدها على طول ساروا الشارجة .. طول الطريق ف السيارة كان الصمت هو سيد الموقف .. فوز حاطة ذياب ع ريولها .. وفوز بنت علي عند المربية مالها اللي يالسة ورا .. وحذالها مربية ذياب .. لما وصلوا البيت راحن المربيات غرفة فوز .. اللي انضاف لها سرير يديد حق ذياب .. أما فوز ف يلست ف الصالة وعلي عقب ما حط السيارة ف الكراج دش البيت ..

علي: وبعدين يعني ؟؟ لمتى بتمين ساكتة ؟؟

شافت عليه فوز وما حست إلا بدمعتها ع خدها .. من آخر مرة قبل كم سنة دشت بيت علي ما دشته مرة ثانية .. وهالمرة بدل لا تدشه كغريبة دشته وهي حرمته .. عقلها بعده ما استوعب إن علي صار ريلها .. ولا قادرة تأقلم نفسها مع وضع إنها بتعيش وياه ف بيت واحد وإن صار عندها بدل الطفل طفلين تربيهم .. وإنها لازم تكون أم لفوز وذياب .. مثل ما علي راح يصير أبو لهم !!

اقترب علي منها .. ويلس حذالها وهي ابداً ما تحركت من مكانها ..

علي: ليش تبجين ؟؟ ما أبي أشوف هالدموع مرة ثانية

كان شوي وبيمسح دموعها لولا إنها صرخت ف ويهه وخلته يبتعد عنها ..

فوز: مالك شغل فيني .. لا تجرب مني
علي: شفيج يا فوز حرام اللي قاعدة تسوينه فيني
فوز: ما أقدر .. ما أقدر
علي: شاللي ما تقدرين عليه ؟؟
فوز: ما أقدر أكون زوجة لك .. لا تطلب مني شي ما أقدر عليه
علي: خلاص يا فوز اللي تبينه راح يصير بس انتي اهدي شوي
فوز: وين داري .. أبي أرتاح
علي: فوق أول غرفة ع إيدج اليمين
فوز: هاي غرفتك
علي: أنا راح أستخدم الغرفة الثانية ..
فوز: مابي ..
علي: لا تعاندين خلاص قلت لج .. وكل أغراضج فيها

راحت فوز دارها بدون لا تناقشه .. وعلي مستاء م الوضع اللي هو فيه .. على جيه قلب فوز مستحيل يحن دامها تتعامل معه بهالأسلوب جأنه وحش مب آدمي !!

أول ما وصلت الدار .. بطلت الليتات .. شافت ع السرير باقة ورد كبيرة .. وحذالها هديه مغلفة .. فوز تدري إن علي يحبها وهي تحبه بس مو قادرة تنسى ذياب مو قادرة تنسى الريال اللي عاشت وياه .. تحس إنها إذا استانست بزواجها راح تخون ذياب .. ما تقدر إنها تكون سعيدة مع إن الوضع اللي هي فيه مو عايبنها ولا حابه معاملتها القاسية لعلي بس مب عارفة شو تسوي .. تخاف من تأنيب الضمير .. !!

راحت صوبها .. حضنتها وانتبهت ع الكرت اللي عليها ..

لو شو ما تسوين ..
حبي لج يخليني راضي باللي تسويه
بتم أحبج .. إنتي اتحرين بتخليني أكرهج بهالتصرفات
ما تدرين أنج تخليني أحبج أكثر وأكثر وأكثر
أتمنى الهدية تعيبج
أحبج

حزينة وايد ع اللي قاعد يصير .. علي ماله ذنب يتحمل كل ها منها .. هو بعد انحط فهالموقف غصب عنه مش برضاه .. مب عارفة شلون تتصرف .. بس خلتها للأيام واللي الله كاتبه هو اللي بيصير !!
خذت فونها واتصلت ف موزة .. تدري الوقت مو مناسب بس محتايه ترمس ويا حد ..

موزة: هلا فواز شفيج ؟؟ صاير شي ؟؟
فوز: مواز حاسة نفسي بموت مو قادرة
موزة: بعيد الشر عنج .. ليش شو مستوي ؟؟
فوز: مب قادرة أتحمل .. مب قادرة أشوف على علي
موزة: شهالأفكار يا فوز ..
فوز: قوليلي شو أسوي ؟؟ صورة ذياب ف بالي .. ما قادرة أفرح
موزة: فوز علي خلاص صار ريلج لازم تتقبلين هالشي .. وإنتي صرتي حرمته وعليج واجبات وحقوق
فوز: أدري .. والله أدري بس
موزة: بس شو يا فوز ؟؟
فوز: أنا متفقة ويا علي .. إن .. إنه
موزة: إنه شو شفيج فوز ؟؟
فوز: هو ف مكان وأنا ف مكان ..
موزة: شو يعني ؟؟
فوز: يعني إحنا متزوجين جدام الناس بس
موزة: معقولة !!!
فوز: مواز فهميني صعب علي وربي صعب شتبوني أسوي حالتي كل يوم تزيد سوء .. أنا لما وافقت ع علي ما وافقت وأنا مقتنعة وافقت بس لأني بغيت أنفذ وصية ذياب الله يرحمه
موزة: بسألج سؤال وجاوبيني
فوز: شو ؟
موزة: إنتي تعتقدين ذياب ليش سوا جيه ؟؟ ليش أقنع علي يخطبج وأقنعج توافقين ؟؟
فوز: مدري
موزة: لا تدرين بس ما تبين تفكرين فهالشي .. تدرين إنه سوا جيه عسب يردكم لبعض .. لانه حس إنه جان أناني لما تزوجج وهو يدري إنج تحبين غيره !!
فوز: مواز
موزة: سمعيني يا فوز .. إنتي وافقتي على علي تبين تنفذين وصية ذياب .. إذا بتمين تعاملين علي بهالطريقة .. بلاها هالوصية انسيها وردي بيت أهلج .. لان ذياب ما جان غرضه جيه لما قالج توافقين ع علي ! ذياب مات خلاص .. والله يرحمه ويغفر له .. إنتي لازم تشوفين حياتج شلون تبين ولدج يعيش ف بيئة مناسبة إذا إنتي تتعاملين ويا علي بهالأسلوب وإلا شلون بنته بتحس إنج أمها .. لا تخربين بيتج بإيدج يا فوز عسب أفكار شيطانيه لا تودي ولا تييب .. علي ريلج حلالج .. وإنتي باللي تسوينه قاعدة ترتكبين ذنب كبير لأن الزواج مو لعبة .. تحدديه إنتي وإلا علي ع كيفكم وما يحتاي أذكرج بهالشي لأنج دارسه ومتعلمة
فوز: محد عاش اللي عشته .. لو أرمس م اليوم لباجر محد ياي يفهمني ويحس باللي فيني
موزة: أنا حاسة فيج فديتج .. بس ما أبيج تضرين نفسج أكثر من جيه .. كافي حالة الحزن اللي عشتي فيها من عقب ذياب .. فكري ف كلامي عدل يا فوز .. لا تتهورين وتهدمين كل اللي حاول ذياب يبنيه يا تنفذين وصيته بالطريقة الصح وإلا مو لازم تنفذينها ..
فوز: أحس بتأنيب ضمير يا موزة ..
موزة: إنتي قاعدة تنفذين وصية .. تعذيب الضمير ليش؟؟ سمعي يا فوز إذا مب قادرة تطلعين من هالحالة لازم تشوفين دكتور نفسي .. لازم تتعالجين ..
فوز: أتعالج ؟؟
موزة: فوز إنتي تعيشين وضع صعب أحين .. حالتج النفسية مسيطرة عليج .. الصدمات اللي تعرضتي لها مب شويه ولازم تتعالجين هالفترة
فوز: يصير خير يا موزة .. سوري فديتج أزعجتج باتصالي فهالوقت
موزة: شهالرمسة يا فوز .. متى ما شفتي نفسج محتايه ترمسين حد أنا موجودة .. وإذا تبين حتى بيي لعندج
فوز: مشكورة ما تقصرين فديتج .. ياللا تصبحين ع خير
موزة: وإنتي من هله

بندت عن موزة .. ويلست تفكر ف كلامها عدل .. وكلام موزة منطقي هي لازم تشوف طبيب نفسي بهالخصوص .. وإلا مستحيل راح تقدر تكمل حياتها ويا علي !!


يوم الأحد
الساعة 2:30 ظهراً



عقب الغدا يلس علي ف الصالة يقرا الجريدة .. وراحت فوز فوق تشوف اليهال .. دشت عليهم جان ذياب راقد أما فوز ف واعية بس ف سريرها .. راحت وخذتها ويلست تلعب وياها .. فوز وايد تشبه علي .. كانت تلاعبها وهي تضحك ومستانسة .. ما انتبهت فوز على علي اللي واقف عند الباب يشوف عليها .. يدري إنه اختار لبنته نعم الأم وإن رغم كل شي فوز راح ترد لطبيعتها وراح تتقبل وجود علي ف حياتها .. حتى لو كانوا عايشين مثل الغريبين ف بيت واحد ! ما حب يفوت هاللحظة وسار داره ياب الكاميرا .. وخذ صورة لفوز حرمته وفوز بنته .. خلت فوز تنتبه وتشوف ع الباب ..

فوز: شتسوي ؟؟
علي: أصوركم ..
فوز: ليش ؟؟
علي: كيفي .. حرمتي وبنتي شو يخصج إنتي ؟
فوز: ما أحب حد يصورني بدون لا يشاورني
علي: ما ع كيفج
فوز: علي
علي: عيونه
فوز: اطلع برع
علي: ياي أشوف عيالي حرام ؟؟
فوز: أوكي بطلع أنا

حطت فوز ف سريرها ويات بتظهر بس علي يودها من إيدها وسحبها صوبه ..

علي: بكل اللي تسوينه قاعدة تعاندين نفسج
فوز: هدني
علي: حرمتي ولو أسوي فيج اللي أبيه محد يقدر يتكلم
فوز: علي قلت لك هدني

شدها علي صوبه أكثر .. وفوز تشوف ع عيونه وخلاص دمعتها متعلقة وبتنزل ف أي لحظة ..

علي: أدري إنج تحبيني بس تكابرين
فوز: إنت ما تدري عن شي ..
علي: ليش تسوين جيه ؟؟
فوز: لأني أكرهك

بطلت إيدها عنه وسارت دارها بسرعة .. وعلي دش داخل يشوف اليهال .. شوي وبدا ذياب يصيح .. سار صوبه وخذه يلس يشوف عليه وفخاطره يقول هالولد صار ولده خلاص حتى لو مو شايل اسمه بس راح يكون ولده ولا كبر راح يزقره بابا .. ذياب يصيح وعلي ما عرف شلون يتصرف .. خذاه لعند فوز .. دق الباب بس ما ردت عليه وفتحه ما جان مقفول دش الغرفة .. ويلس ع الشبرية وذياب ف إيده يحاول إنه يسكته

كلها دقيقتين وطلعت فوز م الحمام جان مبين ع ويهها إنها كانت تبجي ..

فوز: عطيني إياه
علي: شفيه ويهج ؟؟
فوز: عطني الياهل ما تشوفه يبجي ..
علي: هاج ..
فوز: وأحين تسمح تخليني بروحي لأني أبي أرضعه
علي: لا ما أسمح .. قوليلي قبل شفيه ويهج جيه محمر .. كنتي تبجين ؟؟
فوز: ما يخصك
علي: أنا ريلج ويخصني كل شي يصير وياج
فوز: الياهل يجبي يوعان خلني أرضعه
علي: أوكي من تخلصين اترياج ف الصالة
فوز: تعبانه وأبي انام
علي: فوز .. لا تعاندين
فوز: مو قاعدة أعاند
علي: أترياج !! ترا والله بسوي شي ما يرضيج
فوز: شي مثل شو ؟!
علي: مدري عاد .. أنا حذرتج تعالي الصالة نرمس أحسن لج
فوز: يصير خير

رضعت فوز ولدها ورقدته ع الشبريه وخلت الوسايد م الصوبين لا يطيح وعقبها سارت صوب الصالة تشوف علي شو يبا ..

فوز: نعم ؟؟
علي: يلسي
فوز: شو تبا ؟؟
علي: قلت لج يلسي بنرمس
فوز: كاني يلست شتبي ؟؟
علي: ليش كنتي تبجين ؟؟
فوز: ما فيني شي .. ولهانة ع أهلي !
علي: أمس مودرتنهم ما مداج تولهين .. عيل سرتي ألمانيا ويلستي فيها ما قلتي ولهانة عليهم
فوز: مضايجة من نفسي
علي: تبيني أوديج مكان ؟؟ تبين تطلعين م البيت؟؟
فوز: أبي أسير عند مواز .. بتوديني ؟؟
علي: بوديج .. قوليلي متى تبين تروحين وبوديج
فوز: أوكي ..
علي: فوز
فوز: شو ؟
علي: لا تصعبينها علي بليز .. تحسسيني إنج ابداً ما كنتي تحبيني .. وإني خذيتج غصب عنج وسرقتج م الشخص اللي تحبيه .. أوكي أنا وافقت ع كل شروطج وقلت لج اللي تبينه بسويه وكاني منفذ كل كلامي لج .. ما أبي منج غير تعامليني مثل قبل .. بلاها هالمعاملة القاسية منج ترا ما أستاهل اللي قاعدة تسوينه .. ولا تعتقدي إن معاملتج لي راح تغير م الوضع اللي إنتي حابه تكونين فيه .. بس أقل شي ما تحسسيني إني غريب عنج .. أنا أحبج والله إني أحبج
فوز: أنا آسفة علي .. أدري إن اللي قاعدة أسويه غلط بس مو بإيدي .. والله مو بإيدي
علي: هاي فترة وبتعدي .. أنا ما أقدر أحاسبج ولا ألومج وقلت لج مابي منج شي .. بس ما أبيج تعامليني جيه .. اعتبريني غريب بس مو بهالصورة .. لأن الغريب وهو غريب مستحيل تعاملينه بهالطريقة
فوز: محتايه أكون بروحي هالفترة .. نفسيتي تعبانه .. وايد أشياء صارت لي أنا ما كنت حاسبة لها حساب .. علي واللي يسلمك افهمني مو سهل إني بين يوم وليلة أشوف نفسي هنيه ف بيتك وإنت ريلي مب سهل لأنه شي من يوم تزوجت ذياب الله يرحمه غاب عن بالي ومحيته نهائياً من حياتي !!
علي: طيب بعطيج الوقت اللي تبينه .. خذي راحتج وعلى أقل من مهلج .. وأنا أنتظرج
فوز: أبي أسير العصر عند مواز
علي: إن شاء الله .. تزهبي عقب الصلاة
فوز: أوكي ..
علي: فوز
فوز: هلا
علي: الأسبوع الياي راح نسافر
فوز: وين ؟؟
علي: فرنسا
فوز: شو هناك ؟؟
علي: ماكو شي بس جيه نطلع من هالجو الكئيب اللي عايشين فيه
فوز: ماله داعي .. وذياب للحين صغير صعب أسافر
علي: عيل شو فايدتها المربية .. ماكو شي صعب راح نسافر وخلاص أنا حجزت التذاكر
فوز: ع أمرك اللي تشوفه

راحت فوز .. وحس علي براحة شوي .. دامها بدت تسمعه يعني فيه أمل كبير إنها تتغير وإن شاء الله ترد له فوز اللي عرفها وحبها .. أما فوز فراحت تتصل ف موزة وتخبرها إنها بتمرها العصر وتبيها تروح وياها العيادة !!


يوم الأربعاء
الساعة 9:00 مساءاً


ميرة وموزة عند فوز .. عزمتهم اليوم ع العشا .. سعيد وغيث ويا علي ف الصالة تحت .. والبنات سارن فوق يسولفن ع راحتهن ..

عند الشباب ..

سعيد: علاوي شو الأوضاع ؟؟
علي: أوضاع شو ؟
سعيد: يعني الحياة اليديدة وفوز ..؟؟
علي: الحمدلله أمورنا طيبة
غيث: هههههه سعيد شتبي فيه
سعيد: خلني آخذ علومه
علي: باجر إن شاء الله بالليل مسافرين
سعيد: أوووه شهر عسل شو ؟
علي: يقولون
غيث: وين بتسافرون ؟؟
علي: فرنسا
غيث: حلوو تروحون وتردون بالسلامة
سعيد: واليهال بتاخذونهم وياكم ؟
علي: أكيد ما نستغنى عن عيالنا


عند البنات

ميرة: فواز شالأخبار ؟؟
فوز: الحمدلله كل شي تمام
موزة: خبرينا شلون تحسين نفسج بعد جلسات العلاج ؟
فوز: يعني أحس فيه تحسن .. وترا آخذ الدوا بانتظام
ميرة: علاج شو ؟؟
فوز: أروح عيادة نفسية أتعالج
ميرة: من شو ؟؟ شفيج ؟
موزة: ماكو شي بس الفترة الأخيرة نفسيتها كانت داون
فوز بابتسامة: يب .. بس الحمدلله وايد أحس بتغير ف حالتي هاليومين .. وباجر مسافرين إن شاء الله يعني يمكن السفر بعد راح يساعد ف إني أعدل من نفسيتي شوي وأرد مثل قبل
ميرة: إن شاء الله .. وعلاوي يدري عن هالشي؟
فوز: لا .. ما قلت له
ميرة: ليش عاد ؟
فوز: بس جيه
موزة تغير الموضوع: نورة تسلم عليكن ..
فوز: الله يسلمج شخبارها ؟؟
موزة: الحمدلله بخير بس الحمل وايد متعبنها
فوز: الله يعينها
ميرة: إلا صج فواز
فوز: هلا ميرة
ميرة: شرايج عقب ما تردين م السفر نروح نزور هند
فوز: فكرة والله .. موافقة هي ف دبي صح ؟؟
ميرة: هيه .. أدله بيتهم
فوز: خلاص تم أول ما نرد م السفر نسير عندها ..
موزة: لا تنسون بسير وياكم
فوز: ضروري
ميرة: من يصدج إن عقب ما نخلص جامعة .. ما نتفرق وكلنا سكنا ف نفس المكان ..
فوز: سبحان الله الدنيا صغيرة
ميرة: فواز أشوفج هديتي الكتابه مول ما تنزلين شي ؟؟
فوز: أدري والله .. بس شسوي زادت المسؤوليات عقب الزواج
ميرة: هيه والله .. اندثرت موهبتج
فوز: ههههه بعيد الشر ما عليج خليني أتفيج وبرد بقوة
موزة: عندج بدل الياهل اثنين وين يايه تتفيجين
فوز: فديتهم والله .. ما عليج أصلا فوز خلاص حرمه
ميرة: هههههه وذياب ريال
فوز: هيه

سمعت فوز صوت علي يزقرها .. استأذنت م البنات وسارت تشوف شو يبا جان واقف بنص الدري .. محد يدري عن الوضع اللي امبينهم إلا موزة حتى ميرة ما تدري .. وعلي ما يدري إن موزة تدري عن اللي بين فوز وبينه ..

فوز: تبي شي ؟؟
علي: منورة اليوم .. لو أدري بتستانسين هالكثر من زمان خليتهم إييون
فوز: زاقرني تقولي جيه ؟؟
علي: لا مو جيه ييبي ذياب سعيد يبي يشوفه
فوز: إن شاء الله

لفت فوز بتمشي وزقرها مرة ثانية ..

فوز: هلا

بحركة سريعة تجدم منها وباسها ع خدها وفوز عصبت عليه بس ما قالت شي .. كانت بتصرخ لولا إن الموجودين كلهم بيسمعوها .. بس ودها تصفع علي طراق ع ويهه .. وعلي ضحك عليها لأنه يدري إنها ما تقدر تقول شي ولا تسوي شي ..

فوز: أكرهك
علي بهمس: وأنا أحبج

راحت فوز عنه .. وخبرت المربية تودي ذياب تحت عند الشباب .. علي يتحرا إن هي راح تييبه بس من بعد الحركة اللي سواها كرهته ما تبي تشوفه مره ثانية .. وبعدها رجعت مرة ثانية للبنات ..

موزة: شفيج ؟؟
فوز: ماكو .. علي جان يبي ذياب يقول سعيد يبي يشوفه
ميرة: وايد يحبه
فوز: هيه .. أحيده لمن تييون عندنا أول شي يسأل عنه ذياب .. صج ليش مو يايبين عيالكم؟؟
موزة: لين ويا محمد خليناهم عند يدتهم
فوز: فديتهم لو يبتوهم
ميرة: ويه مواز حمود شقي زين إنه ما يا
فوز: هههههههه كل اليهال أشقياء

كملن البنات سوالفهن ليمن الشباب قالوا بيترخصوا .. وسلمن ع بعض وبعدها كل وحده سارت عند ريلها .. ومن عقب ما ساروا فوز كانت بتروح فوق بس علي زقرها ..

فوز: شتبي ؟؟
علي: معصبة علي ؟؟
فوز: هيه .. حركات يهال
علي: أحين لأني بستج صارت حركات يهال
فوز: وليش تبوسني ؟؟
علي: كيفي أبي أغيظج
فوز: أدري فيك .. كريه
علي: شكثر
فوز: وايد
علي: مب مشكلة يزاج الله خير
فوز: بسير أرتب جنطتي وإنت عقاب لك إيلس ويا ذياب
علي: فديته ولدي بيلس شو حارنج إنتي
فوز: ما حارني شي ..
علي: زين ما تبين مساعدة ؟؟ بنيي أنا وذياب نساعدج
فوز: مابي شي منك
علي: متأكدة ؟؟
فوز: هيه متأكدة ايلس هنيه
علي: عيل بنيي ..

صرخت فوز صرخة م القهر اللي فيها وراحت فوق ترتب أغراضها .. علي بس يبي يرفع ضغطها بهالتصرفات .. ضحك عليها وهي معصبة وشل ذياب وساروا عندها فوق .. دق الباب ودش كانت فوز تزهب ملابسها وتحطهم ف الجنطة .. ما قالت شي دش علي ويلس وذياب يمشي ف الغرفة ويلعب فيها ..

فوز: علاوي يود الياهل .. ذياب حبيبي عيب
علي: شو قلتي ؟؟
فوز: قلت لك يود الياهل
علي: من زمان ما سمعت اسمي ع لسانج لا وبعد بدلع
فوز: أصلاً طلع بالغلط
علي: المهم إنه طلع ..
فوز: أحين إنت ما تبي تزهب جنطتك ؟
علي: عيل إنتي ليش حرمتي
فوز: شو يعني ؟
علي: إنتي بترتبينها لي ؟؟
فوز: لسه جدامي أرتب جنطة ذياب وفوز
علي: خليهم باجر .. عقب ما تخلصين ملابسج دوري
فوز: أنا عارفة ليش تسوي هالحركات بس ما عليه يصير خير
علي: ذياب بابا تعال .. بنسير نشوف فوز شتسوي من تخلصين خبرينا

خذت فوز المخدة من القهر اللي فيها وفرتها على علي .. اللي نقع م الضحك عليها .. خذ ذياب وساروا يشوفون فوز ويلعبون وياها .. أما فوز ف من خلصت مرتبة جنطتها بدون لا تخبر علي سارت داره وزهبت له الجنطة ع السريع وبعدين سارت تشوفهم شو يسوون ..

أول ما دشت غرفة اليهال المنظر اللي شافته خلا عيونها تدمع .. ابتسمت ابتسامة هادية وهي تشوف علي راقد وعلى يمينه فوز وعلى يساره ذياب وهم راقدين بعد ..

سارت صوبهم وخذت فوز بهدوء عسب تحطها ف سريرها .. وعلي انتبه عليها بس سوا نفسه راقد .. وعقبها خذت ذياب وحطته ف سريره .. ولما يات بتوعي علي يودها من إيدها ..

فوز: يممممه .. بسم الله شفيك خرعتني ..

شافها بنظرة خلتها تذوب .. ومن الخرعة مو قادرة تتحرك من مكانها .. يابها صوبها ويلسها حذاله واقترب منها أكثر .. وفوز تشوف عليه مو قادره تستوعب اللي يصير ..

علي: ولهت عليج وايد ..

جان يمسح بإيده ع خذها وشعرها .. وفوز من الخوف تبلع ريقها

علي: ليش حارمتني منج .. كل شي فيج حلالي ليش تحرميني من حلالي ..
فوز: أبا أروح ..
علي: إنتي لي .. ما بخليج تروحين .. فوز لمتى بتخليني بعيد .. ؟
فوز: مو وقته هالكلام أحين
علي: عيل متى وقته .. لمتى بتظل حالتنا جيه أنا ف غرفة وإنتي ف غرفة ..
فوز: علي بليز .. علي
علي: أحبج وأبيج وما حاب أكون بعيد عنج .. العمر يمضي يا فوز لا تحرميني منج
فوز وهي تبلع ريقها : محتايه وقت يا علي
علي: مو كافي عليج الوقت اللي خذتيه ؟؟
فوز: علي فيه شي إنت ما تعرفه
علي: شصاير ؟!
فوز بتردد: أنا أتعالج عند طبيبة نفسيه !!
علي: شو ؟؟ من متى هالحجي وليش ؟؟
فوز: من جم يوم .. علي نفسيتي تعبانه لا تجبرني ع شي ما أبيه فالوقت الحالي .. الدكتورة قالت لازم أخذ فترة نقاهه .. واستمر ع جلسات العلاج وإن شاء الله بيتعدل الوضع اللي أنا فيه .. وكل ها محتاي وقت .. أنا مو راضية عن نفسي ولا على الوضع اللي إحنا فيه بس حالتي ما تسمح .. وايد أفكار سلبيه ف عقلي تراكمت عقب وفاة ذياب الله يرحمه لازم أتخلص منها اللي صار مب سهل وصعب أنساه ف يوم وإلا يومين
علي: بس السالفة صار لها أكثر من سنة يا فوز
فوز: راح يتغير الوضع اللي امبينا أوعدك
علي: طيب يا فوز اللي تشوفينه

باسها ع إيدها وطلع م الغرفة .. راح داره واستغرب إن جنطة ملابسه مرتبه .. ابتسم رغم القهر اللي فيه .. بدل ملابسه ورقد .. أما فوز ف يلست تصيح ع اللي صار .. كانت وايد خايفة من نظرات علي وخوفها هو اللي خلاها تخبره عن موضوع العلاج .. باست عيالها وراحت دارها هي بعد ترقد !!


عقب مرور أسبوع


الفندق - باريس
يوم السبت
الساعة 6:00 مساءاً


خلال هالأسبوع علاقة فوز بعلي تحسنت أكثر من قبل .. للحين كل واحد ف صوب .. بس صاروا يعاملوا بعض على إنهم أصدقاء .. حالة فوز النفسية تعدلت وايد وصارت تسولف مع علي وأغلب الوقت ويا بعض .. وباجر راح يردون البلاد ..

قبل شوي يايين من برع .. فوز ميودة ذياب وعلي ميود فوز .. هالأسبوع مره عليها بسلام .. كانت وايد مستانسه بوجودها مع علي واليهال .. حست نفسها اندمجت ف هالعائلة وبدت تحس إن فوز بنتها مثل ما علي قام يحس إن ذياب ولده ..

علي: شو بتسوين أحين ؟؟
فوز: تعال وياي الغرفة
علي: ليش ؟؟
فوز: ممممم بخليك تبدل حق ذياب .. مو الريال لازم يساعد حرمته
علي باستغراب: أبدل حق ذياب ؟؟ جزء من النص مفقود ترا شو أبدل له ؟؟
فوز: احم احم شو بعد ؟؟
علي: أكيد تمزحين
فوز: وليش امزح ياللا ياللا
علي: مو صج ؟؟
فوز: بلا علاوي صج ياللا قوم
علي: زين المربية هنيه خليها هي تسوي هالشي ؟؟
فوز: نو .. إنت بتسويه
علي: شو تعاقبيني مثلاً
فوز: تقدر تقول
علي: أمري لله امشي جدامي
فوز: هههههه زين لا تدف بطيح أنا وولدي
علي: فديتج إنتي وولدج

دشو الغرفة وزهبت فوز كل شي .. ويلست ع الكرسي وعلي يشوف عليها مستغرب ..


علي: شو أحين ؟؟
فوز: زهبت لك كل شي ياللا شوف شغلك أنا بيود فوز
علي: ما تبين تغيرين رايج ؟؟
فوز: لا .. ياللا كلها جم شهر بعوده يروح الحمام مثل أخته بس إنت أحين انجز مهمتك
علي: زين يالكريهه
فوز: هههههه شوف شغلك وإنت ساكت

جان ذياب يصيح ما يبيه يسويله شي وفوز تضحك ع علي اللي مب عارف يتصرف ..

علي: تعالي شو ولدج مب راضي يخليني أسوي شي جيه ما بعرف أشتغل
فوز: تبي اساعدك ؟؟
علي: هيه تعالي ياللا
فوز: زين لحظة بخلي المربية تنتبه ع فوز
علي: وديها عندها خل تبدل لها ملابسها
فوز: مابي نخلص من ذياب ونبدل لها
علي: أوكي ..
فوز: وإلا أقولك خليها تلعب ما راح تسوي شي .. ياللا

يات فوز ويلست حذال علي .. كانت وايد جريبة منه وتعلمه شو يسوي وهو مستانس وايد وقاعد يسوي اللي تقوله عليه .. بدلو ملابسه وسبحوه وزهبوه ..

علي: فديت ولدي شلون صاير ؟؟ معرس
فوز: ههههه معرس شو حرام عليك
علي: وربي عسل
فوز: شكله خلاص نعسان بيرقد .. بوديه عند المربية ترقده وبيي نبدل حق فوز
علي: أوكي حبي

سارت فوز تودي ذياب .. وعلي ميود فوز أونه بيبدا فيها ليمن تيي فوز .. لمن يات جان قاعد يسبحها وهي واقفة عند باب الحمام تشوف عليه .. وما انتبهت إلا بالماي ع ملابسها

فوز بشهقة: علاوي شو سويت حرام عليك
علي: ههههههه فشو سرحانة ؟؟ ما تستحين أنا عندج وتسرحين
فوز: شدراك يمكن سرحانه فيك
علي: صج ؟؟
فوز: جب جب لا تسوي جيه الجو مرة بارد تبيني أمرض
علي: فديتج ما تهونين .. شوفي شقايل أسبح بنتي خطير مرة .. تبين أسبحج ؟؟
فوز بشهقة : صج ما تستحي .. أحسن شي أروح عنك
علي: هههههههههه وين تعالي أسولف معج
فوز: ما أبا بسير
علي: شفيج استحيتي زين ..
فوز: جب علاوي جب
علي: فديت اللي يستحون .. وخلصنا كانا وهاج بنتج لبسيها
فوز: ليش ما تكمل جميلك مرة وحده
علي: تعبت .. تحميم اليهال مجهد
فوز: عاد اليوم بس خليتك تسبحهم صار الأمر مجهد
علي: فديتهم والله .. تدرين فوز ؟
فوز: شو ؟
علي: أحسني قاعد أعيش أجمل أيام حياتي معكم .. مستانس وايد لأني أبو لإثنين .. الله لا يحرمني منكم
فوز: ولا منك يا رب
علي: ياتني فكرة قومي
فوز: وين أقوم ؟؟
علي: قومي تزهبي بنظهر
فوز: ذياب راقد وين نظهر ؟؟
علي: خليهم راقدين .. فوز بعد أكيد بترقد والمربية هنيه بنظهر أنا وإنتي بس
فوز: وين بنسير
علي: عازمنج ع العشا
فوز: خلينا نتعشا هنيه تعبت م الحواطه ؟؟
علي: لا لا لا بنطلع خاري نتعشا
فوز: لازم ؟
علي: يب لازم
فوز: شو المناسبة ؟؟
علي: عقب بتعرفين ياللا
فوز: بابا فوز سيري عند ناني ..
علي: فديتها بنتي تفهم هههه
فوز: ما شاء الله عليها
علي: زين ياللا قومي تزهبي
فوز: أوكي اطلع من داري
علي: ما عليه دارج هاه .. يصير خير عقب
فوز: ياللا اطلع خل عنك هالسوالف

ظهر علي من دارها .. وراحت فوز تشوف لها لبس عسب تظهر فيه ويا علي .. رغم إنها ما تدري هو وين مودنها وليش مصر يتعشون برع .. عقب ما تزهبت وتكشخت ظهري خاري تتريا علي اللي متكشخ هو الثاني وظاهر بكامل أناقته ..

فوز: أموت وأعرف هالكشخة كلها حق منو ؟؟
علي: إذا موحقج يا قلبي حق منو
فوز: مدري عنك
علي: ياللا خلينا نروح
فوز: أوكي !!


ظهروا م الفندق عقب ما وصوا المربية على اليهال .. اللي رايحين ف سابع نومه .. علي ودا فوز تشوف برج إيفل وكانت مستانسة وايد ليش ان المكان روووعة والأضواء فيه ولا أروع خصوصاً بالليل الجو يصير رومانسي ..

كانوا واقفين جدام البرج بمسافة .. فوز تشوف عليه وهي مستانسه مع إنها مو أول مرة تشوفه بس هاي اول مرة تكون جريبة منه ..

علي: شرايج ندش ؟؟
فوز: لا وين مابي
علي: ليش عاد ؟؟
فوز: أخاف عقب راسي بيدور
علي: تجربة حلوة ترا ما تتفوت إنتي مب كل يوم ف باريس
فوز: أدري بس مابي .. عقب بحس بغثيان عاد إنت كيفك
علي: لااااه دام جيه ما نبي ..
فوز: المنظر وايد حلو ..

اقترب علي منها .. وباسها ع خدها وفوز ما قالت له شي .. هاي أول مرة يبوسها من عقب آخر مرة عصبت عليه .. ما كانت تبي تخرب اللحظة اللي تعيشها مع علي ساعتها .. هو ريلها ولازم تستانس فيه وتتهنى .. شافت عليه فوز بنظرة كلها حب .. عرف علي منها إنها سامحته ع كل شي سواه لها ..

علي: المنظر حلو .. بس الأحلى من كل ها إن أنا وإنتي مع بعض هنيه
فوز: مابي أخرب عليك هاللحظة ..
علي: اششششش .. لا ترمسين خليني أقول كل اللي ف قلبي ..
فوز: آسمعك
علي: سمعيني بقلبج .. أحبج كل عرق فيني ينبض بهالحب .. ولو أوصف سعادتي فهاللحظة يمكن ما أقدر أعبر عنها .. مو مصدج إن أنا وإنتي ويا بعض .. إنج لي أخيراً .. إنج حلالي ودي أحطج ف عيوني وأغمض عليج .. ودي أحطج ف قلبي وأقفل عليج .. ودي
فوز: خلاص يا علي ..
علي: فوز تحبيني ؟؟
فوز: أكثر من أول أحبك

حضنها علي بقوة وحست فوز بأمان وراحة صار لها فترة طويلة ما حست فيهم .. مو مصدجة السعادة اللي تعيشها .. ولا الشعور اللي يمر عليها ..

طلع علي صندوق صغير من جيبه .. وفتحه ..

فوز: شو ها ؟؟
علي: اعتبرينا اليوم تزوجنا .. وها خاتم الزواج

ابتسمت فوز ومدت إيدها عسب علي يلبسها الخاتم .. عقب ما لبسها باس إيدها .. وطاحت فوز ف حضنه ..

فوز: لا تخليني .. مابي أعيش الفقد مرة ثانيه
علي: ما راح أخليج ..

طبعت فوز بوسه ع خده ومشت عنه وعلي وراها ع طول .. كانوا مستانسين باللحظات الحلوة اللي يعيشونها مع بعض .. هالسفرة يات ف وقتها وقدرت تصلح اللي انكسر بينهم .. وقدرت تحنن قلب فوز وتغيره .. عقب ما تعشو رجعوا الفندق كان الوقت متأخر وايد .. واليهال راقدين ..

علي: مممممممم شو يعني ؟؟
فوز: شو ؟
علي: ما بتغيرين رايج ..؟؟
فوز: بشوو ؟؟
علي: ولا شي .. ياللا تصبحين ع خير
فوز: وإنت من هله ..

راحت فوز دارها .. وراح علي داره .. وقفت فوز وشافت عليه وهو واقف بس عاطنها ظهره ..

فوز: حبيبي ..

أول ما سمعها تزقره حبيبي جان شوي ويطير م الوناسه .. من زمااااااان ما سمع كلمة حب أو غزل من فوز .. جان عشطان لهالكلام الحلو .. اقترب منها

علي: عيونه
فوز: ما راح أنسى هالليلة .. اليوم حسيت إني رجعت فوز
علي: فوز اللي أنا أبيها
فوز: واللي تحبها
علي: يعني خلاص ردت المياه لمجاريها ؟؟
فوز: هيه
علي: والخطوط الحمرآ ؟؟
فوز بحيا : إنشآلت
علي: أحبج

رجعت علاقة فوز بعلي مثل علاقة أي اثنين متزوجين .. وردت فوز لحالتها الطبيعية ولحبها لعلي اللي يزيد يوم عن يوم .. بس ما نساها ذياب الله يرحمه .. كل اللي صار إنها غيرت تفكيرها وما كانت تبي تكرر ويا علي نفس المأساة اللي صارت ويا ذياب .. هي ندمانة وايد ع أشياء وايد سوتها ويا ذياب .. تحس إنها حرمته من وايد حقوق تحس إنها ما كانت وفيه معه ف مشاعرها ع الأقل .. ذياب راح وما بيرجع هذا هو الواقع اللي لازم تتقبله فوز بس ما توقف حياتها عنده .. ما تبي تحرم علي من حقوقه كافي الأيام اللي ضاعت وهي بعيد عنه .. لازم تفكر ف عايلتها الصغيرة .. هي وعلي وفوز وذياب .. !!

" قد لا تأتي آلحيآة على آلكيف .. قد لآ نملك تغيير آلقدر .. لكن بيدنآ تغيير آلواقع الذي نعيش .. جمعنآ آلحب .. فرّقتنآ الظروف .. وعآد آلحب لـ يلم شتآتنآ من جديد .. آليوم أنآ أخرى أعيش في كنفِ آلحب بـ سعآدةٍ لآ توصف .. فقط لأنني أخترت غلق آلبآب في وجه الأحزآن .. أدركتُ أخيراً مآ كآنت تلك الأحزآن .. إلا بدآية لـ نهآيةٍ سعيدة !

فوز محمد
/ / 2012

آلنهآية

 

أنثــى استثنائيــة

¬°•| عضو فعّال |•°¬
إنضم
26 ديسمبر 2011
المشاركات
105
الإقامة
جدران قلبي المحطم

رواية رائعة جداً بالرغم من أن الجزء الأخير محزن وبشدة
لم استطع الخروج من المنتدى بعد أن رأيت أنك كتبتي الجزء الأخير
انتظرته بفارغ الصبر,,
بس والله حرام ما يصير ذياب يموت :imua31:


دمتي بخيـر,,
 
الحالة
مغلق و غير مفتوح للمزيد من الردود.
أعلى