(( طولت بالي وخذها اليوم لك شكراً ما ينزل الراس دام الروح بي حية ))
الجزء الثالث والعشرون
بدأت امتحانات الكورس الأول .. بالنسبة لفوز واجهت صعوبة ف بعض المواد الدراسية أما ميرة ف مثل ما تقول امتحاناتها كانت حلوة وايد لو إن علاقتها ف سعيد خلتها تهمل دراستها نوعاً ما .. أما موزة ف انشغالها ف الدراسة خلاها تنسى سيف .. اللي جان يطرشلها مسجات من فترة لفترة .. وكانت ف بعض الأحيان ترد عليه .. يعني الوضع ما بينهم مستقر تقريباً ..!
إجــــــــازة الربيــــــــــع
بيت أبو حمد
يوم الإثنين
الساعة 10:26 مساءاً
كانت فوز يالسة ف الحديقة ومعها اللاب توب .. داشة المنتدى تشوف آخر الردود على كتاباتها .. الجو جان حلو وبارد وهي مستمتعة باليلسة خاري .. ويمكن اللي زاد متعتها تفكيرها إن أختها راح ترجع عقب أسبوع م السفر .. انتبهت على علي اللي داش المنتدى .. واللي لين أحينه ما عرف إن فوز رفيجة ميرة هي نفسها العضوة اللي تكتب ف المنتدى .. وغير جيه جان بين فترة وفترة يطرش مسجات .. وفوز تضطر ترد عليه .. وكانت متلومة إنها شاركت ميرة ف المقلب .. وقررت تخليها تعترف له بكل شي لأنها خايفة يفكر فيها تفكير مب زين ..!!
دق تليفونها .. كانت ريم متصلة فيها .. استانست باتصالها ورمستها ..
ريم: السلام عليكم والرحمة
فوز: وعليكم السلام ورحمة الله وبركاته .. هلا والله
ريم: شحالج فديتج ..؟؟
فوز: الحمدلله بخير .. شحالج إنتي يالقاطعة ؟؟
ريم: أنا الحمدلله طيبة .. والأمور عال العال .. علومكم إنتو؟؟
فوز: والله .. نحمد الله ونشكره ..
ريم: شو ماشي أخبار ؟؟
فوز: ممممممم لا ماشي ..
ريم: بعيد الشر .. ولا حتى شوية ؟؟
فوز: الظاهر إنتي عندج أخبار .. وعسب جيه داقة
ريم: ممممممم عندي بصراحة .. وما أدري عاد إذا هالأخبار راح تونسج أو تضايجج ..
فوز: شو مستوي ؟؟
ريم: تعرفين فهد ...؟؟
فوز: منو فهد ...؟؟ ولد ييرانا ...؟؟
ريم: لا ويييين .. رحتي بعيد ..
فوز: عيل منو ؟؟
ريم: أخو محمد .. الحب الجديم
فوز: أووووف .. لازم تطرينه يعني ..؟؟
ريم: شو الحب تحول كره وإلا شالسالفة ..؟؟
فوز: الحب تحول لـ ولا شي .. وبعدين حديثنا عن فهد مب محمد .. شفيه فهد ؟؟
ريم: أنا شفته لمن كنا سايرين المطار .. وحمد وصّاه علي عقب ما درا إن نحن ف نفس الطايرة ..
فوز: هيه حمد قالي هالشي ..
ريم: بس اللي ما تعرفينه إن كراسينا طلعت حذال بعض وبينا ياهل ف النص .. وطول الرحلة جان يرمس وياي ..
فوز: أوووووووووووه .. ما شاء الله .. والله وتطورنا ..
ريم: بلا تعليقاتج السخيفة يالدبة ..
فوز: أوكي كملي ..
ريم: المهم عرفت من هالرحلة كل شي عنه تقريباً .. وعقب ما وصلنا .. أصّر إنه يروح يوصلني قبل بس أنا رفضت .. وشكرته وسرت عنه ..
فوز: وبس ..؟؟
ريم: يا ريييييت ..
فوز: شو عيل ...؟؟
ريم: اكتشفت عقب جم يوم إنه محاضر ف كليتنا .. وتفاجأت أول ما شفته داش الكلاس وهو بعد ياته صدمة .. طلع يدرسنا مقرر .. تخيلي ..؟؟
فوز: معقولة ؟؟
ريم: والله
فوز: هيييه صح .. هو قالي إنه ياته فرصة عمل وقرر يشتغل هناك
ريم: إنزين .. وصرت تقريباً أشوفه مرتين في الأسبوع .. والأسبوع اللي طاف أنا ما سرت المحاضرة لأني كنت تعبانة .. عندي زجام وحمى .. دق تليفوني وشفت رقم غريب أول ما رديت طلع هو .. ماخذ رقمي من ملفي ودق يتطمن ويسأل عن سبب غيابي ..
فوز: يا سلاااااااام .. احم احم .. ريموووه ليكون طيحتي الريال
ريم: هههههههههه يب ..
فوز: حلفي ..؟
ريم: شو حلفي وحلفي .. أجذب عليج ؟؟
فوز: شقالج ؟؟
ريم: رمسني وقالي الأشياء اللي تخصه وأنا ما أعرفها .. وقال إنه يبا يخطبني ..
فوز: قالج عن حرمته اللي توفت ؟؟؟
ريم: هيه .. ربي يرحمها
فوز: وإنتي شو رايج ؟؟
ريم: بصراحة أنا أشوف إنه ريال والنعم فيه .. بس ما أدري أبويه شو راح يقول ..
فوز: ما أظن بيعارض .. ما عليج إذا إنتي تبينه توكلي على الله .. فهد والله ما يتعوض .. أحسن عن محمد بمليون مرة
ريم: يصير خير
فوز: وربي يوفقج فديتج ..
ريم: جميعاً إن شاء الله
فوز: ممممم حبيتيه ؟؟
ريم: أعجبت بشخصيته .. وإذا صار نصيب أكيد بحبه .. دام راح يصير ريلي
فوز: أنا أقولج لا تفوتينه .. والظاهر إنه يحبج لأن فهد من توفت حرمته أهله حاولوا وياه عسب يعرس بس هو رفض .. ودام فتح معج الموضوع ف أكيد أعجب فيج وحبج وشاريج
ريم: فكرت وايد فهالشي .. وكنت بسأله ليش ما تزوج عقب وفاة حرمته .. بس عقب هونت ..
فوز: إذا صار نصيب .. اسأليه اللي تبينه ..
ريم: هيه والله .. المهم ببند عنج أحينه ..
فوز: أوكي ..
ريم: سلمي ع أميي وأبوويه وحمد وندوش فديتها ..
فوز: يوصل إن شاء الله ..
ريم: أشوفج ع خير جريب إن شاء الله
فوز: ع خير ..
ريم: فمان الله
فوز: ربي يحفظج ..
بندت فوز عن أختها .. وردت للمنتدى .. كانت بتسوي تسجيل خروج بس انتبهت إن في رسالة وصلتها من العضو vip .. ابتسمت تلقائياً وفتحتها بالمرة .. كانت تعتقد إنها رسالة عادية بس أول ما قرت الكلام المكتوب فيها انصدمت .. ظهرت من المنتدى وصكرت اللاب توب وهي تحس بقلبها يدق بالقو .. وعلى طول دقت حق ميرة .. اللي بالمرة ردت عليها ..
فوز: السلام عليكم
ميرة: وعليكم السلام والرحمة .. هلا والله
فوز: هلا بج زود .. شحالج ؟؟
ميرة: ممممممم مبسوطة
فوز: لا والله .. عسى دوم إن شاء الله
ميرة: وياج .. وإنتي شحالج ؟؟
فوز: أنا بخير .. بس ف هاللحظة بالذات خاطري أييج الشارجة وأذبحج
ميرة: أفاااا ليش عاااد ...؟؟
فوز: ليش عااد .. بقولج ليش عاد .. بس قبل قوليلي منو عندج ..؟؟
ميرة: علاوي وسعيد هنيه ..
فوز: أخوج شو يسوي .. أنا بقولج وإنتي ردي عليه هيه أو لا
ميرة: أوكي .. شو ؟؟
فوز: حاط اللاب توب ع ريوله .. وداش المنتدى صح ؟؟
ميرة: تقريباً ..
فوز: تقدرين تظهرين خاري أو تروحين بعيد عنهم ؟؟
ميرة: هيه .. لحظة بس ..
ميرة: هلا .. خلاص ظهرت خاري .. شو مستوي ؟؟؟
فوز: يالدبة إنتي متى بتقولين حق أخوج الحقيقة ؟؟ وإنج إنتي صاحبة المقلب ؟؟
ميرة: ما أدري والله لين أحينه ما فكرت
فوز: لا فديتج لازم تفكرين .. لأنه يطرش لي رسايل وأنا أرد عليه وكله بسببج إنتي ..
ميرة: إنزين عادي ترا .. بعدين خلي ردج يكون عادي وعلى قد الرسالة.. وشوفي إذا تستاهل أو لا ..
فوز: ف عينج .. وربي مب عارفة شو أقول ..
ميرة: شفيج ؟ علاوي سوا شي ..؟؟
فوز: أخوج مطرشلي قبل شوية رسالة ع المنتدى
ميرة: شو يقول فيها ..؟؟
فوز: يعترف فيها بكل شي ..
ميرة: ما فهمت ..؟؟
فوز: الرمسة اللي قلتيها إنتي عن إعجابه وهالسوالف ..
ميرة: حلفي ؟؟
فوز: والله .. أقولج انصدمت وايد
ميرة: ليش إنزين إنتي تعرفين ها كله ؟؟
فوز: هيه .. بس ما أعرف إنه يحبني ويبا يخطبني .. لا وبعد طلب رقم أبويه وإلا أخويه عسب يدق عليهم .. تخيلي
ميرة: مستحيل ..!!!
فوز: والله .. إذا مب مصدقة دشي المنتدى بنكي وشوفي
ميرة: أويييييه تعقدت السالفة .. ممممم أحينه إذا درا إن أنا اللي أطرش الرسايل وربي بيعصب .. بيقول شو تلعبون بمشاعري
فوز: شفتي .. حذرتج م البداية من هالشي بس ما سمعتي الرمسة
ميرة: لازم أقوله الحقيقة ..
فوز: تسوين خير فديتج .. لا تتعقد الأمور أكثر وأكثر ..
ميرة: أكثر من جيه ..؟؟ ما أظن ..
فوز: المهم .. لا تنسين تردين عليه عقب ..
ميرة: أكيد .. لازم أقولج ردة فعله .. وشو بيقول .. بس خليني أبند أحينه وعقب برمسج
فوز: أوكي ..
ميرة: ياللا فديتج مع السلامة
فوز: ربي يحفظج ..
يلست فوز ف الحديقة تتريا رد ميرة عليها ع أحر م الجمر .. وهي خايفة من ردة فعل علي .. وتفكيره فيها .. وف نفس الوقت كانت تفكر ف الكلام المكتوب ف الرسالة .. وردت فيها الذكرى لـ ورا .. لكل المواقف اللي جمعتهم ف بعض ...!!!
بيت عبدالله
يوم الإثنين
الساعة 11:15 مساءاً
علي وسعيد يالسين ف الصالة .. علي ع النت .. وسعيد ميود الريموت ويالس يجلب ف القنوات ..
سعيد: خاطريه أعرف من ساعة يالس ع النت شو تسوي ؟؟
علي: ولا شي .. بس أطالع
سعيد: متأكد ..؟
علي: يب
سعيد: فونك يدق .. ليش ما ترد ..؟
علي: مالي خلق حقها ..
سعيد: حق منو؟
علي: وحده ما تعرفها
سعيد: وإنت من وين تعرفها ؟؟
علي: من الشارع
سعيد: شو؟؟
علي: أقصد تعرفت عليها ف السنتر من فترة أحينه ..
سعيد: من متى رجعت حق هالسوالف ؟؟
علي: سوالف شو ..؟؟ ما أرمس حد غيرها
سعيد: وليش ترمسها ؟؟
علي: بس جيه .. عطتني رقمها والفترة الأخيرة كنت مضايج وايد ودقيت عليها ورمستها ..
سعيد: شو مضايجنك عاد .. وبعدين أنا وين سرت ليش ما ترمسني أنا ف اللي يضايجك ؟؟
علي: صار اللي صار وخلصنا ..
سعيد: إنزين شو ها اللي جان مضايجنك؟؟
علي: ما أبا أرد أذكره عسب ما أتضايج مرة ثانية ..
سعيد: أوووونه ..
علي: ميروووه وين سارت ؟؟
سعيد: ظهرت خاري ترمس رفيجتها ..
علي: منو ؟؟
سعيد: ما أدري .. أظن فوز ..
علي .. فوز .. فوز .. فوز .. وبعدين يعني .. منو فوز .. أستغفر الله العظيم .. أحس نفسي متلخبط ومب عارف شو أبا .. سعيد يحبها ما يصير أفكر فيها .. وبعدين أنا رمست العضوة وأتريا ردها .. بس ليش فوز ف بالي ليش يا ربي ...!!!
عقب ما بندت ميرة عن فوز دشت البيت مرة ثانية .. طالعها سعيد وابتسم وهي ردت له نفس الابتسامة .. وسارت تيلس حذال أخوها
ميرة: علاوي ..؟؟
علي: هلا
ميرة: أبا أرمسك ف سالفة ..
علي: سالفة شو ..؟؟
ميرة: بس اوعدني ما تعصب ولا تتضايج ..
سعيد جان يطالع ميرة باهتمام .. شو هالسالفة ..؟؟ احساس يقوله إنها متعلقة بفوز .. لأن ميرة لو كانت بترمس أخوها ف شي كانت رمسته قبل لا فوز تدق لها .. بس دام إنها رمستها وعقب يات ترمس علي ف أكيد صاير شي .. ما علّق ولا قال شي .. سوا نفسه كأنه مب موجود بينهم ..
علي: وليش أعصب .. قولي عادي ..
ميرة: لا مش عادي .. لازم تكون رايق عسب أقولك
علي: أنا رايق .. رمسي عاااااد
ميرة وهي تبلع ريقها: العضوة اللي إنت معجب ف كتاباتها ..
علي باستغراب: بلاها ..؟!
ميرة: كانت اطرش لك رسايل ع المنتدى ف الفترة الأخيرة
علي: هيه ..
ميرة: بصراحة اللي جان يطرش مش هيه ..
علي: عيل منو ..؟؟؟
ميرة: أنا ..
علي بصدمة: شو ...؟!!!!
ميرة: خلني أفهمك السالفة ..
علي: شو تفهميني .. تستغفليني يا ميرة ..؟؟ معقولة إنتي تسوين جيه
ميرة: علاوي اصبر .. أنا ما سويت شي ..
علي: كل ها وما سويتي شي .. اطرشين لي رسايل ومخلتني أعيش ف وهم طول هالفترة وأنا أقول إن العضوة معجبة فيني .. وف الأخير تطلعين إنتي صاحبة الرسايل ..؟؟؟ ليش سويتي جيه ..؟؟
ميرة: كنت بسوي مقلب ..
علي: مقلب ..؟؟؟ تجرحين مشاعري بس لأنج تبين تسوين مقلب ..؟؟؟
ميرة: ما توقعت إنك تعصب .. ولا يا ف بالي إنك تتجرأ وتقولها إنك تبي تخطبها .. وبدت ميرة تدمع .. كانت شوي وبتصيح بس يودت نفسها .. وسعيد تدخل ..
سعيد: اهدا يا علي .. شفيك جيه محرّج .. بدل لا تسألها ليش سوت جيه .. ودامها داشة من نك نيم العضوة .. اسألها منو العضوة وكيف عرفتها ..
طالعها علي .. كأنه يتريا جوابها ع أسئلة سعيد .. وميرة طالعت ع سعيد اللي طالعها وهز راسه .. وكأنه يقولها ترمس .. وعقبها رمست ..
ميرة: أنا ما عرفت العضوة إلا قبل فترة بسيطة بس .. واكتشفت إني أعرفها وإنتو بعد تعرفونها .. وعسب جيه قلت لها تفتح خاصية الرسايل .. قلت لها إن علي مهتم ف كتاباتها وجان خاطره يطرش لها رسالة .. واقنعتها تعطيني الباسورد عسب أدش بنكها وأطرشله رسالة .. وفعلاً سويت جيه ..
علي: منو هالعضوة ...؟!!!!
ميرة بتردد: فــ ـ ـ ـ وز ..!
علي: منو فوز ..؟؟
ميرة: فوز رفيجتي .. اللي ويايه بنفس الغرفة ..!!
صدمة سعيد كانت أشد من صدمة علي .. يمكن لأنه جان يبيها وحاط عينه عليها .. وهي نفس البنت اللي أخوه وولد خالته يحبها من فترة طويلة .. ولأن علي عرفها قبل ف هو أحق فيها .. أما علي ف لأنه جان منصدم ما عرف شو يقول .. بس عرف يفسر سبب تفكيره فيها ويفسر كل اللي مكتوب ف الدفتر الصغير حقها .. كانت ميرة تتريا ردة الفعل .. بس علي ما قال شي .. كل اللي سواه طرشلها رسالة .. وعقبها خذ مفتاح سيارته وظهر م البيت ...!
لحقته ميرة .. بس ما وحت عليه .. جان خلاص راكب السيارة .. وظهر م البيت بسرعته .. خافت عليه وسارت تدق ع جهازه مغلق
سعيد: لا تخافين .. ما راح يسوي شي
ميرة: ما شفت حالته وهو ظاهر م البيت .. حتى ما قال شي ..
سعيد: شو تبينه يقول ..؟؟ ما عنده شي يقوله
ميرة: إمبلا .. جان المفروض يقول شي .. يرمس مش يسكت جيه
سعيد: بس أنا مستغرب من عصبيته وردة فعله .. ليش ظهر جيه .. الأمر عادي ..
ميرة: ما أدري والله
سعيد: فوز هي اللي قالت لج تخبريه الحقيقة ؟؟
ميرة: هيه .. لأنها خافت الأمور تتعقد أكثر
سعيد: ليش..؟؟
ميرة: لأن الحبيب مطرشلها رسالة يبا رقم أبوها أو أخوها عسب يخطبها ..
سعيد: تمزحين؟
ميرة: محد يمزح فهالأمور .. فوز دقت وقالت لي إنه طرشلها رسالة وقالها إنه معجب فيها
سعيد: ما تحسين إنه استعيل ..؟؟
ميرة: ليش؟؟
سعيد: علي ما جان يعرف إن هالعضوة نفسها فوز .. ع فرض إنها ما كانت فوز شو بيخطب وحده ما يعرف عنها شي .. لا من وين ولا منو أهلها ..
ميرة: على فرض .. بس نحن نرمس عن شي واقع أحينه .. وبصراحة أنا من عرفتها تمنيتها تكون حق علاوي
سعيد بغلاسة: وليش ما تمنيتيها تكون حقي ؟؟
طالعته ميرة بنص عين: ما بغيت البنت تتوهق ويا واحد غلس شراتك ..
سعيد: أفاا يا ميرة .. أنا غلس؟؟
ميرة: تصدق .. واااااااايد
عيل ربي يعينج لأنج بتتوهقين ويا واحد غلس
ميرة: ترا أنا خبلة سرت أحبك إنت
سعيد بجدية: ميرة ..؟
ميرة: هلا
سعيد: أبا أرمس عبدالله وعلي عنا ..
ميرة: ما فهمت
سعيد: أبا أعرس ..
ميرة: تعرس..؟؟؟
سعيد: هيه
ميرة: بس أنا أبا أكمل دراستي وجدامي سنتين لين أخلص
سعيد: خلاص عيل بشوف لي وحده ثانية
ميرة: هاك الدرب مفتوح
سعيد بطل عينه: من صدقج ؟؟
ميرة: هيه
سعيد: أوكي خلي دراستج تنفعج
ميرة: بتنفعني ليش لا ..
سعيد: أسمع رمسة يديدة اليوم ..
ميرة: إنت تبا تناقر ومش عارف كيف .. وأحسن شي ما أرد عليك
سعيد: ما أبا أناقر .. بس بصراحة أبيج تكونين دوم قبالي ..أبا أسولف وياج براحتي .. أبا نروح ونيي ويا بعض ..
ميرة: وإنت تعتقد إني ما أبا هالشي ..
سعيد: عيل خليني أرمس خوانج ..
ميرة: خلنا نتفق قبل
سعيد: ع شو؟؟
ميرة: أبا أكمل دراستي ..
سعيد: ممممم إنزين بس بشرط
ميرة: شو؟؟
سعيد: نملج ..
ميرة: نملج والعرس عقب سنتين .. وايد
سعيد: ما فيها شي
ميرة: ما أظن عبدالله بيوافق
سعيد: وليش ما يوافق .. أنا ولد خالتج .. وشارنج وأبيج
ميرة: ما أدري ..
سعيد: شوفي نحن بنملك ف الصيف .. والعرس بنسويه ف آخر سنة لج .. شرايج ؟؟؟
ميرة: شوف عبدالله وعلاوي وإذا وافقوا انا ما عندي مانع ..
دق تليفون ميرة .. كانت فوز متصلة فيها .. لأنها تبا تعرف ردة فعل علي .. وهي نستها خير شر من شافت سعيد ويلست ترمس وياه ..
فوز: يالدبة إنتي وينج .. ساعة أترياج تردين عليه ؟؟؟
ميرة: سوري والله نسيتج ..
فوز: نعم .. نعم .. نعم .. نسيتيني ؟؟
ميرة: هيه .. هنيه سعيد ويلسنا نرمس ونسيتج
فوز: وأنا أقول ليش ما اتصلت فيني ..
ميرة: شسوي بعد .. كله من سعيد هو السبب
سعيد: أنا السبب ف عينج ..
ميرة: ف عيني الحلووة
سعيد: وع .. شو م الحلاة فيها ..
ميرة: أحلى عن ويهك يالدب ..
فوز: ميييييييييييييرة ..
ميرة: سعيد اجلب ويهك عني .. فوز تصارخ والله بتذبحني خلني أعرف أرمسها .. هلا فوز ..
فوز: إنتو للحين ع نفس حركاتكم الصبيانية .. متى بتكبرون ..؟؟؟
ميرة: ها سعيد والله ..
فوز: الله يعينكم .. المهم قوليلي شو صار بالتفصيل ..
ميرة: شو أقولج ..؟؟
فوز: كل شي ..
ميرة: أول ما خبرته انصدم ..
فوز: إنتي شو قلتيله ..؟؟
ميرة: قلت له إن أنا اللي أطرش الرسايل ..
فوز: شت .. بالمرة جيه ف الويه
ميرة: هيه ..
فوز: وعقب شو صار؟؟
ميرة: هزبني شوية .. وعصب مني .. وعقب سأل منو العضوة وأنا كيف عرفتها ..؟؟ وقلت له إن العضوة هي إنتي .. وأول ما سمع اسمج تقولين حد صب عليه سطل ماي بارد .. صخ ما رمس ولا قال شي أبداً .. حتى ويهه ما جان فيه تعابير .. يلس يسوي شي ف اللاب توب وعقبها بند اللاب توب وخذ مفتاح سيارته .. وظهر م البيت ...!
فوز: حلفي؟؟؟
ميرة: والله .. وحاولت أدق عليه فونه مبند .. لا وبعد ظهر م البيت وهو معصب وتخيلي كيف سوا بالسيارة ..
فوز: دبه والله أخاف يصير فيه شي
ميرة: ما بيصير شي إن شاء الله .. صحيح هو أول مرة يعصب جيه .. بس ما عليج علاوي قلبه طيب .. عقب ما يهدا بيرد وبيرمس ف الموضوع بهدوء ..
فوز: أتمنى بصراحة .. حذرتج يا ميرة من هالشي وقلتي عادي .. الله يستر
سعيد بهمس: اسأليها .. هي شو رايها ..؟؟
ميرة تأشر بإيدها : بشو؟؟
سعيد: شو رايها ف علي ..؟؟ تبيه أو لا ...؟؟
ميرة: ما أبا ..
سعيد: عشان خاطريه ياللا ..
فوز: ميرووه إنتي وين تروحين .. أكيد سعيد وياج ..
ميرة: سوري فديتج ..
فوز: المهم ببند عنج أحينه ..
ميرة: لا لحظة ..
فوز: شو ؟؟
ميرة: أبا اسألج ..
فوز: عن شو ؟؟؟
ميرة: بصراحة أبا اعرف إنتي شو رايج ف علي ..؟؟
فوز: من أي ناحية يعني ؟؟
ميرة: لا تستهبلين فواز .. أقصد مممممم لو خطبج بتوافقين ؟؟؟
فوز: ما أدري ..
ميرة: يعني ما تحسين بشي صوبه ؟؟
فوز: بعد ما أدري ..
ميرة: لا تخافين ما بقول حق علاوي بس أبا أعرف
فوز: لو كنت أدري كنت قلت لج ..
ميرة: أكيد ما بتقولين لأني اخته ..
فوز: لا والله مب عشان جيه .. بخليج أحينه أوكي .. أول ما يرد أخوج طمنيني ..
ميرة: إن شاء الله فديتج ..
فوز: ياللا فمان الله
ميرة: ربي يحفظج
سعيد: شفيج ؟؟
ميرة: ما أدري .. أحس فوز متضايجة من الموضوع وايد
سعيد: ليش شو قالت لج ؟؟
ميرة: كل أجوبتها .. ما أدري وعقب قالت بتبند وما بغيت أضغط عليها .. البنت محتاية وقت تفكر فيه ..
سعيد: من حقها ..
ميرة: دق ع علاوي شوفه إذا فتح جهازه أو لا ..
سعيد: إن شاء الله ..
أما علي .. ف من سمع رمسة ميرة .. ومن درا إن العضوة هي فوز .. حس إن كل الأبواب تصكرت ف ويهه .. طرش لها رسالة .. كل اللي انكتب فيها .. " أنا آسف .. وإنسي كل الكلام اللي انكتب ف الرسالة .. ولو تحذفينها من صندوقج وعقلج يكون أحسن .."..!!
ليش سوا جيه ..؟؟ ما يدري .. اللي عرفه وتأكد منه إن فوز مب له .. جان مضايج وايد وماله خلق حق أي حد .. يمكن يبا ييلس مع نفسه شوية ويفكر بكل شي .. مستعد يخسر فوز .. بس ما يخسر أقرب الناس له .. وعلي متأكد مليون ف المائة إن سعيد شي ف خاطره صوب فوز وإنه يبيها .. حس نفسه غبي لأنه فكر فيها .. وأغبى لأنه طرش الرسالة حق العضوة .. بس اللي متفاجئ منه صدق .. شلون العضوة تطلع نفسها فوز ..؟؟ وكيف ما لاحظ هالشي عقب ما قرا دفترها .. مع إنه انتبه لنفس الأسلوب .. بس أبداً ما يا ف باله إن العضوة اللي يتابع كتاباتها هي فوز .. فوز .. فوز .. فوز .. انتبه ع نفسه .. وين ساير ...؟!! يمشي ف نفس الطريق اللي يوصله لـ بيتهم فوز .. وقّف سيارته بنص الشارع .. جان الشارع شبه فاضي .. وعقب ركن ع صوب .. ونزل م السيارة .. تذكر أول مرة دش فيها المنتدى وقرا لها .. تذكر لمن كانت ميرة ترمس عنها ويقولها اخطبيها لي .. لمن شافها أول مرة .. ولمن درا إنها رفيجة أخته .. لمن رمسها .. وخذ دفترها وقرا اللي فيه .. تأكد وقتها إنها تعيش حالة حب ومع ذلك جان يفكر فيها .. يحبها .. هاي الحقيقة اللي ما قدر ينكرها .. وجان بيشرد من حبها وقال حق العضوة إنه معجب فيها ويبا يخطبها .. ما درا إنه شرد منها لها .. يعني ما سوا شي ..!
علي: آآآآآه يا فوز .. كنتي جريبة مني وايد وما حسيت فيج ..
جان ميود دفترها ويالس يجلب فيه .. فوق 10 مرات قراه .. ومستعد يكمل لـ 1000 ..
رأيتهُ اليوم أيضاً ..
ورأيتُ تلك النظرات التي أمقتها .. أعلم بـ أنهُ يحبني ..
يبحثُ عن نظرة مني .. تشفي لهيب الشوق الذي يجتاحه ..
لكنني أكرهه ..
لا .. ليس كرهاً .. فـ لو كنتُ أعرفُ معنى الكره .. لكرهتُ أناساً كثر .. دمّروا حياتي ..
ورموني على رصيفِ الانتظار ..!
من الصعب أن نقرر فراق من نحب .. والأصعب أن نمني النفس بأن من تركناهم لا يملكون العيش بدوننا وسيعودون سريعاً ..!
جميعُ القرارات نستسهلها عندما نفكرُ بالقرارِ الأصعب
ولا شيء أصعب من قرارِ الفراق واستنزافِ المشاعر واستهلاكِ كلماتِ الحب ..!
نحنُ عندما نحب .. نحبُ بإرادتنا ومع ذلك نخوض التجربة عن رغبة لا اقتناع ..!
وعندما نفارق .. نفارقُ رغماً عنا ومع ذلك نمضي فيهِ عن اقتناع لا رغبة !!
ما هذا التناقض العجيب ..؟!!
ربما لن يفهمهُ أحد .. يكفي أن أفهمهُ أنا ...!!
فتح تليفونه .. وبدت المسجات توصله .. أغلبها من عند شوق .. وميرة وسعيد بعد مطرشيله .. بدون لا يقرا مسجات شوق حذفها .. وفتح مسجات ميرة وسعيد .. كانوا يسألون عنه .. ما رد عليهم .. جان محتاج لـ هدوء عشان يتخذ القرار المناسب ومحتاج لـ وقت عشان ينسى فوز وينسى العضوة ..
دق تليفونه .. جان سعيد متصل فيه .. ف رد عليه عسب ما إيلسون يحاتونه أكثر ..
علي: هلا سعيد ..
سعيد: وينك إنت ..؟؟
علي: ليش فيه شي ..؟؟
سعيد: خرعتنا يالدب .. ظهرت جيه ولا قلت وين ساير ..
علي: كنت محتاي أيلس ويا نفسي شوية ..
سعيد: أحينه أنا أبا أفهم إنت ليش مضايج ومعصب ..؟؟
علي: مب لازم تعرفون ..
سعيد: علي .. إنت تسرعت وايد ف قرار خطبتك لـ العضوة .. واحمـ ..
علي يقاطعه: أدري تسرعت .. بس عرفت إني تسرعت لمن اكتشفت إنها نفسها فوز .. وطرشتلها رسالة وقلت لها تنسى كل شي .. وخلاص ..
سعيد: ليش ؟؟
علي: بس ياخي .. ما أباها .. ببند أحينه
سعيد: علاوي شفيك إنت جيه ؟؟
علي: سعيد مالي خلق أرمس حد أحينه .. ياللا فمان الله
سعيد: أوكي بخليك بس لا تتأخر .. ميرة تحاتيك
علي: إن شاء الله ..
بند سعيد .. وعلي فر التليفون ف السيارة .. وكمل قراءة لـ الدفتر .. وعقبها قرر يرد البيت لأن باجر عنده دوام ..!!!
بيت أبو حميد
يوم السبت
الساعة 4:30 عصراً
علاقة موزة بسيف رغم توترها الفترة اللي طافت .. بس الأوضاع ما بينهم تقريباً في سكون .. كانت موزة ف دارها .. تفكر بسيف اللي شافها ورمسها .. قطع تفكيرها صوت تليفونها لمن دق .. جان أخوها أحمد متصل فيها .. الخميس اللي طافت جان زواجه من حصة .. وعقبها ع طول سافروا ماليزيا يقضون شهر العسل ..
أحمد: السلام عليكم
موزة: وعليكم السلام والرحمة .. هلا والله بالمعرس
أحمد: هلا بج زود .. شحالج دبه ..؟؟
موزة: الحمدلله بخير .. شحالك إنت .. وشخبارها حصييص..؟؟ عساكم مستانسين ؟؟؟
أحمد: الحمدلله كلنا بخير .. وحصة كاهي حذالي تسلم عليج
موزة: ربي يسلمها .. شو الجو عندكم ..؟؟؟
أحمد: والله برد م الخاطر ..
موزة: ومتى ناوين تردون ؟؟؟
أحمد: أعوذ بالله منج .. ما كملنا 3 أيام .. خلينا ع راحتنا ..
موزة: لا صج والله .. متى بترجعون عسب نستقبلكم ..؟؟
أحمد: يمكن ع الخميس الياية .. وإذا عيبتنا اليلسة هنيه بنكمل أسبوعين ..
موزة: ما شاء الله عليكم .. أهم شي تستانسون ..
أحمد: الحمدلله مستانسين وايد .. حصة بترمسج ..
موزة: أوكي عطيني إياها
حصة: هلا مويييييز شحالج ؟؟
موزة: هلا والله بحرمة أخويه .. هلا بالعروس .. أنا طيبة فديتج .. شحالج إنتي ؟؟
حصة: الحمدلله بخير
موزة: ما سوالج شي احمدووو ..؟؟
حصة: فديته والله .. ما سوا شي بالعكس ..
موزة: يا ربي وقمنا نتفدى ..
حصة: ريلي .. ويحق لي أتفداه متى ما بغيت
موزة: زين والله ربي يسعدكم ويهنيكم
حصة: آمين يا رب .. وعقبال ما نفرح فيج إنتي و.. أحم ..
موزة: لا خليني بعيد عن الـ احم مالج زين
حصة: ليش عاد ..؟؟
موزة: بس جيه .. أنا ما أبا أسير بعيد عن أهلي ..
حصة: أونج .. عيل أنا خليت أهلي وييت عندكم
موزة: عادي إنتي تحبين أحمد يعني بتسوين أي شي عشانه
حصة: وإنتي ما تحبين سيف ؟؟
موزة: لا ..
حصة: علينا هالحجي يا مويييز ..؟؟
موزة: لا مب عليكم .. المهم استانسوا وايد هناك .. ولا تنسون تييبون لي هدايا ..
حصة: بعد مب هدية .. هدايا ..
موزة: هيه .. هدايا .. مب أنا اللي جمعتكم ويا بعض .. ف استاهل هدايا منج ومن أحمدووو
حصة: لا توصين
موزة: ياللا عيل .. جلبي ويهج
حصة: أصلاً بجلبه لأن متفقين نظهر نتحوط فديتج .. سلمي ع عمي وعمتي وايد ..
موزة: إن شاء الله
حصة: ياللا مع السلامة
موزة: ربي يحفظكم
بندت حصة عنها .. وردت فيها الذكرى ليوم الخميس .. لمن شافت سيف .. ورمسها .. كانت تحاول تهرب من نظراته لها .. سيف رغم إنها مب متأكدة إن جان بطل حركاته وسوالفه ويا البنات .. بس تحس إن في شي يجذبها صوبه .. يخليها تفكر فيه غصب عنها ..
سيف: شحالج ..؟؟
موزة: الحمدلله بخير ..
سيف: مبارك عليج زواج أخوج
موزة: ومبارك عليك زواج أختك .. وعقبالك
سيف: عقبالنا ..
موزة: أنا مب مستعيلة ع الزواج .. أصلاً ما أفكر أتزوج لأن بصراحة الرياييل ف هالزمن ينخاف منهم .. وما تقدر توثق ف أي حد ..
سيف: شقصدج ..؟؟
موزة: قصدي واضح ..
سيف: ليش دوم تحاولين تخربين كل لحظة حلوة .. أعيشها معج
موزة: أحسن شي ما أرد عليك
سيف: مواز .. أنا أحبج .. افهميها عااد ..
موزة: شالمطلوب مني ..؟؟
سيف: ما أبا منج غير شي واحد بس .. تردين شرات قبل .. موزة اللي أعرفها واللي حبيتها .. هالدور مب لايق عليج
موزة: هالدور أنا غصب عني عشته .. وإنت السبب فيه .. وعشان جيه ما أقدر أرد مثل قبل ..
سيف: إمبلا تقدرين .. لو كنتي تبين هالشي ..
موزة: أوكي .. وأنا ما أبا ..
سيف: لي متى بتمين جيه ..؟؟
موزة: لين أشوف نفسي فعلاً قدرت أنسى الصدمة اللي إنت خليتني فيها .. وأأقلم نفسي على إني أتعامل وياك مثل غيرك
سيف: لهالدرجة تكرهيني ؟؟
موزة: قلت لك ما أعرف أكره ..
سيف: مواز .. أنا وايد ذليت نفسي عشانج .. عشان رضاج .. بس ما أقدر أتحمل أكثر .. أنا عمري ما ذليت نفسي عسب بنت .. وتخسي اللي تذلني .. بس لأني أحبج وشاريج أسوي كل هااا ..
موزة: إنت اللي خليت نفسك فهالموقف يا سيف .. لو ما سويت اللي سويته .. ما جان هالشي صار .. ها غلطك وإنت تتحمله .. مب أنا ..
سارت موزة عنه .. كالعادة نقاشاتهم دايماً عقيمة .. يمكن موزة ما تبيه يرمسها .. تبا التعامل بينهم يرد مثل قبل بروحه .. وبدون تدخله أو تدخلها .. هالشي راح يريحها أكثر ويخليها تنسى اللي صار بالتدريج ..
دق تليفونها بمسج .. جان سيف مطرشلها مسج .. ويلست تقراه وتتمعن ف كل حرف فيه ..
أبي أعرف : تحبني ..؟!
أو إنك مثل ما قالوا .. جرحت الود وسنيني ...!
طلبتك ..
لا تردني ..!
أبي نرجع مثل أول نسولف عن بدايتنا
أمانه لا تخذلني ..!!
قرت المسج .. وردت عليه بمسج .. يمكن لأنها محتاية فعلاً تعبر عن المشاعر اللي ف داخلها واللي ما قدرت تقولها حق سيف بسبب اللي سواه لها ..
يآجَريح مِن بعآدي
وأنا من بعآدك جَريح !
كآن لِي ويّاك قِسمة
بـ نلتِقيْ !
عقب ما طرشت المسج .. خلت فونها ع صوب وسارت تسويلها نسكافيه .. الجو بارد ومحتاجة شي يدفيها .. وفهالوقت اللي كانت فيه موزة بالمطبخ .. دق سيف فوق الـ 5 مرات .. جان يبا يرمسها .. وأول ما يات وشافت اتصالاته استغربت .. قرت المسج اللي وصلها وهي ميودة التليفون ..
" أتمنى والله يجمعنا النصيب .. لخليج أسعد إنسانة ف العالم .. وربي أحبج .. وشاريج .. وبسوي المستحيل عسب آخذج .."
ابتسمت موزة ع المسج .. بس ما ردت .. كحركة منها لقهر سيف .. اللي جان يتريا كلمة ع الأقل تبرد فواده .. رغم إنه عدم ردها ريحه شويه .. لأن موزة لو ردت بتقول كلام يجرحه .. وسكوتها بالنسبة له يعني رضاها ..!!
دق تليفونها بمسج .. بس هالمرة جان المسج من عند فوز تسألها إذا فاضية لأنها تبا ترمسها .. وموزة اتصلت فيها .. لأن فوز ما ترسل مسج تسألها إذا فاضية إلا إذا جان عندها موضوع تبا ترمس فيه ..
موزة: السلام عليكم
فوز: وعليكم السلام والرحمة
موزة: شحالج غناتي؟؟
فوز: بخير ربي يسلمج .. شحالج إنتي ؟؟
موزة: الحمدلله بخير ..
فوز: دبه ليش دقيتي .. كنت بدق عليج
موزة: ويا راسج ما بينا هالسوالف .. أكيد عندج شي بتقولينه
فوز: تبين الصج .. هيه
موزة: لا تقولين الموضوع يخص محمد ...؟؟
فوز: لا مب محمد .. محمد من قلت له إني انخطبت ما اتصل ولا رسل ولا سوا شي .. لو إني خايفة من هالهدوء
موزة: الهدوء اللي يسبق العاصفة
فوز: حاسة جيه والله
موزة: ما عليج منه .. ما يقدر يسوي شي ..
فوز: أدري ..
موزة: إنزين عيل الموضوع عن منو ..؟؟
فوز: علي أخو ميرة
موزة: بلاه ..؟؟
فوز: الموضوع صاير من فترة .. بس انتي انشغلتي بعرس أحمد وما بغيت أزعجج .. ف قلت بأجله لعقب العرس ..
موزة: شو صاير ..؟؟
فوز: أنا مب عارفة شو صاير بالضبط .. تبين الصدج خاطري أرمسه .. أبا أفهم ليش سوا جيه ..
موزة: شو سوا ..؟؟
فوز: أخوها جان يتابع كتاباتي ف المنتدى من فترة طويلة أحينه .. ومعجب فيني .. بس هو ما يدري إن اللي تكتب هي أنا .. وطرشلي رسالة ع المنتدى يقولي إنه معجب وإنه يبا رقم أبويه أو أخويه عسب يخطبني ..
موزة: مستحيل ..!
فوز: وربي .. أنا كنت عارفة عن سالفة اعجابه لأن ميرة قالت لي .. قبل لا يعترف هو .. بس ..
موزة: بس شو ..؟؟
فوز: أنا لمن قريت الرسالة .. قلت حق ميرة تخبره الحقيقة وتقوله إن العضوة اللي تكتب هي أنا فوز رفيجتها .. وفعلاً ميرة قالت له .. تخيلي شو سوا ..؟؟؟
موزة: شو سوا ..؟؟
فوز: طرش لي رسالة يقولي أنسى كل الكلام اللي قاله .. وأحذف الرسالة من صندوقي ومن عقلي بعد ..!!
موزة: ليش ..؟؟؟
فوز: ما أدري .. يمكن يكرهني .. وانصدم لمن درا إن العضوة هي أنا ..؟؟
موزة: وليش يكرهج .. إنتي شو سويتيله ..؟؟
فوز: ما سويت شي .. أصلاً ما أذكر إذا رمسنا بعض أو لا .. كل اللي بينا نظرات بس ..
موزة: غريبة والله .. إنزين إنتي ما حاولتي تسألين ميرة ..؟؟
فوز: لا .. أنا حتى ما قلت لها إنه طرش هالرسالة .. ما أدري بيني وبينج حسيت بإهانة .. بهالتصرف كأنه يشكك فيني وف أخلاقي ..
موزة: لا تفكرين جيه فديتج .. أكيد له أسبابه
فوز: شو هالأسباب .. يقول حق بنت بخطبج .. وبعد ما يعرف منو هي .. يطرشلها يقولها ما أباج .. شو الشي اللي يخليه يسوي جيه؟؟؟
موزة: أكيد عنده سبب قوي ..
فوز: ما أدري والله .. تضايجت وايد من تصرفه ..
موزة: وليش تتضايجين ..؟؟ يهمج ..؟؟
فوز: لا طبعاً
موزة: لا تجذبين أنا رفيجتج ..
فوز: ما أدري ..
موزة: إمبلا تدرين .. بس تنكرين
فوز: شو أنكر ..؟!!
موزة: إنج تحبينه ..
فوز: ما توصل للحب .. وبعدين أنا توني طالعة من تجربة فاشلة ما أبا أدخل نفسي ف تجربة ثانية ..
موزة: أوكي .. ما بقولج تحبينه .. بس أكيد معجبة فيه وتفكرين فيه .. وعسب جيه ضايجتج ردة فعله
فوز: مواز .. أنا تضايجت من ردة فعله لأن تصرفه يدل على إن أنا فيني شي غلط .. مب عشان شي ثاني ..
موزة: أنا أشوف لو تقولين حق ميرة تسأله أفضل ..
فوز: ما أعتقد راح يقولها ..
موزة: طيب هو ما طرشلج مرة ثانية..؟؟
فوز: أصلاً ما دش المنتدى خير شر ..
موزة: غريبة والله .. أنا حاسة إن في شي خلاه يقولج تنسين اللي ف الرسالة .. صدقيني هو يحبج بس أكيد شي منعه
فوز: أحينه إنتي تقولين عنده أسباب .. أوكي قوليلي شو هالأسباب واقنعيني ..
موزة: مممممم ما أدري .. الأيام راح توضح كل شي .. وبتعرفين ليش هو سوا جيه .. لا وبعد أبصم لج بالعشر إنه راح يرد ف كلامه
فوز: ليش شو شايفني لعبة .. مرة أبيج ومرة لا .. خلاص أصلاً أنا فتحت له المجال .. وما بكرر نفس الغلط .. وخل يشوف حياته عند وحده تناسبه ..
موزة: لا تعقدين الأمور إنتي .. خليله أعذار
فوز: ما يهمني عسب أخليله أعذار .. ولا راح أسامحه ع الحركة البايخة اللي سواها .. ما بجذب عليج أنا كنت معجبة فيه وتعيبني شخصيته .. ودوم لمن أشوفه أتخرع .. أحس بشي غريب يتحرك فيني .. بس عقب اللي سواه .. طاح من عيني ..!
موزة: لهالدرجة ..؟؟ فواز خل عنج السوالف ..
فوز: ما علينا .. يمكن الله جان يبيني أعرفه ع حقيقته وعسب جيه صار هالشي .. والحمدلله ع كل حال
موزة: الحمدلله .. إنتي لا تفكرين وايد بالموضوع .. ويا خبر اليوم بفلوس باجر ببلاش .. وجريب إن شاء الله بتعرفين ليش هو سوا جيه ..
فوز: خلاص أصلاً ما أبا أعرف ..
موزة: أونج ..
فوز: هيييييه ..
موزة: على ماما يا بابا
فوز: أكرهج ..
موزة: ههههههههه وأنا أموت فيج .. خصوصاً لمن تنقهرين .. أبصم بالعشر إن شي ف خاطرج صوبه ..
فوز: وشو يخليج متأكدة هالكثر ..؟؟
موزة: لأن ردة فعلج من طلب علي .. ما كانت نفس ردة فعلج من طلب سلطان .. ولو تيلسين مع نفسج وتفكرين فيها بتشوفين رمستي صح ..
فوز: بخليج أحينه
موزة: شو بتشردين ..؟؟
فوز: ف عينج أشرد .. أبويه يزقرني بسير أشوفه شو يبا ..
موزة: أوكي ..
فوز: ياللا فديتج .. أشوفج ع خير الأسبوع الياي
موزة: إن شاء الله
فوز: مع السلامة
موزة: ربي يحفظج
بندت موزة عن فوز .. ويلست تفكر ف سالفتها .. فعلاً شو الشي اللي يخلي أخو ميرة يتصرف هالتصرف .. أحينه موزة بيذبحها الفضول .. بس ما تقدر تسأل ميرة لأن ها شي خاص بفوز وهي تقرر إذا تقول حق ميرة او لا .. ياللا الأيام راح تكشف كل شي ..!!!
بـــدايــــة الفصـــــل الــثــانــــــي
السكن الجامعي
يوم الأحد
الساعة 5:00 عصراً
قبل شوية راجعة ميرة م المحاضرات .. كانت فوز يالسة ع النت .. تطلع معلومات لأن يوم الأربعاء عندها عرض وقالت أحسن تزهبه م اليوم ..
ميرة: أوف .. الأسبوع الياي ما بتشوفوني ..
فوز: ليش عاد ..؟؟
ميرة: عندي 3 امتحانات .. ما أعرف وين بودي بعمري ..
فوز: لا تحاتين إن شاء الله خير
ميرة: إن شاء الله .. شو تسوين ..؟؟
فوز: أشتغل ع النت ..
ميرة: أنا بسير أصلي العصر مش مصلية ..
فوز: تقبل الله مقدماً ..
ميرة: منا ومنكم صالح الأعمال ..
سارت ميرة تتغسل وتتمسح عسب تصلي .. ودق تليفون فوز .. كانت موزة متصلة فيها .. واستغربت فوز اتصالها وحست إنه صاير شي .. ف ردت عليها بسرعة ..
فوز: هلا مواز ..
موزة: أهلين .. شحالج فوز ..؟؟
فوز: الحمدلله بخير .. من صوبج ..؟؟
موزة: الحمدلله ..
فوز: بلاه صوتج متغير .. صاير شي ..؟؟
موزة: شو أقولج يا فوز ..
فوز: شو مستوي لا تخرعيني ..؟؟
موزة: نورة ..
فوز بخوف: بلاها ...؟!!!!!
موزة: راح تتطلق من ريلها ..
فوز: خس الله بليسج يالويه ع بالي شي صار فيها .. إنزين أدري عن هالشي من فترة ..
موزة: منو قالج ..؟؟
فوز: هي اتصلت فيني لمن كنت مريضة عسب تسأل عني وأنا سألتها عن الزواج وجيه .. وقالت إنها احتمال تنفصل عن ريلها .. بس ليش ما قالت لي .. وحاولت قبل فترة اتصل فيها جهازها مغلق ..
موزة: وليش ما قلتيلي ..؟؟
فوز: نسيت .. هالشي صار لمن كنت مريضة .. وما يا ف بالي أقولج .. وبعدين حسيت إن ها شي يخصها ويمكن ما تبا حد يعرف
موزة: الظاهر جيه ..
فوز: عيل إنتي منو قالج ..؟؟
موزة: دقت عليّه وحده تسألني عنها .. أسئلة غريبة بصراحة .. وطبعاً أنا ما قدرت أقول أي شي .. لأنها أمنتنا على أسرارها ..
فوز: وما قالت لج ليش تبا تتطلق ..؟؟
موزة: مب هي اللي طالبة الطلاق .. أظن ريلها يبا يطلقها ..
فوز بصدمة: شو...؟؟؟ ليش .. هو يحبها وجان يترياها وجم مرة خطبها لين وافقت .. شو يخليه يطلقها ..؟؟؟
موزة: ما أدري شو أقولج يا فوز .. ما أقدر أقول أي شي إلا لمن نتأكد .. لأني ما أثق ف رمسة وحده ما أعرفها .. يمكن تكون جذابة بعد ..
فوز: هي شو قالت لج ..؟؟؟
قالت موزة حق فوز السبب اللي عشانه راح تتطلق نورة .. وأول ما عرفت .. انصدمت .. وكل اللي قالته : مستحيل .. ما أصدج ..
موزة: حتى أنا ما قدرت أصدج هالشي .. بس شو يخليها تجذب ..
فوز: عقلي مب قادر يستوعب .. لا طبعاً .. يمكن تكون غلطانة .. يمكن ما تقصد نورة رفيجتنا ..
موزة: بس اللي يأكد صدج كلامها .. إنج فعلاً تدرين إنها تبا تنفصل عن زوجها ..
فوز: ما أدري .. بس أنا ما أبا أصدج هالشي ..!
موزة: أنا راح أتأكد بطريقتي الخاصة وبرد عليج .. بدل لا نسيء الظن فيها ..
فوز: أوكي .. أتريا منج خبر ..
موزة: بس عاد لين أرد البيت .. يعني ف الويكند راح إييج الخبر الأكيد إن شاء الله
فوز: ع خير ..
يوم الثلاثاء
الساعة 8:30 مساءاً
موزة وفوز وميرة متيمعات ويا بعض ويسولفن .. هاي عادتهن كل ثلاثاء .. يلتقن ف مكان ويفتن علومهن .. كانت موزة تسولف عن ولد وياها ف الكلاس .. صار لها موقف ويّاه .. والبنات يبون يعرفون شو صار .. خصوصاً ميرة اللي الفضول بيذبحها جريب ..
ميرة: أشوفج تعلمتي حركات النذالة من رفيجتج ..؟
فوز تطالعها بنص عين : نعم .. ما سمعت ..؟؟
ميرة: لا تسمعين أحسن .. والله ما أدري ليش إنتن جيه نذلات
فوز: هههههههههه مواز بليز قولي السالفة ترا ميرة شوية وتبجي
ميرة: ها ها ها .. ما يضحك يالدبة
موزة: هههههههه مشكلة الناس الفضوليين ..
ميرة: عاد اللي يسمع يقول إنتي مول مش فضولية ..
موزة: أنا نص فضولية .. إنتي فضولية كاملة
فوز: ههههههههه والله إنتي وياها أكبر فضوليات جابلتهن ف حياتي
ميرة: أنا أعترف .. ~_~ .. الدور والباجي ع غيري
موزة: احم .. ما بعلّق
فوز: لا تعلقين .. قولي السالفة خلصينا .. ترا ذليتينا ..
موزة: انزيييين ..
ها الله يسلمكم .. أمس حضرتي كنت متأخرة ع المحاضرة .. أصلاً سايرة غصب عني .. وطبعاً الطلاب كلهم ف الكلاس .. والدكتور بعد جان موجود .. أنا ياية منطلقة بدش الكلاس والولد الظاهر الدكتور مطرشنه إييب شي .. ف جان يمشي ويطالع ع ورا يرمس الدكتور .. وبدخلتي أنا .. وصار اللي صار ..
ميرة: هييييه يالدبة .. شو صار اللي صار .. شو صار ..؟؟
فوز: لا تقولين إنج دعمتيه ..؟؟؟
ميرة: شت ..
موزة: دعمته .. قولي حضنته ..
ميرة: شت شت شت ..
فوز: هي إنتي بلاج تشتشتي .. خلينا نفهم السالفة .. شو يعني ..؟؟
موزة: شو شو يعني .. أقولج ضربت فيه بالقو .. ومن قوة الضربة أنا فقدت توازني وكنت بطيح .. وهو حليله احم يودني ويا خشمي ف خده .. حسيت نفسي بموت قسم بالله .. شعور غييييير .. لا وبعد حاطه إيدي ع صدره .. تخيلوا الإحراج كيف ..
ميرة: حد شافج ؟؟
موزة: لا الحمدلله لأنه هو جان تقريباً خاري الكلاس ..
فوز من صدمتها ساكتة ما تقول شي .. وميرة فاتحة استجواب حق موزة ..
ميرة: ما قالج شي ..؟؟
موزة: قال اسلمتي .. وبعدني عنه بالمرة .. عقبها هو سار إييب الشي اللي وصاه الدكتور عليه وأنا دشيت المحاضرة .. حليله أول ما دش منزل راسه .. يلس شوية وعقب استأذن .. حسيته جان منحرج أكثر مني .. وأنا بعد تضايجت من نفسي وايد وما حضرت باجي المحاضرات ..
ميرة: بعد تقول حليله ..
موزة: لأنه مؤدب وطيب والكل يحترمه .. يعني مب إنه مسوي هالحركة عن قصد .. وبعدين أنا الغلطانة ياية منهدة ..
ميرة: فوز ليش ساكتة .. قولي شي
فوز: أخ عليج يا مواز .. ما اتخيل هالموقف .. وع .. والله بموت
ميرة: ههههههههههههه باجر عاد ف ملحق الأنوار راح ينزلون تقرير عن هالحدث .. ضبط طالبة جامعية في احضان طالب جامعي
موزة: وع .. صج إنج سخيييييييفة .. وماصخة ..
ميرة: ههههههههههههه
فوز: ميرة لا تضحكين وايد ترا اللي يضحك ع شخص .. عقب يرد فيه هالشي ويضحكون عليه
ميرة: بسم الله .. الله لا يقولها ..
فوز: عيل صخي ..
موزة: هيه والله صخي ..
ميرة: بصخ .. بسم الله عليه .. بسم الله
فوز: ههههههههههه بلاج تقولين شايفة يني
ميرة: يمه ما أتخيل جيه يصير ويايه ..
فوز: لا تنهدين ف المشي وما بيصير وياج ..
ميرة: لا ما بنهد ولا بتأخر ع محاضراتي م اليوم ورايح ..
يوم الأربعاء
الساعة 12:00 ظهراً
تفاجأت ميرة أول ما دق عليها علي وقالها إن هو اللي راح يشلها م الجامعة .. وإنه جريب يوصل وعسب جيه يباها تتزهب وتنزل أغراضها .. بس اللي فاجأها أكثر إن فوز راح تروح وياهم .. ليش جيه صار ..؟!! فوز لين أحين ما تدري عن هالشي .. لأنها لسه ما وصلت السكن .. سألت ميرة علي عن السبب وليش هالتخطيط ..
علي: دق عليّه حمد .. وقالي إنه راح إيي ياخذكن عقب المغرب لأنه عنده شغل يعني يبيني أكون ف بيتهم ع الساعة 8 عسب آخذج مناك .. ف أنا اقترحت عليه إني أيي أخذكن بدل لا تيلسن اليوم بطوله ف الجامعة ..
ميرة: أهاااا .. بس فوز ما أظن بتوافق ..
علي: ليش ..؟؟ عيل إنتي تروحين ويا أخوها .. وبعدين نحن بينا عيش وملح .. والمفروض ما تستحي مني
ميرة: ومنو قالك إن البنت تستحي منك .. وبعدين فوز ما تفكر جيه .. بس ما أدري أحس عقب اللي صار ما راح تقدر تشوفك ..
علي: ليش شو صار ..؟؟
ميرة: مش إنت قلت إنك تبا تخطبها ..
علي: إنزين ..
ميرة: يعني راح تحس بإحراج منك لأنها ما ردت عليك .. أو لأنها درت إن في شي ف خاطرك صوبها ..
في هاللحظة دشت فوز .. طالعتها ميرة وابتسمت ف ويهها .. وردت لها فوز نفس الابتسامة ..
علي: ما راح تحس بشي .. خليج زاهبة إنتي بس وقوليلها تتزهب .. كلها ربع ساعة وبكون عندكم ..
ميرة: إن شاء الله ..
علي: ياللا عيل فداعة الله
ميرة: ربي يحفظك ..
ميرة: وصلتي ..؟؟
فوز: لا أنا بعدني ف الطريق .. ظلي واصل بس ..
ميرة: ههههههههههه تستهبلين حضرتج ؟؟
فوز: لا والله إنتي اللي تستهبلين .. يعني شو وصلتي .. منو تشوفين جدامج ..
ميرة: انزين عادي ها سؤال استنكار .. مب استفهام ..
فوز: أوونه ..
ميرة: ما علينا خلصي أغراضج بسرعة ..
فوز: لا تستعيلين .. أبويه مسافر وحمد دق وقال إن عنده شغل وبيتأخر ..
ميرة: أدري ..
فوز باستغراب: تدرين ..؟؟
ميرة: هيه
فوز: وشدراج عاد .. حمد دق عليج ...؟؟
ميرة: لا والله .. علاوي دق عليه
فوز: شو قالج ..؟؟
ميرة: قالي تزهبي إنتي ورفيجتج لاني ياي أخذكن
فوز بصدمة: شو؟؟؟؟
ميرة: اللي سمعتيه ..
فوز: يعني أحين أخوج هو اللي بيشلنا ..؟؟
ميرة: هيه .. والله قالي ربع ساعة وبيوصل .. بسرعة زهبي أغراضج
فوز باستسلام: إن شاء الله ..
زهبت فوز أغراضها .. وفخاطرها تقول .. لازم أكون قوية وأسوي نفسي مب مهتمة لكل اللي صار .. ترا هي ما بترمسه ولا بتسولف وياه ولا بتطالعه حتى لأنها بتكون ورا يالسة .. عقب ما خلصن وتزهبن .. نزلن ينتظرن علي يوصل .. اللي دق حق ميرة وقالها إنه خاري يترياهن .. خلصن اجراءات التصاريح وظهرن ..
جان علي يالس ف السيارة .. نزل أول ما ين البنات صوبه .. خذ أغراض ميرة قبل وحطهن ف السيارة .. وعقب خذ أغراض فوز .. فوز وهي تناوله ما طالعته .. بس هو جان مركز ف ويهها .. وعرف من شكلها إنها مضايجة أو معصبة أو حاطة ف خاطرها عليه ..
ركبت فوز السيارة .. ويلست ورا ميرة .. وعلي جان ساكت طول الطريق .. وفوز نفس الشي .. ما ترمس إلا إذا ميرة سألتها أو رمستها .. وترد عليها .. يات ف بال ميرة فكرة .. وقالت بتطبقها لأنه ما باجي شي ويوصلون بيتهم فوز وهي كانت تبا علي يرمس فوز بأي طريقة .. وفعلاً نفذت فكرتها ..
ميرة: علاوي ..
علي: هلا ..
ميرة: أبا أسير الحمام .. شوف لي مسجد ووقف عنده ..
علي: إن شاء الله ..
وقف علي عند أقرب مسجد .. وجان حذاله سوبر ماركت ف قرر ينزل ياخذ لهم شي يشربونه ..
فوز: أنا مب سايرة .. بس لا تتأخرين
ميرة: إن شاء الله ..
سارت ميرة صوب قسم النساء ودشت المسجد .. وفوز ف السيارة بروحها .. كانت ميودة دفترها اليديد وتكتب فيه .. دق تليفون علي .. ما جان ماخذنه معه .. ف طالعت صوب مصدر الصوت وانتبهت ع التليفون .. وانصدمت أول ما شافت دفترها حذاله .. كانت بتاخذه عسب تتأكد إذا فعلاً هالدفتر الصغير هو نفسه دفترها اللي ضيعته .. أو واحد ثاني يشبهه .. بس لمن شافت علي ياي صوب السيارة تراجعت ..
دش علي السيارة .. وما قال شي .. وفوز كانت تحس برغبة في إنها ترمسه وتسأله ليش سوا اللي سواه .. أما علي ف جان متردد .. هل يرمسها أم لا .. فرصة وياته ويمكن ما تتكرر .. ما يدري إن ميرة مخططة حق هالشي أصلاً ..
علي بهدوء: فوز ..؟!
أول ما سمعت اسمها .. حست بالدم يمشي ف عروقها .. وقلبها بدا يدق بالقو .. يمكن كانت خايفة م الرمسة اللي بتسمعها .. أو يمكن هالشعور صار شعور عادي إييها كل ما شافت علي أو رمسته ..
فوز: نعم ..؟!
علي: أنا آسف .. اسمحيلي .. أدري غلطت ف حقج .. وأدري إنج مضايجة مني ع الحركة السخيفة اللي سويتها ..
فوز: آسف ..؟!! ماله داعي تتأسف .. شيئين ف حياتي ما انتظرتهم من الناس اللي أعرفهم أو أحبهم .. الشكر .. والإعتذار ..
علي: حسيت إن لازم أعتذر ..
فوز: لأنك عارف نفسك غلطان ..؟؟؟
علي: ما أدري ..
فوز: أنا بس أبا أعرف .. ليش سويت جيه ...؟؟؟؟
علي: غصب عني ..
فوز: غصب عنك ..؟؟ خليتني أحس إني رخيصة .. وتقولي غصب عنك .. على فكرة ما كنت أتريا شي لا منك ولا من غيرك ..
علي: إنتي ما تعرفين باللي ف قلبي ..
فوز: ما يهمني .. لا إنت .. ولا اللي ف قلبك ..
علي جان يرمسها بدون لا يطالع ع ورا .. يمكن ما بغاها تشوف الحزن اللي تارس عيونه .. نزل راسه ع تحت .. وانتبه ع دفترها .. وبحركة سريعة خذ الدفتر وحطه عند باب السيارة .. وفوز انتبهت ع هالحركة .. بس ما علقت .. مع إن احساسها يقولها إن هالدفتر لها ..
علي: بيي يوم بتعرفين ليش أنا سويت جيه ..
فوز: ما أبا أعرف
علي: لا تزعلين مني .. وربي إنج غالية وغلاتج من غلاة ميرة .. ما أبا منج شي غير إنج تعذريني
فوز: أنا نسيت اللي صار .. وحذفت الرسالة وحذفت السالفة بكبرها من عقلي .. وقلت لك أنا ما أفكر فيك .. وإنت ما تهمني ..
طالعها علي .. وحست فوز بالرعب أول ما شافت شكله .. وطالعت الصوب الثاني .. أما علي ف زاد عذابه أكثر أول ما لمح الدموع ف عيون فوز .. وعرف إن كل الكلام اللي تقوله مب صحيح .. بس تكابر أو تبا تسوي نفسها قوية لأنها حاسة بجرح وإهانة كبيرة ..
علي: هاج ..
طالعت فوز ع الشي اللي يعطيها إياه ..
فوز: شو ها ..؟؟
علي: دفترج .. طاح من جنطتج لمن كنتوا ف بيتهم سعيد أول مرة .. شفته واحتفظت فيه ..
فوز: قريته ...؟!!!
علي: فوق 10 مرات .. ولو تبيني أقراه 1000 مرة .. بقراه
فوز: بس ..
علي يقاطعها: أدري .. بتقولين هاي خصوصيات والمفروض ما تفتحه .. بس دامي حصلته .. صار ملكي .. ويحق لي أسوي فيه اللي أبا .. وعقب اللي صار ماله داعي يبقى عندي لأنه مصدر عذاب بالنسبة لي ..
في هاللحظة يات ميرة .. وما قدرت فوز تسأل أو تفهم .. ليش دفترها مصدر عذاب بالنسبة لـ علي .. كانت تحاول تكتشف السبب .. معقولة الكلام المكتوب ف الدفتر هو اللي خلاه يغير رايه أول ما درا إني أنا
العضوة ..؟؟؟ عيل العضوة كانت تكتب أكثر من جيه .. ومع ذلك جان يفكر فيها وقال بيخطبها ..!!!
نهاية الجزء
ترقبوا الجزء الـ 24
الجزء الثالث والعشرون
بدأت امتحانات الكورس الأول .. بالنسبة لفوز واجهت صعوبة ف بعض المواد الدراسية أما ميرة ف مثل ما تقول امتحاناتها كانت حلوة وايد لو إن علاقتها ف سعيد خلتها تهمل دراستها نوعاً ما .. أما موزة ف انشغالها ف الدراسة خلاها تنسى سيف .. اللي جان يطرشلها مسجات من فترة لفترة .. وكانت ف بعض الأحيان ترد عليه .. يعني الوضع ما بينهم مستقر تقريباً ..!
إجــــــــازة الربيــــــــــع
بيت أبو حمد
يوم الإثنين
الساعة 10:26 مساءاً
كانت فوز يالسة ف الحديقة ومعها اللاب توب .. داشة المنتدى تشوف آخر الردود على كتاباتها .. الجو جان حلو وبارد وهي مستمتعة باليلسة خاري .. ويمكن اللي زاد متعتها تفكيرها إن أختها راح ترجع عقب أسبوع م السفر .. انتبهت على علي اللي داش المنتدى .. واللي لين أحينه ما عرف إن فوز رفيجة ميرة هي نفسها العضوة اللي تكتب ف المنتدى .. وغير جيه جان بين فترة وفترة يطرش مسجات .. وفوز تضطر ترد عليه .. وكانت متلومة إنها شاركت ميرة ف المقلب .. وقررت تخليها تعترف له بكل شي لأنها خايفة يفكر فيها تفكير مب زين ..!!
دق تليفونها .. كانت ريم متصلة فيها .. استانست باتصالها ورمستها ..
ريم: السلام عليكم والرحمة
فوز: وعليكم السلام ورحمة الله وبركاته .. هلا والله
ريم: شحالج فديتج ..؟؟
فوز: الحمدلله بخير .. شحالج إنتي يالقاطعة ؟؟
ريم: أنا الحمدلله طيبة .. والأمور عال العال .. علومكم إنتو؟؟
فوز: والله .. نحمد الله ونشكره ..
ريم: شو ماشي أخبار ؟؟
فوز: ممممممم لا ماشي ..
ريم: بعيد الشر .. ولا حتى شوية ؟؟
فوز: الظاهر إنتي عندج أخبار .. وعسب جيه داقة
ريم: ممممممم عندي بصراحة .. وما أدري عاد إذا هالأخبار راح تونسج أو تضايجج ..
فوز: شو مستوي ؟؟
ريم: تعرفين فهد ...؟؟
فوز: منو فهد ...؟؟ ولد ييرانا ...؟؟
ريم: لا ويييين .. رحتي بعيد ..
فوز: عيل منو ؟؟
ريم: أخو محمد .. الحب الجديم
فوز: أووووف .. لازم تطرينه يعني ..؟؟
ريم: شو الحب تحول كره وإلا شالسالفة ..؟؟
فوز: الحب تحول لـ ولا شي .. وبعدين حديثنا عن فهد مب محمد .. شفيه فهد ؟؟
ريم: أنا شفته لمن كنا سايرين المطار .. وحمد وصّاه علي عقب ما درا إن نحن ف نفس الطايرة ..
فوز: هيه حمد قالي هالشي ..
ريم: بس اللي ما تعرفينه إن كراسينا طلعت حذال بعض وبينا ياهل ف النص .. وطول الرحلة جان يرمس وياي ..
فوز: أوووووووووووه .. ما شاء الله .. والله وتطورنا ..
ريم: بلا تعليقاتج السخيفة يالدبة ..
فوز: أوكي كملي ..
ريم: المهم عرفت من هالرحلة كل شي عنه تقريباً .. وعقب ما وصلنا .. أصّر إنه يروح يوصلني قبل بس أنا رفضت .. وشكرته وسرت عنه ..
فوز: وبس ..؟؟
ريم: يا ريييييت ..
فوز: شو عيل ...؟؟
ريم: اكتشفت عقب جم يوم إنه محاضر ف كليتنا .. وتفاجأت أول ما شفته داش الكلاس وهو بعد ياته صدمة .. طلع يدرسنا مقرر .. تخيلي ..؟؟
فوز: معقولة ؟؟
ريم: والله
فوز: هيييه صح .. هو قالي إنه ياته فرصة عمل وقرر يشتغل هناك
ريم: إنزين .. وصرت تقريباً أشوفه مرتين في الأسبوع .. والأسبوع اللي طاف أنا ما سرت المحاضرة لأني كنت تعبانة .. عندي زجام وحمى .. دق تليفوني وشفت رقم غريب أول ما رديت طلع هو .. ماخذ رقمي من ملفي ودق يتطمن ويسأل عن سبب غيابي ..
فوز: يا سلاااااااام .. احم احم .. ريموووه ليكون طيحتي الريال
ريم: هههههههههه يب ..
فوز: حلفي ..؟
ريم: شو حلفي وحلفي .. أجذب عليج ؟؟
فوز: شقالج ؟؟
ريم: رمسني وقالي الأشياء اللي تخصه وأنا ما أعرفها .. وقال إنه يبا يخطبني ..
فوز: قالج عن حرمته اللي توفت ؟؟؟
ريم: هيه .. ربي يرحمها
فوز: وإنتي شو رايج ؟؟
ريم: بصراحة أنا أشوف إنه ريال والنعم فيه .. بس ما أدري أبويه شو راح يقول ..
فوز: ما أظن بيعارض .. ما عليج إذا إنتي تبينه توكلي على الله .. فهد والله ما يتعوض .. أحسن عن محمد بمليون مرة
ريم: يصير خير
فوز: وربي يوفقج فديتج ..
ريم: جميعاً إن شاء الله
فوز: ممممم حبيتيه ؟؟
ريم: أعجبت بشخصيته .. وإذا صار نصيب أكيد بحبه .. دام راح يصير ريلي
فوز: أنا أقولج لا تفوتينه .. والظاهر إنه يحبج لأن فهد من توفت حرمته أهله حاولوا وياه عسب يعرس بس هو رفض .. ودام فتح معج الموضوع ف أكيد أعجب فيج وحبج وشاريج
ريم: فكرت وايد فهالشي .. وكنت بسأله ليش ما تزوج عقب وفاة حرمته .. بس عقب هونت ..
فوز: إذا صار نصيب .. اسأليه اللي تبينه ..
ريم: هيه والله .. المهم ببند عنج أحينه ..
فوز: أوكي ..
ريم: سلمي ع أميي وأبوويه وحمد وندوش فديتها ..
فوز: يوصل إن شاء الله ..
ريم: أشوفج ع خير جريب إن شاء الله
فوز: ع خير ..
ريم: فمان الله
فوز: ربي يحفظج ..
بندت فوز عن أختها .. وردت للمنتدى .. كانت بتسوي تسجيل خروج بس انتبهت إن في رسالة وصلتها من العضو vip .. ابتسمت تلقائياً وفتحتها بالمرة .. كانت تعتقد إنها رسالة عادية بس أول ما قرت الكلام المكتوب فيها انصدمت .. ظهرت من المنتدى وصكرت اللاب توب وهي تحس بقلبها يدق بالقو .. وعلى طول دقت حق ميرة .. اللي بالمرة ردت عليها ..
فوز: السلام عليكم
ميرة: وعليكم السلام والرحمة .. هلا والله
فوز: هلا بج زود .. شحالج ؟؟
ميرة: ممممممم مبسوطة
فوز: لا والله .. عسى دوم إن شاء الله
ميرة: وياج .. وإنتي شحالج ؟؟
فوز: أنا بخير .. بس ف هاللحظة بالذات خاطري أييج الشارجة وأذبحج
ميرة: أفاااا ليش عاااد ...؟؟
فوز: ليش عااد .. بقولج ليش عاد .. بس قبل قوليلي منو عندج ..؟؟
ميرة: علاوي وسعيد هنيه ..
فوز: أخوج شو يسوي .. أنا بقولج وإنتي ردي عليه هيه أو لا
ميرة: أوكي .. شو ؟؟
فوز: حاط اللاب توب ع ريوله .. وداش المنتدى صح ؟؟
ميرة: تقريباً ..
فوز: تقدرين تظهرين خاري أو تروحين بعيد عنهم ؟؟
ميرة: هيه .. لحظة بس ..
ميرة: هلا .. خلاص ظهرت خاري .. شو مستوي ؟؟؟
فوز: يالدبة إنتي متى بتقولين حق أخوج الحقيقة ؟؟ وإنج إنتي صاحبة المقلب ؟؟
ميرة: ما أدري والله لين أحينه ما فكرت
فوز: لا فديتج لازم تفكرين .. لأنه يطرش لي رسايل وأنا أرد عليه وكله بسببج إنتي ..
ميرة: إنزين عادي ترا .. بعدين خلي ردج يكون عادي وعلى قد الرسالة.. وشوفي إذا تستاهل أو لا ..
فوز: ف عينج .. وربي مب عارفة شو أقول ..
ميرة: شفيج ؟ علاوي سوا شي ..؟؟
فوز: أخوج مطرشلي قبل شوية رسالة ع المنتدى
ميرة: شو يقول فيها ..؟؟
فوز: يعترف فيها بكل شي ..
ميرة: ما فهمت ..؟؟
فوز: الرمسة اللي قلتيها إنتي عن إعجابه وهالسوالف ..
ميرة: حلفي ؟؟
فوز: والله .. أقولج انصدمت وايد
ميرة: ليش إنزين إنتي تعرفين ها كله ؟؟
فوز: هيه .. بس ما أعرف إنه يحبني ويبا يخطبني .. لا وبعد طلب رقم أبويه وإلا أخويه عسب يدق عليهم .. تخيلي
ميرة: مستحيل ..!!!
فوز: والله .. إذا مب مصدقة دشي المنتدى بنكي وشوفي
ميرة: أويييييه تعقدت السالفة .. ممممم أحينه إذا درا إن أنا اللي أطرش الرسايل وربي بيعصب .. بيقول شو تلعبون بمشاعري
فوز: شفتي .. حذرتج م البداية من هالشي بس ما سمعتي الرمسة
ميرة: لازم أقوله الحقيقة ..
فوز: تسوين خير فديتج .. لا تتعقد الأمور أكثر وأكثر ..
ميرة: أكثر من جيه ..؟؟ ما أظن ..
فوز: المهم .. لا تنسين تردين عليه عقب ..
ميرة: أكيد .. لازم أقولج ردة فعله .. وشو بيقول .. بس خليني أبند أحينه وعقب برمسج
فوز: أوكي ..
ميرة: ياللا فديتج مع السلامة
فوز: ربي يحفظج ..
يلست فوز ف الحديقة تتريا رد ميرة عليها ع أحر م الجمر .. وهي خايفة من ردة فعل علي .. وتفكيره فيها .. وف نفس الوقت كانت تفكر ف الكلام المكتوب ف الرسالة .. وردت فيها الذكرى لـ ورا .. لكل المواقف اللي جمعتهم ف بعض ...!!!
بيت عبدالله
يوم الإثنين
الساعة 11:15 مساءاً
علي وسعيد يالسين ف الصالة .. علي ع النت .. وسعيد ميود الريموت ويالس يجلب ف القنوات ..
سعيد: خاطريه أعرف من ساعة يالس ع النت شو تسوي ؟؟
علي: ولا شي .. بس أطالع
سعيد: متأكد ..؟
علي: يب
سعيد: فونك يدق .. ليش ما ترد ..؟
علي: مالي خلق حقها ..
سعيد: حق منو؟
علي: وحده ما تعرفها
سعيد: وإنت من وين تعرفها ؟؟
علي: من الشارع
سعيد: شو؟؟
علي: أقصد تعرفت عليها ف السنتر من فترة أحينه ..
سعيد: من متى رجعت حق هالسوالف ؟؟
علي: سوالف شو ..؟؟ ما أرمس حد غيرها
سعيد: وليش ترمسها ؟؟
علي: بس جيه .. عطتني رقمها والفترة الأخيرة كنت مضايج وايد ودقيت عليها ورمستها ..
سعيد: شو مضايجنك عاد .. وبعدين أنا وين سرت ليش ما ترمسني أنا ف اللي يضايجك ؟؟
علي: صار اللي صار وخلصنا ..
سعيد: إنزين شو ها اللي جان مضايجنك؟؟
علي: ما أبا أرد أذكره عسب ما أتضايج مرة ثانية ..
سعيد: أوووونه ..
علي: ميروووه وين سارت ؟؟
سعيد: ظهرت خاري ترمس رفيجتها ..
علي: منو ؟؟
سعيد: ما أدري .. أظن فوز ..
علي .. فوز .. فوز .. فوز .. وبعدين يعني .. منو فوز .. أستغفر الله العظيم .. أحس نفسي متلخبط ومب عارف شو أبا .. سعيد يحبها ما يصير أفكر فيها .. وبعدين أنا رمست العضوة وأتريا ردها .. بس ليش فوز ف بالي ليش يا ربي ...!!!
عقب ما بندت ميرة عن فوز دشت البيت مرة ثانية .. طالعها سعيد وابتسم وهي ردت له نفس الابتسامة .. وسارت تيلس حذال أخوها
ميرة: علاوي ..؟؟
علي: هلا
ميرة: أبا أرمسك ف سالفة ..
علي: سالفة شو ..؟؟
ميرة: بس اوعدني ما تعصب ولا تتضايج ..
سعيد جان يطالع ميرة باهتمام .. شو هالسالفة ..؟؟ احساس يقوله إنها متعلقة بفوز .. لأن ميرة لو كانت بترمس أخوها ف شي كانت رمسته قبل لا فوز تدق لها .. بس دام إنها رمستها وعقب يات ترمس علي ف أكيد صاير شي .. ما علّق ولا قال شي .. سوا نفسه كأنه مب موجود بينهم ..
علي: وليش أعصب .. قولي عادي ..
ميرة: لا مش عادي .. لازم تكون رايق عسب أقولك
علي: أنا رايق .. رمسي عاااااد
ميرة وهي تبلع ريقها: العضوة اللي إنت معجب ف كتاباتها ..
علي باستغراب: بلاها ..؟!
ميرة: كانت اطرش لك رسايل ع المنتدى ف الفترة الأخيرة
علي: هيه ..
ميرة: بصراحة اللي جان يطرش مش هيه ..
علي: عيل منو ..؟؟؟
ميرة: أنا ..
علي بصدمة: شو ...؟!!!!
ميرة: خلني أفهمك السالفة ..
علي: شو تفهميني .. تستغفليني يا ميرة ..؟؟ معقولة إنتي تسوين جيه
ميرة: علاوي اصبر .. أنا ما سويت شي ..
علي: كل ها وما سويتي شي .. اطرشين لي رسايل ومخلتني أعيش ف وهم طول هالفترة وأنا أقول إن العضوة معجبة فيني .. وف الأخير تطلعين إنتي صاحبة الرسايل ..؟؟؟ ليش سويتي جيه ..؟؟
ميرة: كنت بسوي مقلب ..
علي: مقلب ..؟؟؟ تجرحين مشاعري بس لأنج تبين تسوين مقلب ..؟؟؟
ميرة: ما توقعت إنك تعصب .. ولا يا ف بالي إنك تتجرأ وتقولها إنك تبي تخطبها .. وبدت ميرة تدمع .. كانت شوي وبتصيح بس يودت نفسها .. وسعيد تدخل ..
سعيد: اهدا يا علي .. شفيك جيه محرّج .. بدل لا تسألها ليش سوت جيه .. ودامها داشة من نك نيم العضوة .. اسألها منو العضوة وكيف عرفتها ..
طالعها علي .. كأنه يتريا جوابها ع أسئلة سعيد .. وميرة طالعت ع سعيد اللي طالعها وهز راسه .. وكأنه يقولها ترمس .. وعقبها رمست ..
ميرة: أنا ما عرفت العضوة إلا قبل فترة بسيطة بس .. واكتشفت إني أعرفها وإنتو بعد تعرفونها .. وعسب جيه قلت لها تفتح خاصية الرسايل .. قلت لها إن علي مهتم ف كتاباتها وجان خاطره يطرش لها رسالة .. واقنعتها تعطيني الباسورد عسب أدش بنكها وأطرشله رسالة .. وفعلاً سويت جيه ..
علي: منو هالعضوة ...؟!!!!
ميرة بتردد: فــ ـ ـ ـ وز ..!
علي: منو فوز ..؟؟
ميرة: فوز رفيجتي .. اللي ويايه بنفس الغرفة ..!!
صدمة سعيد كانت أشد من صدمة علي .. يمكن لأنه جان يبيها وحاط عينه عليها .. وهي نفس البنت اللي أخوه وولد خالته يحبها من فترة طويلة .. ولأن علي عرفها قبل ف هو أحق فيها .. أما علي ف لأنه جان منصدم ما عرف شو يقول .. بس عرف يفسر سبب تفكيره فيها ويفسر كل اللي مكتوب ف الدفتر الصغير حقها .. كانت ميرة تتريا ردة الفعل .. بس علي ما قال شي .. كل اللي سواه طرشلها رسالة .. وعقبها خذ مفتاح سيارته وظهر م البيت ...!
لحقته ميرة .. بس ما وحت عليه .. جان خلاص راكب السيارة .. وظهر م البيت بسرعته .. خافت عليه وسارت تدق ع جهازه مغلق
سعيد: لا تخافين .. ما راح يسوي شي
ميرة: ما شفت حالته وهو ظاهر م البيت .. حتى ما قال شي ..
سعيد: شو تبينه يقول ..؟؟ ما عنده شي يقوله
ميرة: إمبلا .. جان المفروض يقول شي .. يرمس مش يسكت جيه
سعيد: بس أنا مستغرب من عصبيته وردة فعله .. ليش ظهر جيه .. الأمر عادي ..
ميرة: ما أدري والله
سعيد: فوز هي اللي قالت لج تخبريه الحقيقة ؟؟
ميرة: هيه .. لأنها خافت الأمور تتعقد أكثر
سعيد: ليش..؟؟
ميرة: لأن الحبيب مطرشلها رسالة يبا رقم أبوها أو أخوها عسب يخطبها ..
سعيد: تمزحين؟
ميرة: محد يمزح فهالأمور .. فوز دقت وقالت لي إنه طرشلها رسالة وقالها إنه معجب فيها
سعيد: ما تحسين إنه استعيل ..؟؟
ميرة: ليش؟؟
سعيد: علي ما جان يعرف إن هالعضوة نفسها فوز .. ع فرض إنها ما كانت فوز شو بيخطب وحده ما يعرف عنها شي .. لا من وين ولا منو أهلها ..
ميرة: على فرض .. بس نحن نرمس عن شي واقع أحينه .. وبصراحة أنا من عرفتها تمنيتها تكون حق علاوي
سعيد بغلاسة: وليش ما تمنيتيها تكون حقي ؟؟
طالعته ميرة بنص عين: ما بغيت البنت تتوهق ويا واحد غلس شراتك ..
سعيد: أفاا يا ميرة .. أنا غلس؟؟
ميرة: تصدق .. واااااااايد
عيل ربي يعينج لأنج بتتوهقين ويا واحد غلس
ميرة: ترا أنا خبلة سرت أحبك إنت
سعيد بجدية: ميرة ..؟
ميرة: هلا
سعيد: أبا أرمس عبدالله وعلي عنا ..
ميرة: ما فهمت
سعيد: أبا أعرس ..
ميرة: تعرس..؟؟؟
سعيد: هيه
ميرة: بس أنا أبا أكمل دراستي وجدامي سنتين لين أخلص
سعيد: خلاص عيل بشوف لي وحده ثانية
ميرة: هاك الدرب مفتوح
سعيد بطل عينه: من صدقج ؟؟
ميرة: هيه
سعيد: أوكي خلي دراستج تنفعج
ميرة: بتنفعني ليش لا ..
سعيد: أسمع رمسة يديدة اليوم ..
ميرة: إنت تبا تناقر ومش عارف كيف .. وأحسن شي ما أرد عليك
سعيد: ما أبا أناقر .. بس بصراحة أبيج تكونين دوم قبالي ..أبا أسولف وياج براحتي .. أبا نروح ونيي ويا بعض ..
ميرة: وإنت تعتقد إني ما أبا هالشي ..
سعيد: عيل خليني أرمس خوانج ..
ميرة: خلنا نتفق قبل
سعيد: ع شو؟؟
ميرة: أبا أكمل دراستي ..
سعيد: ممممم إنزين بس بشرط
ميرة: شو؟؟
سعيد: نملج ..
ميرة: نملج والعرس عقب سنتين .. وايد
سعيد: ما فيها شي
ميرة: ما أظن عبدالله بيوافق
سعيد: وليش ما يوافق .. أنا ولد خالتج .. وشارنج وأبيج
ميرة: ما أدري ..
سعيد: شوفي نحن بنملك ف الصيف .. والعرس بنسويه ف آخر سنة لج .. شرايج ؟؟؟
ميرة: شوف عبدالله وعلاوي وإذا وافقوا انا ما عندي مانع ..
دق تليفون ميرة .. كانت فوز متصلة فيها .. لأنها تبا تعرف ردة فعل علي .. وهي نستها خير شر من شافت سعيد ويلست ترمس وياه ..
فوز: يالدبة إنتي وينج .. ساعة أترياج تردين عليه ؟؟؟
ميرة: سوري والله نسيتج ..
فوز: نعم .. نعم .. نعم .. نسيتيني ؟؟
ميرة: هيه .. هنيه سعيد ويلسنا نرمس ونسيتج
فوز: وأنا أقول ليش ما اتصلت فيني ..
ميرة: شسوي بعد .. كله من سعيد هو السبب
سعيد: أنا السبب ف عينج ..
ميرة: ف عيني الحلووة
سعيد: وع .. شو م الحلاة فيها ..
ميرة: أحلى عن ويهك يالدب ..
فوز: ميييييييييييييرة ..
ميرة: سعيد اجلب ويهك عني .. فوز تصارخ والله بتذبحني خلني أعرف أرمسها .. هلا فوز ..
فوز: إنتو للحين ع نفس حركاتكم الصبيانية .. متى بتكبرون ..؟؟؟
ميرة: ها سعيد والله ..
فوز: الله يعينكم .. المهم قوليلي شو صار بالتفصيل ..
ميرة: شو أقولج ..؟؟
فوز: كل شي ..
ميرة: أول ما خبرته انصدم ..
فوز: إنتي شو قلتيله ..؟؟
ميرة: قلت له إن أنا اللي أطرش الرسايل ..
فوز: شت .. بالمرة جيه ف الويه
ميرة: هيه ..
فوز: وعقب شو صار؟؟
ميرة: هزبني شوية .. وعصب مني .. وعقب سأل منو العضوة وأنا كيف عرفتها ..؟؟ وقلت له إن العضوة هي إنتي .. وأول ما سمع اسمج تقولين حد صب عليه سطل ماي بارد .. صخ ما رمس ولا قال شي أبداً .. حتى ويهه ما جان فيه تعابير .. يلس يسوي شي ف اللاب توب وعقبها بند اللاب توب وخذ مفتاح سيارته .. وظهر م البيت ...!
فوز: حلفي؟؟؟
ميرة: والله .. وحاولت أدق عليه فونه مبند .. لا وبعد ظهر م البيت وهو معصب وتخيلي كيف سوا بالسيارة ..
فوز: دبه والله أخاف يصير فيه شي
ميرة: ما بيصير شي إن شاء الله .. صحيح هو أول مرة يعصب جيه .. بس ما عليج علاوي قلبه طيب .. عقب ما يهدا بيرد وبيرمس ف الموضوع بهدوء ..
فوز: أتمنى بصراحة .. حذرتج يا ميرة من هالشي وقلتي عادي .. الله يستر
سعيد بهمس: اسأليها .. هي شو رايها ..؟؟
ميرة تأشر بإيدها : بشو؟؟
سعيد: شو رايها ف علي ..؟؟ تبيه أو لا ...؟؟
ميرة: ما أبا ..
سعيد: عشان خاطريه ياللا ..
فوز: ميرووه إنتي وين تروحين .. أكيد سعيد وياج ..
ميرة: سوري فديتج ..
فوز: المهم ببند عنج أحينه ..
ميرة: لا لحظة ..
فوز: شو ؟؟
ميرة: أبا اسألج ..
فوز: عن شو ؟؟؟
ميرة: بصراحة أبا اعرف إنتي شو رايج ف علي ..؟؟
فوز: من أي ناحية يعني ؟؟
ميرة: لا تستهبلين فواز .. أقصد مممممم لو خطبج بتوافقين ؟؟؟
فوز: ما أدري ..
ميرة: يعني ما تحسين بشي صوبه ؟؟
فوز: بعد ما أدري ..
ميرة: لا تخافين ما بقول حق علاوي بس أبا أعرف
فوز: لو كنت أدري كنت قلت لج ..
ميرة: أكيد ما بتقولين لأني اخته ..
فوز: لا والله مب عشان جيه .. بخليج أحينه أوكي .. أول ما يرد أخوج طمنيني ..
ميرة: إن شاء الله فديتج ..
فوز: ياللا فمان الله
ميرة: ربي يحفظج
سعيد: شفيج ؟؟
ميرة: ما أدري .. أحس فوز متضايجة من الموضوع وايد
سعيد: ليش شو قالت لج ؟؟
ميرة: كل أجوبتها .. ما أدري وعقب قالت بتبند وما بغيت أضغط عليها .. البنت محتاية وقت تفكر فيه ..
سعيد: من حقها ..
ميرة: دق ع علاوي شوفه إذا فتح جهازه أو لا ..
سعيد: إن شاء الله ..
أما علي .. ف من سمع رمسة ميرة .. ومن درا إن العضوة هي فوز .. حس إن كل الأبواب تصكرت ف ويهه .. طرش لها رسالة .. كل اللي انكتب فيها .. " أنا آسف .. وإنسي كل الكلام اللي انكتب ف الرسالة .. ولو تحذفينها من صندوقج وعقلج يكون أحسن .."..!!
ليش سوا جيه ..؟؟ ما يدري .. اللي عرفه وتأكد منه إن فوز مب له .. جان مضايج وايد وماله خلق حق أي حد .. يمكن يبا ييلس مع نفسه شوية ويفكر بكل شي .. مستعد يخسر فوز .. بس ما يخسر أقرب الناس له .. وعلي متأكد مليون ف المائة إن سعيد شي ف خاطره صوب فوز وإنه يبيها .. حس نفسه غبي لأنه فكر فيها .. وأغبى لأنه طرش الرسالة حق العضوة .. بس اللي متفاجئ منه صدق .. شلون العضوة تطلع نفسها فوز ..؟؟ وكيف ما لاحظ هالشي عقب ما قرا دفترها .. مع إنه انتبه لنفس الأسلوب .. بس أبداً ما يا ف باله إن العضوة اللي يتابع كتاباتها هي فوز .. فوز .. فوز .. فوز .. انتبه ع نفسه .. وين ساير ...؟!! يمشي ف نفس الطريق اللي يوصله لـ بيتهم فوز .. وقّف سيارته بنص الشارع .. جان الشارع شبه فاضي .. وعقب ركن ع صوب .. ونزل م السيارة .. تذكر أول مرة دش فيها المنتدى وقرا لها .. تذكر لمن كانت ميرة ترمس عنها ويقولها اخطبيها لي .. لمن شافها أول مرة .. ولمن درا إنها رفيجة أخته .. لمن رمسها .. وخذ دفترها وقرا اللي فيه .. تأكد وقتها إنها تعيش حالة حب ومع ذلك جان يفكر فيها .. يحبها .. هاي الحقيقة اللي ما قدر ينكرها .. وجان بيشرد من حبها وقال حق العضوة إنه معجب فيها ويبا يخطبها .. ما درا إنه شرد منها لها .. يعني ما سوا شي ..!
علي: آآآآآه يا فوز .. كنتي جريبة مني وايد وما حسيت فيج ..
جان ميود دفترها ويالس يجلب فيه .. فوق 10 مرات قراه .. ومستعد يكمل لـ 1000 ..
رأيتهُ اليوم أيضاً ..
ورأيتُ تلك النظرات التي أمقتها .. أعلم بـ أنهُ يحبني ..
يبحثُ عن نظرة مني .. تشفي لهيب الشوق الذي يجتاحه ..
لكنني أكرهه ..
لا .. ليس كرهاً .. فـ لو كنتُ أعرفُ معنى الكره .. لكرهتُ أناساً كثر .. دمّروا حياتي ..
ورموني على رصيفِ الانتظار ..!
من الصعب أن نقرر فراق من نحب .. والأصعب أن نمني النفس بأن من تركناهم لا يملكون العيش بدوننا وسيعودون سريعاً ..!
جميعُ القرارات نستسهلها عندما نفكرُ بالقرارِ الأصعب
ولا شيء أصعب من قرارِ الفراق واستنزافِ المشاعر واستهلاكِ كلماتِ الحب ..!
نحنُ عندما نحب .. نحبُ بإرادتنا ومع ذلك نخوض التجربة عن رغبة لا اقتناع ..!
وعندما نفارق .. نفارقُ رغماً عنا ومع ذلك نمضي فيهِ عن اقتناع لا رغبة !!
ما هذا التناقض العجيب ..؟!!
ربما لن يفهمهُ أحد .. يكفي أن أفهمهُ أنا ...!!
فتح تليفونه .. وبدت المسجات توصله .. أغلبها من عند شوق .. وميرة وسعيد بعد مطرشيله .. بدون لا يقرا مسجات شوق حذفها .. وفتح مسجات ميرة وسعيد .. كانوا يسألون عنه .. ما رد عليهم .. جان محتاج لـ هدوء عشان يتخذ القرار المناسب ومحتاج لـ وقت عشان ينسى فوز وينسى العضوة ..
دق تليفونه .. جان سعيد متصل فيه .. ف رد عليه عسب ما إيلسون يحاتونه أكثر ..
علي: هلا سعيد ..
سعيد: وينك إنت ..؟؟
علي: ليش فيه شي ..؟؟
سعيد: خرعتنا يالدب .. ظهرت جيه ولا قلت وين ساير ..
علي: كنت محتاي أيلس ويا نفسي شوية ..
سعيد: أحينه أنا أبا أفهم إنت ليش مضايج ومعصب ..؟؟
علي: مب لازم تعرفون ..
سعيد: علي .. إنت تسرعت وايد ف قرار خطبتك لـ العضوة .. واحمـ ..
علي يقاطعه: أدري تسرعت .. بس عرفت إني تسرعت لمن اكتشفت إنها نفسها فوز .. وطرشتلها رسالة وقلت لها تنسى كل شي .. وخلاص ..
سعيد: ليش ؟؟
علي: بس ياخي .. ما أباها .. ببند أحينه
سعيد: علاوي شفيك إنت جيه ؟؟
علي: سعيد مالي خلق أرمس حد أحينه .. ياللا فمان الله
سعيد: أوكي بخليك بس لا تتأخر .. ميرة تحاتيك
علي: إن شاء الله ..
بند سعيد .. وعلي فر التليفون ف السيارة .. وكمل قراءة لـ الدفتر .. وعقبها قرر يرد البيت لأن باجر عنده دوام ..!!!
بيت أبو حميد
يوم السبت
الساعة 4:30 عصراً
علاقة موزة بسيف رغم توترها الفترة اللي طافت .. بس الأوضاع ما بينهم تقريباً في سكون .. كانت موزة ف دارها .. تفكر بسيف اللي شافها ورمسها .. قطع تفكيرها صوت تليفونها لمن دق .. جان أخوها أحمد متصل فيها .. الخميس اللي طافت جان زواجه من حصة .. وعقبها ع طول سافروا ماليزيا يقضون شهر العسل ..
أحمد: السلام عليكم
موزة: وعليكم السلام والرحمة .. هلا والله بالمعرس
أحمد: هلا بج زود .. شحالج دبه ..؟؟
موزة: الحمدلله بخير .. شحالك إنت .. وشخبارها حصييص..؟؟ عساكم مستانسين ؟؟؟
أحمد: الحمدلله كلنا بخير .. وحصة كاهي حذالي تسلم عليج
موزة: ربي يسلمها .. شو الجو عندكم ..؟؟؟
أحمد: والله برد م الخاطر ..
موزة: ومتى ناوين تردون ؟؟؟
أحمد: أعوذ بالله منج .. ما كملنا 3 أيام .. خلينا ع راحتنا ..
موزة: لا صج والله .. متى بترجعون عسب نستقبلكم ..؟؟
أحمد: يمكن ع الخميس الياية .. وإذا عيبتنا اليلسة هنيه بنكمل أسبوعين ..
موزة: ما شاء الله عليكم .. أهم شي تستانسون ..
أحمد: الحمدلله مستانسين وايد .. حصة بترمسج ..
موزة: أوكي عطيني إياها
حصة: هلا مويييييز شحالج ؟؟
موزة: هلا والله بحرمة أخويه .. هلا بالعروس .. أنا طيبة فديتج .. شحالج إنتي ؟؟
حصة: الحمدلله بخير
موزة: ما سوالج شي احمدووو ..؟؟
حصة: فديته والله .. ما سوا شي بالعكس ..
موزة: يا ربي وقمنا نتفدى ..
حصة: ريلي .. ويحق لي أتفداه متى ما بغيت
موزة: زين والله ربي يسعدكم ويهنيكم
حصة: آمين يا رب .. وعقبال ما نفرح فيج إنتي و.. أحم ..
موزة: لا خليني بعيد عن الـ احم مالج زين
حصة: ليش عاد ..؟؟
موزة: بس جيه .. أنا ما أبا أسير بعيد عن أهلي ..
حصة: أونج .. عيل أنا خليت أهلي وييت عندكم
موزة: عادي إنتي تحبين أحمد يعني بتسوين أي شي عشانه
حصة: وإنتي ما تحبين سيف ؟؟
موزة: لا ..
حصة: علينا هالحجي يا مويييز ..؟؟
موزة: لا مب عليكم .. المهم استانسوا وايد هناك .. ولا تنسون تييبون لي هدايا ..
حصة: بعد مب هدية .. هدايا ..
موزة: هيه .. هدايا .. مب أنا اللي جمعتكم ويا بعض .. ف استاهل هدايا منج ومن أحمدووو
حصة: لا توصين
موزة: ياللا عيل .. جلبي ويهج
حصة: أصلاً بجلبه لأن متفقين نظهر نتحوط فديتج .. سلمي ع عمي وعمتي وايد ..
موزة: إن شاء الله
حصة: ياللا مع السلامة
موزة: ربي يحفظكم
بندت حصة عنها .. وردت فيها الذكرى ليوم الخميس .. لمن شافت سيف .. ورمسها .. كانت تحاول تهرب من نظراته لها .. سيف رغم إنها مب متأكدة إن جان بطل حركاته وسوالفه ويا البنات .. بس تحس إن في شي يجذبها صوبه .. يخليها تفكر فيه غصب عنها ..
سيف: شحالج ..؟؟
موزة: الحمدلله بخير ..
سيف: مبارك عليج زواج أخوج
موزة: ومبارك عليك زواج أختك .. وعقبالك
سيف: عقبالنا ..
موزة: أنا مب مستعيلة ع الزواج .. أصلاً ما أفكر أتزوج لأن بصراحة الرياييل ف هالزمن ينخاف منهم .. وما تقدر توثق ف أي حد ..
سيف: شقصدج ..؟؟
موزة: قصدي واضح ..
سيف: ليش دوم تحاولين تخربين كل لحظة حلوة .. أعيشها معج
موزة: أحسن شي ما أرد عليك
سيف: مواز .. أنا أحبج .. افهميها عااد ..
موزة: شالمطلوب مني ..؟؟
سيف: ما أبا منج غير شي واحد بس .. تردين شرات قبل .. موزة اللي أعرفها واللي حبيتها .. هالدور مب لايق عليج
موزة: هالدور أنا غصب عني عشته .. وإنت السبب فيه .. وعشان جيه ما أقدر أرد مثل قبل ..
سيف: إمبلا تقدرين .. لو كنتي تبين هالشي ..
موزة: أوكي .. وأنا ما أبا ..
سيف: لي متى بتمين جيه ..؟؟
موزة: لين أشوف نفسي فعلاً قدرت أنسى الصدمة اللي إنت خليتني فيها .. وأأقلم نفسي على إني أتعامل وياك مثل غيرك
سيف: لهالدرجة تكرهيني ؟؟
موزة: قلت لك ما أعرف أكره ..
سيف: مواز .. أنا وايد ذليت نفسي عشانج .. عشان رضاج .. بس ما أقدر أتحمل أكثر .. أنا عمري ما ذليت نفسي عسب بنت .. وتخسي اللي تذلني .. بس لأني أحبج وشاريج أسوي كل هااا ..
موزة: إنت اللي خليت نفسك فهالموقف يا سيف .. لو ما سويت اللي سويته .. ما جان هالشي صار .. ها غلطك وإنت تتحمله .. مب أنا ..
سارت موزة عنه .. كالعادة نقاشاتهم دايماً عقيمة .. يمكن موزة ما تبيه يرمسها .. تبا التعامل بينهم يرد مثل قبل بروحه .. وبدون تدخله أو تدخلها .. هالشي راح يريحها أكثر ويخليها تنسى اللي صار بالتدريج ..
دق تليفونها بمسج .. جان سيف مطرشلها مسج .. ويلست تقراه وتتمعن ف كل حرف فيه ..
أبي أعرف : تحبني ..؟!
أو إنك مثل ما قالوا .. جرحت الود وسنيني ...!
طلبتك ..
لا تردني ..!
أبي نرجع مثل أول نسولف عن بدايتنا
أمانه لا تخذلني ..!!
قرت المسج .. وردت عليه بمسج .. يمكن لأنها محتاية فعلاً تعبر عن المشاعر اللي ف داخلها واللي ما قدرت تقولها حق سيف بسبب اللي سواه لها ..
يآجَريح مِن بعآدي
وأنا من بعآدك جَريح !
كآن لِي ويّاك قِسمة
بـ نلتِقيْ !
عقب ما طرشت المسج .. خلت فونها ع صوب وسارت تسويلها نسكافيه .. الجو بارد ومحتاجة شي يدفيها .. وفهالوقت اللي كانت فيه موزة بالمطبخ .. دق سيف فوق الـ 5 مرات .. جان يبا يرمسها .. وأول ما يات وشافت اتصالاته استغربت .. قرت المسج اللي وصلها وهي ميودة التليفون ..
" أتمنى والله يجمعنا النصيب .. لخليج أسعد إنسانة ف العالم .. وربي أحبج .. وشاريج .. وبسوي المستحيل عسب آخذج .."
ابتسمت موزة ع المسج .. بس ما ردت .. كحركة منها لقهر سيف .. اللي جان يتريا كلمة ع الأقل تبرد فواده .. رغم إنه عدم ردها ريحه شويه .. لأن موزة لو ردت بتقول كلام يجرحه .. وسكوتها بالنسبة له يعني رضاها ..!!
دق تليفونها بمسج .. بس هالمرة جان المسج من عند فوز تسألها إذا فاضية لأنها تبا ترمسها .. وموزة اتصلت فيها .. لأن فوز ما ترسل مسج تسألها إذا فاضية إلا إذا جان عندها موضوع تبا ترمس فيه ..
موزة: السلام عليكم
فوز: وعليكم السلام والرحمة
موزة: شحالج غناتي؟؟
فوز: بخير ربي يسلمج .. شحالج إنتي ؟؟
موزة: الحمدلله بخير ..
فوز: دبه ليش دقيتي .. كنت بدق عليج
موزة: ويا راسج ما بينا هالسوالف .. أكيد عندج شي بتقولينه
فوز: تبين الصج .. هيه
موزة: لا تقولين الموضوع يخص محمد ...؟؟
فوز: لا مب محمد .. محمد من قلت له إني انخطبت ما اتصل ولا رسل ولا سوا شي .. لو إني خايفة من هالهدوء
موزة: الهدوء اللي يسبق العاصفة
فوز: حاسة جيه والله
موزة: ما عليج منه .. ما يقدر يسوي شي ..
فوز: أدري ..
موزة: إنزين عيل الموضوع عن منو ..؟؟
فوز: علي أخو ميرة
موزة: بلاه ..؟؟
فوز: الموضوع صاير من فترة .. بس انتي انشغلتي بعرس أحمد وما بغيت أزعجج .. ف قلت بأجله لعقب العرس ..
موزة: شو صاير ..؟؟
فوز: أنا مب عارفة شو صاير بالضبط .. تبين الصدج خاطري أرمسه .. أبا أفهم ليش سوا جيه ..
موزة: شو سوا ..؟؟
فوز: أخوها جان يتابع كتاباتي ف المنتدى من فترة طويلة أحينه .. ومعجب فيني .. بس هو ما يدري إن اللي تكتب هي أنا .. وطرشلي رسالة ع المنتدى يقولي إنه معجب وإنه يبا رقم أبويه أو أخويه عسب يخطبني ..
موزة: مستحيل ..!
فوز: وربي .. أنا كنت عارفة عن سالفة اعجابه لأن ميرة قالت لي .. قبل لا يعترف هو .. بس ..
موزة: بس شو ..؟؟
فوز: أنا لمن قريت الرسالة .. قلت حق ميرة تخبره الحقيقة وتقوله إن العضوة اللي تكتب هي أنا فوز رفيجتها .. وفعلاً ميرة قالت له .. تخيلي شو سوا ..؟؟؟
موزة: شو سوا ..؟؟
فوز: طرش لي رسالة يقولي أنسى كل الكلام اللي قاله .. وأحذف الرسالة من صندوقي ومن عقلي بعد ..!!
موزة: ليش ..؟؟؟
فوز: ما أدري .. يمكن يكرهني .. وانصدم لمن درا إن العضوة هي أنا ..؟؟
موزة: وليش يكرهج .. إنتي شو سويتيله ..؟؟
فوز: ما سويت شي .. أصلاً ما أذكر إذا رمسنا بعض أو لا .. كل اللي بينا نظرات بس ..
موزة: غريبة والله .. إنزين إنتي ما حاولتي تسألين ميرة ..؟؟
فوز: لا .. أنا حتى ما قلت لها إنه طرش هالرسالة .. ما أدري بيني وبينج حسيت بإهانة .. بهالتصرف كأنه يشكك فيني وف أخلاقي ..
موزة: لا تفكرين جيه فديتج .. أكيد له أسبابه
فوز: شو هالأسباب .. يقول حق بنت بخطبج .. وبعد ما يعرف منو هي .. يطرشلها يقولها ما أباج .. شو الشي اللي يخليه يسوي جيه؟؟؟
موزة: أكيد عنده سبب قوي ..
فوز: ما أدري والله .. تضايجت وايد من تصرفه ..
موزة: وليش تتضايجين ..؟؟ يهمج ..؟؟
فوز: لا طبعاً
موزة: لا تجذبين أنا رفيجتج ..
فوز: ما أدري ..
موزة: إمبلا تدرين .. بس تنكرين
فوز: شو أنكر ..؟!!
موزة: إنج تحبينه ..
فوز: ما توصل للحب .. وبعدين أنا توني طالعة من تجربة فاشلة ما أبا أدخل نفسي ف تجربة ثانية ..
موزة: أوكي .. ما بقولج تحبينه .. بس أكيد معجبة فيه وتفكرين فيه .. وعسب جيه ضايجتج ردة فعله
فوز: مواز .. أنا تضايجت من ردة فعله لأن تصرفه يدل على إن أنا فيني شي غلط .. مب عشان شي ثاني ..
موزة: أنا أشوف لو تقولين حق ميرة تسأله أفضل ..
فوز: ما أعتقد راح يقولها ..
موزة: طيب هو ما طرشلج مرة ثانية..؟؟
فوز: أصلاً ما دش المنتدى خير شر ..
موزة: غريبة والله .. أنا حاسة إن في شي خلاه يقولج تنسين اللي ف الرسالة .. صدقيني هو يحبج بس أكيد شي منعه
فوز: أحينه إنتي تقولين عنده أسباب .. أوكي قوليلي شو هالأسباب واقنعيني ..
موزة: مممممم ما أدري .. الأيام راح توضح كل شي .. وبتعرفين ليش هو سوا جيه .. لا وبعد أبصم لج بالعشر إنه راح يرد ف كلامه
فوز: ليش شو شايفني لعبة .. مرة أبيج ومرة لا .. خلاص أصلاً أنا فتحت له المجال .. وما بكرر نفس الغلط .. وخل يشوف حياته عند وحده تناسبه ..
موزة: لا تعقدين الأمور إنتي .. خليله أعذار
فوز: ما يهمني عسب أخليله أعذار .. ولا راح أسامحه ع الحركة البايخة اللي سواها .. ما بجذب عليج أنا كنت معجبة فيه وتعيبني شخصيته .. ودوم لمن أشوفه أتخرع .. أحس بشي غريب يتحرك فيني .. بس عقب اللي سواه .. طاح من عيني ..!
موزة: لهالدرجة ..؟؟ فواز خل عنج السوالف ..
فوز: ما علينا .. يمكن الله جان يبيني أعرفه ع حقيقته وعسب جيه صار هالشي .. والحمدلله ع كل حال
موزة: الحمدلله .. إنتي لا تفكرين وايد بالموضوع .. ويا خبر اليوم بفلوس باجر ببلاش .. وجريب إن شاء الله بتعرفين ليش هو سوا جيه ..
فوز: خلاص أصلاً ما أبا أعرف ..
موزة: أونج ..
فوز: هيييييه ..
موزة: على ماما يا بابا
فوز: أكرهج ..
موزة: ههههههههه وأنا أموت فيج .. خصوصاً لمن تنقهرين .. أبصم بالعشر إن شي ف خاطرج صوبه ..
فوز: وشو يخليج متأكدة هالكثر ..؟؟
موزة: لأن ردة فعلج من طلب علي .. ما كانت نفس ردة فعلج من طلب سلطان .. ولو تيلسين مع نفسج وتفكرين فيها بتشوفين رمستي صح ..
فوز: بخليج أحينه
موزة: شو بتشردين ..؟؟
فوز: ف عينج أشرد .. أبويه يزقرني بسير أشوفه شو يبا ..
موزة: أوكي ..
فوز: ياللا فديتج .. أشوفج ع خير الأسبوع الياي
موزة: إن شاء الله
فوز: مع السلامة
موزة: ربي يحفظج
بندت موزة عن فوز .. ويلست تفكر ف سالفتها .. فعلاً شو الشي اللي يخلي أخو ميرة يتصرف هالتصرف .. أحينه موزة بيذبحها الفضول .. بس ما تقدر تسأل ميرة لأن ها شي خاص بفوز وهي تقرر إذا تقول حق ميرة او لا .. ياللا الأيام راح تكشف كل شي ..!!!
بـــدايــــة الفصـــــل الــثــانــــــي
السكن الجامعي
يوم الأحد
الساعة 5:00 عصراً
قبل شوية راجعة ميرة م المحاضرات .. كانت فوز يالسة ع النت .. تطلع معلومات لأن يوم الأربعاء عندها عرض وقالت أحسن تزهبه م اليوم ..
ميرة: أوف .. الأسبوع الياي ما بتشوفوني ..
فوز: ليش عاد ..؟؟
ميرة: عندي 3 امتحانات .. ما أعرف وين بودي بعمري ..
فوز: لا تحاتين إن شاء الله خير
ميرة: إن شاء الله .. شو تسوين ..؟؟
فوز: أشتغل ع النت ..
ميرة: أنا بسير أصلي العصر مش مصلية ..
فوز: تقبل الله مقدماً ..
ميرة: منا ومنكم صالح الأعمال ..
سارت ميرة تتغسل وتتمسح عسب تصلي .. ودق تليفون فوز .. كانت موزة متصلة فيها .. واستغربت فوز اتصالها وحست إنه صاير شي .. ف ردت عليها بسرعة ..
فوز: هلا مواز ..
موزة: أهلين .. شحالج فوز ..؟؟
فوز: الحمدلله بخير .. من صوبج ..؟؟
موزة: الحمدلله ..
فوز: بلاه صوتج متغير .. صاير شي ..؟؟
موزة: شو أقولج يا فوز ..
فوز: شو مستوي لا تخرعيني ..؟؟
موزة: نورة ..
فوز بخوف: بلاها ...؟!!!!!
موزة: راح تتطلق من ريلها ..
فوز: خس الله بليسج يالويه ع بالي شي صار فيها .. إنزين أدري عن هالشي من فترة ..
موزة: منو قالج ..؟؟
فوز: هي اتصلت فيني لمن كنت مريضة عسب تسأل عني وأنا سألتها عن الزواج وجيه .. وقالت إنها احتمال تنفصل عن ريلها .. بس ليش ما قالت لي .. وحاولت قبل فترة اتصل فيها جهازها مغلق ..
موزة: وليش ما قلتيلي ..؟؟
فوز: نسيت .. هالشي صار لمن كنت مريضة .. وما يا ف بالي أقولج .. وبعدين حسيت إن ها شي يخصها ويمكن ما تبا حد يعرف
موزة: الظاهر جيه ..
فوز: عيل إنتي منو قالج ..؟؟
موزة: دقت عليّه وحده تسألني عنها .. أسئلة غريبة بصراحة .. وطبعاً أنا ما قدرت أقول أي شي .. لأنها أمنتنا على أسرارها ..
فوز: وما قالت لج ليش تبا تتطلق ..؟؟
موزة: مب هي اللي طالبة الطلاق .. أظن ريلها يبا يطلقها ..
فوز بصدمة: شو...؟؟؟ ليش .. هو يحبها وجان يترياها وجم مرة خطبها لين وافقت .. شو يخليه يطلقها ..؟؟؟
موزة: ما أدري شو أقولج يا فوز .. ما أقدر أقول أي شي إلا لمن نتأكد .. لأني ما أثق ف رمسة وحده ما أعرفها .. يمكن تكون جذابة بعد ..
فوز: هي شو قالت لج ..؟؟؟
قالت موزة حق فوز السبب اللي عشانه راح تتطلق نورة .. وأول ما عرفت .. انصدمت .. وكل اللي قالته : مستحيل .. ما أصدج ..
موزة: حتى أنا ما قدرت أصدج هالشي .. بس شو يخليها تجذب ..
فوز: عقلي مب قادر يستوعب .. لا طبعاً .. يمكن تكون غلطانة .. يمكن ما تقصد نورة رفيجتنا ..
موزة: بس اللي يأكد صدج كلامها .. إنج فعلاً تدرين إنها تبا تنفصل عن زوجها ..
فوز: ما أدري .. بس أنا ما أبا أصدج هالشي ..!
موزة: أنا راح أتأكد بطريقتي الخاصة وبرد عليج .. بدل لا نسيء الظن فيها ..
فوز: أوكي .. أتريا منج خبر ..
موزة: بس عاد لين أرد البيت .. يعني ف الويكند راح إييج الخبر الأكيد إن شاء الله
فوز: ع خير ..
يوم الثلاثاء
الساعة 8:30 مساءاً
موزة وفوز وميرة متيمعات ويا بعض ويسولفن .. هاي عادتهن كل ثلاثاء .. يلتقن ف مكان ويفتن علومهن .. كانت موزة تسولف عن ولد وياها ف الكلاس .. صار لها موقف ويّاه .. والبنات يبون يعرفون شو صار .. خصوصاً ميرة اللي الفضول بيذبحها جريب ..
ميرة: أشوفج تعلمتي حركات النذالة من رفيجتج ..؟
فوز تطالعها بنص عين : نعم .. ما سمعت ..؟؟
ميرة: لا تسمعين أحسن .. والله ما أدري ليش إنتن جيه نذلات
فوز: هههههههههه مواز بليز قولي السالفة ترا ميرة شوية وتبجي
ميرة: ها ها ها .. ما يضحك يالدبة
موزة: هههههههه مشكلة الناس الفضوليين ..
ميرة: عاد اللي يسمع يقول إنتي مول مش فضولية ..
موزة: أنا نص فضولية .. إنتي فضولية كاملة
فوز: ههههههههه والله إنتي وياها أكبر فضوليات جابلتهن ف حياتي
ميرة: أنا أعترف .. ~_~ .. الدور والباجي ع غيري
موزة: احم .. ما بعلّق
فوز: لا تعلقين .. قولي السالفة خلصينا .. ترا ذليتينا ..
موزة: انزيييين ..
ها الله يسلمكم .. أمس حضرتي كنت متأخرة ع المحاضرة .. أصلاً سايرة غصب عني .. وطبعاً الطلاب كلهم ف الكلاس .. والدكتور بعد جان موجود .. أنا ياية منطلقة بدش الكلاس والولد الظاهر الدكتور مطرشنه إييب شي .. ف جان يمشي ويطالع ع ورا يرمس الدكتور .. وبدخلتي أنا .. وصار اللي صار ..
ميرة: هييييه يالدبة .. شو صار اللي صار .. شو صار ..؟؟
فوز: لا تقولين إنج دعمتيه ..؟؟؟
ميرة: شت ..
موزة: دعمته .. قولي حضنته ..
ميرة: شت شت شت ..
فوز: هي إنتي بلاج تشتشتي .. خلينا نفهم السالفة .. شو يعني ..؟؟
موزة: شو شو يعني .. أقولج ضربت فيه بالقو .. ومن قوة الضربة أنا فقدت توازني وكنت بطيح .. وهو حليله احم يودني ويا خشمي ف خده .. حسيت نفسي بموت قسم بالله .. شعور غييييير .. لا وبعد حاطه إيدي ع صدره .. تخيلوا الإحراج كيف ..
ميرة: حد شافج ؟؟
موزة: لا الحمدلله لأنه هو جان تقريباً خاري الكلاس ..
فوز من صدمتها ساكتة ما تقول شي .. وميرة فاتحة استجواب حق موزة ..
ميرة: ما قالج شي ..؟؟
موزة: قال اسلمتي .. وبعدني عنه بالمرة .. عقبها هو سار إييب الشي اللي وصاه الدكتور عليه وأنا دشيت المحاضرة .. حليله أول ما دش منزل راسه .. يلس شوية وعقب استأذن .. حسيته جان منحرج أكثر مني .. وأنا بعد تضايجت من نفسي وايد وما حضرت باجي المحاضرات ..
ميرة: بعد تقول حليله ..
موزة: لأنه مؤدب وطيب والكل يحترمه .. يعني مب إنه مسوي هالحركة عن قصد .. وبعدين أنا الغلطانة ياية منهدة ..
ميرة: فوز ليش ساكتة .. قولي شي
فوز: أخ عليج يا مواز .. ما اتخيل هالموقف .. وع .. والله بموت
ميرة: ههههههههههههه باجر عاد ف ملحق الأنوار راح ينزلون تقرير عن هالحدث .. ضبط طالبة جامعية في احضان طالب جامعي
موزة: وع .. صج إنج سخيييييييفة .. وماصخة ..
ميرة: ههههههههههههه
فوز: ميرة لا تضحكين وايد ترا اللي يضحك ع شخص .. عقب يرد فيه هالشي ويضحكون عليه
ميرة: بسم الله .. الله لا يقولها ..
فوز: عيل صخي ..
موزة: هيه والله صخي ..
ميرة: بصخ .. بسم الله عليه .. بسم الله
فوز: ههههههههههه بلاج تقولين شايفة يني
ميرة: يمه ما أتخيل جيه يصير ويايه ..
فوز: لا تنهدين ف المشي وما بيصير وياج ..
ميرة: لا ما بنهد ولا بتأخر ع محاضراتي م اليوم ورايح ..
يوم الأربعاء
الساعة 12:00 ظهراً
تفاجأت ميرة أول ما دق عليها علي وقالها إن هو اللي راح يشلها م الجامعة .. وإنه جريب يوصل وعسب جيه يباها تتزهب وتنزل أغراضها .. بس اللي فاجأها أكثر إن فوز راح تروح وياهم .. ليش جيه صار ..؟!! فوز لين أحين ما تدري عن هالشي .. لأنها لسه ما وصلت السكن .. سألت ميرة علي عن السبب وليش هالتخطيط ..
علي: دق عليّه حمد .. وقالي إنه راح إيي ياخذكن عقب المغرب لأنه عنده شغل يعني يبيني أكون ف بيتهم ع الساعة 8 عسب آخذج مناك .. ف أنا اقترحت عليه إني أيي أخذكن بدل لا تيلسن اليوم بطوله ف الجامعة ..
ميرة: أهاااا .. بس فوز ما أظن بتوافق ..
علي: ليش ..؟؟ عيل إنتي تروحين ويا أخوها .. وبعدين نحن بينا عيش وملح .. والمفروض ما تستحي مني
ميرة: ومنو قالك إن البنت تستحي منك .. وبعدين فوز ما تفكر جيه .. بس ما أدري أحس عقب اللي صار ما راح تقدر تشوفك ..
علي: ليش شو صار ..؟؟
ميرة: مش إنت قلت إنك تبا تخطبها ..
علي: إنزين ..
ميرة: يعني راح تحس بإحراج منك لأنها ما ردت عليك .. أو لأنها درت إن في شي ف خاطرك صوبها ..
في هاللحظة دشت فوز .. طالعتها ميرة وابتسمت ف ويهها .. وردت لها فوز نفس الابتسامة ..
علي: ما راح تحس بشي .. خليج زاهبة إنتي بس وقوليلها تتزهب .. كلها ربع ساعة وبكون عندكم ..
ميرة: إن شاء الله ..
علي: ياللا عيل فداعة الله
ميرة: ربي يحفظك ..
ميرة: وصلتي ..؟؟
فوز: لا أنا بعدني ف الطريق .. ظلي واصل بس ..
ميرة: ههههههههههه تستهبلين حضرتج ؟؟
فوز: لا والله إنتي اللي تستهبلين .. يعني شو وصلتي .. منو تشوفين جدامج ..
ميرة: انزين عادي ها سؤال استنكار .. مب استفهام ..
فوز: أوونه ..
ميرة: ما علينا خلصي أغراضج بسرعة ..
فوز: لا تستعيلين .. أبويه مسافر وحمد دق وقال إن عنده شغل وبيتأخر ..
ميرة: أدري ..
فوز باستغراب: تدرين ..؟؟
ميرة: هيه
فوز: وشدراج عاد .. حمد دق عليج ...؟؟
ميرة: لا والله .. علاوي دق عليه
فوز: شو قالج ..؟؟
ميرة: قالي تزهبي إنتي ورفيجتج لاني ياي أخذكن
فوز بصدمة: شو؟؟؟؟
ميرة: اللي سمعتيه ..
فوز: يعني أحين أخوج هو اللي بيشلنا ..؟؟
ميرة: هيه .. والله قالي ربع ساعة وبيوصل .. بسرعة زهبي أغراضج
فوز باستسلام: إن شاء الله ..
زهبت فوز أغراضها .. وفخاطرها تقول .. لازم أكون قوية وأسوي نفسي مب مهتمة لكل اللي صار .. ترا هي ما بترمسه ولا بتسولف وياه ولا بتطالعه حتى لأنها بتكون ورا يالسة .. عقب ما خلصن وتزهبن .. نزلن ينتظرن علي يوصل .. اللي دق حق ميرة وقالها إنه خاري يترياهن .. خلصن اجراءات التصاريح وظهرن ..
جان علي يالس ف السيارة .. نزل أول ما ين البنات صوبه .. خذ أغراض ميرة قبل وحطهن ف السيارة .. وعقب خذ أغراض فوز .. فوز وهي تناوله ما طالعته .. بس هو جان مركز ف ويهها .. وعرف من شكلها إنها مضايجة أو معصبة أو حاطة ف خاطرها عليه ..
ركبت فوز السيارة .. ويلست ورا ميرة .. وعلي جان ساكت طول الطريق .. وفوز نفس الشي .. ما ترمس إلا إذا ميرة سألتها أو رمستها .. وترد عليها .. يات ف بال ميرة فكرة .. وقالت بتطبقها لأنه ما باجي شي ويوصلون بيتهم فوز وهي كانت تبا علي يرمس فوز بأي طريقة .. وفعلاً نفذت فكرتها ..
ميرة: علاوي ..
علي: هلا ..
ميرة: أبا أسير الحمام .. شوف لي مسجد ووقف عنده ..
علي: إن شاء الله ..
وقف علي عند أقرب مسجد .. وجان حذاله سوبر ماركت ف قرر ينزل ياخذ لهم شي يشربونه ..
فوز: أنا مب سايرة .. بس لا تتأخرين
ميرة: إن شاء الله ..
سارت ميرة صوب قسم النساء ودشت المسجد .. وفوز ف السيارة بروحها .. كانت ميودة دفترها اليديد وتكتب فيه .. دق تليفون علي .. ما جان ماخذنه معه .. ف طالعت صوب مصدر الصوت وانتبهت ع التليفون .. وانصدمت أول ما شافت دفترها حذاله .. كانت بتاخذه عسب تتأكد إذا فعلاً هالدفتر الصغير هو نفسه دفترها اللي ضيعته .. أو واحد ثاني يشبهه .. بس لمن شافت علي ياي صوب السيارة تراجعت ..
دش علي السيارة .. وما قال شي .. وفوز كانت تحس برغبة في إنها ترمسه وتسأله ليش سوا اللي سواه .. أما علي ف جان متردد .. هل يرمسها أم لا .. فرصة وياته ويمكن ما تتكرر .. ما يدري إن ميرة مخططة حق هالشي أصلاً ..
علي بهدوء: فوز ..؟!
أول ما سمعت اسمها .. حست بالدم يمشي ف عروقها .. وقلبها بدا يدق بالقو .. يمكن كانت خايفة م الرمسة اللي بتسمعها .. أو يمكن هالشعور صار شعور عادي إييها كل ما شافت علي أو رمسته ..
فوز: نعم ..؟!
علي: أنا آسف .. اسمحيلي .. أدري غلطت ف حقج .. وأدري إنج مضايجة مني ع الحركة السخيفة اللي سويتها ..
فوز: آسف ..؟!! ماله داعي تتأسف .. شيئين ف حياتي ما انتظرتهم من الناس اللي أعرفهم أو أحبهم .. الشكر .. والإعتذار ..
علي: حسيت إن لازم أعتذر ..
فوز: لأنك عارف نفسك غلطان ..؟؟؟
علي: ما أدري ..
فوز: أنا بس أبا أعرف .. ليش سويت جيه ...؟؟؟؟
علي: غصب عني ..
فوز: غصب عنك ..؟؟ خليتني أحس إني رخيصة .. وتقولي غصب عنك .. على فكرة ما كنت أتريا شي لا منك ولا من غيرك ..
علي: إنتي ما تعرفين باللي ف قلبي ..
فوز: ما يهمني .. لا إنت .. ولا اللي ف قلبك ..
علي جان يرمسها بدون لا يطالع ع ورا .. يمكن ما بغاها تشوف الحزن اللي تارس عيونه .. نزل راسه ع تحت .. وانتبه ع دفترها .. وبحركة سريعة خذ الدفتر وحطه عند باب السيارة .. وفوز انتبهت ع هالحركة .. بس ما علقت .. مع إن احساسها يقولها إن هالدفتر لها ..
علي: بيي يوم بتعرفين ليش أنا سويت جيه ..
فوز: ما أبا أعرف
علي: لا تزعلين مني .. وربي إنج غالية وغلاتج من غلاة ميرة .. ما أبا منج شي غير إنج تعذريني
فوز: أنا نسيت اللي صار .. وحذفت الرسالة وحذفت السالفة بكبرها من عقلي .. وقلت لك أنا ما أفكر فيك .. وإنت ما تهمني ..
طالعها علي .. وحست فوز بالرعب أول ما شافت شكله .. وطالعت الصوب الثاني .. أما علي ف زاد عذابه أكثر أول ما لمح الدموع ف عيون فوز .. وعرف إن كل الكلام اللي تقوله مب صحيح .. بس تكابر أو تبا تسوي نفسها قوية لأنها حاسة بجرح وإهانة كبيرة ..
علي: هاج ..
طالعت فوز ع الشي اللي يعطيها إياه ..
فوز: شو ها ..؟؟
علي: دفترج .. طاح من جنطتج لمن كنتوا ف بيتهم سعيد أول مرة .. شفته واحتفظت فيه ..
فوز: قريته ...؟!!!
علي: فوق 10 مرات .. ولو تبيني أقراه 1000 مرة .. بقراه
فوز: بس ..
علي يقاطعها: أدري .. بتقولين هاي خصوصيات والمفروض ما تفتحه .. بس دامي حصلته .. صار ملكي .. ويحق لي أسوي فيه اللي أبا .. وعقب اللي صار ماله داعي يبقى عندي لأنه مصدر عذاب بالنسبة لي ..
في هاللحظة يات ميرة .. وما قدرت فوز تسأل أو تفهم .. ليش دفترها مصدر عذاب بالنسبة لـ علي .. كانت تحاول تكتشف السبب .. معقولة الكلام المكتوب ف الدفتر هو اللي خلاه يغير رايه أول ما درا إني أنا
العضوة ..؟؟؟ عيل العضوة كانت تكتب أكثر من جيه .. ومع ذلك جان يفكر فيها وقال بيخطبها ..!!!
نهاية الجزء
ترقبوا الجزء الـ 24
